အခန်း ၆၁၀

အခန်း (၆၁၀) မောက်မာလွန်းသော အရိပ်မိစ္ဆာ ဂိုဏ်းချုပ်

“ဝုန်း... ”

အရိပ်မိစ္ဆာ ဂိုဏ်းချုပ် ၏ ဖိအားက အလွန်အမင်း ကြီးမားလှပြီး သူ ထွက်ပေါ်လာသည်နှင့် တစ်ပြိုင်နက် တောင်ပိုင်း မြစ်ဝှမ်းနယ်မြေ တစ်ခုလုံးကို လွှမ်းခြုံသွားတော့၏။

ရှေးခေတ်ကာလက၊ ဤမြေပြင်တွင် အလွန် ကြီးမားသော ဝိညာဉ်ကြောကြီး တစ်ခု ရှိခဲ့ပြီး ရှေးဟောင်း မျိုးနွယ်စုကြီး ဆယ့်ရှစ်ခု က တစ်နေရာစီ ခွဲဝေယူကာ ထိပ်တန်း ကြယ်လေးပွင့်အဆင့် အင်အားစု တစ်ခုစီကို တည်ထောင်ခဲ့ကြခြင်း ဖြစ်သည်။

အကယ်၍ ထို ဖျက်ဆီးရေး စစ်ပွဲကြီးသာ မဖြစ်ပွားခဲ့လျှင် ဤအခြေအနေမျိုးက ယနေ့တိုင် ဆက်လက် တည်ရှိနေမည် ဖြစ်ပြီး လျှို့ဝှက်ဆန်းကြယ် နိုင်ငံတော် ဆိုသည်မှာလည်း ပေါ်ထွက်လာနိုင်မည် မဟုတ်ချေ။

အရိပ်မိစ္ဆာ ဂိုဏ်းချုပ် ၏ အမြင်တွင် တောင်ပိုင်း မြစ်ဝှမ်းနယ်မြေ သည် သူတို့၏ ပိုင်နက်သာ ဖြစ်သည်။

ဒီက အသစ်ရောက်လာတဲ့ လူတွေ အားလုံးက သူတို့အတွက် လမ်းဖယ်ပေးရမယ်။

“ဘာတွေ ဖြစ်နေတာလဲ”

အရိပ်မိစ္ဆာ ဂိုဏ်းချုပ် ၏ ဖိအား ပေါက်ကွဲထွက်လာမှုနှင့်အတူ တောင်ပိုင်း မြစ်ဝှမ်းနယ်မြေ တစ်ခွင်ရှိ လူများအပေါ် သက်ရောက်နေသော ဖိအားက ဧရာမ တောင်ကြီး တစ်တောင် ဖိချလိုက်သလို တစ်ဟုန်ထိုး မြင့်တက်လာတော့၏။

လူပေါင်း ရေတွက်၍မရနိုင်အောင် မော့ကြည့်လိုက်ကြသည်။

ယနေ့ ဘာတွေ အတိအကျ ဖြစ်ပျက်နေသနည်း ဆိုတာကို သူတို့ သိချင်နေကြ၏။

“တစ်ယောက်ယောက် ရောက်လာပြီ”

ရုတ်တရက် ကျင့်ကြံသူ တစ်ဦးက ကောင်းကင်ယံသို့ မော့ကြည့်လိုက်ရာ သူ၏ မျက်လုံးအိမ်များ ကျဉ်းမြောင်းသွားတော့သည်။

ကောင်းကင်အကာအကွယ် ၏ အောက်တွင်၊ ဝတ်ရုံနက်ဝတ် အဘိုးအို တစ်ဦးက လက်နှစ်ဖက်ကို နောက်ပစ်လျက် မတ်တတ်ရပ်နေ၏။ သူ၏ မျက်လုံးအနီရောင်များက ရက်စက်စွာ တောက်ပနေပြီး ရှည်လျားသော ဆံပင်များက လေထဲတွင် ရိုင်းစိုင်းစွာ လွင့်လူးနေကာ သူ၏ ခန္ဓာကိုယ်မှ ထွက်ပေါ်နေသော မိစ္ဆာအရှိန်အဝါ က တောင်ပိုင်း မြစ်ဝှမ်းနယ်မြေ တစ်ခုလုံးကိုပင် ဝါးမြိုတော့မည့်အလား ကြီးမားကျယ်ပြန့်လှသည်။

