အခန်း ၇၀

အခန်း (၇၀) ငါထွက်လာပြီး မင်းကို ပြိုင်ဘက်ကင်းဖြစ်အောင် လုပ်ပေးမယ့်အချိန်ထိ စောင့်ပါ

'အောင်မြင်သွားပြီလား...'

ဆေးပညာရှင်လင်း၏ မျက်လုံးများ ပြင်ပသို့ ကျွတ်ထွက်လုမတတ် ဖြစ်နေသည်ကို မြင်သောအခါ ဝမ်ဟိုင်ဖုန်း၏အကြည့်သည် ချန်ချင်းထံသို့ ချက်ချင်းပြန်ရောက်သွားသည်။

သူ မျှော်လင့်ထားသည့်အတိုင်းပင် သိပ်သည်းသော တာအိုစည်းချက်များဖြင့် တောက်ပနေသည့် ရွှေရောင် နဝမအဆင့် ဆေးလုံးခုနစ်လုံး ဆေးမီးဖိုထဲမှ ပျံသန်းထွက်လာသည်ကို သူ မြင်တွေ့လိုက်ရသည်။

ထိုကဲ့သို့ ဆေးလုံးတစ်လုံးကို သူ သောက်လိုက်သရွေ့ ဆယ်နှစ်ကျော်ကြာ သူ့ကို ဒုက္ခပေးနေခဲ့သော အတားအဆီးသည် မျက်စိတစ်မှိတ်အတွင်း ချိုးဖျက်ဝင်ရောက်သွားနိုင်သည်ဟု သူ ပြင်းပြင်းထန်ထန် ခံစားမိလေ၏။

ရုတ်တရက် ဝမ်ဟိုင်ဖုန်းသည် တခြားတစ်ခုခုကို တွေ့ရှိသွားသကဲ့သို့ ဖြစ်သွားပြီး ဆေးပညာရှင်လင်းကို ကြည့်ကာ မေးမြန်းလိုက်သည်။

"ဆေးပညာရှင်လင်း ... ဆေးလုံးပေါ်မှာ စီးဆင်းနေတာက ဆေးလုံးအမှတ်အသားတွေများလား..."

"..."

ဆေးပညာရှင်လင်းသည် ကျောက်ရုပ်ဖြစ်သွားသကဲ့သို့ တိတ်ဆိတ်နေသည်။

ထိုအရာမှတစ်ဆင့် ဆေးလုံး၏ အပြင်ဘက်မျက်နှာပြင်ပေါ်ရှိ တောက်ပနေသော အလင်းရောင်သည် အမှန်တကယ်ပင် ဆေးလုံးအမှတ်အသားများ ဖြစ်ကြောင်း ဝမ်ဟိုင်ဖုန်း ရာနှုန်းပြည့် သေချာသွားခဲ့သည်။

ထိုသို့မဟုတ်ပါက ဆဌမအဆင့် ဆေးပညာရှင်တစ်ဦးဖြစ်သော လင်းဟောက်ရန်သည် ထိုကဲ့သို့ စိတ်လှုပ်ရှားနေသည့် အမူအရာမျိုး ပြသမည် မဟုတ်ချေ။

"နဝမအဆင့် ဆေးလုံးတွေ... တစ်ကြိမ်တည်းနဲ့ ဖွဲ့စည်းလာတာပဲ... ပြီးတော့ ရာနှုန်းပြည့် ဆေးလုံးအမှတ်အသား အဆင့်တွေချည်းပဲ... ဒါ... ဒါက နဝမအဆင့် အထွတ်အထိပ် ဆေးပညာရှင်တစ်ယောက်ရဲ့ နယ်ပယ်ထက်တောင် ကျော်လွန်နေပြီ..."

