တွင်းနက်ထုတ်ဖော်ခြင်း (၁)

လင်းရှန်၏ မျက်စိတစ်ဆုံးတွင် မည်းမှောင်နေသော ပင်လယ်ရေပြင်နှင့် ပင်လယ်မြူထုကြီးမှာ တမျှော်တခေါ်မျဉ်းတစ်ကြောင်းအဖြစ် ပြောင်းလဲသွားသည်။ လင်းရှန်သည် စွမ်းအင်ကူးပြောင်းခြင်းကို ထပ်မံလုပ်ဆောင်ကာ ရထားပေါ်မှ အပြင်သို့ တိုက်ရိုက်ခုန်ထွက်လိုက်သည်။

ယခုအကြိမ်တွင်မူ သူ၏ စိတ်ဝိညာဉ်စွမ်းအားကို အလွန်စုစည်းထားသဖြင့် မိမိသွားလိုသော အရပ်မျက်နှာဆီသို့ မျက်တောင်တစ်ခတ်အတွင်း ကီလိုမီတာပေါင်းများစွာ ဝေးကွာသောနေရာသို့ တိတိကျကျပျံသန်းရောက်ရှိသွားကြောင်း အာရုံခံမိလိုက်သည်။ ရွှစ်ခနဲ အသံနှင့်အတူ စက္ကန့်ပိုင်းအတွင်း လင်းရှန်သည် ပင်လယ်ပြင်တစ်ခု၏ အထက်တွင် ပေါ်လာခဲ့သည်။ ပတ်ဝန်းကျင်တစ်ခုလုံးတွင် ပိတ်မှောင်နေသော ပင်လယ်မြူထုများ ထူထပ်စွာဖုံးလွှမ်းနေပြီး အနန္တရထားကို လုံးဝမမြင်ရတော့ပေ။

စွမ်းအင်ကူးပြောင်းမှုပြီးဆုံးသွားသည့်အခိုက်အတန့်တွင် လင်းရှန်သည် တဝုန်းဝုန်းတိုက်ခတ်နေသော ပင်လယ်လေပြင်းများနှင့် စိုစွတ်သောပင်လယ်မြူများ သူ့ထံသို့ တိုးဝှေ့ဝင်ရောက်လာပြီး ဝန်းရံသွားသည်ကိုသာ ခံစားလိုက်ရသည်။ တစ်ပြိုင်နက်တည်းမှာပင် ဆွဲငင်အား၏ သက်ရောက်မှုကြောင့် သူသည် ပင်လယ်ရေပြင်ဆီသို့ ချက်ချင်းပင် အရှိန်အဟုန်ဖြင့် ကျဆင်းသွားတော့သည်။ ထိုအချိန်တွင် သူ၏နာနိုစွမ်းအားဝတ်စုံသည် ခန္ဓာကိုယ်တစ်ခုလုံးကို ချက်ချင်း ဖုံးလွှမ်းသွားပြီး ပင်လယ်ထဲသို့ မကျဆင်းမီ နောက်ဆုံးစက္ကန့်ပိုင်းအလိုတွင် ထိန်းညှိဂျက်များ ပွင့်လာကာ သူ့ကို ပင်လယ်ရေပြင်အထက်တွင် ပျံဝဲနေစေခဲ့သည်။

ထိုအခိုက်အတန့်တွင် လင်းရှန်သည် ကြယ်နက်ပန်းပဲဖိုထဲမှ အနက်ရောင်ဂီယာကို ထုတ်ယူလိုက်ပြီး မျက်မှောင်ကြုတ်လျက် အပြင်းအထန် အတွေးနက်နေမိသည်။

“ငါ ထင်တာမမှားဘူးဆိုရင် ဒါက အမှောင်စွမ်းအင်ရဲ့ ကာကွယ်ရေးအလွှာကို ဖြတ်တောက်နိုင်ရုံတင်မကဘူး၊ ထိန်းချုပ်ထားတဲ့ တားမြစ်ပစ္စည်းတွေကိုပါ သက်ရောက်နိုင်တာပဲ။ ဒီအရာက တကယ့်ကို နတ်ဘုရားလက်နက်တစ်ခုပဲ”

