အခန်း ၄

အခန်း (၄)ဒါကို ဇနီးသည်ကို အလိုလိုက်တာဟု ခေါ်ဆိုနိုင်တာလား

သူ၏ မျက်စိရှေ့ရှိ အပြာရောင် စနစ်မျက်နှာပြင်ပေါ်တွင် ဖော်ပြထားသော စာသားများကို ကြည့်ကာ ချန်ချင်းသည် ထိုအရာသည် ဧကရာဇ်နယ်ပယ် ကျင့်ကြံခြင်းဆိုင်ရာ ဆုလာဘ် ဟုတ်မဟုတ် သေချာစေရန် အကြိမ်ကြိမ် အတည်ပြုကြည့်လိုက်၏။

"ဒီဆုလာဘ်က တကယ့်ကို ရက်ရောတာပဲ..."

ဤဘဝ၏ မှတ်ဉာဏ်များနှင့် ပေါင်းစပ်ပြီးဖြစ်သော ချန်ချင်းသည် ထျန်းရွှမ်ကုန်းမြေ၏ ကျင့်ကြံခြင်းနယ်ပယ်များမှာ အနိမ့်မှအမြင့်သို့ ချီသန့်စင်ခြင်းနယ်ပယ်၊ အခြေခံတည်ဆောက်ခြင်းနယ်ပယ်၊ ရွှေအမြုတေနယ်ပယ်၊ အခြေတည်စစိတ်ဝိညာဉ်နယ်ပယ်၊ စိတ်ဝိညာဉ်ခွဲထွက်ခြင်းနယ်ပယ်၊ စိတ်ဝိညာဉ်ခွဲခြမ်းခြင်းနယ်ပယ်၊ ခန္ဓာကိုယ်ပေါင်းစည်းခြင်းနယ်ပယ်၊ ကပ်ဘေးဖြတ်ကျော်ခြင်းနယ်ပယ်၊ မဟာယာနနယ်ပယ်၊ ခြေလှမ်းတစ်ဝက်ဧကရာဇ်နယ်ပယ် နှင့်ဧကရာဇ်နယ်ပယ်တို့ဖြစ်ကြောင်း ကောင်းစွာသိရှိထားသည်။

အဓိကနယ်ပယ်ကြီးတစ်ခုစီကို သေးငယ်သော အဆင့်ငယ်ကိုးခုစီ ထပ်မံ၍ ခွဲခြားထားပေ၏။

ဧကရာဇ်နယ်ပယ် ကျင့်ကြံသူတစ်ဦးသည် မည်သည့်ကမ္ဘာတွင်မဆို ချွင်းချက်မရှိ အမြင့်ဆုံး တိုက်ခိုက်ရေးစွမ်းအားပင်။ ထို့ပြင် မိုးကောင်းကင်တာအို စည်းမျဉ်းများ၏ ကန့်သတ်ချက်များကြောင့် ကမ္ဘာတစ်ခုတွင် မဟာဧကရာဇ် တစ်ဦးတည်းသာ ရှိနိုင်ပြီး မိုးကောင်းကင်တာအို ကံတရားကို တစ်ဦးတည်း အပိုင်စားခံစားခွင့် ရှိပေ၏။

တခြားသူများသည် ဤမိုးကောင်းကင်တာအို ကံတရားကို ခံစားချင်ပါက လမ်းနှစ်သွယ်သာ ရှိလေသည်။ ဤသည်မှာ မဟာဧကရာဇ်ဟောင်းကို အနိုင်ယူခြင်း သို့မဟုတ် တစ်ဖက်လူ၏ သက်တမ်းကုန်ဆုံးချိန်ကို စောင့်ဆိုင်းကာ နေရာကို အစားထိုးခြင်းပင်။

သို့ရာတွင် မဟာဧကရာဇ်ဟောင်းတစ်ပါး ကွယ်လွန်ခြင်းသည် ကမ္ဘာကို တုန်လှုပ်စေသော စစ်ပွဲကြီးတစ်ခု ဖြစ်ပွားခြင်းကို ဆိုလိုပေ၏။ အဘယ်ကြောင့်ဆိုသော် မဟာဧကရာဇ် ပလ္လင်ပေါ်တွင် ထိုင်လိုသူ အများအပြား ရှိနေသော်လည်း ထိုနေရာသည် တစ်နေရာတည်းသာ ရှိသောကြောင့်ပင်။

