အခန်း ၅၈

အခန်း (၅၈) မိုင်ထောင်ချီအကွာမှနေ၍ ဂိုဏ်းတစ်ဂိုဏ်းကို လက်ဝါးတစ်ချက်တည်းဖြင့် ဖျက်ဆီးခြင်း

အမှိုက်ထက် ပိုဆိုးသည်ဟု သူ ယူဆထားသော ပြိုင်ဘက်များကို ရင်ဆိုင်ရသောအခါ ချန်ချင်းသည် သူတို့ကို အဖက်လုပ်ရန် ဆန္ဒမရှိချေ။

ဤလူများ၏ တစ်ခုတည်းသောတန်ဖိုးမှာ ဆုလာဘ်များ ရရှိရန် အသုံးပြုခံရခြင်းသာ ဖြစ်သည်။

ရုတ်ချည်းဆိုသလိုပင် ချန်ချင်းက သူ၏အရှိန်အဝါကို အနည်းငယ် ထုတ်လွှတ်လိုက်သည်။

ဧကရာဇ်၏စွမ်းအားအရှိန်အဝါ...

လူများအားလုံး၏နှလုံးခုန်သံများ ချက်ချင်းရပ်တန့်သွားပေ၏။

သူတို့သည် တစ်ယောက်ပြီး တစ်ယောက် လဲကျသွားကာ မျက်လုံးအပြူးသားဖြင့် သေဆုံးသွားကြသည်။

ထိုတပည့်များကို မဆိုထားနှင့် အကြီးအကဲများပင်လျှင် ဧကရာဇ်တစ်ပါး၏ဖိအားရှေ့တွင် တုံ့ပြန်ရန် အချိန်မရခဲ့ချေ။

သူတို့ မည်ကဲ့သို့ သေသွားခဲ့ရသည် ဆိုသည်ကိုပင် သိခွင့်မရခဲ့ကြပေ။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် နတ်ဆိုးဘုရင် သူတော်စင်ရုပ်ခန္ဓာကိုယ်ကို ရရှိသည့်အတွက် ဂုဏ်ယူပါသည်... ရုပ်ခန္ဓာကိုယ်အမျိုးအစား သုံးထောင် အဆင့်... ၅၂...】

အရေးမပါသော လူအနည်းငယ်ကို သတ်ဖြတ်ရုံဖြင့် ထိပ်ဆုံးတစ်ရာစာရင်းဝင် သူတော်စင်ရုပ်ခန္ဓာကိုယ် တစ်ခုကို ရရှိခြင်းမှာ ချန်ချင်းအတွက် အလွန်ထင်မှတ်မထားသောအရာပင်။

ရှားချင်းယွဲ့ကို ကြည့်ရင်း ချန်ချင်းသည် သူမက သူ့အပေါ်ထားရှိသော နှစ်သက်မှု တိုးလာခြင်းဖြစ်မည် ဟူသော ဖြစ်နိုင်ခြေမှလွဲ၍ တခြားပို၍သင့်လျော်သော ရှင်းလင်းချက်ကို မစဉ်းစားနိုင်တော့ချေ။

"ခင်ပွန်း..."

ရှားချင်းယွဲ့၏ မျက်နှာသည် လူတစ်ယောက်၏ နှလုံးသားကို ထိုးဖောက်သွားနိုင်သည့်အလား အလွန်စူးရှသော ချန်ချင်း၏အကြည့်ကြောင့် နီရဲသွားသည်။

"တောင်းပန်ပါတယ်... တောင်းပန်ပါတယ်... လရောင်အောက်မှာ ငါ့ရဲ့ဇနီးလေးက တကယ်ကို လှလွန်းလို့... ခဏလောက် ငေးကြည့်မိသွားတာ..."

