အခန်း (၆၈၈-၆၉၀)

အခန်း (၆၈၈) - နတ်ဘုရားသန့်စင်ခြင်းပညာ၊ လျှို့ဝှက်ဆန်းကြယ်မျိုးစေ့ အသွင်ပြောင်းခြင်း အပိုင်း (၁)

စုယွီသည် သစ်ပင်နှလုံးသား၊ သစ်ပင်မိစ္ဆာ၏ ခန္ဓာကိုယ်နှင့် နတ်ဘုရားမျိုးစေ့များကို မှော်ရတနာနန်းတော်အတွင်း၌ အတူတကွ သိမ်းဆည်းလိုက်သောအခါ နတ်ဘုရားမျိုးစေ့များထံမှ တဝီဝီမြည်သံများ ရုတ်တရက် ထွက်ပေါ်လာ၏။

ထိုအခိုက်အတန့်၌ မျက်စိကျိန်းမတတ် စူးရှတောက်ပသော အစိမ်းရောင် အလင်းတန်းများက အရပ်မျက်နှာအနှံ့ ဖြာထွက်လာတော့သည်။ ထိုမျိုးစေ့များသည် သစ်ပင်နှလုံးသားနှင့် မိစ္ဆာသစ်ပင်၏ ခန္ဓာကိုယ်အထက်တွင် ခေတ္တမျှ ဝဲပျံနေကြ၏။

နောက်တစ်စက္ကန့်တွင် နတ်ဘုရားမျိုးစေ့များထံမှ ပြင်းထန်သော စုပ်ယူမှု အားတစ်ခု ထွက်ပေါ်လာပြီး သစ်ပင်နှလုံးသားနှင့် သစ်ပင်မိစ္ဆာ၏ ခန္ဓာကိုယ်ထံမှ စွမ်းအားများကို ဖြည်းညင်းစွာ စတင် စုပ်ယူတော့သည်။

သစ်ပင်နှလုံးသားနှင့် သစ်ပင်မိစ္ဆာ၏ ခန္ဓာကိုယ်ထံမှ မှိန်ပျပျ အစိမ်းရောင် အလင်းတန်းများမှာ ဝါးမျိုခံရကာ နတ်ဘုရားမျိုးစေ့များအတွင်းသို့ ပေါင်းစပ် ဝင်ရောက်သွားချေပြီ။

စုယွီက သစ်ပင်မိစ္ဆာ၏ စွမ်းအားအရှိန်အဝါများကို နတ်ဘုရားမျိုးစေ့များက စုပ်ယူနေပုံကို ဂရုတစိုက် စောင့်ကြည့်နေလိုက်သည်။ မျိုးစေ့များက စုပ်ယူနေသည်နှင့်အမျှ ၎င်းတို့ထံရှိ အရှိန်အဝါများမှာလည်း သိမ်မွေ့သော ပြောင်းလဲမှုများ ဖြစ်ပေါ်နေသယောင် ရှိ၏။

နတ်ဘုရားမျိုးစေ့များ၏ ပြောင်းလဲမှုများကို သတိပြုမိသွားသောအခါ စုယွီမှာ အလွန်အမင်း အံ့အားသင့်သွားရပြီး

မိမိကိုယ်ကိုယ် ရေရွတ်လိုက်မိ၏။

"ဒီသစ်ပင်မိစ္ဆာရဲ့ စွမ်းအားက နတ်ဘုရားမျိုးစေ့တွေအပေါ် ဒီလောက်တောင် ကြီးမားတဲ့ သက်ရောက်မှု ရှိနေတာလား"

"ဒီသစ်ပင်မိစ္ဆာက ဘယ်လို ဝိညာဉ်အပင် မျိုးနွယ်စုမျိုး ဖြစ်နေမလဲ"

ထိုသစ်ပင်မှာ မည်သည့် အမျိုးအစားဖြစ်ကြောင်းကို သူ မသိသော်ငြား ၎င်း၏ ယခင် အရွယ်အစားမှာ အမှန်တကယ်ပင် ဧရာမ ကြီးမားလှပေသည်။

၎င်း၏ သစ်ရွက်အုပ်ကြီးက လျှို့ဝှက်ဆန်းကြယ် နယ်မြေ၏ ထက်ဝက်ခန့်ကိုပင် အရိပ်မိုးထားနိုင်ခဲ့သည် မဟုတ်လော။ မှော်ရတနာနန်းတော်အတွင်းသို့ ဆံ့ဝင်စေရန်ပင်လျှင် အပိုင်းပိုင်း ဖြတ်တောက်ကာ ထည့်သွင်းခဲ့ရ၏။

သို့ဖြစ်သော်ငြားလည်း ကျယ်ဝန်းလှသော မှော်ရတနာနန်းတော်ကြီးသည်ပင် သစ်ပင်မိစ္ဆာ၏ ခန္ဓာကိုယ် အစိတ်အပိုင်းများဖြင့် ပြည့်လျှံလုမတတ် ဖြစ်နေခဲ့သည်။

ယခုအချိန်တွင်မူ နတ်ဘုရားမျိုးစေ့များသည် သစ်ပင်မိစ္ဆာ၏ သက်စောင့်စွမ်းအားများကို ကျေနပ်အားရစွာ ဝါးမျိုလျက် ရှိနေလေပြီ။

သို့သော်လည်း အခြေအနေကို အကဲခတ်ကြည့်ရသလောက် သစ်ပင်မိစ္ဆာ၏ စွမ်းအားများကို အပြည့်အဝ ဝါးမျိုနိုင်ရန်အတွက် အချိန်အတော်ကြာ ယူရဦးမည့်ပုံ ပေါ်နေ၏။

စုယွီက သူ၏ အတွေးများကို ပြန်လည် ရုပ်သိမ်းလိုက်ပြီး စံအိမ်တော် သခင်ကြီး ဟုန်ယွဲ့၏ နောက်သို့ ထပ်ကြပ်မကွာ လိုက်ပါသွားတော့သည်။

လူလေးယောက် အုပ်စုသည် ရှေ့ရှိ တောင်ကြားအတွင်း တည်ရှိနေသော လူသားကျင့်ကြံသူများ၏ ရှေးဟောင်း အပျက်အစီးများထံသို့ ရောက်ရှိလာကြ၏။ ထိုနေရာတွင် ဝိညာဉ်အပင်များကြား၌ ပုန်းကွယ်နေသော နန်းတော်များ၊ စံအိမ်များနှင့် မျှော်စင်များဖြင့် ပြည့်နှက်နေသည်။

