အခန်း ၁၆၃

အခန်း (၁၆၃) နှစ်သန်းပေါင်းများစွာကို ဖြတ်သန်းလာတဲ့ အသံဖြင့် ဆက်သွယ်မှုတစ်ခု

"ဝင်္ကပါကို ပြုပြင်ပြီးပြီ"

ချီလေ့ကွမ် အကျယ်ကြီး အော်လိုက်သဖြင့် အနီးအနားရှိ လူအားလုံး လန့်ဖျတ်သွားကြသည်။ နင်းဖန် ရုပ်သေးရုပ်ကို စတင် ပြုပြင်ကတည်းက ချီလေ့ကွမ်သည် တစ်စက္ကန့်မျှ မျက်တောင်မခတ်ဘဲ နေ့ရောညပါ နှစ်ရက်တိုင်တိုင် စိုက်ကြည့်နေခဲ့ခြင်း ဖြစ်သည်။

အခြား အကြီးအကဲများသည် အစပိုင်းတွင် စိတ်ဝင်တစား ရှိခဲ့ကြသော်လည်း နင်းဖန်၏ လက်ရာမှာ ဆရာကျ လွန်းပြီး နားမလည်နိုင်လောက်အောင် နက်နဲလွန်းသဖြင့် နောက်ဆုံး၌ လက်လျှော့လိုက်ကြသည်။ လွန်ခဲ့သည့် နှစ်ရက်အတွင်း အားလုံးက ကိုယ့်အလုပ်နှင့်ကိုယ် ရှုပ်နေခဲ့ကြပြီး အချို့က ကျင့်ကြံခြင်း၊ စကားစမြည်ပြောခြင်းနှင့် တိုက်ခိုက်ရေး လေ့ကျင့်ခြင်းများကို ပြုလုပ်နေကြသည်။

ယခု ချီလေ့ကွမ်၏ အော်သံကြောင့် လူအုပ်ကြီး လုပ်လက်စများကို ချက်ချင်းရပ်ကာ စုရုံးကြည့်ရှုကြတော့သည်။ ကြေမွပျက်စီးနေသော အသူရာ နတ်ဘုရား ရုပ်သေးရုပ်သည် "အသက်စွမ်းအင်" ပြန်လည်ရရှိလာပြီး လှုပ်ရှားလာသည်ကို မြင်လိုက်ရသောအခါ အားလုံး အံ့အားသင့်ကာ အသက်ရှူမှားသွားကြတော့သည်။

"ကောင်းကင်ဘုံအလယ်အလတ်အဆင့် ရုပ်သေးရုပ် တစ်ခု... နင်းဖန်က တကယ်ပဲ အဲဒါကို ပြင်လိုက်တာလား"

"ဒီ အသူရာ နတ်ဘုရား ရုပ်သေးရုပ် က ခန်းမထဲမှာ နှစ်သန်းပေါင်း နှစ်သန်းလောက် ရှိနေခဲ့တာ... ဝိညာဉ်ဖိနှိပ်ခြင်း တောင်ထိပ် အရှင်သခင် အများအပြား အဲဒါကို လေ့လာခဲ့ကြပေမယ့် တစ်ယောက်မှ အဲဒီရဲ့ အတွင်းပိုင်း ဝင်္ကပါ ကို ပြန်လည် မတည်ဆောက်နိုင်ခဲ့ဘူး... ဒါပေမယ့် နင်းဖန်က အဲဒါကို နှစ်ရက်ပဲ လုပ်ပြီး သူ အောင်မြင်သွားတာလား"

"သူ ဝင်္ကပါ တာအို ကို ဘယ်ကနေ သင်လာတာလဲ"

"ဘယ်သူက ဂရုစိုက်မှာလဲ သူ ပြင်နိုင်တယ်ဆိုရင် သူ့မှာ ကျွမ်းကျင်မှု ရှိတယ်လို့ အဓိပ္ပာယ်ရတာပဲ"

