မင်းတို့ပြောနေတဲ့လူက ဒီလိုပုံစံမျိုးလား

ဝူကျိဂူဗိမာန်ကို အမြစ်ပြတ်ချေမှုန်းပစ်ခဲ့သည့် အဓိကတရားခံမှာ အမှန်တကယ်တော့ မိုးပြာနဂါးဧကရာဇ် ဆန်းချန်ဖြစ်ကြောင်း သိရှိလိုက်ရသည့်အခါ မိုးပြာနဂါးချိုင့်ဝှမ်းတစ်ခုလုံး ဆွံ့အသွားကြသည်။

သူတကယ်လုပ်ခဲ့တာလား...

သူဘယ်လိုများလုပ်ခဲ့တာလဲ...

ဧကရာဇ်တစ်ပိုင်းငါးပါးနှင့် အင်မော်တယ်ဘုရင်နှစ်ရာကျော် ရှိနေခဲ့သည်မဟုတ်လား...

မိုးပြာနဂါးဧကရာဇ်က အဆင့်ကိုး နဂါးဘုရင်အဆင့်ပဲ ရှိသေးတာလေ...

သူက ဒီလောက်ကြမ်းတဲ့ တိုက်ခိုက်ရေးစွမ်းရည်ကို ဘယ်ကရခဲ့တာလဲ...

သို့သော်လည်း သူတို့ မည်မျှပင် စဉ်းစား၍မရနိုင်ဖြစ်နေပါစေ ယခုအခါတွင် ဤအရာမှာ မပြောင်းလဲနိုင်သောအချက် ဖြစ်နေလေပြီ။ ဝူကျိဂူဗိမာန်အနေဖြင့် လူတစ်ယောက်ကို မှားယွင်းမှတ်မိနိုင်သော်လည်း လူဆယ့်သုံးယောက်စလုံးကိုတော့ မှားမည်မဟုတ်ချေ။

ပြင်းထန်လှသော ထိတ်လန့်တုန်လှုပ်မှုကြီး ပြီးနောက်တွင်မူ စကားလုံးဖြင့်ဖော်ပြရန်ခက်ခဲသော စိတ်လှုပ်ရှားမှုနှင့် ဂုဏ်ယူဝင့်ကြွားမှု အရိပ်အယောင်များ ထွက်ပေါ်လာတော့သည်။ အားလုံးက လူထုအတွက်တိုက်ပွဲဝင်ပေးတဲ့ သူရဲကောင်းကြီးဟု ခေါ်ဆိုနေကြသည့်ပုဂ္ဂိုလ်မှာ အမှန်တကယ်တော့ ငါတို့ဧကရာဇ် ဖြစ်နေတာလား။

ငါတို့ မိုးပြာနဂါးမျိုးနွယ်စုရဲ့ အကြီးအကဲက တကယ်ပဲ ဒီလောက်ကြီးကျယ်ခမ်းနားပြီး စိတ်ကျေနပ်စရာကောင်းတဲ့ ကိစ္စရပ်ကို လုပ်ဆောင်ခဲ့တာလား။

ဆန်းကျိ၊ ဆန်းချုံးနှင့် ယီခုန်းတို့ကဲ့သို့သော ဧကရာဇ်တစ်ပိုင်း ခုနစ်ပါးမှစ၍ အောက်ခြေရှိ နဂါးဘုရင်များနှင့် နဂါးအရှင်သခင်များအားလုံး ဆွံ့အစွာဖြင့် အစ်ကိုကြီးချန်ထံသို့ အကြည့်များကို ပို့လွှတ်လိုက်ကြတော့သည်။

မျှော်လင့်ထားတဲ့အတိုင်းပါပဲ...

ဧကရာဇ်... တကယ်ကို ကောင်းကောင်းမွန်မွန် လုပ်ဆောင်ခဲ့တာပဲ...

စံပြပုံရိပ်အစစ်အမှန်ပါပဲ...