ဤအရာကို တွေးမိသောအခါ ချန်ချင်း၏ စိတ်ထဲတွင် မေးခွန်းတစ်ခု ပေါ်လာခဲ့၏။

"ငါ တကယ်လို့ တာဝန်ကို ပြီးမြောက်အောင် လုပ်ပြီး ရှားချင်းယွဲ့နဲ့ လင်မယားဆက်ဆံရေးကို ပြည့်ဝအောင် လုပ်လိုက်ရင် မဟာဧကရာဇ်ဟောင်း နေရာမှာ တိုက်ရိုက် အစားထိုးဝင်ရောက်သွားမှာလား..."

ဤအရာနှင့် ပတ်သက်၍ စနစ်က ချက်ချင်းရှင်းပြလာခဲ့သည်။

"စနစ်၏ ဆုလာဘ်များသည် မိုးကောင်းကင်တာအို၏ ကန့်သတ်ချက်ကို မခံရပါ... အိမ်ရှင်အနေဖြင့် ထိုလူနှင့် အတူယှဉ်တွဲနေထိုင်နိုင်သလို သူ့ကို သတ်ဖြတ်ပြီး မိုးကောင်းကင်တာအို ကံတရားကို လုယူရန်လည်း ရွေးချယ်နိုင်ပါသည်..."

"အော်... ဒီလိုကိုး..."

စနစ်က ထိုသို့ပြောလာသည်ကို ကြားသောအခါ ချန်ချင်းသည် စိတ်သက်သာရာ ရသွားပေ၏။ အကြောင်းပြချက်မရှိဘဲ မဟာဧကရာဇ်တစ်ပါးကို စိန်ခေါ်ကာ ကိုယ့်ကိုယ်ကိုယ် ဒုက္ခရှာရမည့် အကြောင်းအရင်း မရှိချေ။

ပြန်လည်မွေးဖွားလာသူ တစ်ယောက်အနေဖြင့် သူသည် လွတ်လပ်စွာ နေထိုင်ပြီး ဘဝကို ပျော်ရွှင်စွာ ဖြတ်သန်းချင်ရုံသာဖြစ်သည်။

သူ စနစ်တာဝန်များကို ပြီးမြောက်အောင် လုပ်ဆောင်ရသည့် အကြောင်းအရင်းမှာ သူ၏စွမ်းအားကို ခိုင်မာစေရန်၊ ကံကြမ္မာ ဗီလိန်၏ ကံတရားကို ပြောင်းပြန်လှန်ပစ်ရန်နှင့် ဇာတ်လိုက်၏ အကြံအစည်များမှ လွတ်မြောက်ကာ အသက်ရှင်သန်နိုင်ရန်သာ ဖြစ်ပေ၏။

တော်ဝင်နန်းတွင်းတိုက်ပွဲများကို သူ စိတ်ဝင်စားမှု မရှိသော်လည်း သေကြေပျက်စီးခြင်းမဲ့ခန္ဓာကိုယ်နှင့် ပြိုင်ဘက်ကင်း ဧကရာဇ်နယ်ပယ် ကျင့်ကြံခြင်းကို အားကိုးကာ သူ၏ ငြိမ်းချမ်းသော ဘဝကို မည်သူကမျှ လာရောက်မနှောင့်ယှက်ရဲစေရန် သေချာစေခြင်းက အလွန်ဆွဲဆောင်မှု ရှိနေခဲ့သည်။

သူက နောက်လှည့်၍ အနီရောင် မင်္ဂလာဝတ်စုံကို ဝတ်ဆင်ထားပြီး အနီရောင် ပုဝါဖြင့် ခေါင်းကို ဖုံးအုပ်ထားကာ ကုတင်ပေါ်တွင် ငြိမ်သက်စွာ ထိုင်နေသော မဟာဝူနိုင်ငံ၏ မင်းသမီးရှားချင်းယွဲ့ကို ကြည့်လိုက်၏။

"ဂလု..."

