အခန်း ၂၂

အခန်း (၂၂) ဘယ်တော့မှ အရှုံးမပေးဘူး

ချန်ချင်း၏ ကျန်းအနည်းငယ် ရှည်လျားသော ဓားချီအလင်းတန်းအောက်တွင် ဂိုဏ်းတံခါးစောင့်မှာ တိုက်ရိုက်ပေါက်ကွဲ၍ သေဆုံးသွားခဲ့သည်။ ထိုလူ၏ အသားနှင့်သွေးများမှာ အပိုင်းပိုင်းအစစ ဆုတ်ဖြဲခံရပြီး အမှုန့်ဖြစ်သွားသော အရိုးများနှင့်အတူ အသွေးအသား အပုံကြီးတစ်ခု ဖြစ်သွားခဲ့ကာ အောက်ရှိ မြေပြင်တစ်ခုလုံးကို သွေးရောင်လွှမ်းသွားစေသည်။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် မြေကမ္ဘာအဆင့်မြင့် ဝင်္ကပါ 'နဂါးထောင်ချောက် ဝင်္ကပါ'တစ်ခုကို ရရှိသည့်အတွက် ဂုဏ်ယူပါသည်...】

ဇနီးသည်အား အလိုလိုက်ခြင်းက တစ်ပိုင်းဖြစ်သော်လည်း တခြားတစ်ဖက်တွင် တချို့သော ကိစ္စရပ်များ၌ ချန်ချင်းသည် ကိုယ့်ကိုယ်ကိုယ် အလွန် တစ်ကိုယ်ကောင်းဆန်သော လူတစ်ဦးအဖြစ် သတ်မှတ်ထားသည်။ မည်သို့ပင်ဖြစ်စေ ရှားချင်းယွဲ့သည် နာမည်အရ သူ၏ ဇနီးဖြစ်နေရုံမျှမက အားကြီးသူကို လေးစားသော လောကကြီးတွင် ဂိုဏ်းတံခါးစောင့်၏ ခွန်အားသည် သူ့ထက် ရှင်းလင်းစွာ အားနည်းနေသော်လည်း သူ၏ တရားဝင် လက်ထပ်ထားသော ဇနီးကို တပ်မက်ဝံ့သေးသည်။ ချန်ချင်းသည် ဤအရာကို မည်သို့ သည်းခံနိုင်မည်နည်း။

ထိုလူကို သတ်ရပေမည်။ ဤသည်မှာ သူ စိတ်ရှင်းလင်းမှု ရရှိရန်အတွက်ပင်။

ဒုတိယဘဝတစ်ခုကို နေထိုင်ရချိန်တွင် ချန်ချင်းသည် အနည်းငယ်မျှသော မတရားမှုကိုပင် မခံစားလိုတော့ချေ။ သူ၏ ယခင်ဘဝတွင် သူ လုံလောက်အောင် ခံစားခဲ့ရပြီးဖြစ်သည်။

"အခု အဆင်ပြေသွားပါပြီ..."

ချန်ချင်းက ရှားချင်းယွဲ့ကို တင်းကျပ်စွာ ဖက်ထားသော သူ၏လက်များကို ဖြေလျော့ပေးရင်း ညင်သာစွာ ပြောလိုက်သည်။

"အင်း..."

ရှားချင်းယွဲ့က တိုးညှင်းစွာ ပြန်ဖြေပြီး သူမ၏ခေါင်းကိုလှည့်ကာ ကြည့်လိုက်သည်။ သူမသည် ပြတ်တောက်နေသော ခြေလက်အင်္ဂါများကို မမြင်ရသော်လည်း သွေးစွန်းနေသော မြေပြင်ကို ကြည့်ကာ ထိုဂိုဏ်းတံခါးစောင့်၏ ကံကြမ္မာကို ခန့်မှန်းရန် မခက်ခဲချေ။

သူမသည် ချန်ချင်းကို အကြမ်းဖက်တတ်သူဟု တွေးထင်မထားချေ။ ချန်ချင်းက ဓားကိုဆွဲထုတ်ပြီး လူသတ်ခဲ့သည်မှာ သူမကြောင့် လုံးလုံးလျားလျား ဖြစ်ကြောင်း သူမ ကောင်းစွာသိရှိထားသည်။