အစ်ကိုကြီးချန် သူရရှိခဲ့သော တုန်လှုပ်ချောက်ချားမှုတန်ဖိုးများကို တိတ်တဆိတ် စစ်ဆေးကြည့်လိုက်ရာ မဆိုးလှပေ။ သူသည် နောက်ထပ် ကံကြမ္မာအမှတ် ဆယ်သန်းကျော် ထပ်မံရရှိခဲ့သည်။

"ကြည့်ရတာ မင်းတို့အားလုံးလည်း ဒီလူကိုသိကြတဲ့ပုံပဲ"

ချီမုန်နှင့် အခြားအင်မော်တယ်ဘုရင်နှစ်ပါးတို့က မိုးပြာနဂါးမျိုးနွယ်စုဝင်များ၏ အမူအရာများကို အကဲခတ်ကြည့်လိုက်ကြသည်။

"သူ ဘယ်မှာလဲ"

"မြန်မြန်... ငါတို့နဲ့အတူ သူ့ကိုဖမ်းဖို့ ကူညီပေးစမ်း"

ဆန်းကျိက အလျင်အမြန်ပင် ခေါင်းခါယမ်းလိုက်ပြီး ငြင်းဆိုလိုက်သည်။

"မဟုတ်ဘူး... မင်းတို့ပြောတဲ့လူတွေထဲက တစ်ယောက်ကိုမှ ငါတို့မမြင်မိပါဘူး"

ယီခုန်းကလည်း အလျင်အမြန်ပင် ပြောဆိုလိုက်၏။

"မှန်တယ်... ငါတို့တွေ လူသားမျိုးနွယ်အများအပြားကို လက်ခံထားခဲ့တာ မှန်ပေမယ့် မင်းတို့ပြောတဲ့ လူတစ်ဆယ့်သုံးယောက်ထဲက တစ်ယောက်မှမပါဘူး။ သူတို့ကို လုံးဝမမှတ်မိဘူး"

ကျန်သောနဂါးများအားလုံးကလည်း ဝေခွဲမရဖြစ်ဟန်ဖြင့် ခေါင်းများကိုခါယမ်းလိုက်ကြပြီး ဤကိစ္စနှင့်ပတ်သက်မှုမရှိကြောင်း ဖော်ပြလိုက်ကြသည်။

ငါတို့ သူ့ကိုမသိဘူး...

မမြင်ဖူးဘူး၊ မသိဘူး...

သုံးကြိမ်တိုင်တိုင် ငြင်းဆိုခြင်း... သူတို့၏ နှလုံးသားထဲတွင် သဘာဝအတိုင်း အလွန်အမင်း ထိတ်လန့်၊ ဂုဏ်ယူပြီး စိတ်လှုပ်ရှားနေကြသော်လည်း သူတို့က မအကြချေ။ ဤကိစ္စကို လုပ်ဆောင်ခဲ့ပြီးပြီ ဖြစ်သော်လည်း ၎င်းတို့ရှေ့တွင် လုံးဝဝန်မခံသင့်ကြောင်း သိထားကြ၏။

လက်ရှိမိုးပြာနဂါးမျိုးနွယ်စုအနေဖြင့် ဤမျှလောက်များပြားလှသော အင်မော်တယ်ဧကရာဇ်များကို ရင်ဆိုင်နိုင်စွမ်း မရှိသေးချေ။ အင်မော်တယ်မဟာမိတ်အဖွဲ့မှ အင်မော်တယ်ဘုရင်နှစ်ပါးက အေးစက်စွာ လှောင်ပြုံးလိုက်ကြသည်။

"မင်းတို့ တကယ်ပဲ ဖုံးကွယ်ထားနိုင်မယ်လို့ ထင်နေတာလား"

"ခုနတင် မင်းတို့ရဲ့တုံ့ပြန်မှုတွေကို ကြည့်ရုံနဲ့တင် မင်းတို့တွေ အဲ့လူစုနဲ့ အလွန်ရင်းနှီးနေမှန်း ထင်ရှားနေတာပဲ"

ချီမုန်၏ လေသံမှာ စူးရှပြတ်သားသွား၏။

"မင်းတို့ သိသည်ဖြစ်စေ၊ မသိသည်ဖြစ်စေ... ငါတို့ ရှာဖွေကြည့်လိုက်ရင် သိရမှာပဲ"

"မင်းတို့ ရှာချင်တိုင်းရှာလို့ရမယ် ထင်နေတာလား"

"မင်းတို့တွေက မိစ္ဆာနန်းတော်တစ်သောင်းရဲ့အမိန့်ကို ဖီဆန်ချင်နေတာလား"

အဟမ်း...

