အခန်း ၉၁

အခန်း (၉၁) ဇနီးမောင်နှံတို့၏ လက်တွေ့ဘဝ

[ဇနီးသည်ကို အလိုလိုက်ခြင်း အောင်မြင်ပါသည်... အိမ်ရှင်က ကျပန်းဆုလာဘ်အဖြစ် ကောင်းကင်တာအို ဧကရာဇ်လက်နက် ဆယ်ကြိမ်ဆက်တိုက် မဲဖောက်ခွင့် အခွင့်အရေးကို ရရှိသည့်အတွက် ဂုဏ်ယူပါသည်...]

ချန်ချင်းသည် သူ အကြည့်မမှားကြောင်းနှင့် ဤသည်မှာ ကောင်းကင်တာအို ဧကရာဇ်လက်နက် ဆယ်ကြိမ်ဆက်တိုက် မဲဖောက်ခွင့် အခွင့်အရေး အမှန်တကယ် ဖြစ်ကြောင်း အတည်ပြုလိုက်သည်။ ထို့နောက် သူ၏အတွေးများသည် အချိန်တချို့တွင် စနစ်၏ဆုလာဘ်များအပေါ် သက်ရောက်မှု ရှိနိုင်သည်ကို သူ ပို၍ပင် ယုံကြည်လာသည်။ ဖြစ်နိုင်ခြေ အလွန် နည်းပါးလျှင်ပင် ဤသည်မှာ သုညကမူ သေချာပေါက် မဟုတ်ပါချေ။

ရှားချင်းယွဲ့သည် သူမ၏ကျင့်ကြံခြင်းကို တည်ငြိမ်အောင် ပြုလုပ်နေစဉ် ချန်ချင်းသည် စနစ်​သိုလှောင်ခန်းကိုဖွင့်ကာ ကောင်းကင်တာအို ဧကရာဇ် လက်နက် ဆယ်ကြိမ်ဆက်တိုက် မဲဖောက်ခွင့် အခွင့်အရေးကို ရွေးချယ်ပြီး အသုံးပြုမှုကို အတည်ပြုလိုက်သည်။

[ဆယ်ကြိမ်ဆက်တိုက် မဲဖောက်ခြင်း ပြုလုပ်နေပါသည်...]

[ဆယ်ကြိမ်ဆက်တိုက် မဲဖောက်ခြင်း အောင်မြင်ပါသည်... အိမ်ရှင်က ကောင်းကင်တာအို ဧကရာဇ် လက်နက်... ကမ္ဘာဦး ဖရိုဖရဲ ခေါင်းလောင်းကို ရရှိသည့်အတွက် ဂုဏ်ယူပါသည်...]

[ဆယ်ကြိမ်ဆက်တိုက် မဲဖောက်ခြင်း အောင်မြင်ပါသည်... အိမ်ရှင်က ကောင်းကင်တာအို ဧကရာဇ် လက်နက်... ကောင်းကင်ဘုံ ပြစ်ဒဏ်ပေးဓားကို ရရှိသည့်အတွက် ဂုဏ်ယူပါသည်...]

[ဆယ်ကြိမ်ဆက်တိုက် မဲဖောက်ခြင်း အောင်မြင်ပါသည်... အိမ်ရှင်က ကောင်းကင်တာအို ဧကရာဇ် လက်နက်... ကြယ်တာရာလေးကို ရရှိသည့်အတွက် ဂုဏ်ယူပါသည်...]

[ဆယ်ကြိမ်ဆက်တိုက် မဲဖောက်ခြင်း အောင်မြင်ပါသည်... အိမ်ရှင်က ကောင်းကင်တာအို ဧကရာဇ် လက်နက်... ကောင်းကင် ဝမ်းနည်းပူဆွေးမှု ကုချင်း ကို ရရှိသည့်အတွက် ဂုဏ်ယူပါသည်...]

