အခန်း ၈

အခန်း (၈) မင်းက အရည်အချင်းတွေကို ဖုံးကွယ်ထားတာပဲ

သူ့ကို ရန်လိုကြောင်း ရှင်းလင်းစွာ ပြသနေသော အကြည့်တစ်စုံထက်မက ရှိနေခြင်းက ချန်ချင်း၏ ကျောရိုးတလျှောက် စိမ့်တက်သွားစေသည်။ အေးစက်သော လေပြေတစ်ခုက သူ၏အဝတ်အစားများထဲသို့ စိမ့်ဝင်လာသည့်အလား သူ၏မသိစိတ်မှ ခံစားလိုက်ရလေ၏။ ထိုနောက် ချက်ချင်းဆိုသလိုပင် အနက်ရောင်ဝတ်စုံ ဝတ်ဆင်ထားသော မျက်နှာဖုံးစွပ် လူဆယ်ဂဏန်းကျော်သည် အရပ်မျက်နှာအသီးသီးမှ ထွက်ပေါ်လာကာ တိုက်ခိုက်လာကြသည်။ သူတို့သည် ဓားများ ကိုင်ဆောင်ကာ ထိုကဲ့သို့ ဝတ်ဆင်ထားသည်ကို မြင်သောအခါ လမ်းသွားလမ်းလာများသည် ကြောက်လန့်တကြား အော်ဟစ်ကာ ထွက်ပြေးသွားကြသည်။

ချန်ချင်းက အလျင်အမြန် တုံ့ပြန်လိုက်သည်။ ဤလူများသည် သူ့အတွက် လာခြင်းဖြစ်ကြောင်း သူ သိထားပေ၏။ သူက လက်ဆန်းတန်းကာ ရှားချင်းယွဲ့၏ လက်ကောက်ဝတ်ကို ဆွဲယူပြီး သူမကို ကာကွယ်ရန် သူ၏နောက်သို့ သဘာဝကျကျ ဆွဲခေါ်လိုက်လေသည်။ ထို့နောက် ရှားချင်းယွဲ့အား စိတ်ချစေရန် အကြည့်တစ်ချက်ပေးကာ ပြောဆိုရန် သူ မမေ့ခဲ့ချေ။

"မကြောက်နဲ့... အရာအားလုံးအတွက် ငါ ရှိတယ်..."

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် နားလည်နိုင်စွမ်းအမှတ် ၂၀ ကို ရရှိသည့်အတွက် ဂုဏ်ယူပါသည်...】

နားလည်နိုင်စွမ်းအမှတ်...

ချန်ချင်းသည် ဤဆုလာဘ်အတွက် အလွန်ကျေနပ်သွားပေ၏။ ရှန်းရှကမ္ဘာရှိ ကျင့်ကြံသူများအတွက် နားလည်နိုင်စွမ်းအမှတ် မည်မျှမြင့်မားသည်က လူတစ်ဦး၏ အနာဂတ် အမြင့်ဆုံး ကန့်သတ်ချက်ကို မကြာခဏ အဆုံးအဖြတ်ပေးတတ်သည်။

နားလည်နိုင်စွမ်းအမှတ် ဆိုသည်မှာ မွေးရာပါ ပါရမီ၏ အစိတ်အပိုင်းတစ်ခုဖြစ်ပြီး မွေးဖွားချိန်ကတည်းက သတ်မှတ်ထားပြီးသား ဖြစ်သင့်ပေ၏။ သို့သော် စနစ်ကို ပိုင်ဆိုင်ထားသော ချန်ချင်းသည် ဇနီးသည်အား အလိုလိုက်ခြင်းဖြင့် သူ၏ နားလည်နိုင်စွမ်းအမှတ်ကို စဉ်ဆက်မပြတ် မြှင့်တင်နိုင်သည်။ သူ၏ နားလည်နိုင်စွမ်းအမှတ် လုံလောက်စွာ မြင့်မားနေသရွေ့ ကျင့်ကြံခြင်းနည်းစနစ် လျှို့ဝှက်ကျမ်းစာတစ်အုပ်ကို ကြည့်ရုံဖြင့် ကျွမ်းကျင်နိုင်ခြင်းကို မဆိုထားနှင့် ဉာဏ်အလင်းပွင့်ကာ သူ၏ကိုယ်ပိုင် ကျင့်ကြံခြင်းနည်းစနစ်ကို ဖန်တီးနိုင်ရန်ပင် မဖြစ်နိုင်သောအရာ မဟုတ်ချေ။ ထို့ကြောင့် ဤဆုလာဘ်၏ တန်ဖိုးသည် ချန်ချင်း၏ အမြင်တွင် ကြီးမားလှပြီး များများရလေလေ ပိုကောင်းလေလေပင်။

'မကြောက်နဲ့... အရာအားလုံးအတွက် ငါ ရှိတယ်...'

