အခန်း (၅၄၅-၅၄၆)
Vol. 39 Ch. 545-546
အခန်း ( ၅၄၅ ) - သတ်ဖြတ်လိုသောစိတ်၊ စစ်မှန်သည့် ဝက်ဝံအစီအရင်နှင့် မြှားကဲ့သို့ စောင့်ဆိုင်းခြင်း
ချူးဧကရာဇ်နှင့် ချီဖျန့်နတ်ဆိုးဧကရာဇ်တို့၏ စကားပြောဆိုမှုကို ကြားလိုက်ရချိန်တွင် ရှာနာနတ်ဆိုးဧကရာဇ်၏ စိတ်နှလုံးသည် အလွန်တရာ စိုးရိမ်ပူပန်သွားခဲ့ရ၏။ သူသည် ချူးဧကရာဇ်၏ ထောင်ချောက်ထဲသို့ ကျရောက်သွားပြီ ဖြစ်သော်ငြား သူ အလေးအနက် စိုးရိမ်နေသည်မှာ ကုချန်ကို ဤပြဿနာထဲသို့ မဆွဲထည့်မိစေရန်သာ ဖြစ်သည်။
ချူးဧကရာဇ်၊ ချီဖျန့်နတ်ဆိုးဧကရာဇ်နှင့် နတ်ဆိုးဧကရာဇ်အဆင့် အစီအရင်တို့ကြောင့် သူသည် လုံးဝ ခုခံနိုင်စွမ်း မရှိတော့ချေ။ အကယ်၍ သူ့ကြောင့်သာ သူ၏သခင် ကုချန်ကို အန္တရာယ်ဖြစ်စေခဲ့ပါက သူ တကယ်ပင် အပြစ်ကြီးစွာ ခံစားရပေလိမ့်မည်။
" သူ လုံးဝ မလာရဘူး... လုံးဝ မလာရဘူး..... "
ရှာနာနတ်ဆိုးဧကရာဇ်သည် အပြင်ပန်းတွင် တည်ငြိမ်နေသော်လည်း စိတ်ထဲတွင်မူ စိုးရိမ်ပူပန်မှုတို့ဖြင့် မီးလောင်နေတော့သည်။ သူသည် ကုချန်နှင့် ဝိညာဉ်အဆက်အသွယ် ပုံမှန် မလုပ်နိုင်တော့သဖြင့် ဤနေရာတွင် ဖြစ်ပျက်နေသည်ကို အသိပေးရန် မဖြစ်နိုင်ချေ။ သို့သော် သူတို့နှစ်ဦးသည် တစ်ဦးနှင့်တစ်ဦး တည်ရှိနေမှုကို အာရုံခံနိုင်သဖြင့် ကုချန်သည် သူရှိရာသို့ ဦးတည်လာနေကြောင်း သူ သိရှိနေသည်။
အစီအရင်၏ အပြင်ဘက်ရှိ ချူးဧကရာဇ်သည် ရှာနာနတ်ဆိုးဧကရာဇ်၏ အတွေးများကို ခန့်မှန်းမိသွားပုံရကာ ချီဖျန့်နတ်ဆိုးဧကရာဇ်အား ပြောဆိုလိုက်၏။
" တာအိုရောင်းရင်း... အလျင်စလို မလုပ်နဲ့ဦး... ရှာနာ ဒီကွေ့ရွှီးနယ်မြေထဲ ဝင်လာကတည်းက တခြားနေရာတွေကို လှည့်လည်တာ မဟုတ်ဘဲ တစ်နေရာတည်းကိုပဲ ဦးတည်သွားနေတာ... ဒါက တစ်ယောက်ယောက်နဲ့ ချိန်းထားလို့ပဲ ဖြစ်ရမယ်... ငါတို့ မျှော်လင့်ထားတဲ့အတိုင်းဆိုရင် အဲဒီလျှို့ဝှက်ဆန်းကြယ်တဲ့ နတ်ဆိုးဧကရာဇ်ပဲ ဖြစ်လိမ့်မယ်.....