မဟာဧကရာဇ် တစ်ပါးအဖြစ် တာအိုကို အောင်မြင်စွာ ရရှိပြီးသည့်တိုင် ကောင်းကင်တာအို ဧကရာဇ် လက်နက်များ နိုးထလာရန် ဖြစ်နိုင်ခြေမှာ အလွန်နည်းပါးသည်။ သို့သော် ချန်ချင်းသည် ဆယ်ကြိမ်ဆက်တိုက် မဲဖောက်ခွင့် အခွင့်အရေးမှတဆင့် ထိုအရာများအနက်မှ ဆယ်ခုကို လွယ်လင့်တကူ ရရှိခဲ့သည်။

ရှားချင်းယွဲ့သည် ဤအကြောင်းကို လုံးဝမသိခဲ့ချေ။ သူမ၏ မဟာဧကရာဇ်နယ်ပယ် ကျင့်ကြံခြင်းမှ ယူဆောင်လာသော ရုပ်ခန္ဓာကိုယ်နှင့် စိတ်ဝိညာဉ်ချီ တိုးတက်မှုများကို နောက်ဆုံးတွင် ကျင့်သားရသွားပြီးနောက် သူမသည် လေဟာနယ်ထဲသို့ လက်လှမ်းကာ သူမ၏ နိုးထလာသော ကောင်းကင်တာအို ဧကရာဇ် လက်နက် ဖြစ်သည့် ဟုန်မန်ဓားကို ထုတ်ယူလိုက်၏။

"ခင်ပွန်းက ကောင်းကင်တာအို ဧကရာဇ် လက်နက် ကို နိုးထလာပုံ မပေါ်ဘူး... ကျွန်မဆီမှာ ရှေးဦးမိုးပြာကောင်းကင်ဓား ရှိနေပြီမလို့ ဒီဟုန်မန်ဓားကို ခင်ပွန်းကို ပေးချင်တယ်..."

ရှားချင်းယွဲ့သည် ချန်ချင်းက ကောင်းကင်တာအို ဧကရာဇ် လက်နက် တစ်ခုကို အသုံးပြုသည်ကို သို့မဟုတ် ထိုအရာနှင့် ပတ်သက်၍ တစ်ခုခု ပြောသည်ကို မမှတ်မိခဲ့ချေ။ ထို့ကြောင့် သူမ၏ နိုးထလာသော ဧကရာဇ်လက်နက် ဖြစ်သည့် ဟုန်မန်ဓား ကို ချန်ချင်းအား ပေးရန် သူမ အကြံပြုခဲ့ခြင်း ဖြစ်ပေသည်။

ထိုသို့မပြုလုပ်ပါက ရှားချင်းယွဲ့သည် ချန်ချင်းအပေါ် သူမ၏ကျေးဇူးတင်မှုကို ဖော်ပြရန် တခြားနည်းလမ်းကို မည်သို့မျှ မစဉ်းစားနိုင်ခဲ့ချေ။

ဤ ဟုန်မန်ဓားသည် လက်ရှိအချိန်တွင် သူမ ကမ်းလှမ်းနိုင်သော အကောင်းဆုံး အလဲအလှယ်ပစ္စည်းပင်။

သူမထက် ဧကရာဇ်လက်နက်၏ အပြည့်အဝ စွမ်းအားကို ချန်ချင်းက ပို၍ကောင်းမွန်စွာ ထုတ်လွှတ်နိုင်မည်ဟု သူမ ယုံကြည်ထားသည်။

"ငါ ကောင်းကင်တာအို ဧကရာဇ်လက်နက်ကို နိုးထမလာဘူးလို့ ဘယ်သူပြောလဲ..."