နှစ်ဖက်စလုံး စတင်ငြင်းခုံနေကြသည်ကို မြင်လိုက်ရသည့်အခါတွင်မူ၊ အစ်ကိုကြီးချန်အနေဖြင့် သူ၏ တည်ရှိမှုကို ထုတ်ဖော်ပြသရန် ဖြစ်လာတော့သည်။

"မင်းတို့ပြောနေတဲ့လူက ဒီလိုပုံစံမျိုးလား"

ငြင်းခုံနေကြသော နဂါးများအားလုံး တစ်ပြိုင်နက်တည်း လှည့်ကြည့်လိုက်ကြပြီး ထိုမြင်ကွင်းကြောင့် နေရာမှာတင် သွေးအန်လုနီးပါး ဖြစ်သွားကြ၏။

သူတို့သည် မိုးပြာနဂါးဧကရာဇ်က မည်သည့်အရာကိုမျှဂရုမစိုက်ဘဲ လူသားပုံစံသို့ ပြန်ပြောင်းလိုက်သည်ကို မြင်တွေ့လိုက်ရသည်။ သူ့ပုံစံမှာ ခဏက မြင်တွေ့ခဲ့ရသည့်ပုံရိပ်နှင့် လုံးဝထပ်တူကျနေခဲ့၏။ အစ်ကိုကြီးချန်က သူ၏နဖူးပေါ်မှ ဆံပင်တစ်စုကို ပေါ့ပေါ့ပါးပါး ဖယ်ရှားလိုက်သည်ကို မြင်လိုက်ရသည့်အခါ မိုးပြာနဂါးအိုကြီးများမှာ နေရာမှာတင် လဲကျလုနီးပါး ဖြစ်သွားရသည်။

ဘိုးဘေးလေးရာ... ဘာတွေလုပ်ဖို့ ကြိုးစားနေတာလဲ...

ငါတို့တွေ အသည်းအသန်ဖုံးကွယ်ပေးပြီး ဝန်မခံရတဲ့အကြောင်းအရင်းက ဒီပြဿနာကို ပြီးဆုံးသွားစေချင်လို့လေ...

အင်မော်တယ်ဧကရာဇ်တွေဆိုတာ ရင်ဆိုင်ဖို့ အဲဒီလောက်မလွယ်ကူဘူး...

မိုးပြာနဂါးချိုင့်ဝှမ်းက ကြီးမားကျယ်ပြန့်လှတာမို့ သူတို့တွေ တကယ်လိုက်ရှာရင်တောင် ငါတို့က လူတစ်ဆယ့်နှစ်ယောက်ကို ဖုံးကွယ်ထားလို့ရတယ်...

အဲ့အချိန်ကျရင် ငါတို့က မသိခဲ့သလိုမျိုး ဟန်ဆောင်ပြီး နှုတ်ပိတ်နေလို့ရတယ်...

အခြားတစ်ဖက်က ဘယ်လိုပဲ ရန်စငြင်းခုံနေပါစေ လက်ပူးလက်ကျပ်မမိသရွေ့တော့ ပြဿနာကြီးကြီးမားမား ဖြစ်မှာမဟုတ်ဘူး...

ဒါပေမယ့် အခု ကြည့်စမ်းပါဦး...

ထိုလူတစ်ဆယ့်နှစ်ယောက်က ပေါ်မလာသေးဘူး... ကိုယ့်ကိုယ်ကိုယ် ထုတ်ဖော်ပြသလိုက်ပြီ...

ငါတို့ ဘယ်လိုမျိုး ဆက်ပြီးဖုံးကွယ်ပေးရတော့မှာလဲ...

တစ်ဖက်ရှိ ချီလင်မျိုးနွယ်စုဝင်များနှင့် အင်မော်တယ်ဘုရင်နှစ်ပါးတို့သည်လည်း ဆွံ့အမှင်တက်သွားကြရသည်။ သူတို့ ချက်ချင်းတုံ့ပြန်နိုင်စွမ်း မရှိခဲ့ကြချေ။

ဘာ... ဘာကြီးလဲ...

ဒီမိုးပြာနဂါးဧကရာဇ်က အဓိကတရားခံဟုတ်လား...

သူတို့က အဓိကပစ်မှတ်ဖြစ်တဲ့သူနဲ့ စေ့စပ်ညှိနှိုင်းနေခဲ့ကြတာလား...

"မင်း... မင်း မင်း မင်း..."

"တကယ်ပဲ မင်းလား..."

အစ်ကိုကြီးချန် လူတိုင်း၏တုံ့ပြန်မှုအပေါ် အလွန်စိတ်ကျေနပ်သွားသည်။

ဒါမှ ငါ့ပုံစံပေါ့...

