အခန်း ၁၈

အခန်း (၁၈)

"ဟင်"

လင်းယန်သည် ထိုအကြောင်းကြားစာကို တစ်ချက်ကြည့်လိုက်မိရာ ရိုက်ကူးရေးအဖွဲ့မှ ဒါရိုက်တာကျန်း ပေးပို့လာသော သတိပေးချက်ဖြစ်နေသည်ကို တွေ့ရှိလိုက်ရ၏။

လာမည့်အပတ်တွင် ကျင်းပမည့် မီးရှူးမီးပန်းပြသပွဲသို့ တက်ရောက်ရန် ၎င်းက ဖိတ်ကြားထားခြင်း ဖြစ်သည်။

လင်းယန်သည် သူ၏မေးစေ့ကို ပွတ်သပ်ကာ စဉ်းစား၍ စာပြန်လိုက်သည်။

"ကျွန်တော် မသွားလို့ မရဘူးလားခင်ဗျာ၊ ကျွန်တော့်ရဲ့ ‘လယ်တောအိမ်' အပန်းဖြေစခန်းက အခုမှ စရုံပဲ ရှိသေးလို့ပါ"

စာပို့ပြီးသည်နှင့် မကြာမီမှာပင် ဒါရိုက်တာကျန်းထံမှ ဖုန်းခေါ်ဆိုမှု ဝင်လာတော့၏။

လင်းယန်သည် သူ၏ တိုက်ရိုက်ထုတ်လွှင့်မှုကို အလျင်အမြန် အဆုံးသတ်လိုက်ပြီး ဖုန်းကို လက်ခံဖြေကြားလိုက်လေသည်။

"ရှောင်လင်း... မင်း လာမယ့်အပတ်က ညစာစားပွဲကို မဖြစ်မနေ တက်ရောက်ရမယ်၊ ဒါက အစီအစဉ်ရိုက်ကူးရေးအဖွဲ့က စီစဉ်ထားတာ ဒါဟာ ပြိုင်ပွဲဝင်တွေအနေနဲ့ မင်းတို့ရဲ့ အကျိုးစီးပွားအတွက်လည်း ပါတယ်၊ ဒီအစီအစဉ်က လူကြိုက်များမှသာ မင်းတို့လည်း လူသိများလာမှာ မဟုတ်လား"

"ဘာလဲ၊ မင်းက ဒီဆုကြေးငွေတွေကို အလိုမရှိဘူးလား၊ မင်းက အခုတောင် တော်တော်လေး နာမည်ကြီးနေတာပဲ၊ ဒီမီးရှူးမီးပန်းပြပွဲက မင်းရဲ့ လူကြိုက်များမှုကို နောက်ထပ်တစ်ဆင့် မြှင့်တင်ပေးနိုင်မှာ သေချာတယ်"

ဒါရိုက်တာကျန်း၏ ပြောစကားများက လင်းယန်ကို အမှန်တကယ်ပင် စိတ်လှုပ်ရှားသွားစေသည်။

ယခုအခါ သူ၏ ‘လယ်တောအိမ်' အပန်းဖြေစခန်း၏ ဆွဲဆောင်မှုမှာ တောရိုင်းတိရစ္ဆာန်လေးများအပေါ်တွင်သာ လုံးလုံးလျားလျား တည်မှီနေပေရာ ထိုအခွင့်အရေးကို အကျိုးရှိရှိ အသုံးချရန် သူ ဆုံးဖြတ်လိုက်တော့၏။

"နားလည်ပါပြီ ဒါရိုက်တာကျန်း၊ ကျွန်တော် မီးရှူးမီးပန်းပြပွဲကို အချိန်မီ

လာခဲ့ပါ့မယ်"

ဒါရိုက်တာကျန်းက ကျေနပ်အားရစွာဖြင့် ခေါင်းညိတ်လိုက်ပြီး ဆိုလေသည်။

"ပရိသတ်တွေရဲ့ အာရုံစိုက်မှုကို ရရှိဖို့အတွက် ငါတို့က ဒီပွဲတော်ကို တစ်ပတ်ကြိုပြီး ကြော်ငြာမှာ ဖြစ်တယ်၊ ပွဲတော်အတွင်းမှာ မင်းတို့ ပြိုင်ပွဲဝင် ငါးယောက်စလုံးက ကိုယ့်ရဲ့ အရည်အချင်းတွေကို ထုတ်ဖော်ပြသပြီး ဖျော်ဖြေရေး အစီအစဉ်အချို့ကို တင်ဆက်ရမယ်"

