အခန်း ၂၄၄

အခန်း ၂၄၄ :ဒီငတုံးငှက်က... ရန်စဖို့တောင် မလိုဘူးပဲ

"မင်း... မင်း ဟင်းလင်းပြင်တာအိုကို နားလည်သဘောပေါက်သွားတာလား"ရွှီဝူဖာထံတွင် အကြွင်းမဲ့ မယုံကြည်နိုင်မှုများ ပြည့်နှက်နေပြီး အက်ရှရှအသံဖြင့် မေးလိုက်သည်။စူးချန်ကဲက ဤသိသာရှင်းလင်းနေသော မေးခွန်းကို တုံ့ပြန်အဖြေမပေးခဲ့ပေ။သူ၏အကြည့်က သူ၏လက်ချောင်းထိပ်ရှိ လှံပေါ်တွင်ပင် ကျရောက်သွားကာ သူက ထိုအရာကို ပေါ့ပေါ့ပါးပါး တစ်ချက်တောက်လိုက်သည်။ဝှစ်....ဟင်းလင်းပြင်လှံသည် မူလက ပြင်းထန်မှုများအားလုံးကို ဆုံးရှုံးသွားပြီး စွန့်ပစ်ခံရသော သတ္တုအပိုင်းအစ တစ်ခုအလား လွင့်စင်သွားကာ လှိုင်းဂယက်တစ်ခုမျှပင် မဖြစ်ပေါ်စေဘဲ မည်းနက်သော ဟင်းလင်းပြင်၏ နက်ရှိုင်းသောနေရာများထဲသို့ တိုးဝင်ပျောက်ကွယ်သွားတော့သည်။ဤပေါ့ပေါ့ပါးပါး လှုပ်ရှားမှုကို အဆုံးသတ်ပြီးနောက် စူးချန်ကဲက နောက်ဆုံးတွင် သူ၏ခေါင်းကို နောက်တစ်ကြိမ် မော့ကြည့်လိုက်ပြီး ရွှီဝူဖာ၏မျက်နှာပေါ်ရှိ အဆက်မပြတ် ပြောင်းလဲနေသော အမူအရာကို ကြည့်လိုက်သည်။သူ၏တည်ငြိမ်သော မျက်လုံးများထဲတွင် ရွှီဝူဖာ၏ နောက်ရှိ မရေမတွက်နိုင်အောင် စီးဆင်းနေသည့် ငွေမီးခိုးရောင် ဟင်းလင်းပြင်သွေးကြောများ ထင်ဟပ်နေပြီး သူက ကျောင်းသုံးစာအုပ်တစ်အုပ်မှ အကောင်းဆုံး အသိပညာများကို လောဘတကြီး စုပ်ယူနေသည့် အာရုံအစိုက်ဆုံး ကျောင်းသားတစ်ဦးအလားပင်။[ကောင်းကင်ဆန့်ကျင် နားလည်သဘောပေါက်နိုင်စွမ်း လှုံ့ဆော်ခံရသည်...ဟင်းလင်းပြင် ဖျက်ဆီးခြင်း ဖွဲ့စည်းပုံကို ခွဲခြမ်းစိတ်ဖြာနေသည်... ဟင်းလင်းပြင် မူလအစတာအိုအပေါ် နားလည်သဘောပေါက်မှု +၁.၅%... +၂%...]