အချိန်အတော်ကြာမှသာ ထိုစကားများသည် လင်းဟောက်ရန်၏နှုတ်ခမ်းမှ ထွက်ပေါ်လာတော့သည်။

"ဂိုဏ်းချုပ်... ခင်ဗျား... ဒီလို ပါရမီရှင်မျိုးကို ဘယ်ကနေ ရှာတွေ့လာတာလဲ..."

လင်းဟောက်ရန်သည် လိပ်ပြာလွင့်သွားသကဲ့သို့ ထုံထိုင်းသော အမူအရာဖြင့် ရှိနေဆဲပင်။

"ဒါက..."

မူလက ချန်ချင်းကို ကျန်းယီဂိုဏ်းသို့ ခေါ်ဆောင်လာရန် ချင်းချန်ဂိုဏ်းသို့ သွားခဲ့သော်လည်း တစ်ဖက်လူ၏ စွမ်းအားဖြင့် လုံးဝအနိုင်ယူခံလိုက်ရပြီး ထာဝရ အညံ့ခံရန် မိုးကောင်းကင်တာအို ကျိန်ဆိုခြင်း ပြုလုပ်ရန် အတင်းအကျပ် ခိုင်းစေခံခဲ့ရကြောင်း သူသည် လင်းဟောက်ရန်အား ပြောပြသင့်သလော...

သူ ထုတ်မပြောနိုင်ခဲ့ချေ။

ချန်ချင်းသည် သူတို့၏ စကားပြောဆိုမှုတိုင်းကို ကြားနေသော်လည်း ဂရုမစိုက်ခဲ့ချေ။

နဝမအဆင့် ဆေးလုံးခုနစ်လုံးက ချန်ချင်း၏ ရည်မှန်းချက်ကို ဖြည့်ဆည်းရန် မလုံလောက်သေးချေ။ သူ ဆက်လက်၍ ဖော်စပ်နေခဲ့သည်။

ထိုဖြစ်စဉ် ဆက်လက်၍ ဖြစ်ပေါ်နေစဉ် ဆဌမအဆင့် ဆေးပညာရှင်တစ်ဦးဖြစ်သော လင်းဟောက်ရန်သည် သူ၏လောကအမြင်နှင့် နားလည်မှုများကို ချန်ချင်းက အကြိမ်ကြိမ် အတင်းအကြပ် ပြောင်းလဲပေးခြင်းကို ခံခဲ့ရလေ၏။

ရာနှုန်းပြည့် ဆေးလုံးဖြစ်တည်မှုနှင့် ရာနှုန်းပြည့် ထိပ်တန်း ဆေးလုံးအမှတ်အသားများ သန့်စင်မှုကို အောင်မြင်နိုင်သူများ လောကကြီးတွင် ရှိနေကြောင်း သူ ပထမဆုံးအကြိမ် သဘောပေါက်သွားခဲ့သည်။

ထိုအရာတစ်ခုတည်းကပင် ချန်ချင်း၏ စွမ်းအားကို သက်သေပြရန် လုံလောက်ပြီဟု သူ ထင်မှတ်ခဲ့သည်။

ထို့နောက် ချန်ချင်းသည် ဆေးပင်များအပေါ် သူ၏ ထူးခြားသော နားလည်မှုကို အားကိုးကာ အဋ္ဌမအဆင့် ဆေးပင်များမှ နဝမအဆင့် နတ်ဘုရား ဆေးလုံး တစ်လုံးကို ဖော်စပ်ရန် အပြန်အလှန် ဖြည့်ဆည်းခြင်း တာအိုကို အသုံးပြု၍ မဖြစ်နိုင်သောအရာကို ချိုးဖောက်သွားလိမ့်မည်ဟု မည်သူက ထင်မှတ်ထားခဲ့မည်နည်း။

