အခန်း ၄၁

အခန်း (၄၁) ငါ့မှာ ဇနီးတစ်ယောက်တည်း ရှိတယ်... သူနဲ့တင် လုံလောက်တယ်

ချန်ချင်း၏လက်ထဲရှိ ဆေးလုံး ခုနစ်လုံးကို အကြိမ်ကြိမ် အတည်ပြုကာ ရှင်းလင်းစွာ မြင်တွေ့ပြီးနောက် တုယွမ်၏ခန္ဓာကိုယ် တုန်ယင်သွားပြီး နောက်သို့ ခြေနှစ်လှမ်း ယိမ်းယိုင်သွားကာ ထိတ်လန့်တကြား အော်ဟစ်လိုက်၏။

"ဒါ... ဒါက ပဉ္စမအဆင့် မဟုတ်ဘူး... ဒါက ဆဌမအဆင့် ဆေးလုံး ပဲ..."

"ဆဌမအဆင့်..."

ရှားချင်းယွဲ့နှင့် လျှူဝူတို့သည် တပြိုင်နက်တည်း အာမေဍိတ်သံ ပြုလိုက်ကြပြီး သူတို့၏ အံ့အားသင့်မှုမှာ သူတို့၏မျက်နှာများပေါ်တွင် အထင်းသား ပေါ်လွင်နေသည်။

ချန်ချင်း၏ ပါရမီကို ဖော်ပြရန် "ပါရမီရှင်များအကြားရှိ ပါရမီရှင်များအကြားရှိ ပါရမီရှင်..." ဟု "ပါရမီရှင်" ဆိုသည့် စကားလုံးကို အဆက်မပြတ် ထည့်သွင်းနေလျှင်ပင် လုံလောက်မည် မဟုတ်ဟု သူတို့ ခံစားရသည်။

အရာအားလုံးကို လွှမ်းခြုံထားရုံသာမက ရှုထောင့်တိုင်းတွင် ထိပ်တန်းအဆင့်ဖြစ်သော ဤပါရမီသည် အမှန်တကယ်ကို ကြောက်မက်ဖွယ်ကောင်းလှသည်။

သူတို့၏ အကန့်အသတ်ရှိသော အမြင်ဖြင့် ချန်ချင်း၏ အနာဂတ် တိုးတက်မှုသည် မည်မျှထိ ပုံကြီးချဲ့ထားသော နယ်ပယ်တစ်ခုသို့ ရောက်ရှိသွားမည်ကို သူတို့ စိတ်ကူးယဉ်တွေးတောနိုင်ခြင်း မရှိတော့ချေ။

မဟာဧကရာဇ်တစ်ပါး ဖြစ်လာမည်ဟု ဆိုရမည်လော...

မလုံလောက်ဘူး... အများကြီး လိုသေးတယ်...

ရှားချင်းယွဲ့နှင့်လျှူဝူတို့ မတုံ့ပြန်နိုင်မီမှာပင် ပို၍အံ့အားသင့်စရာကောင်းသော အရာတစ်ခုက သူတို့၏ မျက်စိရှေ့တွင် နောက်တစ်ကြိမ် ထွက်ပေါ်လာပေ၏။

တုယွမ်သည် ချန်ချင်း၏ရှေ့သို့ ခြေနှစ်လှမ်းဖြင့် ပြန်ရောက်လာပြီး အနည်းငယ်မျှပင် တုံ့ဆိုင်းခြင်းမရှိဘဲ ဒူးထောက်ကာ ခေါင်းငုံ့၍ ပြောလိုက်သည်။

"ကျွန်တော်က သခင်လေးချန်ကို တောင်းပန်ပါတယ်... မဟုတ်ဘူး... ဆရာသခင်ချန် ကျွန်တော့်ကို တပည့်အဖြစ် လက်ခံပေးဖို့ တောင်းပန်ပါတယ်..."