သူ၏ထိုးထွင်းသိမြင်မှုများက တသွင်သွင် စီးဆင်းနေသော စမ်းချောင်းများအလား ဖြစ်ပြီး ချောင်းများအဖြစ် စုစည်းကာ မြစ်များအတွင်းသို့ စီးဝင်သွားခဲ့လေသည်။ဟင်းလင်းပြင် ဖျက်ဆီးခြင်း ဂုဏ်သတ္တိ၏ အနှစ်သာရနှင့် ပတ်သက်၍ အမျိုးမျိုးသော နက်နဲသိမ်မွေ့ပြီး မှုန်ဝါးနေသော ဥပဒေသ အမှန်တရားများက ပိုးအိမ်တစ်ခုမှ ပိုးချည်များကို ခွာချလိုက်သည့်အလား သူ၏ နှလုံးသားထဲတွင် ရှင်းလင်းလာသည်။သူက ရွှီဝူဖာ လှံကိုစုစည်းစဉ် အသုံးပြုခဲ့သော ဟင်းလင်းပြင်သွေးကြောများကို လှုံ့ဆော်သည့် နည်းစနစ်ကိုပင် မသိစိတ်မှ အတုခိုးကာ သူ၏ လက်ချောင်းထိပ်ကို စမ်းသပ်သည့်အနေဖြင့် တွန့်ကွေးလိုက်၏။ဝီ...ယခင်ကထက် သိသိသာသာ ပို၍ခိုင်မာပြီး သွက်လက်သော ငွေမီးခိုးရောင် ဟင်းလင်းပြင်စွမ်းအား အစအနလေးတစ်ခုက သူ၏လက်ချောင်းထိပ်တွင် လှည့်ပတ်နေသည်။ ထိုအရာသည် လုံးဝမဖွဲ့စည်းရသေးသော်လည်း စိတ်ဝိညာဉ်ကို တုန်လှုပ်ချောက်ချားစေသော လှိုင်းဂယက်များကို ထုတ်လွှတ်နေလေပြီ။ရွှီဝူဖာ၏မျက်လုံးများ ပြင်းထန်စွာ တုန်ယင်သွားသည်။သူ သေချာမြင်လိုက်ရသည်။ထိုအရာက နယ်ပယ်အတွင်းတွင် လွတ်လပ်နေသော ဟင်းလင်းပြင် စွမ်းအင်များကို ရိုးရိုးရှင်းရှင်း လှုံ့ဆော်နေခြင်း မဟုတ်ဘဲ စစ်မှန်သော ကျွမ်းကျင်မှုဖြင့်ပုံဖော်နေခြင်းပင်။ဤသည်က အခြေခံကျနေသေးသော်လည်း ထိုအရာ၏အနှစ်သာရမှာ သူ ဟင်းလင်းပြင် နတ်ဘုရားစွမ်းရည်များကို အသုံးပြုစဉ်က သူ လှုံ့ဆော်ခဲ့သော ဟင်းလင်းပြင်မူလအစစွမ်းအားနှင့် တူညီသော မူရင်းဇစ်မြစ်ရှိနေသည်။ဤမိစ္ဆာ... သူသည် ဟင်းလင်းပြင် စွမ်းအားကို နားလည်သဘောပေါက်ရုံသာမက နေရာတွင်ပင် သင်ယူနေသလော....ထို့ပြင် သူ၏သင်ယူမှုအရှိန်နှုန်းက မယုံနိုင်လောက်အောင် မြန်ဆန်နေသည်။"မဖြစ်နိုင်ဘူး... ဒါက လုံးဝ မဖြစ်နိုင်ဘူး"ရွှီဝူဖာက သူ၏ရှေ့ရှိ နားလည်မှုကို ချိုးဖျက်သည့် မြင်ကွင်းကို ငြင်းဆိုရန် ကြိုးစားရင်း သူ၏ နှလုံးသားထဲတွင် ရူးသွပ်စွာ အော်ဟစ်နေပေ၏။"ဟင်းလင်းပြင်တာအိုက ငါ့ရဲ့ နတ်ဘုရား ဟင်းလင်းပြင်မျိုးနွယ်စုရဲ့ အခြေခံအုတ်မြစ်ပဲ...အဲ့ဒီအရာက နှစ်တစ်သောင်းကြာအောင် ခါးသီးစွာ ကျင့်ကြံမှုနဲ့ မွေးရာပါ ပါရမီတွေကနေတဆင့် ရရှိတဲ့ သွေးမျိုးဆက်အမွေအနှစ်တစ်ခုပဲ..