အခန်း ၂၁၈

အခန်း (၂၁၈) စွမ်းအားက အသိအမှတ်ပြုမှုကို ရယူနိုင်ခြင်း

"သောက်နှာဘူး..."

"သေချင်နေတာလား..."

ကျောက်လင်၏ စကားများကို ကြားလိုက်ရသောအခါ လုယွီပင်း၊ လုထင်ရွှယ်နှင့် လုနင်ရွှမ်းတို့မှာ ဒေါသထွက်သွားကြ၏။

ညီအစ်မသုံးယောက်သည် ကျောက်လင်က အလွန်မျက်နှာပြောင်တိုက်လွန်းကြောင်းနှင့် ဆဲဆိုရုံဖြင့် မောင်းထုတ်၍မရနိုင်ကြောင်းကို သဘောပေါက်သွားကြသည်။

ထိုအခါ သူတို့ကို တိုက်ခိုက်မောင်းထုတ်ရန်မှလွဲ၍ အခြား ရွေးချယ်စရာ မရှိတော့ပေ။

ဝှစ်…

လူသုံးယောက်သည် သူတို့၏ ဓားရှည်များကို တပြိုင်နက်တည်း ဆွဲထုတ်လိုက်ကြရာ ဓားသွားများမှ အေးစက်သော အငွေ့အသက်များ တောက်ပနေ၏။

သူတို့သုံးယောက်လုံးသည် ရှေးဟောင်းသိုင်းပညာရှင် မိသားစုများမှ ဆင်းသက်လာကြပြီး အဂ္ဂိရတ်ပညာရှင်များထံမှ အထူးမှာယူထားသည့် ဓားရှည်များကို အသုံးပြုကြကြောင်း ရှင်းလင်းစွာ သိသာနေသည်။

ဓား၏ သတ္တုကပင် မူလကတည်းက ရေခဲစွမ်းအင်ကို ပိုင်ဆိုင်ထား၏။

တစ်နည်းဆိုရသော် ထိုသုံးယောက် ဓားဝှေ့ယမ်းလိုက်သည့်အခါ အေးစက်သော အငွေ့အသက်များ ထွက်ပေါ်လာပြီး အလွန် အန္တရာယ်များလှသည်။

"ဇနီးချောလေးသုံးယောက်... ကိုယ်နဲ့ တကယ်ပဲ တိုက်ချင်နေကြတာလား..."

ကျောက်လင်က ပြုံး၍ ပြောလိုက်၏။

ထိုစကားကို ကြားသောအခါ လုယွီပင်း၊ လုထင်ရွှယ်နှင့် လုနင်ရွှမ်းတို့ ပို၍ပင် ဒေါသထွက်သွားကြသည်။

မည်သည့်အရာမျှ အတည်မပြုရသေးမီမှာပင် ကျောက်လင်က သူတို့ကို ဇနီးဟု ခေါ်နေခြင်းအား မည်သူက သည်းခံနိုင်မည်နည်း။

“သတ်..”

သူတို့သုံးယောက်သည် တစ်ပြိုင်နက်တည်း တိုက်ခိုက်လိုက်ကြပြီး တူညီသော ဓားသိုင်းကို အသုံးပြုကာ ခြေလှမ်းများကိုလည်း ဟန်ချက်ညီညီ လှမ်းလိုက်ကြ၏။ သူတို့ ဓားဖြင့် ထိုးနှက်လိုက်သည့်အခါ အေးစက်သော အလင်းတန်းသုံးခု ထွက်ပေါ်လာပြီး ကျောက်လင်၏ ရင်ဘတ်ဆီသို့ တိုက်ရိုက် ဦးတည်သွားသည်။

"မင်းတို့နဲ့အတူ ငါ ကစားပေးရသေးတာပေါ့..."

