အခန်း ၄၁၅

အခန်း ။ ၄၁၅

တောင်ထိပ်များ တုန်ခါသွားချိန်တွင် ဂြိုဟ်ပြင်ပရှိ မိစ္ဆာအင်အားစုမှ အာဏာရှင်ကြီးများမှာ ထိတ်လန့်တုန်လှုပ်သွားကြသည်။

အမုန်းတရားများ၏ လွှမ်းမိုးမှုနှင့် အာဏာရှင် ကျဆုံးခြင်းဟူသော ဟောကိန်းကြောင့် သူတို့မှာ ကြောက်လန့်နေကြရချိန်တွင် ယခုကဲ့သို့ ကြီးမားလှသော အနှောင့်အယှက်ကြောင့် ပိုမို၍ ထိတ်လန့်သွားကြသည်။ သူတို့၏ အာရုံစိုက်မှုအားလုံးသည် တောင်ထိပ်များဆီသို့သာ ရောက်ရှိသွားသည်။

အမုန်းတရား နတ်ဘုရားဂြိုဟ်၊ ကျောက်မျက်သားရဲဂြိုဟ်နှင့် သရဲဂြိုဟ်ကဲ့သို့ ဂြိုဟ်ကြီး သုံးခုလုံးတွင် တစ်ပြိုင်နက်တည်း ပြင်းထန်သော အပြောင်းအလဲများ ဖြစ်ပေါ်လာခဲ့သည်။

ဂြိုဟ်ကြီးသုံးခု၏ မြေအောက်မှ နက်ရှိုင်းစွာ အိပ်ပျော်နေသော အနက်ရောင် နဂါးသွေးကြောများ နိုးထလာကာ မြေကြီးကို ဖောက်ထွက်လာပြီး သူတို့အနီးတွင် ရှိနေသမျှ သက်ရှိမှန်သမျှကို ဝါးမြိုပစ်လိုက်သည်။ ထို့နောက် အနက်ရောင် နဂါးသွေးကြောများသည် ကောင်းကင်ယံသို့ ပျံတက်သွားခဲ့သည်။

"ဝူး... ဝူး... ဝူး..."

ကောင်းကင်ယံတွင် ရပ်တန့်နေသော အနက်ရောင် နဂါးသွေးကြောများသည် ဝမ်းနည်းကြေကွဲဖွယ် အော်ဟစ်သံများကို ထုတ်လွှတ်လိုက်ရာ ပြင်းထန်သော အသံလှိုင်းများကြောင့် အားနည်းသော သတ္တဝါများမှာ အသားတုံးများအဖြစ် ပြောင်းလဲသွားပြီး မြေပြင်သို့ ပြန်လည်ကျရောက်သွားခဲ့သည်။

အနက်ရောင် နဂါးသွေးကြော၏ အော်ဟစ်သံများ ကျယ်လောင်လာသည်နှင့်အမျှ ယခင်ကတည်းက မှောင်မိုက်နေသော ကောင်းကင်ကြီးမှာ အနက်ရောင် မြူခိုးများ ထပ်မံဖုံးလွှမ်းသွားပြီး ဂြိုဟ်ကြီးသုံးခုလုံးမှ အလင်းရောင်များ လုံးဝပျောက်ကွယ်သွားခဲ့သည်။

ထို့နောက် အော်ဟစ်သံများ ရပ်တန့်သွားပြီး အနက်ရောင်မိုးများ တဖွဲဖွဲ ရွာသွန်းလာခဲ့တော့သည်။

အမုန်းတရား နတ်ဘုရားဂြိုဟ်ပေါ်တွင် အာဏာရှင်များ စုဝေးရောက်ရှိနေကြပြီး အပြင်ဘက်မှ ရွာသွန်းနေသော အနက်ရောင်မိုးကို ကြည့်ရင်း သူတို့၏ မျက်နှာများမှာ အလွန်ပင် တင်းမာနေကြသည်။

