အခန်း ၂၃၇

အခန်း (၂၃၇) အခြေစိုက်စခန်း တည်ဆောက်ခြင်း (၂)

ချွမ်ယွမ်ဝေ့ကလည်း ရေသောက်လိုက်ပြီးနောက် ပြောလိုက်လေသည်။

"အပြင်ဘက်မှာ အခြေစိုက်စခန်း အမျိုးအစား သုံးမျိုး ရှိတယ်...၊ ဗဟိုအစိုးရက တရားဝင် အခြေစိုက် စခန်းတွေကို တည်ထောင်ပြီး၊ စစ်အခြေစိုက်စခန်းတွေကိုတော့ စစ်တပ်က တည်ထောင်ပြီး ထိန်းချုပ် ထားတယ်...။ ကိုယ်ပိုင် အခြေစိုက်စခန်းတွေကိုတော့ တစ်ဦးချင်းစီက ပိုင်ဆိုင်ပြီး သီးခြား လည်ပတ်ကြ တာပေါ့...။”

"လတ်တလောမှာတော့ ရှို့တူးမြို့မှာပဲ တရားဝင် အခြေစိုက်စခန်း တစ်ခုတည်း ရှိပြီး၊ တစ်နိုင်ငံလုံး အတိုင်းအတာနဲ့ စစ်အခြေစိုက်စခန်း နှစ်ခုပဲ ရှိသေးတယ်...။ တစ်ခုက ကျွန်တော်တို့ ကျွင်းချန်မြို့မှာ ဖြစ်ပြီး၊ အခြားတစ်ခုကတော့ ဒီနေရာကနေ ကီလိုမီတာ နှစ်ထောင်ကျော် ဝေးတဲ့ ကျန်းချန်မြို့မှာ ရှိ တယ်...။ ကျန်းချန်မြို့က စစ်အခြေစိုက်စခန်းကို လေတပ်က ထိန်းချုပ်ပြီး၊ ဒီနေရာက စစ်အခြေစိုက် စခန်းကိုတော့ ကြည်းတပ်က ထိန်းချုပ်ထားတာပေါ့...။”

"ကိုယ်ပိုင် အခြေစိုက်စခန်းတွေကတော့ တစ်နိုင်ငံလုံးမှာ ပြန့်နှံ့နေတာပါပဲ...။ အကြီးဆုံးတစ်ခုကတော့ ဒီနေရာကနေ ကီလိုမီတာ ခုနစ်ရာကျော် ဝေးတဲ့ ဟိုင်ချန်မြို့မှာ ရှိတယ်...။”

စီမာယွမ်ကလည်း ထပ်လောင်း ပြောလိုက်လေ၏။

"ကျွင်းချန် စစ်အခြေစိုက်စခန်းကို အခု ကျွင်းချန်မြို့ရဲ့ အပြင်ဘက် ကီလိုမီတာ နှစ်ရာခန့် အကွာမှာ တည်ဆောက်နေတာ...။”

"သူတို့က ပထမအဆင့် တည်ဆောက်ရေး လုပ်ငန်းတွေကို လုပ်ကိုင်နေကြပြီး၊ အခြေစိုက်စခန်း တည် ဆောက်ရာမှာ ကူညီဖို့အတွက် အသက်ရှင်ကျန်ရစ်သူတွေကို စုဆောင်းနေကြတယ်...။ တည်ဆောက် ရေးမှာ ပါဝင်တဲ့ အသက်ရှင်ကျန်ရစ်သူတွေက တစ်ရက်ကို အစားအစာ နှစ်နပ် ရမှာဖြစ်ပြီး ပထမ အဆင့် ပြီးစီးသွားတဲ့အခါ အိမ်တစ်လုံး ရလိမ့်မယ်...။”

သူတို့၏ ရှင်းပြမှုကို ကြားပြီးနောက်၊ လုံယုနှင့် ယောင်ရန်တို့သည် အကြည့်ချင်း ဖလှယ်လိုက်ကြ၏။