ချန်ချင်းသည် ရှားချင်းယွဲ့၏ စေ့စပ်သေချာမှုကို စိတ်ကျေနပ်နေခဲ့လေ၏။ ဟုန်မန်ဓားကို သူမကိုယ်တိုင် အသုံးပြုရန်အတွက် သိမ်းဆည်းထားခြင်းက ပိုကောင်းပေမည်။

ခုနစ်စင်ကြယ်ဓားမြှောင်ပျံကို ဘေးဖယ်ထားလျှင်တောင် ချန်ချင်းသည် ဆယ်ကြိမ်ဆက်တိုက် မဲဖောက်ခြင်းမှတဆင့် ကောင်းကင်တာအို ဧကရာဇ်လက်နက် ဆယ်ခုကို ယခုလေးတင် ရရှိထားပြီး ဖြစ်လေ၏။

ဧကရာဇ်လက်နက် အပေါများဆုံး မဟာဧကရာဇ် အကြောင်း ဆွေးနွေးရမည်ဆိုပါက ချန်ချင်းက ဒုတိယ နေရာယူမည်ဆိုလျှင် ပထမ နေရာယူရဲသူ မည်သူမျှ ရှိမည် မဟုတ်ချေ။

"ခင်ပွန်းမှာလည်း ကောင်းကင်တာအို ဧကရာဇ် လက်နက် ရှိတာလား..."

ရှားချင်းယွဲ့က မေးလိုက်သည်။

ဟုန်မန်ဓားကို သူမ သိမ်းထားစေရန်အတွက် ချန်ချင်း လိမ်ပြောနေသည်ဟု သံသယမဝင်ဘဲ နေရန် ခက်ခဲလှသည်။

မည်သို့ပင်ဆိုစေကာမူ သူသည် သူမအပေါ် အမြဲတမ်း ငဲ့ညှာပြီး စေ့စပ်သေချာလွန်းလှရာ ရှားချင်းယွဲ့သည် ထိုအချက်ကို တစ်ကြိမ်တစ်ခါမျှ သံသယ မဝင်ခဲ့ဖူးချေ။

ရှားချင်းယွဲ့က သူ့ကို မယုံကြည်သည်ကို မြင်သောအခါ ချန်ချင်းသည် အနည်းငယ် ကြွားလုံးထုတ်ရန် ဝန်မလေးချေ။

သူ၏နောက်တွင် လေဟာနယ်အက်ကွဲကြောင်းများ ပွင့်လာပြီး ကမ္ဘာဦး ဖရိုဖရဲ ခေါင်းလောင်း ၊ ကောင်းကင်ဘုံ ပြစ်ဒဏ်ပေးဓား ၊ ကြယ်တာရာလေး ၊ ကောင်းကင် ဝမ်းနည်းပူဆွေးမှု ကုချင်း ... စသည်တို့ တစ်ခုပြီးတစ်ခု အထဲမှ ထွက်လာကာ ချန်ချင်းကို လှည့်ပတ်ခဲ့ကြသည်။

ရေတွက်ကြည့်ပြီးနောက် ကောင်းကင်တာအို ဧကရာဇ် လက်နက် ဆယ်ခုတိတိ ရှိနေကြောင်း တွေ့ရှိလိုက်ရသဖြင့် ရှားချင်းယွဲ့သည် အချိန်အတော်ကြာ အေးခဲတောင့်တင်းသွားပြီး သတိပြန်ဝင်လာရန် အချိန်အတော်ကြာ ယူလိုက်ရပေ၏။

"ကျွန်မ အထင်မမှားဘူးဆိုရင်... မဟာဧကရာဇ် တစ်ပါးက ကောင်းကင်တာအို ဧကရာဇ် လက်နက် တစ်ခုကို တကယ်ကြီး နိုးထလာနိုင်ရင်တောင်... ဘယ်သူမှ နှစ်ခုနိုးထလာတာမျိုး မရှိဖူးဘူး... ခင်ပွန်း... ရှင်... ရှင်က ဆယ်ခုတောင် နိုးထလာတာပဲ..."