ချန်ချင်းသည် တံတွေးကို ခက်ခဲစွာ မျိုချလိုက်ပြီး အလွန်အမင်း စိုးရိမ်ပူပန်နေမိသည်။ ဂုဏ်သိက္ခာရှိသော ဗီလိန်တစ်ယောက်အနေဖြင့် ဇာတ်လိုက်၏ အမျိုးသမီးနှင့် အတူအိပ်ရန်က တကယ်ပဲ အဆင်ပြေမည်လော။

အကယ်၍ သူ တကယ် လုပ်လိုက်ပါက မိုးကောင်းကင်တာအို၏ တန်ပြန်သက်ရောက်မှု သို့မဟုတ် ထိုကဲ့သို့သော အရာတစ်ခုခုကို ခံစားရမည်လောဟု သူ စိုးရိမ်နေမိ၏။

ဤအရာကို တွေးမိသောအခါ ဤဇာတ်ညွှန်းက အသုံးမကျသူမှ ထိပ်တန်းရောက်သွားသည့် ဇာတ်လမ်းထက်ပင် ပို၍ဆိုးရွားနေသည်ဟု ခံစားရကာ သူ သက်ပြင်းမချဘဲ မနေနိုင်တော့ချေ။

"ထားလိုက်ပါတော့... တစ်ဆင့်ချင်းပဲ သွားတာပေါ့..."

စိတ်ပိုင်းဆိုင်ရာ ပြင်ဆင်ပြီးနောက် ချန်ချင်းသည် ရှားချင်းယွဲ့ထံသို့ လျှောက်လှမ်းသွားလိုက်သည်။ သူ၏ ခြေသံများ နီးကပ်လာသည်နှင့်အမျှ ရှားချင်းယွဲ့၏ လက်များသည် ချက်ချင်း လက်သီးဆုပ်သွားသည်ကို သူ သတိထားမိပေ၏။

ရိုးရိုးသားသား ပြောရလျှင် ချန်ချင်းသည် ယခုအချိန်တွင် အနည်းငယ် စိုးရိမ်လာခဲ့သည်။

"ဒီအမျိုးသမီးက ခန္ဓာကိုယ်ပေါ်မှာ ဓားဝှက်ထားပြီးတော့ ငါ အနားရောက်လာရင် ထိုးဖို့ စီစဉ်ထားတာတော့ မဟုတ်လောက်ပါဘူးနော်..."

ကံကောင်းထောက်မစွာဖြင့် ရှားချင်းယွဲ့၏ ရှေ့သို့ ရောက်သွားပြီးနောက်တွင် သူမထံမှ ထူးခြားသော လှုပ်ရှားမှုများ ထွက်ပေါ်မလာခဲ့ချေ။

ဤအရာကို မြင်သောအခါ ချန်ချင်း၏ တင်းမာနေသော အာရုံကြောများ အနည်းငယ် ပြေလျော့သွားသည်။ ထို့နောက် သူက လက်လှမ်းကာ အနီးနားတွင် ချထားသော မင်္ဂလာချိန်ခွင်ကို ကောက်ယူလိုက်ပြီး အနီရောင် ပုဝါအောက်သို့ ထည့်ကာ မတင်လိုက်၏။

သူတို့၏ အကြည့်များ ဆုံတွေ့သွားချိန်တွင် ဤအမျိုးသမီးသည် အမှန်တကယ်ပင် ထူးခြားလှပလွန်းပြီး 'ဆွဲဆောင်မှုရှိသော အလှတရား' ဆိုသည့် စကားလုံးများနှင့် ထိုက်တန်ရုံသာမက 'မဟာဝူနိုင်ငံ၏ အလှဆုံးမိန်းမပျို' ဆိုသည့် ဂုဏ်ပုဒ်နှင့်ပါ ပို၍ထိုက်တန်ကြောင်း ချန်ချင်း ဝန်ခံလိုက်ရသည်။

သူမ မလိုလားကြောင်း ရှင်းလင်းစွာ ပြသနေသော်လည်း ချန်ချင်းအား သူမ၏ အားနည်းသော ဘက်ကို မမြင်စေလို၍ အင်အားကြီးဟန်ဆောင်နေသော သူမ၏ အနည်းငယ် နီရဲနေသော မျက်လုံးများသည် ပို၍ပင် ရင်နာစရာ ကောင်းနေခဲ့ပေ၏။

"..."