"ရုပ်သေးရုပ် ကို ပြုပြင်တာက အဲဒါကို ဖန်တီးတာထက် ပိုခက်တယ်လို့ ဂျူနီယာညီလေးချီ ပြောခဲ့တယ် မဟုတ်လား... အဲဒါက နင်းဖန်မှာ ကောင်းကင်ဘုံအဆင့် ရုပ်သေးရုပ် တွေကို ဖန်တီးနိုင်စွမ်း ရှိနေပြီလို့ မဆိုလိုဘူးလား"

"ရှီး …. ကောင်းကင်ဘုံအဆင့် တိုက်ခိုက်ရေး အမျိုးအစား ရုပ်သေးရုပ် တစ်ခုမှာ ပုံကြမ်းရဲ့ ရှုပ်ထွေးမှုအပေါ် မူတည်ပြီး တရားဓမ္မသဏ္ဌာန် နယ်ပယ် နဲ့ ကောင်းကင်အရှင်သခင် နယ်ပယ် ကြားက တိုက်ခိုက်ရေး စွမ်းအား ရှိတယ်... အကယ်၍ နင်းဖန်က အဲ့ ဒီအဆင့်ရှိ ရုပ်သေးရုပ် တွေကို ဖန်တီးနိုင်ရင် သူကိုယ်တိုင် စစ်တပ်တစ်ခု ဖြစ်လာနိုင်ပြီး ဂိုဏ်းကို ပိုအားကောင်းလာစေလိမ့်မယ်"

အကြီးအကဲများသည် ဤအကြောင်းကို အလွန် စိတ်လှုပ်ရှားစွာ ဆွေးနွေးခဲ့ကြ၏။ သူတို့ တစ်ယောက်ချင်းစီတိုင်းသည် စိတ်ဓာတ်များ တောက်ပနေကြသည်။ ချီလေ့ကွမ် လည်း အလွန် စိတ်လှုပ်ရှားနေသော်လည်းရှင်းပြရာတွင် သူ၏ စကားကို ထိန်းချုပ်ထားခဲ့သည်...

"အဲဒါ ဒီလောက် မရိုးရှင်းပါဘူး... ကောင်းကင်ဘုံအဆင့် ရုပ်သေးရုပ် ဟာ ပေါ့ပေါ့ပါးပါး ဖန်တီးလို့ရတဲ့ အရာ မဟုတ်ဘူး... အဲဒါက မှန်ကန်တဲ့ အချိန်၊ မှန်ကန်တဲ့ နေရာ နဲ့ မှန်ကန်တဲ့ လူ လိုအပ်တယ်"

သူက ဤစကားများဖြင့် လူတိုင်းကို သတိပေးလိုက်ခြင်း ဖြစ်သည်။ ရုပ်သေးရုပ် ဖန်တီးခြင်းသည် ဆေးဖော်စပ်ခြင်း သို့မဟုတ် မှော်လက်နက် သွန်းလုပ်ခြင်းကဲ့သို့ပင် ကျရှုံးနိုင်ခြေ အမြဲရှိလှ၏။ အထူးသဖြင့် ဝင်္ကပါများ ထွင်းထုပြီး လည်ပတ်စေရန် အကြိမ်ကြိမ် စမ်းသပ်ရသဖြင့် တစ်ကြိမ်တည်းနှင့် အောင်မြင်ရန် မလွယ်ကူချေ။

ထို့ပြင် ရုပ်သေးရုပ်၏ ဂုဏ်သတ္တိအလိုက် သင့်တော်မည့် ကုန်ကြမ်းပစ္စည်းများကို ရွေးချယ်ရသေးသည်။ အကယ်၍ တိုက်ခိုက်ရေးအမျိုးအစား ရုပ်သေးရုပ်ဆိုလျှင် ကာလကြာရှည်ကတည်းက ပျောက်ကွယ်သွားပြီဖြစ်သော "ငရဲကိုးထပ် နက်နဲသံမဏိ" ကဲ့သို့ ရှားပါးရတနာများပင် လိုအပ်တတ်သည်။ ဤကဲ့သို့သော ကန့်သတ်ချက်မျိုးစုံကြောင့် ကောင်းကင်ဘုံအဆင့် ရုပ်သေးရုပ်တိုင်းသည် အလွန်အမင်း တန်ဖိုးကြီးမားလှခြင်း ဖြစ်သည်။

