အခန်း ၂၇၂

272

လိုင်နာ၏ စိတ်ဓာတ်ကျဆင်းမှုသည် ညစာစားချိန်အထိ ဆက်လက်ဖြစ်ပွားနေခဲ့ပြီး ညစာအဖြစ် ပင်လယ်စာများကို အားရပါးရ မြိန်ရည်ရှက်ရည် သုံးဆောင်လိုက်ရပြီးနောက်တွင်မှ သူ့စိတ်ခံစားချက်မှာ အနည်းငယ် ပြန်လည်ကောင်းမွန်လာခဲ့သည်။ သူ မှာယူထားသော ဟင်းလျာအများစုမှာ ပင်လယ်စာများဖြစ်ကြ၏။ ပါဝင်ပစ္စည်းများ၏ လတ်ဆတ်မှုမှာ စားဖိုမှူး၏ အနည်းငယ် ညံ့ဖျင်းလှသော ချက်ပြုတ်မှု အတတ်ပညာကို အတော်အတန် အဖတ်ဆယ်ပေးနိုင်ခဲ့သည်။ လိုင်နာတစ်ယောက် လုပ်ငန်းခွင်အခြေအနေထဲသို့ အာရုံနစ်မြုပ်သွားသည်နှင့် တစ်ပြိုင်နက် မူးနေသော အဘိုးအို၏အကြောင်းကို စိတ်ထဲမှ ယာယီအားဖြင့် မေ့ပျောက်ထားနိုင်ခဲ့သည်။

သို့သော်လည်း ညို့ငင်ဆွဲဆောင်မှုရှိသောဝိုင်၏ မွှေးရနံ့သင်းသင်းလေးမှာ လေထုထဲတွင် ရံဖန်ရံခါ ရုတ်တရက် ပေါ်ထွက်လာတတ်ပြီး သူ့ကို ခဏတာမျှ မူးဝေမိန်းမောသွားစေတတ်သည်။ လိုင်နာသည် ထိုဝိုင်၏အရသာကို မိမိနှလုံးသားအတွင်း၌ ယာယီအားဖြင့် အတင်းအကျပ် ပိတ်လှောင်ထားနိုင်ရန်အတွက် သူ့ခွန်အားရှိသမျှ အကုန်ထုတ်သုံးလိုက်ရတော့၏။ ရှသည် လိုင်နာ၏ ပုံမှန်မဟုတ်သော အမူအရာကို သတိပြုမိသွားခဲ့သည်။ အခန်းသို့ ပြန်လာမည့် လမ်းတစ်လျှောက်တွင် ရှမှာ လိုင်နာကို အကြိမ်ကြိမ်စနောက်ကျီစယ်ခဲ့သော်လည်း လိုင်နာသည် လုံးဝ ပြန်လည်ရန်မတွေ့ဘဲ ခေါင်းကိုငုံ့ကာ စိတ်ကောက်နေသည့် ကလေးတစ်ယောက်အလား သုန်မှုန်သော မျက်နှာပေးဖြင့်သာ လျှောက်လှမ်းနေခဲ့သည်။

"ဘာဖြစ်လို့လဲ"

လီလီယန် မနေနိုင်တော့ဘဲ လှမ်းမေးလိုက်သည်။ လိုင်နာသည် သက်ပြင်းအရှည်ကြီး တစ်ချက်ချလိုက်ပြီး ယနေ့မွန်းလွဲပိုင်းက မူးနေသောအဘိုးအိုနှင့် ဆုံတွေ့ခဲ့ရပုံကို လီလီယန်အား အစအဆုံး ပြောပြလိုက်ရင်းဆို၏။

"ငါ အဲဒီဝိုင်ကို တကယ်ကြီး နောက်ထပ်တစ်ခေါက်လောက် ထပ်ပြီးအရသာခံ သောက်ကြည့်ချင်သေးတာ"