သူသည် ကိစ္စကြီးတစ်ခုကို လုပ်ဆောင်ပြီးနောက် မိမိ၏စွမ်းဆောင်ရည်များကို ဖုံးကွယ်ထားတတ်သည့် လူစားမျိုးမဟုတ်ချေ။ သူသည် ကမ္ဘာကြီးတစ်ခုလုံးကိုကြေညာပြီး သူ့အမည်ကို နေရာတိုင်းတွင် ချီးမွမ်းကြသည်ကိုသာ မြင်တွေ့လိုသူဖြစ်သည်။

ဒါက သူ့အောင်မြင်မှုပဲဥစ္စာ၊ ဘာလို့ဖုံးကွယ်ထားရမှာလဲ...

အချိန်တွေ ကြာလာလို့၊ အခြားသော အရှက်မရှိတဲ့ မကောင်းတဲ့ ရည်ရွယ်ချက်ရှိသူအချို့က ဒီဂုဏ်ပုဒ်ကို လုယူဖို့ကြိုးစားလာရင် ဘယ်လိုလုပ်မလဲ...

မိမိကိုယ်မိမိ နှိမ့်ချပြီး တိတ်တဆိတ်သည်းခံနေခြင်းက သူ့အတွက်တော့ လုံးဝမလိုအပ်သော အရာတစ်ခုပင်။ အာရုံစိုက်ခံရမှုအားလုံးက သူ့ထံတွင်သာရှိနေသရွေ့ ၎င်းက ကောင်းသောအရာဖြစ်စေ၊ မကောင်းသောအရာဖြစ်စေ သူက အရင်ဆုံးရယူထားမည်ဖြစ်သည်။

"မှန်တယ်... မှန်တယ်... အစကတော့ လူထုအတွက်တိုက်ပွဲဝင်ပေးပြီးနောက် ငါ့နာမည်ကို ချန်ထားရစ်ဖို့ မရည်ရွယ်ခဲ့ပါဘူး"

ဂိုဏ်းချုပ်ကျန်းက ပြုံးလျက်ပြောလိုက်သည်။

"ဒါပေမယ့် မင်းတို့အားလုံးက ငါ့တံခါးဝအထိ ရောက်လာကြပြီဆိုတော့၊ ငါ့အနေနဲ့ မင်းတို့တွေကို လက်ဗလာနဲ့ ပြန်မလွှတ်နိုင်တော့ဘူးပေါ့..."

"ကောင်းတယ်... အလွန်ကောင်းတယ်"

အင်မော်တယ်မဟာမိတ်အဖွဲ့မှ အင်မော်တယ်ဘုရင်နှစ်ပါး နောက်ဆုံးတွင် ထိတ်လန့်မှုများမှ ပြန်လည်သက်သာလာသည်။ တစ်ဦးပြီးတစ်ဦး အင်မော်တယ်လက်နက်များနှင့် အင်မော်တယ်ရတနာများကို ထုတ်ယူလိုက်ကြပြီး တိုက်ပွဲအတွက် ပြင်ဆင်လိုက်ကြ၏။

"ဒါဆိုရင် မင်းတို့ မိုးပြာနဂါးမျိုးနွယ်စုရဲ့ နဂါးဧကရာဇ်က ဝူကျိဂူဗိမာန်ကို ဖျက်ဆီးပစ်ခဲ့တဲ့ နောက်ကွယ်ကလက်မည်းကြီးပေါ့။ ဒါဆိုရင် မင်းတို့ရဲ့နဂါးမျိုးနွယ်စုတစ်ခုလုံးက ကန့်လန့်ကာနောက်ကွယ်ကအင်အားစုဖြစ်ရမယ်"

"အင်မော်တယ်လောကနဲ့ မိစ္ဆာလောကကြားက စစ်ပွဲရဲ့ အတိုင်းအတာကို သဘောအလျောက် ချဲ့ထွင်ဝံ့တာကတော့ တကယ့်ကိုသတ္တိရှိလှတာပဲ"

"ဆန်းကျိ... မင်း ဘာလို့ အမှန်အတိုင်း အကုန်မဖွင့်ပြောသေးတာလဲ"

"ဒါက အထင်လွဲတာပါ... အထင်လွဲတာပါ..."