ငါတို့ စိတ်ရှည်ရှည်နဲ့ စောင့်နေမယ်ဆိုရင် သူကပဲ အမဲလိုက်ခံရဖို့ အလိုလို ရောက်လာလိမ့်မယ်... အဲဒီအခါကျရင် သူတို့နှစ်ယောက်လုံးကို တစ်ခါတည်း ရှင်းပစ်ပြီး သူတို့ဆီမှာ ရှိတဲ့ ရတနာတွေကို ၅၀-၅၀ ခွဲယူကြမယ်လေ... ဘယ်လိုလဲ "
ချူးဧကရာဇ်၏ အကြံပြုချက်ကို ကြားသောအခါ ချီဖျန့်နတ်ဆိုးဧကရာဇ်မှာ စဉ်းစားဟန် ဖြစ်သွား၏။ သူနှင့် ရှာနာနတ်ဆိုးဧကရာဇ်ကြားတွင် အကြီးအကျယ် ရန်ငြိုးမရှိသော်လည်း ချူးဧကရာဇ်ပေးမည့် အကျိုးအမြတ်က မက်မောစရာ ဖြစ်နေသည်။ ထို့ကြောင့် သူသည်လည်း ရက်စက်သော အကြည့်ဖြင့် ခေါင်းညိတ်လိုက်လေသည်။
" သဘောတူတယ်... ဒါပေမဲ့ အဲဒီနတ်ဆိုးဧကရာဇ်ရဲ့ အသားနဲ့ ရုပ်ခန္ဓာကိုတော့ ငါ သီးသန့် ယူမယ်... ငါက အရုပ်ဖန်တီးဖို့အတွက် နတ်ဆိုးဧကရာဇ်အဆင့် ပစ္စည်းတစ်ခု လိုနေတာ... သူ့ကိုပဲ သုံးမယ်... ကျန်တဲ့ ရတနာတွေကိုတော့ ခွဲယူကြတာပေါ့ "
" ရတာပေါ့... ဘာမှမဖြစ်ဘူး "
ချူးဧကရာဇ်မှ ချက်ချင်း သဘောတူလိုက်လေသည်။ သူ၏အဓိကရည်ရွယ်ချက်မှာ အတိတ်က နာကြည်းချက်အတွက် ရှာနာနတ်ဆိုးဧကရာဇ်ကို လက်စားချေရန်သာ ဖြစ်သည်။ ထိုနာကြည်းချက်သည် သူ၏စိတ်နှလုံးထဲတွင် အကြီးမားဆုံး အရိပ်မည်းတစ်ခု ဖြစ်နေခဲ့သည် မဟုတ်ပါလော။
" အရင်ဆုံး သူ့ကို ဒီမှာပဲ ချုပ်ထားလိုက်မယ်... အဲ့ဒီလူ ရောက်လာတဲ့အခါမှပဲ ရှင်းပစ်တော့မယ် "
ချူးဧကရာဇ်သည် သရော်လိုက်၍ လက်ကို ဝှေ့ယမ်းလိုက်ရာ နတ်ဆိုးဧကရာဇ်အဆင့် အစီအရင်အတွင်းရှိ မြင်ကွင်းအားလုံးမှာ ဝေဝါးဝါး အရောင်များဖြင့် ဖုံးလွှမ်းသွားလေသည်။ အပြင်ဘက်မှ ကြည့်ပါက အစီအရင်ထဲတွင် မည်သူမျှ ရှိမနေသကဲ့သို့ ပုံမှန်အတိုင်းသာ မြင်ရတော့မည်ဖြစ်သည်။
ဤအခြေအနေကို မြင်သောအခါ ရှာနာနတ်ဆိုးဧကရာဇ်သည် ၎င်းမှာ ကုချန်အား ထောင်ချောက်ဆင်ရန် ကြံစည်နေကြောင်း သိလိုက်ရသည်။ သူသည် သူ၏လက်နှစ်ဖက်ကို စုစည်းကာ အဆုံးမဲ့ မဟာတာအိုဥပဒေများကို ထုတ်လွှတ်ပြီး ရှေးဟောင်းကြေးမုံများအဖြစ် ပြောင်းလဲကာ အပြင်သို့ ပစ်လွှတ်လိုက်၏။ သူ့အနေဖြင့် အစီအရင်ကို မဖျက်ဆီးနိုင်သော်လည်း ကုချန်ရောက်လာပါက ထောင်ချောက်ဖြစ်ကြောင်း သိသာစေရန် အချက်ပြလိုခြင်းသာ ဖြစ်သည်။