"ခုနကပဲ ဟောကိန်းထုတ်တဲ့ သန့်ရှင်းသောကျောက်တုံးကြီး တုန်ခါသွားပြီး ဂြိုဟ်ပြင်ပရှိ မိစ္ဆာအင်အားစုသုံးခု၊ အန္တရာယ်ရှိတယ် ဆိုတဲ့ ဟောကိန်း ထွက်ပေါ်လာခဲ့တယ်"

ဟင်းလင်းပြင်မှ အသံတစ်ခု ပေါ်ထွက်လာသည်။

ဤသတင်းစကားကြောင့် အာဏာရှင်များမှာ ကျောချမ်းသွားကြရသည်။

"ဒီအခြေအနေက ငါတို့ တစ်ခါမှ မကြုံတွေ့ဖူးတဲ့ အခြေအနေဆိုးပဲ"

"ဟောကိန်းထုတ်တဲ့ကျောက်တုံးက ဘယ်ဂြိုဟ်လဲဆိုတာ တိတိကျကျ မပြောသွားဘူး။ ငါတို့ မဟုတ်တာလည်း ဖြစ်နိုင်တယ်မလား"

အာဏာရှင်တစ်ဦးက မေးလိုက်သည်။

"ဒါမှမဟုတ် ဂြိုဟ်သုံးခုလုံး အန္တရာယ်ရှိနေတာလည်း ဖြစ်နိုင်တာပဲ"

ဤစကားကြောင့် အာဏာရှင်များအားလုံး တိတ်ဆိတ်သွားကြသည်။ ခဏမျှ စဉ်းစားပြီးနောက် "ဒီကိစ္စက အရမ်းအရေးကြီးတယ်။ တခြား ဂြိုဟ်နှစ်ခုက အာဏာရှင်တွေနဲ့ အတူတူ ဆွေးနွေးမှ ဖြစ်မယ်" ဟု ဆုံးဖြတ်လိုက်ကြသည်။

...

ကျောက်မျက်သားရဲဂြိုဟ်ပေါ်တွင်လည်း အာဏာရှင်များ စုဝေးပြီး အလေးအနက် ဆွေးနွေးနေကြသည်။

"ဟောကိန်းထုတ်တဲ့ကျောက်တုံးကနေ ထွက်ပေါ်လာတဲ့ ဟောကိန်းကို သိကြမှာပါ။ တစ်ချိန်တည်းမှာပဲ ဂြိုဟ်သုံးခုလုံးရဲ့ နဂါးသွေးကြောတွေမှာလည်း ပြောင်းလဲမှုတွေ ဖြစ်ပေါ်နေတယ်"

"နဂါးသွေးကြောတွေရဲ့ အော်ဟစ်သံနဲ့ အနက်ရောင်မိုးတွေက တစ်ခုချင်းစီတောင် ထိတ်လန့်

စရာ ကောင်းနေပြီ။ အခုလို တစ်ပြိုင်နက်တည်း ဖြစ်လာတာက ပိုဆိုးတယ်"

"ဟောကိန်းက ငါတို့ဂြိုဟ်ကို ရည်ညွှန်းတာ ဖြစ်နိုင်မလား"

"ဂြိုဟ်သုံးခုလုံး ပါဝင်ပတ်သက်နေတာ ဖြစ်နိုင်ပါတယ်။ တခြား ဂြိုဟ်နှစ်ခုက အာဏာရှင်တွေနဲ့ ပူးပေါင်းဆွေးနွေးဖို့ လိုအပ်တယ်"

...

