အခန်း (၈၂)

အခန်း (၈၂) ဗီလိန်မှတ်များ မလုံလောက်လျှင် အရင်းအမြစ်များကို အသုံးပြု၍ ဖြည့်တင်းခြင်း

ရှီးဟွမ်၏ ပူးပေါင်းပါဝင်မှုဖြင့် ချင်လော့၏ ဝိညာဉ်တိုက်ပွဲသည် လျင်မြန်စွာ အနိုင်ရရှိသွားခဲ့သည်။

"မလုပ်နဲ့..."

ထိုသူတော်စင်က ဟိန်းဟောက်လိုက်သော်လည်း ကံမကောင်းစွာဖြင့် အဆုံးသတ်ကို မပြောင်းလဲနိုင်ခဲ့ချေ။

သူ၏ ဝိညာဉ်အတွင်း၌ ချင်လော့၏ သေခြင်းရှင်ခြင်းတံဆိပ်တုံး ရိုက်နှိပ်ခံလိုက်ရပေသည်။

သူက သူ၏ရှေ့ရှိ ချင်လော့ကို စိတ်ပျက်အားငယ်စွာ ကြည့်လိုက်ရာ သူ၏မျက်လုံးများတွင် မကျေနပ်မှု အရိပ်အယောင်တစ်ခု ရှိနေခဲ့သည်။

ချင်လော့က ပြုံးလိုက်၏။

"သေခြင်းနဲ့ ရှင်ခြင်းဆိုတာ ဘာလဲဆိုတာ မင်း ခံစားကြည့်လို့ရပြီ..."

သေခြင်းရှင်ခြင်းတံဆိပ်တုံး ချက်ချင်း အသက်ဝင်သွားပေသည်။

ထိုသူတော်စင်၏ မျက်နှာက ချက်ချင်း ပြောင်းလဲသွား၏။

ယခုလေးတင် ဖြစ်ပွားခဲ့သော ဝိညာဉ်တိုက်ပွဲထက် ဆယ်ဆ၊ အဆတစ်ရာ၊ အဆတစ်သောင်း ပို၍ ပြင်းထန်ပေသည်။

"မလုပ်နဲ့..."

သူက ရူးသွပ်စွာ ဟိန်းဟောက်လိုက်ပြီး သူ၏ အမူအရာက ကြောက်မက်ဖွယ်ကောင်းအောင် တွန့်လိမ်နေကာ မြေပြင်ပေါ်တွင် လှဲချ၍ အဆက်မပြတ် လူးလှိမ့်နေခဲ့သည်။

"ကျွန်တော့်ကို သတ်လိုက်ပါ... ကျေးဇူးပြုပြီး ကျွန်တော့်ကို သတ်လိုက်ပါ..."

"မလုပ်ပါနဲ့... ကျွန်တော့်ကို သတ်လိုက်ပါ... သတ်လိုက်ပါ... အား..."

"ကျွန်တော့်ကို ချမ်းသာပေးပါ... သခင်... ကျွန်တော့်ကို ချမ်းသာပေးပါ..."

ဤမြင်ကွင်းက ဘေးရှိ အမျိုးသမီးကို ထိတ်လန့်သွားစေခဲ့သည်။

သူတော်စင်တစ်ပါးပင်လျှင် ဤမျှ လူမဆန်စွာ ညှဉ်းပန်းနှိပ်စက်ခံရလျှင် သူမကရော မည်သို့ဖြစ်မည်နည်း။

ဤဖြစ်နိုင်ခြေရှိသော မြင်ကွင်းကို တွေးတောရင်း သူမက ပြင်းထန်စွာ တုန်ရီသွားပြီး စိတ်ထဲမှ ရေရွတ်လိုက်မိ၏။

"ဒါဆို သေလိုက်တာက ပိုကောင်းမယ်..."

သို့သော် သူမက သေရမည်ကို လုံးဝ မလိုလားခဲ့ချေ။

ချင်လော့ကို သတိပြုမိချိန်၌ သူမက မြေပြင်ပေါ်တွင် သပ်ရပ်စွာ ဒူးထောက်လိုက်သည်။

" ဒီအစေခံမလေး ယွဲ့ယောင်က သခင့်ကို အရိုအသေပေးပါတယ်... ဒီအစေခံမလေးက သခင့်ကို နာခံဖို့ ဆန္ဒရှိပါတယ်..."

"ကျွတ် ကျွတ်..."

