အခန်း ၂၃၁

အခန်း (၂၃၁) ညီအစ်မသုံးယောက်အား သိမ်းပိုက်ခြင်းနှင့် ရေခဲဝိညာဉ်နတ်ဘုရားကျင့်စဉ်

"နင်..."

"အဲ့ဒါက မြန်လွန်းတယ်လေ..."

လုယွီပင်း၊ လုထင်ရွှယ်နှင့် လုနင်ရွှမ်းတို့မှာ ကျောက်လင်၏ စကားကြောင့် လန့်ဖျပ်သွားကြ၏။

သူ့အား လက်ထပ်ရန် ယခုလေးတင် သဘောတူလိုက်သည်ကို ချက်ချင်းပင် မင်္ဂလာဦးညကို ဖြတ်သန်းချင်နေပြီလား။

ဤသည်မှာ မြန်ဆန်လွန်းလှသည်။

ကျောက်လင်က ညီအစ်မသုံးယောက်၏ ပခုံးများကို ပေါ့ပေါ့ပါးပါး ပုတ်လိုက်၏။

"ကိုယ်ရဲ့ ဇနီးလေးသုံးယောက်... ကိုယ်က မင်းတို့ရဲ့ အလှအပကို တပ်မက်နေတာ မဟုတ်ပါဘူး..."

"ဒီလိုပြောရရင်တော့ ကိုယ့်မှာ မင်္ဂလာဦးညအပြီးမှာ မင်းတို့ရဲ့ စွမ်းအားတွေကို တိုးတက်စေနိုင်တဲ့ နှစ်ကိုယ်တူကျင့်ကြံခြင်းကျင့်စဉ် တစ်ခုရှိတယ်..."

"ကိုယ်က မင်းတို့ကို ကျောက်စိမ်းဗိမာန်နယ်ပယ်ဆီ ကြိုတင်ပြီး တက်လှမ်းနိုင်အောင် ကူညီပေးချင်ရုံပါ..."

ကျောက်လင်က ပြုံး၍ ပြောလိုက်၏။

ကျောက်လင်၏ အတွေ့အကြုံအရ သူနှင့် သူ၏ဇနီးတို့ အကြင်နာပေးပြီးသည်နှင့် တစ်ပြိုင်နက် စနစ်က သူ့အား ဆုချီးမြှင့်မည့်အပြင် သူ၏ဇနီးကိုလည်း အကျိုးကျေးဇူးအချို့ ပြန်လည်ပေးအပ်မည် ဖြစ်သည်။

သို့သော်လည်း ကျောက်လင်က စနစ်၏ လျှို့ဝှက်ချက်ကို ထုတ်ဖော်၍မရနိုင်သောကြောင့် နှစ်ကိုယ်တူကျင့်ကြံခြင်းကျင့်စဉ်ကို ဆင်ခြေတစ်ခုအနေဖြင့် အသုံးပြုခဲ့ခြင်း ဖြစ်၏။

ထိုစကားကို ကြားလိုက်ရသောအခါ ညီအစ်မသုံးယောက်ဖြစ်သည့် လုယွီပင်း၊ လုထင်ရွှယ်နှင့် လုနင်ရွှမ်းတို့မှာ ခဏတာ မှင်တက်သွားကြသည်။

သူတို့သုံးယောက်လုံးက အလွန် သံသယဝင်နေကြ၏။

ဤသည်မှာ ကျောက်လင်က သူတို့၏ ခန္ဓာကိုယ်ကို ရယူရန်အတွက် တမင်သက်သက် ဖန်တီးထားသော ဆင်ခြေတစ်ခု မဟုတ်ပေဘူးလား။

လူသုံးယောက်၏ မျက်နှာပေါ်ရှိ နားမလည်နိုင်သော အမူအရာများကို မြင်လိုက်ရသောအခါ ကျောက်လင်က လင်းလုံသစ်သီးသုံးလုံးကို ထုတ်ယူကာ သူတို့အား တစ်လုံးစီ ကမ်းပေးလိုက်၏။

"ဇနီးလေးတို့... ပဉ္စမအဆင့်ကျင့်စဉ် မရှိရင်တောင် ဒီလင်းလုံသစ်သီးကို မျိုချလိုက်တာနဲ့ ကျောက်စိမ်းဝမ်းတွင်းနယ်ပယ်ကို ထိုးဖောက်တက်လှမ်းနိုင်တယ်... ဒါပေမဲ့ လင်းလုံသစ်သီးရဲ့ ဝိညာဉ်စွမ်းအား အများစုကတော့ ဆုံးရှုံးသွားလိမ့်မယ်..."