ကျောက်လင်က ခပ်ဖွဖွ ပြုံးလိုက်၏။

ထိုအခိုက်တွင် ကျောက်လင်သည်လည်း သတ္တုစပ်ထန်ဓားကို ဆွဲထုတ်လိုက်ပြီး သွေးနတ်ဘုရားဓား၏ စတုတ္ထအဆင့်ဖြစ်သော သွေးမြစ်တေးသံကို ထုတ်ဖော်လိုက်သည်။

ဤဟန်ကွက်ကို ရန်သူအား တိုက်ခိုက်ရာတွင် အသုံးပြုပါက အလွန်သေစေနိုင်လောက်ပြီး တိုက်ခိုက်မှုတိုင်းက သွေးထွက်စေမည် ဖြစ်သည်။

သို့သော် ကျောက်လင်သည် အမြွှာသုံးယောက်ကို ထိခိုက်စေလိုသော ရည်ရွယ်ချက်မရှိသဖြင့် သွေးမြစ်တေးသံကို ကာကွယ်ရေးဟန်ကွက်အဖြစ် ပြောင်းလဲလိုက်၏။

ထန်ဓားသည် သူ၏ ရင်ဘတ်ရှေ့တွင် လျှပ်တစ်ပြက် လှုပ်ရှားသွားပြီး သွေးရောင် အလင်းနှင့် အရိပ်တို့ကို ဖန်တီးလိုက်သည်။

လုယွီပင်း၊ လုထင်ရွှယ်နှင့် လုနင်ရွှမ်းတို့၏ ဓားရှည်များက သွေးရောင် အလင်းနှင့် အရိပ်ကို ထိုးဖောက်ဝင်ရောက်သွားသောအခါ အေးစက်သော လေများ ပေါက်ကွဲထွက်လာပြီး အဖြူရောင်ရေခဲနှင့် ဆီးနှင်းအလွှာများ ဖုံးလွှမ်းသွား၏။

သို့သော် မျက်တောင်တစ်ခတ်အတွင်းမှာပင် နီရဲသော အလင်းတန်းများက နေမင်းကြီး ဆင်းသက်လာသကဲ့သို့ ဖြစ်ပေါ်လာပြီး ရေခဲနှင့် ဆီးနှင်းများကို ချက်ချင်းပင် လုံးဝ အငွေ့ပျံသွားစေသည်။

ကျောက်လင်၏ ကျင့်စဉ်ဖြစ်သော ဟောက်ယန်ကျင့်စဉ်သည် မူလကတည်းက အမြင့်မြတ်ဆုံး ယန်လမ်းစဉ်ဖြစ်ပြီး မီးစွမ်းအင်၏ အမြင့်ဆုံးအဆင့်အဖြစ် သတ်မှတ်ခံထားရ၏။

ထို့ကြောင့် ကျောက်လင်၏ သွေးမြစ်တေးသံတွင် ပြင်းထန်သော မီးဝိညာဉ်စွမ်းအင်များ ပါဝင်နေပြီး အမျိုးသမီးသုံးယောက်၏ ရေခဲဝိညာဉ်စွမ်းအင်ကို အလွယ်တကူ ဖယ်ရှားပစ်နိုင်ခဲ့သည်။

"နင်..."

လုယွီပင်း၊ လုထင်ရွှယ်နှင့် လုနင်ရွှမ်းတို့သည် ကျောက်လင်၏ စွမ်းအားကို ချက်ချင်း ခံစားလိုက်ရ၏။

ထို့အပြင် သူတို့၏ ရေခဲခန္ဓာကိုယ်ကို ကျောက်လင်က ခုလေးတင် ဖိနှိပ်နိုင်ခဲ့ကြောင်းကိုပါ သုံးယောက်လုံး နားလည်သွားကြသည်။

အတိတ်က ညီအစ်မသုံးယောက် ပူးပေါင်းလိုက်သောအခါ မည်သည့် ရွှေခန္ဓာနယ်ပယ် ကျွမ်းကျင်သူမှ တစ်ချက်တည်းနှင့်ပင် မခံနိုင်ခဲ့ပေ။

ယွီလုံခရိုင်ရှိ ချီလင်အကယ်ဒမီသည် လျန်ရှီးစီရင်စုတွင် နံပါတ်တစ် အကယ်ဒမီဟု ကြွေးကြော်နိုင်ခြင်း၏ အကြောင်းရင်းမှာ ညီအစ်မသုံးယောက်၏ ပေါင်းစပ်စွမ်းအားကို အခြား မည်သည့် အကယ်ဒမီမှ နည်းပြများကမျှ မယှဉ်နိုင်သောကြောင့် ဖြစ်သည်။

သို့သော် ယနေ့တွင် ညီအစ်မသုံးယောက်က ကျောက်လင်နှင့် တွေ့ဆုံခဲ့ရ၏။

"ဇနီးချောလေးသုံးယောက်က တော်တော်လေး စွမ်းပေမဲ့ ခင်ပွန်းဖြစ်သူနဲ့ တွေ့တဲ့အခါကျတော့ နည်းနည်းလေး လိုနေသေးတယ်..."