သရဲဂြိုဟ်ပေါ်တွင်လည်း

"ဒီလို ရုတ်တရက် ပြောင်းလဲမှုတွေက အပြာရောင်ကြယ်ပေါ်မှာ တစ်ခုခု ဖြစ်ပျက်နေလို့ ဖြစ်တာများလား"

"အပြာရောင်ကြယ်ကလွဲရင် ဒီလို ပြောင်းလဲမှုမျိုး ဖြစ်အောင် ဘယ်သူက လုပ်နိုင်မှာလဲ"

"အပြာရောင်ကြယ်မှာ နတ်ဘုရားအဆင့်ရှိသူ တစ်ဦးမှ မရှိဘဲ ဂြိုဟ်ပြင်ပရှိ မိစ္ဆာအင်အားစုတွေကို ဘယ်လိုများ ခြိမ်းခြောက်နိုင်မှာလဲ"

"ဘာပဲဖြစ်ဖြစ် ဟောကိန်းက သတိပေးချက် ထုတ်ထားပြီမို့လို့ သတိထားဖို့ လိုတယ်"

...

အာဏာရှင်တို့၏ အစည်းအဝေးတွင် ဂြိုဟ်သုံးခုမှ အာဏာရှင်များ စုဝေးရောက်ရှိနေကြသည်။ သန့်ရှင်းသောမျက်လုံးအရှင်က ပတ်ဝန်းကျင်ကို ကြည့်ပြီး ကျောက်မျက်သားရဲဂြိုဟ်မှ အာဏာရှင်၊ ဆီးနှင်းနယ်မြေ၏ ဘုရင်ကို စူးစိုက်ကြည့်လိုက်သည်။

"ဟွန့်... ကျောက်မျက်သားရဲတွေလို ဦးနှောက်မရှိတဲ့ တိရစ္ဆာန်တွေကို မယုံကြည်သင့်ခဲ့ဘူး။ မင်းတို့ကြောင့်သာ မဟုတ်ရင် နှစ်တစ်ရာကျော် အချိန်တွေကို အလဟဿ မဖြုန်းတီးခဲ့ရဘူး"

နှစ်တစ်ရာကျော် ဆိုသည်မှာ ကျောက်မျက်သားရဲဂြိုဟ်က အပြာရောင်ကြယ်ကို တိုက်ခိုက်ခဲ့သော အချိန်ဖြစ်သည်။

"လွန်ခဲ့တဲ့ နှစ်တစ်ရာကျော်တုန်းက အပြာရောင်ကြယ်ရဲ့ လူသားတွေက အားနည်းလွန်းတာကို ကျောက်မျက်သားရဲဂြိုဟ်က မအောင်မြင်နိုင်ခဲ့ဘူး။ တကယ်ကို အသုံးမကျလိုက်တာ"

အမုန်းတရား နတ်ဘုရားဂြိုဟ်မှ အာဏာရှင်တစ်ဦးက ထောက်ခံပြောပြောလိုက်သည်။

ဆီးနှင်းနယ်မြေ၏ ဘုရင်မှာ ဒေါသထွက်သွားပြီး "မင်းတို့ ကျောက်မျက်သားရဲဂြိုဟ်သာ မရှိရင် အပြာရောင်ကြယ်ကိုတောင် ရှာတွေ့မှာ မဟုတ်ဘူး။ ဘာလို့ ငါတို့ကို ဒီလိုမျိုး ပြောရဲတာလဲ" ဟု ပြန်လည်တုံ့ပြန်သည်။

သန့်ရှင်းသောမျက်လုံးအရှင်က "ဘာဖြစ်လဲ မင်းတို့ ကျောက်မျက်သားရဲဂြိုဟ်ရဲ့ မာနကြီးမှုကြောင့် သန့်ရှင်းသောသစ်ပင်ဆီမှာ ဂုဏ်ယူလိုစိတ်နဲ့ အမှန်တရားကို ဖုံးကွယ်ထားခဲ့လို့သာ နှစ်ပေါင်းတစ်ရာ အချိန်တွေကုန်ပြီး အပြာရောင်ကြယ်မှာ ပါရမီရှင်တစ်ယောက် ပေါ်ပေါက်လာခဲ့တာပဲ" ဟု ပြန်ပြောလိုက်သည်။