ချန်ချင်းက ပေါ့ပေါ့ပါးပါး အကြောင်းပြချက်တစ်ခု ပေးလိုက်သည်။

ဤပေါ့ပေါ့ပါးပါးမှတ်ချက်က ရှားချင်းယွဲ့၏ မတည်မငြိမ်ဖြစ်နေသော နှလုံးသားကို ပို၍ပင် မြန်ဆန်စွာ ခုန်သွားစေသည်။

သူမက အလျင်အမြန် ကျောခိုင်းလိုက်ပြီး ချန်ချင်းကို တည့်တည့်မကြည့်ရဲတော့ဘဲ သူမ၏ မျက်နှာပေါ်ရှိ အမူအရာကို ဖုံးကွယ်ထားချင်ခဲ့လေ၏။

သူ မမြင်ရလျှင်ပင် ဤအချိန်တွင် သူမ မည်ကဲ့သို့ပုံစံမျိုး ဖြစ်နေမည်ကို လွယ်လင့်တကူ တွေးတောကြည့်နိုင်သည်။

ရှားချင်းယွဲ့က အနည်းငယ် တုန်ယင်နေသောအသံဖြင့် ပြောဆိုသည်။

"ခင်ပွန်းက ကျွန်မကို ချီးကျူးနေပေမဲ့လည်း... ကျွန်မက ခင်ပွန်းကို ဘာအကျိုးကျေးဇူးမှ မပေးနိုင်ဘူး..."

"ငါ့ဇနီးလေးက ငါ့ကို မစွန့်လွှတ်သရွေ့... ငါ့အတွက် အကြီးမားဆုံး အကျိုးကျေးဇူးပါပဲ..."

ချန်ချင်းသည် ရှားချင်းယွဲ့၏ခါးကို အနောက်မှ ဖက်လိုက်ပြီး သူ၏မေးစေ့ကို သူမ၏ပခုံးပေါ်တွင် တင်ကာ သူမ၏နားထဲသို့ တိုးညှင်းစွာ ပြောလိုက်သည်။

"ခင်ပွန်းက ကျွန်မကို ဘဝသစ်တစ်ခု ပေးခဲ့တာလေ... ခင်ပွန်းကို ကျွန်မက ဘယ်လိုလုပ်ပြီး စွန့်လွှတ်နိုင်မှာလဲ..."

ရှားချင်းယွဲ့သည် ဤစကားကို တုံ့ဆိုင်းမှု အနည်းငယ်မျှမရှိဘဲ ပြောလိုက်၏။

"အနာဂတ်မှာ ပိုပြီးကျယ်ပြန့်တဲ့ လောကကြီးကို မြင်ပြီးရင် ကျွန်မကို ခင်ပွန်းက စွန့်ပစ်သွားမှာကို ကျွန်မ ကြောက်မိတယ်..."

ထို့နောက် ရှားချင်းယွဲ့က သူမ၏အတွေးများကို ဖွင့်ဟဝန်ခံလိုက်သည်။

ချန်ချင်းက ပြုံးလိုက်ပြီး သူ၏ လက်များကို ရှားချင်းယွဲ့၏ပခုံးများပေါ်သို့တင်ကာ သူမကို သူ့ဘက်သို့ လှည့်လိုက်သည်။

သူက တည်ကြည်လေးနက်သော အမူအရာဖြင့် ပြောဆိုသည်။

"ဒီဘဝမှာ... ငါ ချန်ချင်းက ငါ့ရဲ့ဇနီးကိုပဲ လက်ထပ်မယ်... ငါ့ရဲ့ဇနီးကိုပဲ ချစ်မယ်..."

ထိုစကားကို ကြားချိန်၌ ရှားချင်းယွဲ့က မော့ကြည့်လိုက်ရာ သူမ၏ လှပသော မျက်လုံးများ အနည်းငယ် တုန်ယင်သွားပြီး ချန်ချင်းကိုသာ ကြည့်နေခဲ့လေ၏။

ချန်ချင်း၏မျက်နှာ နီးကပ်လာသည်ကို မြင်သောအခါ...

ရှားချင်းယွဲ့သည် မရှောင်တိမ်းဘဲ သူမ၏မေးကို ညင်သာစွာမော့ကာ မျက်လုံးများကို စုံမှိတ်ထားလိုက်ပြီး သူ့ကို ဆန္ဒရှိသည့်အတိုင်း လုပ်ဆောင်ခွင့်ပေးလိုက်သည်။

"ခင်ပွန်း... ကျွန်မ... ကျွန်မ အသက်ရှူလို့ မရတော့ဘူး..."