"အခု ကိုယ်က မင်းတို့ကို လင်းလုံသစ်သီး ပေးလိုက်ပြီဆိုတော့ ကိုယ့်ရဲ့ ကတိကို တည်ပြီး မင်းတို့ ကျောက်စိမ်းဗိမာန်နယ်ပယ်ကို တက်လှမ်းနိုင်အောင် ကူညီပေးလိုက်တာနဲ့ အတူတူပဲ..."

"မင်းတို့ရဲ့ စိုးရိမ်ပူပန်မှုတွေကို ကိုယ် နားလည်ပါတယ်..."

"ဇနီးလေး ထင်ရွှယ်... မင်းက အပြတ်သားဆုံးဆိုတာ ကိုယ်သိတယ်... ဒါကြောင့် ကိုယ်တို့ ရင်ဆုံး မင်္ဂလာဦးညကို ဖြတ်သန်းလိုက်ကြရအောင်... ဒါမှ မင်းလည်း နှစ်ကိုယ်တူကျင့်ကြံခြင်းကျင့်စဉ်ရဲ့ အကျိုးကျေးဇူးတွေကို ခံစားသိရှိနိုင်မှာလေ..."

"အဲ့ဒီနောက်ပိုင်း ထင်ရွှယ်က ရလဒ်တွေကို ယွီပင်းနဲ့ နင်ရွှမ်းကို ပြန်ပြောပြတဲ့အခါ ကိုယ်က မင်းတို့အတွက် စဉ်းစားပေးသလား၊ မစဉ်းစားပေးဘူးလား ဆိုတာကို သိလာရလိမ့်မယ်..."

ကျောက်လင်က ပွင့်ပွင့်လင်းလင်းပင် ပြုံး၍ ပြောလိုက်၏။

ညီအစ်မသုံးယောက်ထဲတွင် လုထင်ရွှယ်က ကျောက်လင်အပေါ် အကောင်းဆုံး အမြင်ရှိပြီး သူ့အပေါ် အပွင့်လင်းဆုံးလည်းဖြစ်သည်။

ထို့ကြောင့် ကျောက်လင်က လုထင်ရွှယ်မှတစ်ဆင့် ဝင်ရောက်ရန် လမ်းစရှာဖို့ လိုအပ်ပေသည်။

"အာ... အမ်…အင်း... ငါ သဘောတူတယ်..."

နားထောင်ပြီးနောက် လုထင်ရွှယ်က သိပ်မစဉ်းစားတော့ဘဲ သူမ၏ အလိုအလျောက် သိစိတ်အရ ချက်ချင်း သဘောတူလိုက်၏။

လုယွီပင်းနှင့် လုနင်ရွှမ်းတို့ နှစ်ယောက်လုံးမှာ အံ့သြသွားကြသည်။

ထိုစကားကို ကြားသောအခါ ကျောက်လင်က ထပ်မစောင့်တော့ပေ။ သူက လုထင်ရွှယ်၏ လက်ကို ချက်ချင်း ဆွဲကိုင်ကာ လမ်းမြှောင်ထဲသို့ ပြန်လည် ဝင်ရောက်သွား၏။

လမ်းမြှောင်ထဲတွင် ပဲ့တင်သံများ ထပ်ဟပ်သွားသည်။

လုထင်ရွှယ်က ထိုကိစ္စများနှင့် ပတ်သက်၍ အတွေ့အကြုံ မရှိသော်လည်း ကျောက်လင်၏ လမ်းညွှန်မှုအောက်တွင် သူမ၏ အသံလေးက ကျယ်လောင်ပြတ်သားနေပြီး စွဲမက်ဖွယ်ကောင်းသော ခံစားချက်ကို ချန်ရစ်ထားခဲ့၏။

လမ်းမြှောင်အဝတွင် ရှိနေသော လုယွီပင်းနှင့် လုနင်ရွှမ်းတို့မှာ ထိုအသံကို ကြားနေရချိန် တစ်လျှောက်လုံး မျက်နှာများ နီရဲနေကြသည်။

"အစ်မ... ကျောက်လင်က ငါတို့ကို လိမ်နေတာတော့ မဟုတ်ပါဘူးနော်..."