တစ်ဖက်လူ၏ လှပသော ကျက်သရေကို မြင်တွေ့နိုင်သေးသဖြင့် ချင်လော့က အံ့အားသင့်စွာဖြင့် ပြောဆိုလိုက်သည်။

"ဒီလောက်လှပပြီး ဉာဏ်ကောင်းတဲ့ အမျိုးသမီးက ငါ့အတွက် စကားပြောရသက်သာစေတယ်..."

"မင်းရဲ့ ဝိညာဉ်ကို လွှတ်ပေးထားလိုက်... မင်းရဲ့ ဝိညာဉ်ထဲမှာ သေးငယ်တဲ့ အမှတ်အသားလေး တစ်ခု ချန်ထားချင်တယ်..."

လင်းယွဲ့ယောင်သည် မခုခံရဲဘဲ ချင်လော့၏ သေခြင်းရှင်ခြင်းတံဆိပ်တုံး ရိုက်နှိပ်ခြင်းကို ရိုးသားစွာ ခံယူလိုက်ပေသည်။

တံဆိပ်တုံး ရိုက်နှိပ်ပြီးနောက် သူမ၏ ဝိညာဉ်သည် ချင်လော့၏ ထိန်းချုပ်မှုကို ခံလိုက်ရကြောင်း ခံစားလိုက်ရသည်။

ချင်လော့၏ အတွေးတစ်ချက်ဖြင့် သူမသည် ဘေးရှိ သူတော်စင်ကဲ့သို့ လူမဟုတ် တစ္ဆေမဟုတ်သည့် အခြေအနေသို့ ရောက်ရှိသွားမည်ဖြစ်သည်။

ချင်လော့က သူ၏လက်ကို ဝှေ့ယမ်းလိုက်ရာ ထိုသူတော်စင်၏ ညှဉ်းပန်းနှိပ်စက်ခံရမှု ရပ်တန့်သွားပြီး ချင်လော့ကို ကြည့်လိုက်ရာ သူ၏မျက်လုံးများတွင် ပြင်းထန်သော ကြောက်ရွံ့မှုများ ရှိနေခဲ့သည်။

"စွန်းကျုံးမိုက သခင်ကို ဂါရဝပြုပါတယ်..."

"မင်းတို့နှစ်ယောက် ပြန်သွားကြ... ငါက လင်းရွှမ်ရဲ့ ပစ္စည်းတွေကို ထုတ်ပြီး မင်းတို့နဲ့ လဲလှယ်ဖို့ ဆန္ဒရှိတယ်လို့ ပြောလိုက်... အဲ့ဒီ နတ်နဂါးအဆီအနှစ်သွေး တစ်စက်ကို ငါ လိုချင်တယ်လေ..."

"သက်ရှိထင်ရှားရှိနေတဲ့ နတ်နဂါးက ဘယ်နေရာမှာ ရှိနေလဲဆိုတာ မင်းတို့နှစ်ယောက် သိလား... နဂါးအကြေးခွံတွေရဲ့ အတိအကျ အသုံးဝင်မှုက ဘာလဲ..."

သူတို့နှစ်ဦးစလုံး၏ မျက်လုံးများတွင် ဇဝေဇဝါဖြစ်မှုများ ရှိနေပြီး ယခင်က အမျိုးသမီး သူတော်စင် သိရှိထားသည်နှင့် အတူတူလောက်သာ ဝေဝါးစွာ သိရှိထားကြပေသည်။

"မင်းတို့က လျှို့ဝှက်နဂါးတပ်အဖွဲ့ထဲမှာ ရာထူးအငယ်လေးတွေ ဖြစ်ပုံရတယ်..."

ချင်လော့၏ အသံတွင် စိတ်ပျက်မှု အရိပ်အယောင်များ ပါဝင်နေသဖြင့် သူတို့နှစ်ဦးစလုံးမှာ စိုးရိမ်တကြီး ဖြစ်သွားကြ၏။

"သခင်... ကျွန်တော်တို့ ပြန်ရောက်တာနဲ့ ချက်ချင်း စုံစမ်းပြီး သခင် ကျေနပ်လောက်မယ့် အဖြေကို ပေးပါ့မယ်..."