"..."

တိတ်ဆိတ်မှု...

ချန်ချင်းသည် မင်္ဂလာချိန်ခွင်ကို မူလနေရာတွင် အနေခက်စွာ ပြန်ချထားလိုက်သည်။ ဤသည်မှာ သူ၏ ပထမဆုံး မင်္ဂလာပွဲဖြစ်ပြီး ဘာလုပ်ရမှန်းမသိဘဲ အနည်းငယ် ကြောင်အမ်းအမ်း ဖြစ်နေခဲ့၏။ ဤသည်မှာ အမှန်ပင်။ ယခင်ဘဝတွင်ဖြစ်စေ ယခုဘဝတွင်ဖြစ်စေ ဤသည်မှာ သူ၏ ပထမဆုံး လက်ထပ်ဖူးခြင်းပင်။

အခြားတစ်ဖက်တွင်မူ စနစ်၏တာဝန်မှာ ရှားချင်းယွဲ့ကို သူနှင့် လိုလိုလားလား လင်မယားဆက်ဆံရေး ပြည့်ဝအောင် လုပ်ဆောင်ရန် ဖြစ်သည်။ ချန်ချင်းသည် သူမကို အတင်းအကြပ်လုပ်ရန် မဖြစ်နိုင်ချေ။ အကယ်၍ သူသာ အတင်းအကြပ် လုပ်လိုက်ပါက သူမ၏ အေးစက်နေသော မျက်လုံးများကို ကြည့်ရုံဖြင့် သူမ၏ အကောင်းမြင်စိတ်များ ကျဆင်းသွားပါက ပြန်လည်မြှင့်တင်ရန် ခက်ခဲမည်ဖြစ်ကြောင်း သူ သိနေခဲ့ပေ၏။ ဤဘဝတွင် မဖြစ်နိုင်လောက်အောင်ပင် ဖြစ်သွားနိုင်သည်။

ဤမျှလှပသော အမျိုးသမီးကို ရရှိခြင်းထက် ဧကရာဇ်နယ်ပယ် ကျင့်ကြံခြင်းက ပို၍အရေးကြီးသည်ဟု ချန်ချင်း ခံစားနေရဆဲပင်။ ရှားချင်းယွဲ့သည် မဟာဝူနိုင်ငံ၏ အလှဆုံးမိန်းမပျို ဖြစ်သော်လည်း ထျန်းရွှမ်ကုန်းမြေတွင် နိုင်ငံပေါင်းများစွာ ရှိနေသဖြင့် ရှားချင်းယွဲ့ကဲ့သို့ လှပသော ဒုတိယမြောက် အမျိုးသမီး မရှိဟု မဆိုနိုင်ချေ။

အကယ်၍ ချန်ချင်းသာ လှပသော အမျိုးသမီးများကို အမှန်တကယ် နှစ်သက်ပါက သစ်ပင်တစ်ပင်အတွက်နှင့် သစ်တောတစ်ခုလုံးကို မည်သည်ကြောင့် စွန့်လွှတ်ရမည်နည်း။ ဧကရာဇ်နယ်ပယ် ကျင့်ကြံခြင်းနှင့်ဆိုလျှင် သေမျိုးလောက၏ ပြိုင်ဘက်ကင်း အလှပဂေးများကို မဆိုထားနှင့် ကောင်းကင်ဘုံမှ နတ်မိမယ်များပင်လျှင် သူ လက်လှမ်းမမီနိုင်စရာ အကြောင်းမရှိချေ။

သူ၏ စိတ်ထဲတွင် အရာရာကို ချိန်ဆပြီးနောက် ချန်ချင်းက ဆုံးဖြတ်ချက် ချလိုက်သည်။

သူက အနေခက်စွာ ချောင်းဟန့်လိုက်ပြီး စားပွဲဆီသို့ လျှောက်သွားကာ လက်ဖက်ရည်တစ်ခွက် ငှဲ့လိုက်၏။ လည်ချောင်းစိုစေရန် သူကိုယ်တိုင် ဦးစွာတစ်ခွက်သောက်လိုက်သည်။ ထို့နောက် ခွက်အသစ်တစ်ခွက်ကို ယူကာ လက်ဖက်ရည်ထပ်ငှဲ့ပြီး ရှားချင်းယွဲ့ထံသို့ ပြန်သွားကာ သူမအား လက်ကမ်းပေးလိုက်သည်။

"မင်း... ရေသောက်လိုက်ဦး..."