ဤစကားအဆုံးတွင် ဆီးနှင်းနယ်မြေ၏ ဘုရင်မှာ ဘာမှပြန်မပြောနိုင်တော့ပေ။ အမှန်တကယ်ပင် အပြာရောင်ကြယ်၏ တည်နေရာကို ကျောက်မျက်သားရဲဂြိုဟ်က ရှာတွေ့ခဲ့သော်လည်း ဂုဏ်ယူလိုစိတ်ဖြင့် တစ်ဦးတည်း သိမ်းပိုက်ထားခဲ့ခြင်းပင်။

သန့်ရှင်းသောမျက်လုံးအရှင်သာ ကျောက်မျက်သားရဲဂြိုဟ်၏ ထူးခြားချက်ကို သတိမပြုမိခဲ့လျှင် အပြာရောင်ကြယ်၏ တည်နေရာကို ယနေ့တိုင် သိရှိနိုင်မည်မဟုတ်ပေ။

သရဲဂြိုဟ်မှ သရဲမိခင်အရှင်က ဂြိုဟ်နှစ်ခုကြား အချင်းများနေသည်ကို မြင်သောအခါ ကြားဖြတ်၍ ပြောလိုက်သည်။

"အခုချိန်မှာ အရေးကြီးဆုံးက ဟောကိန်းထုတ်တဲ့ကျောက်တုံးရဲ့ ဟောကိန်းကို ပြောင်းလဲဖို့ပဲ။ ဒီမှာ အချင်းများနေလို့ ဘာအကျိုးရှိမှာလဲ"

သန့်ရှင်းသောမျက်လုံးအရှင်က မကျေမနပ်ဖြင့် "ပြောင်းလဲဖို့ ဘယ်လိုပြောင်းလဲမှာလဲ။ မင်းတို့ သရဲဂြိုဟ်ရဲ့ နတ်ဘုရားအဆင့်ရှိသူတွေကို ခေါ်ပြီး အပြာရောင်ကြယ်ကို တိုက်ခိုက်ခိုင်းပြီး ရွှီရန်ကို အပြီးအပိုင် ချေမှုန်းပစ်မှာလား" ဟု ပြန်မေးသည်။

သရဲမိခင်အရှင်က သူမ၏ ကိုယ်အင်္ဂါ အစိတ်အပိုင်းများကို ဝှေ့ယမ်းကာ ချက်ချင်း ငြင်းလိုက်သည်။

"မဖြစ်နိုင်ဘူး"

အဓိကအကြောင်းရင်းမှာ ကြောက်ရွံ့ခြင်းပင်။ ယခင်က ဖြစ်ပေါ်ခဲ့သည့် အာဏာရှင် ကျဆုံးခြင်းဟောကိန်းကိုပင် သူတို့ မဖြေရှင်းနိုင်သေးသဖြင့် ကိုယ်တိုင် တိုက်ပွဲဝင်ရန် မဖြစ်နိုင်ပေ။

ခဏမျှ စဉ်းစားပြီးနောက် သရဲမိခင်အရှင်က အကြံပြုသည်။

"သန့်ရှင်းသောသစ်ပင် ရိုးရာအခမ်းအနားကို ကျင်းပကြစို့။ သန့်ရှင်းသောသစ်ပင်ကို ကိုးကွယ်ပြီး ရှေ့ဆက်ရမယ့်ကိစ္စတွေကို သူစီစဉ်ခိုင်းမှသာ အပြာရောင်ကြယ်ရဲ့ တိုးတက်မှုကို တားဆီးနိုင်မှာဖြစ်တယ်"

"ကောင်းပြီ"

"ဒါဆို သန့်ရှင်းသောသစ်ပင် အခမ်းအနားကို ကျင်းပကြတာပေါ့"

"ဒီလိုလုပ်ဖို့ ပိုစောစောကတည်းက စဉ်းစားသင့်တာ"

"သန့်ရှင်းသောသစ်ပင်က ငါတို့ကို အပြစ်တင်လိမ့်မယ်ဆိုရင်တောင် ဂြိုဟ်ပြင်ပရှိ မိစ္ဆာအင်အားစုတွေ ပျက်စီးသွားတာထက်တော့ ပိုကောင်းပါတယ်"

