အခန်း ၁၉၀၅

အခန်း(၁၉၀၅) ရေအောက်လှိုင်းများ အရှိန်ပြင်းလာခြင်း နှင့် အဖြစ်အပျက်ကြီးတစ်ခု၏ အစ

ဤသတင်းကြောင့် မြို့တစ်မြို့လုံး ဆူညံပွက်လောရိုက်သွားတော့သည်။ ဤကာလအတွင်း လီမျိုးနွယ်စုသည် အလွန်ပင် ဝင့်ကြွားပြသနေခဲ့သဖြင့် အနီးနားရှိ သီးသန့်ကျင့်ကြံသူများပင်လျှင် လီချန်းယွမ် ကိုယ်တိုင် အရှေ့ပင်လယ်သို့ လာရောက်မည်ဖြစ်ကြောင်း သိရှိထားကြသည်။

"နောက်ဆုံးတော့ သူရောက်လာပြီပဲ။ ဒီလောက် ခမ်းနားကြီးကျယ်တဲ့ ပြပွဲမျိုး ငါတစ်ခါမှ မမြင်ဖူးဘူး”

"ဒါက ဘာဆန်းလို့လဲ? လီချန်းယွမ်ဆိုတာ လူငယ်မျိုးဆက်ထဲမှာ နံပါတ်တစ် ကျွမ်းကျင်သူဖြစ်သလို ပါရမီရှင်စာရင်း မှာလည်း ထိပ်ဆုံးကပဲလေ”

"ဟုတ်တယ်။ ဘာမှ အလွဲအချော်မရှိဘူးဆိုရင် သူက နောင်ကျ တရှစစ်တပ် ထိပ်တန်းခေါင်းဆောင်ကြီးတွေထဲက တစ်ယောက် ဖြစ်လာမှာ သေချာတယ်။ တရှစစ်တပ်ရဲ့ အနာဂတ် စစ်သေနာပတိချုပ်တောင် ဖြစ်လာနိုင်တယ်”

"ငါကြားတာတော့ သူက တရှရဲ့ အိမ်ရှေ့မင်းသားကို ထောက်ခံတဲ့သူတဲ့။ အိမ်ရှေ့မင်းသားသာ ထီးနန်းတက်နိုင်မယ်ဆိုရင် သူက တကယ်ကို စစ်သေနာပတိချုပ် ဖြစ်လာနိုင်တာပေါ့"

လူအသီးသီးက ဝေဖန်ဆွေးနွေးနေကြသော်လည်း ပတ်ဝန်းကျင်၌ အင်အားစုအမျိုးမျိုးမှ လာသော သူလျှိုများမှာလည်း ပိုမိုများပြားလာသည်။ လီချန်းယွမ်သည် အရှေ့ပင်လယ်တွင်ရှိသော ရှေးဟောင်းအမွေအနှစ်တစ်ခုကို သိမ်းပိုက်ရန် လာရောက်ခြင်းဖြစ်သည်ဟူသော သတင်းများလည်း ထွက်ပေါ်နေသည်။

ဤသည်မှာ မည်သူ့အတွက်မျှ မထူးဆန်းပေ။ ထိုကဲ့သို့သော ထူးကဲသည့် ပါရမီရှင်များသာ လျင်မြန်စွာ ကြီးထွားလိုပါက မည်သူမျှ အဆင့်လိုက် အေးအေးဆေးဆေး ကျင့်ကြံနေကြမည်မဟုတ်ပေ။ ခြေလှမ်းတိုင်း၌ ခုန်ပျံကျော်လွှားသော တိုးတက်မှုများဖြစ်လေ့ရှိကာ သဘာဝကျသော ကံကောင်းမှုများလည်း ကြုံတွေ့ရစမြဲဖြစ်သည်။