အချိန်အတော်ကြာပြီးနောက် ရှားချင်းယွဲ့သည် ဤစကားတစ်ခွန်းကို နောက်ဆုံးတွင် အားယူ၍ ပြောနိုင်ခဲ့သည်။

"ပထမဆုံးအကြိမ် ဆိုတာတော့ အမြဲတမ်း ရှိရမှာပေါ့..."

ချန်ချင်းက အပြုံးနှင့် ပြောလိုက်၏။

ရှားချင်းယွဲ့၏ 'ပထမဆုံး' ဆိုသည်မှာ ဧကရာဇ် လက်နက်နှစ်ခု နိုးထလာပြီး ထုံးစံအသစ်တစ်ခု ဖန်တီးခြင်းကို ရည်ညွှန်းသော်လည်း ချန်ချင်း၏ 'ပထမဆုံး' ဆိုသည်မှာ ဧကရာဇ်လက်နက်ဆယ်ခု နိုးထလာခြင်းပင်။

ဤကွာဟချက်သည် အမှန်တကယ်ကို အနည်းငယ် ကြီးမားလှသည်။

'ဒါက သာမန်လူတွေနဲ့ ထိပ်တန်းပါရမီရှင်တွေ ကြားက ကွာဟချက်လား...'

သူမ၏စိတ်ထဲမှ သက်ပြင်းမချဘဲ မနေနိုင်တော့ချေ။

"အဲ့ဒီလို ဖြစ်နေမှတော့... ဒီဟုန်မန်ဓားကို ကျွန်မအတွက်ပဲ သိမ်းထားလိုက်မယ်..."

ရှားချင်းယွဲ့သည် ဟုန်မန်ဓားကို ပြန်လည်ရယူပြီး လေဟာနယ်ထဲသို့ ပြန်လည်သိမ်းဆည်းလိုက်ကာ ဆက်လက်၍ အတင်းအကြပ် မတောင်းဆိုတော့ချေ။

ချန်ချင်းသည်လည်း ကောင်းကင်တာအို ဧကရာဇ် လက်နက်ဆယ်ခုကို လာရာလမ်းသို့ ပြန်ပို့လိုက်၏။

ရှားချင်းယွဲ့၏စိတ်ထဲတွင် တစ်စုံတစ်ခု ရှိနေသည်ကို သူ မြင်လိုက်သဖြင့် လက်ဆန့်တန်းကာ သူမ၏ပါးပြင်ကို ညင်သာစွာကိုင်ပြီး ပြောလိုက်သည်။

"တကယ်လို့ ငါ့ရဲ့ဇနီးလေးက ငါ့ကို တကယ်ကြီး ကျေးဇူးဆပ်ချင်တယ်ဆိုရင်... ဘဝက ရှည်လျားပါသေးတယ်... ဒီအချိန်လေးမှာ အလျင်စလို လုပ်ဖို့ မလိုပါဘူး..."

"အင်း..."

ရှားချင်းယွဲ့က ခေါင်းကို ညင်သာစွာ ညိတ်လိုက်ပြီး ချန်ချင်း၏စကားများက အလွန်ယုတ္တိရှိသည်ဟု ခံစားမိသည်။ သူမ၏ ကျန်ရှိနေသေးသော ဘဝသည် ထက်ဝက်ပင် မကျိုးသေးရာ မည်သည်ကြောင့် အလျင်စလို လုပ်ရမည်နည်း။

"တကယ်လို့ ငါ့ရဲ့ဇနီးလေးက ငါ့ကို တကယ်ကြီး ကျေးဇူးဆပ်ချင်တယ်ဆိုရင်... ဒီနတ်ဘုရားလက်နက် တွေထက်စာရင်... သမီးလေး တစ်ယောက်လောက် ပြုစုပျိုးထောင်ချင်တယ်..."