ထိုသို့သာ မဟုတ်လျှင် ၁၂ ဆက်မြောက် တောင်ထိပ်အရှင်သခင်သည် ဂိုဏ်း၏ အခြေခံအုတ်မြစ်အဖြစ် ကောင်းကင်ဘုံအဆင့် ရုပ်သေးရုပ် ထောင်ပေါင်းများစွာကို အလွယ်တကူ ဖန်တီးချန်ထားခဲ့မည် မဟုတ်ပါလော။ သို့သော် လက်တွေ့တွင် ထိုသို့ မဖြစ်နိုင်ကြောင်း ထင်ရှားလှပေသည်။ ချီလေ့ကွမ်၏ ရှင်းပြချက်ကို ကြားရပြီးနောက် လူတိုင်း၏ စိတ်လှုပ်ရှားမှုများ အနည်းငယ် ငြိမ်ကျသွားခဲ့သည်။

သို့သော် သူတို့၏ မျက်နှာများတွင် မျှော်လင့်ချက်များ ရှိနေဆဲဖြစ်ပြီး အောက်ဘက်ရှိ အခြေအနေကိုသာ မျက်တောင်မခတ်တမ်း စောင့်ကြည့်နေကြသည်။ တစ်ဖက်တွင်လည်း နင်းဖန်မှာမူ ဤရုပ်သေးရုပ်၏ အတွင်းပိုင်းဝင်္ကပါကို ရိုးရိုးရှင်းရှင်း ပြုပြင်လိုက်ရုံမျှဖြင့် ဤမျှ ကြီးမားသော လှုပ်ခတ်မှုကို ဖြစ်စေလိမ့်မည်ဟု လုံးဝ မထင်ထားခဲ့မိချေ။

ယခုအချိန်တွင် သူသည် နတ်ဘုရားစိတ်အာရုံမှတစ်ဆင့် ရုပ်သေးရုပ်နှင့် ချိတ်ဆက်ကာ ပြန်လည်ရရှိလာသော တုံ့ပြန်မှုကို သေချာစွာ အာရုံခံနေသည်။ အချိန်အတော်ကြာ စစ်ဆေးပြီးနောက်တွင်မှ သူ ကျေနပ်စွာဖြင့် ခေါင်းညိတ်လိုက်တော့သည်။

"မဆိုးဘူး၊ အတွင်းပိုင်း ဝင်္ကပါ က အခု လုံးဝ ပုံမှန်ဖြစ်နေပြီ"

"ဒါပေမယ့် အဲဒီ မှတ်ဉာဏ် အပိုင်းအစတွေထဲမှာ တွေ့ရတဲ့ တိုက်ခိုက်ရေး စွမ်းအား ပြန်လည်ရဖို့ဆိုရင် အပြင်ခွံ ကိုလည်း ပြုပြင်မှုတချို့ လုပ်ဖို့ လိုသေးတယ်"

နင်းဖန်သည် မေးစေ့ကို ပွတ်သပ်ကာ ဟိုဟိုဒီဒီ လမ်းလျှောက်ရင်း တွေးတောနေမိသည်။ တိုက်ခိုက်ရေး ရုပ်သေးရုပ်များသည် ကျင့်ကြံသူများနှင့်မတူဘဲ ရုပ်ခန္ဓာကို ကျင့်ကြံ၍ မရနိုင်ချေ။ ၎င်းတို့၏ ခန္ဓာကိုယ်ကြံ့ခိုင်မှုမှာ ဖန်တီးရာတွင် အသုံးပြုသည့် ကုန်ကြမ်းပစ္စည်းများပေါ်တွင်သာ လုံးဝ မူတည်နေသည်။