သို့သော် အစီအရင်အတွင်းမှ မဲမှောင်နေသော မြူခိုးများသည် စုစည်းလာကာ ဧရာမ ပုံရိပ်ကြီးတစ်ခုအဖြစ် ပြောင်းလဲသွားလေသည်။ ၎င်းမှာ ဒဏ္ဍာရီလာ ဝက်ဝံသားရဲကြီးပင် ဖြစ်၏။
" ဝုန်း! "
ထိုဝက်ဝံ သားရဲကြီးသည် ရက်စက်စွာ ဟိန်းဟောက်လျက် ရှာနာနတ်ဆိုးဧကရာဇ်ကို တိုက်ခိုက်လေသည်။ ရှာနာနတ်ဆိုးဧကရာဇ်မှာ သူ့ကိုယ်သူ ကာကွယ်ရန်ပင် မနည်းကြိုးစားနေရတော့ရာ အစီအရင်ကို ဖျက်ဆီးရန် မည်သို့မျှ မဖြစ်နိုင်တော့ချေ။
အစီအရင်အပြင်ဘက်ရှိ ချူးဧကရာဇ်မှာ ကျေနပ်စွာ ရယ်မောလျက် စောင့်ဆိုင်းနေလေသည်။
" ငါ့ရဲ့ ဝက်ဝံအစီအရင်က ဒီလောက်နဲ့တော့ လွယ်လွယ်နဲ့ ပျက်စီးမှာ မဟုတ်ဘူး "
သူသည် ကုချန်ကို လှည့်စားရန်အတွက် အစီအရင်၏ စွမ်းအားအပြည့်ကို မသုံးဘဲ ရှာနာနတ်ဆိုးဧကရာဇ်ကို ချုပ်တည်းထားရုံမျှသာ လုပ်ထားကာ သားကောင် အလိုလို ရောက်လာမည့်အချိန်ကိုသာ စောင့်ဆိုင်းနေခြင်း ဖြစ်သည်။
ဝက်ဝံသားရဲကြီး၏ ဖိအားပေးမှုကြောင့် ရှာနာနတ်ဆိုးဧကရာဇ်၏ အခြေအနေမှာ ပို၍ ဆိုးရွားလာပြီး ကုချန်နှင့် ဆက်သွယ်ရန်ပင် ပိုမို ခက်ခဲလာတော့သည်။ သူသည် ကုချန် ထောင်ချောက်ထဲသို့ မကျရောက်စေရန်သာ ဆုတောင်းနေရတော့သည်။
...
ထောင်ပေါင်းများစွာသော မိုင်များအကွာတွင်.....
ကုချန်သည် ရုတ်တရက် ရပ်တန့်လိုက်လေသည်။ သူ၏မျက်ဝန်းများတွင် သံသယများဖြင့် ပြည့်နှက်နေလေသည်။ သူ၏ဝိညာဉ်အာရုံထဲတွင် ရှာနာနတ်ဆိုးဧကရာဇ်သည် ရုတ်တရက် ရပ်တန့်သွားကာ မလှုပ်မယှက် ဖြစ်နေ၏။
ထို့အပြင် သူနှင့် သူ၏ဆက်သွယ်မှုမှာလည်း အလွန်တရာ အားနည်းသွားခဲ့ပြီ ဖြစ်သည်။
အခန်း ( ၅၄၆ ) - ဆက်သွယ်မိခြင်း၊ ချက်ချင်းသတိပေးခြင်း၊ ကယ်ဆယ်ရန် မလိုပါ
ဘာတွေဖြစ်နေတာလဲ?