ရှ အံ့ဩတုန်လှုပ်စွာဖြင့် အသက်ရှူမှားသွားပြီး ပြောလိုက်သည်။

"တကယ်ကြီး အဲဒီလောက်အထိ ကောင်းတာလား"

"ဒီနေ့ ငါ တည်းခိုခန်းရဲ့ မုန့်၊ ပင်လယ်စာနဲ့ ဝိုင်တွေကို စမ်းသပ်မြည်းစမ်းခဲ့တယ်၊ ငါ့အထင်တော့ ဒီကမုန့်တွေကို Michelinကနေ အကြံပြုညွှန်းဆိုပေးလို့ ရနိုင်လောက်အောင် တကယ့်ကို အရသာရှိပါတယ်၊ ဒါပေမဲ့ ငါ့စိတ်ထဲမှာ အမှတ်ရဆုံးကတော့ ဝိုင်ရဲ့အရသာပဲ၊ တကယ်လို့ အဲဒီဝိုင်သာ ဒီတည်းခိုခန်းကထုတ်တာဆိုရင် ငါ ဟဲယဲ့တည်းခိုခန်းကို ဘာတွေဝေမှုမှမရှိဘဲ Michelin ကြယ်နှစ်ပွင့် ချက်ချင်းပေးပစ်လိုက်မှာ"

လိုင်နာသည် KMအစားအသောက် မဂ္ဂဇင်း၏ အယ်ဒီတာချုပ်တစ်ဦးအနေဖြင့် သူ ရှာဖွေတွေ့ရှိထားသော အရသာရှိလှသည့် အစားအသောက်များနှင့် လူသိနည်းသောရတနာသိုက်ဆိုင်လေးများကို ဆောင်းပါးအဖြစ် ထုတ်ဝေလေ့ရှိသော်လည်း သူ့တွင် ဖုံးကွယ်ထားသော အခြားလျှို့ဝှက်သရုပ်မှန်တစ်ခုရှိနေသေးရာ ၎င်းမှာ သူသည် Michelinကြယ်ပွင့် သုံးသပ်အကဲဖြတ်သူတစ်ဦး ဖြစ်နေခြင်းပင်သည်။ Michelin မှ စတင်ဖွဲ့စည်းတည်ထောင်ခဲ့သော Michelin ကြယ်ပွင့်အဆင့်သတ်မှတ်ချက် စနစ်သည် ကမ္ဘာပေါ်တွင် အသိအမှတ်ပြုအခံရဆုံးနှင့် ရိုသေလေးစားအခံရဆုံးသော စားသောက်ဆိုင်အဆင့်သတ်မှတ်ချက်စနစ်များထဲမှ တစ်ခုဖြစ်၏။ မူလအစတုန်းက ကားဖြင့် ခရီးသွားလာခြင်းကို မြှင့်တင်ရန်အတွက် စားသောက်ဆိုင်များနှင့် ဟိုတယ်များ၏လမ်းညွှန်စာအုပ်အဖြစ် ရည်ရွယ်ပုံစံထုတ်ခဲ့ခြင်းဖြစ်သော်လည်း အချိန်ကာလရွေ့လျားလာသည်နှင့်အမျှ စားသောက်ဆိုင်များ၏ အရည်အသွေးကို တရားဝင်အကဲဖြတ်စိစစ်ပေးရသော အာဏာပိုင်စံနှုန်းတစ်ခုအဖြစ်သို့ ပြောင်းလဲတိုးတက်လာခဲ့သည်။

