အခန်း (၂၀၅၃-၂၀၅၄)

အခန်း (၂၀၅၃ ) ဘိုးဘေးကြီးအား ကြွရောက်ပါရန် ရိုသေစွာ ပင့်ဖိတ်အပ်ပါသည်

ချင်ဝူဆန့်သည် ချန်းရွှေနတ်ဘုရားနယ်မြေဆီသို့ အမြန်ဆုံး ပြန်လည်ရောက်ရှိနိုင်ရန်အတွက် လူအများကို ခေါ်ဆောင်မလာခဲ့ဘဲ ချန်ထားခဲ့ရာ၊ ကျန်ရှိနေသောသူများမှာမူ ယခုထက်တိုင် လမ်းခရီး၌သာ ရှိနေကြသေးသည်။

သူသည် ချန်းရွှေနတ်ဘုရားနယ်မြေဆီသို့ ပြန်လည်ရောက်ရှိလာသည့် ပထမဆုံးအချိန်မှာတင်၊ ချင်မျိုးနွယ်စု၏ ဘိုးဘေးခန်းမဆီသို့ ချက်ချင်း ဦးတည်လာခဲ့တော့သည်။

ချင်ဝူဆန့် ပြန်လည်ရောက်ရှိလာသည့် သတင်းကို ကြားသိလိုက်ရသောအခါ၊ ချင်မျိုးနွယ်စု၏ တိုက်ရိုက်အနွယ်ဝင်များနှင့် ဘေးအနွယ်ဝင် အသီးသီးတို့သည် တရဟော လှမ်း၍ လာရောက်ကြလေသည်။

မကြာမီအချိန်အတွင်းမှာတင်၊ ဤနေရာ၌ လူရိပ်လူခြေ ရာဂဏန်းခန့် စုဝေးမိသွားခဲ့ကြတော့သည်။

လူဦးရေ အရေအတွက်မှာ နည်းပါးသည်ဟု ထင်ရသော်လည်း၊ ဤလူများမှာ ဟော်ဆွေ့အနွယ်အဆက်ဖြစ်သော ချင်မျိုးနွယ်စု တစ်ခုလုံး၏ အလုံးစုံသော အင်အားအခြေခံ ခုနစ်ပုံခန့်ကို ကိုယ်စားပြုနိုင်နေပြီ ဖြစ်သည်။

၎င်းတို့ထဲ၌ တစ်ပိုင်းသူတော်စင်များ ပါဝင်နေသကဲ့သို့၊ စွမ်းအင်စုစည်းခြင်း အဆင့် သူတော်စင်များနှင့် ကျင့်ကြံခြင်းအဆင့်အတန်းအရ ချင်ဝူဆန့်နှင့် ရင်ပေါင်တန်းနိုင်သော ကမ္ဘာကြီးသူတော်စင်များပင် ပါဝင်နေခဲ့ကြ၏။

ထိုအထဲမှ အချို့မှာ ဘေးအနွယ်ဝင်များ ဖြစ်ကြပါစေဦးတော့၊ ၎င်းတို့သည်လည်း ဟင်းလင်းပြင် အမြင့်ဆုံးမဟာမိတ်အဖွဲ့အတွင်း၌ အရေးပါသော ရာထူးတာဝန်များကို ထမ်းဆောင်နေကြသူများ သို့မဟုတ် ချင်မျိုးနွယ်စုအတွင်း၌ အရေးကြီးသော ဌာနအသီးသီးကို အုပ်ချုပ်မင်းလုပ်နေကြသည့် ရာထူးကြီး သြဇာရှိသူများသာ ဖြစ်ကြပေသည်။

"ဝူဆန့်…… ဒီတစ်ခေါက် ခရီးစဉ်က အဆင်ပြေချောမွေ့ခဲ့ရဲ့လား"

အဘိုးအိုတစ်ဦး၏ မျက်ဝန်းအစုံထဲ၌ မျှော်လင့်ချက်အရိပ်အယောင်များ ထွက်ပေါ်နေခဲ့သည်။

သူသည်လည်း ကမ္ဘာကြီးသူတော်စင်တစ်ဦးပင် ဖြစ်ပြီး၊ ကျင့်ကြံခြင်းအဆင့်အတန်းမှာ ချင်ဝူဆန့်ထက်ပင် သာလွန်မြင့်မားနေခဲ့သေး၏။

"ပဉ္စမဘိုးဘိုးကြီး…… ဒီတစ်ခေါက် ခရီးစဉ်က အတိုင်းထက်အလွန် အဆင်ပြေချောမွေ့ခဲ့ပါတယ်၊ ဒါကြောင့်မို့လို့လည်း ကျွန်တော်က ဘိုးဘေးခန်းမဆီကို တန်းတန်းမတ်မတ် လာခဲ့ပြီး၊ ဘိုးဘေးကြီး ကိုယ်တိုင် ဆင်းသက်ကြွရောက်လာဖို့အတွက် ပင့်ဖိတ်ရတာပေါ့"

ချင်ဝူဆန့်က ပြုံးပြုံးရွှင်ရွှင်ဖြင့် ဆိုလိုက်သည်။

အတိုင်းထက်အလွန် အဆင်ပြေချောမွေ့ခဲ့တယ် တဲ့

ဘိုးဘေးကြီး ကိုယ်တိုင် ဆင်းသက်ကြွရောက်လာဖို့ ပင့်ဖိတ်မယ် တဲ့

လူတိုင်း၏ စိတ်ဓာတ်များ ချက်ချင်း နိုးကြားတက်ကြွသွားခဲ့ကြပြီး၊ ကြည့်ရသည်မှာ လူတိုင်းလူတိုင်း၏ မျက်ဝန်းထဲ၌ ဝမ်းမြောက်ဝမ်းသာ ဖြစ်နေကြသည့် အရိပ်အယောင်များ ရှိနေသော်လည်း၊ အချို့သော တည်ရှိမှုများ၏ ပျော်ရွှင်မှုမှာမူ သေသေချာချာ ကြည့်လျှင် ခုနစ်ပုံခန့်မှာ ဟန်ဆောင်မှုဖြစ်ပြီး သုံးပုံခန့်သာ အမှန်အကန် ဖြစ်နေခဲ့ရသည်။

ဟော်ဆွေ့ဘိုဘေးကြီးသည် သမာဓိခုံရုံး၏ ဂုဏ်ထူးဆောင် ကောင်းကင်အရှင်မြတ် ဖြစ်လာခဲ့ပြီးသည့်နောက်ပိုင်း၊ ချန်းရွှေနတ်ဘုရားနယ်မြေဆီသို့ မပြန်လာခဲ့သည်မှာ နှစ်ပေါင်းများစွာ ကြာမြင့်နေခဲ့ပြီ ဖြစ်သည်။

ချင်မျိုးနွယ်စု၏ ဘိုးဘေးခန်းမနေရာတစ်ခုတည်း၌သာ၊ သူနှင့် ဆက်သွယ်စကားဆိုနိုင်ခြင်း ရှိပေသည်။

အလွန်တရာ ကြီးမားလှသော ကိစ္စရပ်များ ပေါ်ပေါက်လာခဲ့ပြီး၊ လက်ရှိမျိုးဆက်၏ အိမ်တော်သခင်နှင့် အဘက်ဘက်မှ မျိုးနွယ်စုလူကြီးများ သေသေချာချာ တိုင်ပင်ဆွေးနွေးပြီးမှသာလျှင်၊ ဘိုးဘေးကြီးကို ဆင်းသက်ကြွရောက်လာရန် ပင့်ဖိတ်နိုင်ခြင်း ဖြစ်သည်။