ကုချန်၏မျက်ခုံးများမှာ အနည်းငယ် တွန့်ချိုးသွားရ၏။ သူနှင့် ရှာနာနတ်ဆိုးဧကရာဇ်တို့အကြား အကွာအဝေးမှာ ပိုမိုနီးကပ်လာသဖြင့် ပုံမှန်အရဆိုလျှင် သူတို့၏ ဝိညာဉ်အဆက်အသွယ်မှာလည်း ပိုမိုအားကောင်းလာရမည်ပင်။ သို့သော် ယခုအခါ ဆက်သွယ်မှုမှာ အားကောင်းလာမည့်အစား ခံစားမိရန်ပင် ခက်ခဲသည့် အတိုင်းအတာအထိ အားနည်းသွားခဲ့လေသည်။
ရှာနာနတ်ဆိုးဧကရာဇ် တစ်ခုခုနှင့် ကြုံတွေ့နေရပြီလော။
ကုချန်သည် ခဏမျှ တွေးတောလိုက်မိ၏။ သူသည် ယခုအခါ ကုချန်အပေါ် အပြည့်အဝ သစ္စာရှိသူတစ်ဦးဖြစ်သည်။ မည်သည့်အခြေအနေမျိုးနှင့် ကြုံတွေ့ပါစေ အဖိုးတန်သော အခွင့်အရေးတစ်ခုခု ရှိနေပါကပင် သူသည် ကုချန်၏အမိန့်ကို ဦးစားပေးကာ ကုချန်နှင့် အမြန်ဆုံး ဆုံတွေ့ရန် ကြိုးစားသူဖြစ်သည်။ သို့သော် ယခုအခါ သူသည် အကြောင်းမဲ့ ရပ်တန့်နေသလို အဆက်အသွယ်မှာလည်း တဖြည်းဖြည်း မှိန်ဖျော့သွားလေသည်။
သူသည် အန္တရာယ်တစ်ခုခုထဲသို့ မသိလိုက်ပါဘဲ ဆွဲခေါ်ခံလိုက်ရခြင်း ဖြစ်နိုင်ချေ ရှိသည်။
ကုချန်သည် သူ၏အရှိန်ကို မြှင့်တင်လိုက်၏။ ရှာနာနတ်ဆိုးဧကရာဇ်မှာ သူ၏လက်အောက်ရှိ ပထမဆုံး နတ်ဆိုးဧကရာဇ်အဆင့် တိုက်ခိုက်ရေးစွမ်းအားဖြစ်ရာ သူ့အား အဆင်သင့် အသုံးချရမည့်အချိန်တွင် မည်သည့် မတော်တဆမှုမှ မဖြစ်စေချင်ပေ။
အကွာအဝေး ပိုနီးကပ်လာသည့်အခါ သူတို့၏ ဝိညာဉ်ဆက်သွယ်မှုမှာ ပြန်လည် ကြည်လင်လာခဲ့၏။
" သခင်...! သခင်...! "
ကုချန်၏စိတ်ထဲတွင် ရှာနာနတ်ဆိုးဧကရာဇ်၏ အလွန်တရာ စိုးရိမ်တကြီး ဖြစ်နေသော အသံကို ကြားလိုက်ရသည်။
ယခင်က သူသည် ကုချန်နှင့် ဆက်သွယ်ရန် မည်မျှပင် ကြိုးစားကြိုးစား မအောင်မြင်ခဲ့သော်ငြား ယခုအခါတွင်မူ အဆက်အသွယ် ပြန်လည်ရရှိသွားခဲ့ပြီ ဖြစ်သည်။ ချူးဧကရာဇ်သည် သူ၏ အစီအရင်ဖြင့် ပြင်ပကမ္ဘာနှင့် အဆက်အသွယ်ကို ပိတ်ဆို့ထားသော်လည်း ကုချန်နှင့် ရှာနာနတ်ဆိုးဧကရာဇ်တို့၏ နက်ရှိုင်းလှသော "သခင်-ကျွန်" ဝိညာဉ်ဆက်သွယ်မှုကိုမူ မည်သည့်အစီအရင်ကမျှ တားဆီးနိုင်မည် မဟုတ်ချေ။
" မင်း အန္တရာယ်နဲ့ ကြုံနေရတာလား? "
ကုချန်၏အသံမှာ တည်ငြိမ်နေ၏။ သူ၏အသံကြောင့် ရှာနာနတ်ဆိုးဧကရာဇ်၏ စိုးရိမ်နေသော စိတ်အခြေအနေမှာ အနည်းငယ် ပြန်လည် ငြိမ်သက်သွားခဲ့သည်။
" သခင်! အကြောင်းစုံက ရှည်ပါတယ်... သခင် လုံးဝ မလာပါနဲ့! "