သူတို့သည် စီမာမိသားစုနှင့် ချွမ်မိသားစု အပါအဝင် သူတို့၏ မိတ်ဆွေများအတွက် အခြေစိုက်စခန်း အတွင်း နေထိုင်ခွင့် လက်မှတ်များကို ရရှိထားပြီး ဖြစ်သည်။ သို့သော်လည်း ဤသတင်းကောင်းကို သူတို့အား မျှဝေလိုက်ပါက၊ ယောင်ရန်နှင့် လုံယုတို့သည် ရွှီချီဖန်ထံမှ ထိုနေထိုင်ခွင့် လက်မှတ်များကို မည်သို့ ရရှိခဲ့သည်ကို ရှင်းပြရပေလိမ့်မည်။

သူတို့နှစ်ဦးစလုံးက ဤအကြောင်းကို စဉ်းစားနေကြစဉ်၊ ရှီရွှမ်းက စတင် မေးမြန်းလိုက်၏။

"အခြေစိုက်စခန်းထဲ ဝင်ဖို့အတွက် ကျွန်တော်တို့ ဘာပေးချေရမယ်လို့ ကြားထားလဲ...။”

စီမာယွမ်က ခေါင်းငြိမ့်ပြကာ၊

"ဟုတ်တယ်...၊ ကျွန်တော့်အစ်ကိုက သူ့သူငယ်ချင်းတစ်ယောက်ကို မေးကြည့်တော့ အခြေစိုက်စခန်း တည်ဆောက်ရာမှာ မပါဝင်တဲ့ အသက်ရှင်ကျန်ရစ်သူတွေက ဝင်ခွင့်ရဖို့အတွက် ရိက္ခာတွေ ပေးရမယ် လို့ သိရတယ်...။”

"တရားဝင် အခြေစိုက်စခန်းထဲ ဝင်ဖို့ဆိုရင် လူတစ်ယောက်ချင်းစီက ရိက္ခာ (၁၀) ကီလိုဂရမ် အပ်နှံရ မယ်...။ စစ်အခြေစိုက်စခန်းထဲ ဝင်ဖို့ဆိုရင်တော့ လူတစ်ယောက်ချင်းစီက ရိက္ခာ (၄၀) ကီလိုဂရမ် အပ်နှံ မယ်တဲ့...။ ကိုယ်ပိုင် အခြေစိုက်စခန်းတွေရဲ့ ဝင်ခွင့်လိုအပ်ချက်တွေကတော့ သူတို့ရဲ့ စည်းမျဉ်းတွေပေါ် မူတည်ပြီး ကွဲပြားကြလိမ့်မယ်...။”

၎င်းကို ကြားရသောအခါ ဟွမ်ချန်နှင့် အခြားသူများမှာ တိတ်ဆိတ်သွားကြတော့၏။

ထိုမျှ မြင့်မားသော ဝင်ခွင့်သတ်မှတ်ချက်များကြောင့်၊ များစွာသော အသက်ရှင်ကျန်ရစ်သူများမှာ ဝင် ရောက်နိုင်ကြမည် မဟုတ်ပေ။ လူအများစုမှာ မိမိတို့၏ ဆာလောင်မှုကို ဖြေဖျောက်ရန်ပင် ရိက္ခာအလုံ အလောက် မရှိကြသဖြင့်၊ သူတို့ကို ရိက္ခာ (၁၀) ကီလိုဂရမ် သို့မဟုတ် (၄၀) ကီလိုဂရမ် အပ်နှံခိုင်းခြင်းမှာ အခြေစိုက်စခန်းအတွင်း ဝင်ရောက်ခြင်းကို တားဆီးရန် သွယ်ဝိုက်သော နည်းလမ်းတစ်ခု ဖြစ်ပေသည်။

ကျားရှန်းက မေးမြန်းလိုက်၏။

"အခြေစိုက်စခန်းက ဘယ်တော့လောက် ပြီးစီးမလဲဆိုတာ သိလား...။”

