အခန်း ၂၇၄

274

"ခင်ဗျားပြောတဲ့ အဘိုးအိုက သူလား"

ရစ်ချက်သည် ငိုက်မြည်းနေသော အဘိုးအိုကို အထပ်ထပ်အခါခါ အကဲခတ်ကြည့်ရှုလိုက်သော်လည်း မည်သည့်ထူးခြားသည့် အရည်အချင်းမျိုးကိုမျှ ရှာမတွေ့နိုင်ခဲ့ချေ။ လီလီယန်နှင့် ရှတို့မှာလည်း ခေါင်းများကိုသာ ခါယမ်းလိုက်ကြသည်။ ရှ ၏နှုတ်ခမ်းအစုံမှာ အပြုံးတစ်ခုအဖြစ် ကွေးညွတ်တက်သွားခဲ့ရာ ဤမြင်ကွင်းက တကယ်ကို ရယ်စရာကောင်းလွန်းလှ၏။ လိုင်နာသည် သူ့ဝမ်းဗိုက်ကိုကျုံ့ထားရင်း ဝိုင်အိုးများကို တစ်လုံးပြီးတစ်လုံး ဆင့်ကာ စီစီရီရီတင်နေခဲ့ရသည်။ ရှ အနေဖြင့် လိုင်နာ ဤမျှလောက်အထိ အဝတ်အစားဖရိုဖရဲနှင့် သနားစရာကောင်းအောင် ရုန်းကန်နေရသည့်ပုံစံမျိုးကို တစ်ခါမျှမမြင်ဖူးခဲ့ချေ။

"နင် ဒီလိုလုပ်နေတာ ဘယ်လောက်ကြာပြီလဲ"

ရှ မရပ်မနားရယ်မောလိုက်သည်။ လိုင်နာသည် ဝိုင်အိုးများကို သယ်ပိုးမတင်နေရသဖြင့် သူ့နဖူးပေါ်မှချွေးများကို သုတ်ရန်ပင် အချိန်မရှိခဲ့ရာ ရှ ၏လှောင်ပြောင်သရော်မှုကို သဘာဝကျစွာပင် လျစ်လျူရှုထားလိုက်တော့၏။ သူသည် ယနေ့နံနက်ခင်းတုန်းက ယွမ်ဒန်ချူးပေးခဲ့သော လမ်းညွှန်ချက်အတိုင်း လိုက်လံရှာဖွေခဲ့ပြီးနောက် နောက်ဆုံးတွင် လူသူဆိတ်ငြိမ်သော လှေကားထောင့်တစ်ခု၌ နှစ်နှစ်ခြိုက်ခြိုက် အိပ်ပျော်နေသည့် တုကန်ကိုရှာတွေ့ခဲ့ခြင်းဖြစ်သည်။ အမျိုးမျိုး အဖုံဖုံ အသနားခံတောင်းဆိုပြီးနောက်တွင်မူ လိုင်နာသည် သူ့ကို နောက်ထပ် ဝိုင်တစ်ခွက်ထပ်မံ‌ပေးရန်အတွက် တုကန်၏သဘောတူညီချက်ကို နောက်ဆုံးတွင်ရရှိခဲ့ပါသော်လည်း ၎င်း၏လဲလှယ်မှုတန်ဖိုးအနေဖြင့် လိုင်နာသည် အသစ်ရောက်ရှိလာသော ဝိုင်အိုးအသစ်အားလုံးကို သန့်စင်အောင် ဆေးကြောပေးရမည်ဖြစ်ပြီး သိုလှောင်ရုံထဲသို့ စနစ်တကျရွှေ့ပြောင်းထည့်သွင်းပေးရမည်ဖြစ်သည်။