ထို့နောက် ကျောက်လင်က ပြုံး၍ မှတ်ချက်ချလိုက်သည်။

ချက်ချင်းပင် လုယွီပင်း၊ လုထင်ရွှယ်နှင့် လုနင်ရွှမ်းတို့မှာ အလွန် ဒေါသထွက်သွားကြ၏။

မျက်တောင်တစ်ခတ်အတွင်း သူတို့သုံးယောက်သည် ဓားများကို ထပ်မံ ဝှေ့ယမ်းလိုက်ပြီး လျင်မြန်သော ခြေလှမ်းများကို တစ်ပြိုင်နက်တည်း အသုံးပြုလိုက်ကြသည်။ သူတို့သည် သုံးယောက်တစ်စု တိုက်ခိုက်ရေးစစ်ကြောင်းကို ဖွဲ့စည်းလိုက်ကြပြီး နေရာသုံးခုတွင်ရပ်ကာ ကျောက်လင်ကို အလယ်တွင် ဝိုင်းထားလိုက်ကြ၏။

သူတို့သုံးယောက်၏ အဓိပ္ပာယ်မှာ ကျောက်လင်သည် နေရာတစ်နေရာမှ ကာကွယ်နိုင်လျှင်တောင် သူတို့သုံးယောက်က သုံးနေရာမှ တစ်ပြိုင်နက်တည်း တိုက်ခိုက်ပါက မည်သို့မျှ ကာကွယ်နိုင်မည် မဟုတ်ဟူ၍ ဖြစ်သည်။

ရွှီး... ရွှီး... ရွှီး….

ဓားရှည်သုံးလက်က ကျောက်လင်၏ ခန္ဓာကိုယ်ကို တစ်ပြိုင်နက်တည်း ထိုးနှက်လိုက်၏။

"ဒီလိုဇနီးချောလေးသုံးယောက်က ကိုယ့်ကို အနိုင်ကျင့်နေမှတော့ ကိုယ်လည်း ယဉ်ကျေးနေတော့မှာ မဟုတ်ဘူးနော်..."

ကျောက်လင်က တည်ငြိမ်စွာ ပြောလိုက်သည်။

ရုတ်တရက် ကျောက်လင်သည် လုယွီပင်းထံသို့ ပြင်းထန်စွာ ပြေးဝင်သွားပြီး သူ၏ သတ္တုစပ်ထန်ဓားမှာ လျှပ်စီးကဲ့သို့ လျင်မြန်စွာ လှုပ်ရှားသွား၏။

သွေးမြစ်တေးသံ၏ စစ်မှန်သော တိုက်ခိုက်ရေးစွမ်းအားများ ထွက်ပေါ်လာသည်။

ဓားသွားအတွင်း စစ်သည်နှင့် မြင်းထောင်ပေါင်းများစွာကဲ့သို့ စွမ်းအားများက တဟုန်ထိုး ထွက်ပေါ်လာ၏။

လုယွီပင်း၏ ဓားရှည်က တိုက်ခိုက်လာစဉ် သတ္တုစပ်ထန်ဓားနှင့် ထိမိသည်နှင့် တစ်ပြိုင်နက် သူမ၏ လက်ထဲမှ လွင့်ထွက်သွားသည်။

ဤအခွင့်အရေးကို အသုံးချကာ ကျောက်လင်သည် လုယွီပင်း၏ ဘေးသို့ အပြေးအလွှား သွားလိုက်ပြီး သူမ၏ လည်ပင်းကို ဘယ်ဘက်လက်ဖြင့် ရစ်ပတ်ကာ သူ၏ ရှေ့တွင် အကာအကွယ်အဖြစ် ထားလိုက်၏။

လုထင်ရွှယ်နှင့် လုနင်ရွှမ်းတို့ ဓားများဖြင့် ထိုးနှက်လိုက်ချိန်တွင် သူတို့၏ ဓားသွားများသည် လုယွီပင်း၏ ခန္ဓာကိုယ်ကို ထိုးမိတော့မည်ဖြစ်ကြောင်း သတိပြုမိသွားသဖြင့် ဓားများကို အမြန် ပြန်ရုတ်လိုက်ကြသည်။

