အခန်း ၁၉၀၄

အခန်း(၁၉၀၄) လီမျိုးနွယ်စု၏ ခြိမ်းခြောက်မှုနှင့် လီချန်းယွမ် ရောက်ရှိလာခြင်း

အမှန်စင်စစ် ဤကျိုင်းမှာ ဖန်ဆင်းရှင်အဆင့် အထွတ်အထိပ်သို့ ရောက်ရှိခဲ့သူတစ်ဦး ချန်ထားရစ်ခဲ့သော မှော်လက်နက်တစ်ခု ဖြစ်သည်။ လက်နက်သွန်းလုပ်ခြင်း အတတ်ပညာတွင် လူသားများနှင့် နတ်ဆိုးများကြား အနည်းငယ် ကွာဟချက် ရှိသည်ဆိုသော်လည်း၊ ဤအဆင့်ရှိ ကျွမ်းကျင်သူတစ်ဦးအနေဖြင့် အစွမ်းထက်သော နတ်ဘုရားလက်နက်တစ်ခုကို ပိုင်ဆိုင်ရန် အခြေအနေမှာ သဘာဝကျလှပေသည်။

ကျိုင်းပေါ်၌ ရှေးဟောင်းအက္ခရာစာလုံးများ ရစ်ပတ်ထွင်းထုထားကာ တောင်တန်းများနှင့် မြစ်ချောင်းများ၏ ရှုခင်းများကိုလည်း ရေးဆွဲထားသည်။

ခဏအကြာတွင် လီအိမ်တော်၏ တံခါးကြီးများ ပွင့်လာခဲ့သည်။ အိမ်တော်ထိန်းဟု ထင်ရသော အဖိုးအိုတစ်ဦး၏ ဦးဆောင်မှုဖြင့် လူအုပ်စုတစ်စုမှာ စီတန်းထွက်လာကြသည်။

"အားလုံးပဲ နားထောင်ကြပါ။ ဟျန်ထျန်းမြို့စားက အခု ဒီ အရှေ့ပင်လယ်ကို ကိုယ်တိုင်ရောက်ရှိလာပြီး ခင်ဗျားတို့အားလုံးနဲ့ မိတ်ဖက်အသစ်တွေ ဖွဲ့ဖို့ လာတာဖြစ်ပါတယ်။ သူ ဒီနေရာမှာ ရေရှည်အတွက် အရင်းအမြစ် စုဆောင်းရေးစခန်းတစ်ခုကို တည်ထောင်မှာပါ။ ကျွန်တော်တို့ လိုအပ်တဲ့ ပစ္စည်းမှန်သမျှကို နောင်မှာ ဆက်လက်ဝယ်ယူသွားမှာ ဖြစ်ပါတယ်။ ဒါကတော့ ကျွန်တော်တို့ ရှာဖွေနေတဲ့ ပစ္စည်းစာရင်းပါပဲ။"

အိမ်တော်ထိန်းအဖိုးအိုက လက်ကိုဝှေ့ယမ်းလိုက်သောအခါ သူ၏ရှေ့တွင် ဖန်သားပြင်တစ်ခု ပေါ်လာသည်။ ထိုဖန်သားပြင်ပေါ်တွင် ရတနာများစွာ၏ စာရင်းကို ဖော်ပြထား၍ စာရင်း၏အဆုံးတွင် ဝယ်ယူမည့်ဈေးနှုန်းများကိုပါ ဖော်ပြထားသည်။

လူအများအပြားမှာ အံ့အားသင့်ကာ အသက်ရှုပင် မှားသွားကြသည်။ ကောင်းကင်နှင့် မြေကြီး၏ ရတနာမျိုးစုံကို ဝယ်ယူရန် လိုအပ်သော ပမာဏက များပြားလှပေသည်။ လီမျိုးနွယ်စုမှာ မည်မျှအထိ ချမ်းသာကြွယ်ဝကြောင်း ခန့်မှန်းကြည့်ရုံနှင့် သိနိုင်သည်။