ရှားချင်းယွဲ့ မည်မျှပင် ဖြူစင်စေကာမူ အစောပိုင်းက ဂိုဏ်းတံခါးစောင့်သည် သူမ၏ အလှကို တပ်မက်နေပြီး တောင်ပေါ်သို့ တက်ခွင့်ရရန် သူမ၏ ခန္ဓာကိုယ်ကို အသုံးပြုစေလိုကြောင်း သူမ မသိဘဲ သို့မဟုတ် နားမလည်ဘဲ မနေချေ။ ထို့ကြောင့် ချန်ချင်းက ပြတ်ပြတ်သားသား လုပ်ဆောင်ပြီး ထိုလူကို ဖယ်ရှားပစ်ခဲ့ခြင်းပင်။

ဤမျှထိ ကြီးစိုးပြီး အကာအကွယ်ပေးတတ်သော ခင်ပွန်းတစ်ယောက်ရှိနေခြင်းက လောကရှိ မည်သည့် အမျိုးသမီးက ခုခံနိုင်မည်နည်း။

မည်သို့ပင်ဖြစ်စေ ရှားချင်းယွဲ့သည် ယခုအချိန်တွင် ချန်ချင်းကို အပြစ်တင်ရန် အတွေးမရှိရုံသာမက သူမ၏စိတ်အတွင်း၌ ဖော်ပြ၍မရနိုင်သော ထူးခြားသည့် စိတ်လှုပ်ရှားမှုတစ်ခု ဖြစ်ပေါ်နေသည်။

သို့သော် ရှားချင်းယွဲ့ ထပ်မံ၍ မတွေးတောနိုင်မီမှာပင် တောင်ပေါ်မှနေ၍ ခမ်းနားကြီးကျယ်သော အသံတစ်သံက ပဲ့တင်ထပ်ကာ ထွက်ပေါ်လာခဲ့သည်။

"သတ္တိကောင်းတဲ့ လူယုတ်မာ... မင်းက ကောင်းကင်ငှက်မွှေးဂိုဏ်းကို ကျူးကျော်လာပြီးတော့ ငါ့ရဲ့တပည့်ကို သတ်ရဲတယ်ပေါ့... မင်း သေချင်နေတာပဲ..."

ထိုအသံဆုံးသည်နှင့်တပြိုင်နက် တပည့် ဒါဇင်ပေါင်းများစွာ၏ ပုံရိပ်များသည် ကြယ်ပျံများကဲ့သို့ နောက်မှလိုက်ပါလာပြီး တောင်ပေါ်မှ လျင်မြန်စွာ ဆင်းသက်လာကာ ချန်ချင်းနှင့်ရှားချင်းယွဲ့တို့ကို အလွှာလိုက် ဝန်းရံလိုက်ကြသည်။

စကားပြောဆိုခဲ့သော အကြီးအကဲ ဝတ်စုံဝတ်ထားသူသည် လှေကားထစ် ဒါဇင်ပေါင်းများစွာအထက်တွင် လက်နှစ်ဖက်ကို နောက်ပစ်ကာ မတ်တတ်ရပ်နေပြီး သူ၏အကြည့်များမှာ မောက်မာထောင်လွှားကာ ချန်ချင်းနှင့်ရှားချင်းယွဲ့တို့ကို အကဲခတ်နေသည်။

"နင်တို့ကမှ သတ္တိကောင်းတဲ့ လူတွေပဲ... ငါက ရှားမိသားစုရဲ့ မင်းသမီးပဲ... နင်တို့ရဲ့လူတွေက တော်ဝင်မိသားစုကို မလေးမစား လုပ်ခဲ့တာ... ငါ့ရဲ့ခင်ပွန်းက သူ့ကို ဖယ်ရှားလိုက်တာက သက်ညှာပေးလိုက်တာပဲ... နင်တို့ ခေါင်းမာမနေဖို့ အကြံပေးချင်တယ်..."

ရှားချင်းယွဲ့သည် ဓားများ၏ အေးစက်သော အလင်းရောင်ကို မကြောက်မရွံ့ဘဲ ရှေ့သို့ ထွက်လာကာ ချန်ချင်းနှင့်အတူ အခိုင်အမာ ရပ်တည်လိုက်သည်။

"မင်းသမီး... ရှားချင်းယွဲ့..."