လင်းရှန် တစ်ခါမှ သဘောမပေါက်ခဲ့သည့် မေးခွန်းမှာ အမှန်တော့ အသေးအဖွဲအချက်လက်လေးတစ်ခုသ ဖြစ်သည်။ ထိုအရာမှာ အချိန်ရေတွက်မှုကိန်းဂဏန်းများက အရင်ဆုံးပေါ်လာခြင်းဖြစ်ပြီး အနက်ရောင်ဂီယာကိုမူ လင်းရှန် သတိပြန်ရလာပြီးမှ ဆွဲငင်အားမှန်ဘီလူးကို သုံး၍ ချန်ယန်ရွှီထံမှ လုယူခဲ့ခြင်း ဖြစ်သည်။ ထို့ကြောင့် ထိုနှစ်ခုကြားတွင် ဆက်စပ်မှုရှိနေမည်ဟု သူလုံးဝမတွေးမိခဲ့သလို ဤအရာကို ချန်ယန်ရွှီက ရည်ရွယ်ချက်ရှိရှိချန်ထားခဲ့ခြင်းဖြစ်နိုင်သည်ဟုလည်း မစဉ်းစားခဲ့မိပေ။

ဤအချက်က လင်းရှန်ကို အကြီးအကျယ်လမ်းမှားစေခဲ့သည်။ အဘယ်ကြောင့်ဆိုသော် သူ့အနေဖြင့် အနက်ရောင်ဂီယာကိုရရှိခဲ့သော်လည်း ထိန်းချုပ်မှုကို မည်သို့အောင်မြင်အောင်လုပ်ရမည်ကို အသေးစိတ်လေ့လာရန်လိုအပ်သေးသည်ဟုသာ လင်းရှန် အမြဲယူဆထားသောကြောင့်ဖြစ်သည်။ ချန်ယန်ရွှီ၏ ရည်ရွယ်ချက်ရှိရှိလုပ်ဆောင်မှုကြောင့် ဤအနက်ရောင်ဂီယာသည် သူ့၏ ထိန်းချုပ်ခြင်းကို ခံထားရပြီးသား ဖြစ်နေမည်ဟု သူ လုံးဝ မတွေးခဲ့မိချေ။

အကယ်၍ ဤသို့သာဆိုလျှင် အရာအားလုံးက ယုတ္တိရှိသွားချေပြီ။ အနက်ရောင်ဂီယာမှ သယ်ဆောင်လာသော ထူးခြားချက်အချို့က ငွေကျည်ဆန်နှင့် တောင်ဘက်ကောင်းကင်ဂိတ်အပေါ် သူ၏ ထိန်းချုပ်မှုကို သက်ရောက်မှုရှိစေခဲ့ခြင်း ဖြစ်သည်။ အချိန်ရေတွက်မှုပေါ်လာရခြင်းမှာလည်း အနက်ရောင်ဂီယာကြောင့်ဖြစ်ပြီး ထိုအကြောင်းရင်းကြောင့်ပင် တစ်ခုခုနှင့် ထိတွေ့မိခြင်း သို့မဟုတ် မတော်တဆထိမိပြီးနောက် အချိန်ရေတွက်မှုက ရုတ်တရက်မြန်ဆန်သွားခြင်း သို့မဟုတ် သူ၏ အချိန်စီးဆင်းမှုနှုန်း မြန်ဆန်လာခြင်းဖြစ်သည်။ အနည်းငယ်မယုံနိုင်စရာကောင်းသည်ဟု ထင်ရသော်လည်း လက်ရှိအချိန်တွင် သဲလွန်စအားလုံးကိုပေါင်းစပ်ပြီး မဖြစ်နိုင်သောအရာများကို ဖယ်ထုတ်လိုက်ပါက ဤမယုံနိုင်စရာကောင်းသောယူဆချက်မှာ အမှန်ကန်ဆုံးဖြစ်နိုင်ချေရှိနေသည်။

ထို့ပြင် ယခုအချိန်တွင် သူ့၌ အခြားရွေးချယ်စရာလုံးဝမရှိတော့ပေ။

၄၊ ၃...