ဝိုင်အိုးအရေအတွက်မှာ တော်တော်လေးများပြားပြီး ၎င်းတို့၏ ပုံသဏ္ဍာန်များမှာလည်း ပုံမှန်မဟုတ်သဖြင့် စီသည့်အခါ အလွန်တရာဂရုစိုက်ရသည်။ သို့သော်လည်း လိုင်နာသည် စိတ်ဓာတ်ခွန်အားများ အပြည့်အဝ တက်ကြွနေခဲ့၏။ ဤအရာမှာ သူ့ကိုဆွဲဆောင်နေသော ဝိုင်အမြောက်အမြားရှိနေ၍သာမကဘဲ တုကန်မှာ သူ့အားမကြာမီအချိန်အတွင်း ဒုတိယထပ်ရှိ ဘားကောင်တာတွင် တရားဝင်ဖွင့်လှစ်ရောင်းချတော့မည်ဟုပြောပြခဲ့သောကြောင့်လည်းဖြစ်၏။ ဤသည်မှာ တကယ့်ကို အံ့ဩစရာကောင်းလှပြီး ဝိုင်သောက်ရတော့မည်ဖြစ်သည်။ စိတ်နှလုံးကောင်းရှိလှသော ရစ်ချက်သည် မောဟိုက်ကာပြင်းထန်စွာ အသက်ရှူနေရသည့် လိုင်နာကိုမကြည့်ရက်တော့သဖြင့် မတတ်သာဘဲဝင်ရောက်ကူညီပေးလိုက်တော့သည်။ မည်သည့်အရာကိုမျှ ဂရုမစိုက်တတ်သော လီလီယန်နှင့် ရှတို့ပင်လျှင် ဘေးမှဒီအတိုင်း လက်ပိုက်ကြည့်မနေခဲ့ကြချေ။

အထူးသဖြင့် လိုင်နာကို အမြဲတမ်း စောင်းမြောင်းပြောဆိုတတ်ပြီး မနှစ်သက်လှသော ရှ သည်ပင်လျှင် လိုင်နာ အကူအညီ လိုအပ်နေသည်ကိုမြင်တွေ့ရသောအခါ တစ်ချိန်လုံး မကျေမနပ် ညည်းတွားနေခဲ့ပါသော်လည်း သူမကိုယ်တိုင် ဝင်ရောက်ကူညီပေးရန်အတွက် တုံ့ဆိုင်းမနေခဲ့ချေ။ လူအများ၏ ဝိုင်းဝန်းကူညီမှုကြောင့် ဝိုင်အိုးများကို လျင်မြန်စွာပဲ စနစ်တကျစီစဉ်နေရာချထားပြီးသွားခဲ့သည်။ ဘေးနားတွင် လဲလျောင်းကာ ငိုက်မြည်းနေသော တုကန်သည် လန့်နိုးလာခဲ့သည်။ သူသည် ပျင်းရိငြီးငွေ့စွာဖြင့် မျက်လုံးများကို ပင့်တင်လိုက်ကာ သိုလှောင်ရုံထဲရှိ ဝိုင်အိုးများကို တစ်ချက်လှမ်းကြည့်လိုက်ပြီးနောက်မှသာ မတတ်သာသည့်အလား အိပ်ရာမှထထိုင်လိုက်တော့သည်။

"ကောင်းပြီ ကောင်းပြီ၊ တကယ်ပဲ တခြားနည်းလမ်းမရှိတော့ဘူးပဲ"

တုကန်သည် ခန္ဓာကိုယ်ကို ယိမ်းထိုးလှုပ်ရှားလိုက်ရင်း ဘားကောင်တာဗီရိုထဲမှ ဝိုင်တစ်ပုလင်းကို ကျပန်းဆွဲယူလိုက်သည်။ ရှ သည် နားမလည်နိုင်အောင်ဖြစ်သွားခဲ့ရ၏။ လိုင်နာမှာ ထိုအဖိုးအို၏ ဝိုင်စပ်တတ်သော အတတ်ပညာမှာ အလွန်တရာထူးခြားဆန်းပြားလှသည်ဟု တဖွဖွပြောဆိုနေခဲ့ပါသော်လည်း သူ ထုတ်ယူလိုက်သော ဝိုင်ပုလင်းမှာ သိသိသာသာပင် ရမ်ဖြစ်နေခဲ့ရာ ၎င်းမှာအသုံးအများဆုံးဖြစ်သော သာမန်အရက်အမျိုးအစားမျှသာ ဖြစ်သည်။ ရှမှာ လိုင်နာကို တံတောင်ဖြင့် သာသာလေးတွန်းလိုက်ရင်း လှမ်းမေးလိုက်၏။