အရှေ့ပင်လယ်တွင် တရှ၌ မရှိသော ကောင်းကင်ဘုံအရင်းအမြစ်များစွာ ရှိနေသည်။ ထို့ကြောင့် တရှရှိ အထက်တန်းလွှာ မျိုးနွယ်စုများနှင့် ဂိုဏ်းအသီးသီးကအရှေ့ပင်လယ်ရှိ ကျွန်းစုများပေါ်တွင် အထူးအရင်းအမြစ် စုဆောင်းရေးစခန်းများကို တည်ထောင်လေ့ရှိကြသည်။

"ရောင်းချချင်တဲ့သူတွေ ကျွန်တော့်နောက်ကို လိုက်ခဲ့ကြပါ။ စာရင်းသွင်းပေးမယ့်သူတွေ ရှိပါလိမ့်မယ်။ ဘယ်သူ့ကိုမှ မလိမ်ညာပါဘူး" အိမ်တော်ထိန်းက ပြောလိုက်သည်။

"ဒါပေမဲ့ ဒီအခွင့်အရေးကို သုံးပြီး ပြဿနာလာရှာမယ့်သူ ရှိရင်တော့ ကျွန်တော်တို့ကို အပြစ်မတင်ပါနဲ့။ ဟျန်ထျန်း မြို့ဝန် အိမ်တော်ဆိုတာ အခြေအမြစ်မရှိတဲ့ အင်အားစုသေးသေးလေး မဟုတ်ဘူး။ မကောင်းတဲ့ စိတ်ကူးတွေ မရှိကြဖို့ အကြံပေးပါရစေ"

အိမ်တော်ထိန်း ပြောနေစဥ်၌ပင် လူတိုင်း၏ နှလုံးသားကို ဖိနှိပ်ထားနိုင်သော အရှိန်အဝါလှိုင်းများ သိသိသာသာ ထွက်ပေါ်လာသည်။

ဖန်ဆင်းရှင်အဆင့်

လူအများမှာ ထိတ်လန့်စွာဖြင့် အသက်ရှူရပ်မတတ် ဖြစ်သွားကြသည်။ ဟျန်ထျန်းမြို့ဝန် အိမ်တော်ထိန်းတစ်ဦးကပင် ဖန်ဆင်းရှင်အဆင့်၌ရှိသည်။ အရှေ့ပင်လယ်တွင် ဖန်ဆင်းရှင်အဆင့်ဟူသည် အဘယ်ကဲ့သို့သော အခြေအနေမျိုးနည်း။

၎င်းတို့မှာ ကျွန်းတစ်ကျွန်းကို စိုးမိုးကာ ကျွန်းအရှင်သခင် ဖြစ်နိုင်သော၊ ဘိုးဘေးအဆင့်ရှိသော အရှင်သခင်များ ဖြစ်ကြသည်။

ယခုမူ ထိုကဲ့သို့သော ပုဂ္ဂိုလ်က လီချန်းယွမ်၏ အိမ်တော်ထိန်း ဖြစ်နေသည်။ ဤသည်မှာ သာမန်ကိစ္စမဟုတ်ပေ။ လူတိုင်းက အခြားသူများကို ဝေ့ဝဲကြည့်လိုက်ရာ အိမ်တော်ထိန်း၏ နောက်ကွယ်ရှိ အစောင့်များအားလုံးမှာလည်း စကြဝဠာအဆင့်များ ဖြစ်နေကြသည်ကို တွေ့လိုက်ရသည်။

ဤမျှလောက်သော ကျွမ်းကျင်သူများ စီတန်းရပ်နေခြင်းမှာ အမှန်တကယ်ပင် ကြီးမားသော ခြိမ်းခြောက်မှုတစ်ခု ဖြစ်ပေသည်။

လူအများမှာ ထိတ်လန့်မှုမှ ပြန်လည်သက်သာလာပြီးနောက် ဟျန်ထျန်းအိမ်တော်က ၎င်းတို့၏ အင်အားအခြေခံကို ပေါ်ပေါ်တင်တင် ပြသခြင်းဖြင့် မကောင်းသော အကြံရှိသူများကို ဟန့်တားနေခြင်းဖြစ်ကြောင်း နားလည်သွားကြသည်။ အရှေ့ပင်လယ်မှာ တရှကဲ့သို့ စနစ်တကျ မရှိပေ။ လူသတ်၍ ရတနာလုယူခြင်းမှာ ထူးဆန်းသော ကိစ္စမဟုတ်ပေ။