လင်းယန်သည် မျက်မှောင်အနည်းငယ် ကြုတ်သွားကာ မေးမြန်းလိုက်၏။

"ဒါက လုပ်ငန်းသစ် ထူထောင်သူတွေအတွက် အစီအစဉ် မဟုတ်ဘူးလား၊ ဘာဖြစ်လို့ ဖျော်ဖြေရေး အစီအစဉ်တွေ ထည့်ရတာလဲ"

"ဒါမှလည်း လူတွေ ပိုစိတ်ဝင်စားလာမှာပေါ့"

အရာအားလုံးသည် "လူကြိုက်များမှု" ဆိုသော စကားလုံးတစ်လုံးတည်းတွင်သာ လာ၍ ဆုံလေတော့သည်။

ဖုန်းချပြီးနောက် လင်းယန်သည် မီးရှူးမီးပန်းပြပွဲအကြောင်းကို များစွာ တွေးမနေတော့ဘဲ မိမိလုပ်ရမည့် အလုပ်များကိုသာ ဆက်လက် လုပ်ကိုင်နေ၏။

သို့သော်လည်း နောက်ကွယ်မှ ပေးပို့ထားသော ထူးခြားသည့် သီးသန့်စာအချို့က သူ၏ အာရုံကို ဖမ်းစားသွားလေသည်။

သူ၏ စာလက်ခံပုံးထဲတွင် နေ့စဉ်နှင့်အမျှ ပရိသတ်များ၏ စာများဖြင့် ပြည့်နှက်နေလေ့ရှိရာ ထိုစာများကို သူ သိပ်ပြီး ဂရုမပြုမိတတ်ပေ။

သို့သော် ယခုလူသည် သူ့ထံသို့ စာစောင်ပေါင်းများစွာကို တရစပ် ပေးပို့ထားသည်ကို တွေ့ရ၏။

လင်းယန်က ထိုသူ၏ အကောင့်ကို ဖွင့်ကြည့်လိုက်သောအခါ ဖော်လိုဝါ ခြောက်သန်းကျော် ရှိသည့် နာမည်ကျော် ဘလော့ဂါ တစ်ဦး ဖြစ်နေသည်ကို အံ့အားသင့်ဖွယ် တွေ့ရှိလိုက်ရသည်။

မိမိကဲ့သို့ လူတစ်ဦးက ထိုမျှ နာမည်ကြီးသူ၏ အာရုံစိုက်မှုကို မည်သို့ ရရှိသွားသနည်း။

"လင်း ညီလေး၊ ဒါကို မြင်ရင် ပြန်စာလေး ပို့ပေးပါဦး"

ထိုနာမည်ကျော် ဘလော့ဂါသည် သူ၏ ‘လယ်တောအိမ်’ အပန်းဖြေစခန်းသို့ လာရောက်လည်ပတ်လိုခြင်း ဖြစ်ပေသည်။

ခေတ္တမျှ စဉ်းစားပြီးနောက် လင်းယန်သည် ထိုကိစ္စကို သဘောတူလိုက်၏။

အကြောင်းမှာ ထိုသူ၏ ကျော်ကြားမှုသည် သူ့အတွက် ပရိသတ်အသစ်များကို ဆွဲဆောင်နိုင်မည် ဖြစ်သောကြောင့်ပင်ဖြစ်သည်။

ယခုလက်ရှိ ကျေးလက်လုပ်ငန်း ထူထောင်မှုသည် ပရိသတ်အင်အားကို အခြေခံ၍ ငွေရှာနေရခြင်း ဖြစ်ရာ မိမိကိုယ်ကို ဆိုရှယ်မီဒီယာ ဘလော့ဂါတစ်ဦး ခေါ်ဆိုလျှင်လည်း မမှားနိုင်ပေ။

ထို့ကြောင့် ဤကိစ္စသည် ကောင်းမွန်သော အခွင့်အရေးတစ်ခု ဖြစ်သည်ဟု သူ ယူဆလိုက်၏။

လင်းယန်ထံမှ ပြန်စာကို ရရှိပြီးနောက်တွင်မူ ချောင်ရှီးဖုန်းသည် ထိုစဉ်က ရိုက်ကူးထားသည့် ရွှေရောင်မျောက်ကလေး၏ ဗီဒီယိုကို ထပ်တလဲလဲ ကြည့်ရှုနေမိသည်။