ဆခြားတစ်ဖက်တွင်မူ ချန်ချင်း၏နောက်၌ ရှိနေသော ရှားချင်းယွဲ့အတွက် ဤစကားလုံးတိုလေးများသည် သူမ၏ နှလုံးသားကို သေးငယ်ခြင်းမရှိသော ရိုက်ခတ်မှုတစ်ခု ဖြစ်စေခဲ့သည်။ သူတစ်ပါးကို အနိုင်ကျင့်ရန် အာဏာကို အသုံးပြုတတ်သော ကောလာဟလထဲမှ အသုံးမကျသည့် သခင်လေးသည် ဤကဲ့သို့ သေရေးရှင်ရေး အကျပ်အတည်းတွင် သူမကို ကာကွယ်ရန် မည်သည်ကြောင့် ဦးစားပေးရသည်ကို သူမ နားမလည်နိုင် ဖြစ်နေခဲ့ပေ၏။

ရှားချင်းယွဲ့၏ အမြင်တွင် ဤကဲ့သို့ အဖြစ်အပျက်မျိုး၏ ပထမဆုံး လက္ခဏာပြသည်နှင့် တစ်ကိုယ်ကောင်းဆန်သော သူသည် သူမကို တိုက်ရိုက်စွန့်ပစ်ကာ ထွက်ပြေးသွားသင့်သည်။ မည်သို့ပင်ဆိုစေကာမူ ချန်ချင်း၏ဘေးတွင် ချန်ရှုံး စီစဉ်ပေးထားသော တာအိုအစောင့်အရှောက်သည် သကြားလုံးဖိုး ပေးရန်အတွက် သကြားကပ် ရှန်းကျာသီး ဈေးသည်နောက်သို့ လိုက်ရန် သူ့အနားမှ စေလွှတ်ခံလိုက်ရလေပြီ။ ယခုအချိန်တွင် ရှားချင်းယွဲ့၏ စိတ်အခြေအနေသည် အလွန်ရှုပ်ထွေးနေသည်။ ချန်ချင်းနှင့် ပတ်သက်၍ သူမ၏ ကြိုတင်မှတ်ယူထားမှုများသည် ယိမ်းယိုင်မသွားဘဲ မနေနိုင်တော့ချေ။

ဤလူသည် သူ၏ အရည်အချင်းများကို အမြဲတစေ ဖုံးကွယ်ထားခဲ့ခြင်းများ ဖြစ်နိုင်သလော။ လူအများက သူ၏ တည်ရှိမှုကို လျစ်လျူရှုသွားအောင် လူပေါ်ကြော့သခင်လေးတစ်ယောက်လို တမင်သက်သက် ဟန်ဆောင်နေပြီး တစ်နေ့ကျလျှင် လူတိုင်းကို အံ့သြသွားအောင် လုပ်ဆောင်ရန် ဖြစ်နိုင်သည်။

ယခုခေတ်ကို မဆိုထားနှင့် သမိုင်းကြောင်းကို ပြန်ကြည့်လျှင် ဤကဲ့သို့ အဖြစ်အပျက်များနှင့် လူများစွာကို သမိုင်းမှတ်တမ်းများတွင် ရေးသားထားသည်။ ဤအကြောင်းကို ပို၍တွေးလေလေ ရှားချင်းယွဲ့ ပို၍ ထိတ်လန့်လာလေလေပင်။ အာဏာကြီးမားသော ဝန်ကြီးချုပ်ချန်ရှုံးသည် မဟာဝူနိုင်ငံအတွက် ရင်ဆိုင်ရန် ခက်ခဲနေလေပြီ။ ရှားဧကရာဇ်ပင်လျှင် သူ၏ ခံစားချက်များကို ထည့်သွင်းစဉ်းစားကာ သူ့ကို ခုနစ်ပုံခန့် လေးစားမှု ပြသရသည်။ ယခုချိန်၌ သူ၏ အရည်အချင်းများကို ဖုံးကွယ်ထားပြီး ရည်မှန်းချက်များကို မသိနိုင်သော ဝန်ကြီးချုပ်၏ သခင်လေးပါ ထပ်ပေါင်းလိုက်လျှင်... ရှားချင်းယွဲ့၏ စိတ်ထဲတွင် မဟာဝူနိုင်ငံ အန္တရာယ်ရှိနေပြီဟူသော အတွေးတစ်ခုတည်းသာ ရှိတော့၏။

သို့သော် ချန်ချင်း၏ နောက်ထပ်စကားများက ရှားချင်းယွဲ့၏ နှလုံးသားကို ထပ်မံ၍ ယိမ်းယိုင်သွားစေခဲ့သည်။

"မင်းတို့ ငါ့ကို ဒုက္ခပေးချင်တာ ကိစ္စမရှိဘူး... ဒါပေမဲ့ အပြစ်မရှိတဲ့ လူတွေကို ပါမလာအောင် လုပ်လို့မရဘူးလား... သူ့ကို လွှတ်ပေးလိုက်ပါ..."