သူက သာမန်သေမျိုးတစ်ယောက် ဖြစ်ပြီးတော့ အချိန်ခဏလေးအတွင်းမှာ အဲ့ဒီအရာနဲ့ အဆက်အသွယ် ရသွားတာလား..သူက ဘယ်လိုလုပ်ပြီး..."သို့သော် စူးချန်ကဲ၏လက်ချောင်းထိပ်ရှိ ပို၍လျှင်မြတ်သွက်လက်လာပြီး ခိုင်မာလာသော ငွေမီးခိုးရောင် အလင်းရောင်က ကျယ်လောင်သော ပါးရိုက်ချက် တစ်ချက်ပြီးတစ်ချက်အလား သူ၏နားလည်မှုကို ရက်စက်စွာ ရိုက်နှက်နေခဲ့သည်။"ဟင်းလင်းပြင် နတ်ဘုရားစွမ်းရည်တွေကို သုံးတာက ကောင်းကင်ဆန့်ကျင် နားလည်သဘောပေါက်စွမ်းကိုတောင် အရှိန်မြှင့်ပေးနိုင်တယ်ဆိုတော့... တော်တော်လေး အဆင်ပြေပုံရတယ်"စူးချန်ကဲက သူ၏ လေ့ကျင့်မှုရလဒ်များကို စိတ်ကျေနပ်ပုံရကာ သူ၏စိတ်နှလုံးသားထဲတွင် ရေရွတ်လိုက်သည်။ သူ၏လက်ချောင်း တစ်ချက်တောက်လိုက်သည်နှင့် ဟင်းလင်းပြင်စွမ်းအား အစအနလေးက တိတ်ဆိတ်စွာ ပျောက်ကွယ်သွားတော့သည်။ထို့နောက် သူက ရွှီဝူဖာကို ကြည့်လိုက်ရာ သူ၏ လေသံက တည်ငြိမ်နေဆဲ ဖြစ်သော်လည်း သူ၏ မျက်လုံးများတွင် အားပေးမှု အရိပ်အယောင်တစ်ခု အမှန်တကယ်ပင် ထင်ဟပ်လာပြီး သူက မေးမြန်းလိုက်၏။"မင်းမှာ တခြား လှည့်ကွက်တွေ ရှိသေးလား""..."ရွှီဝူဖာ၏အသက်ရှူသံက ရုတ်တရက် လေးလံလာပြီး သူ၏ရင်ဘတ်က ပြင်းထန်စွာ နိမ့်ချည်မြင့်ချည် ဖြစ်နေသည်။အရှက်ရမှု...ဗြောင်ကျကျ အရှက်ရမှု...ပြိုင်ဘက်က သူ၏ အဓိက အခြေခံအုတ်မြစ်ကို ချက်ချင်းသင်ယူရုံသာမက သူ့ကို သင်ထောက်ကူ ပစ္စည်းတစ်ခုအဖြစ်ပင် သဘောထားနေသလော..."ပုရွက်ဆိတ်ကောင်..."ရွှီဝူဖာက ဤစကားလုံးများကို သူ၏သွားများကြားမှ ညှစ်ထုတ်လိုက်ရာ စကားလုံးတစ်လုံးချင်းစီက အရိုးထိအောင် နက်ရှိုင်းသော သတ်ဖြတ်လိုခြင်းစိတ်ဆန္ဒနှင့် ဒေါသတို့ဖြင့် ပြည့်နှက်နေသည်။"မင်းက သေချင်နေတာပဲ"သူ မည်သည့်အရာကိုမျှ ထိန်ချန်မထားတော့ချေ။ရွှီဝူဖာသည် လုံးလုံးလျားလျား ရူးသွပ်သွားခဲ့လေပြီ။သူ လက်မခံနိုင်ခဲ့ချေ။သူ၏မာန်မာနနှင့် အခြေခံအုတ်မြစ်အဖြစ် သူ သတ်မှတ်ထားသော ဟင်းလင်းပြင်တာအိုကို လူသား တစ်ယောက်က ဤမျှထိ လွယ်လင့်တကူ ထွင်းဖောက်မြင်သွားသည်ကို သူ လက်မခံနိုင်ခဲ့ပေ။"ဟင်းလင်းပြင် ဓားသွားအသင်္ချေ...""