“ဟင်းလင်းပြင်ဖြိုခွဲ အဆင့် စတုတ္ထအလွှာ... မဟုတ်ဘူး ဒါက နတ်ဘုရားဝိညာဉ် ကိုယ်ပွား တစ်ခုပဲ ရှိသေးတယ်။ သူ့ရဲ့ စစ်မှန်တဲ့ ရုပ်ခန္ဓာ ရဲ့ ကျင့်ကြံခြင်းအဆင့်က ဒီထက် အသေးစား နယ်ပယ် အနည်းငယ်လောက် ပိုမြင့်ဦးမှာ”

ယဲ့ဖုန်းက အရိပ်မိစ္ဆာ ဂိုဏ်းချုပ် ကို ကြည့်လိုက်ရာ သူ၏ အကြည့်များက စူးရှသွားတော့၏။

ရှေးဟောင်း မျိုးနွယ်စုကြီး ဆယ့်ရှစ်ခု တည်ရှိနေကြောင်းကို သူ သိထားပြီး ၎င်းတို့သည် တစ်ချိန်က ထိပ်တန်း ကြယ်လေးပွင့်အဆင့် အင်အားစု များ ဖြစ်ခဲ့ကြကာ တစ်ခုစီတိုင်းတွင် ဟင်းလင်းပြင်ဖြိုခွဲ အဆင့် ၌ အလွန် အစွမ်းထက်သော ပညာရှင် တစ်ဦးစီ ခေါင်းဆောင်အဖြစ် ရှိနေကြကြောင်းကိုလည်း သိရှိထားသည်။

ရှေးဟောင်း စစ်ပွဲကြီး အတွင်း သူတို့၏ ခွန်အား (၉၀) ရာခိုင်နှုန်းကျော်ကို ဆုံးရှုံးခဲ့ရသော်လည်း နှစ်ပေါင်းများစွာ ကြာပြီးနောက် သူတို့ အတော်လေး ပြန်လည် နာလန်ထူလာခဲ့မည်မှာ သေချာလှသည်။

ထိုသို့မဟုတ်ပါက သူတို့ ထွက်ပေါ်လာရဲမည် မဟုတ်ချေ။

‘နတ်ဘုရားဝိညာဉ် ကိုယ်ပွား တစ်ခုတည်းကတောင် ဟင်းလင်းပြင်ဖြိုခွဲ အဆင့် စတုတ္ထအလွှာ မှာ ရှိနေတာဆိုတော့ သူ့ရဲ့ စစ်မှန်တဲ့ ရုပ်ခန္ဓာ က အနည်းဆုံး ဟင်းလင်းပြင်ဖြိုခွဲ အဆင့် ဆဋ္ဌမအလွှာ မှာ ရှိရမယ်။ တကယ်ကို ဒုက္ခပေးမယ့် လူပဲ’

ယဲ့ဖုန်းက သူ့ဘာသာ တွေးလိုက်သည်။

မြင့်မြတ်သော နတ်ဘုရားပုံစံ ၏ ပြန်လည်အသုံးပြုနိုင်မည့် အချိန်က ပြည့်သွားပြီ ဖြစ်သော်လည်း ၎င်းကို အသုံးပြုရန် သူ မရည်ရွယ်သေးချေ။

ဤအရာက လောလောဆယ်တွင် သူ၏ အစွမ်းထက်ဆုံး ဝှက်ဖဲ ဖြစ်ရာ ပေါ့ပေါ့ဆဆ အသုံးမပြုသင့်ပေ။

“ကောင်းကင်ဘုံသို့ ခြေလှမ်းခုနစ်လှမ်း” ကို အသုံးမပြုဘဲ သူ၏ လက်ရှိ အခြေအနေ တစ်ခုတည်းနှင့်ပင် ဤအဆင့်ကို ရင်ဆိုင်နိုင်စွမ်း ရှိပုံရသည်။

“တာအိုရောင်းရင်း.. ခင်ဗျားက ကျွန်တော်တို့ လျှို့ဝှက်ဆန်းကြယ် နိုင်ငံတော် ကို ဘာလို့ ဒီလောက် ကြောက်စရာကောင်းတဲ့ အရှိန်အဝါတွေ လာထုတ်ပြနေရတာလဲ”