စံအိမ်တော် သခင်ကြီး ဟုန်ယွဲ့က သူတို့ သုံးဦးကို ဦးဆောင်ကာ အပျက်အစီးများပေါ်ရှိ ကျန်ရစ်နေသော အခင်းအကျင်းများနှင့် တားမြစ်ချက်များကို ရှောင်ကွင်းလျက် သစ်ပင်ရိပ်များအောက်မှတစ်ဆင့် အပျက်အစီးများအတွင်းသို့ ဖြည်းညင်းစွာ ခြေချလိုက်ကြသည်။

ထိုစဉ် ခဏအကြာ၌ပင် လူလေးယောက် အုပ်စုသည် ခြေလှမ်းများ တန့်ရပ်သွားကြပြီး သူတို့ရှေ့ရှိ မြင်ကွင်းကြောင့် အနည်းငယ် အံ့အားသင့်သွားကြတော့၏။

အကြောင်းမူကား သူတို့ရှေ့ရှိ မြေပြင်ပေါ်... အဆောက်အအုံများ ကြားတွင် အနက်ရောင် ချပ်ဝတ် ဝတ်ဆင်ထားသော ပုံရိပ်များက သက်စောင့်စွမ်းအား အရိပ်အယောင် လုံးဝ မရှိတော့ဘဲ လဲလျောင်းနေကြသောကြောင့်ပင်။

စံအိမ်တော် သခင်ကြီး ဟုန်ယွဲ့နှင့် အခြားသူများက အနက်ရောင် ချပ်ဝတ် ဝတ်ဆင်ထားသော ပုံရိပ်တစ်ခုထံသို့ သတိကြီးစွာဖြင့် ချဉ်းကပ်သွားကြသည်။

ဤအနက်ရောင် ချပ်ဝတ်မှာ စုယွီ ယခင်က မြင်တွေ့ခဲ့ဖူးသော အနက်ရောင် စစ်သည်တော် တာအိုရုပ်သေး မဟုတ်ဘဲ အစစ်အမှန် အနက်ရောင် ချပ်ဝတ် တစ်စုံ ဖြစ်နေ၏။

သို့သော် စံအိမ်တော် သခင်ကြီး ဟုန်ယွဲ့က ထိုအနက်ရောင် ချပ်ဝတ်ကို မြင်လိုက်ရသောအခါ သူမ၏ မျက်နှာပေါ်တွင် ဝမ်းသာပီတိ အရိပ်အယောင်တစ်ခု ပေါ်လွင်လာပြီး

"လက်စသတ်တော့ ဒီရှေးဟောင်း ခန္ဓာကိုယ်သန့်စင်ခြင်း ချပ်ဝတ် အမျိုးအစား ဖြစ်နေတာကိုး"

"ရှေးဟောင်း ခန္ဓာကိုယ်သန့်စင်ခြင်း ချပ်ဝတ် ဟုတ်လား"

စုယွီ၊ ဖန်ရှောင်နှင့် ဖန်လုံတို့ အားလုံးက စံအိမ်တော် သခင်ကြီး ဟုန်ယွဲ့ထံသို့ လှမ်းကြည့်လိုက်ကြ၏။

စံအိမ်တော် သခင်ကြီး ဟုန်ယွဲ့က သူတို့သုံးဦးအား ရှင်းပြလိုက်သည်။

"ဒါက ခန္ဓာကိုယ်သန့်စင်ခြင်း ကျင့်ကြံသူတွေ အထူးသီးသန့် အသုံးပြုတဲ့ ချပ်ဝတ် တစ်မျိုးပဲ... အသက်သွင်းဖို့အတွက် ချီကို အားကိုးစရာ မလိုဘူး... ပြီးတော့ ကျွမ်းကျင်ပိုင်နိုင်သွားပြီဆိုရင် ကျင့်ကြံသူရဲ့ ခန္ဓာကိုယ်နဲ့တောင် ပေါင်းစပ်သွားနိုင်တယ်... အရည်အသွေးမြင့်မားတဲ့ အဆင့်မြင့် ခန္ဓာကိုယ်သန့်စင်ခြင်း ချပ်ဝတ်က ကာကွယ်မှုကို မြှင့်တင်ပေးရုံသာမကဘူး ရုပ်ခန္ဓာရဲ့ ခွန်အားကိုပါ တိုးပွားစေတယ်"

သူက ရှေ့ရှိ အနက်ရောင် ချပ်ဝတ်ကို ဖြုတ်ချလိုက်၏။ အတွင်းရှိ အဖြူရောင် အရိုးစုကြီး ပေါ်လာသည်နှင့် တစ်ပြိုင်နက် ၎င်းသည် ချက်ချင်းပင် ဖုန်မှုန့်များအဖြစ် ပြောင်းလဲသွားကာ လေထဲသို့ လွင့်ပါသွားတော့သည်။

မည်မျှသော နှစ်ပေါင်းများစွာက သေဆုံးသွားခဲ့သည်ကို မည်သူမျှ မသိနိုင်တော့ချေ။

စံအိမ်တော် သခင်ကြီး ဟုန်ယွဲ့က အနက်ရောင် ချပ်ဝတ်ကို ဂရုတစိုက် စစ်ဆေးလိုက်ပြီးနောက် ခေါင်းကို ဖြည်းညင်းစွာ ခါယမ်းလိုက်ရင်း

"အရည်အသွေး အမြင့်ဆုံး တတိယအဆင့် ခန္ဓာကိုယ်သန့်စင်ခြင်း ချပ်ဝတ် တစ်စုံပဲ... နှမြောစရာပဲ... စတုတ္ထအဆင့်သာ ဖြစ်ခဲ့ရင် ပိုကောင်းမှာ"

သို့ရာတွင် ဤနေရာ၌ ထိုကဲ့သို့သော အနက်ရောင် ချပ်ဝတ်များ အမြောက်အမြား ရှိနေသေးသည် မဟုတ်ပါလော။

စံအိမ်တော် သခင်ကြီး ဟုန်ယွဲ့၊ စုယွီ၊ ဖန်ရှောင်နှင့် ဖန်လုံတို့သည် အတူတကွ ရှာဖွေကြပြီး မိုင်ပေါင်းများစွာ ကျယ်ဝန်းသော ရှေးဟောင်း အပျက်အစီးများကို ဖြန့်ကျက် စစ်ဆေးလိုက်ကြ၏။ အံ့အားသင့်ဖွယ် ကောင်းလှစွာပင် သူတို့သည် ခန္ဓာကိုယ်သန့်စင်ခြင်း ချပ်ဝတ် အစုံ နှစ်ထောင် နီးပါးခန့်ကို တွေ့ရှိခဲ့ကြပြီး အများစုမှာ အရည်အသွေး အမြင့်ဆုံး တတိယအဆင့်များ ဖြစ်ကြသည်။