ဤစကားကို ကြားသောအခါ အနက်ရောင်ဝတ်စုံဝတ်လူစုသည် အချင်းချင်း ကြည့်လိုက်ကြပြီးနောက် သူတို့၏ ခေါင်းဆောင်က ပြောလိုက်၏။

"ငါတို့ သူ့ကို အန္တရာယ်မပြုဘူး... ဒါပေမဲ့ ငါတို့ကို သွားတိုင်တန်းဖို့လည်း သူ့ကို လွှတ်မပေးနိုင်ဘူး... မင်းသာ မင်းရဲ့ ကံကြမ္မာကို နာခံပြီး လက်ခံမယ်ဆိုရင် သူ သေချာပေါက် အဆင်ပြေမှာပါ..."

သူတို့ သဘောတူသည်ဖြစ်စေ မတူသည်ဖြစ်စေ ချန်ချင်းအတွက် အရေးမကြီးချေ။ အရေးကြီးသည်မှာ စနစ်က မည်သို့မြင်သနည်း ဆိုသည်ပင်။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် နက်နဲသော အဆင့်မြင့် မှော်ရတနာ အရိပ်ရုပ်သေးရုပ်တစ်ရုပိကို ရရှိသည့်အတွက် ဂုဏ်ယူပါသည်... မှတ်ချက် ..အရိပ်ရုပ်သေးရုပ်တစ်ခု၏ ခွန်အားသည် စိတ်ဝိညာဉ်ခွဲထွက်ခြင်းနယ်ပယ် အထွတ်အထိပ်အဆင့် စွမ်းအားနှင့် ညီမျှသည်...】

စိတ်ဝိညာဉ်ခွဲထွက်ခြင်းနယ်ပယ် အထွတ်အထိပ်အဆင့်....

ဤသည်မှာ သူ၏ဖခင်ချန်ရှုံးက သူ၏ဘေးတွင် ထားခဲ့သော တာအိုအစောင့်အရှောက်ထက် များစွာပို၍ သန်မာအားကောင်းပေ၏။ သူ အမြတ်ထွက်သွားပြီ... အများကြီး အမြတ်ထွက်သွားလေပြီ။ သူ့ထံ၌ နောက်ထပ် ဝှက်ဖဲတစ်ခု ထပ်တိုးလာခဲ့လေပြီ။

"ဧကရာဇ်ရဲ့ ခြေရင်းက လမ်းမပေါ်မှာ လူသတ်ရဲတယ်ဆိုတော့... မင်းတို့ မျက်စိထဲမှာ ဥပဒေဆိုတာ မရှိတော့ဘူးလား..."

ထိုနောက် ချက်ချင်းဆိုသလိုပင် သူ၏နံဘေးမှ ထွက်လာသော ရှားချင်းယွဲ့၏ အသံက ချန်ချင်း၏ အာရုံကို ဖမ်းစားသွားခဲ့သည်။ သူသည် အနည်းငယ် အံ့သြသွားသလို ခံစားလိုက်ရပြီး စနစ်မျက်နှာပြင်ကို ဖျောက်ရန် လက်ကို ဝှေ့ယမ်းလိုက်သည်။ ဤကဲ့သို့ အခြေအနေမျိုးတွင် ရှားချင်းယွဲ့က တိတ်ဆိတ်စွာ နေပြီး ဤလူသတ်သမားများ သူ့ကို ခုတ်ပိုင်းသွားရန် ဆုတောင်းနေလိမ့်မည်ဟု သူ ထင်မှတ်ထားခဲ့၏။

ဤလူသတ်သမားများကို ဟန့်တားရန် ရှားချင်းယွဲ့က ဧကရာဇ်နှင့် မဟာရှားဥပဒေကို ထုတ်သုံးလိမ့်မည်ဟု သူ လုံးဝထင်မှတ်မထားခဲ့ချေ။

"မဟာရှား ဥပဒေလား..."

ဤစကားကို ကြားသောအခါ လူသတ်သမားတစ်ယောက်က ရယ်မောလိုက်၏။

"သူ့ရဲ့ တည်ရှိနေမှု ကိုယ်တိုင်က ဥပဒေကို ဂရုမစိုက်တာပဲ... ငါတို့ သူ့ကို သတ်တာက ကောင်းကင်ဘုံ ကိုယ်စား ဆောင်ရွက်တာပဲ..."