"ဒါဆိုရင်…… ဒီတစ်ခေါက် မင်းရရှိခဲ့တဲ့ အကျိုးအမြတ်က၊ ငါတို့ ချင်မျိုးနွယ်စု အရင်တုန်းက ရှန်းဟုန်အကြွင်းအကျန်တွေကို ဝိုင်းဝန်းလုပ်ကြံခဲ့တဲ့ ဘယ်အကြိမ်ထက်မဆို အဆပေါင်းများစွာ သာလွန်နေတာမျိုးလား"

တစ်စုံတစ်ယောက်က တိုးတိုးလေး ရေရွတ်လိုက်မိ၏။

"ဒါကတော့ သေချာပေါက်ပေါ့ဗျာ၊ အရင်တုန်းက ကျွန်တော်တို့ ဝိုင်းဝန်းလုပ်ကြံခဲ့သမျှ အကြိမ်တိုင်းက ရှန်းဟုန်အကြွင်းအကျန်တွေထဲက ဘေးအနွယ်ဝင်တွေပဲ ဖြစ်ခဲ့တာ၊ အဓိကလူ တစ်ဦးနှစ်ဦးလောက် ပါလာခဲ့ရင်တောင်မှ၊ အဲဒီလူတွေက လွတ်အောင် ပြေးသွားနိုင်ခဲ့ကြတာချည်းပဲ"

"ဒါပေမဲ့ ဒီတစ်ခေါက်မှာတော့၊ ရှန်းဟုန်ရဲ့ အဓိကပုဂ္ဂိုလ်တွေရဲ့ ကိုးပုံခန့်က ပိုက်ကွန်ထဲကို သက်ဆင်းမိသွားခဲ့ကြပြီ"

"ရှန်းဟုန်အကြွင်းအကျန်တွေဟာ နောက်ထပ် နောင်လာမည့် နှစ်ပေါင်းအတန်ကြာတဲ့အထိ ဘယ်လိုနည်းနဲ့မှ လှိုင်းတံပိုး ထပ်မပွားနိုင်တော့ဘူး၊ သူတို့တွေ နောက်ထပ်တစ်ကြိမ် ပြန်လည်ခေါင်းမော့လာနိုင်မယ့် အခွင့်အရေး ဆိုတာလည်း လုံးဝ ရှိလာတော့မှာ မဟုတ်ဘူး"

ချင်ဝူဆန့်က ပါးစပ်ကြီး ဖြဲလျက် ပြုံးရယ်လိုက်ပြီး -

"ကျွန်တော့်ရဲ့ ဒီတစ်ခေါက် ခရီးစဉ်က၊ တစ်ချက်တည်းနဲ့ ရှန်းဟုန်အကြွင်းအကျန်တွေကို အပြီးတိုင် ဖိနှိပ်ခြေမှုန်းပစ်လိုက်တာပဲ "

ရှန်းဟုန်အကြွင်းအကျန်တွေကို အပြီးတိုင် ဖိနှိပ်ခြေမှုန်းပစ်လိုက်တာ ဟုတ်လား။

လူတိုင်း၏ မျက်ဝန်းအစုံထဲ၌ တုန်လှုပ်ခြောက်ခြားသွားသော အရိပ်အယောင်များ ဖြတ်ပြေးသွားခဲ့ကြသည်။

ထို ပဉ္စမဘိုးဘိုးကြီးက မိမိဘာသာ တိုးတိုးလေး ရေရွတ်လိုက်မိသည်။

"ဝူဆန့်ရဲ့ လက်ရုံးရည် အစွမ်းအစကတော့၊ တကယ်ကိုပဲ မြင့်မားလွန်းတာပဲ"

"ပြန်တွေးကြည့်ရင် ငါ ပဉ္စမဘိုးဘိုးကြီး ငယ်ရွယ်စဉ်တုန်းကလည်း၊ ရှန်းဟုန်အကြွင်းအကျန်တွေကို ဝိုင်းဝန်းလုပ်ကြံဖို့အတွက် အကြိမ်ပေါင်းများစွာ စီစဉ်ညွှန်ကြားခဲ့ဖူးတာပဲ"

"ဒါပေမဲ့ အကြိမ်တိုင်းမှာ သူတို့ရဲ့ အဓိကအနှစ်သာရလူတွေက လွတ်အောင် ပြေးသွားနိုင်ခဲ့ကြလို့၊ တစ်ခါတည်းနဲ့ အမြစ်ပြတ်အောင် နှိမ်နင်းဖို့ ခက်ခဲခဲ့ရတာ……"

ဤပဉ္စမဘိုးဘိုးကြီးအပြင်၊ အသက်အရွယ် အလွန်ကြီးရင့်နေပြီဖြစ်သော သက်ကြီးဝါကြီး အများအပြားကလည်း ထပ်တူထပ်မျှသော သက်ပြင်းချ ညည်းတွားမှုများကို ဖော်ထုတ်လာခဲ့ကြသည်။

ပြောရလျှင် ၎င်းတို့၏ မျိုးဆက်တွင်၊ လူတိုင်းလူတိုင်းသည် ရှန်းဟုန်အကြွင်းအကျန်များကို ဝိုင်းဝန်းလုပ်ကြံရန်အတွက် စီစဉ်ညွှန်ကြားခဲ့ဖူးကြပေသည်။

အဘယ်ကြောင့်ဆိုသော် ဝိုင်းဝန်းလုပ်ကြံမှု အောင်မြင်သည့် အကြိမ်တိုင်းတွင်၊ လူသားမျိုးနွယ်စု၏ ကောင်းကျိုးပြု အမှတ်များကို ရရှိနိုင်သောကြောင့် ဖြစ်သည်။

သို့သော်လည်း ချင်ဝူဆန့်၏ မျိုးဆက်သို့ ရောက်ရှိလာသောအခါတွင်မူ၊ ရှန်းဟုန်အကြွင်းအကျန်များမှာ ၎င်း၏လက်ထဲ၌ တစ်ကွက်တည်းနှင့် အကုန်လုံး ဖမ်းဆီးခြင်း ခံလိုက်ရလိမ့်မည်ဟု လုံးဝ ထင်မှတ်မထားခဲ့ကြသဖြင့်၊ အမှန်တကယ်ပင် စိတ်ကူးကြည့်ရန် ခက်ခဲလွန်းလှပေသည်။

"ဝူဆန့်အစ်ကိုကြီး…… မင်းရဲ့ ဒီတစ်ခေါက် အတွေ့အကြုံတွေကို မြန်မြန်လေး ပြောပြပါဦး၊ သေချာပေါက် အလွန်အမင်း စိတ်လှုပ်ရှားဖို့ ကောင်းမှာပဲမလား"

မျိုးဆက်တူ ညီအစ်ကိုတစ်ဦးက ချင်ဝူဆန့်ကို လှမ်း၍ အော်ဟစ်မေးမြန်းလိုက်သည်။

ချင်ဝူဆန့်က တည်ငြိမ်စွာဖြင့် ပြုံးပြလိုက်ပြီး၊ သူ၏ဖခင်ဖြစ်သူ လက်ရှိ ချင်မျိုးနွယ်စု၏ အိမ်တော်သခင် ရှေ့မှောက်သို့ ရောက်မလာသေးသည်ကို မြင်ရသဖြင့်၊ ဤတစ်ခေါက် ဝိုင်းဝန်းလုပ်ကြံမှု ဖြစ်စဉ်တစ်ခုလုံးကို ဖြည်းညှင်းစွာ စတင်၍ ရှင်းလင်းပြောပြလိုက်တော့သည်။