စီမာယွမ်က ခေါင်းခါပြကာ ပြန်လည် ဖြေလိုက်၏။

"အဲဒါနဲ့ပတ်သက်လို့ သတင်းမကြားသေးဘူး...။ ဒါပေမဲ့ ကျွန်တော့်အစ်ကို ပြောတာကတော့ မီးလောင်မှု တွေကြောင့် ဆောက်လုပ်ရေး အချိန်ကြန့်ကြာသွားတာလို့ ပြောတယ်...။ မြင့်မားတဲ့ အပူချိန်ကြောင့် ဂတ်စ်ပိုက်လိုင်းတွေနဲ့ ဓာတ်ဆီဆိုင်တွေ ပေါက်ကွဲပြီး နေရာအနှံ့ မီးတွေ ကူးစက်သွားတာလေ...။”

"မီးငြှိမ်းသတ်ဖို့ ရေမရှိတော့ အခြေစိုက်စခန်း ဆောက်လုပ်နေစဉ်အတွင်းမှာ မီးကို ထိန်းချုပ်ဖို့ ခက်ခဲ နေတယ်...၊ ဒါ့အပြင် လုပ်သားရှားပါးမှုလည်း ရှိနေတဲ့အတွက် အခြေစိုက်စခန်းရဲ့ ပထမအဆင့် ဆောက်လုပ်ရေး ပြီးစီးဖို့ အနည်းဆုံး ခြောက်လလောက် အချိန်ယူရလိမ့်မယ်...။”

သူ၏ အဖြေကို ကြားရသောအခါ ဟွမ်ချန်က မျက်မှောင်ကြုတ်ကာ မေးလိုက်လေသည်။

"အခြေစိုက်စခန်းက ဘယ်လောက်အထိ ကျယ်ဝန်းလို့လဲ...။ ကျန်းချန်မြို့မှာရှိတဲ့ အသက်ရှင်ကျန်ရစ်သူ အားလုံးကို ဆံ့နိုင်မယ့် နေရာအလုံအလောက် ရှိပါ့မလား...။”

ချွမ်ယွမ်ဝေ့က ပြန်လည် ဖြေလိုက်၏။

"ပထမအဆင့် ပြီးစီးသွားတဲ့အခါ လူဦးရေ သုံးသန်းအထိ ဆံ့နိုင်တယ်လို့ သူတို့ ပြောကြတယ်...။”

ရှီရွှမ်းက သက်ပြင်းချလိုက်ရင်း ပြောလိုက်၏။

"အခြေစိုက်စခန်းကို ဝင်ဖို့ လိုအပ်ချက်တွေက ဒီလောက်အထိ မြင့်မားနေရင်တော့၊ အခြေစိုက်စခန်းဆီ သွားနိုင်တဲ့သူ အများကြီး ရှိလာမှာ မဟုတ်ဘူး...။”

လုံယုကလည်း သဘောတူလိုက်၏။

"မှန်တယ်... စွမ်းဆောင်နိုင်ရည်ရှိတဲ့ လူတွေပဲ ရိက္ခာ (၁၀) ကီလိုဂရမ် ဒါမှမဟုတ် (၄၀) ကီလိုဂရမ်အထိ ပေးဆောင်ပြီး အခြေစိုက်စခန်းထဲ ဝင်နိုင်ကြလိမ့်မယ်...။”

ခဏမျှ တိတ်ဆိတ်သွားပြီးနောက်၊ ချွမ်ယွမ်ဝေ့က မေးလိုက်လေသည်။

"ခင်ဗျားတို့ကော အခြေစိုက်စခန်းဆီ သွားကြမှာလား...။”

ယောင်ရန်သည် သူတို့အတွက် နေထိုင်ခွင့် လက်မှတ်များကို ရရှိထားပြီးဖြစ်သဖြင့်၊ သွားကြရမည် ဖြစ် သည်။ သူမက ခေါင်းငြိမ့်ပြကာ ပြောလိုက်၏။

"သွားမှာပေါ့...။”

