အခန်း ၂၄

အခန်း (၂၄) မင်းလည်း ထိုက်တန်ပါတယ်

ကောင်းကင်ငှက်မွှေးဂိုဏ်း... ဂိုဏ်းချုပ်ခန်းမ..

"မကောင်းတော့ဘူး... ဒီကိစ္စက မကောင်းတော့ဘူး..."

တပည့်တစ်ဦးသည် ဒယိမ်းဒယိုင်ဖြင့်ပြေးလာကာ ခန်းမထဲသို့ ဝင်လာပြီး ကြမ်းပြင်ပေါ်သို့ လဲကျသွားလေ၏။

"ဘာမကောင်းတာလဲ... မင်းက ဘာလို့ ဒီလောက်ထိ ပျာယာခတ်နေရတာလဲ... ဒါက ဘယ်လို အပြုအမူမျိုးလဲ..."

ဂိုဏ်းချုပ်လုဝူယန်က မကျေမနပ်ဖြင့် ပြောလိုက်ပေသည်။ သူ ဂိုဏ်းချုပ် ရှိနေသရွေ့ ကိစ္စသည် မည်မျှထိကြီးကြီး ကောင်းကင်ကြီး အမှန်တကယ် ပြိုကျလာနိုင်မည်လော။

"ဂိုဏ်း... ဂိုဏ်းချုပ်ကို သတင်းပို့ပါတယ်... အကြီးအကဲလင်ကို သွားပြီးကူညီတဲ့ မဟာအကြီးအကဲ လင်းဝေနဲ့ တခြားသူတွေ အားလုံး... သူတို့အားလုံး အသတ်ခံလိုက်ရပါတယ်..."

ထိုတပည့် စကားပြောဆိုလိုက်သည်နှင့်တပြိုင်နက် လွန်ခဲ့သော တခဏက တည်ငြိမ်နေခဲ့သော လုဝူယန်၏မျက်နှာအမူအရာ ပြင်းထန်စွာ ပြောင်းလဲသွားပြီး သူ၏ ဂိုဏ်းချုပ်ပလ္လင်ပေါ်မှ ထိတ်လန့်တကြား မတ်တတ်ထရပ်လိုက်သည်။

"မင်း... မင်း ဘာပြောလိုက်တယ်... အကြီးအကဲလင်နဲ့ တခြားသူတွေ အားလုံး... သူတို့အားလုံး သေသွားပြီလား..."

တပည့်က ဖြစ်ရပ်တစ်ခုလုံး၏ဖြစ်စဉ်ကို လိုရင်းနှင့် အပြည့်အစုံ ရှင်းပြလိုက်၏။

"အဲ့ဒီ ရုပ်သေးရုပ်က တကယ့်ကို စိတ်ဝိညာဉ်ခွဲထွက်ခြင်းနယ်ပယ် ကျင့်ကြံခြင်း ရှိနေတာပဲ..."

လုဝူယန်သည် မှော်ရတနာသန့်စင်သူတစ်ဦး၏ နယ်ပယ် လုံလောက်စွာ မြင့်မားနေသရွေ့ သူတို့ ဖန်တီးသော ရုပ်သေးရုပ်များသည် လူသားကျင့်ကြံသူများထက် မညံ့နိုင်ကြောင်း ကြားဖူးသည်။ သို့သော် စိတ်ဝိညာဉ်ခွဲထွက်ခြင်းနယ်ပယ်နှင့် ညီမျှသော ခွန်အားရှိသည့် ရုပ်သေးရုပ်တစ်ရုပ်... ထို့ပြင် ဂိုဏ်းအကြီးအကဲ ဒါဇင်ပေါင်းများစွာကို တစ်ဖက်သတ် သတ်ဖြတ်နိုင်သည့် ရုပ်သေးရုပ်မျိုးကို လုဝူယန်၏ ဘဝတွင် တစ်ကြိမ်တစ်ခါမျှ မကြုံတွေ့ဖူးခဲ့ချေ။

"ကောင်းပြီ... ငါကိုယ်တိုင် လှုပ်ရှားမှ ရတော့မယ့်ပုံပဲ... စိတ်ဝိညာဉ်ခွဲထွက်ခြင်းနယ်ပယ်နဲ့ ညီမျှတဲ့ ခွန်အားရှိတဲ့ ရုပ်သေးရုပ်လေး တစ်ရုပ်ပဲ မဟုတ်လား... ဒီနေ့ သူတို့ အသက်ရှင်ရက် ပြန်မသွားနိုင်အောင် ငါ လုပ်ပစ်မယ်... အသက်တစ်ချောင်းအတွက် အသက်တစ်ချောင်းပဲ..."