ထို့ပြင် ဤရုပ်သေးရုပ်တစ်ကိုယ်လုံးကို "ကိုးထပ်ငရဲ နက်နဲသံမဏိ" ဖြင့် တည်ဆောက်ထားခြင်း ဖြစ်သည်။ ဤကုန်ကြမ်းမှာ ယခုခေတ်တွင် ရှားပါးသွားပြီဖြစ်ရာ အခြား မည်သည့်အင်အားစုကမျှ ထုတ်လုပ်နိုင်မည် မဟုတ်ချေ။ ကံကောင်းထောက်မစွာဖြင့် ထိုက်ရီအစစ်အမှန်ဂိုဏ်း၏ နက်နဲသော အခြေခံအုတ်မြစ်ကြောင့် ပစ္စည်းအချို့ ကျန်ရှိနေသေးခြင်း ဖြစ်သည်။

နင်းဖန်က လက်တစ်ချက် တောက် လိုက်ရာ ချုံချီလေးသည် ချက်ချင်း အတောင်ပံခတ်ကာ သက်တံရောင်အလင်းတန်းအသွင်ဖြင့် ခန်းမထဲမှ ပျံသန်းထွက်သွားတော့သည်။ ဆယ့်ငါးမိနစ်ခန့်အကြာတွင် လေဟာနယ်လှုပ်ခတ်သွားပြီး ထိုသားရဲလေး၏ ပုံရိပ် ပြန်လည်ပေါ်လာခဲ့သည်။

နင်းဖန်၏ရှေ့တွင် ဝဲပျံပြီးနောက် သားရဲလေးသည် ဗိုက်ကို တုန်ခါကာ အိတ်ကပ်တစ်ခုထဲမှ သွန်းထုတ်လိုက်သကဲ့သို့ သံမဏိပစ္စည်းအပုံကြီးကို ထွေးထုတ်လိုက်သည်။ ဤပစ္စည်းများ၏ မျက်နှာပြင်တွင် သိပ်သည်းလှသော မကောင်းဆိုးဝါးချီများ ရစ်သိုင်းနေပြီး တစ်ကိုယ်လုံး မည်းနက်နီရဲနေကာ အမှန်တကယ်ပင် ကိုးထပ်ငရဲ နက်နဲသံမဏိများ ဖြစ်ကြသည်။

"လိမ္မာလိုက်တာ..."

နင်းဖန်က ပြုံးလိုက်ပြီး ချုံချီလေး၏ ခေါင်းကို ပွတ်သပ်ပေးရန် လက်ဆန့်ထုတ်လိုက်သည်။ သူ့အတွက် ကုန်ကြမ်းများ သွားရောက်ယူဆောင်ရန် 'ကောင်းကင်လက်မှုပညာ တောင်ထိပ်' သို့ သွားဖို့ သံသံလေးကို သူ အမိန့်ပေးခဲ့ခြင်း ဖြစ်သည်။ သယ်ယူပို့ဆောင်ရေးအမျိုးအစား ရုပ်သေးသားရဲတစ်ကောင်အနေဖြင့် သံသံလေး၏ အလုပ်လုပ်နိုင်စွမ်းမှာ တကယ်ကို ထိပ်တန်းအဆင့်ဟု ပြောရမည်။

'ငါသာ ဒီကောင်လေးကို ခေတ်သစ်ကမ္ဘာဆီ ပြန်ခေါ်သွားပြီး အစားအသောက် ပို့ခိုင်းရင် တစ်နေ့ကို အော်ဒါ နှစ်ထောင်လောက် ပြေးနိုင်မှာပဲ...'