ဤသီးသန့်ကျင့်ကြံသူများသည် တရားဝင်သည်ဖြစ်စေ၊ နတ်ဆိုးများဖြစ်စေ "အင်အားကြီးသူကသာ အမှန်" ဟူသော နိယာမကို ယုံကြည်ကြသည်။ ကြီးမားသော အမြတ်အစွန်းများ၏ ဆွဲဆောင်မှုအောက်တွင် အချို့လူများမှာ စွန့်စားကြရန် ဝန်လေးကြမည်မဟုတ်ပေ။

သို့သော် လူအများအပြားမှာ ကြိုတင်ပြင်ဆင်လာခဲ့ကြပုံရသည်။ စာရင်းကို ကြည့်ပြီးနောက် ၎င်းတို့ မည်မျှရောင်းနိုင်မည်ကို အမြန်ဆုံး အတည်ပြုကာ လီအိမ်တော်ထဲသို့ ဝင်ရန် တန်းစီကြတော့၏။ ထိုအခါမှသာ ချူယွင်ဖန်သည် လူများစွာ အဘယ်ကြောင့် ဤနေရာတွင် စုဝေးနေရကြောင်း သဘောပေါက်သွားသည်။ ဟျန်ထျန်းမြို့ဝန်က ဤသတင်းကို ကြိုတင်ဖြန့်ဝေထားခဲ့သဖြင့် လူအများကို ဆွဲဆောင်နိုင်ခဲ့ခြင်း ဖြစ်ပေလိမ့်မည်။ တရှရှိ အင်အားစုများမှာ အရှေ့ပင်လယ်ထဲသို့ ခြေမရှုပ်ချင်ကြသော်လည်း ငွေကြေးနှင့် ပတ်သက်လာလျှင်မူ မည်သူမျှ ငြင်းဆန်ကြမည် မဟုတ်ပေ။

ဟျန်ထျန်းမြို့ဝန်၏ အိမ်တော်က ကြီးမားသော သုံးစွဲမှုသည် သီးသန့်ကျင့်ကြံသူ အများအပြားကို ဆွဲဆောင်နိုင်ခဲ့သည်။

'စိတ်ဝင်စားဖို့ ကောင်းသားပဲ'

ချူးယွင်ဖန်းက ထိုမြင်ကွင်းကို ကြည့်နေသော်လည်း လှုပ်ရှားရန် အလျင်မလိုသေးပေ။ အဘယ်ကြောင့်ဆိုသော် အိမ်တော်အတွင်းမှ ပို၍ အစွမ်းထက်သော အရှိန်အဝါများ ထွက်ပေါ်နေသည်ကို သူ ခံစားမိနေသောကြောင့် ဖြစ်သည်။ ထိုနေရာတွင် အစောင့်အကြပ်အဖြစ် ရှိနေသော ဖန်ဆင်းရှင်အဆင့်က တစ်ယောက်တည်း မဟုတ်ပေ။

'ဒါဟာ လီချန်းယွမ် တစ်ယောက်တည်း ပိုင်ဆိုင်နိုင်တဲ့ အင်အားမျိုး မဟုတ်တာတော့ သေချာတယ်။ သူ ဖန်ဆင်းရှင်အဆင့်ကို အခုမှ ရောက်ခါစပဲ ရှိသေးတာ။ သူ့မှာ နောက်လိုက် ဖန်ဆင်းရှင်တွေ ရှိနေဦးတော့၊ ဒီလောက်ထိ များနေဖို့ဆိုတာ မဖြစ်နိုင်ဘူး'