လူတိုင်းမှာ နားထောင်ရင်းဖြင့် ကြောင်အမ်းမှင်တက် သွားခဲ့ကြရသည်။

"ရှန်းဟုန်အကြွင်းအကျန်တွေက ပုရွက်ဆိတ်တွင်းလို နေရာမျိုးအထိ ပုန်းကွယ်နေတာကိုတောင်မှ၊ ဝူဆန့် မင်းက ရှာဖွေတွေ့ရှိသွားလိမ့်မယ်လို့ တကယ်ကို ထင်မှတ်မထားမိဘူး"

အကြီးကဲတစ်ဦးက လေးစားစွာဖြင့် သက်ပြင်းချလိုက်သည်။

"ဆဋ္ဌမဘိုးဘိုးကြီး…… အဓိကကတော့ သူတို့တွေ အရင်တုန်းက သတ္တိကောင်းလွန်းပြီး ရှန်းချန်နတ်ဘုရားနယ်မြေထဲမှာ ပုန်းနေခဲ့ကြတာဗျ၊ ရှန်းချန်နတ်ဘုရားနယ်မြေက ဟင်းလင်းပြင် အဆင့်မြင့်ဆုံးမဟာမိတ်အဖွဲ့ထဲမှာ ဘာမှ ထင်ရှားပေါ်လွင်ခြင်း မရှိတဲ့အတွက်၊ အေးအေးဆေးဆေး ကြီးထွားလာနိုင်မယ်လို့ ထင်နေခဲ့ကြတာ"

"ဘယ်သိပါ့မလဲ၊ ကျွန်တော်တို့ လူသားမျိုးနွယ်စုရဲ့ အခြေခံအုတ်မြစ်တွေက ဒီလောက်အထိ နက်ရှိုင်းခိုင်မာနေခဲ့ပြီဥစ္စာ၊ ရှန်းချန်နတ်ဘုရားနယ်မြေထဲမှာတောင်မှ ကျွန်တော်တို့ရဲ့ သူလျှိုမျက်စိတွေ ရှိနေခဲ့တာပဲ"

ချင်ဝူဆန့်က ရယ်မောလျက် ဆိုလိုက်သည် -

"ဒီတစ်ခေါက်မှာလည်း သူတို့က မဟာမိတ်ဥပဒေတွေကို အသုံးချပြီး ထွက်ပြေးတိမ်းရှောင်သွားခဲ့ကြလို့သာ၊ ကျွန်တော့်အနေနဲ့ သူတို့ကို အမြစ်ပြတ် ဝိုင်းဝန်းလုပ်ကြံနိုင်မယ့် အခွင့်အရေး ရရှိခဲ့ပြီး၊ နောက်ပိုင်းမှာ ဒီ နယ်မြေကိုးခု တိုက်ပွဲကြီး ဖြစ်ပွားလာခဲ့တာပေါ့"

"ဒါဆိုရင်တော့ ဒီတစ်ခေါက်မှာ၊ သေချာပေါက် သူတို့ကို တစ်ကွက်တည်းနဲ့ အကုန်လုံး ဖမ်းဆီးနိုင်ခဲ့တာပဲ၊ အဲဒီ ရှန်းဟုန်အကြွင်းအကျန်တွေရဲ့ ဝိညာဉ်တွေကျတော့ ရော……"

"ပဉ္စမဘိုးဘိုးကြီး…… အဓိကလူတွေ ဖြစ်တဲ့ တည်ရှိမှုတွေကသာ အရေးအကြီးဆုံးမို့လို့၊ ကျွန်တော်က အဲဒီ အဓိကလူတွေကို အရှင်ဖမ်းမိပြီးတာနဲ့ ချက်ချင်း ပြန်လာခဲ့တာပါ၊ ဒါပေမဲ့ ကျွန်တော့်လက်အောက်က တပ်စခန်းကြီး ခြောက်ခုကတော့ နယ်မြေကိုးခုမှာ ဆက်ပြီး ဝိုင်းဝန်းလုပ်ကြံနေတုန်းပဲ"

"စဉ်းစားကြည့်ရင် နှစ်ပေါင်းရာချီ ကုန်လွန်သွားခဲ့ပြီဆိုတော့၊ အဲဒီကိစ္စတွေလည်း ပြီးပြတ်လောက်ပါပြီ၊ အဲဒီ ဝိညာဉ်တွေအကုန်လုံးလည်း သေချာပေါက် ဝိညာဉ်မျိုးနွယ်စုဆီကို ပို့ဆောင်ပြီးလောက်ပြီ ဖြစ်မှာပါ"

ချင်ဝူဆန့်က ဆိုလိုက်၏။

"ဒါဆိုရင်လည်း ကောင်းတာပေါ့"

"အဲဒီအချိန်ကျရင် ဟော်ဆွေ့ဘိုးဘေးကြီးက စကားတစ်ခွန်းနှစ်ခွန်းလောက် မိန့်ကြားလိုက်ရုံနဲ့တင်၊ အဲဒီ ဝိညာဉ်တွေအကုန်လုံးက ကျွန်ဘဝတပ်သားတွေရဲ့ သံသရာစက်ဝိုင်းထဲကို အပြီးတိုင် ပစ်ချခြင်းခံရမှာဖြစ်ပြီး၊ ဘယ်သောအခါမှ လူပြန်မဖြစ်နိုင်တော့ဘူးပေါ့"

"နှမြောစရာပဲ၊ အကယ်၍ ဝိညာဉ်မျိုးနွယ်စုကသာ အဲဒီလိုမျိုး ခေါင်းမာပြီး စည်းကမ်းကြီးမနေခဲ့ဘူးဆိုရင်၊ ငါတို့အနေနဲ့ ဒီ ရှန်းဟုန်အကြွင်းအကျန်တွေရဲ့ ဝိညာဉ်တွေကို ကိုယ့်လက်ထဲမှာတင် သိမ်းထားလို့ ရတာ၊ ငါ့ရဲ့ အတွင်းကမ္ဘာနယ်မြေထဲမှာတင် ရုပ်သေးရုပ်တွေ ဖြည့်ဆည်းဖို့ လိုအပ်နေတာနဲ့ ကွက်တိပဲ၊ သူတို့ရဲ့ ဝိညာဉ်တွေက ရုပ်သေးရုပ်တွေ သွန်းလုပ်ဖို့အတွက် အလွန်ကောင်းတဲ့ ပစ္စည်းကြမ်းတွေလေ"

ကမ္ဘာကြီးသူတော်စင်အဆင့်ရှိသော အဘွားအိုတစ်ဦးက တိုးတိုးလေး ရေရွတ်လိုက်ရင်း၊ မျက်ဝန်းအစုံထဲ၌ နှမြောတသဖြစ်ရသည့် အရိပ်အယောင်များ ပေါ်ပေါက်လာခဲ့သည်။

အတိအကျ ဤအချိန်မှာတင်၊ ကောင်းကင်ယံထက်၌ ရုတ်တရက် ထူးခြားဆန်းပြားသော နိမိတ်လက္ခဏာများ ပေါ်ပေါက်လာခဲ့၏။

တောက်ပလှသော နေမင်းကြီးကဲ့သို့ ခန့်ညားထည်ဝါလှသော အတွင်းကမ္ဘာနယ်မြေတစ်ခုသည်၊ ဖြည်းညှင်းစွာ ကမ္ဘာလောကထဲသို့ ထင်ဟပ်ပေါ်ပေါက်လာခဲ့သည်။

၎င်း၏ ပေါ်ပေါက်လာမှုသည်၊ ချက်ချင်းပင် ထိုနေရာ၌ ရှိနေသော လူတိုင်း၏အပေါ်သို့ အတိုင်းအဆမဲ့ လေးလံထိုင်းမှိုင်းလှသော ဖိအားကြီးကို သက်ရောက်စေခဲ့တော့သည်။