ချန်ချင်း၏ ရုတ်တရက် အကြောင်းအရာ ပြောင်းလဲမှုက ရှားချင်းယွဲ့ကို ကြက်သေသေလုနီးပါး ဖြစ်သွားစေသည်။

အဟွတ်... အဟွတ်... အဟွတ်...

သူမ၏ နှုတ်ခမ်းဖျားရှိ စကားလုံးများ ရပ်တန့်သွားပြီး ရုတ်တရက် အသက်ရှူမွန်းကြပ်သကဲ့သို့ ဖြစ်သွားသည်။

"ခင်ပွန်းက အတည်ပြောနေတာလား... ဒါမှမဟုတ် ကျွန်မကို နောက်နေတာလား..."

ရှားချင်းယွဲ့သည် အနည်းငယ် ပြန်လည်သက်သာလာပြီးနောက် ရုတ်တရက် မော့ကြည့်လိုက်၏။

သူတို့၏အကြည့်များ ဆုံတွေ့သွားပြီး သူမ၏မျက်နှာအမူအရာ တည်ကြည်လေးနက်နေသည်။

ဤအရာကို မြင်သောအခါ ချန်ချင်း၏ နှလုံးသားထဲတွင် စကားလုံးတချို့သာ ရှိတော့သည်။

'သေချာပြီ...'

ရှားချင်းယွဲ့သည် ဤမျှထိ တည်ကြည်လေးနက်နေသဖြင့် ချန်ချင်းသည် ဤကိစ္စကို ပေါ့ပေါ့တန်တန် သဘောထား၍ မရတော့ချေ။

သူ ရှေ့သို့တိုးသွားပြီး ပို၍နီးကပ်စွာ ချဉ်းကပ်ကာ ရှားချင်းယွဲ့ကို သူ၏ရင်ခွင်ထဲသို့ ဆွဲသွင်းလိုက်၏။

"ငါက ငါ့ရဲ့ဇနီးလေးကို မဟုတ်မမှန်စကား တစ်ခွန်းမှ မပြောခဲ့ဖူးပါဘူး..."

"ကျွန်မက အဲ့ဒီကိစ္စတွေအကြောင်း ဘာမှမသိပါဘူး... အရာအားလုံးက... ခင်ပွန်းအပေါ်မှာပဲ လုံးဝမူတည်ပါတယ်..."

ရှားချင်းယွဲ့သည် ချန်ချင်း၏ ရင်ဘတ်ကို မှီလိုက်ပြီး သူမ၏ သဘောထားမှာ ဤထက်ပို၍ ရှင်းလင်း၍ မရနိုင်တော့ချေ။

"ငါ့တာဝန်ထားလိုက်..."

ရှားချင်းယွဲ့၏ သဘောထားကို အတည်ပြုပြီးနောက် ချန်ချင်းသည် ဆက်လက်၍ တုံ့ဆိုင်းမနေတော့ချေ။ သူသည် ခါးကိုညွှတ်ကိုင်းကာ သူမကို မြေကြီးပေါ်မှ ပွေ့ချီလိုက်၏။

ရှားချင်းယွဲ့သည် ရုန်းကန်ခြင်းမပြုဘဲ ကြွေရုပ်လေး တစ်ရုပ်ကဲ့သို့ လိမ္မာစွာဖြင့် ချန်ချင်း၏ပွေ့ချီထားခြင်းကို ခံယူလိုက်သည်။

သူမကို အဆတစ်ရာ ကျင့်ကြံခြင်း ဟင်းလင်းပြင်မှ ပွေ့ချီထုတ်သွားပြီး မျက်စိတစ်မှိတ်အတွင်း အိပ်ခန်းထဲသို့ ရောက်ရှိသွားကြသည်။