စတုတ္ထအဆင့် ခန္ဓာကိုယ်သန့်စင်ခြင်း ချပ်ဝတ်များမှာမူ အစုံ တစ်ရာပင် မပြည့်ချေ။

စံအိမ်တော် သခင်ကြီး ဟုန်ယွဲ့၊ စုယွီနှင့် အခြားသူများ၏ အံ့သြဝမ်းသာမှု အထွတ်အထိပ် အဖြစ် သူတို့သည် ပဉ္စမအဆင့် ခန္ဓာကိုယ်သန့်စင်ခြင်း ချပ်ဝတ် သုံးစုံကို တွေ့ရှိခဲ့ကြပြီး ၎င်းတို့အနက်မှ တစ်စုံမှာ ထူးကဲလှသော အရည်အသွေး အမြင့်ဆုံး ပစ္စည်းတစ်ခု ဖြစ်နေပေ၏။

ထိုချပ်ဝတ်သည် တစ်ကိုယ်လုံး နီရဲနေပြီး ပြင်းထန်လှသော သွေးအရှိန်အဝါနှင့် မိစ္ဆာချီဓာတ်တို့ ပါဝင်နေသည်။

စံအိမ်တော် သခင်ကြီး ဟုန်ယွဲ့သည် မြင်မြင်ချင်းပင် ထိုချပ်ဝတ်ကို သဘောကျသွားတော့၏။ သူက ၎င်းကို သူ၏ ကိုယ်ပိုင်အဖြစ် ပြတ်သားစွာ သိမ်းပိုက်လိုက်ပြီး အားပါးတရ ရယ်မောလိုက်သည်။

"မဆိုးဘူး... တကယ် မဆိုးဘူး... ဒီသေမင်းနယ်မြေကို လာခဲ့ရတဲ့ ခရီးက နောက်ဆုံးတော့ တန်သွားပြီပဲ"

ထိုခန္ဓာကိုယ်သန့်စင်ခြင်း ချပ်ဝတ်နှင့်ဆိုလျှင် သူ၏ ခွန်အားသည်ပင် အနည်းငယ် တိုးလာနိုင်သေး၏။

သို့သော် ဤနေရာတွင် ဆဋ္ဌမအဆင့် ရတနာများကို မတွေ့ရှိခဲ့ရသည်မှာ နှမြောစရာပင်။

သို့သော်ငြား သိုလှောင်လက်စွပ်များနှင့် ချန်ခွန်းအိတ် အမြောက်အမြား ရှိနေသေး၏။ ရှေးဟောင်း စာအုပ်များ၊ ကျောက်စိမ်းပေလွှာများနှင့် မှော်ရတနာ သွန်းလုပ်ရေး ပစ္စည်း အများအပြားကိုလည်း သူတို့ တွေ့ရှိခဲ့ကြသည်။ သို့သော် ဝိညာဉ်အပင်များ သို့မဟုတ် ဝိညာဉ်ဆေးဘက်ဝင် အပင်များကိုမူ လုံးဝ မတွေ့ရှိခဲ့ကြပေ။

"နတ်ဘုရားပန်းပဲ ဂိုဏ်းရဲ့ ခြေကုပ်စခန်း ဟုတ်လား"

စံအိမ်တော် သခင်ကြီး ဟုန်ယွဲ့သည် ရှေးဟောင်း စာအုပ်အချို့ကို လှန်လှောကြည့်ရှုရင်း ဤရှေးဟောင်း အပျက်အစီးများ၏ ယခင် ပိုင်ရှင် မည်သူဖြစ်ကြောင်း သိရှိသွားသောအခါ အံ့အားသင့်သည့် အမူအရာကို ဖုံးကွယ်မထားနိုင်တော့ချေ။

နတ်ဘုရားပန်းပဲ ဂိုဏ်းအကြောင်းကို သူ သိထား၏။ ထိုဂိုဏ်းသည် အရိုင်းနယ်မြေတွင် အခြားသော အပျက်အစီးများလည်း ရှိထားသေးသည်။

ဤသည်မှာ ရှေးခေတ်ကာလက မှော်ရတနာ သွန်းလုပ်ခြင်းတွင် နာမည်ကြီးသော ဩဇာရှိ အင်အားစုကြီး တစ်ခုဖြစ်ပြီး နတ်ဘုရား ချပ်ဝတ် ဟု ခေါ်သော ခန္ဓာကိုယ်သန့်စင်ခြင်း ချပ်ဝတ်ဖြင့် ကျော်ကြားခဲ့၏။

ရှေးဟောင်း အင်မော်တယ် ဂိုဏ်းအင်အားစု အများအပြားသည် သူတို့၏ တပည့်များ အသုံးပြုရန်အတွက် နတ်ဘုရားပန်းပဲ ဂိုဏ်းထံမှ ဤခန္ဓာကိုယ်သန့်စင်ခြင်း ချပ်ဝတ်ကို အမှာစာ တင်ခဲ့ကြဖူး၏။

ရှေးခေတ် ကာလက လူအများစုသည် ခန္ဓာကိုယ် သန့်စင်ခြင်းနှင့် ချီ စွမ်းအားတို့ကို ရောနှော၍ ကျင့်ကြံခဲ့ကြသည်။

စံအိမ်တော် သခင်ကြီး ဟုန်ယွဲ့သည် နတ်ဘုရား ချပ်ဝတ် ဟူသော အမည်ကို ယခင်က ကြားဖူးခဲ့ပြီးပြီပင်။

အကြောင်းမူကား အင်မော်တယ်တစ်သောင်း နန်းတော်တွင် ထိုကဲ့သို့သော နတ်ဘုရား ချပ်ဝတ် အမြောက်အမြား ရှိနေပြီး အစုံ နှစ်ထောင်ခန့် ရှိသည်ဟု ကောလာဟလ ထွက်ပေါ်နေသောကြောင့်ပင်။

နတ်ဘုရား ချပ်ဝတ်များကို ဝတ်ဆင်ထားသော အင်မော်တယ်တစ်သောင်း နန်းတော်မှ ကျင့်ကြံသူများ၏ တပ်မတော်သည် နာမည်ဆိုးဖြင့် ကျော်ကြားလှသည်။ သို့သော် ဤအင်အားစုသည် အနီးအနားတွင် ရှိမနေခဲ့ပေ။ ထိုအစား မိစ္ဆာကောင်များ၊ မိစ္ဆာမျိုးနွယ်စုများနှင့် အခြား ကျင့်ကြံသူများကို တိုက်ခိုက်ရန် အရိုင်းနယ်မြေ၏ နက်ရှိုင်းသော နေရာများသို့ စွန့်စား ဝင်ရောက်သွားခဲ့ကြခြင်းပင်။