ကမ္ဘာကြီးသူတော်စင်များ ဖြစ်ကြပါစေဦးတော့၊ မိမိကိုယ်ကိုယ် ပုရွက်ဆိတ်တစ်ကောင်ကဲ့သို့ သေးငယ်သိမ်ဖျင်းလှသည်ဟု ခံစားလိုက်ကြရပေသည်။

ဒါက ကောင်းကင်နိမိတ် သူတော်စင်အဆင့်ရဲ့ အရှိန်အဝါပဲလား……

ဘိုးဘိုးကြီး အနည်းငယ်မှာ စိတ်ထဲမှနေ၍ တိတ်တဆိတ် သက်ပြင်းချ လေးစားမိနေခဲ့ကြသည်။

ချင်ဝူဆန့်၏ မျက်ဝန်းထဲ၌လည်း မျှော်လင့်တောင့်တရသည့် အရိပ်အယောင်များ ထွက်ပေါ်လာခဲ့သည်။

အတွင်းကမ္ဘာနယ်မြေထဲမှနေ၍ မကြာမီမှာတင် ပုံရိပ်တစ်ခု လျှောက်လှမ်းထွက်ပေါ်လာခဲ့ပြီး၊ လူတိုင်း၏ ရှေ့မှောက်ဆီသို့ သက်ဆင်းလာခဲ့သည်။

ထိုရောက်ရှိလာသူ၏ ရုပ်ရည်သွင်ပြင်မှာ ရိုးရိုးသာမန်မျှသာ ဖြစ်ပြီး၊ ကြည့်ရသည်မှာ အသက်လေးဆယ်ကျော်အရွယ်ခန့် ရှိပုံရကာ၊ မျက်ခုံးမျက်ကွင်း အထားအသိုမှာ ချင်ဝူဆန့်နှင့် အနည်းငယ်မျှ ဆင်တူလှပေသည်။

"ကျွန်တော်မျိုးတို့…… အိမ်တော်သခင်ကို ဂါရဝပြုပါတယ် "

လူတိုင်းက ညီညီညာညာဖြင့် ဦးညွတ်အလေးပြုလိုက်ကြ၏။

ထိုရောက်ရှိလာသူသည်၊ အခြားသူမဟုတ်ဘဲ ချင်မျိုးနွယ်စု၏ လက်ရှိမျိုးဆက် အိမ်တော်သခင် ဖြစ်သလို၊ ချင်ဝူဆန့်၏ ဖခင်ဖြစ်သူ ချင်ကွမ်လင် ပေတည်း။

"ဝူဆန့်…… မင်း ဒီကိစ္စရဲ့ အစအဆုံး အကြောင်းအရင်းကို နောက်ထပ်တစ်ကြိမ် ပြန်ပြီး ပြောပြပါဦး၊ အဲဒီနောက်မှာ အကဲဖြတ်လူကြီးတွေလည်း အကုန်လုံး ရောက်နေကြတာနဲ့ မို့လို့၊ငါတို့တွေ ဘိုးဘေးကြီးကို ပင့်ဖိတ်ဖို့ သင့်၊ မသင့်ဆိုတာကို အတူတူ တိုင်ပင်ဆွေးနွေးကြတာပေါ့"

ချင်ကွမ်လင်က လေးနက်သော အသံဖြင့် ဆိုလိုက်သည်။

ချင်ဝူဆန့်သည် နောက်ထပ်တစ်ကြိမ် ဖြစ်စဉ်တစ်ခုလုံးကို ပြန်လည်၍ ရှင်းလင်းပြောပြလိုက်ပြန်သည်။

ထိုနေရာ၌ ရှိနေသော မဟာလောက အကဲဖြတ်လူကြီးများမှာ တစ်ဦးကိုတစ်ဦး လှမ်း၍ ကြည့်လိုက်ကြပြီး၊ ၎င်းတို့ထဲမှ တစ်ဦးက ကိုယ်စားလှယ်အဖြစ် ရှေ့သို့ထွက်ကာ ချင်ကွမ်လင်ဆီသို့ လက်ယှက်ဂါရဝပြုလျက် -

"အိမ်တော်သခင်…… ကျွန်တော်တို့လို အဘိုးအိုတွေ ထင်မြင်တာကတော့၊ ဒီကိစ္စက ပတ်သက်ဆက်နွှယ်မှု အလွန်ကြီးမားလွန်းတဲ့အတွက်၊ သေချာပေါက် ဟော်ဆွေ့ဘိုးဘေးကြီးကို ကြွရောက်လာဖို့ မိန့်ကြားပင့်ဖိတ်ရပါလိမ့်မယ်"

"တခြား ကွဲလွဲတဲ့ သဘောထားတွေ မရှိကြတော့ဘူးလား"

ချင်ကွမ်လင်က မေးမြန်းလိုက်၏။

လူတိုင်းက ခေါင်းခါပြကြသည်။

ချင်ကွမ်လင်သည် အကြိမ်ကြိမ် သေသေချာချာ အတည်ပြုပြီးနောက်မှသာ၊ ဖြည်းညှင်းစွာ ခေါင်းညိတ်ပြလိုက်ပြီး၊ ထို့နောက် လူအများကို ခေါ်ဆောင်လျက် ဘိုးဘေးခန်းမ၏ နန်းဆောင်မကြီးထဲသို့ ဖြည်းညှင်းစွာ လျှောက်လှမ်းဝင်ရောက်သွားခဲ့တော့သည်။

ဤနေရာသို့ ဝင်ရောက်လာကြသော ချင်မျိုးနွယ်စုဝင်တိုင်းသည်၊ တစ်ဦးတစ်ယောက်မျှမကျန် အလိုအလျောက်ပင် ကြည်ညိုရိုသေစိတ်များ ဖြစ်ပေါ်လာခဲ့ကြရပြီး၊ မျက်ဝန်းအစုံထဲ၌ ရိုသေကိုးကွယ်မှု အရိပ်အယောင်များမှတစ်ပါး အခြားသော အရောင်အသွေးများ လုံးဝ ရှိမနေခဲ့ကြချေ။

"ချင်မျိုးနွယ်စုမှ ချင်ကွမ်လင်သည်၊ ချင်မျိုးနွယ်စု၏ သားသမီး မြေးမြစ် အဆက်ဆက်တို့ကို ဦးဆောင်လျက်၊ ဘိုးဘေးကြီးအား ကြွရောက်ပါရန် ရိုသေစွာ ပင့်ဖိတ်အပ်ပါသည် "

ချင်ကွမ်လင်သည် မြင့်မားလှသော နေရာ၌ ရှိနေသည့် ဘိုးဘေးကြီး၏ ရုပ်တုဆီသို့ လှမ်းကြည့်လိုက်ကာ၊ မျက်ဝန်းထဲ၌ ရိုသေကျိုးနွံမှုများဖြင့် ပြည့်နှက်လျက်၊ လူအများကို ဦးဆောင်ကာ ကိုယ်ကိုညွတ်၍ ဂါရဝပြုလိုက်တော့သည်။

သူ၏ အသံမှာ ကျယ်လောင်လှခြင်း မရှိသော်လည်း၊ ဘိုးဘေးခန်းမ နန်းဆောင်ကြီးကို ဖောက်ထွက်သွားနိုင်စွမ်း ရှိနေခဲ့ရုံမျှမက၊ ချင်မျိုးနွယ်စုတစ်ခုလုံး၏ နယ်မြေအဝန်းအဝိုင်းဆီသို့ပါ ပျံ့နှံ့သွားစေခဲ့သည်။