သူတို့နှစ်ဦးက အလျင်အမြန် ပြောဆိုလိုက်ကြသည်။

ချင်လော့က လင်းယွဲ့ယောင်၏ ချောမွေ့သော မေးစေ့ကို ပင့်တင်လိုက်ပြီး သူမ၏ သဘာဝအတိုင်း ဆွဲဆောင်မှုရှိသော အလှတရားကို ကြည့်ကာ ချီးကျူးလိုက်သည်။

"ဖန်ဆင်းရှင်ရဲ့ လက်ရာမြောက်တဲ့ ဖန်တီးမှုတစ်ခုပဲ... ဒီလောက်လှပတဲ့ အမျိုးသမီးကိုသုံးပြီး အလှမာယာထောင်ချောက် ဆင်တာဆိုတော့ လျှို့ဝှက်နဂါးတပ်အဖွဲ့က လူတွေက တကယ် ဉာဏ်ကောင်းတာပဲ..."

လင်းယွဲ့ယောင်၏ မျက်လုံးများတွင် ဝေဝါးသော အရောင်အသွေးတစ်ခု ဖြတ်ပြေးသွားပြီး သူမ၏ နှုတ်ခမ်းကို ညင်သာစွာ ကိုက်ကာ သူမ၏ ဆွဲဆောင်မှုကို ပြသလိုက်သည်။

အကယ်၍ ချင်လော့သာ သူမကို ခေါ်သွားမည်ဆိုလျှင် သူမက သဘာဝကျကျ ပျော်ရွှင်မိမည်ဖြစ်သည်။

ယနေ့တွင် သူမ မြင်တွေ့ခဲ့ရသော ချင်လော့ကဲ့သို့ လူမျိုးသည် မဟာချင်အင်ပါယာ၏ ဧကရာဇ်ရာထူးကို ယှဉ်ပြိုင်ရန် သေချာပေါက် အရည်အချင်းပြည့်မီပေသည်။

ချင်လော့၏ အမျိုးသမီး ဖြစ်လာရခြင်းက သူမအတွက် အရှုံးမရှိပေ။

ချင်လော့က လင်းယွဲ့ယောင်၏ လှပသော မျက်နှာကို ညင်သာစွာ ပုတ်လိုက်၏။

"မင်းရဲ့ မြေခွေးမလို မာယာတွေကို သိမ်းထားလိုက်စမ်း..."

သူ့တွင် လင်းယွဲ့ယောင်ကို ပိုင်ဆိုင်ရန် ရည်ရွယ်ချက် မရှိခဲ့ချေ။

အမျိုးသမီးတစ်ဦးဆိုသည်မှာ အရေခွံတစ်လွှာသာ ဖြစ်ရာ ထိုအသားစလေးနှစ်ခု၏ သာယာမှုအတွက် သူ၏ အနာဂတ်ကို မည်သို့ ထိခိုက်ခံနိုင်မည်နည်း။

" မျက်လုံးတစ်လုံးအတွက် မျက်လုံးတစ်လုံး ဆိုတဲ့ စကားကို မင်း ကြားဖူးလား..."

လင်းယွဲ့ယောင်၏ မျက်လုံးများတွင် ဇဝေဇဝါဖြစ်မှုများ ရှိနေပြီး သူမက ကောင်းစွာ နားမလည်ခဲ့ပေ။ သို့သော် ချင်လော့က သူမအား ရှင်းပြလိုက်သည်။

"မင်းရဲ့ နည်းလမ်းတွေကို လျှို့ဝှက်နဂါးတပ်အဖွဲ့ဆီမှာ ပြန်သုံးလိုက်... လျှို့ဝှက်နဂါးတပ်အဖွဲ့ရဲ့ လျှို့ဝှက်ချက် အားလုံးကို ငါ သိချင်တယ်... အရာအားလုံးကို မှတ်ထားပါ..."

"အထူးသဖြင့် နတ်နဂါးနဲ့ ပတ်သက်တဲ့ လျှို့ဝှက်ချက်ပဲ..."

"ကောင်းပြီ... မင်းတို့နှစ်ယောက် သွားပြီး အလုပ်လုပ်လို့ရပြီ..."

ထိုနှစ်ဦးကို လွှတ်လိုက်ပြီးနောက် ရှီးဟွမ်သည် ချင်လော့၏ အနောက်မှ ထွက်လာခဲ့သည်။

"ဘာလဲ... အဲ့ဒီ သဘာဝအတိုင်း ဆွဲဆောင်မှုရှိတဲ့ အမျိုးသမီးကို မင်း မလိုချင်ဘူးလား..."