ဟင်းလင်းပြင် လှောင်ချိုင့်...""အတိုင်းအတာ ဖြတ်တောက်ခြင်း...""ဖရိုဖရဲ ပြည်နှင်ဒဏ်ပေးခြင်း..."ရွှီဝူဖာက ရူးသွပ်နေသော မိစ္ဆာတစ်ကောင်အလား ဖြစ်နေပြီး သူ၏နံဘေးပတ်လည်ရှိ ရွှေရောင်ရင့်ရင့် နတ်ဘုရားအလင်းတန်းနှင့် ငွေမီးခိုးရောင် ဟင်းလင်းပြင် သွေးကြောများက အဆုံးစွန်အထိ တလိမ့်လိမ့်ထလာကာ သူ၏လက်များက ရူးသွပ်စွာ လူးလွန့်နေပေ၏။ပုံစံအမျိုးမျိုးရှိသည့် ဟင်းလင်းပြင်သတ်ဖြတ်ခြင်း နတ်ဘုရားစွမ်းရည်များ တစ်ခုပြီးတစ်ခု ထွက်ပေါ်လာပြီး တစ်ခုစီတိုင်းက ထပ်တူထပ်မျှ ကြောက်မက်ဖွယ်ကောင်းနေသည်။ ထိုအရာများသည် မည်သည့်တန်ကြေးမျှ မကုန်ကျသည့်အလား ထွက်ပေါ်လာသည်။မရေမတွက်နိုင်သော သေးငယ်သည့် ဟင်းလင်းပြင် အက်ကွဲကြောင်းများဖြင့် ဖွဲ့စည်းထားသော ဖျက်ဆီးနိုင်သည့် မုန်တိုင်းတစ်ခုက လည်ပတ်နေပြီး လွှမ်းမိုးချုပ်ကိုင်နိုင်စွမ်းကြီးမားသည်။ ထိုမုန်တိုင်း ဖြတ်သန်းသွားသော နေရာတိုင်းတွင် အမှောင်ထုပင်လျှင် အပိုင်းပိုင်းအစစ ဆုတ်ဖြဲခံလိုက်ရသည်။ရွှီဝူဖာသည် စူးချန်ကဲကို ဖိနှိပ်သတ်ဖြတ်ရန် ကြိုးစားနေသဖြင့် မယုံနိုင်လောက်အောင် ခိုင်မာသော ဟင်းလင်းပြင် အတားအဆီးများနှင့် လှောင်ချိုင့်များက လေထုထဲမှ ဖြစ်ပေါ်လာပေ၏။တိုက်ခိုက်မှုတချို့က စူးချန်ကဲ မတ်တတ်ရပ်နေသော ဟင်းလင်းပြင်ကို တိုက်ရိုက်ခွဲထုတ်ရန် ကြိုးစားခဲ့ကြသည်။သူက အမည်မသိ ဖရိုဖရဲနေရာတစ်ခုသို့ ဦးတည်နေသော အက်ကွဲကြောင်းတစ်ခုကိုပင် အတင်းအကျပ် ဆုတ်ဖြဲဖွင့်လိုက်ရာ ကြောက်မက်ဖွယ်ကောင်းသော စုပ်ယူမှုဖြင့် ပေါက်ကွဲထွက်လာပြီး စူးချန်ကဲကို ထာဝရမရှိခြင်းထဲသို့ ပြည်နှင်ဒဏ်ပေးရန် ဆန္ဒရှိနေခဲ့သည်။ဤအချိန်အခိုက်အတန့်တွင် ဟင်းလင်းပြင်နတ်ဘုရား နယ်ပယ်သည် ငရဲဘုံတစ်ခုအဖြစ် ပြောင်းလဲသွားပုံရသည်။မရေမတွက်နိုင်သော ဖျက်ဆီးနိုင်သည့် ဟင်းလင်းပြင် စွမ်းအား အမျိုးအစားများက ဤနယ်ပယ်အတွင်းတွင် ရူးသွပ်စွာ တလိမ့်လိမ့်ထနေခဲ့သည်။ဤနယ်ပယ်ကို ရွှီဝူဖာက ထိန်းချုပ်မထားဘဲ အလွန် တည်ငြိမ်မှု မရှိခဲ့ပါက ဤနတ်ဘုရားစွမ်းရည်များ၏ နောက်ဆက်တွဲ သက်ရောက်မှုသက်သက်က ကမ္ဘာအသင်္ချေ၏ ဟင်းလင်းပြင်ကို အပိုင်းပိုင်းအစစ ဆုတ်ဖြဲရန် လုံလောက်ပေမည်။ရွှီဝူဖာက တန်ကြေးပေးဆပ်ရမှု သို့မဟုတ် စွမ်းအားကုန်ဆုံးမှုကို ဂရုမစိုက်တော့ချေ။သူ၏စိတ်ထဲတွင် အတွေးတစ်ခုတည်းသာ ရှိတော့သည်။ ဤသည်မှာ ထိုမိစ္ဆာကို သတ်ဖြတ်ရန်ပင်။တစ်ဖက်လူကို ခြေမွှဖျက်ဆီးပစ်ရန်အတွက် သူ အကျွမ်းကျင်ဆုံးနှင့် ဂုဏ်ယူရဆုံးဖြစ်သော ဟင်းလင်းပြင်စွမ်းအားကို အသုံးပြုရပေမည်။ဤသည်မှာ နတ်ဘုရားဟင်းလင်းပြင်မျိုးနွယ်စု၏ အမြင့်မားဆုံးစွမ်းအားကို သက်သေပြရန်ပင်။မည်သည့် ဟင်းလင်းပြင် တာအိုနယ်ပယ် ကျွမ်းကျင်သူကိုမဆို မျက်တောင်တစ်ခတ်အတွင်း အကြိမ် ထောင်ပေါင်းများစွာ ကျရှုံးသွားစေနိုင်သော ဤလောကကြီးကို ဖျက်ဆီးမည့် ပြင်းထန်သော တိုက်ခိုက်မှုကို ရင်ဆိုင်ရချိန်၌...စူးချန်ကဲ၏အမူအရာက တည်ငြိမ်နေဆဲ ဖြစ်ပြီး သူအနည်းငယ်ပင် စိတ်လှုပ်ရှားနေခဲ့သည်။ဒီငတုံးငှက်က... ငါ သူ့ကို ရန်စဖို့တောင် မလိုဘူးပဲ...ရုတ်ချည်းဆိုသလိုပင် စူးချန်ကဲက သူ၏မျက်လုံးများကို ပိတ်လိုက်ပြီး သူ၏ ကောင်းကင်ဆန့်ကျင် နားလည်နိုင်စွမ်းကို အပြည့်အဝ အသက်သွင်းလိုက်သည်။ရွှီဝူဖာထံမှ လှုပ်ရှားမှုတိုင်းနှင့် နတ်ဘုရားစွမ်းရည် တိုင်းက မတူညီသောပုံစံများနှင့် သဘာဝများရှိသည့် ဟင်းလင်းပြင် သွေးကြောများကို လှုံ့ဆော်ခဲ့လေ၏။တုန်ခါမှု အကြိမ်အရေအတွက်များ၊ ယှက်နွယ်နေသော ပုံစံများနှင့် ထိုသွေးကြောများ၏ စွမ်းအင် စီးဆင်းမှု