လုနင်ရွှမ်းက တိုးညှင်းသော အသံဖြင့် ပြောလိုက်၏။

"ငါလည်း ကျောက်လင်ကို သံသယဝင်ပေမဲ့ သူက ငါတို့ကို လိမ်စရာအကြောင်းမှမရှိတာ..."

"ကျောက်လင်က ပဉ္စမအဆင့် ဝိညာဉ်သစ်သီး သုံးလုံးကို ထုတ်ပေးနိုင်တယ်ဆိုတော့ သူ့ရဲ့ နောက်ခံက သာမန်မဟုတ်တာ သေချာတယ်... သူက ငါတို့ရဲ့ ခန္ဓာကိုယ်ကို လိုချင်ရုံသက်သက်နဲ့ ဒီလောက်ကြီးမားတဲ့ အရာတွေကို ပေးပြီး ငါတို့ကို လှည့်စားစရာ အကြောင်းမရှိဘူး..."

လုယွီပင်းက တည်ငြိမ်စွာ ပြန်ပြောလိုက်သည်။

လုနင်ရွှမ်းက တွေးကြည့်လိုက်ရာ ၎င်းမှာ မှန်ကန်ကြောင်း သိလိုက်၏။

အကယ်၍ ကျောက်လင်က သူတို့ ညီအစ်မသုံးယောက်၏ ခန္ဓာကိုယ်ကိုသာ လိုချင်ပါက ဝိညာဉ်သစ်သီး သုံးလုံးကို အလဟဿ ဖြုန်းတီးနေစရာမလိုဘဲ သူ၏ မိသားစုအင်အားကို အသုံးပြုကာ သူတို့ကို တိုက်ရိုက် ပြန်ပေးဆွဲသွားနိုင်ပေသည်။

လမ်းမြှောင်ထဲတွင်တော့။

ကျောက်လင်က လုထင်ရွှယ်အား အပြည့်အဝ အနိုင်ယူ သိမ်းပိုက်လိုက်၏။

ထိုအချိန်တွင် ကျောက်လင်က အဝတ်အစား ဝတ်ဆင်နေစဉ် သူ၏ စိတ်က စနစ်မျက်နှာပြင်ပေါ်သို့ အာရုံစိုက်ထားသည်။

[ဂုဏ်ယူပါတယ် ပိုင်ရှင်... ဇနီးဖြစ်သူ လုထင်ရွှယ်နဲ့ မင်္ဂလာဦးည ဖြတ်သန်းခြင်း အောင်မြင်သွားတဲ့အတွက် စနစ်ကနေ နှစ် ၂၀ စာ ကျင့်ကြံမှုစွမ်းအားကို ဆုချီးမြှင့်လိုက်ပါတယ်...]

[ပိုင်ရှင်ရဲ့ ဇနီး လုထင်ရွှယ် ကိုယ်ဝန်ရရှိသွားတဲ့အတွက် ဂုဏ်ယူပါတယ်... စနစ်ကနေ ပိုင်ရှင်ကို ရေခဲဝိညာဉ်နတ်ဘုရားကျင့်စဉ် ဆုချီးမြှင့်လိုက်ပါတယ်...]

အဆင့်(၁) ဇနီးဖြစ်၍ ဆုလာဘ်များက အလွန် များပြားလှ၏။

နှစ် ၂၀ စာ ကျင့်ကြံမှုစွမ်းအား ဆုချီးမြှင့်ခံရသောကြောင့် ယခုအခါ ကျောက်လင်၏ ကိုယ်ပိုင် မျက်နှာပြင်ပေါ်တွင် ကျင့်ကြံမှုစွမ်းအား ၈၄ နှစ် ရှိနေပြီ ဖြစ်သည်။

ထို့ပြင် ရေခဲဝိညာဉ်နတ်ဘုရားကျင့်စဉ်က တကယ်တမ်းတွင် နဝမအဆင့် ရေခဲစွမ်းအင် ကျင့်စဉ်တစ်ခုဖြစ်ပြီး ၎င်းက လုညီအစ်မသုံးယောက်အတွက် အထူး ဖန်တီးပေးထားခြင်းပင်ဖြစ်၏။

"ထင်ရွှယ်... မင်းရဲ့ လက်ချောင်းကို ကိုက်ပြီး သွေးတစ်စက်လောက် ကိုယ့်ကိုပေးပါ..."