ထိုအခိုက်အတန့်တွင် အသက်အရွယ် ကြီးရင့်နေပြီ ဖြစ်သော အသံတစ်ခု ထွက်ပေါ်လာသည်။

ထို့နောက် နူးညံ့သော အရှိန်အဝါ တစ်ခု ဆင်းသက်လာပြီး လူအများစုကို ကြီးမားလှသော ဖိအားများမှ ကင်းလွတ်သွားစေတော့၏။

လင်မြောင်ဘိုးဘေး ရောက်ရှိလာခြင်းပင် ဖြစ်သည်။

သူ၏ ဘေးတွင် ကျန်းလင်းဘိုးဘေး လည်း ပါဝင်၏။

မြေပြင်ပေါ်တွင်၊ အစိမ်းရောင် ဝတ်ရုံဝတ် ဓားဘိုးဘေး၊ သွေးကြာပန်း ဂိုဏ်းချုပ် နှင့် ငှက်မွေးဖြူ စံအိမ်သခင် တို့က အရိပ်မိစ္ဆာ ဂိုဏ်းချုပ် ကို မော့ကြည့်လိုက်ကြပြီး သူ၏ လုပ်ရပ်များက အရမ်းကို ရမ်းကားလွန်းသည်ဟု ခံစားလိုက်ရသည်။

သို့သော် အရိပ်မိစ္ဆာ ဂိုဏ်းချုပ် ကတော့ ထိုသို့ မြင်ပုံမရချေ။

ကောင်းကင်ယံတွင် မြင့်မားစွာ မတ်တတ်ရပ်လျက် အေးစက်ပြီး မောက်မာသော မျက်နှာထားဖြင့် မကြာသေးမီကမှ ရောက်ရှိလာသော ကျန်းလင်းဘိုးဘေး နှင့် လင်မြောင်ဘိုးဘေး တို့ကို ငုံ့ကြည့်ကာ မထီမဲ့မြင် လေသံဖြင့် မေးလိုက်သည်။

“မင်းတို့ထဲက ဘယ်သူက လျှို့ဝှက်ဆန်းကြယ် နိုင်ငံတော် ရဲ့ ဘိုးဘေးလဲ”

“ငါပဲ”

လင်မြောင်ဘိုးဘေး က ပြန်ဖြေလိုက်၏။

“တာအိုရောင်းရင်း တောင်ပိုင်း မြစ်ဝှမ်းနယ်မြေ မှာရှိတဲ့ သန်းနဲ့ချီတဲ့ သက်ရှိတွေကို အထိတ်တလန့် ဖြစ်အောင် ဘာလို့ ဒီလောက် ကြီးမားတဲ့ ဖိအားတွေ ထုတ်လွှတ်နေရတာလဲ” ကျန်းလင်းဘိုးဘေး က တင်းမာနေသော အခြေအနေကို လျှော့ချရန် ကြိုးစားလိုက်သည်။

ထိုအခါ၊ အရိပ်မိစ္ဆာ ဂိုဏ်းချုပ် က မထီမဲ့မြင် လေသံဖြင့် ပြောလိုက်၏။

“ဒီ မြေသြဇာကောင်းတဲ့ မြေက မူလက ငါတို့ ရှေးဟောင်း မျိုးနွယ်စုကြီး ဆယ့်ရှစ်ခု ရဲ့ ပိုင်နက်ပဲ။ မင်းတို့ အသစ်ရောက်လာတဲ့ ကောင်တွေက ယဉ်ကျေးမှု နည်းနည်းလောက် သင်ယူထားသင့်တယ်။ နားလည်လား”

ထိုစကားများ ထွက်ပေါ်လာသောအခါ လူအုပ်ကြီးမှာ အံ့အားသင့်သွားကြတော့သည်။

ရှေးဟောင်း မျိုးနွယ်စုကြီး ဆယ့်ရှစ်ခု ဟုတ်လား။

အဲဒါ ဘာအကြောင်း ပြောနေတာလဲ။

ထိုနေရာတွင် ရှိနေသူ အများစုမှာ အလွန် နည်းပါးသော လူအနည်းငယ်မှလွဲ၍ အရိပ်မိစ္ဆာ ဂိုဏ်းချုပ် ၏ စကားများ နောက်ကွယ်ရှိ အဓိပ္ပာယ်ကို လုံးဝ နားမလည်နိုင်အောင် ဖြစ်နေကြသည်။