"ဘာတွေ ဖြစ်နေတာလဲ"

လိုင်နာကိုယ်တိုင်လည်း သေချာရေရာစွာမသိရှိလှသဖြင့် ဝေဝေဝါးဝါးဖြင့်သာ ပြန်ပြောနိုင်တော့သည်။

"ဒီအတိုင်း စောင့်ရုံသာစောင့်ကြည့်လိုက်ပါ"

တုကန်သည် ဖန်ခွက်အရှည်တစ်ခွက်ကို ယူလိုက်ပြီး ၎င်းထဲသို့ ရမ်ထက်ဝက်ခန့် လောင်းထည့်လိုက်သည်။ ထို့နောက် မီးဖိုချောင်မှ သူယူဆောင်လာခဲ့သော လိမ္မော်သီးတစ်လုံးကို ထောင့်စွန်းတစ်နေရာမှထုတ်ယူလိုက်ပြီး လိမ္မော်ရည်အချို့ကို ဖန်ခွက်ထဲသို့ ညှစ်ထည့်လိုက်ကာ ပျားရည်အနည်းငယ်ကိုလည်း ထပ်မံဖြည့်စွက်လိုက်၏။ နောက်ဆုံးတွင်မူ သူကိုယ်တိုင်ချက်လုပ်ထားသော မက်မွန်ဝိုင်ကို တစ်စက်မျှ မချင့်မရဲဖြင့် ထည့်သွင်းလိုက်ပြီးနောက် ၎င်းဖန်ခွက်ကို လီလီယန်ထံသို့ ကမ်းပေးလိုက်သည်။

"ဟင် ဘာဖြစ်လို့ လီလီယန်ကို အရင်ပေးရတာလဲ"

လိုင်နာ့ပါးစပ်မှာ အံ့ဩလွန်းသဖြင့် အဟောင်းသားဖြစ်သွားခဲ့ရသည်။ ဝိုင်အိုးတွေကို သယ်ပေးခဲ့သည်မှာ သူဖြစ်ပါလျက်နှင့် ဘာကြောင့် သူက အရင်မသောက်ရသနည်း။ မျက်လုံးအစုံပြူးကျယ်နေပြီး ပြင်းထန်စွာ မောဟိုက်နေသော လိုင်နာကို လျစ်လျူရှုထားလိုက်ရင်း လီလီယန် ဖန်ခွက်ကိုယူကာ အနံ့ခံကြည့်လိုက်သည်။ ထိုသောက်စရာထဲတွင် လိမ္မော်ရည်ပါဝင်နေခဲ့သဖြင့် အလွန်တရာ လန်းဆန်းစေသော အရသာမျိုးကို ပေးစွမ်းနိုင်ခဲ့၏။ လက်တွေ့တွင်မူ လီလီယန်သည် အရက်သောက်ခြင်းကို မနှစ်သက်ချေ။ အရက်သည် သူမဦးနှောက်ကို ထုံထိုင်းသွားစေနိုင်ပြီး သူမစမ်းသပ်ချက်များကို ထိခိုက်စေနိုင်သည်ဟု ထင်မြင်မိသဖြင့် သူမသည် အရက်ကိုသောက်ခဲလှသည်။ သို့သော်လည်း တုကန်မှ သူမထံ ကမ်းပေးလိုက်သော ဝိုင်တစ်ခွက်မှာမူ အရက်နံ့ လုံးဝမထွက်နေဘဲ တကယ့် အအေးတစ်ခွက်၏ အနံ့အသက်မျိုးသာ ရရှိနေခဲ့သည်။