ရှားချင်းယွဲ့သည် သူမ၏လက်များကို မြှောက်ကာ ချန်ချင်း၏ရင်ဘတ်ကို ဖိထားရင်း တိုး​ညှင်းစွာ ပြောလိုက်၏။

"ငါ့အမှားပါ... ဒါက ငါ့ရဲ့အမှားပါ..."

ချန်ချင်းသည် ထိုနေရာတွင် ရပ်တန့်လိုက်ပြီး ဆက်မလုပ်တော့ချေ။

ဤအနမ်းက ရှားချင်းယွဲ့ကို မကြုံစဖူး အတွေ့အကြုံတစ်ခုအား ယူဆောင်လာပေးခဲ့ပေသည်။

နှုတ်ခမ်းချင်း ထိတွေ့ရုံသာမက နမ်းခြင်းလည်း လုပ်နိုင်ကြောင်း သူမ ပထမဆုံးအကြိမ် သဘောပေါက်သွားခဲ့လေ၏။

အစပိုင်းတွင် သူမ အနည်းငယ် နေရခက်နေသော်လည်း တဖြည်းဖြည်းနှင့် အံ့အားသင့်ဖွယ်ကောင်းသော ခံစားချက်တစ်ခုက ရှားချင်းယွဲ့၏ လက်ချောင်းများနှင့်ခြေချောင်းများကို အလိုအလျောက် ကွေးညွှတ်သွားစေခဲ့သည်။

သူမ တွေဝေမိန်းမောနေစဥ်မှာပင် ချန်ချင်းသည် ကူးပြောင်းရေးတံခါးတစ်ခုကို ဖွင့်ရန် လက်ဝှေ့ယမ်းနေသည်အား ရှားချင်းယွဲ့က သတိပြုမိသွားသည်။

အစပိုင်းတွင် ဤသည်မှာ ချန်အိမ်တော်သို့ ပြန်သွားမည့် ကူးပြောင်းရေးတံခါးဟု သူမ ထင်မှတ်ခဲ့သည်။

သို့သော် ထိုအထဲတွင် တခြားမြင်ကွင်းတစ်ခု ထွက်ပေါ်လာသည်ကို သူမ တွေ့လိုက်ရပြီး ဂိုဏ်း ခန်းမဆောင်တစ်ခုက တဖြည်းဖြည်း ပို၍ပီပြင်ရှင်းလင်းလာပေ၏။

ခန်းမဆောင်အတွင်း၌ ဂိုဏ်းချုပ်သည် မြင့်မားသော နေရာတွင်ထိုင်နေပြီး အောက်တွင် အကြီးအကဲအသီးသီးသည် တစ်ဖက်တစ်ချက်၌ မတ်တတ်ရပ်နေကြသည်။

ဤအချိန်တွင် တပည့် ဝတ်စုံဝတ်ဆင်ထားသူ တစ်ဦးသည် ခန်းမဆောင်ထဲသို့ ထိတ်လန့်တကြား ပြေးဝင်လာပြီး ဒူးထောက်ကာ ပြောဆိုလိုက်သည်။

"ဂိုဏ်းချုပ်... မကောင်းတော့ဘူး... အခြေအနေက ဆိုးရွားနေပြီ.. အကြီးအကဲဝေနဲ့ သူနဲ့အတူ ပါသွားတဲ့ တပည့်တွေရဲ့ စိတ်ဝိညာဉ်မီးအိမ်တွေ ငြိမ်းသေသွားပြီ..."

'အကြီးအကဲဝေလား...'