ဤနေရာသည် နတ်ဘုရားပန်းပဲ ဂိုဏ်း၏ ရှေးဟောင်း ခြေကုပ်စခန်း တစ်ခု ဖြစ်ကြောင်း သိလိုက်ရသောအခါ စံအိမ်တော် သခင်ကြီး ဟုန်ယွဲ့သည် အလွန်အမင်း ဝမ်းမြောက်သွားတော့၏။

သူသည် စုယွီတို့နှင့်အတူ ဟင်းလင်းပြင် လက်စွပ်များနှင့် ချန်းခွန်းအိတ်များကို အလျင်စလို ရှင်းလင်း သိမ်းဆည်းလိုက်ကြသည်။

ဤဟင်းလင်းပြင် လက်စွပ်များနှင့် ချန်းခွန်းအိတ်များထဲတွင် နောက်ထပ် နတ်ဘုရား ချပ်ဝတ်များကို တွေ့ရှိခဲ့ကြရ၏။ ပဉ္စမအဆင့် ပုဂ္ဂိုလ်များထံမှ တွေ့ရှိရသော ဟင်းလင်းပြင် လက်စွပ် အချို့တွင်မူ စံအိမ်တော် သခင်ကြီး ဟုန်ယွဲ့သည် နတ်ဘုရား ချပ်ဝတ် အမြောက်အမြား သိုလှောင်ထားမှုကို တွေ့ရှိခဲ့သည်။

နောက်ဆုံးတွင် စံအိမ်တော် သခင်ကြီး ဟုန်ယွဲ့သည် တတိယအဆင့် နတ်ဘုရား ချပ်ဝတ် အစုံ လေးထောင်ကျော်၊ စတုတ္ထအဆင့် သုံးရာကျော်နှင့် ပဉ္စမအဆင့် ငါးစုံတို့ကို စုဆောင်းနိုင်ခဲ့ပြီး ၎င်းတို့အနက်မှ နှစ်စုံမှာ အရည်အသွေး အမြင့်ဆုံး ပစ္စည်းများ ဖြစ်ကြပါ၏။

အခန်း (၆၈၉) - နတ်ဘုရားသန့်စင်ခြင်းပညာ၊ လျှို့ဝှက်ဆန်းကြယ်မျိုးစေ့ အသွင်ပြောင်းခြင်း အပိုင်း (၂)

ထိုကဲ့သို့သော အကျိုးအမြတ်များက စံအိမ်တော် သခင်ကြီး ဟုန်ယွဲ့၏ မျှော်လင့်ချက်များကို များစွာ ကျော်လွန်သွားခဲ့သဖြင့် သူ၏ မျက်လုံးများအတွင်းမှ အလင်းရောင်မှာ ပိုမို တောက်ပလာတော့၏။

ဤနတ်ဘုရား ချပ်ဝတ် အုပ်စုနှင့်ဆိုလျှင် အင်မော်တယ်နန်းတော်ကြီး ပင် ဖြစ်ပါစေဦးတော့... သူ၏ မြေကမ္ဘာ အင်မော်တယ် ဂိုဏ်းသည်လည်း အင်အား (၅၀၀၀) ကျော် ရှိသော ခန္ဓာကိုယ်သန့်စင်ခြင်း တပ်မတော်ကြီး တစ်ရပ်ကို ဖွဲ့စည်း တည်ထောင်နိုင်လာပြီလေ။

ထို့အပြင် စံအိမ်တော် သခင်ကြီး ဟုန်ယွဲ့သည် နတ်ဘုရားသန့်စင်ခြင်း ဂိုဏ်းထံမှ ပဉ္စမအဆင့်မြင့် နတ်ဘုရားသန့်စင်ခြင်း အမွေအနှစ်ကိုလည်း ရရှိခဲ့ပြီး ဤနတ်ဘုရား ချပ်ဝတ်ကို သွန်းလုပ်သည့် နည်းလမ်းသည်ပင်လျှင် အမွေအနှစ်အတွင်း၌ ပါဝင်နေ၏။

သို့သော်ငြားလည်း ၎င်းကို အပေါ်ယံမျှ လှမ်းကြည့်လိုက်ရုံဖြင့် ဤနတ်ဘုရား ချပ်ဝတ်ကို သွန်းလုပ်ရန် မလွယ်ကူကြောင်း၊ အရိုင်းနယ်မြေမှ ရှားပါးလှသော ဝိညာဉ်ကျောက်တုံး ဓာတ်သတ္တု ပစ္စည်းများစွာ လိုအပ်ကြောင်း သူ သတိပြုမိလိုက်သည်။

သွန်းလုပ်ခြင်း လုပ်ငန်းစဉ်၏ ခက်ခဲမှုမှာလည်း သာမန် မှော်ရတနာ သွန်းလုပ်သူများ၏ အမွေအနှစ် အဆင့်အတန်းထက် များစွာ ကျော်လွန်နေ၏။

အကြောင်းမူကား ဤမှော်ရတနာ သွန်းလုပ်သူ၏ အမွေအနှစ်အတွက် လိုအပ်ချက်မှာ ချီ ကျင့်ကြံခြင်း ခွန်အား မဟုတ်ဘဲ ခန္ဓာကိုယ်သန့်စင်ခြင်း ကျင့်ကြံခြင်း ခွန်အား ဖြစ်နေသောကြောင့်ပင်။

နတ်ဘုရား ချပ်ဝတ်ကို သွန်းလုပ်လိုပါက ရှေးဟောင်း ခန္ဓာကိုယ်သန့်စင်ခြင်း နယ်ပယ် ကျင့်စဉ်များကို အထူးသီးသန့် ကျင့်ကြံရမည် ဖြစ်၏။ ဤရှေးဟောင်း ခန္ဓာကိုယ်သန့်စင်ခြင်း ကျင့်စဉ်များကို လှမ်းကြည့်လိုက်ရုံမျှဖြင့် သာမန်လူများ ကျင့်ကြံနိုင်သောအရာ မဟုတ်ကြောင်း စံအိမ်တော် သခင်ကြီး ဟုန်ယွဲ့ တွက်ဆမိလိုက်သည်။