Michelinကြယ်ပွင့်သတ်မှတ်ချက်များကို အဓိကအားဖြင့် အတန်းအစား သုံးမျိုး ခွဲခြားထားသည်။ Michelin ကြယ်တစ်ပွင့်မှာ အလွန်ကောင်းမွန်သော အစားအသောက်များနှင့် ထိပ်တန်းဝန်ဆောင်မှုများရှိနေသဖြင့် ခရီးတစ်ထောက်ရပ်နားရန် ထိုက်တန်သော အရည်အသွေးမြင့် စားသောက်ဆိုင်ကို ညွှန်းဆိုပြီး၊ Michelin ကြယ်နှစ်ပွင့်မှာမူ ထူးကဲလှသော ဟင်းလျာချက်ပြုတ်မှု အတတ်ပညာနှင့် အမှတ်ရဖွယ်ရာစားသောက်မှု အတွေ့အကြုံများကို ပေးစွမ်းနိုင်သဖြင့် သွားရောက်လည်ပတ်ရန် ထိုက်တန်သော ပြောင်မြောက်လှသည့် စားသောက်ဆိုင်ကို ပြဆိုကာ၊ Michelin ကြယ်သုံးပွင့်မှာမူ အစားအသောက်လောက၏အမြင့်ဆုံး ဂုဏ်ထူးဆောင်ဆုကို ကိုယ်စားပြုပြီး ထူးခြားဆန်းပြားလှသော ဟင်းလျာချက်ပြုတ်မှု အနုပညာနှင့် အပြစ်ပြောစရာမရှိသည့် ဝန်ဆောင်မှုများရှိနေသဖြင့် သီးသန့် ခရီးစဉ်တစ်ခုအဖြစ် သွားရောက်ရန် ထိုက်တန်သော အလွန်ထူးကဲမွန်မြတ်လှသည့် စားသောက်ဆိုင်ကိုဖော်ပြခြင်းဖြစ်၏။

ရှ သည် သာမန်အချိန်များတွင် လိုင်နာကို သိပ်ပြီးအထင်မကြီးသော်လည်း သူ့အလုပ်လုပ်နိုင်စွမ်း အတတ်ပညာကိုမူ သေချာပေါက် အသိအမှတ်ပြုထားသည်။ ပြောရမည်ဆိုလျှင် လိုင်နာသည် အစားအသောက်များကို အရသာခံ သုံးသပ်ရာတွင် အမှန်ပင် ထူးခြားဆန်းပြားလှသော ပါရမီရှင်တစ်ဦးဖြစ်ပြီး သူ အကြံပြုညွှန်းဆိုသမျှအရာတိုင်းကိုလည်း အများပြည်သူမှာ တခဲနက် နှစ်သက်သဘောကျကြသဖြင့် သူသည် KM အစားအသောက်မဂ္ဂဇင်း၏ အယ်ဒီတာချုပ်အဆင့်အထိ တိုးမြှင့်ခြင်းခံခဲ့ရခြင်းဖြစ်၏။ Michelin ကြယ်ပွင့်အဆင့်သတ်မှတ်ချက်ကိုရရှိရန်မှာ အလွန်တရာ ခဲယဉ်းလှသည်။ စားသောက်ဆိုင်တစ်ဆိုင်အနေဖြင့် Michelinထံမှ ကြယ်တစ်ပွင့် အဆင့်သတ်မှတ်ချက် ရရှိရုံမျှဖြင့်ပင် အတော်လေးကို ကောင်းမွန်လှပြီ ဖြစ်သည်။ ရှ သည် လိုင်နာနှင့် သိကျွမ်းခဲ့သော နှစ်ပေါင်းများစွာအတွင်း သူစားသောက်ဆိုင်တစ်ဆိုင်ကို ကြယ်နှစ်ပွင့်အထိပေးရန် ပြောဆိုသည်ကို ယခု ဤတစ်ကြိမ်သာ ပထမဦးဆုံးအဖြစ် မြင်တွေ့ဖူးခြင်းဖြစ်၏။