နင်းဖန်သည် ဤရယ်စရာကောင်းသော အတွေးကို ဖျောက်ဖျက်ကာ ပစ္စည်းများနှင့် အသူရာနတ်ဘုရား ရုပ်သေးရုပ်ကို ခန်းမအနက်ဆုံးရှိ ရုပ်သေး သွန်းလုပ်ရေးအခန်းသို့ ယူဆောင်လာခဲ့သည်။

ထိုနေရာတွင် ရုပ်သေးပစ္စည်းများကို ပုံသွင်းရာ သီးသန့်နေရာ ဖြစ်သည်။ လျှို့ဝှက်ခန်းမတစ်ခုလုံးကို အထူးဝင်္ကပါများ ရေးထိုးထားပြီး အခန်းအောက်ခြေတွင် ကောင်းကင်နှင့်မြေကြီး၏ ထူးဆန်းသော မြေကမ္ဘာမီးတောက်များ တောက်လောင်နေသည်။ နင်းဖန်သည် ဖန်တီးမှုလုပ်ငန်းစဉ်ကို စတင်လိုက်ပြီး အချိန်များ တစ်စတစ်စ ကုန်လွန်သွားကာ မျက်စိတစ်မှိတ်အတွင်း နောက်ထပ် နှစ်ရက် ကုန်လွန်သွားခဲ့သည်။

ယခုအချိန်တွင် မူလက စုတ်ပြတ်နေသော အသူရာနတ်ဘုရား ရုပ်သေးရုပ်မှာ လုံးဝ ပြောင်းလဲသွားခဲ့ပြီ ဖြစ်သည်။ ရုပ်သေးရုပ်သည် အခန်းဗဟိုတွင် လွင့်မျောနေပြီး အသစ်ဖြည့်တင်းလိုက်သော ကိုးထပ်ငရဲ နက်နဲသံမဏိများသည် အပူရှိန်ကြောင့် နီရဲကာ ပျက်စီးနေသော နေရာအားလုံးကို အပြည့်အဝ ဖုံးအုပ်သွားခဲ့သည်။

နာရီအနည်းငယ်အကြာတွင် ကောင်းကင်နှင့်မြေကြီး၏ ဝိညာဉ်ချီများ ရုတ်တရက် စုစည်းလာပြီးနောက် မြင့်မားကာ ခွန်အားကြီးမားသော လူသဏ္ဌာန်ရုပ်သေးရုပ်တစ်ခုသည် တောက်လောင်နေသော မြေကမ္ဘာမီးတောက်များထဲမှ ထွက်လာသည်။ထိုအရာမှာမှာ အပြည့်အဝ ပြုပြင်ပြီးသွားသော အသူရာနတ်ဘုရား ရုပ်သေးရုပ်ပင် ဖြစ်သည်။

ဤအခိုက်အတန့်တွင် ရုပ်သေးရုပ်သည် ၎င်း၏ အထွတ်အထိပ်အခြေအနေသို့ လုံးဝ ပြန်လည်ရောက်ရှိသွားခဲ့ပြီ ဖြစ်သည်။ တစ်ကိုယ်လုံးမှာ အနီနက်ရောင် သန်းနေပြီး သန်မာလှသော ခြေလက်များ ရှိကာ အဆစ်များကို နဂါးအကြေးခွံပုံစံ သံချပ်ကာပြားများဖြင့် အထပ်ထပ် ဖုံးအုပ်ထားသည်။ ရုပ်ထွက်တစ်ခုလုံးမှာ ပေါ့ပါးသွက်လက်ပြီး ပေါက်ကွဲထွက်လုမတတ် စွမ်းအားများဖြင့် ပြည့်နှက်နေ၏။

ထိုရုပ်သေးရုပ်သည် ဒူးတစ်ဖက်ထောက်ကာ ၎င်း၏ သစ္စာရှိမှုကို ပြသလိုက်သည်။ အတွင်းပိုင်း ဝင်္ကပါ လည်ပတ်လာသည်နှင့်အမျှ နတ်ဘုရားစိတ်အာရုံမှတစ်ဆင့် နင်းဖန်၏စိတ်ထဲသို့ ပုံရိပ်တစ်ခု ဝင်ရောက်လာခဲ့သည်။