"လူသတ်တာက လူသတ်တာပဲ... အကြောင်းပြချက် ဘယ်လောက်ပဲ ရှိရှိ လူသတ်တာပဲ... သူ့ရဲ့ အပြစ်တွေကို ဥပဒေက စီရင်ပြီး အပြစ်ပေးရမှာပေါ့..."

အင်တိုက်အားတိုက် ငြင်းခုံနေစဉ် ရှားချင်းယွဲ့၏ လေးနက်သော အမူအရာကို ကြည့်ကာ ဤအမျိုးသမီး မဟာဧကရီ ဖြစ်လာမည့်လမ်းတွင် မည်သို့သော အရာများကို ကြုံတွေ့ရမည်အား ချန်ချင်း စိတ်ကူးကြည့်ရန်ပင် ခက်ခဲနေသည်။ သူမ၏ ဖြူစင်မှုက ပလ္လင်ပေါ်တွင် ခိုင်မြဲစွာ ထိုင်နိုင်လိမ့်မည် မဟုတ်ချေ။

"အဓိပ္ပာယ်မရှိတာတွေ ပြောမနေနဲ့... ညီအစ်ကိုတို့... မြန်မြန်ဆန်ဆန်နဲ့ ပြတ်ပြတ်သားသား လှုပ်ရှားကြစို့..."

လူသတ်သမားခေါင်းဆောင်က အမိန့်ပေးလိုက်သည်။ တစ်စုံတစ်ယောက်က ဓားကိုကိုင်ကာ ချန်ချင်း၏အနီးသို့ ချက်ချင်းချဉ်းကပ်လာပြီး သူ့ကို ဓားဖြင့် ခုတ်ချလိုက်၏။

ချန်ချင်းကမူ သူ ယခင်က ရရှိထားသော ဆုလာဘ်ဖြစ်သည့် အဝါရောင် အလယ်အလတ်အဆင့် ကျင့်ကြံနည်းစနစ် 'တောင်ဖြိုလက်ဝါး' ကို အသုံးပြုကာ လက်ဝါးထဲတွင် စိတ်ဝိညာဉ်စွမ်းအားများကို လှည့်ပတ်လိုက်လေသည်။ လက်ရှိ သူ၏ နားလည်နိုင်စွမ်းအမှတ်ဖြင့် သူသည် အလျင်စလို အလွတ်ကျက်ပြီး အကြိမ်အနည်းငယ်မျှ ကြည့်လိုက်ရုံဖြင့် အလွယ်တကူ ကျွမ်းကျင်နိုင်ပေ၏။

သူ လက်ဝါးဖြင့် ရိုက်ချလိုက်သည်နှင့် တစ်ပြိုင်နက် စိတ်ဝိညာဉ်စွမ်းအားများသည် လေထဲတွင် လူတစ်ရပ်စာရှိသော လက်တစ်ဖက်၏ ပုံရိပ်ယောင်အဖြစ် ပြောင်းလဲသွားကာ လူသတ်သမားကို တည့်တည့်ထိမှန်ပြီး ခုနစ်မီတာ သို့မဟုတ် ရှစ်မီတာခန့် အဝေးသို့ လွင့်စင်သွားစေခဲ့သည်။ ထိုလူသည် မြေကြီးပေါ်သို့ ကျသွားပြီး နှစ်ကြိမ်ပင် မရုန်းကန်နိုင်မီ သတိလစ်သွားတော့သည်။

ကျန်ရှိနေသော လူသတ်သမားများသည် သူတို့၏ အဖော်ကို ပြန်ကြည့်လိုက်ကြပြီး သူတို့၏ မျက်နှာအမူအရာများ ပျက်ယွင်းသွားခဲ့သည်။ ပျော်ပါးခြင်းကိုသာ စိတ်ဝင်စားသည်ဟု ယူဆရသော ဤဒဏ္ဍာရီလာ နတ်ဆိုးဘုရင်သည် အမှန်အားဖြင့် ကျင့်ကြံသူတစ်ဦး ဖြစ်နေလိမ့်မည်ဟု သူတို့ မျှော်လင့်မထားခဲ့ကြချေ။ ဤလူများထံတွင် သိုင်းပညာစွမ်းရည်တချို့ရှိသော်လည်း ချွင်းချက်မရှိ သူတို့အားလုံးသည် စိတ်ဝိညာဉ်အမြှစ်များ ကင်းမဲ့နေသော သာမန်သေမျိုးများ ဖြစ်ကြသဖြင့် ကျင့်ကြံ၍ မရနိုင်ချေ။ သာမန်သေမျိုးတစ်ဦးသည် သူ၏ သိုင်းပညာကို အမြင့်ဆုံးအထိ သွေးကြောလှည့်ပတ်ထားလျှင်ပင် ချီသန့်စင်ခြင်းနယ်ပယ် အခြေခံအဆင့် ကျင့်ကြံသူတစ်ဦးနှင့် မယှဉ်နိုင်ကြောင်း သူတို့ သိရှိထားကြ၏။ အချိန်တခဏအတွင်းတွင် သူတို့အားလုံး ထိတ်လန့်ပြီး ကြောက်ရွံ့သွားကြသည်။