တစ်ရက်နှင့် တစ်ညကြာ နှိုင်းယှဉ်လေ့လာပြီးနောက် လင်းယန်၏ ခြံဝင်းအတွင်း ပေါ်လာသော ထိုရွှေရောင်မျောက်သည် ထူးခြားသော အသိဉာဏ်ရှိကြောင်း သူ ပိုမို ယုံကြည်လာခဲ့၏။

ယခုသွားလျှင် ထိုမျောက်အိုကြီးနှင့် ထပ်မံတွေ့ဆုံနိုင်ရန် မသေချာသော်လည်း လင်းယန်၏ အပန်းဖြေစခန်းသို့ သွားရောက်ရန် သူ ဆုံးဖြတ်လိုက်တော့သည်။

ထို့ကြောင့် သူသည် တောင်ပေါ်မြို့သို့ သွားမည့် လေယာဉ်လက်မှတ်ကို ချက်ချင်း ဝယ်ယူလိုက်လေသည်။

ထို့ပြင် သူသည် ဖိုးဖိုးကြီး၏ အပန်းဖြေစခန်းသို့ သွားရောက်ကာ ဘဝကို အခြေချ နေထိုင်ကြည့်မည်ဖြစ်ကြောင်း ဗီဒီယိုတစ်ခု ရိုက်ကူး၍ တင်လိုက်၏။

မည်သို့ပင်ဆိုစေကာမူ သူသည် ပရိသတ်အင်အားတောင့်သူဖြစ်၍ ထိုဗီဒီယိုကို တင်လိုက်သည်နှင့် တစ်ပြိုင်နက် ပရိသတ်များစွာ၏ အာရုံစိုက်မှုကို ရရှိသွားတော့သည်။

"ဘာလဲ၊ ဘလော့ဂါ ချောင်က လယ်တောအိမ် အပန်းဖြေစခန်းကို သွားပြီး ဘဝကို အခြေချမလို့လား"

"ဒါက မရိုးဘူးဟ၊ ဖန်ဟောင်းတွေ သိတာကတော့ ချောင်ရှီးဖုန်းဟာ တိရစ္ဆာန်တွေကို လေ့လာဖို့ပဲ အချိန်ကုန်ခံတာ၊ သူက အကြောင်းမရှိဘဲ အပန်းဖြေစခန်းကို သွားစရာ အကြောင်းမရှိဘူး"

"အဲဒီ တောင်ပေါ်မြို့က အပန်းဖြေစခန်းမှာ ဘာရှိလို့လဲ"

ပရိသတ်များသည် 'ဖိုးဖိုးကြီး၏ အပန်းဖြေစခန်း' အကြောင်းကို ချက်ချင်းပင် စုံစမ်းကြတော့၏။

စုံစမ်းလိုက်သည့်အခါတွင်မူ အရေးကြီးသော အချက်အလက်များကို တွေ့ရှိသွားကြသည်။

"ဒါက လင်းယန်ဆိုတဲ့ လူငယ်လေး ဖွင့်ထားတဲ့ ဆိုင်မဟုတ်လား"

"ဟုတ်တယ်၊ ကိုချောင်က အပန်းဖြေဖို့ သွားတာလို့ ပြောပေမဲ့ တကယ်တော့ တိရစ္ဆာန်တွေကြောင့် သွားတာ ၁၀၀ ရာခိုင်နှုန်း သေချာတယ်"

"ကိုချောင်လို တိရစ္ဆာန်ရူးတစ်ယောက်က 'ဘဝကို အပန်းဖြေတယ်' ဆိုတဲ့ စကားလုံးကို ဘယ်လိုရေးရမှန်းတောင် မေ့နေတာ ကြာပြီ"

"အံ့သြစရာပဲ၊ ငါ အကြိုက်ဆုံး ဘလော့ဂါ နှစ်ယောက် ဆုံကြတော့မှာလား"

"တစ်ခုခုတော့ မှားနေပြီ၊ ကိုချောင်ကို အဲဒီကို ဖိတ်တာဟာ လင်းယန်ရဲ့ နောက်ကွယ်က ငွေရှင်ကြေးရှင်တွေက လင်းယန်ကို နာမည်ကြီးအောင် လုပ်ပေးတာ မဟုတ်ဘူးလား"

"မဖြစ်နိုင်တာ မဟုတ်ဘူး၊ ကိုချောင်မှာ ဖော်လိုဝါ ခြောက်သန်းကျော် ရှိတာလေ"