ဤအချိန်တွင် အချိန်ရေတွက်မှု နောက်ဆုံးသုံးစက္ကန့်သာလိုတော့သည်။ သူ့၏ အမြင်အာရုံထဲတွင် ပြေးလွှားနေသော ကိန်းဂဏန်းများကို ကြည့်ရင်း လင်းရှန်၏ စိတ်ထဲတွင် လေးလံထိုင်းမှိုင်းမှုကို ခံစားလိုက်ရသည်။

“ဒီအချိန်ရေတွက်မှုက အနက်ရောင်ဂီယာနဲ့ ငါ့ကြားက ချိတ်ဆက်မှုကြောင့် ဖြစ်ပေါ်လာတာပဲ။ အမှောင်ဂိုဏ်းက တောင်ဘက်ကောင်းကင်ဂိတ်အပေါ် ငါ့ရဲ့ ထိန်းချုပ်မှုကို ဖြတ်တောက်ချင်နေတာပဲ။ ဒါကြောင့် ငါ ဒါကို ဖျက်ဆီးပစ်ရမယ် ဒါမှမဟုတ် ထိန်းချုပ်မှုကို ဖြတ်တောက်လိုက်ရမယ်”

ထိုခဏတွင် လင်းရှန်သည် ဆုံးဖြတ်ချက်တစ်ခုချလိုက်ပြီး သူ၏ ကျောဘက်ရှိ ထိန်းညှိဂျက်အားလုံး ရုတ်တရက် လင်းထိန်သွားကာ မီးပွင့်သွားပြီး အသံထက်မြန်သော အရှိန်နှုန်းဖြင့် အဝေးသို့ ပြေးထွက်သွားတော့သည်။

၃၊ ၂၊ ၁

စက္ကန့်ပိုင်းမျှ အချိန်မှာ ဖျတ်ခနဲရောက်ရှိလာပြီး လင်းရှန်သည် အလွန်အမင်းအေးစက်ပြီး ပြင်းထန်သောအရှိန်အဝါတစ်ခု သူ့ထံသို့ ရူးသွပ်စွာစုစည်းလာသည်ကိုသာ ခံစားလိုက်ရသည်။ သူ၏ မျက်ဝန်းများ အလျင်အမြန်လှုပ်ရှားသွားပြီး အချိန်ရေတွက်မှု၏ နောက်ဆုံးစက္ကန့်တွင် ပင်လယ်မြူထုထဲ၌ စွမ်းအင်ကူးပြောင်းမှုကို တိုက်ရိုက်အသုံးပြုကာ ချက်ချင်းပင် နှစ်ကီလိုမီတာခန့်ဖြတ်ကျော်သွားခဲ့သည်။ ထို့နောက် သူသည် ဒရုန်းတစ်စင်းကို သုံး၍ အနက်ရောင်ဂီယာကို ဖမ်းဆွဲလိုက်ပြီးနောက် ဆန့်ကျင်ဘက်အရပ်မျက်နှာဆီသို့ အခြားခုန်ကူးမှုတစ်ခုကို ထပ်မံလုပ်ဆောင်လိုက်သည်။ မီလီစက္ကန့်ပိုင်းအတွင်း လင်းရှန်သည် အဝေးမှ တည်နေရာသတ်မှတ်ရန် ဒရုန်းကို အသုံးပြုကာ လေထုအလယ်ရှိ အနက်ရောင်ဂီယာဆီသို့ ချိန်ရွယ်လိုက်သည်။