သူကိုယ်တိုင် မျက်မြင်တွေ့ရှိခဲ့သော်လည်း လွန်ခဲ့သော ရက်အနည်းငယ်အတွင်း အဆက်မပြတ် ဆေးဖော်စပ်ခြင်းကြောင့် အလွန်အမင်း ပင်ပန်းနွမ်းနယ်နေသဖြင့် သူ ထင်ယောင်ထင်မှား ဖြစ်နေသလားဟု လင်းဟောက်ရန် မတွေးဘဲ မနေနိုင်ခဲ့ချေ။

သူသည် စိတ်တည်ငြိမ်စေသော မန္တန်တစ်ခုကို တိတ်တဆိတ် ရွတ်ဆိုလိုက်သော်လည်း သူ၏ရှေ့ရှိ မြင်ကွင်းသည် ပြောင်းလဲမသွားခဲ့ချေ။

လင်းဟောက်ရန် မယုံကြည်နိုင်သေးဘဲ ကိုယ့်ကိုယ်ကိုယ် ပြင်းပြင်းထန်ထန် ဆိတ်ဆွဲလိုက်၏။

"ရှီး..."

ဤှသည်က နာကျင်လွန်းသဖြင့် သူ မျက်နှာမဲ့သွားပြီး လေကို ပြင်းပြင်းရှူသွင်းလိုက်ရသည်။

ဤသည်ကြောင့် သူ၏ရှေ့ရှိ အရာအားလုံးသည် လုံးဝထင်ယောင်ထင်မှား မဟုတ်ဘဲ အမှန်တကယ်ပင် ဖြစ်ပျက်နေကြောင်း လင်းဟောက်ရန် ယုံကြည်သွားတော့သည်။

"ဆေးနတ်ဘုရား... သူက အသက်ရှင်နေတဲ့ ဆေးနတ်ဘုရား ပဲ... ဆေးတာအို ဘိုးဘေးကိုတောင် ကျော်လွန်သွားနိုင်မယ့် တည်ရှိမှုတစ်ခုပဲ... မဟုတ်ဘူး... သူက ဆေးဘိုးဘေးရဲ့ ပြန်လည်ဝင်စားခြင်းလို့တောင် ငါ သံသယဝင်မိတယ်..."

သူ၏နံဘေးရှိ လင်းဟောက်ရန်၏ တစ်ကိုယ်တည်း တီးတိုးစကားပြောနေမှုများကို နားထောင်ရင်းနှင့် သူ့သခင်၏ စွမ်းအားကို အသိအမှတ်ပြုသည်အား မြင်သောအခါ ဝမ်ဟိုင်ဖုန်းသည် သစ္စာရှိသော လက်အောက်ခံတစ်ဦးအနေဖြင့် သူ၏ ရင်ဘတ်ကို ကော့ကာ မေးစေ့ကို အနည်းငယ် မော့ထားလိုက်ပြီး သူ၏ မျက်နှာပေါ်တွင် ဂုဏ်ယူသော အမူအရာတစ်ခု ထွက်ပေါ်လာသည်။

သူ၏ မျက်နှာပေါ်တွင် 'တွေ့လား... ဒါက ငါ့သခင်ရဲ့ စွမ်းအားပဲ' ဟူသော စကားလုံးများ ရေးသားထားလုနီးပါးပင်။

ချန်ချင်းသည် ဆေးဖော်စပ်ခြင်းကိုသာ ဆက်လက်၍ အာရုံစိုက်နေပြီး ပြင်ပအရာအားလုံးကို လေကဲ့သို့ သဘောထားကာ လျစ်လျူရှုထားခဲ့သည်။

အကယ်၍ သူ ဂယက်ရိုက်ခတ်အောင် လုပ်မည်ဆိုပါက အကြီးကြီး လုပ်ရပေမည်။

တစ်ချိန်တည်းမှာပင်…

တာ့မန်တောင်တန်းတွင် တံခါးပိတ်ကျင့်ကြံနေသော ယဲ့ဖုန်းသည် နောက်ဆုံးတွင် သူ စောင့်မျှော်နေသော အချိန်အခိုက်အတန့်သို့ ရောက်ရှိလာသည်။