လိုင်နာ၏ ပြောပြချက်အရ ကြယ်တစ်ပွင့်မှာ တည်းခိုခန်း၏မုန့်များအတွက် ဖြစ်ပြီး အခြားကြယ်တစ်ပွင့်မှာမူ ထိုအရသာရှိလှသော ဝိုင်အတွက် ဖြစ်သည်။ သို့သော်လည်း ပင်လယ်စာမှာမူ စားဖိုမှူး၏အတတ်ပညာ အနည်းငယ် လိုအပ်ချက်ရှိနေသေးခြင်းကြောင့် ကြယ် (၀.၅) ပွင့်သာရရှိခဲ့သည်။ ရှ နှင့် တခြားသူများမှာမူ ဓာတ်ခွဲခန်းထဲတွင် လှည့်လည်ကြည့်ရှုလေ့လာရင်း အလုပ်ရှုပ်နေခဲ့ကြသဖြင့် မုန့်များကို မြည်းစမ်းရန် အချိန်မရရှိခဲ့ကြသေးသော်လည်း ပင်လယ်စာညစာအပေါ်တွင်မူ အလွန်အမင်းစိတ်ကျေနပ်နေခဲ့ကြပြီးဖြစ်ရာ တကယ့်ကို ပြောင်မြောက်လှသည်ဟု ထင်မြင်နေခဲ့ကြ၏။ သို့သော်လည်း ၎င်းမှာ လိုင်နာ၏အမြင်တွင် ကြယ် (၀.၅) ပွင့်သာ ရရှိခဲ့ခြင်းကို ကြည့်ခြင်းအားဖြင့် လိုင်နာသည် အစားအသောက်အပေါ်တွင် မည်မျှလောက်အထိ တင်းကျပ်ပြတ်သားသောစံနှုန်းများ ထားရှိကြောင်း ပေါ်လွင်နေခဲ့သည်။

"တကယ်လို့ အဲဒီအရသာရှိလှတဲ့ ဝိုင်ကသာ ဒီတည်းခိုခန်းကထွက်တာ အမှန်ပဲဆိုရင် ငါ သေချာပေါက် Michelin အဆင့်သတ်မှတ်ချက် ဌာနချုပ်ဆီကို အစီရင်ခံစာတင်ပြပြီးတော့ ငါ့ရဲ့ ကိုယ်ပိုင်အဆင့်သတ်မှတ်ချက်ကိုပါ တစ်ပါတည်း ပေးပစ်ရမယ်"

လိုင်နာ ခိုင်မာပြတ်သားစွာ ပြောလိုက်သည်။ ယခုအခါတွင်မူ ရှ ပင်လျှင် လိုင်နာတစ်ယောက် စွဲစွဲလန်းလန်းဖြင့် မေ့မရနိုင်အောင်ဖြစ်နေရသော ဝိုင်မှာ မည်ကဲ့သို့သော ဝိုင်မျိုးဖြစ်နေမည်ကို အလွန်အမင်း စူးစမ်းလိုစိတ်ဖြစ်ပေါ်လာခဲ့ရ၏။ အကြောင်းမှာ လိုင်နာသည် မိမိဂုဏ်သိက္ခာကို အလွန်တရာ အလေးထားစောင့်ရှောက်တတ်သူ ဖြစ်ပြီး အကြံပြုချက်များကိုလည်း ခဲယဉ်းစွာ ညွှန်းဆိုလေ့ရှိသောကြောင့် ဖြစ်သည်။ မည်သည့်အချိန်မဆို ဆင်ခြင်တုံတရားပြည့်ဝလှသော လီလီယန်မှာ အကြံပြုစကားဆိုလာခဲ့သည်။