လုဝူယန်၏မျက်နှာတွင် ပြတ်သားသော အမူအရာတစ်ရပ် ထင်ဟပ်နေသည်။

"ဂိုဏ်းချုပ်ကို သတင်းပို့ပါတယ်... ဒါက တစ်ခုတည်း မဟုတ်ပါဘူး... ဆယ်ပေါင်းများစွာပါ... ပြီးတော့ သူတို့က အရင်က မြို့တော်ကို ကျွန်တော်တို့ စေလွှတ်ခဲ့တဲ့ တပည့်တွေရဲ့ ခေါင်းတွေကိုလည်း သယ်လာကြပါတယ်..."

တပည့်က အလျင်အမြန် ထပ်လောင်းပြောဆိုလိုက်သည်။

"မင်း... မင်း ဘယ်လောက်လို့ ပြောလိုက်တယ်..."

လုဝူယန်၏ ခန္ဓာကိုယ် ယိမ်းယိုင်သွားပြီး သူ နားကြားမှားသွားသည်ဟု သံသယဝင်မိလေ၏။

"မဟာအကြီးအကဲ လင်းဝေနဲ့ တခြားသူတွေကို သတ်ပြီးတဲ့နောက် အဲ့ဒီသခင်လေးက တူညီတဲ့ ရုပ်သေးရုပ်တွေအများကြီးကို ဆင့်ခေါ်လိုက်ပါတယ်..."

တပည့်သည် အမှန်အတိုင်း ရှင်းပြလိုက်ပြီး မည်သည့်အရာကိုမျှ ဖုံးကွယ်မထားရဲချေ။

"စိတ်ဝိညာဉ်ခွဲထွက်ခြင်းနယ်ပယ် ရုပ်သေးရုပ် ဆယ်ပေါင်းများစွာ..."

လုဝူယန်သည် သူ၏ထိုင်ခုံလက်ရန်းကို မှီကာ ဂိုဏ်းချုပ် ပလ္လင်ပေါ်တွင် ပြန်လည်၍ ထိုင်ချလိုက်ပြီး သူသည် ကျောက်တုံးနှင့် မာကျောသော နေရာတစ်ခုကြားတွင် ပိတ်မိနေကာ အကျဥ်းအကျပ်ထဲ ရောက်နေကြောင်း တွေ့ရှိလိုက်ရသည်။

"ဂိုဏ်း... ဂိုဏ်းချုပ်... သူတို့ ဖောက်ဝင်လာပြီ..."

ဤအချိန်တွင် တခြား ကောင်းကင်ငှက်မွှေးဂိုဏ်း တပည့်တစ်ဦးက အလျှင်အမြန် ပြေးဝင်လာသည်။

"ကောင်းပြီ... ငါ သိပြီ... တပည့်တွေအားလုံး အသင့်ရှိနေဖို့ အမိန့်ပေးလိုက်... အချိန်မရွေး ငါ့အမိန့်ကို နားထောင်ဖို့ အသင့်ပြင်ထားပြီးတော့ ဂိုဏ်းကာကွယ်ရေး ဝင်္ကပါကို အသက်သွင်းလိုက်စမ်း..."