“ရှေးဟောင်း မျိုးနွယ်စုကြီး ဆယ့်ရှစ်ခု”

ကျန်းလင်းဘိုးဘေး နှင့် လင်မြောင်ဘိုးဘေး တို့၏ အကြည့်များက စူးရှသွားတော့၏။

ဤ အင်အားစု ဆယ့်ရှစ်ခု အကြောင်းကို သေချာပေါက် သူတို့ သိထားကြသည်။

သို့သော် ဒဏ္ဍာရီ များ အဖြစ်သာ သိထားကြခြင်း ဖြစ်၏။

အထူးသဖြင့် လင်မြောင်ဘိုးဘေး မှာ သူ၏ မျက်လုံးများတွင် အံ့အားသင့်မှုများ ပြည့်နှက်နေပြီး အတော်လေး မယုံကြည်နိုင်အောင် ဖြစ်နေတော့သည်။

ရှေးဟောင်း မျိုးနွယ်စုကြီး ဆယ့်ရှစ်ခု တဲ့လား။

ဒါတွေက ရှေးဟောင်း မှတ်တမ်းတွေထဲမှာ မှတ်တမ်းတင်ထားတဲ့ ရှေးဟောင်း အင်အားစုတွေ မဟုတ်ဘူးလား။ အခု လောကထဲကို ပြန်ထွက်လာကြပြီလား။

ဤအချက်ကို တွေးမိသောအခါ လင်မြောင်ဘိုးဘေး မှာ ပို၍ပို၍ မယုံကြည်နိုင်အောင် ဖြစ်လာရသည်။

နှစ်ထောင်ပေါင်းများစွာ အမွေဆက်ခံလာခဲ့သော လျှို့ဝှက်ဆန်းကြယ် နိုင်ငံတော် ၏ အုပ်စိုးသူ တစ်ဦးအနေဖြင့် သူသည် ဤမြေသြဇာကောင်းသော မြေပေါ်တွင် နိုင်ငံတော်ကို တည်ထောင်ခဲ့စဉ်ကတည်းက ဤဒေသ၏ သမိုင်းကြောင်းကို နားလည်ထားခဲ့ပြီး ဖြစ်သည်။

ထို့ကြောင့် လင်မြောင်ဘိုးဘေး သည် လွန်ခဲ့သော နှစ်ပေါင်း တစ်သောင်းခန့်က တောင်ပိုင်း မြစ်ဝှမ်းနယ်မြေ တွင် ကြီးမားသော စစ်ပွဲကြီးတစ်ခု ဖြစ်ပွားခဲ့ကြောင်းကို သိရှိထား၏။

ထိုစစ်ပွဲကြီးအတွင်း ရှေးဟောင်း မျိုးနွယ်စုကြီး ဆယ့်ရှစ်ခု အားလုံး ပျောက်ကွယ်သွားခဲ့ကြသည်။

သူ၏ အမြင်တွင် ရှေးဟောင်း မျိုးနွယ်စုကြီး ဆယ့်ရှစ်ခု သည် သမိုင်းစင်မြင့်ပေါ်မှ ထွက်ခွာသွားခဲ့ပြီ ဖြစ်သော်လည်း မမျှော်လင့်ဘဲ နှစ်ပေါင်း တစ်သောင်းတိုင်တိုင် ပုန်းအောင်းနေခဲ့ပြီးနောက် ယခုအခါ လောကထဲသို့ ပြန်လည် ထွက်ပေါ်လာခဲ့ပြီ လော။

ကျန်းလင်းဘိုးဘေး သည်လည်း ရှေးဟောင်း မျိုးနွယ်စုကြီး ဆယ့်ရှစ်ခု အကြောင်းကို သိရှိထားပါ၏။

လွန်ခဲ့သော နှစ်ပေါင်း တစ်သောင်းခန့်က သူတို့သည် ထိပ်တန်း ကြယ်လေးပွင့်အဆင့် အင်အားစု များ ဖြစ်ခဲ့ကြပြီး ကျောင်းယန် သန့်စင်သော မြို့တော် တွင်ပင် သူတို့နှင့် ပတ်သက်သော မှတ်တမ်းများ ရှိနေသည်။