ရှားချင်းယွဲ့သည် စကားမပြောချေ။ ချန်ချင်းက လက်ဖက်ရည်အိုးထဲမှ သောက်ပြီးဖြစ်ကြောင်းနှင့် ပြဿနာမရှိကြောင်း အတည်ပြုပြီးနောက်မှ သူ၏လက်ထဲမှ ခွက်ကိုယူကာ အကုန်သောက်လိုက်၏။

ရိုးရိုးသားသား ပြောရလျှင် ယခုအချိန်တွင် သူမသည်လည်း အလွန်စိုးရိမ်နေခဲ့သည်။ ချန်ချင်းက နောက်တခဏတွင် သူ၏ ဟန်ဆောင်မှုကို ခွာချကာ ဆာလောင်နေသော ဝံပုလွေတစ်ကောင်ကဲ့သို့ သူမအပေါ် ခုန်အုပ်ပြီး ကိုက်စားသွားမည်ကို သတိထားနေမိ၏။ သို့သော် ရှားချင်းယွဲ့သည် ငြင်းဆန်၍ မရချေ။ အကူအညီမဲ့စရာ အကောင်းဆုံးမှာ တော်ဝင်သွေးကြောနှင့် မဟာဝူနိုင်ငံ တစ်ခုလုံး၏ အနာဂတ်ကို ကာကွယ်ရန်အတွက် သူမတွင် ကိုယ့်ကိုယ်ကိုယ် သတ်သေခွင့်ပင် မရှိဘဲ သူ၏ သနားညှာတာမှုအောက်တွင်သာ နေထိုင်ရပေမည်။

သူမ မသိသည်မှာ ယခုအချိန်တွင် ချန်ချင်း၏စိတ်အာရုံသည် သူမအပေါ်တွင် လုံးဝရှိမနေခြင်းပင်။

ချန်ချင်း တစ်ဦးတည်းသာ မြင်နိုင်သော ရုတ်တရက် ပေါ်လာသည့် စနစ်မျက်နှာပြင်ပေါ်တွင်...

"ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် အလယ်အလတ်အဆင့် စိတ်ဝိညာဉ်ကျောက်တုံး ၁၀ တုံးကို ရရှိသည့်အတွက် ဂုဏ်ယူပါသည်..."

ဤစာသားကို မြင်သောအခါ ချန်ချင်းသည် မျက်မှောင်အနည်းငယ် ကြုတ်လိုက်မိ၏။ သူ ဇဝေဇဝါဖြစ်သွားသည်။

"ဒီရေတစ်ခွက် ငှဲ့ပေးတာက ဇနီးသည်ကို အလိုလိုက်တာထဲ ပါတာလား..."

အလယ်အလတ်အဆင့် စိတ်ဝိညာဉ်ကျောက်တုံး ဆယ်တုံးဆိုသည်မှာ ချန်ချင်း၏ နောက်ခံအရ ဘာမှမဟုတ်သော်လည်း ဆင်းရဲသော မိသားစုများအတွက် တစ်နှစ်ပတ်လုံး ကြိုးစားအလုပ်လုပ်လျှင်တောင် ထိုမျှထိ ရရှိချင်မှ ရရှိပေမည်။ ထိုရှုထောင့်မှ ကြည့်ပါက ရေတစ်ခွက် ငှဲ့ပေးရုံဖြင့် အလယ်အလတ်အဆင့် စိတ်ဝိညာဉ်ကျောက်တုံး ဆယ်တုံး ရရှိနိုင်ခြင်းကပင် ကြီးမားသော အကျိုးအမြတ်တစ်ခု ဖြစ်နေလေပြီ။

"ကန့်သတ်ချက် ရှိမရှိပဲ မသိတာ..."