လီချန်းယွမ်၊ လီမျိုးနွယ်စုနှင့် အိမ်ရှေ့မင်းသားတို့မှာ အင်အားကြီးမားလှသော်လည်း "အဝေးက နဂါးသည် အနီးက မြွေကို မနှိပ်ကွပ်နိုင်" ဟူသော စကားပုံကဲ့သို့ပင်၊ ဤနေရာမှာ မဟာရှား၏ ထိန်းချုပ်မှုကို မနာခံသော လေလွင့်ကျင့်ကြံသူများ စုဝေးရာနေရာ ဖြစ်သည်။ ထို့ကြောင့် ဤအမွေအနှစ်ကို မျက်စိကျနေသူများစွာ ရှိနေသလို၊ အခွင့်ကောင်းယူလိုသူများလည်း စုဝေးနေကြသည်။

ယခုအခါတွင်မူ မည်သူက ပို၍ စွမ်းဆောင်နိုင်မည်နည်းဆိုသည်ကို ဆုံးဖြတ်ရမည့် အချိန်ပင် ဖြစ်သည်။

လီအိမ်တော်အတွင်း၌ လီချန်းယွမ်သည် သူရောက်ရှိလာသည်နှင့်တစ်ပြိုင်နက် ကြိုတင်ရောက်နှင့်နေသော ကျွမ်းကျင်သူအားလုံးကို စုဝေးစေခဲ့သည်။ ထိုသူများထဲမှ အများအပြားမှာ လီချန်းယွမ်ထက် ပို၍ အစွမ်းထက်ကြသော်လည်း အားလုံးက သူ့ကိုသာ ခေါင်းဆောင်အဖြစ် နာခံကြသည်။

"ဘာတွေဖြစ်ခဲ့တာလဲ။ သတင်းက ဘယ်လိုလုပ်ပြီး ပေါက်ကြားသွားရတာလဲ" လီချန်းယွမ်က မေးခွန်းထုတ်လိုက်သည်။

အိမ်တော်ထိန်းက ရှေ့သို့တက်ကာ ရှင်းပြသည်။

"အမွေအနှစ် ပေါ်ထွက်လာတဲ့အချိန်မှာ ရုတ်ရုတ်သဲသဲတွေ အကြီးအကျယ် ဖြစ်ခဲ့ပါတယ်။ ဒီသတင်းကို သိတာ ကျွန်တော်တို့ တစ်ဖွဲ့တည်း မဟုတ်ပါဘူး။ တစ်ယောက်ယောက်က ဒီကိစ္စကို ပိုပြီး ရှုပ်ထွေးသွားအောင် သတင်းလွှင့်လိုက်တာ ဖြစ်နိုင်ပါတယ်။ ဒါမှ ရေနောက်ရင် ငါးဖမ်းလို့ ရမှာလေ။"

"အခုတော့ ကျွန်တော်တို့ ဖုံးကွယ်ထားလို့ မရတော့တဲ့အတွက် ပိုပြီး ဝင့်ကြွားတဲ့ပုံစံနဲ့ သတင်းကို ဖြန့်လိုက်တာပါ။ ဒါမှ မကောင်းတဲ့ အကြံရှိသူ အများစုကို ခြိမ်းခြောက်ဟန့်တားနိုင်မှာ ဖြစ်ပါတယ်။"

"ဟမ် ငါနဲ့ လီမျိုးနွယ်စုဆီကနေ အခွင့်ကောင်းယူချင်တယ်ပေါ့။ သူတို့မှာ အဲ့လောက်ထိ ထက်တဲ့ သွားတွေ ရှိမရှိ ကြည့်ရသေးတာပေါ့!" လီချန်းယွမ်က နှာခေါင်းရှုံ့၍ ပြောလိုက်သည်။

ဤတစ်ကြိမ်တွင် သူသည် လီမျိုးနွယ်စုမှ ကျွမ်းကျင်သူများစွာကို စုစည်းခဲ့ရုံသာမက အိမ်ရှေ့မင်းသားထံမှလည်း ကျွမ်းကျင်သူအချို့ကို ငှားရမ်းခဲ့သည်။