သူ ယုံကြည်သွားလေပြီ။ တုယွမ်သည် ယခုအချိန်ကဲ့သို့ မည်သူ့ကိုမျှ ဤမျှထိ လုံးလုံးလျားလျား ယုံကြည်လက်ခံခြင်း တစ်ကြိမ်တစ်ခါမျှ မရှိခဲ့ဖူးချေ။

အကယ်၍ သူသည် ချန်ချင်း၏တပည့် ဖြစ်လာနိုင်ပြီး ကျွမ်းကျင်မှု အနည်းငယ်ကို သင်ယူနိုင်မည်ဆိုပါက အနာဂတ်တွင် ပြိုင်ဘက်ကင်း ဆိုသည့် စကားလုံးကို ထိတွေ့နိုင်မည့် အခွင့်အရေး ရရှိနိုင်လိမ့်မည်ဟု သူ ယုံကြည်ထားလေ၏။

"ဆရာသခင်တု... ထပါ... ကျွန်တော်က ဆေးဖော်စပ်ခြင်း တာအိုထဲကို မကြာသေးခင်ကမှ ဝင်လာတာပါ... ကျွန်တော်ကိုယ်တိုင်တောင် နားမလည်သေးတဲ့ အရာတချို့ ရှိနေသေးတယ်... တပည့် လက်ခံပြီးတော့ တခြားလူတွေကို လမ်းမှားရောက်အောင် ဘယ်လိုလုပ်ပြီး လုပ်နိုင်မှာလဲ..."

ချန်ချင်း၏ စကားများမှာ အပြောကောင်းသော်လည်း တကယ်တမ်းတွင်မူ သူသည် ထိုအရာကို ဒုက္ခတစ်ခုအဖြစ်သာ ခံစားရသောကြောင့်ပင်။

ရှားချင်းယွဲ့ကသာ ဤကဲ့သို့ တောင်းဆိုမှုမျိုး လုပ်မည်ဆိုပါက ချန်ချင်းသည် အနည်းငယ်မျှပင် တုံ့ဆိုင်းခြင်းမရှိဘဲ သဘောတူမည်မှာ သေချာပေါက်ပင်။

တုယွမ်အတွက်မူ သူတို့အကြားတွင် ပတ်သက်ဆက်နွယ်မှုမရှိသဖြင့် သူ့ကို လက်မခံရန် ချန်ချင်းက ဆုံးဖြတ်လိုက်သည်။

တုယွမ် စကားမပြောနိုင်မီမှာပင် ချန်ချင်းက ဆက်ပြောလိုက်၏။

"တကယ်လို့ ဆရာသခင်တုက ဆေးဖော်စပ်ခြင်း အတွေ့အကြုံတွေနဲ့ ထိုးထွင်းသိမြင်မှုတွေကို ဖလှယ်ချင်တယ်ဆိုရင်တော့... ခင်ဗျားကို အချိန်မရွေး ကြိုဆိုပါတယ်..."

"သေချာတာပေါ့... သေချာတာပေါ့..."

ချန်ချင်းက ဤမျှအထိ ပြောဆိုထားပြီးဖြစ်ရာ တုယွမ်သည် မည်မျှပင် မျက်နှာပြောင်တိုက်စေကာမူ သူ့ကို ဆက်လက်နားပူနေ၍ မရနိုင်တော့ချေ။

ချန်ချင်းနှင့် ဆေးဖော်စပ်ခြင်းအတွေ့အကြုံများ၊ ထိုးထွင်းသိမြင်မှုများကို ဖလှယ်နိုင်ခြင်းကလည်း သူ၏အမြင်အရ ကောင်းမွန်သော ရွေးချယ်မှုတစ်ခုပင်။

အကယ်၍ အနာဂတ်တွင် သူတို့၏ ဆက်ဆံရေးက ပို၍ရင်းနှီးလာပါက သူသည် အမှန်တကယ်ပင် တစ်ဖက်လူ၏တပည့် ဖြစ်ကောင်းဖြစ်လာနိုင်သည်။

ထိုနောက် ချန်ချင်းသည် ရှားချင်းယွဲ့ထံသို့ လျှောက်လှမ်းသွားကာ သူ၏ လက်ထဲရှိ ဆေးလုံးများအားလုံးကို သူမအား ပေးလိုက်သည်။

"ဇနီးလေး... ကျေးဇူးပြုပြီး ဒီဆေးလုံးတွေကို ယူပြီး သန့်စင်လိုက်ပါ... မင်းရဲ့ ခင်ပွန်းက ဘေးကနေ မင်းကို ကာကွယ်ပေးမယ့်သူအဖြစ် လုပ်ပေးပါ့မယ်..."

"ကောင်းပါပြီ..."