ချင်လော့က ပြုံးလိုက်၏။

"ယောကျာ်းတွေက သဘာဝအရ လှပတဲ့ အမျိုးသမီးတွေကို သဘောကျတာပဲ... ငါလည်း ချွင်းချက်မဟုတ်ပါဘူး... ဒါပေမဲ့ ခဏတာ ပျော်ရွှင်မှုနဲ့ တစ်သက်တာဆိုတာကိုတော့ ငါ ခွဲခြားသိမြင်နိုင်ပါသေးတယ်..."

"ကောင်းပြီ... အဲ့ဒီ နောင်တဓားချောက်ကမ်းပါးက အမျိုးသမီး ဘာဖြစ်နေပြီလဲ..."

ချင်လော့က တိုးတက်မှုကို မေးမြန်းသည်ကို ကြားချိန်၌ ရှီးဟွမ်သည် ယခုလေးတင် ပြသခဲ့သော အမူအရာကို သိမ်းဆည်းလိုက်သည်။

"အဲ့ဒီအမျိုးသမီးက ဓားကျင့်ကြံသူဆိုတဲ့အတိုင်း သူမရဲ့ စိတ်ဆန္ဒက တော်လေးသန်မာတယ်..."

"သူမရဲ့ ပါးစပ်ကနေ နောင်တဓားချောက်ကမ်းပါးရဲ့ သတင်းကို ရဖို့ဆိုတာ အရမ်း ခဲယဉ်းတယ်... သူမရဲ့ ဝိညာဉ်အနက်ရှိုင်းဆုံးထဲကို ဝင်ကြည့်ဖို့ပဲ ငါ ဆုံးဖြတ်ထားတယ်..."

"အန္တရာယ်ရှိလား..."

ရှီးဟွမ်၏ အသံတွင် လေးနက်မှုများ ပါဝင်နေသည်ကို ချင်လော့ ကြားလိုက်ရသည်။

"အန္တရာယ် က အတိုင်းအတာတစ်ခုတော့ ရှိတယ်... ဒါပေမဲ့ ဒါက လူသားဧကရာဇ်အလံထဲမှာဆိုတော့ သေစေလောက်တဲ့ အန္တရာယ်တော့ မရှိပါဘူး..."

"ကောင်းပြီ... ဒါဆိုရင် မင်း လုပ်လို့ရပြီ..."

ရှီးဟွမ်က ခေါင်းညိတ်လိုက်ပြီး လျှို့ဝှက်ပညာရပ်တစ်ခုကို အသုံးပြုလိုက်သည်။

ခန္ဓာကိုယ်ကို ဝင်ရောက်ပူးကပ်ခြင်း မဟုတ်သော်လည်း ပူးကပ်ခြင်းနှင့် ဆင်တူကာ သူမက လင်းယွဲ့၏ ဝိညာဉ်အနက်ရှိုင်းဆုံးထဲသို့ ဝင်ရောက်သွားခဲ့၏။

မြေပြင်ပေါ်တွင် လဲလျောင်းနေသော လင်းယွဲ့၏ ခန္ဓာကိုယ်သည် ပြင်းထန်သော နာကျင်မှုကို ခံစားနေရသည့်အလား တုန်ခါနေခဲ့သည်။

အချိန်များက တစ်မိနစ်ပြီးတစ်မိနစ် ကုန်လွန်သွားခဲ့သည်။

ချင်လော့ အနည်းငယ် စိုးရိမ်လာချိန်၌ ရှီးဟွမ်က နောက်ဆုံးတွင် ထွက်လာခဲ့ပေသည်။

"အခြေအနေက နည်းနည်း ဆိုးတယ်... ဒီအမျိုးသမီးရဲ့ ဆရာကလည်း ဓားကျင့်ကြံသူ တစ်ယောက်ပဲ..."

"အဓိပ္ပာယ်မရှိတာ..."

ချင်လော့က မျက်လုံးလှန်လိုက်၏။

နာမည်မှစ၍ သူတို့က ဓားတာအိုကို ကျင့်ကြံကြသည်မှာ သဘာဝကျကျ ထင်ရှားနေပေသည်။

"ပြီးတော့ သူမရဲ့ ဆရာက မဟာသူတော်စင်အဆင့် ဓားကျင့်ကြံသူ တစ်ယောက်ပဲ..."