ဆွဲငင်အားမှန်ဘီလူး၊၊

ဝူး

ဒရုန်းသည် မည်းမှောင်သော ပင်လယ်မြူထုများ၏ ဝါးမျိုခြင်းကို ခံလိုက်ရပြီး နှစ်ကီလိုမီတာခန့် ကွာဝေးနေသဖြင့် လင်းရှန်အနေဖြင့် ၎င်းကို လုံးဝမမြင်ရတော့ပေ။ သို့သော် ထိုအချိန်တွင် ဟင်းလင်းပြင်လှုပ်ရှားမှုတစ်ခုထွက်ပေါ်လာပြီး ပင်လယ်မြူထုအထက်တွင် ပျံဝဲနေသော ဒရုန်း၏ ဗဟိုချက်တွင် အနက်ရောင်ရေလှိုင်းများ အလျင်အမြန်တွန့်လိမ်ပေါ်ပေါက်လာကာ ဒရုန်းနှင့်အတူ အနက်ရောင်ဂီယာကိုပါ ချက်ချင်း ဝါးမျိုသွားပြီး ကောင်းကင်ထက်တွင် လိမ်တွန့်နေသော အနက်ရောင်ပူဖောင်းတစ်ခု ဖြစ်ပေါ်စေခဲ့သည်။

တစ်ပြိုင်နက်တည်းမှာပင် မူလကငြိမ်သက်နေသော ပင်လယ်ရေပြင်သည် ပြင်းထန်သော လှိုင်းတံပိုးများ စတင်ပေါ်ပေါက်လာပြီး အနက်ရောင်ဂီယာရှိရာနေရာ၌ ပြင်းထန်သောအမှောင်အော်ရာများ ရူးသွပ်စွာစုစည်းလာခဲ့သည်။ လင်းရှန်သည် ဟင်းလင်းပြင်ရှေ့ရှိ ပင်လယ်ပြင်မှ ထူးခြားသော တုန်ခါမှုတစ်ခု ထွက်ပေါ်လာသည်ကို သတိပြုမိလိုက်သည်။

ရှူး၊၊

စွမ်းအားဝတ်စုံမှ ပစ်လွှတ်လိုက်သော အချက်ပြမီးများစွာသည် ပင်လယ်ပြင်ထက်ရှိ မည်းမှောင်သော ညကောင်းကင်ယံကို ဖြတ်သန်းသွားခဲ့သည်။ ထူထပ်သော ပင်လယ်မြူများသည် သမုဒ္ဒရာမျက်နှာပြင်ထက်တွင် မီးခိုးရောင်ကန့်လန့်ကာကြီးတစ်ခုကဲ့သို့ ကျဆင်းလာသည်။ လင်းရှန်သည် သေချာစိုက်ကြည့်နေမိသည်။ ထိုခဏတွင် လုံးဝချောမွေ့နေသော အနက်ရောင်ဧရာမတံတိုင်းကြီးတစ်ခုသည် ဘာသတိပေးချက်မျှမရှိဘဲ မြူတံတိုင်းကို ရုတ်တရက်ဖြတ်သန်းပေါ်ထွက်လာပြီး ၎င်း၏ အနားသတ်များက ရေငွေ့များနှင့် ကောင်းကင်အလင်းရောင်ကို ဝါးမျိုကာ ကောင်းကင်တစ်ခုလုံးကို ဖုံးလွှမ်းသွားမည့် ကွင်းပြင်ကြီးတစ်ခုအဖြစ် တွန့်လိမ်ကျယ်ပြန့်လာခဲ့သည်။ မြင်ကွင်းတစ်ခုလုံးမှေးမှိန်သွားခဲ့ပြီး ၎င်းမှာ တကယ့်အရှိတရားတစ်ခုကဲ့သို့ ၎င်း၏ ဒီရေများကို ထုတ်လွှတ်နေသော အနက်ရောင်တွင်းနက်ကြီးတစ်ခုပင်ဖြစ်သည်။