ကျောက်လင်က သူ၏ဘေးရှိ ရှက်သွေးဖြာနေသော လုထင်ရွှယ်ကို ကြည့်ကာ အပြုံးဖျော့ဖျော့ဖြင့် ပြောလိုက်သည်။

"ဟင်... ဘာလုပ်ဖို့လဲ..."

လုထင်ရွှယ်မှာ အနည်းငယ် အံ့အားသင့်သွား၏။

"ကိုယ့်ကို ယုံကြည်လိုက်ပါ..."

ကျောက်လင်က သူ၏ အိတ်ကပ်ထဲမှ ကံကြမ္မာနတ်ဘုရားအဆင့်စာရင်းကို ထုတ်ယူကာ ကမ်းပေးလိုက်သည်။

လုထင်ရွှယ်က နားမလည်နိုင် ဖြစ်နေသော်လည်း သူမက ကျောက်လင်၏ ဇနီးဖြစ်နေပြီဖြစ်၏။ ယခုလေးတင် သူမ၏ ရုပ်ခန္ဓာက လျှို့ဝှက်ဆန်းကြယ်သော စွမ်းအားတစ်ခု၏ ပြောင်းလဲပေးခြင်းကို ခံလိုက်ရပြီး သူမ၏ ရုပ်ခန္ဓာက ပြီးပြည့်စုံသော ရွှေခန္ဓာနယ်ပယ်၏ အထွတ်အထိပ်သို့ ရောက်ရှိသွားကြောင်း သူမ ခံစားလိုက်ရသည်။

မည်သို့ပင် ကြည့်စေကာမူ ကျောက်လင်က သူမကို ဘယ်တော့မှ အန္တရာယ်ပြုမည် မဟုတ်ပေ။

ထပ်မံမေးခွန်းထုတ်မနေတော့ဘဲ လုထင်ရွှယ်က သူမ၏ လက်ချောင်းကို ချက်ချင်း ကိုက်လိုက်ပြီး ကံကြမ္မာနတ်ဘုရားအဆင့်စာရင်းပေါ်သို့ သွေးတစ်စက် ကျဆင်းသွားစေလိုက်၏။

ကျောက်လင်၏ အသိစိတ်က ကံကြမ္မာနတ်ဘုရားအဆင့်စာရင်းနှင့် ပေါင်းစည်းသွားသည်။ အဆင့်စာရင်းပေါ်ရှိ လုထင်ရွှယ်၏ ပေါ်လောပေါနေသော ပုံရိပ်ကို မြင်လိုက်ရသောအခါ သူက အသစ်ရရှိထားသော ရေခဲဝိညာဉ်နတ်ဘုရားကျင့်စဉ်၏ ကျင့်ကြံမှု အကြောင်းအရာများကို လုထင်ရွှယ်၏ ပုံရိပ်ထဲသို့ တုံ့ဆိုင်းခြင်းမရှိဘဲ ချက်ချင်း ထည့်သွင်းပေးလိုက်၏။

ထို့နောက် လျှို့ဝှက်ဆန်းကြယ်သော စွမ်းအားတစ်ခု၏ ရိုက်ခတ်ခြင်းကို ခံလိုက်ရသကဲ့သို့ လုထင်ရွှယ်၏ ခန္ဓာကိုယ်မှာ ပျော့ခွေသွားပြီး မြေပြင်ပေါ်သို့ လဲကျသွားသည်။

လုယွီပင်းနှင့် လုနင်ရွှမ်းတို့က လမ်းမြှောင်ထဲမှ ဆူညံသံများ ငြိမ်သက်သွားသည်ကို ကြားလိုက်ရသောကြောင့် လမ်းမြှောင်ထဲသို့ ပြေးဝင်သွားရာ မြေပြင်ပေါ်တွင် လဲကျနေသော လုထင်ရွှယ်ကို မြင်လိုက်ရ၏။

"ကျောက်လင်... နင် ထင်ရွှယ်ကို ဖျက်ဆီးလိုက်ပြီပဲ..."