ဂိုဏ်းကာကွယ်ရေးဝင်္ကပါသည် ကောင်းကင်ငှက်မွှေးဂိုဏ်း၏ အပြင်းထန်ဆုံး ဝှက်ဖဲဟု ဆိုနိုင်ပြီး တစ်ခုတည်းသော ဝင်္ကပါဖြစ်ကာ ထိုအရာကို အသက်သွင်းရန် ဂိုဏ်းတစ်ခုလုံး၏စွမ်းအား လိုအပ်ပေ၏။ အကယ်၍ ချန်ချင်းက ပြန်လည်သင့်မြတ်ရန် ဆန္ဒမရှိပါက လုဝူယန်သည် ဂိုဏ်းဝင်္ကပါနှင့် သူ၏ကိုယ်ပိုင်စွမ်းအားတို့ ပေါင်းစပ်လိုက်ပါက ကုန်ကျစရိတ် အနည်းငယ် ကြီးမားမည်ဆိုလျှင်ပင် တစ်ဖက်လူနှင့် ရုပ်သေးရုပ် ဒါဇင်ပေါင်းများစွာကို ကိုင်တွယ်ဖြေရှင်းရန် မခက်ခဲသင့်ဟု တွေးတောထားသည်။

"ဟုတ်ကဲ့ပါ..."

တပည့်က သဘောတူပြီး ဂိုဏ်းချုပ်ခန်းမမှ အလျင်အမြန် ထွက်ခွာသွားသည်။ လုဝူယန်သည် ချန်ချင်းနှင့် တွေ့ဆုံရန် ရည်ရွယ်ချက်ဖြင့် နောက်မှ အနီးကပ် လိုက်ပါသွားခဲ့သည်။

မကြာမီ နှစ်ဖက်လုံး တွေ့ဆုံခဲ့ကြ၏။ ကြားရသည်မှာ တစ်ပိုင်းဖြစ်ပြီး မြင်တွေ့ရသည်မှာ တခြားတစ်ပိုင်းပင်။ လေထဲတွင် လွင့်မျောနေသော အရိပ်ရုပ်သေးရုပ် ဒါဇင်ပေါင်းများစွာကို သူကိုယ်တိုင် မျက်မြင်တွေ့ရှိရသောအခါ လုဝူယန်၏နှလုံးသားသည် အမှန်တကယ်ကို မတည်ငြိမ်နိုင်တော့ချေ။ ထိုအရာများ၏ အသွင်အပြင်ကြောင့် ဖြစ်ပေါ်လာသော ဖိနှိပ်မှု ခံစားချက်သည် တူညီသောနယ်ပယ်ရှိ လူသား ကျင့်ကြံသူများထက် များစွာပို၍ ကြီးမားလှ၏။

ထို့နောက် လုဝူယန်၏ မျက်လုံးများသည် ဓားပျံတစ်လက်ကို စီးနင်းကာ ရှားချင်းယွဲ့ကို ရင်ခွင်ထဲတွင် ပွေ့ဖက်ထားသော ချန်ချင်းအပေါ်သို့ အလျှင်အမြန် အာရုံစိုက်လိုက်သည်။

"သခင်လေးချန်... ငါတို့ကြားမှာ ဘယ်လို အထင်လွဲမှားမှုတွေပဲ ရှိနေပါစေ... အခု မင်းက ဒီလူတွေကို သတ်လိုက်ပြီဆိုတော့ ကြီးမားတဲ့ နာကြည်းမှုဆိုရင်တောင် ပျောက်ကွယ်သွားသင့်ပါပြီ... ငါ့ရဲ့စံအိမ်မှာ အရမ်းကောင်းမွန်တဲ့ လက်ဖက်ရည် ရှိတယ်... ငါတို့ နှစ်ယောက် ထိုင်ပြီး သေသေချာချာ စကားပြောကြရင် ဘယ်လိုလဲ..."