ထိုဝိုင်သည် ပယင်းရောင်ရှိနေခဲ့ရာ ၎င်းမှာ လီလီယန်ကို ခရီးသွားနေစဥ်အတွင်း သူမနှင့် ရှတို့ မြင်တွေ့ခဲ့ရသော နေဝင်ဆည်းဆာ၏ ရွှေရောင်အလင်းတန်းများ ဖြန်းပက်ထားသည့် ရွှေရောင်ကမ်းခြေကြီးကို ပြန်လည်အမှတ်ရသွားစေခဲ့သည်။ အလွန်ပင် နွေးထွေးပြီး ဆွဲဆောင်မှုရှိလှပေ၏။ ဖန်ခွက်ကို သာသာလေးဝှေ့ယမ်းလိုက်သောအခါ ဝိုင်ရည်များသည် ဖန်ခွက်၏ နံရံများပေါ်တွင် နေဝင်ဆည်းဆာ၏ ဖြာထွက်နေသော အလင်းတန်းများအလား အစင်းကြောင်းများ ကျန်ရစ်ခဲ့ပြီး လူကို မိန်းမောပြာဝေသွားစေသည်။ လီလီယန်သည် ပိုမိုနီးကပ်စွာအနံ့ခံနိုင်ရန် အနားသို့ တိုးကပ်လိုက်သည်။ ပထမဆုံးရရှိလိုက်သော အနံ့မှာ ရမ်၏ ထူးခြားလှသော ချိုမြိန်သည့်ရနံ့ဖြစ်ပြီး သိပ်သည်းလှသော်လည်း အီမနေဘဲ သမုဒ္ဒရာလှိုင်းတံပိုးများနှင့် နေရောင်ခြည်ရနံ့များကို သယ်ဆောင်လာသော အပူပိုင်းကျွန်းစုတစ်ခု၏ လေပြေညင်းကဲ့သို့ဖြစ်၏။ ထို့နောက်တွင်မူ လိမ္မော်ရည်၏ လန်းဆန်းစေသော သစ်သီးရနံ့များမှာ ပေါက်ကွဲထွက်ပေါ်လာခဲ့ပြီး တက်ကြွလှုပ်ရှားမှုကို ပေးစွမ်းနိုင်ခဲ့သည်။ ပျားရည် ဖြည့်စွက်ထားမှုမှာ ထိုသောက်စရာကို သိမ်မွေ့လှသော ချိုမြိန်မှုကို တိုးပွားစေခဲ့ပြီး ဤအရသာများ မှေးမှိန်ပျောက်ကွယ်သွားပြီးနောက်တွင်မူ မက်မွန်သီးရနံ့တစ်ခုသာ စွဲကျန်ရစ်ခဲ့တော့သည်။

လီလီယန်သည် တစ်ငုံမျှမြည်းစမ်းကြည့်လိုက်သည်။ ပထမဆုံးရရှိလိုက်သော အရသာမှာ ချိုမြိန်လှပြီး ပျားရည်၏ချောမွေ့ကာ စွဲငြိစေသော ချိုမြိန်မှုသည် လိမ္မော်ရည်၏ချိုချဥ်အရသာနှင့် ရောယှက်သွားခဲ့ပြီး လန်းဆန်းစေသော ခံစားချက်ကို ဖန်တီးပေးခဲ့၏။ ၎င်းကို အနည်းငယ် မျိုချလိုက်ပြီးနောက်မှသာ ရမ်၏ အရသာမှာ ပါးစပ်အတွင်း၌ စတင်ပျံ့နှံ့သွားခဲ့သော်လည်း ၎င်းမှာပျားရည်၏ ချိုမြိန်မှုကြောင့် လျင်မြန်စွာဖိနှိပ်ခြင်း ခံလိုက်ရပြီး ရမ်၏သိပ်သည်းဆွဲဆောင်မှုရှိသော အရသာအပြည့်ကိုသာ ချန်ထားခဲ့တော့သည်။ ဝိုင်ကို သောက်သုံးပြီးနောက်တွင်မူ သူမပါးစပ်အတွင်းမှ မက်မွန်သီးရနံ့များ စတင်ထွက်ပေါ်လာခဲ့ရာ ခံတွင်းအနံ့ဆိုးထွက်ပေါ်မည်ကို စိုးရိမ်ပူပန်နေခဲ့သော လီလီယန်၏စိတ်အာရုံကို လုံးဝအေးချမ်းသွားစေခဲ့တော့၏။ သူမသည် ထိုမက်မွန်သီးရနံ့ကို ဖမ်းဆုပ်နိုင်ရန်အတွက် တစ်ငုံပြီးတစ်ငုံ စွဲစွဲလန်းလန်းသောက်သုံးနေခဲ့တော့သည်။