ရှားချင်းယွဲ့၏လက်ထဲရှိ ခွက်အလွတ်ကို ကြည့်ရင်း ချန်ချင်း၏ စိတ်ထဲတွင် အကြံတစ်ခု ပေါ်လာခဲ့သည်။ သူ စားပွဲဆီသို့ ပြန်သွားကာ လက်ဖက်ရည်အိုးကို ကောက်ယူပြီး သူမအတွက် နောက်တစ်ခွက် ထပ်ငှဲ့ပေးလိုက်၏။

"ရေဆာနေတယ် မဟုတ်လား... နောက်တစ်ခွက် သောက်လိုက်ဦး..."

ရှားချင်းယွဲ့သည် ချန်ချင်းကို ထူးဆန်းစွာ ကြည့်လိုက်ရုံမှလွဲ၍ အများကြီး မတွေးတော့ချေ။ သူမသည် လက်တစ်ဖက်ဖြင့် မျက်နှာကို တစ်စိတ်တစ်ပိုင်း ဖုံးကွယ်ထားကာ ခေါင်းကို အနည်းငယ် စောင်းပြီး ခွက်ထဲရှိ လက်ဖက်ရည်ကို သောက်လိုက်သည်။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် ခွန်အားစွမ်းရည် +၁ ကို ရရှိသည့်အတွက် ဂုဏ်ယူပါသည်...】

"ခွန်အား စွမ်းရည်လား..."

အစပိုင်းတွင် လက်ဖက်ရည်ငှဲ့ပေးခြင်းကဲ့သို့သော သေးငယ်သည့် အရာများသည် စိတ်ဝိညာဉ်ကျောက်တုံးများကိုသာ ဆုလာဘ်အဖြစ် ပေးလိမ့်မည်ဟု ချန်ချင်း ထင်မှတ်ထားခဲ့၏။ စနစ်က အကြိမ်အရေအတွက်ကို ကန့်သတ်မထားရုံသာမက ကျပန်းဆုလာဘ်များအတွက် အရည်အသွေး ကွဲပြားမှုများလည်း ရှိနေလိမ့်မည်ဟု သူ လုံးလုံးလျားလျား ထင်မှတ်မထားခဲ့ချေ။

ခွန်အား စွမ်းရည်အမှတ်ကို ရရှိကာ အသုံးပြုလိုက်ပြီးနောက် သူ၏ ခန္ဓာကိုယ်အတွင်းမှ မည်သည့်နေရာမှန်းမသိ ပေါ်ထွက်လာသော အကြမ်းစားခွန်အားတစ်ခုက ခြေလက်များနှင့် အရိုးများအထိ ပြည့်နှက်သွားသည်ကို သူ ရှင်းလင်းစွာ ခံစားလိုက်ရသည်။ ဤအရာကို သဘောပေါက်သွားသောအခါ ချန်ချင်းသည် ချက်ချင်း စိတ်ဝင်စားသွားပြီး ရှားချင်းယွဲ့အတွက် နောက်တစ်ခွက် ထပ်ငှဲ့ပေးလိုက်၏။

ရှားချင်းယွဲ့သည် ဇဝေဇဝအ ဖြစ်နေသော်လည်း ချန်ချင်းကို မစော်ကားလို သို့မဟုတ် ဒေါသမထွက်စေလိုသဖြင့် နာခံစွာပင် လက်ဖက်ရည်ကို သောက်လိုက်သည်။ ချန်ချင်း ထပ်ငှဲ့ပေးကာ သူမ ထပ်သောက်သည်။ ချန်ချင်းက နောက်တစ်ကြိမ် ထပ်ငှဲ့ပေးသည်။ သူမ နောက်တစ်ကြိမ် ထပ်သောက်သည်။ ချန်ချင်း ဆက်လက်၍ ငှဲ့ပေးနေခဲ့ပြီး သူမသည်လည်း ဆက်လက် သောက်နေခဲ့၏။ သူမ ပို၍သောက်လေလေ ပို၍ဇဝေဇဝါဖြစ်လာလေလေပင်။ ချန်ချင်းက လက်ဖက်ရည်ကို ဝိုင်အဖြစ် အထင်မှားနေခြင်းများလော။ ထို့ပြင် သူမက မတွေးဘဲ မနေနိုင်တော့ချေ။ "သူ မှားလုပ်နေတာဆိုတော့... ငါ ဒီအတိုင်းပဲ လိုက်လျောပေးလိုက်ရမလား..."