ရှားချင်းယွဲ့ သေချာ ကြည့်လိုက်ရာ ဤဂိုဏ်းမှလူများ၏ဝတ်စုံများသည် အစောပိုင်းက သူမ၏ ခင်ပွန်းက ဧကရာဇ်၏စွမ်းအားဖြင့် ချက်ချင်း သတ်ပစ်လိုက်သော လူဆိုးအုပ်စုနှင့် တူညီနေကြောင်း တွေ့ရှိလိုက်ရသည်။

ချန်ချင်း၏ နတ်ဘုရားစွမ်းရည်ကြောင့် ထိုလူဆိုးများ၏နောက်ကွယ်ရှိ အင်အားစုများကို လျင်မြန်စွာရှာဖွေတွေ့ရှိနိုင်ခဲ့သည်ကိုကြည့်ပြီး သူမ အံ့အားသင့်သွားသည်။

သူမ တွေးတောနေစဉ်မှာပင် တစ်ဖက်မှနေ၍ ဒေါသတကြီးအော်ဟစ်သံတစ်သံကို ကြားလိုက်ရလေ၏။

"သူ ဘယ်သူပဲဖြစ်ဖြစ်... ငါတို့ ဂိုဏ်းရဲ့ လျှို့ဝှက်နယ်မြေ အခွင့်အရေးကို လုယူရဲရုံတင်မကဘူး ငါတို့ ဂိုဏ်းက အကြီးအကဲနဲ့ တပည့်တွေကို ရက်ရက်စက်စက် သတ်ပစ်ရဲတယ်... ဒီရန်ငြိုးက ဘယ်လိုမှ ပယ်ဖျက်လို့ မရဘူး... တကယ်လို့ ငါတို့က သူ့ကို မသတ်ရင် သတင်းထွက်သွားတာနဲ့ ငါတို့ကို ဘယ်သူက လေးစားတော့မှာလဲ... ငါတို့ ထျန်းကျန်းဂိုဏ်းကို ဘယ်သူက မျက်လုံးထဲ ထည့်တော့မှာလဲ..."

ဤစကားများ ထွက်ပေါ်လာသည်နှင့်တစ်ပြိုင်နက် အကြီးအကဲများသည် တစ်ယောက်ပြီး တစ်ယောက် တုံ့ပြန်ကြပြီး ဂိုဏ်းချုပ်ကို သည်းမခံရန်နှင့် တပည့်များကို တိုက်ရိုက်စေလွှတ်ရန် တိုက်တွန်းလိုက်သည်။ သူတို့သည်လည်း လိုက်ပါသွားရန်နှင့် ပါဝင်ကူညီရန် ဆန္ဒရှိကြောင်း ဖော်ပြခဲ့ကြသည်။

ဂိုဏ်းချုပ်က စဉ်းစားလိုက်ပြီး အကြီးအကဲများ ပြောသည်မှာ အလွန်ယုတ္တိရှိသည်ဟု ခံစားလိုက်ရသည်။ ဤရန်ငြိုးကို ကလဲ့စားမချေခြင်းက ဂိုဏ်းချုပ်တစ်ဦးအနေဖြင့် သူ၏ ဂုဏ်သိက္ခာကို ထိခိုက်စေပြီး ထျန်းကျန်းဂိုဏ်းမှ ခက်ခက်ခဲခဲ တည်ဆောက်ထားသော အားကောင်းသည့် ဂိုဏ်း၏ပုံရိပ်ကို ဖျက်ဆီးပစ်ရာ ရောက်ပေမည်။

ထျန်းကျန်းဂိုဏ်းမှ ဂိုဏ်းချုပ်၏စွမ်းအားမှာ သူမထက် နိမ့်ကျနေကြောင်း ရှားချင်းယွဲ့ တွေ့မြင်လိုက်ရပြီးနောက် ချန်ချင်းအတွက် ဤခြိမ်းခြောက်မှုကို ဖယ်ရှားရန်အတွက် သူမကိုယ်တိုင် လှုပ်ရှားပေးမည်ဟု ကမ်းလှမ်းရန် ဟန်ပြင်လိုက်၏။

ချန်ချင်းသည် သူ၏လက်ကို ပေါ့ပေါ့ပါးပါး မြှောက်ကာ လက်ဝါးတစ်ချက် ရိုက်နှက်လိုက်မည်ဟု မည်သူက ထင်မှတ်ထားမိမည်နည်း။

မြင်ကွင်းသည် ကျယ်ပြန့်သွားပြီး ရွှေရောင် အလင်းတန်းများ ထွက်ပေါ်လာကာ ဧရာမ ရွှေရောင် လက်ဝါးကြီးတစ်ခုသည် အမိုးခုံးကို ဖောက်ထွက်လာပြီး ထျန်းကျန်းဂိုဏ်းဆီသို့ ဦးတည်ပြီး ကျရောက်သွားသည်။

ကျယ်ပြန့်သော ထျန်းကျန်းဂိုဏ်းသည် ဤလက်ဝါးအောက်တွင် ဖုန်မှုန့်လေးတစ်ခုအလား သေးငယ်သွားသည်။

ကျယ်လောင်သော ဝုန်းခနဲ အသံကြီးနှင့်အတူ...

