အာရုဏ်ဦးနှင့် ပျက်သုန်းခြင်း (၂)
Vol. 62 Ch. 1037
လင်းရှန်သည် ၎င်းကို ခေတ္တမျှအဖြေရှာမရဘဲ လေ့လာနေမိပြီးနောက် နားနေတွဲဘက်သို့ ခေါင်းမော့ကြည့်လိုက်သည်။ ခဏမျှစဉ်းစားပြီးနောက် လျှောက်သွားကာ တင်းကျန်းရီ၏ အခန်းတံခါးကိုပြန်ဖွင့်လိုက်သည်။ အံ့သြစရာကောင်းသည်မှာ တင်းကျန်းရီသည် နိုးနေနှင့်ပြီးဖြစ်ကာ တိတ်ဆိတ်စွာ အဝတ်အစားဝတ်ဆင်နေသည်ကို တွေ့လိုက်ရခြင်းပင်။
“နိုးနေပြီလား”
“ရှင် ပထမဆုံးအကြိမ်လာကတည်းက ကျွန်မနိုးနေတာပါ”
တင်းကျန်းရီက သူမ၏ အဝတ်အစားများကို သေသေချာချာ ဝတ်ဆင်လိုက်ပြီး အဖြူရောင်သုတေသနအင်္ကျီကို ထပ်ဝတ်ကာ မျက်မှန်အမည်းကို တပ်ဆင်လိုက်သည်။ ထို့နောက် မတ်တတ်ရပ်လျက် လင်းရှန်ကို ကြည့်ကာ ပြောလိုက်သည်။
“ဒါက သွေးကပ်ဘေးပန်းရဲ့ အမှောင်စွမ်းအင်ထုတ်လွှတ်မှုအကြာဆုံးအချိန်ပဲ၊၊ ရထားတွဲအားလုံးထဲမှာ ပြည့်နှက်သွားတာပဲ။ အရင်က အဖွဲ့ဝင်တွေ အကျပ်အတည်းကနေ အသည်းအသန်ထွက်ပြေးခဲ့ရတဲ့ အတွေ့အကြုံတွေ၊ ပင်ပန်းနွမ်းနယ်မှု၊ ဒဏ်ရာတွေနဲ့ အောက်ဆီဂျင်မြင့်မားစွာပါဝင်တဲ့ ရေအောက်ပိတ်ဆို့ထားတဲ့ ဝန်းကျင်မှာ ရှိနေတာတွေကြောင့် ငိုက်မြည်းခြင်းနဲ့ နှစ်ခြိုက်စွာ အိပ်ပျော်ခြင်းအခြေအနေတွေကို ကျွန်မ အနီးကပ်စောင့်ကြည့်လေ့လာပြီး သုတေသနပြုဆန်းစစ်ချက်တွေလုပ်ခဲ့တယ်။ ဒီဆန်းစစ်ချက်အရ ဒီတစ်ကြိမ်က ပိုပြီး ပြင်းထန်တယ်၊၊ ဒါက ဆင့်ကဲပြောင်းလဲမှုရဲ့ အရေးကြီးတဲ့အဆင့်တစ်ခုကိုဖော်ပြနေတာပဲ၊၊ ဒါကြောင့်လည်း ကပ္ပတိန်ချန်နဲ့ ကျွန်မက ဗိုင်အိုလာကို အားလုံးကို ကိုင်တွယ်ခိုင်းပြီး ရှင့်ကို မနှိုးခဲ့တာပါ”
တင်းကျန်းရီ၏ စကားကို ကြားရသောအခါမှ လင်းရှန်သည် နောက်ဆုံးတွင် စိတ်သက်သာရာရသွားတော့သည်။
“ဒီလောက် အမှောင်စွမ်းအင်အများကြီးစုပ်ယူမိလိမ့်မယ်လို့ ငါ မထင်ထားဘူး၊၊ ဒါက သားရဲတွေကို အမဲလိုက်တာထက် ပိုနေပုံရတယ်” လင်းရှန်က မှတ်ချက်ပြုလိုက်သည်။
တင်းကျန်းရီက လက်နှစ်ဖက်ကို အိတ်ကပ်ထဲထည့်ကာ တည်ငြိမ်စွာ ထောက်ပြသည်။