【နေ့စဉ်တက်ရောက်စာရင်းသွင်းခြင်းကို ပြုလုပ်လိုပါသလား...】

သူ၏ရှေ့တွင် ပေါ်လာသော စနစ် အချက်ပေးချက်ကို ရင်ဆိုင်ရာတွင် ယဲ့ဖုန်း၏အဖြေမှာ အနည်းငယ်မျှ တုံ့ဆိုင်းခြင်း မရှိခဲ့ချေ။

"တက်ရောက်စာရင်းသွင်းမယ်..."

【တက်ရောက်စာရင်းသွင်းနေပါသည်...】

【တက်ရောက်စာရင်းသွင်းခြင်း အောင်မြင်ပါသည်... အိမ်ရှင်... ရုပ်ခန္ဓာကိုယ်အမျိုးအစား သုံးထောင်ထဲမှ ကောင်းကင်ဘုံ သူတော်စင်ရုပ်ခန္ဓာကိုယ်ကို ရရှိသည့်အတွက် ဂုဏ်ယူပါသည်... ရုပ်ခန္ဓာကိုယ်အမျိုးအစား သုံးထောင်အဆင့်... ၂၃၃...】

"ရုပ်ခန္ဓာကိုယ်တစ်ခုပဲ... ပြီးတော့ အဆင့် နှစ်ရာ့သုံးဆယ့်သုံး ရှိတဲ့ ရုပ်ခန္ဓာကိုယ် တစ်ခုပဲ... ဒါက အရမ်းကောင်းတယ်..."

ထိုတက်ရောက်စာရင်းသွင်းခြင်းက စနစ်ထံမှ ထိုမျှထိ ကြီးမားသော အံ့အားသင့်စရာကို ယူဆောင်လာပေးလိမ့်မည်ဟု ယဲ့ဖုန်း အမှန်တကယ်ကို ထင်မှတ်မထားခဲ့ချေ။

ရုပ်ခန္ဓာကိုယ်တစ်ခု နိုးထလာခြင်းက မည်သည့်အရာကိုဆိုလိုကြောင်း သူ ကောင်းစွာသိရှိထားသည်။ အဆင့်သုံးထောင်ရှိသော အသုံးမကျသည့် ရုပ်ခန္ဓာကိုယ်တစ်ခု ဖြစ်နေလျှင်ပင် ဤသည်က မရေမတွက်နိုင်သော သာမန်ကျင့်ကြံသူများကို ကျော်လွန်သည့် ပါရမီရှင်တစ်ဦး ဖြစ်နေဆဲပင်။

ထိုရုပ်ခန္ဓာကိုယ်ပိုင်ရှင်သည် မည်မျှထိ အသုံးမကျပါစေ ပါရမီရှင်တစ်ဦး ဖြစ်နေပေမည်။

ရုပ်ခန္ဓာကိုယ်အမျိုးအစား သုံးထောင်ထဲတွင် အဆင့် နှစ်ရာကျော် ရှိသော ရုပ်ခန္ဓာကိုယ်တစ်ခုကိုမူ ဆိုဖွယ်ရာပင် မရှိတော့ချေ။

အရာအားလုံးက အိပ်မက်တစ်ခု ဖြစ်နေမည်ကို စိုးရိမ်သဖြင့် ယဲ့ဖုန်းသည် စနစ်သိုလှောင်ခန်းကိုဖွင့်ကာ ချိတ်ဆက်မှုကို အတည်ပြုလိုက်သည်။

【ကောင်းကင်ဘုံ သူတော်စင်ရုပ်ခန္ဓာကိုယ် ချိတ်ဆက်ခြင်း အောင်မြင်ပါသည်...】

ကောင်းကင်ဘုံ သူတော်စင်ရုပ်ခန္ဓာကိုယ်ကို ချိတ်ဆက်ပြီးနောက် ယဲ့ဖုန်းသည် ကျင့်ကြံရန် မစောင့်ဆိုင်းနိုင်တော့ချေ။