အမြဲတမ်း တည်ငြိမ်အေးဆေးလှသော လီလီယန်ပင်လျှင် ဤဝိုင်ကြောင့် မူးယစ်မိန်းမောနေသည်ကို မြင်တွေ့လိုက်ရသောအခါ ရှ သည်လည်း အလွန်အမင်း စမ်းသပ်ချင်စိတ်ပြင်းပြလာခဲ့ရသဖြင့် အရှေ့သို့တိုးကပ်လိုက်ရင်း တုကန်ကို မျှော်လင့်ချက်အပြည့်ရှိသော မျက်ဝန်းများဖြင့် စိုက်ကြည့်လိုက်မိသည်။ တုကန်သည် ရှကို တစ်ချက် လှမ်းကြည့်လိုက်ပြီး ဤတစ်ကြိမ်တွင်မူ သူသည် ဝီစကီကို ရွေးချယ်လိုက်၏။ သူသည် ဖန်ခွက်နံရံများကို နွေးထွေးစေရန်အတွက် ခွက်ထဲသို့ ရေနွေးများကို အသာလောင်းထည့်လိုက်ပြီးနောက် ၎င်းထဲသို့ ချောကလက်တစ်တုံးကို ထည့်သွင်းလိုက်သည်။ ချောကလက်သည် အငွေ့ပျံနေသော ဖန်ခွက်နှင့်ထိတွေ့မိသည်နှင့်တစ်ပြိုင်နက် စတင်အရည်ပျော်သွားခဲ့တော့၏။ ထို့နောက်မှ သူသည် ဝီစကီကို ဖြည်းညှင်းစွာလောင်းထည့်လိုက်ရာ ပယင်းရောင်အရည်များသည် ဖန်ခွက်ထဲတွင် ဝဲလှည့်သွားခဲ့ပြီး ချောကလက်နှင့် အသာထိတွေ့မိကာ ထူးခြားဆန်းပြားလှသော ရနံ့တစ်ခုကို ထုတ်လွှတ်လိုက်တော့သည်။

ဘေးနားတွင်မူ သူကိုယ်တိုင်ချက်လုပ်ထားသော ပြောင်းဖူးဝိုင်ကိုထပ်မံဖြည့်စွက်လိုက်ရာ ၎င်း၏ထူးခြားလှသော ချိုမြိန်မှုနှင့် နူးညံ့ပျော့ပျောင်းမှုများမှာ ဤသောက်စရာကို အရှေ့တိုင်းဆန်သော အထိအတွေ့တစ်ခုအဖြစ် တိုးပွားစေခဲ့သည်။ ပြောင်းဖူးဝိုင်ကို ဖြည့်စွက်လိုက်ခြင်းမှာ ဝီစကီ၏ပြင်းရှမှုကို ဟန်ချက်ညီစေရုံသာမကဘဲ ချောကလက်၏ ချိုမြိန်မှုနှင့်လည်း သဟဇာတဖြစ်သော ပဲ့တင်ထပ်မှုကို ဖန်တီးပေးနိုင်ခဲ့၏။ ရှ သည် ဝီစကီနှင့် ချောကလက်ကို မြင်တွေ့လိုက်ရသည်။ နောက်ဆုံးရောက်ရှိလာသော ဝိုင်မှာ ဘာလဲဆိုတာကို သူမ မသိရှိပါသော်လည်း ၎င်းကို သိသိသာသာပင် ဂရုမစိုက်တော့ဘဲ မော့ချလိုက်တော့သည်။ ဝီစကီ၏ထူးခြားလှသော မီးခိုးနံ့နှင့် သစ်သားရနံ့များမှာ ဤသောက်စရာ၏ အဓိကအနံ့အသက်ကို ဆုံးဖြတ်ပေးခဲ့သည်။ ၎င်းသည် နက်မှောင်သော အရောင်အဆင်း၊ သိပ်သည်းလှသော အရသာရှိပြီး စပ်ရှိန်းရှိန်းနိုင်မှုနှင့် ဝက်သစ်ချပင်၏ သက်တမ်းရင့်အရသာများ ပါဝင်နေခဲ့သဖြင့် ရှုပ်ထွေးလှသော အရသာစရိုက်ကို ပိုင်ဆိုင်ထား၏။ ထိုစပ်ရှိန်းရှိန်းနိုင်သောဝီစကီသည် ရှကိုယ်တိုင်နှင့် အလွန်တရာ ဆင်တူလှပေသည်။ ပထမဆုံးကြည့်လိုက်ရုံဖြင့် အလွန်တရာ ပူပြင်းလှသည်။