ထျန်းကျန်းဂိုဏ်းတစ်ခုလုံးသည် ထျန်းကျန်းတောင် နှင့်အတူ ချန်ချင်း၏လက်ဝါးရိုက်ချက်တစ်ချက်တည်းဖြင့် ပြားကပ်သွားခဲ့လေ၏။

လူထောင်ပေါင်းများစွာသည် မျက်စိတစ်မှိတ်အတွင်း သေဆုံးသွားကြသည်။

ကြွင်းကျန်ရစ်သောအရာမှာ ကျန်းတစ်ရာ ကျယ်ဝန်းသော လက်ဝါးရာကြီးတစ်ခုတည်းသာ ဖြစ်ပြီး တွင်းနက်ကြီးတစ်ခု သို့မဟုတ် ချောက်ကမ်းပါးကြီးတစ်ခုနှင့် တူညီနေသည်။

"ဂလု..."

ရှားချင်းယွဲ့သည် သူမ၏နှုတ်ခမ်းများကို ပိတ်ကာ ထွက်လာတော့မည့် စကားလုံးများကို မျိုချလိုက်၏။

ချန်ချင်း၏ဇနီး တစ်ယောက်အနေဖြင့်ပင် သူမသည် ကြောက်ရွံ့မှုကို မခံစားဘဲ မနေနိုင်ခဲ့ချေ။

ဧကရာဇ်တစ်ပါး၏ ကြောက်မက်ဖွယ်ကောင်းမှုကို သူမ ယခင်က သိခဲ့ဖူးသော်လည်း မည်မျှပင် ကြားဖူးစေကာမူ မျက်မြင်တွေ့ရှိရသကဲ့သို့ ထိတ်လန့်တုန်လှုပ်ဖွယ် မကောင်းချေ။

မျက်စိတစ်မှိတ်အတွင်း မိုင်ထောင်ချီအကွာအဝေးမလက်ဝါးတစ်ချက်တည်းဖြင့် ဂိုဏ်းတစ်ဂိုဏ်းကို သုတ်သင်လိုက်ခြင်း...

ဤသည်မှာ ရှားချင်းယွဲ့ စိတ်ကူးယဉ်ရန်ပင် မဝံ့ရဲသောအရာ ဖြစ်လေ၏။

အစွမ်းထက်တယ်... တကယ့်ကို အစွမ်းထက်လွန်းတယ်...

ထျန်းကျန်းဂိုဏ်းသည် သူ့ကိုသာမက ရှားချင်းယွဲ့ကိုလည်း ဖယ်ရှားလိုခဲ့သည်။

ထို့ကြောင့် ဤလက်ဝါးရိုက်ချက်သည် သဘာဝကျစွာပင် ဇနီးသည်အား အလိုလိုက်ခြင်း ဆုလာဘ်ယန္တရားကို အသက်သွင်းလိုက်သည်။

【ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် ကံကြမ္မာ ရွှေနဂါး တစ်ကောင်ကို ရရှိသည့်အတွက် ဂုဏ်ယူပါသည်...】

'နောက်ထပ် နဂါး တစ်ကောင်လား...'