ထို့နောက်တွင် ချင်ဝူဆန့်နှင့် အခြားသောသူများသည်လည်း ချင်ကွမ်လွင်နှင့်အတူ၊ ဟော်ဆွေ့ဘိုးဘေးကြီး ကြွရောက်လာပါရန် ညီညာဖျဖျဖြင့် ရိုသေစွာ ပင့်ဖိတ်လိုက်ကြတော့သည်။

၎င်းတို့၏ အသံများမှာ လိမ့်ဆင်းလာသော မိုးခြိမ်းသံကြီးများကဲ့သို့၊ ရေတွက်၍မကုန်နိုင်သော လူအများ၏ နားစည်ထဲ၌ တရစပ် မြည်ဟည်းသွားခဲ့လေသည်။

လူအပေါင်းမှာ ဘာကိစ္စဖြစ်ပျက်နေမှန်း လုံးဝ မသိရှိကြသဖြင့်၊ အချိန်တိုအတွင်းမှာတင် ထိတ်လန့်တုန်လှုပ်လျက် ဝေခွဲမရ ဖြစ်သွားခဲ့ကြရ၏။

ခန့်မှန်းရသလောက် လက်ဖက်ရည်တစ်ခွက်စာခန့် အချိန်ကုန်လွန်သွားခဲ့ပြီးနောက်၊ ကောင်းကင်ကြီးမှာ အကြီးအကျယ် ပြောင်းလဲသွားခဲ့တော့သည်။

လှိမ့်ဝင်လာသော တိမ်တိုက်များ၏ ကြားထဲမှနေ၍၊ ကောင်းကင်ယံ ကမ္ဘာမြေကြီးတစ်ခုလုံးကို ပြည့်နှက်သွားစေတော့မည့် အလွန်တရာ ကြီးမားထည်ဝါလှသော ပုံရိပ်ကြီးတစ်ခုသည်၊ ဖြည်းညှင်းစွာ ထွက်ပေါ်လာခဲ့သည်ကို မြင်တွေ့လိုက်ကြရသည်။

"ဟော်ဆွေ့ဘိုးဘေးကြီး ပါလား"

ရေတွက်၍မကုန်နိုင်သော လူအများက ထိတ်လန့်တုန်လှုပ်စွာဖြင့် အော်ဟစ်လိုက်ကြသည်။

၎င်းတို့ထဲမှ အချို့မှာ ယခုဘဝတွင် ဟော်ဆွေ့ဘိုးဘေးကြီး၏ ရုပ်သွင်အစစ်အမှန်ကို ပထမဆုံးအကြိမ် မြင်တွေ့ဖူးကြခြင်း ဖြစ်သဖြင့်၊ အလွန်အမင်း စိတ်လှုပ်ရှားလွန်း၍ မိမိကိုယ်ကိုယ် ထိန်းချုပ်နိုင်ခြင်း မရှိကြတော့ဘဲ၊ တရစပ် မြေကြီးပေါ်သို့ ဒူးထောက်လျက် ဦးချဂါရဝပြုလိုက်ကြတော့သည်။

ဖန့်ချန် ရှိနေသော အတွင်းကမ္ဘာနယ်မြေထဲ၌လည်း၊ ထိုပုံရိပ်ကြီးသည် အတိအကျ ဤအချိန်မှာတင် ကုလားကာအလင်းပိတ်ကြီးတစ်ခုလုံးကို အပြည့် ဖုံးလွှမ်းသွားခဲ့လေသည်။

ချီယန်သူတော်စင်သည် ထိုပုဂ္ဂိုလ်ကြီးကို ငေးမောကြည့်ရှုရင်းဖြင့် ကြောင်အမ်းသွားခဲ့ရပြီး၊ မသိစိတ်အရ ဆိုလိုက်မိသည်။

"ဒါဆိုရင်…… ဒီပုဂ္ဂိုလ်ကြီးကတောင်မှ မင်း သူ့ကို စောင့်ကြည့်နေတာကို လုံးဝ ရိပ်မိခြင်း မရှိတာလား……"

သူသည် ရုတ်တရက် ဖန့်ချန်၏ အတွင်းကမ္ဘာနယ်မြေ၏ ဆန်းကြယ်ထူးခြားလှသော စွမ်းအားအပေါ် စူးစမ်းသံသယစိတ်များ ပြင်းထန်စွာ ဝင်ရောက်လာခဲ့ရတော့သည်။

အခန်း (၂၀၅၄) ဘိုးဘေးကြီး၊ ကျွန်တော် မှားခဲ့ပါတယ်

ဖန့်ချန်သည် ဟော်ဆွေ့ဘိုးဘေးကြီး၏ ပုံပန်းသဏ္ဌာန်ကို မြင်တွေ့ရသည်မှာ ယခုမှ ပထမဆုံးအကြိမ် ဖြစ်သည်။

သူ၏ ထူးခြားချက်ဟု ဆိုရမည်ဆိုလျှင်၊ မိမိ၏ စိတ်အာရုံထဲ၌ ထိုပုဂ္ဂိုလ်၏ ရုပ်သွင်ကို မည်သို့မျှ မှတ်သားထား၍ မရခြင်းပင် ဖြစ်သည်။

မျက်စိရှေ့တည့်တည့်၌ ထိုပုဂ္ဂိုလ်ကို စိုက်ကြည့်နေပါလျက်နှင့်ပင်၊ သူ၏ ရုပ်ရည်ကို အဘယ်ကြောင့် မှတ်မိခြင်း မရှိသနည်းဟု ဆိုရလောက်အောင်ပင် ဖြစ်သည်။

ထိုပုဂ္ဂိုလ်၏ ရုပ်ရည်မှာ လူကြီးဖြစ်သလော သို့မဟုတ် လူငယ်ဖြစ်သလောဟူသော အချက်ကိုပင် သူ၏ စိတ်အာရုံ၌ မည်သည့် သဘောတရားမျှ ရှိမနေခဲ့ပေ။

"ဒါက ကောင်းကင်အရှင်မြတ် သူတော်စင်တွေရဲ့ စွမ်းရည်ပဲလား……"

ဖန့်ချန် စိတ်ထဲ၌ သက်ပြင်းချမိသည်။

သို့သော်လည်း ဤသို့သော တည်ရှိမှုမျိုး၏ ရုပ်သွင်ကို မှတ်မိနေခြင်းဖြင့်လည်း မည်သည့်အရာမှ ထူးခြားလာမည် မဟုတ်ပေ။

ဝမ်ချုံစန်းပင်လျှင် အဆုံးမရှိသော ကိုယ်ပွားတည်ဆောက်ပုံ အမျိုးမျိုး ရှိနိုင်သေးသည်၊ သမာဓိခုံရုံးမှ ဂုဏ်ထူးဆောင် ကောင်းကင်အရှင်မြတ်တစ်ပါးကိုမူ ဆိုဖွယ်ရာ ရှိတော့မည်လော။

ထိုအချိန်၌

ဟော်ဆွေ့ဘိုးဘေးကြီးသည် ဘိုးဘေးခန်းမ၏ နန်းဆောင်ကြီးအတွင်းသို့ ရောက်ရှိလာခဲ့ပြီ ဖြစ်သည်။

ဖန့်ချန်နည်းတူပင်၊ ချင်ကွမ်လင် အပါအဝင် ထိုနေရာရှိ လူအားလုံးမှာလည်း ဟော်ဆွေ့ဘိုးဘေးကြီး၏ ပုံပန်းသဏ္ဌာန်ကို မှတ်မိနိုင်ခြင်း မရှိကြပေ။

သူတို့မှာလည်း ဘိုးဘေးကြီးကို တောက်လျှောက် စိုက်ကြည့်ရန် ရဲဝံ့ခြင်းမရှိဘဲ၊ ရိုသေလေးစားစွာဖြင့် ခေါင်းငုံ့ထားကြသည်။