ခါးသက်ချိုမြိန်သော ချောကလက်သည် ဝီစကီ၏ပြင်းထန်လှသော အရသာထဲသို့ သိမ်မွေ့သောချိုမြိန်မှုကို ပေါင်းစပ်ထည့်သွင်းပေးလိုက်ရာ ၎င်းမှာ ကြမ်းတမ်းခက်ထန်သော ပန်းချီကားတစ်ချပ်ပေါ်ရှိ သေသပ်လှပသော စုတ်ချက်တစ်ခုနှင့် အလားသဏ္ဌာန် တူညီလှသည်။ တစ်ချိန်တည်းမှာပင် ပြောင်းဖူးဝိုင်မှာ ဤသောက်စရာကို အရှေ့တိုင်းဆန်သော အထိအတွေ့အဖြစ် တိုးပွားစေခဲ့၏။ ၎င်းကို ဖြည့်စွက်လိုက်ခြင်းမှာ မူရင်းအရသာကို ပျက်စီးသွားစေခြင်းမရှိဘဲ ဆန့်ကျင်ဘက်အနေဖြင့် အရသာကို ပိုမိုသိပ်သည်းပြီး ရှုပ်ထွေးသွားစေကာ စုံစုံလင်လင်ရှိပြီး မေ့ပျောက်နိုင်စွမ်းမရှိသော အတွေ့အကြုံတစ်ခုကိုဖန်တီးပေးခဲ့သည်။

ရစ်ချက်သည်လည်း ယခုအကြိမ်တွင်မူ မအောင့်အီးနိုင်တော့ချေ။ ရှ နှင့် လီလီယန်တို့သည် ဝိုင်၏အရသာထဲတွင် လုံးဝ စွဲလန်းမိန်းမောနေကြပြီဖြစ်ရာ သူသည်လည်း ၎င်းကို မြည်းစမ်းကြည့်ချင်နေမိသည်။ တုကန်သည် သူ့ကို အချိန်အကြာကြီးစောင့်ဆိုင်းရအောင်မပြုလုပ်ခဲ့ချေ။ သူသည် ဂန္ထဝင်မြောက်လှသော ဘရန်ဒီပုလင်းကို ရွေးချယ်လိုက်ပြီး ဖန်ခွက်ထဲသို့ ရေခဲအမြောက်အမြား ထည့်သွင်းလိုက်ကာ သူကိုယ်တိုင် ချက်လုပ်ထားသော လက်ဖက်ရည်ဝိုင်ကိုလည်း ရောစပ်လိုက်၏။ ဘရန်ဒီသည် နူးညံ့ပြီး ပျော့ပျောင်းလှသည်။ ရေရှည် သက်တမ်းရင့်အောင် ပြုလုပ်ထားခဲ့ခြင်းကြောင့် အရက်၏ကြမ်းတမ်းမှုမှာ အချိန်ကာလ၏ တိုက်စားမှုကြောင့် နူးညံ့ချောမွေ့သွားခဲ့ပြီဖြစ်သည်။ ထို့ပြင် တုကန်မှ ရေခဲအမြောက်အမြား ဖြည့်စွက်ပေးလိုက်ခြင်းသည် ၎င်း၏ပြင်းရှမှုကို ပိုမိုလျော့နည်းသွားစေခဲ့၏။ နူးညံ့ချောမွေ့လှသော ဘရန်ဒီသည် ကျော့ရှင်းလှသော လက်ဖက်ရည်ဝိုင်နှင့် ပေါင်းစပ်လိုက်သောအခါ ရစ်ချက်ကဲ့သို့ပင် မည်သူ့ကိုမျှရန်မပြုတတ်သော အေးချမ်းသည့်အထိအတွေ့မျိုးကို ရရှိစေသည်။