ချန်ချင်းသည် သူမကို အလွန်သိမ်မွေ့လှပသော အနုပညာလက်ရာ တစ်ခုကဲ့သို့ ဆက်ဆံခဲ့ပြီး သူ၏ လက်ထဲတွင် ကိုင်ထားပါက ပြုတ်ကျမည်ကို အလွန် ကြောက်ရွံ့နေကာ သူ၏ ပါးစပ်ထဲတွင် ငုံထားပါက အရည်ပျော်သွားမည်ကို စိုးရိမ်နေသည်။ သူသည် ရှားချင်းယွဲ့ကို ခုတင်ပေါ်သို့ ဂရုတစိုက် ချပေးလိုက်၏။

ရှားချင်းယွဲ့သည် ခေါင်းကို နံဘေးဘက်သို့ လှည့်ထားပြီး သူမ၏နီရဲနေသော ပါးပြင်များကို ဖုံးကွယ်၍ မရနိုင်ခဲ့ချေ။ သူမသည် ချန်ချင်းကို စေ့စေ့မကြည့်ရဲဘဲ သူမ၏အကြည့်ကို လွှဲဖယ်ထားရုံသာ တတ်နိုင်တော့သည်။

ထိုကိစ္စကို မလုပ်ဆောင်မီ ချန်ချင်းသည် အတွေးတစ်ချက်ဖြင့် အနှောင့်အယှက်ကင်းစေရန်အတွက် စနစ်မှ သူ၏အားအကောင်းဆုံး ဝင်္ကပါကို ဖြန့်ကျက်ပြီး ပတ်ဝန်းကျင်ကို ပိတ်ဆို့လိုက်သည်။

နောက်ဆုံးတွင် ဤအဆင့်သို့ ရောက်ရှိလာပြီဖြစ်ရာ ဗီလိန်တစ်ယောက်အနေဖြင့် ကောင်းကင်တာအိုက သတ်မှတ်ထားသော ဇာတ်လိုက်မနှင့် ဇနီးမောင်နှံတို့၏ နီးကပ်မှုကို မျှဝေမည်ဖြစ်သ​ဖြင့် ကောင်းကင်တာအို၏ ကောင်းကင်ဘုရင် ရောက်လာလျှင်ပင် ခြံဝင်း၏အပြင်ဘက်တွင် စောင့်နေရပေမည်။

ချန်ချင်းသည် သူ၏ အကြံအစည်ကို ဖျက်ဆီးရဲသော မည်သူမဆို... နတ်ဘုရားလာလျှင် နတ်ဘုရားကို သတ်မည်ဖြစ်ပြီး ဗုဒ္ဓလာလျှင် ဗုဒ္ဓကို သတ်ပေမည်။

ယခုအချိန်၌ ရှားချင်းယွဲ့နှင့် ဇနီးမောင်နှံတို့၏ လုပ်ရပ်ကို ပြီးမြောက်ခြင်းအတွက် ရရှိမည့် မဟာဧကရာဇ် ကျင့်ကြံခြင်း ဆုလာဘ်ထက် သူမကို လူတစ်ယောက်အနေဖြင့် ရယူခြင်းကို ချန်ချင်း ပို၍ဂရုစိုက်နေခဲ့သည်။

ဤကဲ့သို့ သူမနှင့် နေ့ရောညပါ အတူတကွ နေထိုင်လာခဲ့ရာ သူ စိတ်မလှုပ်ရှားဟု ပြောလျှင် သေချာပေါက် လိမ်ညာရာကျပေမည်။

စနစ်မရှိလျှင်ပင် ဇာတ်လိုက်ယဲ့ဖုန်း သို့မဟုတ် တခြား မည်သူ့ကိုမျှ ရှားချင်းယွဲ့အား သူ့ထံမှ ခေါ်ဆောင်သွားရန် ချန်ချင်း ခွင့်ပြုမည် မဟုတ်ချေ။

ပိုးထည်နှင့်ဖဲကြိုးများ ကြမ်းပြင်ပေါ်သို့ ပြန့်ကျဲသွားပြီး သူတို့နှစ်ဦးကြားတွင် မည်သည့်အတားအဆီးမျှ မရှိတော့ချေ။