"သူ ဖြစ်နေတာကိုး... သူက မဟာဝူနိုင်ငံရဲ့ အလှဆုံး မိန်းမပျို ဖြစ်နေတာ အံ့အားသင့်စရာ မရှိတော့ဘူး... သူက ဒီလောက်ထိ ဆွဲဆောင်မှု ရှိနေတာကိုး..."

"တစ်ယောက်က မင်းသမီး... နောက်တစ်ယောက်က တော်ဝင်သမက်တော်... ငါတို့ လှုပ်ရှားသင့်လား..."

ချန်ချင်းနှင့် ရှားချင်းယွဲ့တို့၏ အဆင့်အတန်းများကို သိရှိသွားသောအခါ ကောင်းကင်ငှက်မွှေးဂိုဏ်း၏ တပည့်များသည် သိသာရှင်းလင်းစွာ တုံ့ဆိုင်းသွားကြပြီး ဘာလုပ်ရမှန်းမသိ ဖြစ်နေကြ၏။ သူတို့က အကြီးအကဲ လင်ထျန်းထံသို့ လှည့်ကြည့်ကာ ဆုံးဖြတ်ပေးရန် တောင်းဆိုလိုက်ကြသည်။

မင်းသမီးရှားချင်းယွဲ့ကို မြင်ချိန်၌ အကြီးလင်ထျန်းသည် ချန်ချင်းက ကောင်းကင်ငှက်မွှေးဂိုဏ်းနှင့် ဒုတိယမင်းသားတို့ ပူးပေါင်း၍ ဖယ်ရှားလိုသော ရန်သူဖြစ်ကြောင်း အလျင်အမြန် အတည်ပြုနိုင်ခဲ့သည်။

ထိုရန်သူသည် ဂိုဏ်း၏တံခါးဝသို့ ကိုယ်တိုင်လာပို့ပေးလိမ့်မည်ဟု လင်ထျန်း လုံးဝထင်မှတ်မထားခဲ့ချေ။

လင်ထျန်း၏ နှုတ်ခမ်းများတွင် ကောက်ကျစ်သော အပြုံးတစ်ခု ကွေးတက်သွားသည်။ သူသည် ဤကိစ္စတွင် အောင်မြင်မှုများ ရယူရန်နိုင်ပါက ဒုတိယမင်းသား၏ အဓိကအဖွဲ့ခွဲတွင် ပါဝင်နိုင်မည် ဖြစ်သောကြောင့် အလွန်ကောင်းမွန်သော အခွင့်အရေးတစ်ခုအဖြစ် ခံစားလိုက်ရ၏။

ထို့ကြောင့် လင်ထျန်းသည် အတွေးတစ်ခုရလာကာ အသံကို မြှင့်၍ ပြောလိုက်သည်။

"မင်းသမီးကို လူယုတ်မာတစ်ယောက်က ဓားစာခံအဖြစ် ဖမ်းထားတယ်... မင်းတို့ အားလုံး ဘာရပ်ကြည့်နေကြတာလဲ... မြန်မြန် လှုပ်ရှားကြ... အဲ့ဒီလူယုတ်မာကို နေရာမှာတင် သတ်လိုက်... မင်းသမီးကို ကယ်တင်ကြစမ်း..."

အမှောင်ထုကြောင့် သေချာမမြင်ရသည့်အပြင် လက်ရှိနေရာတွင် ရှိနေသူများအားလုံးမှာ သူတို့၏ လူများဖြစ်ပြီး သူတို့၏ နောက်ကွယ်တွင် ကောင်းကင်ငှက်မွှေးဂိုဏ်း ရှိနေသည်။ ထိုအချိန်ရောက်လျှင် တော်ဝင်မိသားစုက အမှန်တကယ် စုံစမ်းစစ်ဆေးလာပါက မင်းသမီးကို ကယ်တင်ရန် စိတ်အားထက်သန်မှုကြောင့် တော်ဝင်သမက်တော်ကို မမှတ်မိလိုက်ခြင်းဟူသော အကြောင်းပြချက်ကို အသုံးပြုကာ ဖုံးကွယ်နိုင်ပေ၏။