"ငါတို့ ဒီနေရာမှာ နောက်ထပ်အချိန်အနည်းငယ်လောက် ထပ်ပြီးတည်းခိုနေဦးမှာပဲလေ၊ ဒီနေ့ လျိုနနက ငါ့ကိုပြောပြတယ် သူတို့ဆရာဖြစ်တဲ့ မစ္စတာယွမ်က မနက်ဖြန်ကျရင် ဆံပင်ပေါက်ဆေးထဲမှာ ပါဝင်တဲ့ဒြပ်ပစ္စည်းတွေအကြောင်းကို ငါတို့နဲ့အတူဆွေးနွေးပေးမယ်တဲ့၊ ငါ ကြားရသလောက်တော့ မစ္စတာယွမ်က ဒီတည်းခိုခန်းရဲ့သူဌေးနဲ့ တော်တော်လေး ရင်းနှီးတဲ့ဆက်ဆံရေး ရှိတယ်ဆိုတော့ မနက်ဖြန်ကျရင် သူ့ကို အဲဒီအကြောင်း မေးကြည့်လို့ရတာပဲ"

"ဟုတ်သားပဲ အဲဒီလိုလုပ်ရမှာ၊ ငါ အမြဲတမ်း ခံစားနေရတာက အဲဒီမူးနေတဲ့ အဘိုးအိုက ဒီတည်းခိုခန်းရဲ့ ဝန်ထမ်းတစ်ယောက်ဖြစ်ရမယ်၊ မဟုတ်ရင် သူက ငါ့ကိုဒုတိယထပ်ဆီ ဘယ်လိုလုပ်ပြီး ခေါ်သွားနိုင်ပါ့မလဲ၊ ပြီးတော့ သူက ဘားကောင်တာထဲက ဝိုင်အိုးတွေနဲ့ ဖန်ခွက်တွေကိုပါ ရင်းနှီးနေတဲ့ အမူအရာနဲ့ ရှာဖွေနိုင်ခဲ့သေးတယ်"

လိုင်နာသည် လီလီယန်ကို ကျေးဇူးတင်ရှိလှသော မျက်ဝန်းများဖြင့်ကြည့်လိုက်မိသည်။ ညဉ့်အမှောင်ထုသည် မင်ရည်အလား အလွန်တရာ နက်မှောင်လာခဲ့ပြီး ရှေးဟောင်းတည်းခိုခန်းကြီးကို လွှမ်းခြုံအုပ်မိုးသွားခဲ့တော့၏။ ကောင်းကင်ယံထက်တွင်မူ ကြယ်တာရာလေးများမှာ တဖျတ်ဖျတ် တောက်ပနေကြသည်။ လမင်းကြီး ပိုမိုတောက်ပလာသည်နှင့်အမျှ တည်းခိုခန်းကြီးသည်လည်း တဖြည်းဖြည်းချင်း အိပ်မက်ကမ္ဘာထဲသို့ သက်ဆင်းသွားခဲ့လေပြီ။ လေညင်းအဝှေ့တွင် သစ်ရွက်လေးများလှုပ်ခတ်သွားသောအသံနှင့် ရံဖန်ရံခါထွက်ပေါ်လာတတ်သော ပိုးကောင်လေးများ၏ အော်မြည်သံမှတစ်ပါး ဘေးပတ်ဝန်းကျင်တစ်ခုလုံးမှာ ဆိတ်ငြိမ်အေးချမ်းလျက် ရှိနေခဲ့၏။

သို့သော်လည်း တည်းခိုခန်း၏ နောက်ဖေးဥယျာဉ်ထဲရှိ ပန်းများနှင့် နွယ်ပင်များ ဝန်းရံထားသော ပန်းခြံငယ်လေးတစ်ခုထဲတွင်မူ ညဉ့်နက်သန်းခေါင်ယံ၏ ဆိတ်ငြိမ်မှုကို ဖြိုခွဲဖျက်ဆီးပစ်လိုက်သည့်အသံများ ထွက်ပေါ်လာခဲ့သည်။