ရှေးဟောင်း မျိုးနွယ်စုကြီး ဆယ့်ရှစ်ခု ပူးပေါင်းလိုက်သောအခါ သူတို့၏ ခွန်အားက ကြယ်ငါးပွင့်အဆင့် အင်အားစု များကို ယှဉ်ပြိုင်နိုင်စွမ်း ရှိပြီး သူတို့၏ ဂုဏ်သတင်းကလည်း အတော်လေး ကြီးမားသည်ဟု ဆိုကြသည်။

ကျန်းလင်းဘိုးဘေး ၏ မှတ်ဉာဏ်ထဲတွင် ရှေးဟောင်း မျိုးနွယ်စုကြီး ဆယ့်ရှစ်ခု ရုတ်တရက် ပျောက်ကွယ်သွားခြင်းမှာ အလွန် ကြေကွဲဖွယ်ကောင်းပြီး ပြင်းထန်သော တိုက်ပွဲကြီးတစ်ခု ကြောင့် ဖြစ်ကြောင်း သိထားရ၏။

ထိုတိုက်ပွဲကြီး၏ စစ်မှန်သော အကြောင်းရင်းနှင့် ပတ်သက်၍မူ မည်သူမျှ ရှင်းရှင်းလင်းလင်း မသိကြချေ။

ဘာပဲဖြစ်ဖြစ် ဤအရာများသည် လွန်ခဲ့သော နှစ်ပေါင်း တစ်သောင်းခန့်က အဖြစ်အပျက်များ ဖြစ်ပြီး တစ်စုံတစ်ယောက်က ကိုယ်တိုင် ကြုံတွေ့ခဲ့ရခြင်း မရှိလျှင် မည်သူကမျှ အသေးစိတ်ကို သေချာ မသိနိုင်ပေ။

“သြော် ၊ ရှေးဟောင်း မျိုးနွယ်စုကြီး ဆယ့်ရှစ်ခု က စီနီယာတွေပဲ။ ဒါဆို မိတ်ဆွေ က ဘယ်အင်အားစု ကများလဲ”

လင်မြောင်ဘိုးဘေး ၏ သဘောထားက အများကြီး ပိုမို ရိုသေလေးစားလာတော့၏။

ဘာပဲဖြစ်ဖြစ် တစ်ဖက်လူက စီနီယာ တစ်ဦး ဖြစ်ရာ သင့်တော်သော လေးစားမှု တစ်ခုကိုတော့ ပြသသင့်သည် မဟုတ်ပါလား။

“ငါက အရိပ်မိစ္ဆာ ဂိုဏ်း ရဲ့ လက်ရှိ ဂိုဏ်းချုပ် ပဲ”

သူက ကျယ်လောင်စွာ ပြောလိုက်ရာ သူ၏ အသံက အရှိန်အဝါဖြင့် ပိုမို ကျယ်လောင်သွားပြီး တောင်ပိုင်း မြစ်ဝှမ်းနယ်မြေ တစ်ခုလုံးသို့ မျက်တောင်တစ်ခတ်အတွင်း ပျံ့နှံ့သွားတော့၏။

ထိုသို့ပြောပြီးနောက် သူက မြေပြင်ဘက်သို့ လှမ်းကြည့်လိုက်သည်။

“အစိမ်းရောင် ဝတ်ရုံဝတ် ဓားဘိုးဘေး၊ သွေးကြာပန်း ဂိုဏ်းချုပ်၊ ငှက်မွေးဖြူ စံအိမ်သခင် မင်းတို့က ဘာလို့ ထွက်မလာကြသေးတာလဲ”

အရိပ်မိစ္ဆာ ဂိုဏ်းချုပ် က လေးနက်သော လေသံဖြင့် ပြောလိုက်သည်။

“အခြေအနေက ဒီလိုဖြစ်နေမှတော့ ငါတို့လည်း ထွက်သွားကြတာပေါ့။ ငါတို့ ရှေးဟောင်း မျိုးနွယ်စုကြီး ဆယ့်ရှစ်ခု လောကထဲကို ထွက်လာဖို့က အစောကြီး ဖြစ်ဖြစ် ၊ နောက်ကျမှ ဖြစ်ဖြစ် လိုအပ်တာပဲလေ” ဟု သွေးကြာပန်း ဂိုဏ်းချုပ် က ပြောလိုက်၏။