တာအိုအစောင့်အရှောက်ကို ချန်ချင်းက အဝေးသို့ စေလွှတ်လိုက်သဖြင့် သူတစ်ယောက်တည်းသာ ကျန်ရစ်တော့သည်။ ထိူကြောင့် သူတို့၏ လူဆယ်ဂဏန်းခန့်သည် သူ့ကို သတ်ရန် လုံလောက်သည်ထက် ပိုနေပြီဖြစ်ကာ ကောင်းကင်ဘုံက ပေးသော အခွင့်အရေးဖြစ်သည်ဟု မူလပက သူတို့ ထင်မှတ်ထားခဲ့ကြ၏။ ချန်ချင်းသည် လျှို့ဝှက်စွာ ကျင့်ကြံနေလိမ့်မည်ဟု သူတို့ လုံးဝထင်မှတ်မထားခဲ့ချေ။

ဤမြင်ကွင်းကို တွေ့လိုက်ရသော ရှားချင်းယွဲ့သည်လည်း ချန်ချင်းက သူ၏ အရည်အချင်းများကို ဖုံးကွယ်ထားသည်ဟူသော သူမ၏ အစောပိုင်း အတွေးကို ပို၍ခိုင်မာသွားစေခဲ့သည်။ ဤလူသည် အမှန်တကယ်ကို ရိုးရှင်းသော သခင်လေးတစ်ယောက် မဟုတ်ချေ။

ထိုနောက်ချက်ချင်းပင် လူသတ်သမားအုပ်စု ဘာလုပ်ရမှန်းမသိ ဖြစ်နေချိန်တွင် မိုးခြိမ်းသံကဲ့သို့ အားကောင်းပြီး ကြီးစိုးသောအသံတစ်သံက အဝေးမှ ထွက်ပေါ်လာခဲ့သည်။

"သတ္တိကောင်းတဲ့ အရူးတွေ... ငါ့ရဲ့ သခင်လေးကို ဒုက္ခမပေးကြနဲ့..."

ဤသည်မှာ တာအိုအစောင့်အရှောက် အလျှင်အမြန် ပြန်ရောက်လာခြင်းပင်။ ထို့နောက် ချန်ချင်းသည် နောက်လှည့်ကာ ရှားချင်းယွဲ့၏ လက်ကိုကိုင်ပြီး သူမအား ပြောလိုက်၏။

"သွားကြစို့..."

ရှားချင်းယွဲ့သည် ချန်ချင်းနှင့်အတူ နောက်လှည့်လိုက်ပြီး လူသတ်သမားအုပ်စုကို ကျောခိုင်းလိုက်ကာ မသိစိတ်မှ လှည့်ကြည့်ချင်သွားသော်လည်း ချန်ချင်းက သူမကို တားဆီးလိုက်သည်။

"အဲ့ဒီလို မလုပ်ဖို့ ငါ အကြံပေးချင်တယ်... ညဘက် အိပ်မပျော်ဘဲ နေလိမ့်မယ်..."

ရှားချင်းယွဲ့၏ အကြည့်နှင့် ဆုံတွေ့သောအခါ ချန်ချင်းသည် သူမ၏ အတွေးများကို သိမြင်သွားပြီး ပြောလိုက်သည်။

"ဒီလောကကြီးက ဒီအတိုင်းပဲ... အားကြီးတဲ့သူက အားနည်းတဲ့သူကို အနိုင်ကျင့်တာပဲ... တစ်နည်းပြောရရင် သူတို့သာ ငါ့ကို သတ်ဖို့ အခွင့်အရေးရရင် ငါ့ကိုလည်း လွှတ်ပေးမှာ မဟုတ်ဘူး..."