"ရွံစရာကောင်းတဲ့ အရင်းရှင်တွေ၊ ဒါဆို ကျန်တဲ့ ပြိုင်ပွဲဝင် လေးယောက်က ဘာလုပ်ရမှာလဲ"

"တောင်ပေါ်မြို့ သစ်တောဦးစီးဌာနကကော ဘာလို့ အခုထိ ဘာမှ အကြောင်းမပြန်သေးတာလဲ"

"အစီအစဉ်ရိုက်ကူးရေးအဖွဲ့ကတောင် ဘာမှ အရေးမယူသေးဘူး"

"ကိုချောင်... ခင်ဗျား ခြိမ်းခြောက်ခံနေရတာဆိုရင် ပရိုဖိုင်ပုံကို ဒီပုံနဲ့ ပြောင်းလိုက်ပါ"

အင်တာနက်ပေါ်ရှိ ပြင်းထန်သော ဝေဖန်မှုများကို ကြည့်ရင်း ရန်အာဟူသည် မကျေမနပ်ဖြင့် ဆိုလေသည်။

"သူတို့က အကို လင်း အပေါ် ဘာလို့ ဒီလိုတွေ ပြောနေကြတာလဲ၊ ဒါက တော်တော်ကို လွန်လွန်းတယ်"

လင်းယန်သည် လက်ထဲမှ တံစဉ်ကို ချလိုက်ပြီး ခပ်အေးအေးပင် ပြန်ပြောလိုက်၏။

"မင်း ဒါတွေ လိုက်ကြည့်နေမယ့်အစား ငါးစာမြက်တွေ သွားရိတ်တာက ပိုကောင်းလိမ့်မယ်"

လင်းယန်၏ စိတ်ထဲတွင်မူ ထိုအချက်ကို ကြိုတင်သိရှိပြီးသား ဖြစ်သည်။ ရွှေရောင်မျောက်နှင့် အရှေ့မြောက်ကျားတို့မှာ အရင်းရှင်များ၏ ရင်းနှီးမြှုပ်နှံမှုကြောင့် ရောက်လာခြင်း ဖြစ်ကြောင်း ဝေဖန်သူများက ယူဆနေကြ၏။

သို့သော် သူ့တွင် ဝိညာဉ်ရေစင် ရှိနေသကဲ့သို့ နောက်ဘက်ရှိ တောင်တန်းကြီးများထဲတွင်လည်း အဖိုးတန် တောရိုင်းတိရစ္ဆာန်နှစ်မျိုးသာမက ရှိနေသေးရာ ထိုသူများ၏ သံသယကို ဖျောက်ဖျက်ရန် သူ့အတွက် ခက်ခဲသော အလုပ် မဟုတ်ပေ။

"ဟော... ဒီရွှေငါးလေးက ဘာလို့ ဒီလောက်တောင် ကြီးလာတာလဲ"

လင်းယန်သည် ငါးကန်အတွင်း အမြီးတယမ်းယမ်းဖြင့် ကူးခတ်နေသော ရွှေငါးလေးကို ကြည့်ရင်း တစ်ခုခု မှားယွင်းနေကြောင်း ခံစားလိုက်ရသည်။

ဤရွှေငါးသည် အနည်းငယ် ဝလွန်းနေသည်မဟုတ်ပါလား။

ထို့ပြင် ထိုလိပ်ကြီးမှာလည်း မည်သည့်အချိန်တွင် ဤမျှ ကြီးထွားသွားသနည်း။

လိပ်သည် စဝယ်စဉ်က လက်ဝါးခန့်သာ ရှိသော်လည်း ယခုမူ ရေချိုးဇလုံခန့်ပင် ရှိနေချေပြီ။

ကန်မှာ မသေးလှသဖြင့် အစပိုင်းတွင် ငါးသားပေါက်များစွာနှင့် ရွှေငါးအချို့ ကို သူထည့်ထားခဲ့ခြင်း ဖြစ်သည်။

ယခုမှ တစ်လခွဲခန့်သာ ရှိသေးသော်လည်း ဤမျှ မြန်ဆန်စွာ ကြီးထွားလာခြင်းမှာဖြစ်နိုင်သည်လော။

"အမယ်လေး၊ သူဌေး ဟိုအမည်းရောင် အကောင်ကြီးက ဘာလဲ၊ ခင်ဗျား ကန်ထဲမှာ မိစ္ဆာကောင်တွေ မွေးထားတာလား"