ဆီးနှင်းနယ်မြေ၏ ဘုရင်လည်း သဘောတူညီလိုက်သည်။

သန့်ရှင်းသောမျက်လုံးအရှင်ကလည်း "ဒါဆို သန့်ရှင်းသောသစ်ပင်ကို ကိုးကွယ်ပြီး သူ့ကို ဝင်ရောက်စွက်ဖက်ခိုင်းကြစို့။ သန့်ရှင်းသောသစ်ပင်တောင် ဒီကိစ္စကို မဖြေရှင်းနိုင်ရင်တော့ ပိုမိုသန်မာတဲ့ မိခင်ဂြိုဟ်ကြီးကို ဆင်းသက်လာခိုင်းဖို့ပဲ ရှိတော့တယ်" ဟု ပြောလိုက်သည်။

ချက်ချင်းပင် အာဏာရှင်အားလုံးသည် သန့်ရှင်းသောသစ်ပင် အခမ်းအနားကို ကျင်းပရန် တစ်ညီတစ်ညွတ်တည်း သဘောတူညီလိုက်ကြသည်။

မကြာမီတွင် အာဏာရှင်များ၏ ခန္ဓာကိုယ်မှ ကြောက်မက်ဖွယ်ကောင်းသော စွမ်းအားများ ထွက်ပေါ်လာပြီး ပတ်ဝန်းကျင်တွင် ပြင်းထန်သော မုန်တိုင်းတစ်ခု ဖြစ်ပေါ်လာသည်။

ဤမုန်တိုင်းသည် နတ်ဘုရားအဆင့်ရှိသူပင် ချဉ်းကပ်ပါက ချက်ချင်း အစိတ်စိတ်အမွှာမွှာ ဖြစ်သွားစေနိုင်လောက်အောင် ပြင်းထန်သည်။

ရုတ်တရက် သူတို့ရှေ့တွင် ကျောက်ပြားကြီးတစ်ခု ပေါ်လာပြီး ထိုအပေါ်တွင် အနက်ရောင်ဂြိုဟ် သုံးခု ပေါ်လာသည်။ ထိုအချိန်တွင် အာဏာရှင်များက နားမလည်နိုင်သော မိခင်ဂြိုဟ်၏ ဘာသာစကားဖြင့် ဝါကျများကို ရွတ်ဆိုကြသည်။

ရွတ်ဆိုနေစဉ် ဟင်းလင်းပြင်မှ အနက်ရောင် သံကြိုးများ ထွက်ပေါ်လာပြီး ဂြိုဟ်သုံးခုကို ချိတ်ဆက်လိုက်သည်။ ဂြိုဟ်များ၏ အပေါ်တွင်မူ တိမ်တိုက်ကဲ့သို့သော အနက်ရောင် အညစ်အကြေးများ ပေါ်လာသည်။

တပြိုင်နက်တည်းမှာပင် တကယ့်ဂြိုဟ်ကြီး သုံးခုကိုလည်း ကြီးမားသော သံကြိုးကြီးတစ်ခုက ချိတ်ဆက်လိုက်သည်။

သံကြိုးကြီးသည် ဂြိုဟ်တစ်ခုစီ၏ ဗဟိုချက်သို့ ထိုးဖောက်ဝင်ရောက်သွားပြီး အနက်ရောင် အညစ်အကြေးများကို ပျံ့နှံ့စေသည်။ ဂြိုဟ်ပေါ်ရှိ သတ္တဝါများမှာ ထိတ်လန့်နေကြပြီး အချို့မှာ သိလိုစိတ်ဖြင့် ချဉ်းကပ်၍ ကြည့်နေကြသည်။

သို့သော် ထိုအညစ်အကြေးနှင့် ထိမိသည်နှင့် သတ္တဝါများမှာ ချက်ချင်း အရည်ပျော်ကျသွားပြီး မြေကြီးထဲသို့ စိမ့်ဝင်သွားကြသည်။ အချိန်တိုအတွင်း ဂြိုဟ်သုံးခုပေါ်ရှိ သတ္တဝါအရေအတွက်မှာ လျင်မြန်စွာ လျော့နည်းသွားသည်။