၎င်းမှာ ထိုရုပ်သေးရုပ်ကို စတင်ဖန်တီးခဲ့သည့် အတိတ်က မြင်ကွင်း ဖြစ်သည်။ လွင့်မျောနေသော မြူခိုးများကြားတွင် ဆက်တိုက်တည်ရှိနေသော တောင်ထိပ်များ ပေါ်ထွက်လာပြီး လက်ရှိဂိုဏ်း၏ အသွင်သဏ္ဌာန်ကို ဝေဝါးစွာ မြင်တွေ့ရသည်။ မျက်နှာကို ရှင်းလင်းစွာ မမြင်ရသော အမျိုးသားတစ်ဦးသည် အလယ်တွင် ရပ်နေပြီး သူ့နောက်၌ ရုပ်သေးယန္တရား အမြောက်အမြား ရှိနေသည်။

သူသည် ဝင်္ကပါတစ်ခုကို ထိန်းချုပ်ကာ မြေကမ္ဘာမီးတောက်များထဲတွင် လူသဏ္ဌာန် တိုက်ခိုက်ရေးရုပ်သေးရုပ် ခုနစ်ခုကို ဖန်တီးနေပြီး တစ်ခုချင်းစီမှာ အားကောင်းမောင်းသန်သော အရှိန်အဝါများကို ပိုင်ဆိုင်ထားကြသည်။ သို့သော် ထိုပုံရိပ်သည် ထိုနေရာတင် ရုတ်တရက် ပြတ်တောက်သွားခဲ့တော့သည်။

"အဲ့ဒီစီနီယာက မင်းရဲ့ ဖန်တီးရှင်လား"

နင်းဖန် အနည်းငယ် အံ့အားသင့်သွားသည်။ ရုပ်သေးရုပ်ထံမှ စီးဆင်းလာသော မှတ်ဉာဏ်ပုံရိပ်များသည် အနည်းဆုံး လွန်ခဲ့သော နှစ်သန်းပေါင်း သောင်းချီက ဖြစ်ရပ်များ ဖြစ်ရမည်။ ထိုရုပ်သေးရုပ်၏ ဖန်တီးရှင်မှာ ဝိညာဉ်ဖိနှိပ်ခြင်းတောင်ထိပ်၏ ၁၂ဆက်မြောက် တောင်ထိပ်အရှင်သခင် ဖြစ်ဟန်တူပြီး ဤကဲ့သို့သော အသူရာနတ်ဘုရား ရုပ်သေးရုပ်မျိုးမှာ စုစုပေါင်း (၇) ခု ရှိနေခြင်း ဖြစ်သည်။

ဤအချက်က နင်းဖန်၏ စိတ်ဝင်စားမှုကို နိုးဆွပေးလိုက်သဖြင့် သူသည် တောင်ထိပ်တစ်ခုလုံးကို အနှံ့အပြား ရှာဖွေတော့သည်။ နာရီအနည်းငယ်အကြာတွင် ကျန်ရှိနေသော ရုပ်သေးရုပ် (၆) ခုကို ရှာတွေ့ခဲ့သည်။ ၎င်းတို့အနက် (၄) ခုမှာ နဂိုအတိုင်း ရှိနေသော်လည်း ကျန် (၂) ခုမှာမူ လုံးဝ စွန့်ပစ်ရလုနီးပါး ပျက်စီးနေပြီ ဖြစ်သည်။

သို့သော် နင်းဖန်သည် စိတ်ပျက်မသွားဘဲ ထိုရုပ်သေးရုပ်အားလုံးကို ပြုပြင်ရန် (၈) ရက်ခန့် အချိန်ယူခဲ့သည်။ ယခုအခါ အသူရာနတ်ဘုရား ရုပ်သေးရုပ် (၇) ခုစလုံးသည် “တာအိုတည်ထောင်ခြင်းအဆင့်” ကျွမ်းကျင်သူတစ်ဦး၏ တိုက်ခိုက်ရေးစွမ်းအားကို ပိုင်ဆိုင်သွားကြပြီး နင်းဖန်၏ အမိန့်ကို နာခံရန် အသင့်ဖြစ်နေကြပြီဖြစ်သည်။