ဥယျာဉ်ထဲတွင်မူ လရောင်သည် သစ်ပင်များကြားမှတစ်ဆင့် ဖြာကျနေခဲ့ပြီး မြေပြင်ပေါ်တွင် အရိပ်အယောင်လေးများကို ဖြစ်ပေါ်စေသည်။ ဤအလင်းနှင့် အရိပ်တို့ ယှက်သန်းနေသော စင်မြင့်ထက်တွင် ပိန်လှီလှသော လူရိပ်တစ်ခုသည် တိတ်တဆိတ် လှုပ်ရှားနေခဲ့ပြီး သူ့ခြေလှမ်းများမှာ ပေါ့ပါးသွက်လက်လှကာ ရံဖန်ရံခါတွင် ကြွေကျနေသော သစ်ရွက်ခြောက်များကိုနင်းမိသဖြင့် တရှဲရှဲ အသံလေးများ ထွက်ပေါ်လာပြီးနောက် ညဉ့်အမှောင်ထုထဲသို့ မည်သည့်ခြေရာလက်ရာမျှမကျန် ချက်ချင်းပျောက်ကွယ်သွားတတ်၏။ သူ ပန်းခင်းများကို ဖြတ်သန်းသွားသည့် အချိန်တိုင်းတွင် သစ်ကိုင်းလေးများမှာ ကွေးညွတ်သွားခဲ့ကြပြီး အိပ်မောကျနေခဲ့ကြသော ပန်းပွင့်လေးများသည်လည်း မျက်စိတစ်မှိတ်အတွင်းမှာပင် ပျောက်ကွယ်သွားခဲ့ကြရသည်ရာ သူသည် ပန်းသူခိုးတစ်ဦးဖြစ်ပေသည်။

သူသည် ပန်းခြံထဲမှခိုးယူထားသော ပန်းပွင့်များ အပြည့်ထည့်ထားသည့် အဝတ်အိတ်တစ်အိတ်ကို သယ်ဆောင်ထားသည်။ ထိုပန်းခိုးသမားသည် သွက်လက်ဖျတ်လတ်စွာလှုပ်ရှားရင်း ပန်းများ ဝေဆာစွာဖူးပွင့်နေမည့် နောက်ထပ်နေရာတစ်ခုကို ရှာဖွေရန်အတွက် ဘေးပတ်ပတ်လည်သို့ အကြိမ်ကြိမ် လှည့်ပတ်ကြည့်ရှုနေခဲ့၏။ မကြာမီမှာပင် သူသည် ပန်းခင်းအသစ်တစ်ခုကို လှမ်းမြင်လိုက်ရသည်။ သို့သော်လည်း သူသည် မိမိပန်းတိုင်ဆီသို့ လှမ်းကူးတော့မည့် ထိုခဏ၌ပင် သစ်ပင်အဖျားမှ ကျီးကန်းတစ်ကောင်သည် ရုတ်တရက် ပျံတက်လာခဲ့ပြီး စူးရှလှသော အော်သံတစ်ချက်ကို အော်မြည်လိုက်တော့သည်။

၎င်းမှာ ရှောင်ရှီးဖြစ်သည်။ ရှောင်ရှီးသည် သစ်ပင်အထက်မှ ပျံသန်းဆင်းသက်လာခဲ့ပြီး သူ့တောင်ပံများသည် ညဉ့်ကောင်းကင်ယံထက်တွင် အမည်းရောင်စက်ဝန်းတစ်ခုကို ဆွဲသားလိုက်သည့်အလား ဖြစ်ပေါ်စေကာ ပန်းသူခိုး၏ပုခုံးပေါ်သို့ တိတ်တဆိတ် နားလိုက်တော့သည်။ ၎င်း၏ခြေသည်းများသည် အဝတ်စများကို တင်းကျပ်စွာ ဆုပ်ကိုင်ထားရင်း ပန်းသူခိုးကို လုံးဝမလှုပ်ရှားနိုင်အောင် ဖိနှိပ်ချုပ်ကိုင်ထားခဲ့ပြီး ခံပြင်းစက်ဆုပ်ဖွယ်ရာ အလင်းတန်းနှစ်ခုကဲ့သို့ စူးရှလှသော သူ့မျက်လုံးများဖြင့် ပန်းသူခိုး၏ မျက်လုံးများကို တည့်တည့်မတ်မတ် စိုက်ကြည့်နေခဲ့၏။ သူသည် ရှေ့သို့ ဆက်လက်လှမ်းချီရန် ကြိုးစားလိုက်သော်လည်း သူ့ရှေ့မှောက်တွင် လူတစ်ယောက်ရုတ်တရက် ပေါ်ထွက်လာခဲ့ရာ ၎င်းမှာ လက်ထဲတွင် ပေါက်ပြားတစ်ချပ်ကိုကိုင်ဆောင်ထားသော မစ္စကျိဖြစ်သည်။