ရှားချင်းယွဲ့သည် နှုတ်ခမ်းကို ညင်သာစွာ ကိုက်ထားပြီး မျက်လုံးများကို အနည်းငယ် မှိတ်ထားကာ သူမ၏ လက်များသည် ချန်ချင်း၏ ကျယ်ပြန့်သော ပခုံးများနှင့် ကျောပြင်ကို တင်းကျပ်စွာ ပွေ့ဖက်ထားလေ၏။

နာကျင်မှုနှင့် အနေရခက်မှုတို့ကြောင့် အစပိုင်းတွင် သူမ၏မျက်ခုံးများ တွန့်ကွေးနေသည်။ သို့ရာတွင် နောက်ပိုင်းတွင် ထိုအစား သူမသည် လုံးဝနစ်မျောနေပုံရပြီး သူမ၏နှုတ်ခမ်းထောင့်များ အထက်သို့ ကွေးတက်သွားသည်။

အရာအားလုံးသည် ပို၍ကောင်းမွန်သော အခြေအနေသို့ တည်ငြိမ်စွာ ဖွံ့ဖြိုးတိုးတက်နေခဲ့သည်။

ချန်ချင်းသာမက ယဲ့ဖုန်းသည်လည်း ထပ်တူထပ်မျှပင်။

သူသည် ရှားချင်းယွဲ့ကို လုံးဝဆုံးရှုံးသွားသော်လည်း နေ့စဉ်တက်ရောက်စာရင်းသွင်းရန် အခွင့်အရေး နောက်တစ်ကြိမ် ရရှိခဲ့သဖြင့် ဤသည်မှာ အရှုံးအမြတ် ညီမျှသော ကိစ္စတစ်ခုပင်။

"ကောင်းလိုက်တာ... တက်ရောက်စာရင်းသွင်းခြင်း အကြိမ်အရေအတွက် ပြန်ပြီးအသစ်ဖြစ်သွားပြီ... ငါက ကျင့်ကြံခြင်းမှာ နစ်မြုပ်နေသရွေ့ အချိန်တွေက အရမ်း မြန်မြန်ကုန်သွားတာပဲ..."

ယဲ့ဖုန်းက မျက်လုံးများ ဖွင့်လိုက်ပြီး အသစ်ပြန်ဖြစ်သွားသော နေ့စဉ် တက်ရောက်စာရင်းသွင်းခြင်း အကြိမ်အရေအတွက်ကို ကြည့်ကာ သူ၏မျက်နှာပေါ်တွင် ပျော်ရွှင်မှုအပြည့် ထင်ဟပ်လာပြီး ပြောလိုက်၏။

သို့သော် မည်သည့်အကြောင်းကြောင့်မှန်းမသိရဘဲ လွန်ခဲ့သော အချိန်တခဏကစ၍ သူ၏ရင်ဘတ်မှာ အနည်းငယ် မွန်းကျပ်နေခဲ့သည်။

သူ့ထံ၌ ဖော်ပြ၍မရနိုင်သော အနေမခက်မှုတစ်ခု ရှိနေခဲ့သည်။

သူ လျစ်လျူရှုရန် ကြိုးစားလေလေ ထိုခံစားချက်က ပို၍အားကောင်းလာလေလေဖြစ်ပြီး ကြောင်တစ်ကောင်က သူ၏ နှလုံးသားကို ရူးသွပ်စွာ ကုတ်ခြစ်နေသကဲ့သို့ တည်ငြိမ်ရန် အမှန်တကယ်ကို ခက်ခဲလှသည်။

"ဒီနေ့ တက်ရောက်စာရင်းသွင်းတာက ရတနာ တစ်ခု ရလိမ့်မယ်လို့ ကောင်းကင်ကြီးက ငါ့ကို အရိပ်အမြွက် ပြနေတာများ ဖြစ်နေမလား..."