လင်းရှန်၏ မျက်လုံးသူငယ်အိမ်များ သိသိသာသာကျုံ့ဝင်သွားသည်။ သူ့၏ ခန္ဓာကိုယ်ပင်ပန်းနွမ်းနယ်မှုကို ဂရုမစိုက်နိုင်တော့ဘဲ နောက်ဘက်ဆီသို့ အခြားခုန်ကူးမှုတစ်ခုကို ထပ်မံလုပ်ဆောင်လိုက်သည်။ ထိုအတောအတွင်း ရှေ့ရှိ ပင်လယ်မျက်နှာပြင်သည် ရုတ်တရက် နိမ့်ဆင်းသွားပြီး တစ်ကီလိုမီတာခန့် ကျယ်ဝန်းသော ဝဲဂယက်ကြီးတစ်ခုဖြစ်ပေါ်လာခဲ့သည်။ စစ်မှန်သော အမှောင်ထုတံတိုင်းကြီးအတွင်း၌ အရာအားလုံးသည် တိတ်ဆိတ်နေပြီး လှိုင်းတံပိုးများသည် လုံးဝဝါးမျိုခြင်းမခံရမီ မမြင်ရသော အမှုန်အမွှားပုံဆောင်ခဲအစအနများအဖြစ် ကြေမွသွားခဲ့သည်။

နက်ရှိုင်းသော ဟင်းလင်းပြင်တွင်းနက်ကြီး၏ အောက်ခြေမှ ကြိမ်နှုန်းနိမ့်တုန်ခါသံများ စိမ့်ထွက်လာပြီး ၎င်းမှာ အိပ်မောကျနေသော ကြယ်တာရာသားရဲကြီးတစ်ကောင်က နိုးထလာပြီး သန်းဝေလိုက်သဖြင့် ကောင်းကင်တစ်ဝက်ခန့်ကို အရိပ်မိုးသွားသည်နှင့် တူလှသည်။ မြူပင်လယ်ထဲမှ ထွက်ပေါ်နေသော မျောပါနေသည့် ဧရာမအပျက်အစီးများနှင့် ထိတ်လန့်ဖွယ်ရာအစအနအားလုံး ပျောက်ကွယ်သွားပြီး ၎င်းနှင့်အတူ ရေတွက်၍မရသော ထူးဆန်းသည့်သတ္တဝါများသည် ဟင်းလင်းပြင်တွင်းနက်ကြီးထဲမှ ဆန်အိတ်များ ပေါက်ထွက်သွားသကဲ့သို့ ကောင်းကင်ယံထက်သို့ ရူးသွပ်စွာ ပေါက်ကွဲထွက်လာပြီး ပင်လယ်ပြင်၏အရပ်မျက်နှာအသီးသီးသို့ ရူးသွပ်စွာစီးဆင်းသွားတော့သည်။

ဤမြင်ကွင်းကို ကြည့်ရင်း လင်းရှန်၏ မျက်နှာမှာ အကြီးအကျယ်ပြောင်းလဲသွားသည်။ ၎င်းမှာ အသေးစားတွင်းနက်ကြီးတစ်ခုပေါ်ပေါက်လာပြီး ကာလကြာရှည်စုစည်းထားသော အမှောင်သတ္တဝါများစွာ ပေါက်ကွဲထွက်လာခြင်းနှင့် တူလှသည်၊၊

ဝုန်း ဝုန်း၊၊

ဧရာမ ဝဲဂယက်ကြီးနှင့် အမှောင်ဒီရေများသည် ပြင်းထန်စွာ ထပ်တူကျလှုပ်ခတ်သွားပြီး ပတ်ဝန်းကျင်တစ်ခုလုံးတွင် ဧရာမလှိုင်းတံပိုးကြီးများကို မြင့်တက်စေခဲ့ကာ ရေတွက်၍မရသော ထူးဆန်းသည့်သတ္တဝါများသည် မြူထုထဲသို့ အလျင်အမြန်ပျောက်ကွယ်သွားပြီး ရေအောက်ထဲသို့ အရှိန်အဟုန်ဖြင့် ငုပ်လျှိုးသွားကြတော့သည်။

“ကပ္ပတိန်လင်း”