မိုးပြာနဂါးအိုကြီး ပျာယာခတ်သွားသည်။ ဤကြီးမားလှသော စွပ်စွဲချက်ကြီးကိုသာ သူတို့အပေါ်ပုံချလိုက်မည်ဆိုပါက နဂါးမျိုးနွယ်စုတစ်ခုလုံး ကြီးမားသောဒုက္ခနှင့် ရင်ဆိုင်ရပေလိမ့်မည်။

"အခုထိ အထင်လွဲနေတုန်းပဲလား"

ချီမုန်က အေးစက်စွာ လှောင်ပြုံးလိုက်၏။

"ဆန်းကျိ... အခုအချိန်မှာ အကြောင်းပြချက်တွေပေးဖို့ ကြိုးစားနေတာက နောက်ကျသွားပြီ"

ဆန်းကျိ သူ၏ဦးနှောက်ကို အစွမ်းကုန်အသုံးပြုပြီး အလျင်အမြန်ကာကွယ်ပြောဆိုလိုက်ရတော့သည်။

"ငါတို့ရဲ့ ဧကရာဇ်က ဆော့ကစားရတာကို သဘောကျတတ်လို့ပါ... သူက အဲ့ဒီလူရဲ့ပုံစံအတိုင်း တမင်တကာပြောင်းပြလိုက်တာပါ၊ သူက အစစ်အမှန်မဟုတ်..."

ချီလင်မျိုးနွယ်စုနှင့် အင်မော်တယ်ဘုရင်နှစ်ပါးတို့ ပြန်လည်မချေပရသေးမီမှာပင် အစ်ကိုကြီးချန်က ပထမဆုံးအကြိမ်အဖြစ် မကျေမနပ်ဖြစ်ဟန် ထုတ်ဖော်ပြသလိုက်သည်။

"ဟေး... ဟေး... အဖိုးကြီးဆန်းကျိ၊ ဘာတွေလျှောက်ပြောနေတာလဲ"

"ဒါကို ငါကိုယ်တိုင်လုပ်ခဲ့တာ ဟုတ်ပြီလား။ မင်းက အဲ့ဒီနေရာမှာမရှိခဲ့ဘဲနဲ့ ဘာလို့ ဝင်ပြီးပြောဆိုနေရတာလဲ"

ဤမိုးပြာနဂါးအိုကြီးက အမှန်တကယ်ပင် သူ၏မြင့်မြတ်လှသော စွမ်းဆောင်ရည်များကို ဖျောက်ဖျက်ပစ်ချင်နေတာလား...

ဒီလိုမျိုး အားကိုးလို့မရတဲ့အသင်းဖော် ရှိသေးတာလား...

သူ မကျေမနပ်ဖြစ်သွားပြီးနောက် သူကိုယ်တိုင်လုပ်ဆောင်ခဲ့ကြောင်း သက်သေပြရန်အတွက် ဂုဏ်ယူဝင့်ကြွားစွာဖြင့် ကြွားဝါပြောဆိုလိုက်တော့သည်။

"ငါက အဲဒီတုန်းက တကယ့်ကို ပြတ်ပြတ်သားသား သတ်ဖြတ်ခဲ့တာ... ခုနစ်ကြိမ်တိုင်တိုင် အဝင်အထွက်ပြုလုပ်ပြီး သတ်ဖြတ်ခဲ့လို့၊ သွေးတွေက မြစ်တစ်စင်းလို စီးဆင်းသွားခဲ့တာ မင်းတို့သိရဲ့လား"

"စစ်နတ်ဘုရားပူးကပ်နေသလိုမျိုး ခံစားချက်ကို ကြားဖူးကြလား"

"ဪ... ဒါနဲ့၊ ဖေးရှန်ဂိုဏ်းမှာသုံးနေကြတဲ့ အင်မော်တယ်လက်နက်တွေအားလုံးက ငါအဲ့ဒီတိုက်ပွဲကနေ ရရှိခဲ့တဲ့ပစ္စည်းတွေပဲ"

"မင်းတို့ မယုံရင် သွားကြည့်လို့ရတယ်။ ကျိလင်းဟန်သုံးနေတဲ့ဓားက အဆင့်ကိုး အင်မော်တယ်ဓားတောင် ဖြစ်နေသေးတယ်"

"အဆင့်ကိုး အင်မော်တယ်ဓားတိုင်းက စကြဝဠာမှာ တစ်လက်တည်းပဲရှိရမယ်... ဟုတ်တယ်မလား"

ဆန်းကျိ၊ ဆန်းချုံး၊ ယီခုန်းနှင့် အခြားသော အဆင့်မြင့် အကြီးအကဲများအားလုံး လုံးဝမျှော်လင့်ချက်မဲ့သွားကြတော့သည်။

အားကိုးလို့မရဘူး...

တကယ်ကို အားကိုးလို့မရတော့ဘူး...