ဤပြုပြင်မှုများသည် နင်းဖန်၏ နတ်ဘုရားစိတ်အာရုံကိုလည်း များစွာ တိုးတက်စေခဲ့သည်။ သူ၏ စိတ်အာရုံ မှာ မိုင်ပေါင်း ၁၅၀,၀၀၀ အထိ ကျယ်ပြန့်လာပြီး စိတ် စွမ်းအားမှာလည်း ယခင်ကထက် နှစ်ဆခန့် တိုးလာကာ နယ်ပယ်သစ်တစ်ခုသို့ ကူးပြောင်းရန် နီးစပ်လာခဲ့သည်။

“မဆိုးဘူး... အခု ငါ့မှာ အဖိုးတန် တိုက်ခိုက်ရေးရုပ်သေးရုပ် ခုနစ်ခု ရှိနေပြီ။ နတ်ဘုရားစိတ်အာရုံကလည်း တိုးတက်လာပြီဆိုတော့ စိတ်ဝိညာဉ်သွန်းလုပ်ခြင်းနယ်ပယ်ရဲ့ နှောင်းပိုင်းအဆင့်ကို ချိုးဖျက်ဖို့ ငါ စတင် အားထုတ်လို့ ရပြီ...”

နင်းဖန် ကျေနပ်စွာ ခေါင်းညိတ်လိုက်စဉ်မှာပင် ထူးဆန်းမှုတစ်ခု ဖြစ်ပေါ်လာသည်။ ရှေ့ရှိ ရုပ်သေးရုပ် (၇) ခုသည် အလိုအလျောက် စုစည်းသွားကြပြီး ကြိုတင်သတ်မှတ်ထားသော စနစ်တစ်ခုကို အစပျိုးလိုက်ကြသည်။

နတ်ဘုရားစိတ်အာရုံ အပိုင်းအစများသည် ဝင်္ကပါများအတွင်းမှ အသက်ဝင်လာပြီး နင်းဖန်၏ စိတ်ထဲသို့ ပေါင်းစပ်ဝင်ရောက်သွားသည်။ ၎င်းသည် ရန်လိုမှုမရှိဘဲ ရှေးဟောင်းသတင်းစကားတစ်ခုသာ ဖြစ်ကြောင်း သိလိုက်ရသဖြင့် နင်းဖန်လည်း စိတ်ကိုဖွင့်ကာ လက်ခံလိုက်သည်။

“ဝုန်း...”

ခဏချင်းမှာပင် နင်းဖန်၏ အသိစိတ်ပင်လယ်တစ်ခုလုံး တုန်လှုပ်သွားပြီး တည်ငြိမ် သော အသံကြီးတစ်သံ ထွက်ပေါ်လာတော့သည်။

“ငါ့နာမည်က ယဲ့ထင်... ဝိညာဉ်ဖိနှိပ်ခြင်းတောင်ထိပ်ရဲ့ ၁၂ဆက်မြောက် တောင်ထိပ်အရှင်သခင်ပဲ။ ငါဟာ ဂိုဏ်းကို ထာဝရကာကွယ် ဖို့အတွက် 'ကောင်းကင်ဘုံ အလယ်အလတ်အဆင့်' ရှိတဲ့ အသူရာနတ်ဘုရား ရုပ်သေးရုပ် ခုနစ်ခုကို ဖန်တီးခဲ့တယ်။ နောင်လာနောက်သား တပည့်တွေ... ဂိုဏ်းမှာ ဘေးအန္တရာယ် ကြုံရတိုင်း ဒီရုပ်သေးရုပ်တွေကို ခေါ်ယူအသုံးချပြီး အကျပ်အတည်းကို ဖြေရှင်းနိုင်ကြပေလိမ့်မယ်..."