"ကျောက်လင်... နင် ငါ့အစ်မကို သတ်လိုက်တာပဲ... ငါ နင့်ကို သတ်မယ်..."

သူတို့နှစ်ယောက်မှာ လန့်ဖျပ်သွားကြပြီး ချက်ချင်းပင် ဓားများကို ဆွဲထုတ်ကာ ကျောက်လင်အား ထိုးစိုက်ရန် ပြင်လိုက်ကြသည်။

ကျောက်လင်မှာ ဆွံ့အသွား၏။

ဓားရှည်နှစ်လက်က သူ့ထံသို့ ထိုးစိုက်လာစဉ် ကျောက်လင်က လက်များကို ဆန့်ထုတ်ကာ သူ၏ လက်ချောင်းများကြားတွင် ဖမ်းညှပ်လိုက်သည်။

"ဇနီးလေးတို့... သေချာကြည့်ပါဦး... ထင်ရွှယ်က အိပ်ပျော်သွားတာပါ..."

ကျောက်လင်က အုပ်ကိုင်ထားမှုကို ဖြေလျှော့ကာ ပြုံး၍ ပြောလိုက်၏။

ထိုစကားကို ကြားသောအခါ လုယွီပင်းနှင့် လုနင်ရွှမ်းတို့က သူတို့၏ စိတ်စွမ်းအားများကို အသုံးပြုကာ လုထင်ရွှယ်ကို အာရုံခံကြည့်လိုက်ရာ သူမ၏ အသက်ရှူနှုန်းက ညီညာနေပြီး တကယ်ပင် အိပ်ပျော်နေကြောင်း တွေ့လိုက်ရသည်။

နှစ်မိနစ်ခန့် ကြာပြီးနောက်။

လုထင်ရွှယ်၏ စိတ်က ရေခဲဝိညာဉ်နတ်ဘုရားကျင့်စဉ်၏ ကျင့်ကြံမှု အကြောင်းအရာများကို အပြည့်အဝ စုပ်ယူပြီးနောက် သူမ သတိပြန်လည်လာခဲ့၏။

"အစ်မ... တတိယညီမ..."

လုယွီပင်းနှင့် လုနင်ရွှမ်းတို့၏ မျက်နှာပေါ်မှ စိုးရိမ်တကြီး အမူအရာများကို မြင်လိုက်ရသောအခါ လုထင်ရွှယ်က နိုးနိုးချင်းပင် လှမ်းခေါ်လိုက်သည်။

ထိုအခိုက်တွင် လုယွီပင်းနှင့် လုနင်ရွှမ်းတို့က ကျောက်လင်ကို အနည်းငယ် မကျေမချမ်းဖြင့် စိုက်ကြည့်လိုက်ကြ၏။

"နင် ထင်ရွှယ်ကို ဘယ်လိုတန်ဖိုးထားရမလဲဆိုတာ နားမလည်ဘူးလား..."

ကျောက်လင်က အင်အား အလွန်အကျွံ သုံးလိုက်သောကြောင့် လိင်မှုကိစ္စတွင် အတွေ့အကြုံမရှိသေးသော လုထင်ရွှယ်အား ဒဏ်ရာရစေပြီး သတိလစ်သွားစေသည်ဟု သူတို့နှစ်ယောက်က ယူဆလိုက်ကြသည်။

ကျောက်လင်မှာ တစ်ဖန် ဆွံ့အသွားပြန်ပြီး မည်သည့် ရှင်းပြမှုမှ မလုပ်နိုင်တော့ပေ။

"အစ်မ... တတိယညီမ... အစ်မတို့ အထင်လွဲနေပြီ..."

ထိုစကားကို ကြားသောအခါ လုထင်ရွှယ်က သူမ၏ အစ်မများ အထင်လွဲနေကြောင်း သိလိုက်ရပြီး သူမ၏ တစ်ကိုယ်လုံး ရှက်သွေးဖြာသွား၏။

ထို့နောက် လုထင်ရွှယ်က ချက်ချင်းပင် ရှင်းပြလိုက်သည်။

"အစ်မ... တတိယအစ်မ... ခင်ပွန်းက ကတိမဖျက်ပါဘူး..."