လုဝူယန်က သူ၏ အဆင့်အတန်းကို နှိမ့်ချကာ ပြောလိုက်သည်။

ရှားချင်းယွဲ့ စကားပြောမထွက်နိုင်အောင် ဖြစ်သွားကာ သက်ပြင်းမချဘဲ မနေနိုင်တော့ချေ။ ဤလောကကြီးသည် ခွန်အားကြီးသူကို အမှန်တကယ်ပင် လေးစားကြသည်။ အကယ်၍ ချန်ချင်းသာ လုံလောက်သော ခွန်အားမရှိပါက လုဝူယန်အား သူ့ကိုယ်သူ နှိမ့်ချရန် မည်သို့ အတင်းအကြပ် ခိုင်းစေနိုင်မည်နည်း။ သူသည် ကောင်းကင်ငှက်မွှေးဂိုဏ်း တပည့်များကို ဓားများနှင့် ရှေ့သို့ ပြေးဝင်လာရန် အမိန့်ပေးကာ သူအနှင့် ချန်ချင်းတို့ကို အပိုင်းပိုင်းအစစ ခုတ်ထစ်ပစ်ရန် ဆုတ်ဖြဲပစ်ရန် ကြာမြင့်စွာကတည်းက အမိန့်ပေးပြီးလောက်ပြီဟု သူမ စိုးရိမ်မိလေ၏။ သူမသည် တခြားသူများ၏နောက်တွင် အမြဲတစေ ပုန်းအောင်းနေ၍ မရနိုင်ဟု တွေးတောကာ ကျင့်ကြံလိုစိတ်များ ပေါက်ဖွားလာသည်။

ချန်ချင်းအတွက်ကမူ လုဝူယန်၏လက်ဖက်ရည်သောက်ကာ စကားပြောရန် ဖိတ်ခေါ်ချက်ကို ကြားပြီးနောက် သူက အေးစက်စက်မျက်နှာဖြင့် ပြောလိုက်သည်။

"ငါနဲ့ လက်ဖက်ရည် သောက်မယ်... မင်းက ထိုက်တန်လို့လား..."

မင်းက ထိုက်တန်လို့လား... မင်းက ထိုက်တန်လို့လား...

ဤစကားလုံးများက လုဝူယန်၏ စိတ်ထဲတွင် အကြိမ်ကြိမ် ပဲ့တင်ထပ်နေ၏။ သူ၏ အပြုံးသည် အေးခဲတောင့်တင်းသွားပြီးနောက် ပျောက်ကွယ်သွားခဲ့သည်။ လွန်ခဲ့သည့်အကြိမ်က သူ့အား ဤကဲ့သို့ စကားပြောရဲသူ မည်သူဖြစ်ကြောင်း သူ မမှတ်မိတော့သော်လည်း သူတို့၏ သင်္ချိုင်းမြက်များသည် ယခုအချိန်၌ သူ၏အရပ်ထက် ပို၍မြင့်မားနေမည်မှာ သေချာပေါက်ပင်။

"သခင်လေးချန်... မင်းက တကယ့်ကို အရမ်းပါရမီပါတယ်ဆိုတာ ငါ ဝန်ခံပါတယ်... ဒါပေမဲ့ ပါရမီကြောင့် မောက်မာတာက အကျင့်ကောင်း မဟုတ်ဘူး... မင်း နားလည်ထားရမှာက ဒီလောကမှာ စကားပုံတစ်ခု ရှိတယ်... လူတွေရဲ့ အထက်မှာ လူတွေ အမြဲရှိသလို ကောင်းကင်ရဲ့ အထက်မှာလည်း ကောင်းကင်တွေ ရှိတယ်ဆိုတာပဲ..."

လုဝူယန်းသည် ချန်ချင်းအား ကောင်းကင်ငှက်မွှေးဂိုဏ်းနှင့် အမှန်တကယ်စစ်ခင်းလိုခြင်း ရှိမရှိ သေချာစွာ ထပ်မံစဉ်းစားရန် တိုက်တွန်းကာ ဖျောင်းဖျနေခဲ့ပေ၏။

"သတ်..."

ချန်ချင်းသည် လုဝူယန်နှင့် နောက်ထပ် စကားများ ဆက်ပြောနေရန် ပျင်းရိနေသည်။ သူသည် လုဝူယန်နှင့် ပြန်လည်သင့်မြတ်ရန် ဤနေရာသို့ လာခဲ့ခြင်း မဟုတ်ချေ။ သူသည် ဂိုဏ်းကို ဖျက်ဆီးရန် လာခဲ့ခြင်း ဖြစ်ရာ သေခါနီးလူများနှင့် စကားပြောဆိုပြီး မည်သည်ကြောင့် အချိန်ဖြုန်းတီးနေရမည်နည်း။

"မင်းက အခွင့်အရေးကို မယူတတ်တာပဲ... ကောင်းကင်ငှက်မွှေးဂိုဏ်းက မင်းကို ကြောက်တယ်လို့ မင်း တကယ်ကြီး ထင်နေတာလား... ဝင်္ကပါကို အသက်သွင်းလိုက်စမ်း..."