ရှားချင်းယွဲ့သည် ချန်ချင်း၏ ကြင်နာမှုကို ငြင်းဆန်ရန် ရည်ရွယ်ချက် မရှိချေ။ ထိုသို့လုပ်ခြင်းက သူမနှင့် သူ၏ ဆက်ဆံရေးကို အလှမ်းဝေးသွားစေမည်အား စိုးရိမ်မိသောကြောင့်ပင်။

ရှားချင်းယွဲ့ပင်လျှင် သူမနှင့် ချန်ချင်းကြားရှိ အကွာအဝေးမှာ အမှန်တကယ်ကို အလွန်နီးကပ်နေပြီဖြစ်ကြောင်း ဝန်ခံရပေမည်။

ချန်ချင်းက ရှားချင်းယွဲ့ ကျင့်ကြံနေစဉ်အတွင်း သူမကို ကာကွယ်ပေးမည်ကို မြင်သောအခါ လျှူဝူက တုယွမ်ကို အချက်ပြလိုက်၏။

တုယွမ်က နားလည်သွားပြီး နားလည်မှုမရှိသူ တစ်ယောက်ကဲ့သို့ မပြုမူဘဲ လျှူဝူနှင့်အတူ ဆေးဖော်စပ်ခန်းထဲမှ တစ်ယောက်ပြီး တစ်ယောက် ထွက်ခွာသွားကြသည်။

ထိုနောက် ဆေးဖော်စပ်ခန်းတံခါးသည် ဖြည်းညှင်းစွာ ပိတ်သွားပြီး အခန်းတစ်ခန်းလုံးအတွင်းတွင် ရှားချင်းယွဲ့နှင့်ချန်ချင်းတို့သာ ကျန်ရစ်ခဲ့သည်။

ရှားချင်းယွဲ့က မမေးဘဲ မနေနိုင်တော့ချေ။

"ခင်ပွန်း... ရှင် ကျွန်မအပေါ် အရမ်းကောင်းလွန်းနေတယ်လို့ မထင်ဘူးလား..."

"မင်းက ငါ့ရဲ့ တစ်ဦးတည်းသော ဇနီးပဲ... ငါက မင်းအပေါ် မကောင်းရင် ဘယ်သူ့အပေါ် ကောင်းရမှာလဲ..."

ချန်ချင်းက ပြန်လည်ချေပလိုက်လေသည်။

"ဒါက သေချာပေါက် မှန်ချင်မှ မှန်မှာပါ... ဒီလောကမှာ လှပတဲ့ အမျိုးသမီးတွေ မရေမတွက်နိုင်အောင် ရှိတယ်... ရှင်က အနာဂတ်မှာ တခြားချစ်သူတွေနဲ့ တွေ့နိုင်သေးတာပဲ..."

အကြောင်းပြချက် တစ်ခုခုကြောင့် ယခုအချိန်၌ ဤကဲ့သို့ ကိစ္စများကို ပြောရသောအခါ ရှားချင်းယွဲ့သည် အနည်းငယ် မွန်းကျပ်သကဲ့သို့ ခံစားလိုက်ရပေ၏။

မဟာဝူနိုင်ငံတွင် ထင်ရှားသော မိသားစုများ၌ ဇနီးများနှင့် ကိုယ်လုပ်တော်များ အများအပြား ရှိခြင်းမှာ ပုံမှန်ကိစ္စပင်။ မူလက ရှားချင်းယွဲ့သည် ဤကဲ့သို့ ကိစ္စများကို သူမ တည်ငြိမ်စွာ ကိုင်တွယ်နိုင်မည်ဟု အမြဲစေ ထင်မှတ်ထားခဲ့သည်။ ချန်ချင်းသည် သူ အလိုရှိသော မည်သူ့ကိုမဆို လက်ထပ်နိုင်ကာ သူမကို တရားဝင်ဇနီးနေရာ ပေးထားလျှင် ကိစ္စမရှိဟု တွေးတောခဲ့ဖူးလေ၏။

သို့သော် သူမ၏ စိတ်ထဲတွင် ထိုမြင်ကွင်းကို အချိန်တခဏကြာမျှ စိတ်ကူးကြည့်ပြီးနောက် ရှားချင်းယွဲ့သည် မပြုံးနိုင်တော့ဘဲ စိတ်လေးလံသွားသည်။

"ငါ့မှာ ဇနီးလေး တစ်ယောက်တည်းရှိရင် လုံလောက်ပါပြီ..."

ချန်ချင်းသည် ရှားချင်းယွဲ့၏လက်ကို ကိုင်ကာ ချစ်ခင်ယုယစွာ ပြောလိုက်သည်။

"..."