ထိုမျှသာမက ဒုတိယမင်းသား၏ အတွင်းသတင်းများအရ နာမည်ဆိုးဖြင့် ကျော်ကြားပြီး လူတိုင်း ရွံရှာသော သစ္စာဖောက် ဝန်ကြီးတစ်ဦး၏ သားကို သတ်ဖြတ်ခြင်းက ပြစ်ဒဏ်ခံရလိမ့်မည်ဟု လင်ထျန်း တွေးထင်မထားခဲ့ချေ။

သူ လောင်းကြေးထပ်ချင်ခဲ့သည်။

"နင်တို့ ဘာလုပ်ဖို့ ကြိုးစားနေတာလဲ... သူက ဒီမင်းသမီးရဲ့ ခင်ပွန်းပဲ... တကယ်လို့ နင်တို့က သူ့ရဲ့ ဆံချည်တစ်မျှင်ကိုတောင် ထိခိုက်အောင် လုပ်ရဲရင်... ဒီမင်းသမီးက နင်တို့ကို အလွတ်ပေးမှာ မဟုတ်ဘူး... ပြီးတော့ မဟာဝူ တော်ဝင်မိသားစုကလည်း နင်တို့ ကောင်းကင်ငှက်မွှေးဂိုဏ်းကို ချမ်းသာပေးမှာ မဟုတ်ဘူး..."

ရှားချင်းယွဲ့က များစွာမတွေးတော့ဘဲ မသိစိတ်မှ စိုးရိမ်တကြီး လွှတ်ခနဲ ပြောဆိုလိုက်သည်။

ဤစကားကို ကြားသောအခါ လှုပ်ရှားရန် ဟန်ပြင်နေသော ကောင်းကင်ငှက်မွှေးဂိုဏ်း တပည့်များသည် ရုတ်တရက် အကျပ်ရိုက်သွားကြပြီး ခြေလှမ်းများကို နောက်ဆုတ်လိုက်ကြ၏။

လင်ထျန်းလည်း ဇဝေဇဝါ ဖြစ်သွားခဲ့သည်။ လူတိုင်းက မင်းသမီးသည် ဤလူယုတ်မာကို လက်ထပ်ရန် ဖိအားပေးခံခဲ့ရသည်ဟု ပြောကြသည် မဟုတ်လော။ ယခု၌ မည်သည်ကြောင့် သူမက သူ့ကို တက်တက်ကြွကြွ ကာကွယ်ပေးနေရသနည်း။

သို့သော် သူ သေချာစဉ်းစားကြည့်ချိန်၌ မည်သို့ပင်ဖြစ်စေ ချန်ချင်းသည် ရှားချင်းယွဲ့၏ခင်ပွန်း ဖြစ်နေသည်။ မင်းသမီးတစ်ပါးအနေဖြင့် ရှားချင်းယွဲ့သည် ဂုဏ်သိက္ခာပိုင်းဆိုင်ရာ ကိစ္စတစ်ခုအဖြစ်သာ ခံစားရခြင်း ဖြစ်နိုင်ပေ၏။

သူမ၏စိတ်နှလုံးသားထဲတွင်မူ ချန်ချင်း သေဆုံးသွားရန် ဆုတောင်းနေပေလိမ့်မည်။

နာမည်ဆိုးမှလွဲ၍ ဘာမှမရှိသော ဤကဲ့သို့ လူမျိုးကို မည်သူက ချစ်မိမည်နည်း။

"ဒီအကြီးအကဲပြောတာ မကြားဘူးလား... လှုပ်ရှားကြတော့... သစ္စာဖောက်ကို သတ်ပြီး မင်းသမီးကို ကယ်တင်ကြစမ်း..."

လင်ထျန်းသည် သူ ဖြောင့်မတ်စွာ လုပ်ဆောင်နေကြောင်းနှင့် တော်ဝင်မိသားစု၏ လုံခြုံရေးအတွက် စိတ်ရင်းဖြင့် အကြွင်းမဲ့ လုပ်ဆောင်နေကြောင်းကို ခိုင်မာစေရန် ထပ်ခါတလဲလဲ အလေးပေး ပြောဆိုလိုက်သည်။