“ကောင်းကင်သန့်စင်ခြင်း နတ်ဘုရားကျင့်စဉ်... မှော်ရတနာတွေနဲ့ ရတနာတွေကို ရုပ်ခန္ဓာထဲ ထည့်သွင်း သန့်စင်ပြီး ရုပ်ခန္ဓာရဲ့ အဆင့်အတန်းကို မြှင့်တင်နိုင်တယ်... ရုပ်ခန္ဓာကို သန့်စင်ဖို့အတွက် ‘အင်မော်တယ် ရတနာ’ တစ်ခုလို သဘောထားရတယ်... ဒါပေမဲ့ ဒါက မပြည့်စုံဘူး... လောလောဆယ် အလွှာ (၅) လွှာပဲ ရှိသေးတယ်... အောင်မြင်သွားရင်တော့ ဝိညာဉ်ခွဲဖြာ နယ်ပယ်ရဲ့ အထွတ်အထိပ် ခန္ဓာကိုယ်သန့်စင်ခြင်း အဆင့်ကို ယှဉ်နိုင်လိမ့်မယ်...” ရှေးဟောင်း ခန္ဓာကိုယ်သန့်စင်ခြင်း ကျင့်စဉ်များ၏ အမွေအနှစ်ကို ကြည့်ရင်း စံအိမ်တော် သခင်ကြီး ဟုန်ယွဲ့က ခေါင်းကို ခါယမ်းလိုက်၏။

သူ၏ ကျင့်ကြံခြင်းမှာ ခန္ဓာကိုယ်သန့်စင်ခြင်း မဟုတ်ဘဲ ချီကို အဓိကထားခြင်း ဖြစ်သဖြင့် ၎င်းကို သူ မကျင့်ကြံနိုင်ဟု ခံစားလိုက်ရသည်။

မှော်ရတနာများနှင့် ရတနာများကို ရုပ်ခန္ဓာနှင့်အတူ အရည်ကျို ပေါင်းစပ်ခြင်းက မှော်ရတနာ သွန်းလုပ်ခြင်းကို ကျင့်ကြံနေရသလိုပင်။

၎င်းက သူ၏ ရုပ် ခန္ဓာကို ထိခိုက်စေပြီး ထိုမှတစ်ဆင့် သူ၏ ချီ ကျင့်ကြံခြင်း လမ်းကြောင်းကို အကျိုးသက်ရောက်မှု ရှိလာမလား မည်သူ သိနိုင်မည်နည်း။

ဤရှေးဟောင်း ခန္ဓာကိုယ်သန့်စင်ခြင်း နယ်ပယ် ကျင့်စဉ်ကို စုယွီ၊ ဖန်ရှောင်နှင့် ဖန်လုံတို့လည်း ရရှိခဲ့ကြ၏။

ထိုစဉ် စံအိမ်တော် သခင်ကြီး ဟုန်ယွဲ့က သူတို့ သုံးဦးဘက်သို့ လှည့်ကာ မှာကြားလိုက်တော့သည်။

“ဒီခန္ဓာကိုယ်သန့်စင်ခြင်း နယ်ပယ်ကို ကျင့်ကြံရင် ဘယ်လို သက်ရောက်မှု ရှိလာမလဲ... ဒါမှမဟုတ် ချီ ကျင့်ကြံခြင်းကို ထိခိုက်မလားဆိုတာ မရေမရာ ဖြစ်နေတယ်... မင်းတို့တွေ မျက်ကန်းလို လျှောက်မကျင့်ကြနဲ့ နော်...”

သို့သော်လည်း စုယွီကမူ ဤရှေးဟောင်း ခန္ဓာကိုယ်သန့်စင်ခြင်း ကျင့်စဉ်များကို အတော်ပင် စိတ်ဝင်စားသွား၏။

အကြောင်းမူကား ၎င်း၏ ကျင့်စဉ်သည် ကောင်းကင်အင်မော်တယ် ခန္ဓာကိုယ်သန့်စင်ခြင်း ကျင့်စဉ်များကဲ့သို့ မဟုတ်ဘဲ မှော်ရတနာများနှင့် ရတနာများကို သန့်စင်ခြင်း ပါဝင်နေသောကြောင့်ပါ။

ကောင်းကင်အင်မော်တယ် ကျင့်စဉ်ကမူ အလင်းပုံစံများ၏ စွမ်းအား

အပေါ်တွင်သာ အဓိက အားကိုးခြင်းပင်။

ခန္ဓာကိုယ်သန့်စင်ခြင်း နယ်ပယ်၏ ဤနည်းလမ်းနှစ်ခုသည် တစ်ခုနှင့်တစ်ခု အားဖြည့်ပေးနိုင်လောက်၏။

ချီ ကျင့်ကြံခြင်းကို ထိခိုက်မည့် အရေးအတွက်မူ... ကျွမ်းကျင်မှု ပြကွက် လက်ထဲတွင် ရှိနေသဖြင့် သူ အမှန်တကယ်ပင် မကြောက်ရွံ့ပါချေ။

ရှေးဟောင်း အပျက်အစီး တစ်ခုလုံးကို ရှာဖွေပြီးနောက် သူတို့ ထွက်ခွာတော့မည့် အချိန်တွင် စံအိမ်တော် သခင်ကြီး ဟုန်ယွဲ့သည် နတ်ဘုရား ချပ်ဝတ်ကို ထုဆစ်ရန်အတွက် အဓိက ပစ္စည်းတစ်ခု ဖြစ်သော ပဉ္စမအဆင့် ဝိညာဉ်ကျောက်တုံး တွင်းတစ်ခုကို ရှာဖွေတွေ့ရှိခဲ့၏။ ၎င်းကကား ဝိညာဉ်သတ်ကျောက်တုံး ပင်။

မူလက စံအိမ်တော် သခင်ကြီး ဟုန်ယွဲ့သည် ဤရှေးဟောင်း အပျက်အစီးများကို သိမ်းပိုက်ရန် ရည်ရွယ်ချက် မရှိသော်လည်း ပဉ္စမအဆင့် ဝိညာဉ်ကျောက်တုံးကို မြင်လိုက်ရပြီးနောက် စောင့်ကြပ်ရန်နှင့် လျှို့ဝှက် မိုင်းတွင်းတူးရန်အတွက် ဤနေရာ၌ အင်မော်တယ် စစ်တပ်တစ်ခုကို အခြေစိုက် စောင့်ကြပ်စေရန် သူ ဆုံးဖြတ်လိုက်တော့၏။

“သွားစို့... ပြန်မယ်...”

ဆုလာဘ်များစွာ ရရှိခဲ့ချေပြီ။

ဒုတိယ အင်မော်တယ် မြို့တော်မှ တာအိုသားတော်နှင့် အခြားသူများအတွက် သွေးကြွေးကိုလည်း ပြန်လည် တောင်းခံနိုင်ခဲ့ပြီ ဖြစ်သည်။

စံအိမ်တော် သခင်ကြီး ဟုန်ယွဲ့နှင့် သူ၏ လူလေးယောက် အုပ်စုသည် ဝိညာဉ်သတ်မြေပြင်မှ အတော်ပင် စိတ်ကြည်လင်စွာဖြင့် ထွက်ခွာခဲ့ကြပြီး ပထမ အင်မော်တယ် မြို့တော်သို့ ပြန်လာခဲ့ကြတော့၏။

အသွားအပြန် ခရီးစဉ်။

သူတို့ သုံးလပင် မပြည့်သော အချိန်ကိုသာ ကုန်ဆုံးခဲ့ရသည်။

*

အရိုင်းနယ်မြေ၊ ပထမ အင်မော်တယ် မြို့တော်ဝယ်..