“ကျွန်မတို့ ချောက်ကမ်းပါးကနေ ထိုးကျသွားတုန်းက သမုဒ္ဒရာနတ်ဘုရားကြီး အနားကနေ ဖြတ်ခဲ့ကြတာလေ။ သမုဒ္ဒရာထဲမှာရှိတဲ့ ဒီလိုစွမ်းအင်အမျိုးအစားက အငွေ့ပျံတဲ့အခြေအနေမှာ ရှိမနေတာမျိုးဖြစ်နိုင်ပေမဲ့… ဒါက ကမ္ဘာ့အဆင့်အတွင်းမှာပါဝင်နေတဲ့ စွမ်းအင်ပမာဏက အလွန်ကြောက်မက်ဖွယ်ကောင်းနေတယ်ဆိုတာကို သွယ်ဝိုက်ပြီး ပြသနေတာပဲ”
လင်းရှန်က ခေါင်းညိတ်ရင်း တင်းကျန်းရီကို ကြည့်ကာ မေးလိုက်သည်။
“မင်းရဲ့ ကိုယ်ပိုင်အပြောင်းအလဲတွေကိုကော ဘယ်လိုခံစားရလဲ”
ထိုစကားကို ကြားသောအခါ တင်းကျန်းရီသည် စားပွဲပေါ်မှ စိတ်ဝိညာဉ်တုန်ခါမှုတိုင်းတာကိရိယာအသေးလေးကို ကောက်ကိုင်လိုက်ပြီး လင်းရှန်၏ရှေ့တွင် မြှောက်ပြလိုက်သည်။ သူမ၏ မျက်ဝန်းများက ပြင်းထန်သောအစိမ်းရောင်အလင်းများဖြင့် တောက်ပနေပြီး မကြာခင်မှာပင် စိတ်ဝိညာဉ်တုန်ခါမှု၏ အမြင့်ဆုံးပမာဏကို တိုင်းတာရရှိခဲ့သည်။
၈၀၀၀။
“ကျွန်မ နောက်ဆုံးအကြိမ်စမ်းသပ်ခဲ့တာက မနေ့က အတိအကျ မနက် ၉ နာရီမှာ၊ ပင်လယ်ကျောက်ဆောင်မြို့မှာတုန်းကပဲ။ အဲ့ဒီတုန်းက ရလဒ်က ၆၉၀၀ ရှိတယ်။ တစ်ရက်အတွင်းမှာတင် ၁၅.၉၄ ရာခိုင်နှုန်း တိုးတက်လာတယ်၊၊ ဒီဆင့်ကဲပြောင်းလဲမှု အရှိန်အဟုန်က တကယ်ကို ချဲ့ကားလွန်းနေပြီ”
တင်းကျန်းရီက ပြောသည်။
“ဟုတ်တယ်”
လင်းရှန်သည် သက်ပြင်းအရှည်ကြီးတစ်ခုချလိုက်ပြီး ခေတ္တမျှတိတ်ဆိတ်သွားပြီးမှ တင်းကျန်းရီကို မော့ကြည့်လိုက်သည်။
“ငွေနဂါးဆယ်ဆပန်းရဲ့ ပန်းဖူးပေါက်ကွဲသွားပြီးနောက် ဘာဖြစ်ခဲ့လဲဆိုတာ မင်းသိလား”
“မသိဘူး၊၊ ကျွန်မလည်း ရှင့်ကို ပြန်မေးမလို့ပဲ” တင်းကျန်းရီက တည်ကြည်စွာ ပြောသည်။
“အရင်ကလို အာကာသပူဖောင်းတွေ ပေါ်မလာခဲ့ပေမဲ့ ထူးဆန်းတဲ့ ဂယက်ရိုက်ခတ်မှုတစ်ခုကိုတော့ ကျွန်မခံစားလိုက်ရတယ်၊၊ ပြီးတော့ လူတိုင်းရဲ့ ခန္ဓာကိုယ်ပေါ်က အမှောင်အမှတ်အသားတွေအားလုံး တစ်ပြိုင်နက်တည်းပျောက်ကွယ်သွားကြတယ်”
“မင်း ဘာမှမမြင်လိုက်ဘူးလား”
လင်းရှန် မျက်မှောင်ကြုတ်သွားသည်။
တင်းကျန်းရီက သူမ၏မျက်လုံးများကို မှေးစင်းလျက် စူးစမ်းလိုစိတ်ဖြင့် မေးမြန်းလာသည်။