၎င်းကို ကြားရသောအခါ၊ စီမာယွမ်နှင့် ချွမ်ယွမ်ဝေ့တို့သည် အကြည့်ချင်း ဖလှယ်လိုက်ကြပြီးနောက် ချွမ်ယွမ်ဝေ့က ပြောလိုက်လေသည်။

"ကျွန်တော်တို့ကတော့ သွားမှာ မဟုတ်ဘူး...။”

အခြားသူများက သူတို့ကို ကြည့်လိုက်ကြစဉ်၊ ချွမ်ယွမ်ဝေ့က ထပ်လောင်း ပြောကြားလိုက်၏။

"ကျွန်တော်တို့ဆီမှာ မိသားစုဝင်တွေ အများကြီး ရှိသလို၊ ဝင်ခွင့်ကြေး ပေးဖို့အတွက် လုံလောက်တဲ့ ရိက္ခာလည်း မရှိဘူး...။ ခင်ဗျားတို့ပဲ အရင်သွားကြပါ...၊ ကျွန်တော်တို့ကတော့ အခြေစိုက်စခန်းဆီ မသွားခင် လုံလောက်တဲ့ ရိက္ခာတွေ စုဆောင်းနိုင်ဖို့ အရင် ကြိုးစားရဦးမယ်...။”

သူသည် မျက်နှာပျက်နေသည်ကို မြင်သောအခါ၊ ယောင်ရန်သည် နေထိုင်ခွင့် လက်မှတ်များအကြောင်း ကို သူတို့အား ပြောပြရန် ဆုံးဖြတ်လိုက်၏။ သူမသည် ချွမ်ယွမ်ဝေ့ကို ကြည့်ကာ ပြောလိုက်လေသည်။

"ကျွန်မတို့ အားလုံး အတူတူ သွားလို့ရပါတယ်...။ ကျွန်မ နေထိုင်ခွင့် လက်မှတ်တွေ ရထားပြီးပြီမို့လို့၊ အခြေစိုက်စခန်းက လူတွေကို စတင် လက်ခံတဲ့အချိန်ကျရင် သွားရုံပါပဲ...။”

သူမ၏ စကား ဆုံးသွားသည်နှင့်တစ်ပြိုင်နက်၊ လုံယုမှလွဲ၍ အားလုံးမှာ များစွာ ထိတ်လန့် တုန်လှုပ် အံ့အားသင့်သွားကြလေတော့၏။

ဟွမ်ချန်က သူမကို စူးစမ်းစွာ ကြည့်၍ မေးလိုက်လေသည်။

"ယောင်ရန်...၊ တကယ်ပဲ ပြောနေတာလား...။ နေထိုင်ခွင့် လက်မှတ်တွေကို ဒီလောက်အထိ လျင်လျင် မြန်မြန် ဘယ်လိုလုပ် ရခဲ့တာလဲ...။”

ယောင်ရန်သည် ဤမေးခွန်းအတွက် ကြိုတင်ပြင်ဆင်ထားပြီး ဖြစ်သဖြင့် တည်ငြိမ်စွာပင် ပြန်လည် ဖြေလိုက်၏။

"ကျွန်မ တပ်ကြပ်ရွှီကို သိတယ်လေ...။ သူက ကျွန်မအဘိုးရဲ့ အရင်းနှီးဆုံး သူငယ်ချင်းရဲ့ သားလေ….၊ ကျွန်မနဲ့ ကျွန်မရဲ့ သူငယ်ချင်းတွေကို အခြေစိုက်စခန်းမှာ နေထိုင်ခွင့်ပေးမယ်လို့ ကတိပေးထားတာ...။”

သူမသည် စီမာယွမ်နှင့် ချွမ်ယွမ်ဝေ့တို့ကို ကြည့်ကာ ထပ်လောင်း ပြောကြားလိုက်၏။

"ဒီအထဲမှာ ရှင်တို့နှစ်ယောက်နဲ့ ရှင်တို့ရဲ့ မိသားစုတွေလည်း ပါဝင်တယ်...။”