"ဒါပေမဲ့ ဘာမှမဖြစ်ပါဘူး။ ငါတို့မျိုးနွယ်စုက အရှေ့ပင်လယ်မှာ အခြေချချင်တယ်ဆိုရင် ဒီလူတွေနဲ့ ထိပ်တိုက်တွေ့မှာ မလွဲမသွေပဲ။ ဒီတစ်ခါတော့ ငါတို့မျိုးနွယ်စုရဲ့ အင်အားကို ပြလိုက်ရမယ်၊ ဒါမှ နောက်ခါကျရင် ငါတို့ကို လာပြီး ပြဿနာမရှာရဲတော့မှာ" လီချန်းယွမ်က အေးစက်စွာ ပြော၏။

သူသည် ဟျန်ထျန်းမြို့ဝန် တစ်ဦးဖြစ်ရုံသာမက လီမျိုးနွယ်စု၏ အကြီးဆုံးတပည့်နှင့် နောက်တက်မည့် မျိုးနွယ်စုခေါင်းဆောင် ဖြစ်သည်နှင့်အညီ မျိုးနွယ်စု၏ အကျိုးစီးပွားကိုလည်း ထည့်သွင်းစဉ်းစားရပေသည်။

တရှတစ်ခွင်၌ အင်အားစုအမျိုးမျိုးမှာ ရောယှက်နေကြသည်။ အကျိုးအမြတ်တစ်ခုခု ရလိုပါက ဝံပုလွေများ၏ ပါးစပ်ထဲမှ အသားကို လုယူရသကဲ့သို့ပင် အလွန်ခက်ခဲလှသည်။ ၎င်းနှင့် နှိုင်းယှဉ်လျှင် အရှေ့ပင်လယ်တွင် ရှားပါးရတနာများစွာ ရှိနေသကဲ့သို့ ရှေးကျင့်ကြံသူကြီးများ ချန်ထားရစ်ခဲ့သော အမွေအနှစ်များမှာလည်း ရေတွက်၍မရအောင် ရှိနေသည်။

ဤနေရာသည် အဆုံးမရှိသော ရတနာသိုက်ကြီးသဖွယ် ဖြစ်သော်လည်း အရှေ့ပင်လယ်ရှိ အင်အားစုများကို စုစည်းနိုင်မည့် အင်အားမျိုး မရှိသေးသဖြင့် မပြုပြင်ရသေးသော မြေရိုင်းကြီးသဖွယ် ဖြစ်နေပေသည်။

ထို့ကြောင့် လွန်ခဲ့သောနှစ်အနည်းငယ်အတွင်း တရှ အင်အားစုအများအပြားမှာ အရှေ့ပင်လယ်ကို ပစ်မှတ်ထားလာကြသည်။ လီမျိုးနွယ်စုသည်လည်း ချွင်းချက်မဟုတ်ပေ။ အရှေ့ပင်လယ် ဒေသခံများအတွက်မူ ဤသည်မှာ နဂါးတစ်ကောင်က မြစ်ကိုဖြတ်ကျော်ကာ နယ်ကျွံလာသကဲ့သို့ပင် ဖြစ်သည်။ လူအများအပြားမှာ ဤအချက်အပေါ် မကျေမနပ်ဖြစ်နေကြ၍ ပေါက်ကွဲထွက်ရန် အခွင့်အရေးကို စောင့်ဆိုင်းနေကြသည်။