ထိုအချိန်တွင် ကျောက်လင်က သူ၏ ဘယ်ဘက်လက်ဖြင့် လုယွီပင်း၏ ပါးပြင်ကို ကိုင်တွယ်လိုက်ပြီးနောက် ကျားတစ်ကောင်ကဲ့သို့ ခုန်အုပ်လိုက်၏။ လုထင်ရွှယ်က သူမ၏ ဓားကို ဓားအိမ်ထဲသို့ ပြန်ထည့်လိုက်ချိန်တွင် သူမ၏ ဘေးသို့ ထပ်မံ ခုန်အုပ်သွားပြီး လုထင်ရွှယ်၏ လည်ပင်းကို ဘယ်ဘက်လက်ဖြင့် ဖမ်းညှစ်ထားလိုက်သည်။

"အယုတ်တမာကောင်... ငါ့ကို လွှတ်စမ်း..."

လုယွီပင်းမှာ ယောက်ျားတစ်ယောက်နှင့် ဤမျှ နီးကပ်စွာ နေရခြင်းမှာ ပထမဆုံးအကြိမ်ဖြစ်ပြီး သူမသည် အလွန် ဒေါသထွက်နေ၏။

"ကောင်းပါပြီ... ဇနီးလေးစကားကို နားထောင်ရမှာပေါ့..."

ကျောက်လင်က ပြုံး၍ ပြန်ဖြေလိုက်ပြီးနောက် လုယွီပင်း၏ ပါးပြင်ကို ပေါ့ပေါ့ပါးပါး ကိုင်တွယ်လိုက်ကာ လုနင်ရွှမ်းဆီသို့ ထပ်မံ ပြေးသွားပြန်၏။

"အယုတ်တမာကောင်... သေဖို့သာ ပြင်ထားတော့..."

ကျောက်လင်က သူမ၏ အစ်မနှစ်ယောက်၏ ပါးပြင်များကို ဆက်တိုက် ကိုင်တွယ်လိုက်သည်ကို မြင်သောအခါ လုနင်ရွှမ်းမှာ ဒေါသထွက်သွားသည်။ ကျောက်လင်က သူမထံသို့ ထပ်မံ ပြေးလာသည်ကို မြင်လိုက်ရသဖြင့် သူမ၏ ဓားရှည်ကို ပိုမို လျင်မြန်စွာ ဝှေ့ယမ်းလိုက်၏။

သို့သော် ကျောက်လင်၏ သတ္တုစပ်ထန်ဓားကလည်း ထိုနည်းတူ လျင်မြန်လှသည်။ လက်တစ်ချက် ခါယမ်းလိုက်ရုံဖြင့် လုနင်ရွှမ်း၏ ဓားရှည်ကို လွင့်ထွက်သွားစေ၏။

စိတ်စွမ်းအား အာရုံခံနိုင်စွမ်းဖြင့် ကျောက်လင်သည် လုနင်ရွှမ်း၏ တိုက်ခိုက်ရေး လမ်းကြောင်းကို လုံးဝ ဖမ်းယူနိုင်ခဲ့ပြီး ထန်ဓားဖြင့် ဓားရှည်ကို အလွယ်တကူ ကာကွယ်နိုင်ခဲ့သည်။

"နင်…”

လုနင်ရွှမ်းမှာ မှင်တက်သွား၏။

သူမက ရွှေခန္ဓာနယ်ပယ် အထွတ်အထိပ်တွင်ရှိသော ကျွမ်းကျင်သူတစ်ယောက် ဖြစ်သော်လည်း သူမ၏ ဓားရှည်က ဟန်ကွက်တစ်ကွက်တည်းနှင့် လက်ထဲမှ လွတ်ကျသွားခဲ့သည်လား။

ကျောက်လင်က ရယ်မောလိုက်ပြီး လုနင်ရွှမ်း၏ လည်ပင်းကို ဖမ်းညှစ်မည့်အစား သူမ၏ ပါးပြင်ကိုသာ ကိုင်တွယ်လိုက်၏။

မျက်တောင်တစ်ခတ်အတွင်း ကျောက်လင်သည် အမြွှာသုံးယောက်လုံး၏ မျက်နှာများကို ကိုင်တွယ်ခဲ့သည်။

"ဇနီးချောလေးတို့... ဆက်တိုက်ကြဦးမလား..."