အချိန်တခဏအကြာတွင် သူသည် မျက်လုံးများကို ဖွင့်ကာ လက်သီးများကို ဆုပ်လိုက်ပြီး စိတ်လှုပ်ရှားစွာဖြင့် ထုတ်ပြန်ကြေညာလိုက်၏။

"ထိပ်ဆုံးငါးရာစာရင်းဝင် ရုပ်ခန္ဓာကိုယ် ဆိုတဲ့ နာမည်နဲ့ တကယ့်ကို ထိုက်တန်တာပဲ... အဲ့ဒါက ငါ့ရဲ့ ကျင့်ကြံခြင်း အမြန်နှုန်းကို တကယ်ပဲ နှစ်ဆ တိုးသွားစေတယ်..."

"တခြားသူတွေက ရုပ်ခန္ဓာကိုယ်တစ်ခု နိုးထတဲ့ အခွင့်အရေးရဖို့အတွက် လူသန်းရာနဲ့နဲ့ချီတဲ့ အထဲက တစ်ယောက်လောက်သာ ကောင်းကင်တာအိုရဲ့ မျက်နှာသာပေးမှုကို အားကိုးနေရပေမဲ့... ငါကတော့ စနစ်တက်ရောက်စာရင်းသွင်းခြင်းတွေကနေ ရုပ်ခန္ဓာကိုယ်တွေကို ရနိုင်တယ်... တခြားဘယ်သူကများ ဒီလို လုပ်နိုင်အုံးမှာလဲ..."

ယဲ့ဖုန်းသည် အလွန်အမင်း ဝမ်းသာပျော်ရွှင်နေပြီး အနာဂတ်တွင် ထိပ်ဆုံးတစ်ရာစာရင်းဝင် သူတော်စင်ရုပ်ခန္ဓာကိုယ်ကဲ့သို့ ပို၍မြင့်မားသော အဆင့်ရှိသည့် ရုပ်ခန္ဓာကိုယ်များကို တက်ရောက်စာရင်းသွင်းပြီး ရရှိရန် စိတ်အားထက်သန်စွာ မျှော်လင့်နေခဲ့လေ၏။

ထိပ်ဆုံးဆယ်ခုစာရင်းဝင် အထွတ်အထိပ် သူတော်စင်ရုပ်ခန္ဓာကိုယ်တစ်ခုကိုပင် သူ ရလာနိုင်သည်။

သူ ပို၍တွေးတောလေလေ ပို၍စိတ်လှုပ်ရှားလာလေလေဖြစ်ပြီး သူ၏မျှော်လင့်ချက်ကို မရပ်တန့်နိုင်တော့ချေ။

သူ လက်ကို မြှောက်ကာ သူ၏ပါးစပ်ထောင့်မှ သွားရည်များကို သုတ်လိုက်၏။

"မဟုတ်ဘူး... မဟုတ်သေးဘူး... ငါ တည်ငြိမ်ရမယ်... မြန်မြန် ကျင့်ကြံရမယ်... ငါ့ရဲ့ ခွန်အားကို မြှင့်တင်ဖို့က အရေးကြီးတယ်..."

မဟာဧကရာဇ်နယ်ပယ်သို့ ချိုးဖျက်ဝင်ရောက်သွားသည်နှင့် တပြိုင်နက် တံခါးပိတ်ကျင့်ကြံခြင်းမှ စောစောစီးစီး ထွက်လာနိုင်မည်ဟု သူ တွေးတောလိုက်မိသည်။