လမ်းကြောင်းများစသဖြင့် အသေးစိတ်ဆုံး အပြောင်းအလဲများအားလုံးက သူ၏ကောင်းကင်ဆန့်ကျင် နားလည်နိုင်စွမ်း၏ ကြောက်မက်ဖွယ်ကောင်းသော ခွဲခြမ်းစိတ်ဖြာမှု စွမ်းအားအောက်တွင် ပုန်းအောင်းရန် နေရာမရှိခဲ့ပေ။[ကောင်းကင်ဆန့်ကျင် နားလည်နိုင်စွမ်း အသက်ဝင်နေသည်...'ဟင်းလင်းပြင် ဓားသွားအသင်္ချေ' ၏ ဖွဲ့စည်းပုံကို လေ့လာစောင့်ကြည့်ခြင်း..ဟင်းလင်းပြင် မူလအစကို ထိတွေ့ခြင်း... နားလည်သဘောပေါက်မှု +၃%...][ကောင်းကင်ဆန့်ကျင် နားလည်နိုင်စွမ်း အသက်ဝင်နေသည်...'ဟင်းလင်းပြင် လှောင်ချိုင့်' တည်ဆောက်မှုကို လေ့လာစောင့်ကြည့်ခြင်း... ဟင်းလင်းပြင် မူလအစကို ထိတွေ့ခြင်း... နားလည်သဘောပေါက်မှု +၂.၅%...][ကောင်းကင်ဆန့်ကျင် နားလည်နိုင်စွမ်း အသက်ဝင်နေသည်... အတိုင်းအတာ ဖြတ်တောက်ခြင်း၏ လှိုင်းဂယက်များကို ခွဲခြမ်းစိတ်ဖြာခြင်း...ဟင်းလင်းပြင် မူလအစကို ထိတွေ့ခြင်း...နားလည်သဘောပေါက်မှု +၄% ][ကောင်းကင်ဆန့်ကျင် နားလည်နိုင်စွမ်း အသက်ဝင်နေသည်...ဖရိုဖရဲ ပြည်နှင်ဒဏ်ပေးခြင်း၏ စွမ်းအားကို အာရုံခံခြင်း...ဟင်းလင်းပြင် မူလအစကို ထိတွေ့ခြင်း...နားလည်သဘောပေါက်မှု +၃.၅%...]ထိုးထွင်းသိမြင်မှု အမြောက်အများက သူ့ထံသို့ ရူးသွပ်စွာ ဝင်ရောက်လာခဲ့သည်။ဟင်းလင်းပြင် မူလအစ တာအိုအပေါ် စူးချန်ကဲ၏ နားလည်မှုက ယခင်က မရှိခဲ့ဖူးသော အရှိန်အဟုန်ဖြင့် မြင့်တက်သွားသည်။အစပိုင်း အသိပညာမဲ့ဝင်ရောက်မှုမှ လျှင်မြန်စွာ ရင်းနှီးကျွမ်းဝင်မှုသို့ ရောက်ရှိလာပြီးနောက် ဥပဒေသ၏ နက်ရှိုင်းသော အမှန်တရားများကို သူ စတင်၍ ထိတွေ့နိုင်ခဲ့သည်။ ထို့ပြင် သူက ထိုနတ်ဘုရားစွမ်းရည်များကို လက်ခံနေခြင်းသက်သက်မဟုတ်ဘဲ စတင်အသုံးပြုရန် ကြိုးစားလာခဲ့သည်။ရွှီဝူဖာကို ရင်ဆိုင်ရန်အတွက် သူ ယခုလေးတင် နားလည်သဘောပေါက်ထားသော ဟင်းလင်းပြင် နတ်ဘုရားစွမ်းရည်ကို အသုံးပြုလိုက်၏။ဝှစ်...