ရှီးဟွမ်၏ ဤစကားက ချင်လော့ကို ဆွံ့အသွားစေခဲ့သည်။

စုချန်ချန်သည် မဟာသူတော်စင် တစ်ပါးဖြစ်သည်မှာ မှန်သော်လည်း အခြားသော မဟာသူတော်စင်အဆင့် ကျင့်ကြံသူများကို ရင်ဆိုင်ရချိန်တွင် မည်သူက ပိုမိုအားကောင်းပြီး မည်သူက အားနည်းမည်ကို ပြောရခက်ပေသည်။

စိတ်ခြေနေမကောင်းစွာဖြင့် ချင်လော့သည် လူသားဧကရာဇ်အလံထဲမှ ထွက်လာခဲ့ပြီး စနစ်ကို စတင်မေးမြန်းလိုက်သည်။

"မဟာသူတော်စင်အဆင့် ကျင့်ကြံသူကို ဘယ်လိုမျိုး အင်အားတိုးတက်အောင် လုပ်ပေးလို့ရမလဲ..."

[ဗီလိန်မှတ် ၁၃၀,၀၀၀ အသုံးပြု၍ အရှူးသက်တမ်းလျှော့ဆေးလုံး (သူတော်စင်အဆင့်မြင့်အဆင့်) ကို လဲလှယ်နိုင်ပါသည်။]

[သောက်သုံးပြီးနောက် သက်တမ်း ချက်ချင်း လျော့ကျသွားမည်ဖြစ်ပြီး စွမ်းအားမှာ ရုတ်တရက် တိုးတက်လာမည်ဖြစ်သည်။]

"တခြားတစ်ခု ပြောင်းလိုက်..."

ချင်လော့က ငြင်းဆန်လိုက်သည်။

ဗီလိန်မှတ် ၁၃၀,၀၀၀ နီးပါးကို အသုံးပြုရမည်ဆိုသည်ကို မဆိုထားနှင့်။

ရန်သူတစ်ထောင်ကို သတ်ပြီး မိမိဘက်မှ တစ်ထောင် ဆုံးရှုံးရမည့် ဤကဲ့သို့သော ဆေးလုံးမျိုးကို လဲလှယ်ရန် သူ့တွင် အကြောင်းပြချက် မရှိချေ။

[ဗီလိန်မှတ် ၁၀၀,၀၀၀ နှင့် ဆေးဖက်ဝင်အပင် အမြောက်အများကို အသုံးပြုပါက စနစ်က သင့်အတွက် အကြိမ်ကိုးဆယ်မိုးကြိုးကပ်ဘေးဆေးလုံး (သူတော်စင် ထိပ်တန်းအဆင့်) ကို ဖော်စပ်ပေးမည်ဖြစ်သည်။]

[မိုးကြိုးကပ်ဘေး၏ စွမ်းအားဖြင့် အဆီအနှစ်များကို ဆေးကြောပြီး ခြင်ဆီများကို ဖြတ်တောက်ပေးကာ မဟာသူတော်စင်အဆင့် ကျင့်ကြံသူကို အဆင့်တက်လှမ်းစေပြီး ခန္ဓာကိုယ်ကိုလည်း တိုးတက်စေကာ သက်တမ်းကို ရှည်ကြာစေသည့် အကျိုးသက်ရောက်မှုလည်း ရှိပါသည်။]

" တန်ဆေးဂိုဏ်းက အရင်းအမြစ်တွေ အားလုံးကို မင်းအတွက် ပေးဖို့ ပြောနေတာလား..."

ချင်လော့သည် စနစ်၏ အကြံအစည်ကို ချက်ချင်း သဘောပေါက်သွားပေ၏။

[စနစ် - ဗီလိန်မှတ်များ မလုံလောက်လျှင် အရင်းအမြစ်များကို အသုံးပြု၍ ဖြည့်တင်းပါ။ ဗီလိန်မှတ် ၁၀၀,၀၀၀ ဖြင့် လဲလှယ်ရခြင်းက တန်ဖိုးရှိပါသည်။]

"မင်းရဲ့ တွက်ချက်မှုပုတီးစေ့တွေက ငါ့မျက်နှာပေါ် ပြုတ်ကျတော့မယ်..."

"ကောင်းပြီ... တန်ဆေးဂိုဏ်းကို ချက်ချင်းသွားမယ်..."