စံအိမ်တော် သခင်ကြီး ဟုန်ယွဲ့နှင့် သူ၏ လူများ ပြန်ရောက်လာသောအခါ အခြား အင်မော်တယ် ဂိုဏ်းများထံမှ မည်သည့် တုံ့ပြန်မှုမျှ မရှိသေးချေ။ သို့ဖြစ်ရသည်မှာ ကျင့်ကြံခြင်း လောက၌ သုံးလဆိုသော အချိန်မှာ တိုတောင်းလွန်းလှပြီး ခရီးသွားချိန်သည်ပင် ဤထက် ပို၍ ကြာမြင့်နိုင်သောကြောင့် ဖြစ်၏။

ပထမ အင်မော်တယ် မြို့တော်အတွင်းရှိ မဟာခန်းမဆောင်၌ စံအိမ်တော် သခင်ကြီး ဟုန်ယွဲ့သည် အင်မော်တယ် ဂိုဏ်းမှ အခြားသော ဝိညာဉ်ခွဲဖြာ နယ်ပယ် ဘိုးဘေးအိုကြီး နှစ်ဦးနှင့် အရိုင်းနယ်မြေ ပြဿနာကို ဆွေးနွေးလိုက်ကြသည်။

သူတို့သည် ခေတ္တမျှ စောင့်ကြည့်ရန်၊ စတုတ္ထနှင့် တတိယ အင်မော်တယ် မြို့တော်မှ လူများကို ပထမ အင်မော်တယ် မြို့တော်၌ ယာယီ တည်းခိုနေထိုင်စေရန်နှင့် အင်မော်တယ် တစ်သောင်း နန်းတော် နှင့် အခြား အင်မော်တယ် ဂိုဏ်းများ၏ တုံ့ပြန်မှုများကို စောင့်ကြည့်ရန် ဆုံးဖြတ်လိုက်ကြ၏။

ဒုတိယ အင်မော်တယ် မြို့တော် ဆုံးရှုံးမှုနှင့် ပတ်သက်၍မူ ထိုနေရာရှိ လူအားလုံး သုတ်သင်

ရှင်းလင်းခံလိုက်ရသည်မှာ အခြေခံအားဖြင့် သေချာသလောက် ရှိနေ

ချေပြီ။

သူတို့သည် ဤအင်မော်တယ် ဂိုဏ်းအတွက် လူသစ်များ ထပ်မံ စုဆောင်းရန် လိုအပ်သလို ဒုတိယ မြို့တော်ကို ပြန်လည် လွှဲပြောင်းယူရန်နှင့် အင်မော်တယ် စစ်တပ်တစ်ခုကို ပြုစုပျိုးထောင်ရန် တာအိုသားတော် တစ်ယောက်ကို ထပ်မံ ရွေးချယ်ရဦးမည် ဖြစ်သည်။

နတ်ဘုရား ချပ်ဝတ်များနှင့် အခြား ပစ္စည်းများကို ပိုင်ဆိုင်ထားသည့် သတင်းနှင့် ပတ်သက်၍ စံအိမ်တော် သခင်ကြီး ဟုန်ယွဲ့သည် တစ်ခေါက်တည်းသော ခရီးစဉ်အတွင်း နတ်ဘုရား ချပ်ဝတ် အမြောက်အမြား ရရှိခဲ့ကြောင်း သိလိုက်ရသောအခါ ဝိညာဉ်ခွဲဖြာ နယ်ပယ် ဘိုးဘေးအိုကြီး နှစ်ဦးမှာ အလွန်အမင်း ဝမ်းမြောက်ဝမ်းသာ ဖြစ်သွားကြတော့၏။

သူတို့သည် နတ်ဘုရား ချပ်ဝတ်ကို မည်သို့ အသုံးပြုရမည်နှင့် အင်မော်တယ် ဂိုဏ်းအတွက် ခိုင်မာသော အုတ်မြစ်တစ်ခုကို မည်သို့ တည်ဆောက်ရမည်ကို နောက်ထပ် တစ်ရက်ကြာအောင် ဆွေးနွေးခဲ့ကြပြန်သည်။

ရက်အနည်းငယ် အကြာ၌ စံအိမ်တော် သခင်ကြီး ဟုန်ယွဲ့သည် စုယွီ၊ ဖန်ရှောင်နှင့် ဖန်လုံတို့ကို လာရောက် ရှာဖွေခဲ့သော်လည်း စုယွီက ဦးစွာ ဝင်ရောက် ပြောဆိုလိုက်၏။

“အစ်ကိုကြီး... ကျွန်တော် အင်မော်တယ် ဂိုဏ်းကို ပြန်ပြီး တံခါးပိတ် ကျင့်ကြံဖို့ ပြင်ဆင်ထားပါတယ်... အရင် တိုက်ပွဲအပြီးမှာ အခြား အင်မော်တယ် ဂိုဏ်းတွေအားလုံး ကျွန်တော့်ကို ပစ်မှတ်ထားလာကြမှာမို့ပါ... ကျွန်တော် အင်မော်တယ် ဂိုဏ်းကို ပြန်ပြီး ဆယ်စုနှစ် အနည်းငယ် ဒါမှမဟုတ် နှစ်ပေါင်း တစ်ရာလောက်အထိ တံခါးပိတ် ကျင့်ကြံနေတာက ပိုကောင်းလိမ့်မယ်... ဒီကိစ္စတွေ အားလုံး ပြီးသွားတဲ့ အခါကျမှပဲ ပြန်ထွက်လာခဲ့တော့မယ် နော်...”