ချန်ချင်းက ဤမျှထိ အကြောက်အလန့်ကင်းမဲ့နေသည်ကို မြင်တွေ့ချိန်၌ လုဝူယန်းသည်လည်း ဒေါသထွက်သွားသည်။

"ဝင်္ကပါ... အသက်သွင်းလိုက်စမ်း"

ထိုအသံသည် ကောင်းကင်နှင့်မြေကြီးတခွင်လုံး၌ ပဲ့တင်ထပ်သွားသည်နှင့်အမျှ သောင်းနှင့်ချီသော ကောင်းကင်ငှက်မွှေးဂိုဏ်း တပည့်များသည် သူတို့၏ စိတ်ဝိညာဉ်ချီများကို ဝင်္ကပါကျောက်တုံးများထဲသို့ တပြိုင်နက်တည်း ထည့်သွင်းလိုက်ကြ၏။

နောက်တခဏတွင် ဝင်္ကပါ ကျောက်တုံးများသည် တစ်ခုပြီးတစ်ခု လင်းလက်လာပြီး ကျောက်တုံးတစ်ခုနှင့် တစ်ခု ချိတ်ဆက်သွားကာ ကြီးမားသော ဝင်္ကပါ ပုံစံတစ်ခုကို ဖန်တီးလိုက်သည်။ ဝင်္ကပါပုံစံ လုံးဝလင်းလက်သွားသောအခါ အလင်းတန်းများသည် ကောင်းကင်သို့ မြင့်တက်သွားပြီး ကောင်းကင်ကိုးလွှာအထက်တွင် ပို၍ကြီးမားသော ဝင်္ကပါပုံစံတစ်ခုကို ဖွဲ့စည်းလိုက်ကာ ကောင်းကင်ငှက်မွှေးဂိုဏ်းတစ်ဂိုဏ်းလုံးကို လွှမ်းခြုံသွားစေပေ၏။

"ဒီဝင်္ကပါကို ရေနဂါးမဟာဝင်္ကပါလို့ ခေါ်တယ်... နက်နဲသိမ်မွေ့ အလယ်အလတ်အဆင့် ဝင်္ကပါပဲ... မင်းတို့ကို ဖျက်ဆီးပစ်ဖို့ကတော့ ဒါက လုံလောက်တာထက်တောင် ပိုသေးတယ်..."

လုဝူယန်၏စကား အဆုံးသတ်သွားသည်နှင့်တပြိုင်နက် မရေမတွက်နိုင်သော စိတ်ဝိညာဉ်ချီများသည် လေထဲတွင် စုရုံးလာပြီး ပေဆယ်ပေါင်းများစွာ မြင့်မားသော ရေနဂါး ပုံရိပ်ယောင်များအဖြစ် ပြောင်းလဲသွားသည်။

"ရေနဂါးမဟာဝင်္ကပါ..."

ချန်ချင်း မှတ်မိသည်မှာ သူသည် မကြာသေးမီကမှ "ခွန်းလုံဝင်္ကပါ" ဟုခေါ်သော မြေကမ္ဘာအဆင့်မြင့် ဝင်္ကပါတစ်ခုကို ရရှိခဲ့ပုံရသည်။

ငါ့ရဲ့ လက်ရှိနားလည်နိုင်စွမ်းအမှတ်ဖြင့် ဝင်္ကပါတွေကို နားလည်နိုင်မလား...

ထိုသို့တွေးတောကာ ချန်ချင်းသည် အရိပ်ရုပ်သေးရုပ်များကို လှုပ်ရှားရန်အတွက် အမိန့်ပေးရန် အလျင်မလိုခဲ့ချေ။ ရေနဂါးမဟာဝင်္ကပါသည် လုံးလုံးလျားလျား အသက်ဝင်လာခြင်း မရှိသေးပေ။ ချန်ချင်းသည် စမ်းသပ်ကြည့်လိုသောစိတ်ဖြင့် သူ၏ စနစ်ကို ဖွင့်ကာ ခွန်းလုံဝင်္ကပါကို ရွေးချယ်ပြီး စတင်၍ လေ့လာဆင်ခြင်ရန် ကြိုးစားလိုက်၏။ သူသည် မျက်လုံးများကို အချိန်တိုလေးမျှသာ မှိတ်ထားပြီးနောက် ချက်ချင်းပြန်ဖွင့်လိုက်သည်။