လီချန်းယွမ်သည် ဤအခွင့်အရေးကို အသုံးချကာ သူ၏မျိုးနွယ်စုကို ဆန့်ကျင်လိုသူအားလုံးကို အမြစ်ပြတ်ရှင်းလင်းပစ်ရန်နှင့် လီမျိုးနွယ်စု အရှေ့ပင်လယ်သို့ ခြေချနိုင်ရန် အခြေခံအုတ်မြစ်ချပေးရန် ရည်ရွယ်ထားသည်။ ဤသည်မှာ မျိုးနွယ်စုက သူ့အား ပေးအပ်ထားသော တာဝန်တစ်ခုပင် ဖြစ်သည်။ အကယ်၍ သူသာ ဤတာဝန်ကို ကောင်းမွန်စွာ ပြီးမြောက်အောင်မြင်ပါက သူ၏ အမွေဆက်ခံသူနေရာမှာ ပို၍ ခိုင်မာလာမည်ဖြစ်ကာ အကယ်၍ ကျရှုံးခဲ့ပါက သူ၏ ဂုဏ်သိက္ခာကို ထိခိုက်စေနိုင်ပေသည်။ ၎င်းမှာ သေလောက်သည့် ထိုးနှက်ချက်မျိုး မဟုတ်လျှင်ပင် သူကဲ့သို့ မာနကြီးသူတစ်ဦးအဖို့ လုပ်ဆောင်သမျှကို အကောင်းဆုံးဖြစ်အောင် လုပ်ဆောင်ရမည်ဟု ခံယူထားသည်။

"ငါတို့ အဲဒီအမွေအနှစ်ကို ရအောင်ယူရမယ်" လီချန်းယွမ်က ကြေညာလိုက်သည်။

"ဒီအမွေအနှစ်ဟာ ငါ့ရဲ့ နောက်ထပ်ခြေလှမ်းအတွက် အရေးပါတယ်။ ဘာအမှားအယွင်းမှ အဖြစ်မခံနိုင်ဘူး။ မနက်ဖြန်ကျရင် ငါတို့ ထွက်ခွာပြီး အမွေအနှစ်ရှိတဲ့ အပျက်အစီးတွေဆီကို အမြန်ဆုံး သွားကြမယ်။ ငါတို့လမ်းကို ပိတ်ဆို့ရဲတဲ့သူမှန်သမျှ အသေသတ်ပစ်ရမယ်။"

သူ၏ နှလုံးသားထဲတွင် နောက်ထပ်လုပ်ဆောင်ရမည့် အရာတစ်ခုသာ ရှိတော့သည်၊ ၎င်းမှာ မင်းသမီးကြီး၏ ကြင်ယာတော်ရွေးပွဲတွင် အနိုင်ရရှိရန်နှင့် အိမ်ရှေ့မင်းသားအတွက် သူမ၏ ထောက်ခံမှုကို ရရှိရန်ပင် ဖြစ်သည်။ မည်သူနှင့် လက်ထပ်ရမည်ဆိုသည်ကိုမူ သူ ဂရုမစိုက်ပေ။

သို့သော်လည်း လူတိုင်းက တစ်ဦးပြီးတစ်ဦး ဖန်ဆင်းရှင်အဆင့်သို့ တက်လှမ်းလာသဖြင့် သူ၏ မူလအားသာချက်မှာ မရှိတော့ပေ။ ၎င်းမှာ သူ့အတွက် အတိုင်းအတာတစ်ခုအထိ ဖိအားဖြစ်စေသည်။ သို့သော် ဤအမွေအနှစ်ကို ရရှိပြီးနောက်တွင်မူ သူ၏ ကျင့်ကြံမှုမှာ လူတိုင်းကို တစ်ဖန် ပြန်လည်ကျော်တက်သွားမည်ဖြစ်သည်။ သူသည် သူ၏ အကြွင်းမဲ့ အင်အားကို အသုံးချကာ အမြဲတမ်း နံပါတ်တစ် ဖြစ်ကြောင်းနှင့် မည်သည့် သာမန်လူစားမျိုးကမျှ သူ့ကို လောဘတက်၍ မရနိုင်ကြောင်း လူတိုင်းကို သိစေချင်နေ၏။