မစ္စကျိသည် ပေါက်ပြားကို သူမရင်ဘတ်ရှေ့တွင် ကန့်လန့်ဖြတ်ကိုင်ဆောင်ထားရင်း သူ့လမ်းကြောင်းကို ပိတ်ဆို့တားဆီးထားခဲ့သည်။

ပန်းသူခိုးသည် အခြေအနေမကောင်းတော့ကြောင်း ရိပ်မိသွားသဖြင့် အနောက်သို့ အပြေးအလွှားလှည့်ပြန်ရန် ပြင်လိုက်စဉ်မှာပင် ဒေါသတကြီး အော်ဟစ်လိုက်သော အသံတစ်သံကို ကြားလိုက်ရ၏။

"မစ္စတာတုကန်၊ ရှင် ဘာဖြစ်လို့ ပန်းတွေကို နောက်တစ်ခေါက် ထပ်ခိုးနေပြန်တာလဲ"

ဓာတ်မီးအလင်းရောင်တစ်ခု ဖျတ်ခနဲ လင်းပွင့်လာခဲ့ပြီး တုကန်သည် မိမိအနေဖြင့် မည်သည့်နေရာသို့မျှ ထွက်ပြေးလွတ်မြောက်နိုင်စွမ်းမရှိတော့ကြောင်း သဘောပေါက်သွားသဖြင့် ပန်းပွင့်များ ထည့်ထားသော အဝတ်အိတ်ကို ရင်ခွင်ထဲ၌ တင်းကျပ်စွာ ပွေ့ပိုက်ထားလိုက်ရင်း မျက်လုံးများကို မှိတ်ကာ အရှက်မရှိ ဝန်ခံစကားဆိုလိုက်သည်။

"ဝိုင်ချက်ဖို့အတွက် ပန်းလာယူတာကို ခိုးတယ်လို့ ခေါ်ရပါ့မလား"

စုဟယ်သည် ခါးကိုလက်နှစ်ဖက်ဖြင့် ထောက်လိုက်ရင်း ဓာတ်မီးအလင်းရောင်ကို ပိုမိုတောက်ပအောင် ဖွင့်လိုက်ပြီး ပြောလိုက်သည်။

"ဒါက သေချာပေါက် ခိုးတာပေါ့၊ နောက်ဖေးဥယျာဉ်ထဲက ပန်းတွေအကုန်လုံးက မစ္စကျိရဲ့ကြိုးစားအားထုတ်မှုရလဒ်တွေကြီးပဲ၊ မနက်ခင်းတိုင်းမှာ သူက ဒီလှပတဲ့ ပန်းလေးတွေအတွက် မြေဆီလွှာတွေကို ဆွပေးရတယ် သင့်တော်တဲ့ မြေဩဇာတွေကို သေချာ ရွေးချယ်ကျွေးရတယ်၊ အဲဒါကြောင့်မလို့ ပန်းတံတိုင်းကြီးက ဒီလောက်အထိ အရောင်အသွေးစုံလင်ဝေဆာနေတာ၊ နူးညံ့တဲ့ ပန်းပွင့်ဖတ်လေးတွေကနေ မွှေးပျံ့တဲ့ဝတ်ဆံလေးတွေအထိ အားလုံးက မစ္စကျိရဲ့ လက်ရာတွေကြီးပဲ၊ ရှင်က နေ့တိုင်း ဒီနေရာကိုလာပြီး ပန်းတွေကို ဖျက်ဆီးနေတော့ ပန်းတံတိုင်းကြီးက ကတုံးဖြစ်တော့မယ်"