ရှားချင်းယွဲ့ ဤစကားကို မငြင်းဆန်ခဲ့ချေ။ ချန်ချင်း၏ စကားများကို သူ ငြင်းဆန်ချင်ခဲ့သော်လည်း သူပြောသည်မှာ အလွန်အဓိပ္ပာယ်ရှိသည်ဟုလည်း ခံစားလိုက်ရ၏။ သူတို့၏ အနောက်ဘက်တွင် ရောက်ရှိလာသော တာအို​အစောင့်အရှောက်သည် လက်ကို လွှဲယမ်းလိုက်ရုံဖြင့် ထိုလူများ၏ အသား၊ သွေးနှင့် အရိုးများသည် လေထဲတွင် ပျောက်ကွယ်သွားတော့သည်။ ကျင့်ကြံသူများနှင့် ရင်ဆိုင်ရသော သာမန်သေမျိုးများသည် အထူးသဖြင့် အဆင့်မြင့် ကျင့်ကြံသူများနှင့် ရင်ဆိုင်ရချိန်တွင် ခုခံရန် အခွင့်အရေး လုံးဝမရှိချေ။

တခြားတစ်ဖက်တွင် ချန်ချင်းသည် ရှားချင်းယွဲ့ကို သကြားရုပ်များ ရောင်းသည့် ဆိုင်လေးတစ်ခုသို့ ခေါ်ဆောင်သွားခဲ့ပေ၏။ ချန်ချင်းက သကြားရုပ်တစ်ခု ဆွဲရန် ဇွန်းဖြင့် သရက်ရည်များ အစက်ချကာ အာရုံစိုက်နေသည်ကို ကြည့်ရင်း ရှားချင်းယွဲ့သည် သတ္တိမွေးကာ မေးမြန်းလိုက်သည်။

"ရှင်က လူတွေ အထင်သေးအောင် အမြဲတမ်း လူပေါ်ကြော့သခင်လေးတစ်ယောက်လို ဟန်ဆောင်နေတာပဲ... တကယ်တော့ ရှင်က ရှင့်ရဲ့အရည်အချင်းတွေကို ဖုံးကွယ်ထားပြီး လျှို့ဝှက်ကျင့်ကြံနေတာ မဟုတ်လား..."

"မင်းက ငါ့ကို အဲ့ဒီလို မြင်တာလား..."

ချန်ချင်းက ထိုသို့ပြောလိုက်သော်လည်း သူ၏ စိတ်ထဲတွင်မူ ဤသည်မှာ အလွန်ကောင်းမွန်သော လက္ခဏာတစ်ခုဖြစ်သည်ဟု တွေးလိုက်မိ၏။ ရှားချင်းယွဲ့ကို သူမ၏ဆန္ဒအလျောက် လင်မယားဆက်ဆံရေး ပြည့်ဝအောင် လုပ်ဆောင်စေပြီး ဧကရာဇ်နယ်ပယ် ကျင့်ကြံခြင်းကို ရယူရန်အတွက် ပုံသေကားချပ် အမြင်များကို ဖယ်ရှားခြင်းသည် ပထမဆုံး ခြေလှမ်းပင်။

"ဒီနေ့ ရှင့်ရဲ့ စွမ်းဆောင်ရည်က ရှင့်ရဲ့ အတိတ်ကပုံစံနဲ့ လုံးဝကွာခြားနေတယ်..."

ရှားချင်းယွဲ့က ရှင်းလင်းစွာ ပြောလိုက်၏။ ချန်ချင်းသည် တိတ်ဆိတ်နေပြီး သကြားရုပ်ဆွဲရန်သာ အာရုံစိုက်နေခဲ့သည်။ သူ ပြောဆိုသည်ထက် ရှားချင်းယွဲ့ ကိုယ်တိုင်တွေးတောပြီး ကွက်လပ်များကို ဖြည့်စွက်ခွင့်ပေးလိုက်သည်က ပိုကောင်းလေ၏။

ချန်ချင်း မျှော်လင့်ထားသည့်အတိုင်းပင် သူ၏ တိတ်ဆိတ်မှုကို မြင်သောအခါ ရှားချင်းယွဲ့သည် သူမ မှန်ကန်စွာ ထောက်ပြနိုင်ခဲ့ပြီး သူက ငြင်းခုံရန်ပင် ပျင်းရိနေသည်ဟု ကောက်ချက်ချလိုက်သည်။

"ရှင်နဲ့ ချန်ရှုံးက မဟာဝူနိုင်ငံတစ်ခုလုံးကို သိမ်းပိုက်ဖို့ ကြံစည်နေတာ မဟုတ်လား... ကျွန်မကို လက်ထပ်တာကလည်း ပုန်ကန်ပြီးတဲ့နောက်မှာ လင်မယား နာမည်ခံပြီး ပြည်သူတွေရဲ့ နှလုံးသားကို နှစ်သိမ့်ဖို့ ကျွန်မကို အသုံးချချင်လို့ပဲ..."