ဆက်သွယ်ရေးနားကြပ်ထဲမှ အဖွဲ့ဝင်များ၏ အသံများ ထွက်ပေါ်လာပြီး ကီကီနှင့် အခြားသူများသည် အနန္တရထားရှိရာဘက်မှနေ၍ စစ်ကူပေးရန် ရောက်ရှိလာကြသည်။ လင်းရှန်သည် ချက်ချင်း နောက်ပြန်လှည့်ကာ အချက်ပြမီးဒါဇင်ပေါင်းများစွာကို ပစ်လွှတ်လိုက်ပြီး လူအုပ်ကိုတားဆီးလိုက်သည်။

“သတိထားကြ… အနားမကပ်လာနဲ့”

သူ့နောက်တွင် အလင်းတန်းများတစ်ခုပြီးတစ်ခုရောက်ရှိလာကြပြီး အဖွဲ့သားအားလုံးမှာ စွမ်းအားဝတ်စုံများကို ဝတ်ဆင်ထားကြသည်။ ပိုင်ဖုန်း ၀၉ နှင့် ရိုင်ယန်တို့ပင် ကူညီရန်အပြေးအလွှားရောက်လာကြသည်။ ပင်လယ်ပြင်ထဲ၌ တွင်းနက်ကြီးတစ်ခုကဲ့သို့ အနက်ရောင်စက်ဝိုင်းကြီးပေါ်ပေါက်နေပြီး ၎င်းမှ ထုတ်လွှတ်လိုက်သောအရာများကို တွင်းနက်ကြီးကဲ့သို့ ပြန်လည်ဝါးမျိုနေသည်ကို မြင်လိုက်ရသဖြင့် လူတိုင်းထိတ်လန့်အံ့ဩသွားကြသည်။

“ဒါက ဘာကြီးလဲ”

“သတိထားကြ၊၊ သန္ဓေပြောင်းမွန်းစတားတွေ အများကြီးပဲ”

“လင်းရှန်... ရှင်အဆင်ပြေရဲ့လား”

ချန်ဆီရွှမ်နှင့် ကီကီတို့ အပြေးအလွှားရောက်လာကြသည်။ လင်းရှန် လုံခြုံစွာဖြင့် လေထဲတွင် ပျံဝဲနေသည်ကို မြင်မှသာ ၎င်းတို့နှစ်ဦးစလုံး သက်ပြင်းချနိုင်တော့သည်။

“အချိန်ရေတွက်မှုက ကုန်သွားပြီလား” ကီကီက စိုးရိမ်တကြီးမေးလိုက်သည်။

လင်းရှန်က ခေါင်းခါပြကာ ရှေ့ရှိ အရာအားလုံးကို ထုတ်လွှတ်နေသော အနက်ရောင်တွင်းနက်ကြီးကို ကြည့်ရင်း လေးနက်စွာ ပြောလိုက်သည်။

“အခြေအနေကို သေချာမသိသေးဘူး၊၊ ဒါပေမဲ့ ချန်ယန်ရွှီချန်ထားခဲ့တဲ့ အနက်ရောင်ဂီယာက အတော်ဒုက္ခပေးတဲ့အရာပဲ”

“ဒါက အဲဒီတားမြစ်ပစ္စည်းကြောင့်ဖြစ်တာလား”

လင်းရှန်က ချန်ယန်ရွှီထံမှ အနက်ရောင်ဂီယာကို လုယူခဲ့သည်ကို မြင်ဖူးသဖြင့် နန်ကျင်းက မနေနိုင်ဘဲ ဝင်ပြောလိုက်သည်။

“တကယ့်ကို အကြီးအကျယ်ပဲ၊၊ ဒီရေလှိုင်းတွေ ပေါက်ကွဲထွက်လာသလိုပဲ”

ရိုင်ယန်က လူအုပ်ထဲမှ ပျံထွက်လာပြီး ရှေ့မှ မြင်ကွင်းကို ကြည့်ကာ ချက်ချင်းပင်ပြောလိုက်သည်။

“လှုပ်ရှားဖို့ ပြင်ဆင်ကြ”