ဟဲယဲ့တည်းခိုခန်း၏ ပန်းတံတိုင်းကြီးသည် တစ်နှစ်ပတ်လုံး ဖူးပွင့်နေလေ့ရှိပြီး နေ့ရက်တိုင်းတွင် မတူညီသော အရောင်အသွေးစုံလင်လှသည့် မွှေးရနံ့ သင်းပျံ့လှသည့် ပန်းမန်များဖြင့် ဝေဆာနေတတ်သဖြင့် ဓာတ်ပုံရိုက်ရန်အတွက် အလွန်တရာကျော်ကြားလှသော နေရာတစ်ခုဖြစ်သည်။ သို့သော်လည်း လွန်ခဲ့သော ရက်အနည်းငယ်အတွင်းမှာပင် ဧည့်သည်များသည် ပန်းပွင့်များ တဖြည်းဖြည်း လျော့နည်းလာသည်ကို သတိပြုမိသွားခဲ့ကြပြီး ၎င်းမှာ ရာသီဥတု အပြောင်းအလဲကြောင့် ဖြစ်လိမ့်မည်ဟုသာ ထင်မှတ်နေခဲ့ကြ၏။ သို့သော်လည်း ယခုရက်ပိုင်းမှာ သေချာပေါက် စန္ဒကူးပန်းများ ပွင့်လန်းသောရာသီ ဖြစ်နေသည်မဟုတ်ပါလား။

"ကျွန်မ ဝိုင်ချက်ဖို့အတွက် လတ်ဆတ်တဲ့ပန်းတွေကို ယူနန်ပြည်နယ်အထိ သွားဝယ်ပေးထားပြီးသားပဲကို ပန်းတံတိုင်းပေါ်ကပန်းတွေဆီ လာမဖျက်ဆီးပါနဲ့တော့"

စုဟယ်သည် ရွေးချယ်စရာမရှိဘဲ သက်ပြင်းအသာချရင်း ဆိုလိုက်သည်။ တုကန်မှာမူ သူ့အဝတ်အိတ်ကို တင်းကျပ်စွာ ဆုပ်ကိုင်ထားရင်း စုဟယ်၏စကားကို လုံးဝနားမထောင်ခဲ့ပေ။

"အပြင်ကနေဝယ်လာတဲ့ ပန်းလတ်လတ်ဆတ်ဆတ်တွေက ဒီပန်းတံတိုင်းပေါ်က ပန်းတွေရဲ့ အရည်အသွေးမျိုးနဲ့တူပါ့မလား၊ ပြီးတော့ ပန်းပွင့်ဖတ်တွေကလည်း ခါးသက်မနေရဘူး ဝတ်ဆံလေးတွေကလည်း ချိုမြိန်နေရမယ်၊ ကျန်တဲ့အကြောင်းအရာတွေကိုတော့ အဲဒီပန်းတွေရောက်လာတဲ့အခါကျမှပဲ ဆက်ပြီး ဆွေးနွေးကြတာပေါ့၊ အခုတော့ မင်းနဲ့ စကားအရှည်ကြီးပြောမနေတော့ဘူး၊ ငါဒီအိတ်ထဲက ပန်းတွေကိုယူပြီး ဝိုင်အရင်သွားချက်ရဦးမယ်"

တုကန်သည် ပြောပြောဆိုဆိုဖြင့် လှည့်ထွက်သွားရန် ပြင်တော့သည်။