သူသည် တာ့မန်တောင်တန်းသို့ ရုတ်တရက် ပို့ဆောင်ခံခဲ့ရပြီး မည်သူမျှ မသိရှိခဲ့ကြချေ။

ရှားချင်းယွဲ့၏ သူ့အပေါ်ထားရှိသော ခံစားချက်များကို ယဲ့ဖုန်း သံသယမဝင်သော်လည်း သူမက သူ သေဆုံးသွားပြီဟု အထင်လွဲကာ တော်ဝင်မိသားစု၏ ဖိအားပေးမှုအောက်တွင် အခြားတစ်ယောက်နှင့် လက်ထပ်ရန် သဘောတူသွားမည်ကို သူ စိုးရိမ်နေခဲ့သည်။

ပြိုင်ဘက်ကင်း ကျင့်ကြံခြင်းဖြင့် တံခါးပိတ်ကျင့်ကြံခြင်းမှ ထွက်လာချိန်တွင် သူ၏ငယ်ချစ်ဦးက တခြားတစ်ယောက်နှင့် နဂါးနှင့်ဖီးနစ်အမြွှာများကိုပင် မွေးဖွားပြီးနေပြီဟူသော ဖြစ်နိုင်ခြေကို တွေးကြည့်ရုံဖြင့် ယဲ့ဖုန်း၏ချီ များ မတည်မငြိမ်ဖြစ်သွားကာ ချီသွေဖည်ခြင်းသို့ပင် ဦးတည်သွားလုနီးပါး ဖြစ်ခဲ့သည်။

"မဖြစ်နိုင်ဘူး... ရှားချင်းယွဲ့က ငါ့ကို ဘယ်တော့မှ သစ္စာဖောက်မှာ မဟုတ်ဘူး... တကယ်လို့ ငါ တကယ် သေသွားရင်တောင် သူက ငါ့ရဲ့ သင်္ချိုင်းဂူကို တသက်လုံး သေချာပေါက် စောင့်ရှောက်ပေးမှာပဲ..."

ရှားချင်းယွဲ့သည် သူ သေဆုံးသွားကြောင်း အတည်ပြုပြီးနောက် အလွန်အမင်း ဝမ်းနည်းပူဆွေးမှုကြောင့် သူ့နောက်သို့ လိုက်ရန် ကြိုးစားခြင်းကဲ့သို့ မိုက်မဲသည့် လုပ်ရပ်တစ်ခုခုအား လုပ်ဆောင်မိမည်ကိုပင် ယဲ့ဖုန်း စိုးရိမ်နေခဲ့လေ၏။

'ရှားချင်းယွဲ့... ကျေးဇူးပြုပြီး မိုက်မဲတာတွေ မလုပ်ပါနဲ့... ငါ့ကို စောင့်ပါ... မင်း ငါ့ကို သေချာပေါက် စောင့်နေရမယ်... ငါ တံခါးပိတ်ကျင့်ကြံခြင်းကနေ ထွက်လာတဲ့အခါ လောကကြီးကို အောင်နိုင်ဖို့ မင်းကို ငါ ခေါ်သွားမယ်...'

ထိုသို့ တွေးတောပြီးနောက် ယဲ့ဖုန်းက ကျင့်ကြံရန် ပို၍ပင် စိတ်အားထက်သန်လာသည်။

...

ကျန်းယီဂိုဏ်း...

ဆေးဖော်စပ်ရေး အခန်း၌....

ချန်ချင်းသည် သူ၏လက်ထဲရှိ စုစုပေါင်း နဝမအဆင့် ဆေးလုံး တစ်ရာ့သုံးလုံးကို ကြည့်ကာ လုံလောက်ပြီဟု ခံစားလိုက်ရသည်။

သူသည် ဆေးပညာရှင် လင်းဟောက်ရန်ကို တစ်လုံးနှင့် ဝမ်ဟိုင်ဖုန်းကို တစ်လုံး ဆုချလိုက်သည်။

ဤသည်မှာ ဝမ်ဟိုင်ဖုန်း၏ သစ္စာရှိမှုကို ဆုချရန်နှင့် လင်းဟောက်ရန်၏ သစ္စာခံမှုကို ရယူရန်ပင်။