လက်ဖက်ရည်ဝိုင်ကို ဖြည့်စွက်လိုက်ခြင်းမှာ ဘရန်ဒီထဲသို့ ထူးခြားလှသော လန်းဆန်းမှုကို ယူဆောင်လာခဲ့သည်။ ၎င်း၏ဖန်ခါးသော အရသာမှာ ဘရန်ဒီ၏ချိုမြိန်မှုကို ဟန်ချက်ညီစေခဲ့ပြီး ၎င်း၏ပြင်းရှမှုအချို့ကို ဖယ်ရှားပေးခဲ့ကာ လန်းဆန်းစေသော အရသာကို ချန်ထားခဲ့၏။ လက်ဖက်ရည်၏ ရှည်လျားပြီး နက်ရှိုင်းလှသော နောက်ဆက်တွဲအရသာမှာ ခံတွင်းအတွင်း၌ ကြာရှည်စွဲကျန်ရစ်သော ချိုမြိန်မှုကို ပေးစွမ်းနိုင်ခဲ့သည်။ ရစ်ချက်သည် ၎င်းကို လက်ဖက်ရည်တစ်ခွက်အလား ထင်မှတ်ကာ အထပ်ထပ်အခါခါမြည်းစမ်းရင်း ဇိမ်ခံနေခဲ့တော့သည်။ လိုင်နာသည် တံတွေးများကို အကြိမ်ကြိမ်မြိုချနေခဲ့ရ၏။ ယခုအကြိမ်တွင်မူ နောက်ဆုံး၌ သူ့အလှည့်သို့ ရောက်ရှိလာခဲ့ပြီဖြစ်သည်။ တုကန်မှ သူ့ကို မည်ကဲ့သို့သောဝိုင်မျိုးပေးသနားမည်ကို သူ သိချင်နေမိသည်။

သို့သော်လည်း ယခုအကြိမ်တွင်မူ တုကန်သည် ဝိုင်ဗီရိုဆီသို့ လှမ်းမကြည့်တော့ချေ။ ဆန့်ကျင်ဘက်အနေဖြင့် သူသည် မနေ့ညကအတိုင်း တူညီလှသော ဖန်အိုးကြီးကို ထုတ်ယူလိုက်ပြီး လိုင်နာအတွက် ဖန်ခွက်အသေးလေးတစ်ခွက်ထဲသို့ လောင်းထည့်ပေးလိုက်တော့သည်။ လိုင်နာသည် မကျေမနပ် ဖြစ်သွားခဲ့ရ၏။ သူသည် မနေ့ညက ဝိုင်ကို တကယ်ကြီးသောက်ချင်နေခဲ့သည်မှာ မှန်ပါသော်လည်း ဝိုင်အသစ်ကိုလည်း မြည်းစမ်းကြည့်ချင်နေခဲ့ခြင်းဖြစ်သည်။ အဘယ်ကြောင့် တုကန်မှာသူ့အပေါ်ကျမှ ဒီလောက်တောင် ခွဲခြားဆက်ဆံပြီး မျက်နှာလိုက်ရပါသနည်း။