ချန်ချင်း၏ ခိုင်မာပြီး ရိုးသားသော မျက်လုံးများနှင့် အကြည့်ချင်းဆုံလိုက်ရသောအခါ ရှားချင်းယွဲ့၏ မျက်လုံးများတွင်လည်း ထူးဆန်းသော တောက်ပမှုတစ်ခု လင်းလက်သွားသည်။

သူမ၏ပါးပြင်များ နီရဲသွားကာ သူမသည် အလျင်အမြန် အကြည့်လွှဲလိုက်ပြီး ခြင်တစ်ကောင်ကဲ့သို့ တိုးညှင်းသော အသံဖြင့် ပြောလိုက်၏။

"ကျွန်မတို့... ကျွန်မတို့ ကျင့်ကြံကြရအောင်..."

"ကောင်းပြီလေ..."

ချန်ချင်းက ခပ်ဖျော့ဖျော့ပြုံးလိုက်ပြီး သူ၏မျက်လုံးများတွင် အလိုလိုက်ခြင်းများ ချစ်ခင်ယုယမှုများဖြင့် ပြည့်နှက်နေသည်။

ထို့နောက် ရှားချင်းယွဲ့သည် ပလ္လင်ခွေထိုင်လိုက်ပြီး ချန်ချင်းကိုယ်တိုင် ဖော်စပ်ထားသော ဆေးလုံးတစ်လုံးကို အရင်ယူကာ သူမ၏ပါးစပ်ထဲသို့ ထည့်လိုက်ပြီး စတင်၍ သန့်စင်လေသည်။

ဆေးလုံးသည် သူမ၏ ပါးစပ်ထဲသို့ ဝင်ရောက်သွားသည်နှင့်တစ်ပြိုင်နက် စနစ်အသိပေးချက်တစ်ခုက ချန်ချင်း၏မျက်စိရှေ့တွင် ထွက်ပေါ်လာသည်။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် အထွတ်အထိပ်အရိုးကို ရရှိသည့်အတွက် ဂုဏ်ယူပါသည်...】

'အထွတ်အထိပ်အရိုး...'

ဤအရိုးကို ပိုင်ဆိုင်ထားခြင်းက ပြိုင်ဘက်ကင်း သန်မာအားကောင်းသူတစ်ဦး ဖြစ်လာနိုင်မည့် အလားအလာကို ဆိုလိုပြီး ကျင့်ကြံခြင်းအမြန်နှုန်းကို များစွာတိုးတက်စေကြောင်း ချန်ချင်းက ရှင်းလင်းစွာ သိရှိထားသည်။

ထိုမျှသာမက အထွတ်အထိပ်အရိုး တစ်ခုစီတိုင်းသည် ပြိုင်ဘက်ကင်း အဖိုးတန် နည်းစနစ် တစ်ခုကိုလည်း သယ်ဆောင်လာလေ့ရှိပေ၏။

အထွတ်အထိပ်အရိုး များသည် လောကတွင် ရှားပါးပြီး မိုးကောင်းကင်တာအို၏ ကောင်းချီးပေးခြင်းခံရသော ကလေးများ မွေးဖွားလာချိန်တွင် အတူတကွ ထွက်ပေါ်လာတတ်သည်။

ထိုအရာများ ထွက်ပေါ်လာသည်နှင့် တပြိုင်နက် အကယ်၍ မိသားစုက အားကောင်းပါက နောက်ထပ် အဆင့်တစ်ခုသို့ သေချာပေါက် တက်လှမ်းနိုင်ပေမည်။

အကယ်၍ သာမန်မိသားစုတစ်ခုသာ ဖြစ်ပါက အားကောင်းသော ကျင့်ကြံသူများ၏ ပစ်မှတ်ထားခြင်းကို ခံရမည်ဖြစ်ပြီး ထိုအရိုးကို အတင်းအကြပ် တူးထုတ်ကာ ပါရမီကို ဆွဲခွာသွားကြပေမည်။

ကျယ်ပြန့်သော သမိုင်းကြောင်းကို ပြန်ကြည့်လျှင် အထွတ်အထိပ်အရိုး တစ်ခုတည်း ထွက်ပေါ်လာခြင်းကပင် သွေးထွက်သံယိုတိုက်ပွဲ ကြီးကြီးငယ်ငယ်များစွာကို ဖြစ်ပေါ်စေခဲ့လေ၏။

မဆိုးဘူး...