လင်းဟောက်ရန်က သူ့ကို သစ္စာခံရန် ဆန္ဒမရှိလျှင်ပင် ဆေးပင်အများစုမှာ တစ်ဖက်လူ၏သိုလှောင်မှုများ ဖြစ်ပြီး သူသည် ဆေးအပင်အများအပြားကို အသုံးပြုခဲ့သည်။ ထိုကြောင့် သူသည် တစ်ဖက်လူကို နဝမအဆင့် ဆေးလုံးတစ်လုံး ပေးခြင်းမှာ ယုတ္တိရှိပေ၏။

"ကျေးဇူးအများကြီးတင်ပါတယ်... ဆေးနတ်ဘုရား သခင်..."

ဆေးလုံးကို လက်ခံရရှိပြီးနောက် လင်းဟောက်ရန်သည် ကျေးဇူးတင်စကား ပြောရန် ဒူးထောက်လိုက်ပြီး ချန်ချင်းကို ဆေးဘိုးဘေး ပြန်လည်ဝင်စားသူ အဖြစ် အမှန်တကယ်ပင် သဘောထားလိုက်သည်။

"သခင်ရဲ့ ကြီးမားတဲ့ ရက်ရောမှုအတွက် ကျေးဇူးတင်ပါတယ်..."

ဝမ်ဟိုင်ဖုန်းက ပို၍ပင် မြန်ဆန်စွာ ဒူးထောက်လိုက်ပြီး သူ၏သစ္စာရှိမှုများ မြင့်တက်လာခဲ့သည်။

ယခုအချိန်၌ မိုးကောင်းကင်တာအို ကျိန်ဆိုခြင်းက အကျုံးမဝင်တော့လျှင်ပင် သူသည် ချန်ချင်း၏အမိန့်ကို လိုလိုလားလား လိုက်နာမည်ဖြစ်ပြီး ဘယ်တော့မှ သစ္စာဖောက်မည် မဟုတ်ချေ။

"ထကြပါ..."

ချန်ချင်းက ပြောလိုက်သည်။

"ကျေးဇူးတင်ပါတယ် ဆေးနတ်ဘုရား သခင်..."

"ကျေးဇူးတင်ပါတယ် သခင်..."

သူ၏စကားကို ကြားသောအခါ သူတို့နှစ်ဦးသား မတ်တတ်ရပ်လိုက်ကြပေသည်။

ထွက်ခွာရန် အချိန်သင့်ပြီဟု ချန်ချင်း တွေ့မြင်လိုက်ရသည်။ အချိန်သည် မိုးလင်းနေလေပြီ။

ရှားချင်းယွဲ့ကိုတွေ့ရန် ချန်အိမ်တော်သို့ ပြန်ရမည့်အချိန်ရောက်ပြီဟု သူ ဆုံးဖြတ်လိုက်သည်။

ဆေးလုံးဆုလာဘ်များကို ရယူပြီးနောက် သူသည် သူမကို ထျန်းကျီ လေလံပွဲသို့ ခေါ်သွားရပေမည်။

သို့သော် သူ ဟင်းလင်းပြင် ကူးပြောင်းရေးတံခါးကို မဖွင့်နိုင်မီမှာပင်...

တံခါး၏အပြင်ဘက်မှ ထိတ်လန့်နေသော တပည့်တစ်ဦး၏အသံ ထွက်ပေါ်လာသည်။

"ဂိုဏ်းချုပ်... မကောင်းတော့ဘူး... ဒီကိစ္စက ဆိုးရွားတယ်... နတ်ဆိုးဂိုဏ်းက ရုတ်တရက် တိုက်ခိုက်လာပြီးတော့ ငါတို့ ကျန်းယီဂိုဏ်းကို ထိုးစစ်ဆင်ချင်နေတယ်..."

Book 7 end.