“ကြည့်ရတာ ရှင်က အခြားမတူညီတဲ့ အတွေ့အကြုံတစ်ခုခုကို ကြုံတွေ့ခဲ့ရပုံပဲ”
လင်းရှန် ခေတ္တမျှတုံ့ဆိုင်းသွားပြီးနောက် ဒိုင်မေးရှင်းဒြပ်ထုအကြောင်းနှင့် အချိန်ရေတွက်မှုအကြောင်းကို တင်းကျန်းရီအား ပြောပြလိုက်သည်။ ချန်ဆီရွှမ်နှင့် ဖီးနစ်တို့ကို ဆက်သွယ်၍မရနိုင်သောကြောင့် ယခုကဲ့သို့ ထူးခြားဆန်းကြယ်သောဖြစ်စဉ်အကြောင်းကို ဆွေးနွေးရန်အတွက် ဒါရိုက်တာတင်းသည် အကောင်းဆုံးရွေးချယ်မှုပင်ဖြစ်သည်။
လင်းရှန်၏ စကားကို နားထောင်ပြီးနောက် တင်းကျန်းရီ၏ အမြဲတည်ငြိမ်နေတတ်သော မျက်နှာပေါ်တွင် ရှားရှားပါးပါး ထူးခြားသောအရိပ်အယောင်တစ်ခုပေါ်လာသည်။ ယင်းမှာ အံ့အားသင့်မှုနှင့် ပိုပြင်းထန်သောစူးစမ်းလိုစိတ်တို့ ရောပြွမ်းနေခြင်း ဖြစ်သည်။
သူမသည် တိုင်းတာကိရိယာကို သုတ်နေရင်း မျက်မှန်နောက်မှ အကြည့်များတွင် စူးရှသော သိပ္ပံနည်းကျအလင်းတန်းများတောက်ပနေသည်။ ခေတ္တမျှ စဉ်းစားတွေးတောပြီးနောက် သူမက ပြန်လည်တုံ့ပြန်ခဲ့သည်။
“အချိန်ဒိုင်မေးရှင်းလား… လူသားတွေရဲ့ ကြိုးသီအိုရီထဲက ဒိုင်မေးရှင်း ၁၁အလွှာအကြောင်းကို အခုထိ ရှင်းရှင်းလင်းလင်းမသိရသေးဘူး။ အကယ်၍ ဒါက အချိန်ကို မျက်မြင်တွေ့ရအောင်လုပ်ပေးနိုင်တယ်ဆိုရင် ဒါဟာ ပိုမြင့်မားတဲ့ အာကာသထဲမှာရှိနေတာကို ညွှန်ပြနေတာပဲ”
“အာကာသဟုတ်လား။ သမုဒ္ဒရာနတ်ဘုရားကြီးလို့ခေါ်တဲ့ ထူးဆန်းတဲ့သတ္တဝါက ထုတ်လွှတ်လိုက်တဲ့ စိတ်အာရုံချောက်ခြားမှုပုံရိပ်ယောင်မျိုးဖြစ်နိုင်မလား”
လင်းရှန်က မေးလိုက်သည်။
“မဖြစ်နိုင်ဘူးလို့ ပြောလို့မရပေမဲ့ ယုတ္တိဗေဒအရတော့ မကိုက်ညီဘူး။ ဒါ့အပြင် ဖြစ်ရပ်တွေရဲ့ လားရာနဲ့အတူ အချိန်ရဲ့ ဒိုင်မေးရှင်းတစ်ခုကိုပါ မြင်တွေ့ခဲ့ရတယ်ဆိုတော့ ရှင်မြင်လိုက်တာက အချိန်ဖြစ်စဥ်ပေါ်မှာ တကယ်ဖြစ်ပျက်နေတဲ့ ဖြစ်ရပ်တွေ ဖြစ်ဖို့များတယ်”
“ဘာလို့လဲ”
တင်းကျန်းရီက ရှင်းပြသည်။