အသံကြီးက ဆက်လက်၍

"ငါ့မှာ တစ်ခါမှ မထုတ်ဖော်ဖူးတဲ့ လျှို့ဝှက်ချက်တစ်ခု ရှိသေးတယ်။ အဲဒါကတော့ အရိပ်ထဲမှာ ဖုံးကွယ်ထားတဲ့ 'ကောင်းကင်အဆင့်မြင့် ပြိုင်ဘက်ကင်း ရုပ်သေးရုပ်ကြီး' ပဲ။ သူ့ရဲ့ စွမ်းအားက မဟာကောင်းကင်အရှင်သခင်တစ်ပါးကိုတောင် တုန်လှုပ်စေနိုင်လောက်အောင် ပြိုင်ဘက်ကင်းတယ်”

“ဒါပေမဲ့ ဒီရုပ်သေးရုပ်ကို မောင်းနှင်ဖို့ဆိုရင် ဝိညာဉ်ကျောက်တုံး အမြောက်အမြားနဲ့ ရုပ်သေးတာအိုရဲ့ အမြင့်ဆုံးကျွမ်းကျင်မှုကို ပိုင်ဆိုင်ထားရမယ်။ အရည်အချင်း မပြည့်ဝဘဲ ထိန်းချုပ်ဖို့ ကြိုးစားရင်တော့ နတ်ဘုရားဝိညာဉ် ပျက်စီးသွားလိမ့်မယ်..."

"ဒါကြောင့် ငါ ဒီရုပ်သေးရုပ်ကို နက်နက်ရှိုင်းရှိုင်း ဖုံးကွယ်ထားခဲ့တယ်။ တကယ်လို့ နောင်လာနောက်သား တစ်ယောက်ယောက်က ပျက်စီးနေတဲ့ အသူရာနတ်ဘုရား ရုပ်သေးရုပ် ခုနစ်ခုစလုံးကို အသက်ပြန်သွင်းပြီး နဂိုအတိုင်း ဖြစ်အောင် ပြုပြင်နိုင်ခဲ့ရင်... အဲဒီသူဟာ ရုပ်သေးရုပ်တာအိုမှာ ငါနဲ့ယှဉ်နိုင်တဲ့ ပါရမီရှင် ဖြစ်တယ်ဆိုတာ သက်သေပြလိုက်တာပဲ။ အခု ငါ့အသံကို ကြားနေရပြီဆိုတော့ မင်းဟာ ငါစောင့်မျှော်နေတဲ့ ထူးချွန်တဲ့ ပါရမီရှင် ဖြစ်ရမယ်..."

"ဒါကြောင့် ဒီပြိုင်ဘက်ကင်း ရုပ်သေးရုပ်ကြီးကို နိုးထစေမယ့် အမြင့်ဆုံး ထိန်းချုပ်ရေး လျှို့ဝှက်နည်းစနစ်ကို မင်းဆီ ငါ လက်ဆင့်ကမ်းလိုက်မယ်။ မင်းအနေနဲ့ ဒီရုပ်သေးရုပ်ကို အသုံးချပြီး ဂိုဏ်းကို ကာကွယ်ပေးဖို့ ငါ မျှော်လင့်တယ်။ ကြယ်တွေ နက္ခတ်တွေ ဘယ်လောက်ပဲ ရွေ့လျားပါစေ... ငါတို့ 'ထိုက်ရီဂိုဏ်း' ရဲ့ နာမည်ဟာ ကောင်းကင်ဘုံမှာ ထာဝရ လင်းထိန်နေရမယ်..."

ဤသတင်းစကားကို ကြားလိုက်ရပြီးနောက် နင်ဖန်တစ်ကိုယ်လုံး တုန်ယင်သွားပြီး မယုံကြည်နိုင်လောက်အောင် အံ့အားသင့်နေသော အမူအရာက သူ၏ မျက်နှာပေါ်တွင် အထင်အရှား ပေါ်လာခဲ့တော့သည်။

---