ချန်ချင်းက ဤဆုလာဘ်အတွက် အလွန်စိတ်ကျေနပ်နေခဲ့သည်။

သူသည် ထိုအထွတ်အထိပ်အရိုးထံမှ မည်ကဲ့သို့ ပြိုင်ဘက်ကင်း အဖိုးတန်နည်းစနစ်မျိုး ရရှိမည်ကို မျှော်လင့်ရင်း ပေါင်းစပ်ခြင်းအား ရွေးချယ်ရန် နှိပ်လိုက်သည်။

【အထွတ်အထိပ်အရိုးကို ပေါင်းစပ်နေပါသည်...】

【ပေါင်းစပ်ခြင်း အောင်မြင်ပါသည်...】

နောက်တခဏတွင် "နဂါးတစ်သောင်း လှံနည်းစနစ်" ဟု အမည်ရသော အဖိုးတန် နည်းစနစ်တစ်ခုက ချန်ချင်း၏စိတ်ထဲတွင် ထွက်ပေါ်လာခဲ့သည်။

ဤလှံနည်းစနစ်တွင် ကန့်သတ်ချက် မရှိ​ဘဲ ကျင့်ကြံခြင်း တိုးတက်မှု အလွှာတစ်ခုစီတိုင်းအတွက် နဂါးတစ်ကောင်၏ စွမ်းအားကို ထုတ်လွှတ်နိုင်သည်။

အလွှာတစ်သောင်း ဆိုသည်မှာ နဂါးတစ်သောင်း၏ စွမ်းအားကို ဆိုလိုသည်။

ထို့ပြင် အလွှာတစ်သိန်း၊ တစ်သန်း၊ ဆယ်သန်း၊ သန်းတစ်ရာစသဖြင့် အဆက်မပြတ် မြှင့်တင်နိုင်သည်။

"နဂါးတစ်သောင်း လှံနည်းစနစ်" ၏ မိတ်ဆက်ကို ဖတ်ပြီးနောက် ချန်ချင်း၏ စိတ်ထဲတွင် စကားလုံးတချို့သာ ရှိတော့သည်။ ဤသည်မှာ 'ပုံမှန်မဟုတ်ဘူး...' ဟူ၍ပင်။

ထို့ပြင် သူသည် လှံတစ်ချက်တည်းဖြင့် နဂါးတစ်သောင်း၏ စွမ်းအားကို ထုတ်လွှတ်ခြင်းက မည်မျှ တုန်လှုပ်ဖွယ်ကောင်းသော မြင်ကွင်းမျိုး ဖြစ်မည်ကို သိရှိနိုင်ရန်အတွက် "နဂါးတစ်သောင်း လှံနည်းစနစ်" ကို အလွှာတစ်သောင်းအထိ အမြန်ဆုံး ကျင့်ကြံလိုခဲ့သည်။

သူ အနာဂတ်ကို စိတ်ကူးယဉ်နေစဉ် စနစ်က နောက်ထပ် အသိပေးချက်တစ်ခုကို ထပ်မံ၍ ပြသလာခဲ့လေ၏။ ရှားချင်းယွဲ့သည် ဒုတိယ ဆေးလုံးကို စတင်၍ သန့်စင်နေပြီ ဖြစ်ကြောင်း သူ သိလိုက်ရသည်။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် ကောင်းကင်အဆင့်မြင့် ကျင့်ကြံနည်းစနစ်ဖြစ်တဲ့ ကောင်းကင်သုတ်သင်ခြင်းဓားချက်ကို ရရှိသည့်အတွက် ဂုဏ်ယူပါသည်...】

သူ ထပ်မံ၍ စစ်ဆေးရန် မလိုအပ်တော့ချေ။ "ကောင်းကင်အဆင့်မြင့် ကျင့်ကြံနည်းစနစ်" နှင့် "ကောင်းကင်သုတ်သင်ခြင်းဓားချက်" ဟူသော စာလုံးများကို ကြည့်ရုံဖြင့် ဤကျင့်ကြံနည်းစနစ်သည် မည်မျှထိ အားကောင်းကြောင်းကို ချန်ချင်း အလွယ်တကူ သိနိုင်သည်။