လီအိမ်တော်အတွင်း၌ ဖန်ဆင်းရှင် ပေါင်း ၂၀ ထက်မနည်း ရှိနေသည်ကို ချူးယွင်ဖန်း အာရုံခံမိလိုက်သည်။ မှန်သည်။ ဤအရေအတွက်မှာ နတ်ဆိုးနတ်ဘုရားဂိုဏ်းက ချူးယွ၍်ဖန်းကို ချုံခိုတိုက်ခိုက်စဉ်က အင်အားနှင့် မနှိုင်းယှဉ်နိုင်သော်လည်း၊ ကြီးမားလှသော အင်အားတစ်ခု ဖြစ်နေဆဲပင်ဖြစ်သည်။ စကြဝဠာအဆင့်များကိုပါ ထည့်သွင်းရေတွက်လျှင် ပို၍ပင် များပြားပေလိမ့်မည်။

ဤအင်အားမှာ လီချန်းယွမ်၏ နောက်ကွယ်ရှိ လီမျိုးနွယ်စုနှင့် သက်ဆိုင်သလား သို့မဟုတ် အိမ်ရှေ့မင်းသားနှင့် သက်ဆိုင်သလားဆိုသည်ကို သူ မသိသော်လည်း၊ မည်သည့်အင်အားစုဖြစ်စေ ၎င်းတို့မှာ အင်အားကြီးမားလှသော ပုဂ္ဂိုလ်ကြီးများပင် ဖြစ်သည်။

လီချန်းယွမ်သည် ဤမျှ ငယ်ရွယ်သော အသက်အရွယ်ဖြင့် တရှ၏ ဟျန်ထျန်းမြို့ဝန် ဖြစ်လာနိုင်ခြင်း၊ လူငယ်မျိုးဆက်ထဲတွင် ပထမဆုံးမြို့ဝန် နှင့် ထိပ်တန်းကျွမ်းကျင်သူ ဖြစ်လာနိုင်ခြင်းမှာ သာမန်လူတန်းစား နောက်ခံမှ လာခြင်းမဟုတ်ကြောင်း ထင်ရှားလှပေသည်။

လီမျိုးနွယ်စုသည် စစ်ဘက်ဆိုင်ရာ အထက်တန်းလွှာ မျိုးနွယ်စုဖြစ်၍ မြို့ဝန်ပေါင်းများစွာကို မျိုးဆက်နှင့်ချီ၍ မွေးထုတ်ပေးခဲ့သည့်အတွက် ၎င်းတို့၏ အရှိန်အဝါမှာ အလွန်ပင် ကြီးမားလှပေသည်။

အိမ်ရှေ့မင်းသားနှင့် ပတ်သက်လျှင်မူ၊ သူသည် ဧကရာဇ်၏ သားကြီးဖြစ်သည့်အပြင် အိမ်ရှေ့စံအဖြစ် ခန့်အပ်ခံထားရသည်မှာ ကြာပြီဖြစ်ရာ နန်းတွင်း၌ နောက်လိုက်နောက်ပါ အမြောက်အမြားရှိသည်။ လီချန်းယွမ်နှင့် နှိုင်းယှဉ်လျှင် အိမ်ရှေ့မင်းသားမှာ အမှန်တကယ်ပင် ယှဉ်နိုင်သူမရှိသော သားရဲကြီးတစ်ကောင်နှင့် တူလှသည်။

သို့သော်လည်း လီချန်းယွမ်၏ ရည်မှန်းချက်မှာ အမွေအနှစ်တစ်ခုကို သိမ်းပိုက်ရန်ဖြစ်ပါက သူသည် ကျွမ်းကျင်သူ အမြောက်အမြားကို ခေါ်ဆောင်လာရမည်ဖြစ်ကြောင်း ချူးယွင်ဖန်း နားလည်ထားသည်။ ထိုရှေးဟောင်းအမွေအနှစ်များကို အလွယ်တကူ ရယူနိုင်ရန်မှာ မဖြစ်နိုင်ပေ။ ထို့ကြောင့် ချူယွင်ဖန်သည် လှုပ်ရှားရန် အလျင်မလိုဘဲ မြို့ထဲရှိ ဟိုတယ်တစ်ခုတွင် တည်းခိုနေထိုင်ခဲ့သည်။