ဤကိစ္စကို ဆက်လက်၍ အကြောင်းပြချက်ပေးရန် နည်းလမ်းမရှိတော့ချေ။ သူတို့တင်မကဘဲ အရာအားလုံးကို ကြုံတွေ့ဖူးခဲ့သည့် မိုးပြာနဂါးဧကရီကိုယ်တိုင်ပင်လျှင် သူ၏လုပ်ဆောင်မှုများကြောင့် ဝေခွဲမရဖြစ်သွား၏။

"မောင်လေး... မင်း တကယ်ပဲ ဘာတွေလုပ်ဖို့ ကြိုးစားနေတာလဲ"

သူမသည်လည်း ၎င်းတို့ရှေ့တွင် ဝန်ခံလိုက်ခြင်းက သေချာပေါက် ပညာရှိရာမကျကြောင်း သိထားသည်။ အစ်ကိုကြီးချန်က သူ၏လက်များကိုဖြန့်ပြလိုက်ပြီး အပြစ်ကင်းစင်သောအမူအရာမျိုး လုပ်လိုက်၏။

"ငါက လူသားတစ်ယောက်အနေနဲ့ ရိုးသားသင့်တယ်လို့ ခံစားရလို့ပါ"

"ငါသာ ရှေ့ကိုထွက်မလာခဲ့ရင် အခြားသော အပြစ်မဲ့တဲ့လူတွေ အထင်လွဲခံရပြီး ဒီကိစ္စထဲဆွဲသွင်းခံရရင် ဘယ်လိုလုပ်မလဲ"

ဧကရီသည် အချိန်အတော်ကြာအောင် ဆွံ့အသွားခဲ့ပြီး နောက်ဆုံးတွင်မူ ခနဲ့တဲ့တဲ့စကားတစ်ခွန်းသာ ပြောဆိုနိုင်တော့သည်။

"မင်းကတော့ တကယ်ကို ကြီးကျယ်ခမ်းနားလှပါတယ်..."

တစ်ဖက်ရှိ ချီလင်မျိုးနွယ်စုဝင်များနှင့် အင်မော်တယ်ဘုရင်နှစ်ပါးတို့သည်လည်း အံ့အားသင့်သွားကြပြီး ဤနေရာတွင် မည်သို့သောပြဇာတ်မျိုး ကပြနေသည်ကို နားမလည်နိုင်ဖြစ်နေကြသည်။ သူ့ပုံစံက ဤစွပ်စွဲချက်ကြီးက သူ့အပေါ်ပုံမကျလာမှာကို အလွန်စိုးရိမ်နေသည့်အလားပင်။ ချီမုန် အသက်ကို ပြင်းထန်စွာရှူသွင်းလိုက်ပြီး သူ့အမူအရာမှာ လုံးဝခက်ထန်သွားသည်။

"ဆန်းကျိ... အခုအချိန်မှာ မင်းဘာများထပ်ပြီး ပြောစရာရှိသေးလဲ"

မိုးပြာနဂါးအိုကြီး ခေါင်းကိုခါယမ်းလိုက်ပြီး သက်ပြင်းအရှည်ကြီးချလိုက်ကာ သူ၏ နဂါးခေါင်းကို နောက်တစ်ကြိမ် မော့လိုက်တော့သည်။

"ဘာမှပြောစရာမရှိတော့ဘူး"

သူ၏ ဝေဝါးနေသော နဂါးမျက်ဝန်းများမှာ တဖြည်းဖြည်းနှင့် တည်ကြည်ပြတ်သားလာ၏။

"အခုကစပြီး... ငါတို့ မိုးပြာနဂါးချိုင့်ဝှမ်းက ဒီကိစ္စကိုတာဝန်ယူတယ်"

"မင်းတို့မှာ ဘယ်လိုအကွက်တွေပဲရှိရှိ... ထုတ်သုံးလိုက်ကြစမ်း"

"ငါတို့ မိုးပြာနဂါးချိုင့်ဝှမ်းတစ်ခုလုံးက ဧကရာဇ်နဲ့အတူ သေအတူရှင်မကွာ ရင်ဆိုင်သွားမယ်"

အစ်ကိုကြီးချန် သူတို့ရှေ့တွင်ရပ်နေပြီး လုံးဝမျှော်လင့်ချက်မဲ့စွာဖြင့် ကြည့်လိုက်မိတော့သည်။

"မင်းတို့က ဘာကို တာဝန်ယူမှာလဲ။ မင်းက ဧကရာဇ်လား... ငါက ဧကရာဇ်လား..."