ဤသည်မှာ တခြားအကြောင်းအရင်းကြောင့် မဟုတ်ဘဲ မြေကမ္ဘာအဆင့်သို့ ရောက်ရှိပြီး ကောင်းကင်အဆင့်နှင့် အဆုံးမရှိ နီးစပ်နေသော ဤခွန်းလုံဝင်္ကပါ၏ သဘောတရားအများစုကို သူ နားလည်သဘောပေါက်သွားသောကြောင့်ပင်။ သူ၏ လက်ရှိ နားလည်နိုင်စွမ်း အမြန်နှုန်းသည် ကြောက်မက်ဖွယ်ကောင်းသည်ဟု ချန်ချင်း ထင်မှတ်ထားခဲ့သော်လည်း ဤမျှထိ ကြောက်မက်ဖွယ်ကောင်းလိမ့်မည်ဟု သူ ထင်မှတ်မထားခဲ့ချေ။

မြေကမ္ဘာအဆင့်မြင့် ဝင်္ကပါတစ်ခုကို မျက်စိတစ်မှိတ်အတွင်း သူ နားလည်သဘောပေါက်သွားခြင်း ဖြစ်သည်။ အကယ်၍ ဤအရာသာ လူသိရှင်ကြား ဖြစ်သွားပါက သူတို့ကိုယ်သူတို့ ပါရမီရှင်များအဖြစ် ဂုဏ်ယူဝင့်ကြွားနေကြသော ထိုဝင်္ကပါသခင်များကို ရှက်ရွံ့သွားစေပြီး တာအို ကျင့်ကြံခြင်းအပေါ် ယုံကြည်မှု ကင်းမဲ့သွားကာ ထိုအချိန်မှစ၍ လုံးလုံးလျားလျား စိတ်ပျက်အားငယ်သွားစေမည်မှာ သေချာပေ၏။ မြင့်မားသော နားလည်နိုင်စွမ်းအမှတ်သည် လူတစ်ယောက်ကို အမှနိတကယ်ပင် သူတို့ ဆန္ဒရှိသကဲ့သို့ လုပ်ဆောင်နိုင်ခွင့် ပေးလေသည်။

"ရေနဂါးမဟာဝင်္ကပါ ပြီးပြည့်စုံသွားပြီ... ဒီနေ့က မင်းတို့ နှစ်ယောက် သေမယ့်နေ့ပဲ..."

အခြေအနေများ ဤသို့ဖြစ်လာသဖြင့် လုဝူယန်သည် ရှားချင်းယွဲ့ကို ဤကိစ္စမှ ဖယ်ထုတ်၍ မရနိုင်တော့ချေ။ လက်ရှိချိန်၌ တော်ဝင်သမက်တော်ကို သတ်ဖြတ်ခြင်းက တော်ဝင်မိသားစုကို စော်ကားပြီးပြီ ဖြစ်ရာ မင်းသမီးတစ်ပါး ထပ်ပေါင်းထည့်ရန် သူ ကြောက်ရွံ့နေရမည်လော။ ထိုအချိန်ရောက်လျှင် မဟာဝူနိုင်ငံက အမှန်တကယ်ပင် ဤကိစ္စကို စုံစမ်းစစ်ဆေးလာပါက လူများ သေဆုံးပြီး မီးလည်း ငြိမ်းသွားပြီဖြစ်ရာ မည်သို့ ရှင်းပြမည်ဆိုသည်မှာ သူ၏ ပါးစပ်ပေါ်တွင်သာ မူတည်ပေလိမ့်မည်။

ဤဆုံးဖြတ်ချက်သည် ချန်ချင်းအား ကြီးမားသော လက်ဆောင်တစ်ခု ပေးအပ်လိုက်ခြင်းဖြစ်ပြီး စနစ်သည်လည်း လှုပ်ရှားလာပြီဖြစ်ကြောင်း လုဝူယန် မသိနိုင်ခဲ့ချေ။