သူမ ထိုသို့ ပြောလိုက်သောအခါ စီမာယွမ်နှင့် ချွမ်ယွမ်ဝေ့တို့မှာ မှင်သက်သွားကြ၏။

သူတို့ ပြန်လည် တုံ့ပြန်ခြင်း မပြုနိုင်မီမှာပင်၊ ယောင်ရန်က ထပ်လောင်း ပြောကြားလိုက်လေသည်။

"ဒါပေမဲ့ ကျွန်မတို့က အခြေစိုက်စခန်းမှာ နေထိုင်ခွင့်နဲ့ အိမ်ဆောက်မယ့် နေရာကို ရွေးချယ်ခွင့်ပဲ ရတာ ...။ မပြောင်းရွှေ့ခင် ကျွန်မတို့ ကိုယ်ပိုင်အိမ်ကို ကိုယ်တိုင် ဆောက်လုပ်ဖို့တော့ လိုလိမ့်မယ်...။”

ရှီရွှမ်းက ခဏမျှ စဉ်းစားကာ ပြောလိုက်၏။

"ကျွန်မတို့ ကိုယ်ပိုင်အိမ် ဆောက်ရမယ်ဆိုရင်တော့၊ ဆောက်လုပ်ရေး ပစ္စည်းတွေ စတင် စုဆောင်း သင့်ပြီ...။”

ဟွမ်ချန်ကလည်း သဘောတူကြောင်း ခေါင်းငြိမ့်ပြကာ

"ကျွန်တော်တို့ ဂိုဒေါင်တွေရှိတဲ့ဆီ သွားကြည့်လို့ရတယ်...။ ဆောက်လုပ်ရေးပစ္စည်းတွေ သိုလှောင်ထား တဲ့ ဂိုဒေါင်ရှိလိမ့်မယ်...။ သံချောင်းတွေနဲ့ အခြား သံမဏိပစ္စည်းတွေကတော့ ရေထဲ နစ်မြုပ်ပြီး ရေခဲ ရိုက်သွားပေမဲ့လည်း အဆင်ပြေနိုင်သေးတယ်...။ ဒါပေမဲ့ ဘိလပ်မြေလို ပစ္စည်းတွေကတော့ အသုံးပြု လို့ ရမှာ မဟုတ်တော့ဘူးပေါ့...။”

ကျားရှန်းက အကြံပြုလိုက်လေသည်။

"ဒါဆိုရင် ဆောက်လက်စ အဆောက်အအုံတွေကို ရှာဖွေကြည့်ရအောင်...။ အပေါ်ထပ်တွေမှာ ဆောက်လုပ်ရေးပစ္စည်းအချို့ ရှိနေနိုင်သေးတယ်...။”

ယောင်ရန်က ခဏမျှ စဉ်းစားလိုက်ပြီး ပြောလိုက်လေ၏။

"အခြေစိုက်စခန်းဆီ သွားဖို့က အနည်းဆုံး ခြောက်လလောက် လိုသေးတာမို့လို့၊ လတ်တလောတော့ ကျွန်မ ဆောက်လုပ်ရေးပစ္စည်းတွေ မစုဆောင်းသေးဘူး...။”

သူမ၏ အတိတ်ဘဝတွင်မူ၊ အခြေစိုက်စခန်းသည် ထိုနေရာသို့ သွားရောက်ကြသော အသက်ရှင်ကျန်ရစ် သူများအတွက် လုံလောက်သော လူနေထိုင်ရာ နေရာများကို ဆောက်လုပ်ပေးနိုင်ခဲ့သည်။ ထိုအချိန်က လူများသည် ကိုယ်ပိုင်အိမ်များကို ကိုယ်တိုင် ဆောက်လုပ်ရန် မလိုအပ်ခဲ့ပေ။ သို့သော်လည်း သူတို့သည် အခြေစိုက်စခန်းအတွင်းရှိ အိမ်တစ်လုံးကို ငှားရမ်းရန် သို့မဟုတ် ဝယ်ယူရန်အတွက် ထပ်ဆောင်း ပေးချေကြရလေသည်။