လွှမ်းမိုးချုပ်ကိုင်နိုင်သော ဟင်းလင်းပြင် ဓားသွားအသင်္ချေ မုန်တိုင်းကို ရင်ဆိုင်ရသောအခါ စူးချန်ကဲက သူ၏လက်ချောင်းများကို ဓားတစ်လက်အလား ညွှန်ပြလိုက်သည်။ ငွေမီးခိုးရောင် အလင်းတန်းတစ်တန်းက သူ၏ လက်ချောင်းထိပ်များတွင် လင်းလက်သွားပြီး သွယ်လျသော်လည်း မယုံနိုင်လောက်အောင် စုစည်းနေသော ဟင်းလင်းပြင် ဖြတ်တောက်ခြင်း လှိုင်းတစ်ခု ပျံ့လွင့်သွားသည်။ ထိုအရာသည် ထိပ်တိုက်တိုက်မိမည့်အစား မုန်တိုင်း၏ စွမ်းအင်စီးဆင်းမှုမှ အဓိကအမှတ်များစွာကို တိကျစွာ ရိုက်ခတ်သွားပေ၏။ရုတ်ချည်းဆိုသလိုပင် ထိုဖြေရှင်း၍မရနိုင်ပုံရသော ဓားသွားမုန်တိုင်းအတွင်းရှိ စွမ်းအင် လည်ပတ်မှုက ဖရိုဖရဲ ဖြစ်သွားပြီး ပေါက်ကွဲသံတစ်သံနှင့်အတူ ထက်ဝက်ကျော် ပြိုလဲကျသွားသည်။ဝုန်း...လွှမ်းမိုးချုပ်ကိုင်နိုင်ကာ အလွှာလိုက်ရှိနေသော ဟင်းလင်းပြင် လှောင်ချိုင့်များကို ရင်ဆိုင်ရသောအခါ စူးချန်ကဲက လေထဲတွင် သူ၏လက်များကို ဝှေ့ယမ်းပြီး ဟင်းလင်းပြင်စည်းချက်နှင့် လိုက်ဖက်သော ငွေမီးခိုးရောင် မှော်စာလုံးတချို့ကို ပုံဖော်ကာ ထိုအရာများကို လှောင်ချိုင့်နံရံများပေါ်သို့ စည်းတံဆိပ်ခတ်နှိပ်လိုက်သည်။မူလက မယုံနိုင်လောက်အောင် ခိုင်မာသော ဟင်းလင်းပြင် အတားအဆီးများက ပြင်းထန်စွာ လှိုင်းထသွားပြီး ထိုအရာများ၏ဖွဲ့စည်းပုံက အလွန်မတည်မငြိမ် ဖြစ်လာကာ ပိတ်လှောင်ခြင်း စွမ်းအားက အကြီးအကျယ် လျော့ကျသွားတော့သည်။"ချိုးဖျက်စမ်း "ထူးဆန်းသော အတိုင်းအတာ ဖြတ်တောက်ခြင်းစွမ်းရည်ကို ရင်ဆိုင်ရသောအခါ စူးချန်ကဲက မျက်မှောင် အနည်းငယ် တွန့်ကွေးသွားသည်။သူက သူ၏လက်ကို မြှောက်ကာ ပုံမှန်မဟုတ်ဘဲ လှိုင်းထနေသော ဟင်းလင်းပြင်ကို ညင်သာစွာ ဖိနှိပ်လိုက်၏။ ဖရိုဖရဲ ဖြစ်သော်လည်း ကျယ်ပြန့်သော ဟင်းလင်းပြင် လှိုင်းဂယက်တစ်ခု ပေါက်ကွဲထွက်လာပြီး ထိုအရာကို အတင်းအကျပ် ဝင်ရောက် နှောင့်ယှက်၍ သွေဖည်သွားစေပြီး လေထဲသို့သာ ခုတ်ပိုင်းမိသွားစေခဲ့သည်။