ကံကြမ္မာနှင့် နဂါးမျိုးနွယ်စု ပေါင်းစပ်မှုက ချန်ချင်းကို အလွန်စိတ်ဝင်စားသွားစေသည်။

အသေးစိတ်မိတ်ဆက်ကို သူ တစ်ချက်ကြည့်လိုက်သည်။ ငရဲကိုးထပ် မသေမျိုးနဂါးနှင့် နှိုင်းယှဉ်ပါက ကံကြမ္မာရွှေနဂါး၏ တိုက်ခိုက်ရေးစွမ်းအားမှာ သိသိသာသာ နိမ့်ကျနေသော်လည်း ဤသည်က ငရဲကိုးထပ် မသေမျိုးနဂါးနှင့် နှိုင်းယှဉ်လျှင်သာ ဖြစ်လေ၏။

ကံကြမ္မာရွှေနဂါး၏ အစစ်အမှန်စွမ်းအားမှာ လူတစ်ယောက် လူအမြောက်အများ သို့မဟုတ် အင်အားစု တစ်ခု၏ကံကြမ္မာကို ပြောင်းလဲပေးနိုင်ခြင်းပင်။

စိတ်ဝိညာဉ်စွမ်းအင်များကို ပို၍ကြွယ်ဝလာစေခြင်း၊ ကျင့်ကြံခြင်း အမြန်နှုန်းကို တိုးတက်စေခြင်း၊ အခွင့်အရေးများ ရရှိနိုင်ခြေကို မြှင့်တင်ပေးခြင်း၊ အတားအဆီးများကို ချိုးဖျက်ဝင်ရောက်ရာတွင် အခက်အခဲကို ထိန်းညှိပေးခြင်း စသဖြင့် အကျိုးကျေးဇူးများစွာ ရှိနေသည်။

ဤသည်က လူတိုင်းကို ကံကောင်းခြင်း ကောင်းချီးတစ်ခုပေးခြင်းနှင့် ညီမျှသည်။

ထို့ပြင် သခင်တစ်ယောက်အနေဖြင့် ချန်ချင်းသည် မည်သူက ကံကြမ္မာအပိုဆုကို ခံစားခွင့်ရှိပြီး မည်သူက ခံစားခွင့် မရှိဘူးသည်ကို လွတ်လပ်စွာ ဆုံးဖြတ်နိုင်ပြီး တခြားသူများမှ သူ၏ကံကြမ္မာစွမ်းအားများကို အချောင်သက်သက် အသုံးချခြင်းမှ ကာကွယ်ပေးနိုင်လေ၏။

ကံကြမ္မာအပိုဆုကို ပထမဆုံး ခံစားခွင့်ရသူများမှာ သူ ကိုယ်တိုင်နှင့် ရှားချင်းယွဲ့တို့ပင်။

ရှားချင်းယွဲ့သည် ချန်ချင်းကို ကြည့်လိုက်ပြီး သူမ၏ ပါးလျသော နှုတ်ခမ်းများ အနည်းငယ် ပွင့်ဟသွားကာ တစ်စုံတစ်ခု ​ပြောဆိုရန် ဟန်ပြင်လိုက်သော်လည်း ရုတ်တရက် အံ့အားသင့်သွားသော အမူအရာကို ပြသလိုက်သည်။

သူမ အသိဝင်လာရန် အချိန်အတော်ကြာ ယူလိုက်ရပြီးနောက် ပြောဆိုသည်။

"ထူးဆန်းတယ်... ကျွန်မ ဘယ်လိုလုပ်ပြီး အဆင့်ချိုးဖျက်ဝင်ရောက်သွားတာလဲ..."

သူမ၏ကျင့်ကြံခြင်းသည် စိတ်ဝိညာဉ်ခွဲထွက်ခြင်းနယ်ပယ် ဒုတိယအဆင့်မှ တတိယအဆင့်သို့ ရုတ်တရက် မြင့်တက်သွားခဲ့လေ၏။

သူမ၏အကြည့်သည် ချန်ချင်းထံသို့ နောက်တစ်ကြိမ် ရောက်ရှိသွားပြီး သူနှင့် ဤအရာကြားတွင် ဆက်စပ်မှု တစ်ခုခုရှိမည်ဟု သူမ သေချာသိနေခဲ့သည်။

ချန်ချင်းက တိုက်ရိုက်မဖြေဘဲ ခေါင်းမော့ကာ ရှားချင်းယွဲ့ကို အပေါ်သို့ မော့ကြည့်ရန် အချက်ပြလိုက်သည်။