အဆက်အသွယ် ပြန်ရသည်နှင့် ရှာနာနတ်ဆိုးဧကရာဇ်သည် ကုချန်အား ချက်ချင်း သတိပေးလိုက်၏။ သူသည် သူ၏အသက်ကို စတေးရမည်ကိုပင် မမှုပါ။ သို့သော် ကုချန်ကိုမူ အန္တရာယ်ထဲသို့ ဆွဲမသွင်းလိုပေ။
" ဘာဖြစ်တာလဲ ပြောပြပါ "
ရှာနာနတ်ဆိုးဧကရာဇ်သည် ချူးဧကရာဇ်မှ နတ်ဆိုးဧကရာဇ်အဆင့် အစီအရင်ဖြင့် သူ့အား ထောင်ချောက်ဆင်ထားကြောင်း အကုန်အစင် ဖွင့်ဟပြောပြလိုက်၏။ ချူးဧကရာဇ်တွင် ချီဖျန့်နတ်ဆိုးဧကရာဇ်ဆိုသည့် အကူအညီလည်း ရှိနေသေးသည်။
အစီအရင်တစ်ခု၏ စွမ်းအားမှာ များပြားလှပေသည်။ ယခု သူသည် နတ်ဆိုးဧကရာဇ်အဆင့် အစီအရင်တစ်ခု၏ အတွင်းပိုင်းတွင် ချူးဧကရာဇ်နှင့် ချီဖျန့်နတ်ဆိုးဧကရာဇ်တို့၏ အန္တရာယ်ပေးခြင်းကို ခံနေရ၏။ ဤအခြေအနေတွင် ကုချန်ကိုယ်တိုင် ရောက်လာပါကလည်း အလွယ်တကူ ကယ်တင်နိုင်မည် မဟုတ်သလို သူပါ အန္တရာယ်ဖြစ်သွားနိုင်သည်ဟု သူ ယုံကြည်ထားသည်။
" သခင်... ကျွန်မအတွက် စိတ်မပူပါနဲ့... တကယ်လို့ ကျွန်မ ဒီကွေ့ရွှီးနယ်မြေထဲကနေ မထွက်နိုင်တော့ရင်တောင် သခင့်ရဲ့ကျွန်အဖြစ် သေဆုံးရတာ ဂုဏ်ယူပါတယ် "
ရှာနာနတ်ဆိုးဧကရာဇ်သည် အဆုံးသတ်တွင် သူ၏စိတ်သန္နိဋ္ဌာန်ကို ပြောပြလိုက်လေသည်။ သူသည် ကုချန်အား လက်စားချေပေးရန်ပင် မမျှော်လင့်ရဲပေ။
" ငါ သိပြီ "
ကုချန်၏အသံမှာ အေးဆေးတည်ငြိမ်နေဆဲပင်။
သူ၏သခင်မှာ အလွန်တရာ အေးဆေးတည်ငြိမ်နေသည်ကို ကြားလိုက်ရချိန်တွင် ရှာနာနတ်ဆိုးဧကရာဇ်၏ စိုးရိမ်စိတ်များ ပျောက်ကွယ်သွားကာ ရင်ထဲမှ ဝန်ထုပ်ဝန်ပိုးတစ်ခု ကျသွားသကဲ့သို့ ခံစားလိုက်ရ၏။ ထို့နောက် သူ၏မျက်ဝန်းများတွင် ရက်စက်သော အရိပ်အယောင်များ ပေါ်လာလေသည်။
" ချူးဧကရာဇ်! ရှင်က ကျွန်မကို သတ်ချင်တာလား... ရှင့်ရဲ့ အစီအရင်ထဲမှာပဲ ဖြစ်နေပါစေ... ကျွန်မ မသေခင် ရှင့်ကို အေးအေးဆေးဆေး ခံစားခွင့်ပေးမှာ မဟုတ်ဘူး "
" ဝုန်း! "
အစီအရင်အတွင်း ဖန်တီးထားသည့် ဝက်ဝံသားရဲကြီးသည် သူ့ထံသို့ တဟုန်ထိုး ပြေးဝင်လာလေသည်။
ယခင်က သူသည် အစီအရင်ကို ဖျက်ဆီးရန် ကြိုးစားရင်း အားကုန်နေသော်လည်း ယခုတွင်မူ သူသည် ကုချန်၏အမိန့်ကို မစောင့်ဆိုင်းတော့ဘဲ သူ၏အစွမ်းအစ အားလုံးကို ထုတ်သုံးကာ ဝက်ဝံသားရဲကြီးကို ပြင်းပြင်းထန်ထန် ပြန်လည် တိုက်ခိုက်တော့သည်။ သူသေဆုံးသွားပါကလည်း ချူးဧကရာဇ်ကို အနာတရဖြစ်စေရမည်ဟု သူ ဆုံးဖြတ်ချက် ချလိုက်လေသည်။