“ကျွန်မ ပြောရရင် နှစ်ဖက်မြင်ဒိုင်မေးရှင်းကနေကြည့်ရင် သုံးဖက်မြင်ဒိုင်မေးရှင်းက အရာဝတ္ထုတစ်ခုရဲ့ ပုံသဏ္ဍာန်ကို မမြင်နိုင်ဘူး။ သုံးဖက်မြင်ဒိုင်မေးရှင်း အရာဝတ္ထုတစ်ခုက နှစ်ဖက်မြင်ဒိုင်ေမးရှင်းကို ဖြတ်သန်းသွားတဲ့အခါ အဆက်မပြတ်ပြောင်းလဲနေတဲ့ နှစ်ဖက်မြင်အပိုင်းအစတွေကိုပဲ မြင်ရလိမ့်မယ်။ အကယ်၍ နှစ်ဖက်မြင်ဒိုင်မေးရှင်းသတ္တဝါတွေသာရှိခဲ့ရင် အဲ့ဒီသုံးဖက်မြင်ဒိုင်မေးရှင်း အရာဝတ္ထုကို နားလည်ဖို့အတွက် အဲ့ဒီအပိုင်းအစတွေကို အတူတကွပေါင်းစပ်ပြီး စိတ်ကူးကြည့်ရလိမ့်မယ်။ ဒီလိုပေါင်းစပ်လှုပ်ရှားမှုကနေ အချိန်ဆိုတာဖြစ်လာတာပဲ၊၊ ဒါကြောင့် အချိန်ဆိုတာ ဒိုင်မေးရှင်းတစ်ခုမဟုတ်ဘဲ စကြာဝဠာရဲ့ လှုပ်ရှားမှုအမျိုးအစားတစ်ခုပဲ။ ရှင်ပြောတာက နောက်ထပ် မိနစ်အနည်းငယ်အတွင်းမှာ ဖြစ်လာမယ့် ဖြစ်ရပ်တွေကို မြင်ခဲ့ရတယ်ဆိုတော့ သုံးဖက်မြင်ဒိုင်မေးရှင်းရှုထောင့်ကနေကြည့်ရင် ဒါဟာ သုံးဖက်မြင်ဒိုင်မေးရှင်းမူဘောင်အတွင်းမှာ မတူညီတဲ့ဖြစ်ရပ်လားရာတွေဆီကို အဆုံးမဲ့တိုးချဲ့သွားတဲ့ ပုံရိပ်တွေပဲ။ ဒါတွေကတော့ သီအိုရီအရ စိတ်ကူးပုံဖော်ချက်တွေပါပဲ၊၊ ရှင်မြင်ခဲ့တာက သာမန်စိတ်အာရုံချောက်ခြားမှုတစ်ခုထက်မကဘူးလို့ပဲ ကျွန်မပြောနိုင်တယ်”
တင်းကျန်းရီက ကိရိယာကို စားပွဲပေါ်သို့ အသာအယာတင်လိုက်ပြီး စိုက်ပျိုးခန်းဖန်သားပြင်ပေါ်တွင် သူမ၏ လက်ချောင်းများဖြင့် မသိမသာပွတ်သပ်နေမိသည်။
“ပြီးတော့ ရှင်မြင်ခဲ့ရတဲ့ အချိန်ရေတွက်မှုပုံရိပ်က... သုံးဖက်မြင်ဒိုင်မေးရှင်းမှာ ပေါ်လွင်လာတဲ့ မြင့်မားတဲ့ အာကာသရဲ့ သတင်းအချက်အလက်ခေါက်ချိုးတစ်ခုနဲ့ ပိုတူတယ်။ မြင့်မားတဲ့ ဒိုင်မေးရှင်းကနေ ငုံ့ကြည့်ပြီး ကျွန်မတို့ အနန္တရထားရဲ့ ဖြစ်ရပ်ပြောင်းလဲမှုတွေကို မြင်ရသလိုမျိုးပေါ့။ အကယ်၍ သုံးဖက်မြင်ဒိုင်မေးရှင်းပေါ်ကို ဒီလိုမျိုးပုံရိပ်ထင်ဟပ်ပြလိုက်မယ်ဆိုရင် ရှင်က ဘယ်လိုဖြစ်ရပ်လားရာကိုပဲလိုက်လိုက် ဒီအမြင်က ရှင့်ရဲ့မျက်စိထဲမှာ ပေါ်နေလိမ့်မယ်”
လင်းရှန် ခေါင်းကိုက်လာပြီး ကောလိပ်တုန်းက စွမ်းအင်မြင့်ရူပဗေဒအတန်းကို ပြန်တက်နေရသလိုမျိုး အကြောင်းပြချက်မရှိ ခံစားလိုက်ရသည်။ ခေတ္တမျှစဉ်းစားပြီးနောက် သူက မျက်မှောင်ကြုတ်ကာဆိုလိုက်သည်။