ချင်ဝူဆန့် တစ်ယောက်တည်းသာလျှင် စိတ်လှုပ်ရှားစွာဖြင့် တစ်စုံတစ်ခုကို ပြောပြနေသည်။

စကားပြော၍ အဆုံးသတ်တွင်၊ ချင်ဝူဆန့်မှာ လက်ဝါးကို ဝှေ့ယမ်းလိုက်ပြီး သူ၏ အတွင်းကမ္ဘာနယ်မြေထဲမှ ပုံရိပ်တစ်ခုပြီးတစ်ခုကို ထုတ်လွှတ်လိုက်သည်။

ထိုအထဲ၌ ယွမ်ဟယ် ၊ အဘိုး နှင့် နယ်မြေကိုးခုမှ ယန်နတ်ဘုရား အသီးသီးတို့ ပါဝင်နေသည်။

"ဘိုးဘေးကြီး၊ ဒီလူတွေကတော့ ရှန်းဟုန်အကြွင်းအကျန်တွေထဲက အဓိကလူတွေပဲ ဖြစ်ပါတယ်"

ချင်ဝူဆန့်က စိတ်လှုပ်ရှားစွာဖြင့် ဆိုလိုက်သည်။

သူသည် အခြားသူများနှင့် မတူပေ။ ဟော်ဆွေ့ဘိုးဘေးကြီး၏ ရုပ်သွင်ကို မြင်နိုင်ရန် ကြိုးစားကြည့်ရှုသော်လည်း၊ မည်သို့မျှ ကြည့်၍ မရနိုင်သေးပေ။

စိတ်ထဲ၌ နောင်တရခြင်းမျိုး မရှိသည့်အပြင်၊ ပိုမိုမြင့်မားသော လေးစားတောင့်တသည့် စိတ်ဓာတ်သာ တိုးပွားလာခဲ့သည်။

"ဟော်ဆွေ့ဘိုးဘေးကြီး"

ယဠမ်ဟယ်က ထိုပုံရိပ်ကို ကြည့်လိုက်ရာ၊ မျက်ဝန်းအစုံထဲ၌ မှေးမှိန်သော အပြုံးတစ်ခု ပေါ်လာခဲ့သည်။

သူက ဟော်ဆွေ့ဘိုးဘေးကြီးအား လုံလောက်သော ရိုသေမှု မပေးသည်ကို မြင်လိုက်ရသောအခါ၊ ချင်မျိုးနွယ်စုမှ သူတော်စင်များမှာ ထိုနေရာ၌ပင် ဒေါသထွက်သွားကြပြီး ယွမ်ဟယ်ကို အမျက်ဒေါသဖြင့် စိုက်ကြည့်လိုက်ကြသည်။

"မင်းတို့တွေက လမ်းလွဲတစ်ခုကို ရွေးချယ်လိုက်တာပဲ"

ဟော်ဆွေ့ဘိုးဘေးကြီးက ယွမ်ဟယ်ကို ကြည့်၍ အေးဆေးစွာ ပြုံးလျက် ဆိုလိုက်သည်။

"လမ်းလွဲမလွဲဆိုတာကို ခဏထားလိုက်ပါဦး၊ ဟော်ဆွေ့ဘိုးဘေးကြီးအနေနဲ့ ကျွန်တော်တို့ကို ဘယ်လိုစီစဉ်ပေးဖို့ ရည်ရွယ်ထားတာလဲ"

ယွမ်ဟယ်က ပြုံးလျက် ဆိုသည်။

"ကျွန်တော်တို့ ရွေးလိုက်တဲ့ ဒီလမ်းလွဲက ဘာအောင်မြင်မှုမှ မရှိတာ မှန်ပေမယ့်၊ ထူးခြားတဲ့ အချက်တစ်ခုတော့ ရှိတယ်၊ အဲဒါကတော့ ကျွန်တော်တို့ သေဖို့ တော်တော်ခက်တယ် ဆိုတာပါပဲ"

သေဖို့ တော်တော်ခက်တယ် ဟုတ်လား

ဟော်ဆွေ့ဘိုးဘေးကြီးတောင်မှ သူတို့ကို အမြစ်ပြတ် မရှင်းလင်းနိုင်ဘူးလား။

လူတိုင်း၏ မျက်ဝန်းထဲ၌ မှေးမှိန်သော အထင်သေးသည့် အရိပ်အယောင်များ ပေါ်လာခဲ့သည်။

သို့သော် ဟော်ဆွေ့ဘိုးဘေးကြီးကမူ ဖြည်းညှင်းစွာ ခေါင်းညိတ်လိုက်ပြီး -

"မင်းတို့ ရွေးလိုက်တဲ့ ဒီလမ်းကြောင်းက တကယ်ပဲ သေဖို့ ခက်ခဲတာ၊ ငါကိုယ်တိုင်တောင် မင်းတို့ကို အပြီးတိုင် သတ်ပစ်ချင်ရင်တောင်မှ အားစိုက်ထုတ်ရဦးမှာမို့လို့၊ တွက်ခြေမကိုက်ဘူး"

လူတိုင်းမှာ လွန်စွာ တုန်လှုပ်ချောက်ချားသွားကြသည်။

မျက်စိရှေ့က ရှန်းဟုန်အကြွင်းအကျန်များ၏ ကျင့်ကြံခြင်းအဆင့်မှာ သူတို့ထက်ပင် နိမ့်ကျနေသေးသည်။

ဟော်ဆွေ့ဘိုးဘေးကြီးနှင့် ယှဉ်လျှင် နတ်ဘီလူးကြီးနှင့် ပုရွက်ဆိတ်၏ ကွာခြားချက်သာ ရှိပေသည်။

နတ်ဘီလူးကြီးတစ်ယောက်က ပုရွက်ဆိတ်တစ်ကောင်ကို နင်းသတ်ဖို့တောင် အားအင်အများကြီး စိုက်ထုတ်ရဦးမည်လော။

အဘယ်ကြောင့်နည်း။

"မင်းတို့တွေက ဘဝပေါင်းများစွာ ပြန်လည်ဝင်စားခဲ့ကြပြီးပြီ၊ မင်းတို့ အရင်က ဘယ်သူတွေ ဖြစ်ခဲ့လဲဆိုတာ ခွဲခြားရတာ ခက်ခဲတယ်၊ ဒါပေမဲ့ ကြည့်ရတာ……"

"မင်းတို့တွေကတော့ ငါ့ကို မှတ်မိနေသေးပုံပဲ"

ဟော်ဆွေ့ဘိုးဘေးကြီးက ရယ်မောလျက် ဆိုလိုက်သည်။

"ငါတို့ လူသားမျိုးနွယ်စုက မင်းတို့ ရှန်းဟုန်အနွယ်တွေကို အကြိမ်ပေါင်းများစွာ ချေမှုန်းခဲ့တာတောင်မှ အမြဲတမ်း လွတ်မြောက်သွားခဲ့ကြတာ၊ ဒါပေမဲ့ ဒီတစ်ခါတော့ ဘာလို့ ငါတို့မျိုးနွယ်စုရဲ့ နောက်မျိုးဆက်လက်ထဲမှာပဲ ပိတ်မိသွားရတာလဲ"

"ဒီလောက်နှစ်ပေါင်းများစွာ ကြာသွားတော့ မင်းတို့တွေရဲ့ စွမ်းအားတွေ ကုန်ခမ်းသွားပြီလား"