ရှားချင်းယွဲ့က သူမ၏ သုံးသပ်ချက်ကို ဆက်လက်၍ ပြောဆိုလိုက်၏။ သကြားရုပ် ဈေးသည်မှာ နောက်ဆက်တွဲ ပြဿနာများ ကြုံရမည်ကို စိုးရိမ်သဖြင့် ဆက်နားမထောင်ရဲဘဲ ထွက်ပြေးသွားခဲ့လေပြီ။ ချန်ချင်းသည် ဖြေရန် မလောချေ။ သူသည် နောက်ဆုံးစုတ်ချက်ကို ဆွဲလိုက်ပြီး ပုံဆွဲခြင်းကို အဆုံးသတ်လိုက်သည်။ ထိုနောက်ချက်ချင်းပင် ပြီးစီးသွားသော သကြားရုပ်ကို စက္ကူပေါ်မှ ဂရုတစိုက် ကောက်ယူလိုက်သည်။ ထိုအရာသည် ရှားချင်းယွဲ့၏ ချစ်စရာရုပ်ပြောင်ပုံစံလေးပင်။

"ဘယ်လိုလဲ... မင်းနဲ့ တူရဲ့လား..."

ချန်ချင်းက မေးလိုက်သည်။

"ကျွန်မကို ဖြေပါ... ရှင့်ရဲ့ ချန်မိသားစုက ပုန်ကန်ဖို့ စီစဉ်နေတာလား..."

ထိုမေးခွန်း၏ အဖြေသည် ရှားချင်းယွဲ့အတွက် အလွန် အရေးကြီးပေ၏။ တိကျသော အဖြေတစ်ခု လိုချင်နေသည့် ရှားချင်းယွဲ့၏ ပြတ်သားသော အမူအရာကို ကြည့်ကာ ချန်ချင်းသည် သက်ပြင်းချပြီး ပြောလိုက်သည်။

"စိတ်မပူပါနဲ့... အနည်းဆုံးတော့ အခုလောလောဆယ် ငါတို့မှာ အဲ့ဒီ အကြံအစည် မရှိသေးပါဘူး..."

"ဒါ့ပြင်... မင်းဆက်တွေ ပြောင်းလဲပြီး အရည်အချင်းရှိတဲ့သူက အာဏာရယူတာ ပုံမှန်ကိစ္စပဲ မဟုတ်ဘူးလား... ဒီမြေက အစကတည်းက ရှားလို့ နာမည်ပေးထားတာမှ မဟုတ်တာ..."

ချန်ချင်း၏ စကားများနှင့် ရင်ဆိုင်ရချိန်တွင် ရှားချင်းယွဲ့ မငြင်းဆန်နိုင်ခဲ့ချေ။ မဟာဝူနိုင်ငံသည်လည်း ထောင်ပေါင်းများစွာသော အလောင်းများအပေါ်တွင် တည်ဆောက်ထားခြင်းဖြစ်ကြောင်း သူမ သေချာပေါက် သိထားပေ၏။

"ဒါပေမဲ့ အနည်းဆုံးတော့ မဟာဝူနိုင်ငံက စဉ်ဆက်မပြတ် စစ်ပွဲတွေ မရှိခဲ့တာကြောင့် ပြည်သူတွေ ဒုက္ခမရောက်ဘဲနဲ့ နိုင်ငံအနှံ့အပြားမှာ သာယာဝပြောပြီးတော့ နှစ်တစ်ရာလောက် တည်ထောင်ထားနိုင်ခဲ့တာပဲ..."

ရှားချင်းယွဲ့က မဟာဝူနိုင်ငံ၏ အောင်မြင်မှုများကို ပြန်လည်ပြောပြလိုက်သည်။ သူမ ပို၍စိတ်လှုပ်ရှားလာသည်ကို မြင်သောအခါ ချန်ချင်းက ပြောလိုက်၏။

"စိတ်အေးအေးထားပါ... မင်းက အခု ငါ ချန်ချင်းရဲ့ ဇနီးဖြစ်နေပြီ... ဧကရာဇ်ကလည်း ငါ့ရဲ့ ယောက္ခမပဲ... ငါက ဘာလို့ ကိုယ့်မိသားစုကို ပြန်ပုန်ကန်ရမှာလဲ..."

"လာ... ငါ့ရဲ့ဇနီးလေး... သကြားလုံး စစားရအောင်..."