“ကပ်ဘေးအပင်တွေရဲ့ စွမ်းအား၊ အချိန်ရေတွက်မှု၊ နောက်ပြီး တားမြစ်ပစ္စည်းတွေရဲ့ စွမ်းအားကိုပါ မြင့်မားတဲ့ ဒိုင်မေးရှင်းအမြင်နဲ့ စဉ်းစားရင် ဘာလို့နားလည်နိုင်သလိုမျိုးဖြစ်နေရတာလဲ”
တင်းကျန်းရီသည် ထိုစကားကို ကြားသောအခါ ခဏမျှ ဆိုင်းသွားပြီး ခေါင်းငုံ့ကာ တွေးတောနေမိသည်။ ထို့နောက် လင်းရှန်ကို ကြည့်လိုက်သည်။
“ရှင်က တကယ်ကို အဖိုးတန်အကြံဉာဏ်တစ်ခုကို ပေးလိုက်တာပဲ”
“ဘာလဲ”
တင်းကျန်းရီက ပတ်ဝန်းကျင်ကို တစ်ချက်ကြည့်လိုက်ပြီး စားပွဲပေါ်မှ လက်ကိုင်အချက်အလက်စက်ကို ကောက်ကိုင်ကာ ဘာမှမပြောဘဲ တစ်ခုခုကို စတင်တွက်ချက်နေသည်။ သူမ၏ မျက်ဝန်းများက တောက်လောင်နေပြီး တစ်ခုခုကို အမြန်ဆုံး အတည်ပြုချင်နေပုံရသည်။
“တွင်းနက် အမှတ် ၅ ထဲမှာ အချိန်ဆွဲဆန့်ခြင်းနဲ့ ရက်ဒ်ရှစ်ဖ်သက်ရောက်မှုတွေအကြောင်း ဒေတာအမြောက်အမြားကို ကျွန်မစုဆောင်းခဲ့ဖူးတယ်၊၊ ရှင်းဂျီရဲ့ အကြီးစားဒေတာတွက်ချက်မှုတွေနဲ့လည်း ပေါင်းစပ်ထားခဲ့တယ်။ အခုထိတော့ ဖီးနစ်အပါအဝင် ဘယ်သူမှ ဒါကို အောင်မြင်အောင် မတွက်ချက်နိုင်သေးဘူး။ ကျွန်မရဲ့ အမြဲတမ်းမူဝါဒက နတ်ဘုရားဆန်တဲ့ဖြစ်စဉ်တွေကို သိပ္ပံနည်းကျ အတည်ပြုဖို့ပဲ၊၊ ရှင်အခုပြောလိုက်တာက အောင်မြင်မှုရနိုင်မယ့် အကြံဉာဏ်တစ်ခုဖြစ်နိုင်တယ်”
လင်းရှန် ပါးစပ်အဟောင်းသားဖြစ်သွားပြီး သူကတော့ စိုးရိမ်စိတ်တွေ ပြေပျောက်အောင် တင်းကျန်းရီနှင့် အချိန်ရေတွက်မှုအကြောင်း စကားစမြည်ပြောချင်ရုံသာဖြစ်သော်လည်း မသိစိတ်ထဲကနေ တင်းကျန်းရီအတွက် အသုံးဝင်မည့်အရာတစ်ခုကိုပေးမိသွားကာ သူမက သုတေသနစလုပ်နေချေပြီ။
လက်ရှိတွင် တင်းကျန်းရီ၏ အံ့ဩစရာကောင်းလောက်အောင် အာရုံစိုက်ပြီး နှစ်မြှုပ်ထားမှုကိုမြင်သောအခါ လင်းရှန်လည်း ဘာမှအများကြီးမပြောတော့ပေ။ သူတစ်ဦးတည်း ထိန်းချုပ်ခန်းသို့ သွားကာ ချန်ဆီရွှမ်ကို သူ၏အခန်းထဲသို့ ပြန်လည်ပွေ့ချီသွားခဲ့သည်။ ထို့နောက် ထိန်းချုပ်ခန်းတွင် တစ်ယောက်တည်းထိုင်ရင်း ပြတင်းပေါက်အပြင်ဘက်က မှောင်မည်းပြီး အဆုံးမရှိသော ပင်လယ်နက်ကြီးကို စိတ်ထဲဗလာဖြစ်နေကာ ငေးကြည့်နေမိသည်။