ထိုစကားကို ကြားသောအခါ အစိမ်းရောင် ဝတ်ရုံဝတ် ဓားဘိုးဘေး နှင့် ငှက်မွေးဖြူ စံအိမ်သခင် တို့က ခေါင်းညိတ်လိုက်ကြပြီး ကောင်းကင်ယံသို့ အတူတကွ ပျံတက်သွားကာ အရိပ်မိစ္ဆာ ဂိုဏ်းချုပ် ၏ အနီးတွင် မတ်တတ်ရပ်လိုက်ကြသည်။

ဟင်းလင်းပြင်ဖြိုခွဲ အဆင့် စတုတ္ထအလွှာ ၏ တူညီသော ဖိအားများ ပေါက်ကွဲထွက်လာတော့၏။

ထိုမြင်ကွင်းကို မြင်လိုက်ရသောအခါ လူအုပ်ကြီးမှာ အံ့အားသင့်သွားကြသည်။

“ဟင်းလင်းပြင်ဖြိုခွဲ အဆင့် ရှေးဟောင်း ပညာရှင် လေးယောက်တောင်”

“ဒါက ရှေးဟောင်း မျိုးနွယ်စုကြီး ဆယ့်ရှစ်ခု ရဲ့ စစ်မှန်တဲ့ ခွန်အားလား”

အင်အားစု အသီးသီးမှ လူများမှာ အံ့အားသင့် ထိတ်လန့်သွားကြတော့၏။

ဘေးမှ ကြည့်ရှုနေသူ အများအပြားသည် ရှေးဟောင်း မျိုးနွယ်စုကြီး ဆယ့်ရှစ်ခု ၏ သမိုင်းကြောင်းကို မသိကြသော်လည်း ဟင်းလင်းပြင်ဖြိုခွဲ အဆင့် ခွန်အားရှိသူ လေးဦး ထွက်ပေါ်လာခြင်းက သေချာပေါက် ရိုးရှင်းသော ကိစ္စ မဟုတ်ချေ။

“မိတ်ဆွေ လေးယောက်... ရှေးဟောင်း မျိုးနွယ်စုကြီး ဆယ့်ရှစ်ခု က ဘာလို့များ တောင်ပိုင်း မြစ်ဝှမ်းနယ်မြေ မှာရှိတဲ့ လူတိုင်းကို အထိတ်တလန့် ဖြစ်စေပြီး မတည်ငြိမ်မှုတွေ အလွယ်တကူ ဖြစ်ပေါ်စေနိုင်တဲ့ ဒီလောက် ကြီးကျယ်ခမ်းနားတဲ့ ဝင်ရောက်မှုမျိုး လုပ်ရတာလဲ”

လင်မြောင်ဘိုးဘေး က ကြင်နာစွာ မေးမြန်းလိုက်သည်။

သူက သူ၏ ထိုင်ခုံတွင် တည်ငြိမ်စွာ ထိုင်နေဆဲဖြစ်သော ယဲ့ဖုန်းကို တစ်ချက် လှမ်းကြည့်လိုက်ပြီး ယဲ့ဖုန်းတွင် အစီအစဉ် တစ်ခုခု ရှိနေမည်မှာ သေချာကြောင်း သိလိုက်၏။

“တောင်ပိုင်း မြစ်ဝှမ်းနယ်မြေ က အမြဲတမ်း ငါတို့ ရှေးဟောင်း မျိုးနွယ်စုကြီး ဆယ့်ရှစ်ခု ပိုင်တာပဲ။ ဒီနေ့ကစပြီး ငါတို့ မျိုးနွယ်စု လောကထဲကို ပြန်ရောက်လာပြီဆိုတော့ ဂိုဏ်းရဲ့ အမာခံစခန်း ကို ပြန်လည် တည်ဆောက်ဖို့ နေရာတစ်ခုကို သိမ်းပိုက်ရမယ်။ ဒီနေရာက တော်တော်လေး သင့်တော်တယ်လို့ ငါ ထင်တယ်။ ဒါကြောင့် ဒီနေ့ကစပြီး ဒီနေရာက ငါတို့ အရိပ်မိစ္ဆာ ဂိုဏ်း ပိုင်ပြီ”