"ဟုတ်ကဲ့ပါ အရှင်!" ဟု ခန်းမအတွင်းရှိ လူတိုင်းက သဘောတူညီကြသည်။

လီချန်းယွမ်မှာ ၎င်းတို့ထက် မျိုးဆက်ငယ်သူတစ်ဦး ဖြစ်သော်လည်း အားလုံးက သူ့ကို ရိုသေလေးစားမှု ပြသကြသည်။ ၎င်းတို့၏ ကျင့်ကြံမှုမှာ အကန့်အသတ်သို့ ရောက်ရှိနေပြီဖြစ်ပြီး အနာဂတ်တွင် ထပ်မံတိုးတက်ရန် အခွင့်အလမ်း အလွန်နည်းပါးကြောင်း သူတို့ သိထားကြသောကြောင့် ဖြစ်သည်။ လီချန်းယွမ်မှာမူ ထိုသို့မဟုတ်ပေ။ လောလောဆယ်တွင် သူသည် ၎င်းတို့ထက် အနည်းငယ် အင် အားနည်းနေသေးသော်လည်း၊ ၎င်းတို့အားလုံးကို လုံးဝကျော်တက်သွားရန်မှာ ကြာတော့မည်မဟုတ်ပေ။

ဤကိစ္စကို အမြဲမပြတ် စောင့်ကြည့်နေသော ချူးယွင်ဖန်းလည်း သတင်းကို မကြာမီ ကြားလိုက်ရသည်။ သို့သော်လည်း သူသည် ပေါ့ပေါ့ဆဆ မလှုပ်ရှားသေးဘဲ အခွင့်အလမ်းကို တိတ်တဆိတ် စောင့်ဆိုင်းနေခဲ့သည်။

နောက်တစ်နေ့ နံနက်အစောပိုင်းတွင် လူအများ၏ စောင့်ကြည့်မှုအောက်၌ လီချန်းယွမ်သည် ကျွမ်းကျင်သူအုပ်စုတစ်စုနှင့် လီမျိုးနွယ်စု၏ အထူးကိုယ်ပိုင်တပ်သား ၃,၀၀၀ ကို ဦးဆောင်ကာ ပင်လယ်နက်ပိုင်းသို့ ထွက်ခွာသွားခဲ့သည်။

ချူးယွင်ဖန်းက လက်ဟန်တစ်ခုကို ပြုလုပ်လိုက်ရာ မမြင်နိုင်သော အလင်းတန်းတစ်ခုက ထိုကိုယ်ပိုင်တပ်သားတစ်ဦးပေါ်သို့ ကျရောက်သွားသည်။ ထိုတပ်သားမှာ ထူးချွန်သူတစ်ဦး ဖြစ်နေလျှင်ပင် ချူးယွင်ဖန်း၏ အစွမ်းဖြင့် သူတစ်ခုခုလုပ်လိုက်သည်ကို ၎င်းတို့ မည်သို့ သိနိုင်ကြမည်နည်း။

ချူးယွင်ဖန်းက မျက်လုံးများကို မှိတ်လိုက်ရာ သူ အမှတ်အသားပြုထားသော တပ်သား သွားနေသည့် အရပ်မျက်နှာကို အာရုံခံနိုင်လိုက်သည်။ သူ စိတ်အေးသွားသော်လည်း ထိုတပ်သားကို အမှတ်အသားပြုထားသူမှာ သူတစ်ယောက်တည်း မဟုတ်ကြောင်း မကြာမီ သိလိုက်ရသည်။

'စိတ်ဝင်စားစရာပဲ။ လီမျိုးနွယ်စုကို မျက်စိကျနေတာ ငါတစ်ယောက်တည်း မဟုတ်ပုံပဲ’

ချူးယွင်ဖန်းက လှောင်ပြုံးပြုံးလိုက်ပြီးနောက် ထိုတပ်သားနောက်သို့ ချက်ချင်း လိုက်မသွားသေးပေ။

သူက မြို့၏ စည်ကားရာနေရာ၌ တည်ရှိသော လီအိမ်တော်ကြီးကို တစ်ချက်ကြည့်လိုက်ရာ၊ သူ၏ မျက်လုံးများထဲတွင် အံ့သြထိတ်လန့်မှု အလင်းတန်းတစ်ခု ဖြတ်ပြေးသွားလေတော့သည်။

--