စံအိမ်တော် သခင်ကြီး ဟုန်ယွဲ့သည် ခေတ္တမျှ စဉ်းစားလိုက်ပြီးနောက် စုယွီ၏ တောင်းဆိုချက်ကို သဘောတူရန် ဆုံးဖြတ်လိုက်ကာ စုယွီကို အင်မော်တယ် ဂိုဏ်းသို့ ပြန်၍ တံခါးပိတ် ကျင့်ကြံခွင့် ပြုလိုက်တော့၏။

သူသည် မူလက စုယွီကို တာအိုသားတော် တစ်ပါး ဖြစ်လာစေရန်နှင့် ဒုတိယ အင်မော်တယ် မြို့တော်ကို လွှဲပြောင်းယူစေရန် မေးမြန်းရန် စဉ်းစားနေပါသည်။

ယခု အခြေအနေ အရဆိုလျှင် သူတို့ တာအိုသားတော်တစ်ပါးကို ထပ်မံ ရွေးချယ်ရန် လိုအပ်နေသေးပုံ ရ၏။

လဝက်ခန့် ကြာပြီးနောက်

*

မြေကမ္ဘာ အင်မော်တယ် ဂိုဏ်း၊ တာ့ယွီ တောင်ထိပ်။

စုယွီ ဤနေရာသို့ ပြန်ရောက်လာခဲ့ချေပြီ။ ပထမဦးစွာ သူသည် အင်မော်တယ် ဂိုဏ်း၏ သီးသန့်နယ်မြေအတွင်း တံခါးပိတ် ကျင့်ကြံနေသော သူ၏ ဆရာ တာအိုပညာရှင် ထျန်းယွီ၏ တိုးတက်မှု သတင်းများကို အင်မော်တယ် ဂိုဏ်း၏ လူကြီးများထံမှ မေးမြန်း စုံစမ်းလိုက်၏။

သူ၏ ဆရာမှာ အသက်ရှင်နေသေးကြောင်းနှင့် မည်သည့် ထူးခြားသော လှုပ်ရှားမှုမျှ မရှိကြောင်း သိလိုက်ရပြီးနောက်တွင်မှ စိတ်အေးသွားရပြီး တာ့ယွီတောင်ထိပ်သို့ ပြန်လာခဲ့တော့သည်။

သို့သော်လည်း တာအိုပညာရှင် ထျန်းယွီသည် ဤမျှလောက် ကြာမြင့်စွာ တံခါးပိတ် ကျင့်ကြံနေခဲ့သော်လည်း ဝိညာဉ်ခွဲဖြာ နယ်ပယ်သို့ မတက်လှမ်းနိုင်သေးချေ။ အခြေအနေမှာ သိပ်ပြီး ဟန်ပုံ မရပါ။

အချို့သောအချက်များကို ချင့်ချိန် စဉ်းစားပြီးနောက် စုယွီသည် ပဉ္စမအဆင့်နိမ့်နှင့် ပဉ္စမအဆင့်လတ် ဝိညာဉ်အရည် (၃၀၀) စက်ကို ထုတ်ယူလိုက်ကာ တားမြစ်နယ်မြေကို စောင့်ကြပ်နေသော အကြီးအကဲ တစ်ဦးအား သူ၏ ဆရာထံသို့ ပေးပို့ခိုင်းလိုက်တော့သည်။

ထိုအခါကျမှသာ စုယွီသည် အနည်းငယ် စိတ်သက်သာရာ ရသွားတော့၏။

‘ဆရာ အောင်မြင်စွာ အဆင့်ချိုးဖြတ်နိုင်ပါစေလို့ ကျွန်တော် ဆုတောင်းပေးပါတယ်’

စုယွီသည် သူ၏ နှလုံးသားထဲမှ တာအိုပညာရှင် ထျန်းယွီအတွက် ဆုတောင်းပေးလိုက်မိသည်။

တာ့ယွီ တောင်ထိပ်သို့ ပြန်ရောက်သည်နှင့် စုယွီသည် တားမြစ်နယ်မြေအတွင်းသို့ ခြေချလိုက်၏။

“မင်း ပြန်လာပြီလား...”

အာရုံလှည့်စားမှု နှလုံးသား ကျောက်တုံး၏ အိုမင်းလှသော အသံသည် အနည်းငယ် အံ့အားသင့်သည့် အရိပ်အယောင်များနှင့်အတူ ထွက်ပေါ်လာတော့သည်။

အကြောင်းမူကား စုယွီသည် ယခင်ကဆိုလျှင် ပြန်လာရန်အတွက် ဆယ်စုနှစ်ပေါင်းများစွာ အချိန်ယူလေ့ ရှိသောကြောင့်ပင် ဖြစ်၏။

စုယွီက ပြန်လည် တုံ့ပြန်လိုက်သည်။

“အပြင်မှာ ကိစ္စတွေ အများကြီး ဖြစ်ခဲ့တယ်... ကျွန်တော် အင်မော်တယ်တစ်သောင်း နန်းတော်၊ လီဟော့ခန်းမ၊ ယွီလုံနန်းတော်နဲ့ က်ိုး ဝိဉာဉ် အင်မော်တယ် တောင်တန်းက လူပေါင်း သောင်းနဲ့ချီပြီး သတ်ခဲ့တယ်... ပြီးတော့ တာအိုသားတော်အချို့ကိုပါ ဖမ်းဆီးခဲ့သေးတယ်... ဒါကြောင့်မို့ လောလောဆယ် ပြန်လာခဲ့တာလေ...”

အာရုံလှည့်စားမှု နှလုံးသား ကျောက်တုံးသည် ခေတ္တမျှ ဆွံ့အ မှင်သက်သွားရ၏။

၎င်း၏ နှစ်ပေါင်းများစွာ တည်ရှိမှု သက်တမ်းတစ်လျှောက်တွင် အင်မော်တယ် ကျင့်ကြံခြင်း လောက၏ လက်ရှိ အခြေအနေကို ကောင်းစွာ သိရှိထားပေသည်။

စုယွီ၏ စကားများကို ကြားလိုက်ရသောအခါ ၎င်းက မယုံကြည်နိုင်သည့် အမူအရာဖြင့် ပြောလိုက်တော့သည်။

“မင်း ကြွားနေတာလား... မင်း အဲဒီလို ကိစ္စတွေ လုပ်ခဲ့ပြီးတာတောင် သူတို့က မင်းကို ဒီအတိုင်း လွှတ်ထားမယ်တဲ့လား...”

စုယွီက သူ၏ ပခုံးများကို တွန့်ပြလိုက်ပြီး ပြုံးလျက်...

“ဒါကြောင့်မို့လို့ပဲ ကျွန်တော် အင်မော်တယ် ဂိုဏ်းကို ပြန်လာပြီး ကျင့်ကြံနေတာပေါ့...”

အာရုံလှည့်စားမှု နှလုံးသား ကျောက်တုံး -

“...”

‘မင်းက နည်းနည်းမှတောင် မလန့်ဘဲ ပျော်နေတယ်လို့ ဘာလို့ ငါ ခံစားနေရတာလဲ..ကောင်လေးရာ.’