ဗိုင်အိုလာက သူ့အနားတွင် ရပ်နေပြီး လက်နှစ်ဖက်ကို နောက်ပစ်ကာ မတ်တပ်ရပ်လျက် စတင်စကားပြောလာသည်။
[ရှင့်ဆီကနေ မတည်ငြိမ်တဲ့ စိတ်ခံစားမှုတွေနဲ့ အသက်ရှူသံတွေကို ငါ စုံစမ်းသိရှိရပါတယ်၊၊ ဒါတွေက အနုတ်လက္ခဏာဆောင်နေပါတယ်။ ဒါဟာ အဖွဲ့ဝင်တွေ ထိခိုက်ဒဏ်ရာရတာမရှိဘဲ လွတ်မြောက်လာခဲ့တာ၊ မြင့်မားတဲ့ စွမ်းရည်ကြီးထွားမှုနဲ့ သွေးပဲစေ့တွေကနေရရှိတဲ့ ကြွယ်ဝတဲ့ဆုလာဘ်တွေနဲ့ ကိုက်ညီမှုမရှိပါဘူး။ ရှင့်ရဲ့ စိတ်ခံစားမှုတွေနဲ့ ရှင်းလင်းတဲ့ အတွေးအခေါ်တွေက အဖွဲ့ရဲ့ရှင်သန်မှုအတွက်အရေးကြီးပါတယ်၊၊ ရှင်ဘာပြဿနာ ကြုံတွေ့နေရလဲဆိုတာ ဗိုင်အိုလာ သိခွင့်ရှိမလား]
“အဲ့လိုလည်း မဟုတ်ပါဘူး...”
လင်းရှန် သက်ပြင်းချလိုက်သည်။
“မိုးလင်းတော့မယ်။ ငါတို့တွေ ချောချောမွေ့မွေ့နဲ့ ရေပြင်ပေါ်တက်နိုင်ပြီး အာရုဏ်ဦးကို မြင်တွေ့နိုင်ဖို့ မျှော်လင့်ပါတယ်”
ဗိုင်အိုလာက ခေါင်းလှည့်ကာ ယခင်မေးခွန်းကိုပင် ဆက်မေးလာသည်။
[အန္တရာယ်များတဲ့ ထွက်ပြေးမှုတွေနဲ့ စွမ်းအားအသုံးပြုမှုတွေကို ကြုံတွေ့ရပြီးနောက်မှာ ခန္ဓာကိုယ်က ဝန်ပိသွားတတ်ပါတယ်၊၊ ဒါ့အပြင် အမှောင်စွမ်းအင်ကို သန့်စင်ရာမှာ အလွန်အကျွံဖြည့်စွက်မိတာတွေ ရှိတယ်။ တင်းကျန်းရီဆီကရတဲ့ ဒီအဖွဲ့ရဲ့ ကျန်းမာရေးစောင့်ကြည့်မှုအစီရင်ခံစာအရ လမ်းညွှန်မှုက အကောင်းဘက်မှာရှိသင့်ပါတယ်။ အဖွဲ့ဝင်တွေရဲ့ စွမ်းအင်ပြန်လည်ပြည့်ဖြိုးလာတာအပြင်၊ ဒဏ်ရာတွေ အနာကျက်မြန်တာလည်းပါဝင်တယ်၊၊ ဘယ်လိုအနုတ်လက္ခဏာဆောင်တဲ့ အရာမျိုးကိုမှ မတွေ့ရပါဘူး။ ဒါကြောင့် ကျွန်မရဲ့ ဆုံးဖြတ်ချက်ကတော့ ရှင်ဟာ ဒီလိုအကောင်းမြင်စရာဖြစ်ရပ်တွေထက်ကျော်လွန်တဲ့ အခက်အခဲတွေနဲ့ ကြုံတွေ့နေရတာဖြစ်နိုင်ပါတယ်၊၊ အနည်းဆုံးဖြစ်နိုင်ခြေကတော့ အမှောင်စွမ်းအင်ကို အလွန်အကျွံသန့်စင်မိခြင်းရဲ့ ဘေးထွက်ဆိုးကျိုးဖြစ်နိုင်ပြီး ဒါက အဖွဲ့ရဲ့ ကျန်းမာရေးစောင့်ကြည့်မှုအစီရင်ခံစာ ဒေတာဘေ့စ်ကို အဆင့်မြှင့်တင်ဖို့ လိုအပ်နေကြောင်းပြနေပါတယ်]