တစ်ရက်လုံးကြာအောင် ဤဖြစ်စဉ်မှာ ဆက်လက်ဖြစ်ပေါ်နေပြီး အညစ်အကြေးများ ပိုမိုထူပြောလာသောအခါ သံကြိုးကြီးက မြေအောက်သို့ စိမ့်ဝင်သွားပြီးနောက် သံကြိုးကြီး ပြန်ထွက်သွားပြီး ဟင်းလင်းပြင်ထဲမှ သန့်ရှင်းသောသစ်ပင်ကြီး၏ ပုံရိပ်မှာ ပေါ်ထွက်လာသည်။

မြေပြင်မှ အနက်ရောင် အမြစ်များ ပေါက်ထွက်လာပြီး အပင်၏ ပင်စည်ကြီးကို ထောက်ပံ့ထားသည်။

အခေါက်များတွင် သွေးကြောများကဲ့သို့သော အရာများ ဖြစ်ပေါ်လာပြီး ရှေးကျ၍ မှောင်မိုက်သော အစီအရင်တစ်ခု ဖြစ်လာသည်။

သစ်ပင်၏ အပေါ်ဖက်တွင်မူ ကြောက်လန့်နေသော မျက်နှာများ ပေါ်လာသည်။ သန့်ရှင်းသောသစ်ပင်၏ ပုံရိပ် အပြည့်အဝ ပေါ်ပေါက်လာချိန်တွင် ယခင်က အော်ဟစ်နေသော အနက်ရောင် နဂါးသွေးကြောသည် သစ်ပင်ကို ရစ်ပတ်ထားပြီး ပိုမိုကြေကွဲဖွယ်ကောင်းအောင် အော်ဟစ်လိုက်သည်။

သစ်ပင်၏ အကိုင်းအခက်များမှာ အနက်ရောင် အရွက်များအဖြစ် ပွင့်လာပြီး အဖျားပိုင်းတွင် ဦးနှောက်ပုံစံ အဆောက်အအုံများ ဖြစ်လာသည်။ ဤပုံရိပ် တည်မြဲသွားချိန်တွင် အာဏာရှင်အားလုံးမှာ ထိတ်လန့်တုန်လှုပ်စွာဖြင့် သစ်ပင်အောက်တွင် ဒူးထောက်နေကြသည်။

"ငါ ပေးအပ်ထားတဲ့ တာဝန်ကို ပြီးမြောက်အောင် လုပ်ဆောင်ပြီးပြီလား"

"အပြာရောင်ကြယ်ကို ကျူးကျော်နိုင်ခဲ့ပြီလား"

အင်မတန် အေးစက်ပြီး မှောင်မိုက်သော အသံနှစ်ခု ထွက်ပေါ်လာသည်။ ဤမေးခွန်းများကြောင့် အာဏာရှင်များ၏ ဝိညာဉ်များမှာ ထိတ်လန့်သွားကြသည်။

သန့်ရှင်းသောမျက်လုံးအရှင်က ရှေ့သို့တိုးလာပြီး တုန်တုန်ရီရီဖြင့် "သန့်ရှင်းသောသစ်ပင်... ကျွန်တော်တို့ မလုပ်ဆောင်နိုင်သေးပါဘူး..." ဟု ဖြေကြားလိုက်သည်။

"အသုံးမကျတဲ့သူတွေ နှစ်ပေါင်းနှစ်သန်းကျော်ကြာတဲ့အထိ မင်းတို့ထဲက ဘယ်သူမှ တာအိုသခင်မဖြစ်လာကြဘူး။ အကုန်လုံးက အသုံးမကျတဲ့သူတွေပဲ"

ထိုအသံက ပြန်တုံ့ပြန်လိုက်သည်။