ကျောက်လင်က ပြုံး၍ မေးလိုက်၏။

လုယွီပင်း၊ လုထင်ရွှယ်နှင့် လုနင်ရွှမ်းတို့က ကျောက်လင်အား ဒေါသတကြီး စိုက်ကြည့်လိုက်ကြသည်။

သို့သော် သူတို့သုံးယောက်လုံး တိုက်ခိုက်မှုကို ရပ်တန့်လိုက်ကြ၏။

ကျောက်လင်က သူတို့ထက် ပိုမို အားကောင်းကြောင်းကို သုံးယောက်လုံး နားလည်သွားကြသည်။

အကယ်၍ ကျောက်လင်သာ အင်အား လျှော့မထားပါက သူတို့သုံးယောက်လုံး သေနေလောက်ပြီ ဖြစ်သည်။

"အယုတ်တမာကောင်... ငါတို့က နင့်ကို မနိုင်ဘူး... ဒါကြောင့် ငါတို့ကို စော်ကားတာမျိုး မလုပ်ပါနဲ့..."

"ငါတို့ညီအစ်မသုံးယောက်က သိုင်းပညာ ကျင့်ကြံဖို့ပဲ ရည်စူးထားတာမို့ အိမ်ထောင်ပြုမှာ မဟုတ်ဘူး..."

လုယွီပင်းက အေးစက်သော အမူအရာဖြင့် ပြောလိုက်၏။

ညီအစ်မသုံးယောက်၏ စိတ်နေသဘောထားမှာ သူတို့၏ သဘာဝ ရေခဲခန္ဓာကိုယ်ကဲ့သို့ပင် အရိုးထဲထိအောင် အေးစက်နေပြီး အချစ်ရေးအပေါ် လုံးဝ စိတ်မဝင်စားကြပေ။

"ဒါကတော့ ပြောရခက်တယ်လေ..."

"ကိုယ့်ရဲ့ သတ်မှတ်ချက်တွေကို ပေးထားပြီးပြီ... မင်းတို့သာ ကိုယ့်ကို လက်ထပ်မယ်ဆိုရင် မင်းတို့သုံးယောက် တစ်လအတွင်း ကျောက်စိမ်းဗိမာန်နယ်ပယ်ကို ရောက်အောင် ကူညီပေးမယ်လို့ ကိုယ် ကျောက်လင်က အာမခံတယ်..."

ကျောက်လင်က တည်ငြိမ်စွာ ပြောလိုက်၏။

"ထွက်သွားစမ်း..."

ညီအစ်မသုံးယောက်က တစ်သံတည်း ထပ်မံ အော်ဟစ်လိုက်ကြသည်။

ကျောက်လင်က ရယ်မောလိုက်ပြီး လှည့်ထွက်သွားကာ အချေအတင် ဆက်ပြောရန် အာရုံမစိုက်တော့ပေ။

စကားပုံတစ်ခုရှိသည် မဟုတ်ပါလား။ ရန်မဖြစ်ဘဲ မိတ်ဆွေမဖြစ်နိုင်ဟူ၍။

၎င်းမှာ ပထမဆုံး တွေ့ဆုံခြင်းသာ ဖြစ်သောကြောင့် ညီအစ်မသုံးယောက်က သူ့ကို လက်ထပ်ရန် မည်သို့ သဘောတူနိုင်မည်နည်းဆိုသည်ကို ကျောက်လင်က သဘာဝကျကျ သိရှိထား၏။

သို့သော် တိုက်ခိုက်ပြီးနောက် ညီအစ်မသုံးယောက်က သူ့ကို မှတ်မိသွားလိမ့်မည်ဟု ကျောက်လင် ယုံကြည်သည်။

နောက်ပိုင်းတွင် ညီအစ်မသုံးယောက်နှင့် နီးကပ်စွာ နေနိုင်ရန်နှင့် သူတို့၏ အသိအမှတ်ပြုမှုကို ရယူနိုင်ရန် ဆက်တိုက် ကြိုးပမ်းရမည့် နည်းလမ်းများစွာ ကျောက်လင်တွင် ရှိနေ၏။

"ဒီကောင်က တော်တော် သန်မာတာပဲ..."