ချင်ဝူဆန့်၏ မျက်ဝန်းထဲ၌ အပြုံးတစ်ခု ပေါ်လာခဲ့သည်။

ဟော်ဆွေ့မျိုးနွယ်စုအနေဖြင့် နှစ်ပေါင်းများစွာ မအောင်မြင်ခဲ့သည့် တာဝန်ကို ယခုအခါ သူက အောင်မြင်အောင် လုပ်နိုင်ခဲ့ပြီဖြစ်ရာ၊ မည်သို့လျှင် မပျော်ရွှင်ဘဲ ရှိပါ့မလဲ။

ဤသို့သာ မဟုတ်လျှင် သူသည်လည်း အောင်မြင်ကြောင်း သတင်းစကား ပို့ရန် ချက်ချင်း လာရောက်မည် မဟုတ်ပေ။

ဖြစ်နိုင်သည်မှာ ဤတစ်ကြိမ် အောင်မြင်မှုသည် သူ၏ ကောင်းကင်နိမိတ်သူတော်စင်အဆင့်သို့ တက်လှမ်းရန် လက်မှတ်ဖြစ်ပေလိမ့်မည်။

"ကျွန်တော်တို့လည်း ဘာလို့လဲဆိုတာ မသိဘူး၊ ဖြစ်နိုင်တာကတော့ ကျွန်တော်တို့ ပင်ပန်းနေလို့များလား"

ဖန့်ကျန့်ထျန်းက အေးဆေးစွာ ပြုံးလျက် ဆိုလိုက်သည်။

ဟော်ဆွေ့ဘိုးဘေးကြီးသည် ရုတ်တရက် စကားမပြောဘဲ တိတ်ဆိတ်သွားပြီး ယွမ်ဟယ်တို့အဖွဲ့ကို အချိန်အတော်ကြာ စူးစိုက်ကြည့်နေခဲ့ကာ ရုတ်တရက် ချင်ဝူဆန့်ကို လှည့်၍ -

"ကျန်ရှိနေတဲ့ လူသားဝိညာဉ်တွေက ဘယ်သူ့လက်ထဲမှာလဲ"

"ဘိုးဘေးကြီး ရွှမ်အီ ဝိညာဉ်ဖမ်းတမန် လက်ထဲမှာ ရှိပါတယ်"

"အင်း"

ဟော်ဆွေ့ဘိုးဘေးကြီး၏ ခန္ဓာကိုယ်သည် အနည်းငယ် လှုပ်ခါသွားပြီး လူတိုင်း၏ အမြင်အာရုံထဲမှ ခဏတာ ပျောက်ကွယ်သွားသကဲ့သို့ ဖြစ်သွားခဲ့ရာ၊ သူ ပြန်ပေါ်လာသည့်အခါတွင်မူ မျက်နှာပေါ်ရှိ အပြုံးမှာ ပျောက်ကွယ်သွားခဲ့ပြီ ဖြစ်သည်။

"ရွှမ်အီ ဝိညာဉ်ဖမ်းတမန်က ဝိညာဉ်မျိုးနွယ်စုရဲ့ တားမြစ်ချက်ကို ချိုးဖောက်တဲ့အတွက် သံသရာစက်ဝိုင်းထဲကို ပစ်ချခြင်း ခံလိုက်ရပြီ"

"သူ့နောက်ကွယ်က အကြီးကဲကလည်း ထိုက်တန်တဲ့ အပြစ်ပေးခြင်းကို ခံလိုက်ရပြီ"

ဟော်ဆွေ့ဘိုးဘေးကြီးက ချင်ဝူဆန့်ကို ကြည့်ကာ အေးဆေးစွာ ဆိုသည်။

ချင်ဝူဆန့်မှာ နားမလည်နိုင်ဖြစ်ကာ တွေဝေနေခဲ့သည်။

သို့သော် ချင်ကွမ်လင်နှင့် အခြားသူများမှာမူ တစ်စုံတစ်ခုကို သတိရသွားပုံရပြီး မျက်နှာအမူအရာမှာ ရုတ်တရက် အလွန်တရာ ဆိုးရွားသွားခဲ့သည်။

"ဒါဆိုရင်……"

သူတို့မှာ ဆက်၍ စဉ်းစားရန်ပင် ကြောက်ရွံ့နေကြသည်။

"ဘိုးဘေးကြီး၊ ဒါက ဘာကြောင့်လဲဆိုတာကို သိခွင့်ရှိမလား အဲဒီ လူသားဝိညာဉ်တွေက လက်ရှိမှာတော့……"

ချင်ဝူဆန့်က အလျင်အမြန် မေးမြန်းလိုက်သည်။

ယွမ်ဟယ်တို့အဖွဲ့၏ မျက်နှာပေါ်ရှိ အပြုံးများမှာ ထူးဆန်းနေသည်ကို သူ သတိထားမိလိုက်ရာ စိတ်ထဲတွင် ရုတ်တရက် ကြောက်ရွံ့မှုများ ဖြစ်ပေါ်လာခဲ့သည်။

"အဲဒီ ဝိညာဉ်မျိုးနွယ်စုရဲ့ ဝိညာဉ်တွေက အာဏာကို ကျော်လွန်ပြီး ဆောင်ရွက်မှုတွေကြောင့်၊ လူသားမျိုးနွယ်စုရဲ့ နတ်ဘုရားနယ်မြေ ခုနစ်ခုထဲကို အကုန်လုံး ပို့ဆောင်ပြီးသွားပြီ"

ဟော်ဆွေ့ဘိုးဘေးကြီးက အေးဆေးစွာ ဆိုလိုက်သည်။

"ဒါက ရှန်းဟုန်အနွယ်ရဲ့ 'သေခြင်းမှတစ်ဆင့် အသက်ရှင်ခြင်း' ပဲ ဖြစ်တယ်၊ ဒီကစပြီး ရှန်းဟုန်အကြွင်းအကျန်တွေဟာ အဖွဲ့အစည်းပျက်ပြားသွားပြီး တစ်ယောက်ချင်းစီကို ပြန်ရှာဖို့ဆိုတာ လုံးဝ မဖြစ်နိုင်တော့ဘူး"

"ဘယ်လိုလုပ်ပြီး ဖြစ်နိုင်မှာလဲ ကျွန်တော်တို့ လူသားမျိုးနွယ်စုက ရှန်းဟုန်အနွယ်ကို အမြစ်ပြတ် ရှင်းလင်းထားတာ၊ ဘယ်လိုပဲဖြစ်ဖြစ် သူတို့တွေက ကျွန်တော်တို့ နတ်ဘုရားနယ်မြေ ခုနစ်ခုရဲ့ သံသရာထဲကို ဝင်ရောက်ဖို့ အရည်အချင်း မရှိဘူးလေ……"

ချင်ဝူဆန့်က အော်ဟစ်လိုက်မိသည်။

သေချာပေါက် စဉ်းစားရမည်ဆိုလျှင် လူသားမျိုးနွယ်စုနှင့် ရှန်းဟုန်အကြွင်းအကျန်မှာ တစ်မျိုးနွယ်စုတည်း မဟုတ်ကြတော့သလို၊ နှစ်ဦးစလုံး၏ အထွတ်အထိပ် အရိုးများလည်း တစ်ခုနှင့်တစ်ခု မျှဝေသုံးစွဲခြင်း မပြုကြပေ။

ဤသည်မှာ ဟော်ဆွေ့မျိုးနွယ်စုမှ ရှန်းဟုန်အကြွင်းအကျန်များကို အပြီးတိုင် ပိတ်ဆို့ထားခြင်းကြောင့်ပင် ဖြစ်သည်။