အရိပ်မိစ္ဆာ ဂိုဏ်းချုပ် က လက်နှစ်ဖက်ကို နောက်ပစ်လျက် မောက်မာသော မျက်နှာထားဖြင့် ပြောလိုက်သည်။

လူဦးရေ ဆယ်သန်းကျော် ရှိသော ရေပေါ်ဖြူ မြို့တော် သည် အတော်လေး အချက်အချာကျသော နေရာတွင် တည်ရှိသည့် မြို့သစ်တစ်ခု ဖြစ်ရာ သူ အတော်လေး သဘောကျနေခြင်း ဖြစ်၏။

“မင်းက မြူခိုးဂိုဏ်း နဲ့ နေရာ လုချင်နေတာလား”

အစိမ်းရောင် ဝတ်ရုံဝတ် ဓားဘိုးဘေး က မျက်မှောင်အနည်းငယ် တွန့်လိုက်ပြီး အရိပ်မိစ္ဆာ ဂိုဏ်းချုပ် က အရမ်း ကြွားလုံးထုတ်လွန်းနေသည်ဟု ခံစားလိုက်ရသည်။

ဘာပဲဖြစ်ဖြစ် ရေပေါ်ဖြူ မြို့တော် သည် မြူခိုးဂိုဏ်း ၏ လက်အောက်ခံ မြို့တစ်မြို့ ဖြစ်ပြီး ယနေ့သည် ကြယ်အဆင့် တိုးမြှင့်ခြင်း အောင်ပွဲခံ အခမ်းအနား ကျင်းပသည့် အခါသမယ ဖြစ်သည်။ အကယ်၍ သူက ဒီအတိုင်း အတင်း သိမ်းပိုက်လိုက်မည် ဆိုလျှင် မြူခိုးဂိုဏ်း နှင့် ရန်သူ ဖြစ်သွားမည် မဟုတ်ပါလား။

“မြူခိုးဂိုဏ်း လောက်လေးကို ဘာကြောက်စရာ ရှိလို့လဲ”

အရိပ်မိစ္ဆာ ဂိုဏ်းချုပ် က အေးစက်ပြီး မောက်မာသော မျက်နှာထားဖြင့် ပြောလိုက်၏။

သူ စုဆောင်းထားသော သတင်းအချက်အလက်များအရ မြူခိုးဂိုဏ်း တွင် ထူးခြားချက် အချို့ ရှိကောင်း ရှိနိုင်သော်လည်း အရိပ်မိစ္ဆာ ဂိုဏ်း ကို ယှဉ်နိုင်မည် မဟုတ်ချေ။

သူက ကောင်းကင်မျက်လုံး ကို အသုံးပြုကာ မြူခိုးဂိုဏ်း ကို စောင့်ကြည့်လိုက်သည်။

“ဒီလောက် များပြားတဲ့ ကံကြမ္မာတွေ။ ဒီလို အင်အားစု မျိုးက ငါတို့ အရိပ်မိစ္ဆာ ဂိုဏ်း ရဲ့ ထိန်းချုပ်မှု အောက်မှာ ရှိသင့်တာ”

အရိပ်မိစ္ဆာ ဂိုဏ်းချုပ် က တွေးလိုက်၏။

အကယ်၍ သူက ဤနေရာကို သိမ်းပိုက်နိုင်မည်ဆိုလျှင် အရိပ်မိစ္ဆာ ဂိုဏ်း သည် မြူခိုးဂိုဏ်း ၏ ကံကြမ္မာများကို ဝါးမြိုပြီး ဆက်လက်၍ အစွမ်းထက်လာမည်မှာ သေချာလှသည်။

“ခင်ဗျားက ကျွန်တော့်ရဲ့ ရေပေါ်ဖြူ မြို့တော် ကို သိမ်းပိုက်ချင်နေတာလား”

ရုတ်တရက် မြေပြင်မှ ပျင်းရိသော အသံတစ်ခု ထွက်ပေါ်လာတော့၏။

--