ချန်မိသားစုအတွက်ကမူ သူ့အတွက် ဂရုစိုက်စရာမရှိချေ။ ဂုဏ်သိက္ခာရှိသော အင်မော်တယ်ဂိုဏ်းတစ်ဂိုဏ်းက သာမန်မိသားစုတစ်ခုကို မည်သည်ကြောင့် ကြောက်ရွံ့နေရမည်နည်း။

သူတို့ထံ၌ ကြီးမားသည့် အာဏာများ ရှိနေလျှင်ပင် မည်သည်ကြောင့် ဂရုစိုက်ရမည်နည်း။ လင်ထျန်း၏ မျက်လုံးထဲတွင် ထိုလူများသည် ကောက်ရိုးခွေးများ၊ ပုရွက်ဆိတ်များသာ ဖြစ်ပေ၏။

"ဘယ်သူ လှုပ်ရဲလဲ... ရှင်တို့ သူ့ကို ထိခိုက်အောင် လုပ်လို့ မရဘူး..."

ကောင်းကင်ငှက်မွှေးဂိုဏ်း တပည့်များ ခြေတစ်လှမ်းချင်း ချဉ်းကပ်လာသည်ကို မြင်သောအခါ ရှားချင်းယွဲ့သည် သူမ၏လက်နှစ်ဖက်ကို ဆန့်ထုတ်ကာ ချန်ချင်းကို သူမ၏နောက်တွင်ထား၍ တင်းကြပ်စွာ ကွယ်ထားလိုက်သည်။

ရှားချင်းယွဲ့သည် ဤမျှထိ အဆင်အခြင်မဲ့စွာ ပြုမူနေသည်ကို မြင်သောအခါ လင်ထျန်းက ပါးနပ်စွာ ပြောဆိုလိုက်၏။

"မင်းသမီး... မင်းသမီးရဲ့ ညဘက် လာရောက်လည်ပတ်မှုကို တခြားလူတွေကို အသိပေးခဲ့မယ်လို့ ကျွန်တော် မထင်ဘူး... ဒီနေရာက အရမ်းလည်း မြင့်ပြီး အရမ်းလည်း ဝေးတယ်... တကယ်လို့ တစ်ခုခု ဖြစ်သွားရင်တောင် ဘယ်သူမှသိမှာ မဟုတ်ဘူးလို့ ကျွန်တော် စိုးရိမ်မိတယ်..."

သူ၏ စကားများသည် သွယ်ဝိုက်သော စကားလုံးများ မဟုတ်တော့ဘဲ ရှားချင်းယွဲ့သည် ပူးပေါင်းဆောင်ရွက်ခြင်း မရှိပါက သူမကိုလည်း နှုတ်ပိတ်ရန် သတ်ပစ်မည်ဟု ရှင်းလင်းသော သတိပေးချက်တစ်ခု ဖြစ်နေသည်။

လှုပ်ရှားရန် ဟန်ပြင်နေသော ချန်ချင်းသည် လင်ထျန်းက သေခါနီး အချိန်လေးတွင် သူ့အတွက် အကျိုးအမြတ်များ ယူဆောင်လာပေးလိမ့်မည်ဟု ထင်မှတ်မထားခဲ့ချေ။

ထိုသူ ထိုစကားများကို ပြောလိုက်သည်နှင့်တပြိုင်နက် အခြေအနေ၏သဘောသဘာဝ ပြောင်းလဲသွားခဲ့သည်။

"ဒီနေ့ ငါ ခြေတစ်လှမ်းမှ နောက်မဆုတ်ဘူးလို့ ကျိန်ဆိုတယ်... နင်တို့မှာ သတ္တိရှိရင် ငါ့ကိုပါ သတ်လိုက်စမ်း..."

ရှားချင်းယွဲ့က ပြတ်သားစွာ ပြောဆိုလိုက်ပြီး ချန်ချင်းနှင့် အတူတကွ ရှေ့တိုး သို့မဟုတ် နောက်ဆုတ်ရန် စိတ်ပိုင်းဖြတ်လိုက်၏။

"ကောင်းပြီ... ဒါဆိုရင်လည်း ငါက သနားညှာတာပြီး မင်းတို့ မျှော်လင့်ချက်မဲ့နေတဲ့ ချစ်သူနှစ်ယောက်ရဲ့ ဆန္ဒကို ဖြည့်ဆည်းပေးရမှာပေါ့... လှုပ်ရှားတော့.."