ဓားတစ်သောင်း မြင့်မြတ်ခန္ဓာကိုယ်နှင့် ပေါင်းစပ်လိုက်ပါက ဤဓားနည်းစနစ်၏ စွမ်းအားသည် နှစ်ဆ ဖြစ်သွားပေမည်။

ဓားတစ်ချက်၏ စွမ်းအားက ကောင်းကင်ကို သုတ်သင်နိုင်ပြီး နတ်ဘုရားများကို ဖျက်ဆီးနိုင်သည်။

ရှားချင်းယွဲ့၏ သန့်စင်မှု အမြန်နှုန်း ပို၍မြန်ဆန်လာသည်နှင့်အမျှ ချန်ချင်း၏ ဆုလာဘ်များသည်လည်း ပို၍များပြားလာခဲ့လေ၏။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် နှလုံးသား ကာကွယ်ရေး ကြေးမုံဆယ်ခုကို ရရှိသည့်အတွက် ဂုဏ်ယူပါသည်...】

【နှလုံးသား ကာကွယ်ရေး ကြေးမုံ... သေစေနိုင်သော ဒဏ်ရာ ဆယ်ခုကို ခံနိုင်ရည်ရှိပြီး မဟာဧကရာဇ် တစ်ပါး၏ တိုက်ခိုက်မှုကိုပင် မည်သည့် ထိခိုက်မှုမှ မရှိဘဲ ပိတ်ဆို့နိုင်သည်...】

သေကြေပျက်စီးခြင်းမဲ့ခန္ဓာကိုယ်ကို ပိုင်ဆိုင်ထားသော ချန်ချင်းသည် ဤကဲ့သို့ အရာမျိုးကို အသုံးပြုရန် မလိုအပ်ချေ။ ထိုအရာများကို သူ၏ဖခင် ချန်ရှုံးနှင့် သူ၏ဇနီး ရှားချင်းယွဲ့တို့ကို ပေးနိုင်မည်ဟု သူ တွေးတောလိုက်၏။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် နားလည်နိုင်စွမ်းအမှတ် ၅၀၀ကို ရရှိသည့်အတွက် ဂုဏ်ယူပါသည်...】

'ဘယ်... ဘယ်လောက်...'

ချန်ချင်းသည် သူ၏ အသံကို မဖိနှိပ်နိုင်လုနီးပါး ဖြစ်သွားခဲ့သော်လည်း ကံကောင်းထောက်မစွာဖြင့် သူ၏ ပါးစပ်ကို အလျှင်အမြန် ပိတ်ကာ ထိန်းထားနိုင်ခဲ့သည်။

ငါးရာဟူသော ဂဏန်းသည် နားလည်နိုင်စွမ်းအမှတ် ဟူသော စကားလုံးနှင့် ပေါင်းစပ်လိုက်သောအခါ သူ၏ သွေးများကို အမှန်တကယ်ပင် ဆူပွက်သွားစေခဲ့လေ၏။

သူ၏ နားလည်နိုင်စွမ်းအမှတ် ပို၍မြင့်မားလေလေ 'ကောင်းကင်သုတ်သင်ခြင်းဓားချက်' နှင့် 'နဂါးတစ်သောင်း လှံနည်းစနစ်' ကဲ့သို့ ထိပ်တန်း ကျင့်ကြံနည်းစနစ်များကို သူ အားစိုက်ထုတ်စရာမလိုဘဲ ပို၍ကျင့်ကြံနိုင်လေလေပင်။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် အရိပ်ရုပ်သေးရုပ် ၁၀၀၀၀ကို ရရှိသည့်အတွက် ဂုဏ်ယူပါသည်...】

ချန်ချင်းအတွက် အရိပ်ရုပ်သေးရုပ် ဆုလာဘ်များ မည်မျှထိများနေပါစေ ပိုသည်ဟူ၍ရှိမည် မဟုတ်ချေ။ ထိုအရာများ ပိုများလေလေ သူ့အတွက် ပိုကောင်းလေလေပင်။

သူတို့အတွက် အခြေအနေများ ကောင်းမွန်နေစဉ်မှာပင် လျှို့ဝှက်အစောင့်သည် တော်ဝင်နန်းတော်သို့ ပြန်လည်ရောက်ရှိနေပြီဖြစ်ပြီး ချင်းချန်ဂိုဏ်းတွင် ဖြစ်ပျက်ခဲ့သမျှကို ဧကရာဇ်အား အသိပေးရန် ဆုံးဖြတ်လိုက်သည်။

---