ဤအချိန်တွင် တန်ဆေးဂိုဏ်း၏ ဂိုဏ်းကာကွယ်ရေး အစီအရင်ကို ဖွင့်လှစ်ထားပြီးဖြစ်ကာ လူအများအပြားက တန်ဆေးဂိုဏ်းကို ရှင်းလင်းရန် လျှို့ဝှက်စွာ ပုန်းအောင်းနေကြပေသည်။

"မင်း လှုပ်ရှားချင်နေတာလား..."

"ခဏစောင့်ဦး... တန်ဆေးဂိုဏ်းက နှစ်ပေါင်းများစွာ တည်ရှိနေခဲ့တာ... သူတို့က အရမ်းချမ်းသာပြီး အရင်းအမြစ်တွေ အများကြီးရှိမှာ သေချာတယ်... ဘယ်သူပဲဖြစ်ဖြစ် အရင်ဆုံး လှုပ်ရှားတဲ့သူက သေမှာပဲ..."

"ငါက ပွဲကြည့်ဖို့ လာတာပါ... တန်ဆေးဂိုဏ်းရဲ့ အဆက်အသွယ်က အရမ်းအားကောင်းတယ်... အားကောင်းတဲ့သူတွေ ဝင်ပါလာနိုင်တယ်လေ..."

ကြောက်မက်ဖွယ်ကောင်းသော အငွေ့အသက်တစ်ခုက တန်ဆေးဂိုဏ်း၏ ကောင်းကင်ထက်သို့ ကျဆင်းလာခဲ့ရာ လူအများအပြားက ထိုသူ့ထံသို့ အကြည့်များ ချက်ချင်း ရွှေ့လိုက်ကြသည်။

"သူတော်စင်ဘုရင်..."

"ဒါက တန်ဆေးဂိုဏ်းကို တိုက်ခိုက်ဖို့လား..."

သို့သော် ထိုသူတော်စင်ဘုရင်သည် တန်ဆေးဂိုဏ်းကို မတိုက်ခိုက်ဘဲ သူ၏အကြည့်က အမှောင်ထဲတွင် ပုန်းအောင်းနေသူများထံသို့ ကျရောက်သွားပေ၏။

"ငါ ဖုန်းထျန်းခွန်က တန်ဆေးဂိုဏ်းအပေါ် ကျေးဇူးရှိတယ်... တန်ဆေးဂိုဏ်းကို ဘယ်သူပဲ တိုက်ခိုက်ရဲပါစေ... ငါ့ကို ရိုင်းစိုင်းတယ်လို့ အပြစ်မတင်နဲ့..."

"ဖုန်ယွင်မျှော်စင်က ဖုန်းထျန်းခွန်ပဲ... သူက တကယ် ရှေ့ထွက်လာတာဆိုတော့ တန်ဆေးဂိုဏ်းက ဒီကပ်ဘေးကနေ လွတ်မြောက်သွားပုံရတယ်..."

"ဟားဟား... ဟုတ်လို့လား... မင်းတို့ လူတစ်ယောက်ကို မေ့နေကြပြီလား... မဟာချင်အင်ပါယာရဲ့ ချင်လော့လေ..."

ပြောရင်းဆိုရင်းနှင့်ပင် ရောက်လာတော့သည်။

ဖုန်းထျန်းခွန်၏ စကားဆုံးသွားသည်နှင့် ချင်လော့၏ အသံ ထွက်ပေါ်လာခဲ့သည်။

"တန်ဆေးဂိုဏ်းရဲ့ သူတော်စင်သားတော် ရဲ့ချန်က ဝူယွမ်စစ်သူကြီးစံအိမ်ကို သတ်ဖြတ်ဖျက်ဆီးမှုမှာ ပါဝင်ခဲ့တယ်... ဆိုးရွားတဲ့ ရာဇဝတ်မှုဖြစ်လို့ အပြစ်ပေးခံရပြီးပြီ..."

"တန်ဆေးဂိုဏ်းချုပ် လုယွမ်က မဟာချင်အင်ပါယာရဲ့ မင်းသားကို သတ်ဖြတ်ဖို့ ကြံစည်မှုနဲ့ သံသယရှိခံရတယ်... သူ့ရဲ့ ရာဇဝတ်မှုက သေဒဏ်ပေးခံရဖို့ ထိုက်တန်တယ်..."

"ဒီနေ့ တန်ဆေးဂိုဏ်းကို ဘယ်သူမှ ကာကွယ်လို့မရဘူး…ဒါ ငါ ချင်လော့ရဲ့စကားပဲ ”