"ကိစ္စရပ်တွေကို ငါ အကြမ်းဖျင်းတော့ နားလည်သွားပြီ၊ ရှန်းဟုန်အကြွင်းအကျန်တွေထဲမှာ ဝိညာဉ်မျိုးနွယ်စုရဲ့ တန်ဖိုးထားမှုကို ခံရသူတစ်ယောက် ရှိနေတယ်၊ သူမက အခြား ရွက်ဆိတ်တွင်း တစ်နေရာမှာ ပုန်းအောင်းနေပြီး ဝိညာဉ်မျိုးနွယ်စုနဲ့ ပြန်လည်ဆက်သွယ်ပြီး ဒီလိုကြီးမားတဲ့ အကွက်ကို တဖြည်းဖြည်း ချမှတ်ထားခဲ့တာပဲ"

ဟော်ဆွေ့ဘိုးဘေးကြီးက ဆိုလိုက်သည် -

"မင်းက ရှန်းဟုန်အကြွင်းအကျန်တွေရဲ့ တည်နေရာကို သိလိုက်တဲ့အချိန်မှာတင်၊ မင်းက ကစားကွက်ထဲကို ဝင်မိသွားပြီ"

"မင်း သူတို့ကိုခေါ်ပြီး ငါ့ဆီကို လာပြတဲ့အချိန်မှာ၊ အဲဒီ ရှန်းဟုန်အကြွင်းအကျန်တွေရဲ့ ဝိညာဉ်တွေက သံသရာထဲကို ရောက်နှင့်နေပြီ"

"ဒါ……"

ချင်ဝူဆန့်၏ မျက်နှာမှာ ဖြူဖျော့သွားခဲ့ပြီး၊ မိမိကိုယ်တိုင်က ဤမျှကြီးမားသော အမှားကို ကျူးလွန်မိလိမ့်မည်ဟု လုံးဝ ထင်မှတ်မထားခဲ့ပေ။

"မင်း၊ မင်းတို့တွေက တမင်တကာ လုပ်တာပဲ"

သူက ယွမ်ဟယ်တို့ကို စိုက်ကြည့်လိုက်ပြီး၊ ထိုနေရာမှာတင် မိမိ၏ အတွင်းကမ္ဘာနယ်မြေကို ထုတ်ဖော်ကာ မျက်စိရှေ့က ယန်နတ်ဘုရားများကို အမှုန့်ချေပစ်ချင်သည့်စိတ်များ ပေါ်ပေါက်လာခဲ့သည်။

"မင်းလို နောက်မျိုးဆက်တစ်ယောက်က ငါတို့ကို ဖမ်းနိုင်မယ်လို့ ထင်နေတာလား ဟားဟား"

ယန်နတ်ဘုရား တစ်ဦးက ကဲ့ရဲ့လှောင်ပြောင်စွာ ဆိုသည်။

"တကယ်ဆို မင်း ဟိုဘက်မှာပဲ ကျန်နေခဲ့ပြီး နောက်ယောင်ခံ လိုက်ခဲ့ရင်၊ တစ်ခုခု မမှန်တာကို သိပြီး မင်းတို့ရဲ့ ဟော်ဆွေ့ဘိုးဘေးကြီးနဲ့ ချက်ချင်း ဆက်သွယ်ခဲ့ရင်တောင် ငါတို့ရဲ့ အစီအစဉ်က အောင်မြင်ချင်မှ အောင်မြင်မှာ"

"ဒါပေမဲ့ ဒီခေတ်က ဟော်ဆွေ့မျိုးနွယ်စုရဲ့ နောက်မျိုးဆက်တွေက လက်ရုံးရည် မရှိဘဲ၊ စိတ်သဘောထားကလည်း အလွန်တရာ မောက်မာပြီး ကိုယ့်ကိုယ်ကိုယ်ပဲ အကြီးမြတ်ဆုံးလို့ ထင်နေကြတာ"

ယွမ်ဟယ်က ရယ်မောရင်း ခေါင်းခါလိုက်သည်။

"ဒီတစ်ခေါက်မှာ မင်းကပဲ ဝိုင်းဝန်းရှင်းလင်းရေးကို ဦးဆောင်ခဲ့တာကတော့ ကံကောင်းသွားတာပဲ၊ တကယ်လို့ စိတ်ထဲမှာ လေးနက်ပြီး သတိကြီးတဲ့ လူတွေသာ လာခဲ့ရင် ငါတို့တွေ နောက်ထပ် အကြိမ်ကြိမ် လှည့်ပတ်ပြီးမှ 'သေရာမှ အသက်ပြန်ဝင်လာ' ရမယ့် အခြေအနေမျိုး ဖြစ်သွားမှာ"

သူ၏ စကားတစ်ခွန်းချင်းစီတိုင်းသည် ချွန်ထက်လှသော ဓားတစ်လက်ကဲ့သို့ ချင်ဝူဆန့်၏ လက်ရှိတွင် အားနည်းနေသော နှလုံးသားပေါ်သို့ အကြိမ်ကြိမ် ထိုးစိုက်လိုက်သကဲ့သို့ ဖြစ်သည်။

သူသည် ရုတ်တရက် မျက်နှာဖြူဖျော့သွားပြီး သွေးတစ်ပွက် အန်ထုတ်လိုက်ကာ၊ စိတ်ဓာတ်များ အလွန်အမင်း ကျဆင်းသွားခဲ့သည်။

ချင်ကွမ်လင်၏ မျက်နှာအမူအရာမှာ အလွန်တရာ လေးနက်နေသည်။

ထိုနေရာရှိ ချင်မျိုးနွယ်စုဝင်များမှာ တစ်ဦးကိုတစ်ဦး လှမ်းကြည့်လိုက်ကြပြီး၊ မျက်နှာပေါ်ရှိ ပျော်ရွှင်မှုများမှာ ပျောက်ကွယ်သွားခဲ့ပြီ ဖြစ်ကာ အချို့မှာမူ ကံဆိုးမှုအပေါ် အားရကျေနပ်နေကြသည်။

သို့သော် သူတို့မှာ ယခုအချိန်တွင် ထုတ်ဖော်ပြသရန် ရဲဝံ့ခြင်း မရှိပေ။

"ဘိုးဘေးကြီး၊ ကျွန်တော် မှားခဲ့ပါတယ်……"

ချင်ဝူဆန့်သည် မြေပြင်ပေါ်သို့ ဒူးထောက်ကျသွားပြီး၊ မျက်နှာတစ်ခုလုံးတွင် စိတ်ပျက်လက်ပျက် ဖြစ်နေသည်။

သူ၏ ရှန်းဟုန်အကြွင်းအကျန်များ၏ 'သေခြင်းမှတစ်ဆင့် အသက်ရှင်ခြင်း' အစီအစဉ်ကို မိမိကိုယ်တိုင်ကပဲ တွန်းအားပေးလိုက်သလို ဖြစ်သွားခဲ့သည်ဟု လုံးဝ ထင်မှတ်မထားခဲ့ပေ……

"ဒီတစ်ခေါက် မင်း နယ်မြေကိုးခုကို သွားရောက်ရှင်းလင်းတဲ့အခါ၊ မင်းကို ကြောက်ရွံ့စေတဲ့သူ ရှိသလား"

ဟော်ဆွေ့ဘိုးဘေးကြီးက တိုးတိုးလေး မေးမြန်းလိုက်သည်။

"သူတို့တွေမှာ အစီအစဉ် နှစ်ခုလောက်ကို အပြိုင် ဆောင်ရွက်နေတာ ဖြစ်နိုင်တယ်"

ယွမ်ဟယ်တို့မှာမူ ဆက်လက်၍ ပြုံးနေကြဆဲ ဖြစ်သည်။

ချင်ဝူဆန့်က သေသေချာချာ စဉ်းစားလိုက်ပြီး အလွန်ခိုင်မာစွာဖြင့် ခေါင်းခါလိုက်သည်။

"မရှိပါဘူး"