"ဒီကောင်က ဘယ်ကရောက်လာတာလဲ... ဘယ်လိုလုပ် ဒီလောက်တောင် သန်မာရတာလဲ..."

"လုမိသားစုက အားအကောင်းဆုံး နည်းပြသုံးယောက်တောင် သူ့ကို မယှဉ်နိုင်ဘူးဆိုတော့ ဒီကောင်က ဘယ်လို သတ္တဝါကြီးလဲ..."

ယွီလုံခရိုင်ရှိ ချီလင်အကယ်ဒမီမှ နည်းပြများနှင့် ကျောင်းသားများသည် ကျောက်လင်က လုညီအစ်မသုံးယောက်ကို အနိုင်ကျင့်နေသည်ကို မြင်တွေ့ပြီးနောက် အလွန်တုန်လှုပ်သွားကြပြီး ကျောက်လင်အပေါ် ကြောက်ရွံ့လေးစားစိတ်များ ဖြစ်ပေါ်လာကြ၏။

လုယွီပင်း၊ လုထင်ရွှယ်နှင့် လုနင်ရွှမ်းတို့မှာ ကျောက်လင် ထွက်သွားသည်ကို ရှုပ်ထွေးသော အမူအရာများဖြင့် ကြည့်နေကြသည်။

ကျောက်လင်က ယွီရွှေခရိုင်ရှိ ချီလင်အကယ်ဒမီသို့ ပြန်ရောက်လာသောအခါ နည်းပြလေးယောက်ဖြစ်သော ယွမ်ကော်ကော်၊ ထန်ဝေ့၊ ဝမ်ထုံနှင့် ဖုန်းရှောင်တို့က သူ့အား လေးစားအားကျစွာဖြင့် ကြည့်နေကြ၏။

"ကျောက်လင်... မင်း တကယ် အရမ်းမိုက်တာပဲ... ယွီလုံခရိုင်က အသန်မာဆုံး နည်းပြသုံးယောက်ကိုတောင် မင်း အနိုင်ယူနိုင်တယ်..."

ယွမ်ကော်ကော်က ရင်ထဲမှ လှိုက်လှဲစွာ ချီးကျူးလိုက်သည်။

"ကျောက်လင်... ငါ တောင်းပန်ချင်ပါတယ်... အရင်က မင်းအပေါ် ငါ အထင်အမြင်လွဲမှားမှုတချို့ ရှိခဲ့တယ်... ဒါပေမဲ့ ခုနက မင်းရဲ့ စွမ်းအားကို မြင်ပြီးတော့ ငါက ဘယ်လောက်တောင် အရေးမပါလဲဆိုတာ နားလည်သွားပြီ..."

ထန်ဝေ့က လေးနက်စွာ ပြောလိုက်၏။

"ငါလည်း တောင်းပန်ချင်တယ်... ငါက မင်းကို အားနည်းတယ်လို့ထင်ပြီး အထင်သေးခဲ့မိတာ... အခု ကြည့်ရတာ လူအက တကယ်ဖြစ်နေတာက ငါပါလား..."

ဝမ်ထုံမှာ အမှန်တကယ်ပင် ခါးညွှတ်၍ တောင်းပန်လိုက်သည်။

"ကျောက်လင်... ယွမ်ကော်ကော်က မင်းကို ဘာလို့ ဒီလောက်တောင် သဘောကျနေလဲဆိုတာ အခုမှ ငါ နားလည်တော့တယ်..."

"ဒီနေ့ကစပြီး ငါ မင်းကို အမြဲ ယုံကြည်တော့မယ်..."

ဖုန်းရှောင်က ရိုးရှင်းစွာ ပြောလိုက်၏။

ရုတ်တရက် ယွီရွှေခရိုင် ချီလင်အကယ်ဒမီရှိ နည်းပြလေးယောက်လုံးသည် ကျောက်လင်၏ နောက်လိုက်များ ဖြစ်သွားကြပြီး သူ၏ ဂုဏ်သတင်းမှာ နည်းပြချုပ် ယန်ဟုန်နျန်ထက်ပင် ကျော်လွန်သွားခဲ့သည်။