အခန်း ၉၇

အခန်း ၉၇ - ဝိညာဉ်နန်းတော်၏ တုံ့ပြန်မှု။

ကျောက်ဝူကျိသည် အပြင်ပန်းတွင် ကြမ်းတမ်းသယောင် ရှိသော်လည်း စိတ်ထားကောင်းမွန်ပြီး အရည်အချင်းရှိသူများကို မြတ်နိုးတတ်သူဖြစ်သည်။

သူသည် ထန်စန်းတို့အပါအဝင် ရှီလိုင်ခဲကျောင်းမှ ကျောင်းသားများကို အလွန်ဂရုစိုက်သည်။ သို့သော် သူ၏ ကျောင်းသားတစ်ဦးက ရှီလိုင်ခဲကျောင်းကို စွန့်ခွာသွားလိမ့်မည်ဟု လုံးဝ မမျှော်လင့်ထားခဲ့ပေ။

ဤသည်မှာ ရှီလိုင်ခဲကျောင်းအတွက် အကြီးအကျယ် မျက်နှာပျက်စရာပင်။

"ဒီ ရှောင်ချန်ယွီဆိုတဲ့ကောင်က တကယ်ကို လွန်သွားပြီ။ ငါ ဝိညာဉ်ကုန်းမြေမှာ လှည့်လည်သွားလာနေတုန်းက သူက နို့တောင် မစို့ရသေးဘူး။"

စကားပြောသူမှာ အသက် ၃၀ ကျော်အရွယ် အမျိုးသမီးတစ်ဦးဖြစ်သည်။ သူမသည် သာမန်အစိမ်းရောင် အဝတ်အစားကို ဝတ်ဆင်ထားပြီး ရွှေတြိဂံအဖွဲ့ဝင် လျိုအာလုံ ဖြစ်သည်။

လျိုအာလုံ၏ ဒေါသမှာ အလွန်ပြင်းထန်ပြီး သူမ၏ချစ်သူ ယွီရှောင်ကန်း၏ ဂုဏ်သိက္ခာကို ထိခိုက်စေသော ရှောင်ချန်ယွီကို သူမ လုံးဝ မုန်းတီးသွားသည်။

"ဟုတ်တယ် ဒီလူငယ်လေးက မာန်ကြီးနေတာပဲ။ ရှီလိုင်ခဲကျောင်းမှာ လူမရှိတော့ဘူးလို့ ထင်နေတာလား။ သွားပြီး သူ့ကို သင်ခန်းစာပေးလိုက်။"

ဖူလန်ဒါက မျက်လုံးများ အရောင်လက်လျက် ပြောလိုက်သည်။

ကျောက်ဝူကျိသည် တောက်ပသည့်ဘုရင်ဟု နာမည်ကြီးသည့် အဆင့် ၇၆ ဝိညာဉ်သူတော်စင် ဖြစ်သည်။

ရှောင်ချန်ယွီသည် တိုက်မုပိုင်နှင့် မာဟုန်ကျွင်းတို့ကို အနိုင်ယူနိုင်ခဲ့သော်လည်း သူတို့မှာ လူငယ်များသာ ဖြစ်ပြီး ကျောက်ဝူကျိ၏ အတွေ့အကြုံနှင့် ဝိညာဉ်စွမ်းအားကို မည်သို့မျှ မယှဉ်နိုင်ဟု သူတို့ ယုံကြည်နေကြသည်။

ဝိညာဉ်နန်းတော်၏ အဓိကအဖွဲ့ မှာလည်း ဤသတင်းကြောင့် ပွက်လောရိုက်နေသည်။

"ဘာ ရှီလိုင်ခဲကျောင်းအဖွဲ့က တကယ်ပဲ ရှုံးသွားတာလား။ နောက်ပြီး သူတို့ရှုံးတာက အမည်မသိ ရှောင်ချန်ယွီဆိုတဲ့လူဆီမှာလား။အဲ့ဒီလူက ဘယ်သူလဲ။"

စကားပြောသူမှာ ဝိညာဥ်နန်းတော်၏ အရည်အချင်းအရှိဆုံး လူငယ်များထဲမှ တစ်ဦးဖြစ်သူ ရှဲ့ယွဲ့ ဖြစ်သည်။

သူ့ဘေးတွင်မူ ဝိညာဉ်ခန်းမဆောင်၏မင်းသမီး ဟူလီနာ့ရှိနေသည်။

"တကယ်ကို မယုံနိုင်စရာပဲ။ ဒီရှီလိုင်ခဲကျောင်းက ကျွန်မတို့ ဝိညာဥ်နန်းတော်ရဲ့ အကြီးမားဆုံး ပြိုင်ဘက်ဖြစ်လာမယ့်သူတွေ။"

"အခုတော့ ရှောင်ချန်ယွီကြောင့် သူတို့ရဲ့ အင်အား ၂ ယောက်ကို ဆုံးရှုံးလိုက်ရပြီ။ အနာဂတ်ကတော့ ခန့်မှန်းရခက်သွားပြီပဲ။"

ဟူလီနာ့က သူမ၏ ဆွဲဆောင်မှုရှိသော အသံဖြင့် ပြောလိုက်သည်။

ဝိညာဉ်နန်းတော်သည်ဝ်ဉာဥ် ကုန်းမြေပေါ်တွင် အင်အားအကြီးဆုံးဖြစ်ပြီး သူတို့၏ ကျောင်းသားများကို အထူးပြုလေ့ကျင့်ပေးထားသည်။

ရှီလိုင်ခဲကျောင်း၏ အောင်မြင်မှုများကို သူတို့ အမြဲစောင့်ကြည့်နေခဲ့သော်လည်း ရှောင်ချန်ယွီ၏ ကြားဝင်မှုကြောင့် အခြေအနေမှာ လုံးဝ ပြောင်းလဲသွားခဲ့သည်။

ဝိညာဉ်နန်းတော်၏ အခြားတစ်နေရာတွင်မူ ချန်းရန်ရွှယ်သည်လည်း ဤသတင်းကို လက်ခံရရှိလိုက်သည်။ သူမ၏ မျက်နှာတွင် အံ့ဩမှုတစ်ခု ပေါ်လာသည်။ သူမသည် ရွှေရောင်ဝတ်ရုံကို ဝတ်ဆင်ထားပြီး လွန်စွာ ခန့်ညားလှပသော မင်းသမီးတစ်ပါးကဲ့သို့ ရှိသည်။

"ရှောင်ချန်ယွီ... နင်က ဘယ်သူလဲ။ နင့်ရဲ့ နောက်ကွယ်မှာ ဘာတွေများ ဖုံးကွယ်ထားတာလဲ..."

ချန်းရန်ရွှယ်၏ မျက်ဝန်းများမှာ လေးနက်သွားသည်။ ရှီလိုင်ခဲကျောင်းကို အနိုင်ယူလိုက်သူ ရှောင်ချန်ယွီသည် သူမ၏ အစီအစဉ်များကိုပါ အနှောင့်အယှက် ဖြစ်စေနိုင်မလားဟု သူမ စိုးရိမ်လာမိသည်။

ဝိညာဉ်ကုန်းမြေတစ်ခုလုံးမှာ ရှောင်ချန်ယွီ၏ နာမည်ကြောင့် မတည်မငြိမ် ဖြစ်လာနေသည်။