လင်ထျန်းက အခြေအနေကို ပို၍တင်းမာစေရန် အမိန့်ပေးလိုက်သည်။ သူ၏ တပည့်များသည် ဤဓားပြလှေပေါ်မှ ဆင်း၍ မရတော့ကြောင်း သိရှိသွားကြပြီး အတူတကွ အောင်မြင်မည် သို့မဟုတ် အတူတကွ သေဆုံးမည်ဟု ဆုံးဖြတ်ချက်ချလိုက်ကြသည်။

သူတို့သည် ဓားများနှင့် ချဉ်းကပ်လာသည်ကို မြင်သောအခါ သိုင်းပညာ သို့မဟုတ် ကျင့်ကြံနည်းစနစ်များကို မသိရှိသော ရှားချင်းယွဲ့သည် ကြောက်လန့်တကြားဖြင့် သူမ၏မျက်လုံးများကို ပိတ်လိုက်သည်။

သို့သော် သူမ၏ ခြေထောက်များသည် တစ်လှမ်းမှ နောက်မဆုတ်ခဲ့ဘဲ ချန်ချင်းကို သူမ၏နောက်တွင် တင်းကျပ်စွာ ကာကွယ်ထားဆဲပင်။

သူမသည် သူ့ကို ကာကွယ်ရန် သူမ၏ မင်းသမီး အဆင့်အတန်းကို အသုံးပြုလိုခဲ့ပြီး ဤလူများသည် တော်ဝင်မိသားစုဝင် တစ်ဦးကို အမှန်တကယ် သတ်ရဲလိမ့်မည်ဟု သူမ မယုံကြည်ခဲ့ချေ။

"သခင်မလေး... အခု မျက်လုံးဖွင့်လို့ ရပါပြီ..."

ရှားချင်းယွဲ့ထံတွင် စိတ်လှုပ်ရှားမှုများ ပြည့်နှက်နေပြီး သူမ၏နှလုံးသားသည် ဗုံတစ်လုံးကဲ့သို့ ခုန်ပေါက်နေချိန်မှာပင် ချန်ချင်း၏ ညင်သာသော အသံက သူမ၏ နားထဲသို့ ရောက်လာခဲ့လေသည်။

ရှားချင်းယွဲ့က သူမ၏ မျက်လုံးများကို ဖြည်းညင်းစွာ ဖွင့်လိုက်ချိန်၌ သူမ၏ရှေ့တွင် ရှိနေခဲ့သော ကောင်းကင်ငှက်မွှေးဂိုဏ်းတပည့် ဒါဇင်ပေါင်းများစွာ ပျောက်ကွယ်သွားပြီဖြစ်ကြောင်း သဘောပေါက်လိုက်သည်။

အဝေးမှ လှေကားထစ်များပေါ်တွင် ထိုင်နေသော အကြီးအကဲ လင်ထျန်း တစ်ဦးတည်းသာ ကျန်ရစ်ခဲ့ပြီး သူ၏ မျက်နှာတွင် ထိတ်လန့်မှုများ ပြည့်နှက်နေကာ ကောင်းကင်ကြီး ပြိုကျသွားသည်ကို မြင်လိုက်ရသကဲ့သို့ တစ်ကိုယ်လုံး တုန်ယင်နေသည်။

ဤအရာမှတစ်ဆင့် ရှားချင်းယွဲ့သည် မည်သည့်အရာများ ဖြစ်သွားသနည်းဆိုသည်ကို အလွယ်တကူ ခန့်မှန်းနိုင်ခဲ့၏။

သို့ရာတွင်... သူမက ခေါင်းကို ဘယ်ညာလှည့်ကြည့်လိုက်သည်။ မည်သည်ကြောင့် အရိပ်ရုပ်သေးရုပ် မရှိရသနည်း။

ချန်ချင်း၏ ကျင့်ကြံခြင်းကို ရှားချင်းယွဲ့ နားလည်ထားမှုအပေါ် အခြေခံ၍ ရွှေအမြုတေနယ်ပယ် ကျွမ်းကျင်သူတစ်ဦးသည် ဤမျှထိများပြားသော ဂိုဏ်းတပည့်များကို ချက်ချင်းသုတ်သင်ပစ်ရန်မှာ မဖြစ်နိုင်ချေ။