ချန်ချင်းက သကြားရုပ်ကို ထပ်မံ၍ လက်ကမ်းပေးလိုက်သည်။ ရှားချင်းယွဲ့သည် သကြားရုပ်ကို ယူလိုက်သော်လည်း သူမ၏ မျက်ခုံးများက သံသယဖြင့် အနည်းငယ် တွန့်ကွေးနေဆဲဖြစ်ကာ မေးလိုက်သည်။

"ရှင် တကယ်ပဲ အဲ့ဒီလို တွေးတာလား... ရှင် တကယ်ပဲ ပုန်ကန်ဖို့ မစီစဉ်ထားဘူးလား..."

"တကယ်ပါ... တကယ်ပါ... မင်းက ငါ ချန်ချင်းရဲ့ ဇနီးအဖြစ် ရှိနေသရွေ့... ငါ ကတိပေးတယ်... ချန်မိသားစုက ဘယ်တော့မှ ပုန်ကန်မှာ မဟုတ်ဘူး..."

ရှားချင်းယွဲ့၏ သံသယများကို ဖယ်ရှားရန် ချန်ချင်းက လက်ကိုမြှောက်ကာ ကျိန်ဆိုလိုက်သည်။

ရှားချင်းယွဲ့က အသိအမှတ်ပြုကြောင်း ညည်းတွားလိုက်၏။ ချန်ချင်း၏ ရည်မှန်းချက်သည် မဟာဝူနိုင်ငံ တစ်ခုတည်းတွင်သာ ကန့်သတ်ထားမည် မဟုတ်ကြောင်း သူမ မည်သို့ သိနိုင်မည်နည်း။ စိတ်အေးသွားပြီးနောက် သူမသည် သူမ၏ လက်ထဲရှိ သကြားရုပ်ကို ပြန်ကြည့်လိုက်သည်။

'ဒါက အရမ်းလှတာပဲ...'

အစောပိုင်းက တခြားကိစ္စများဖြင့် အလုပ်ရှုပ်နေခဲ့သဖြင့် ရှားချင်းယွဲ့သည် ချန်ချင်း ကိုယ်တိုင်ဆွဲထားသော သူမ၏လက်ထဲရှိ သကြားရုပ်မှာ အမှန်အားဖြင့် သူမကိုယ်တိုင်သာ ဖြစ်ကြောင်း ယခုမှပင် သဘောပေါက်သွားလေ၏။ ဤသကြားရုပ်သည် အသက်ဝင်လွန်းသည်ဟု မဆိုနိုင်သော်လည်း အမှန်တကယ်ကို ချစ်စရာကောင်းနေခဲ့သည်။ ရှားချင်းယွဲ့သည် ချန်ချင်းတွင် ဤကဲ့သို့ အနုပညာစွမ်းရည်မျိုး ရှိလိမ့်မည်ဟု အမှတ်တကယ်ပင် ထင်မှတ်မထားခဲ့ချေ။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် အခြေခံတည်ဆောက်ခြင်းနယ်ပယ် ကျင့်ကြံခြင်း လက်ဆောင်ထုပ်ကြီး တစ်ထုပ်ကို ရရှိသည့်အတွက် ဂုဏ်ယူပါသည်... မှတ်ချက်... အသုံးပြုပြီးနောက် သင်၏ လက်ရှိခွန်အားကို အခြေခံတည်ဆောက်ခြင်းနယ်ပယ် အထွတ်အထိပ်သို့ ချက်ချင်းမြှင့်တင်နိုင်ပါသည်...】

အခြေခံတည်ဆောက်ခြင်းနယ်ပယ် ကျင့်ကြံခြင်း လက်ဆောင်ထုပ်ကြီး...

ဤသည်က တစ်ချက်နှိပ်ရုံဖြင့် ခွန်အားမြှင့်တင်ခြင်းပင်။

ချန်ချင်းသည် တွက်ချက်ကြည့်လိုက်၏။ သူ၏ လက်ရှိကျင့်ကြံခြင်းမှာ ချီသန့်စင်ခြင်းနယ်ပယ် ဒုတိယအဆင့် ဖြစ်သည်။ အကယ်၍ အခြေခံတည်ဆောက်ခြင်းနယ်ပယ် အထွတ်အထိပ်သို့ ရောက်သွားပါက အဆင့်ငယ် ဆယ့်ခြောက်ခု ချက်ချင်းမြင့်တက်သွားခြင်းနှင့် ညီမျှပေသည်။

ကောင်းတယ်... အရမ်းကောင်းတယ်... ငါ သေသေချာချာ အာရုံစိုက်ပြီး ဆွဲခဲ့ရတာ အချည်းနှီး မဖြစ်ဘူးပဲ...

ချန်ချင်းသည် ဤဆုလာဘ်ကို အလွန်စိတ်ကျေနပ်သွားပြီး ထိုအရာကို အသုံးပြုရန် စိတ်အားထက်သန်စွာဖြင့် အတည်ပြုလိုက်သည်။