"သူက ညီမကို ကျင့်စဉ်တစ်ခု တကယ် ပေးခဲ့တယ်... ပြီးတော့ အခုကစပြီး ငါတို့ရဲ့ ကျင့်ကြံမှု နည်းလမ်းတွေအပေါ် ကန့်သတ်ချက်တွေ ရှိတော့မှာ မဟုတ်ဘူး..."

ရေခဲဝိညာဉ်နတ်ဘုရားကျင့်စဉ်၏ ကျင့်ကြံမှု အကြောင်းအရာများကို ရရှိပြီးနောက် ၎င်းမှာ နဝမအဆင့် ကျင့်စဉ်တစ်ခုဖြစ်ကြောင်း လုထင်ရွှယ် သိလိုက်ရသည်။ သူမက ချီလင်ကျောက်စိမ်းဗိမာန်သို့ သွားရောက် ကျင့်ကြံခြင်း မရှိလျှင်တောင် ကျင့်စဉ်၏ ကန့်သတ်ခြင်းကို ခံရတော့မည် မဟုတ်ပေ။

လုယွီပင်းနှင့် လုနင်ရွှမ်းတို့က ကျောက်လင်ကို အံ့သြတကြီး ကြည့်လိုက်ကြ၏။

ဒါက တကယ်ကြီးပဲ။

ကျောက်လင်က သူတို့ မင်္ဂလာဦးညကို ဖြတ်သန်းပြီးသည်နှင့် တစ်ပြိုင်နက် ကျင့်စဉ်များ ပေးမည်ဟု ပြောခဲ့ပြီး တကယ်ပင် ကတိတည်ခဲ့သည်။

"ထင်ရွှယ်... ခင်ပွန်းပေးတဲ့ ကျင့်စဉ်က တကယ်ပဲ ငါတို့ကို ကျောက်စိမ်းဗိမာန်နယ်ပယ်ဆီ တက်လှမ်းဖို့ ကူညီပေးနိုင်တာလား..."

အကြီးဆုံးအစ်မ တစ်ယောက်အနေဖြင့် လုယွီပင်းက ကိစ္စရပ်များကို ပို၍ နက်နဲစွာ တွေးတောခဲ့၏။

"ကျောက်စိမ်းဗိမာန်နယ်ပယ်ကို တက်လှမ်းဖို့လောက်တင် မဟုတ်ဘူး... ငါတို့မှာ လုံလောက်တဲ့ ကျင့်ကြံမှု အရင်းအမြစ်တွေ ရှိနေသရွေ့ နဝမအဆင့်ကို ထိုးဖောက်တက်လှမ်းနိုင်ရင်တောင် ကျင့်စဉ်တွေအပေါ် ဘာကန့်သတ်ချက်မှ ရှိမှာမဟုတ်ဘူး..."

"ဒါ့အပြင် ဒီကျင့်စဉ်က ရေခဲစွမ်းအင်ဖြစ်ပြီး ငါတို့ညီအစ်မသုံးယောက်အတွက် လုံးဝကို အထူးဖန်တီးပေးထားတာ..."

လုထင်ရွှယ်က အကောင်းဆုံးသော အရောင်းမြှင့်တင်သူတစ်ဦးကဲ့သို့ စိတ်လှုပ်ရှားစွာဖြင့် ပြောလိုက်သည်။

ချက်ချင်းပင် လုယွီပင်းနှင့် လုနင်ရွှမ်းတို့က ကျောက်လင်အပေါ် မျက်လုံးများ ကျရောက်သွားပြီး သူတို့၏ မျက်ဝန်းများထဲတွင် ပြင်းပြသော ဆန္ဒတစ်ခု ထင်ဟပ်နေ၏။

"ခင်ပွန်း... လာလေ... ငါတို့တွေ မင်္ဂလာဦးညကို ဖြတ်သန်းကြရအောင်..."

အနည်းငယ်မျှ တုံ့ဆိုင်းနေခြင်းမရှိဘဲ ထိုနှစ်ယောက်က လှမ်းခေါ်လိုက်ကြသည်။