အချိန်ကုန်လွန်လာသည်နှင့်အမျှ လီအိမ်တော်သို့ လာရောက်သူ ပိုမိုများပြားလာပြီး အိမ်တော်ပတ်ဝန်းကျင်၌ ဈေးတန်းလေးတစ်ခုပင် ဖြစ်ပေါ်လာသည်။ လူအများအပြားမှာ လီအိမ်တော်က လိုအပ်သည့် အရင်းအမြစ်များကို မပိုင်ဆိုင်ထားကြသော်လည်း၊ ဤရှားပါးသော အခွင့်အရေးကို အသုံးချကာ ၎င်းတို့လိုအပ်သည့် အရင်းအမြစ်များကို အချင်းချင်း အလဲအလှဲ ပြုလုပ်ကြသည်။

ချူးယွင်ဖန်းက လီအိမ်တော်ကို အဝေးမှနေ၍ စောင့်ကြည့်နေခဲ့သည်။ သူသည် လှုပ်ရှားရန် အလျင်မလိုဘဲ အကောင်းဆုံး အခွင့်အရေးကို စောင့်ဆိုင်းရင်း သူ၏ ကျင့်ကြံမှုကို ခိုင်မာအောင် ပြုလုပ်လျက်ရှိ၏။ ရက်အနည်းငယ်အတွင်း၌ပင် ကျွမ်းကျင်သူများစွာ အဝင်အထွက် ပြုလုပ်နေကြသည်ကို သူမြင်လိုက်ရကာ ကျွမ်းကျင်သူ အရေအတွက်မှာလည်း တဖြည်းဖြည်း ပိုမိုများပြားလာသည်။ ကောင်းကင်ယံတွင် ပျံသန်းနေသော အင်အား ၃,၀၀၀ ခန့်ရှိသည့် အထူးတပ်ဖွဲ့တစ်ခုကိုပင် သူ သတိပြုမိလိုက်သည်။ သို့သော် ၎င်းမှာ တရှ၏ တပ်မတော်မဟုတ်ဘဲ လီမျိုးနွယ်စု၏ ကိုယ်ပိုင်တပ်သာ ဖြစ်သည်။

ဤကိုယ်ပိုင်တပ်မှာ အလွန်ပင် စွမ်းရည်ထက်မြက်လှသည်။ ချူးယွင်ဖန်း အစွမ်းကုန် လေ့ကျင့်ပေးထားသည့် 'အပြင်တပ်မတော်' နှင့် မနှိုင်းယှဉ်နိုင်သော်လည်း ရှားပါးလှသော အထူးတပ်ဖွဲ့တစ်ခု ဖြစ်နေဆဲပင်ဖြစ်၏။ ကျွမ်းကျင်သူများဖြစ်စေ၊ ကိုယ်ပိုင်တပ်ကိုဖြစ်စေ လီမျိုးနွယ်စုက ဖုံးကွယ်ထားခြင်း မရှိပေ။ လူတိုင်းကို သိစေချင်သကဲ့သို့ အလွန်ပင် လူသိရှင်ကြား ပြသနေကြသည်။ ကျင့်ကြံခြင်းလောကတွင် အတွေ့အကြုံနည်းပါးသူများပင်လျှင် လီမျိုးနွယ်စု၏ ရည်မှန်းချက်ကို မြင်နိုင်ပေသည်။ ၎င်းတို့သည် အရှေ့ပင်လယ်ရှိ အင်အားစုအသီးသီးကို ခြိမ်းခြောက်ဟန့်တားရန်နှင့် ထိုသူများ စွန့်စားတိုက်ခိုက်လာခြင်းကို ကာကွယ်ရန် ကြိုးစားနေကြခြင်းဖြစ်သည်။

သို့သော် လီမျိုးနွယ်စုက ပိုမိုဝင့်ကြွားလာသည်နှင့်အမျှ စူးစမ်းစုံစမ်းလိုသူများလည်း ပိုမိုများပြားလာသည်။ နောက်ဆုံးတွင် ထိုနေ့၌ သတင်းတစ်ခုမှာ မြို့တစ်မြို့လုံးသို့ ပျံ့နှံ့သွားလေတော့သည်။

ဟျန့်ထျန်း မြို့ဝန် လီချန်းယွမ် ရောက်ရှိလာပြီ။

--