ရေကန်၏ ဘေးနားသို့ ရောက်သောအခါ စုယွီသည် ပင်လယ်လွှမ်းမိုးလိပ်ကြီးကို ဆင့်ခေါ်လိုက်၏။

၎င်း၏ ကျင့်ကြံခြင်းမှာ စတုတ္ထအဆင့်နိမ့်သို့ ရောက်ရှိနေပြီ ဖြစ်ပြီး တတိယအဆင့်၌ ရှိနေစဉ်ကထက် များစွာ နှေးကွေးလှပေသည်။ ၎င်းသည် စတုတ္ထအဆင့်လတ်သို့ ရောက်ရှိရန်အတွက် အချိန်အတော်ကြာ ယူရဦးမည်မှာ သေချာလှ၏။

ပင်လယ်လွှမ်းမိုးလိပ်ကြီးအား စတုတ္ထအဆင့်မြင့် ဝိညာဉ်အရည် အမြောက်အမြား ကျွေးမွေးပြီးနောက် စုယွီက မှာကြားလိုက်သည်။

“မင်းရဲ့ သခင်နဲ့ မင်း.. ဝိညာဉ်ခွဲဖြာ နယ်ပယ်နဲ့ ပဉ္စမအဆင့်ကို ရောက်တဲ့ အခါကျမှပဲ အပြင်မှာ လွတ်လွတ်လပ်လပ် သွားလာနိုင်မှာကွ...”

သို့မဟုတ်ပါက ဧရာမ ပင်လယ်လွှမ်းမိုးလိပ်ကြီး တစ်ကောင် ဖြစ်ပါလျက် ပင်လယ်ပြင်ရှိ ရွှမ်လိပ် မျိုးနွယ်စုများ၏ ခြောက်လှန့်ခံရကာ ခေါင်းပင် မဖော်ရဲဘဲ နေရသည်မှာ အလွန်ပင် စိတ်ပျက်စရာ ကောင်းလှသည် မဟုတ်ပါလော။

ဤအကြောင်းကို ပိုမို စဉ်းစားရင်း စုယွီက လိပ်ကြီးကို ပိုမို တွန်းအားပေးလိုက်ပြန်၏။

“သူတို့က မင်းကို ဒီလို အနိုင်ကျင့်ခဲ့တာဆိုတော့ မင်းရဲ့ ကျင့်ကြံခြင်း အဆင့်တက်လာတဲ့ အခါကျရင် ပင်လယ်ထဲသွားပြီး ရွှမ်လိပ်တွေ အားလုံးကို ချေမှုန်းပစ်လိုက်... ပြီးရင် သူတို့ရဲ့ မိန်းမတွေနဲ့ သမီးတွေကို လုယူပြီး ငါ့အတွက် မျိုးဆက်တွေ အများကြီး မွေးခိုင်းလိုက်ကွာ..”

သူကိုယ်တိုင် ပင်လယ်လွှမ်းမိုးလိပ်ကြီးကဲ့သို့ ရှေးဟောင်း ဝိညာဉ် သတ္တဝါ အုပ်စုကြီးကို ပြုစုပျိုးထောင်နေပုံကို စဉ်းစားမိရင်း စုယွီသည် အနည်းငယ်ပင် စိတ်မရှည်နိုင်အောင် ဖြစ်လာရတော့သည်။

အကယ်၍ သူ၏ ပတ်ပတ်လည်တွင် ပင်လယ်လွှမ်းမိုးလိပ်ကြီး အုပ်စုကြီး တစ်စုသာ ဝန်းရံထားမည် ဆိုပါက မည်သူက သူ၏ ကာကွယ်ရေးကို ဖောက်ဖျက်နိုင်တော့မည်နည်း။

၎င်းအပြင် သူသည် ထိုက်ရွှီကိုပါ တားမြစ်နယ်မြေအတွင်း၌ ကျင့်ကြံရန်အတွက် လွှတ်ထားလိုက်၏။

ထို့နောက်တွင်မူ စုယွီသည် တာ့ယွီ တောင်ထိပ်မှ ထွက်ခွာခဲ့တော့သည်။ သူသည် အရိပ်နီ တာအို ရုပ်သေး အဖြစ် အသွင်ပြောင်းလဲလိုက်ပြီး လင်းချင်းရှား၊ လင်းပင်းနှင့် ယန်ယွီမင်တို့ကို တွေ့ဆုံရန် ရှီကျွင်း အင်မော်တယ် မြို့တော်ရှိ ယွင်ရှောင် ဆေးလုံး စံအိမ်သို့ တိတ်တဆိတ် သွားရောက်ခဲ့၏။

၎င်းနောက် သူသည် ယွီခယ်အာ၊ မာထျန်းလင်တို့နှင့် အတူတကွ အချိန်ကုန်ဆုံးရန် ပိုင်ဟွာဂိုဏ်း၏ လျှို့ဝှက်ဆန်းကြယ် နယ်မြေသို့ သွားရောက်ခဲ့ပြန်သည်။

ဤအလုပ်များ အားလုံး ပြီးမြောက်ပြီးနောက်တွင်မှ စုယွီသည် တကယ့် တံခါးပိတ် ကျင့်ကြံခြင်းကို စတင်ရန်အတွက် အင်မတန် အေးငြိမ်းလှသော အင်မော်တယ် ဂိုဏ်း၏ တာ့ယွီ တောင်ထိပ်သို့ ပြန်လာခဲ့တော့၏။

နေ့စဉ် နေ့တိုင်း သူသည် ကြိုးစား ကျင့်ကြံနေပြီး ဓာတ်ကြီး ငါးပါး ကျင့်စဉ်၊ နယ်ပယ်၊ ဆေးဖော်စပ်ခြင်းနှင့် အခင်းအကျင်းများကို နားလည် သဘောပေါက်ရန်အတွက် ပိုမို ချင့်ချိန် စဉ်းစားနေလိုက်၏။ တစ်ချိန်တည်းမှာပင် သူသည် စတုတ္ထအဆင့်လတ် အရိပ်နီ တာအိုရုပ်သေး၏ အဓိက ပစ္စည်းများကို စုဆောင်းရန်အတွက် အလုပ်ဆောင်ရွက်ရေး ခန်းမဆောင်ထံသို့ အကူအညီ တောင်းခံထားလိုက်သေးသည်။

ဤသို့ဖြင့် သုံးနှစ်နီးပါးခန့် အချိန်ကာလ ကုန်လွန်သွားခဲ့ချေပြီ။

တစ်ရက်တွင် စုယွီသည် စိတ်လှုပ်ရှားမှု တစ်ခုကို ခံစားလိုက်ရသဖြင့် မှော်ရတနာ ထဲမှ ထူးဆန်းသော မျိုးစေ့ကို ထုတ်ယူလိုက်၏။

မူလက အစိမ်းရောင်ရှိသော ထူးဆန်းသော မျိုးစေ့သည် ဝိညာဉ်ခွဲဖြာ နယ်ပယ်နှောင်းပိုင်း အဆင့်ရှိ သစ်ပင်မိစ္ဆာ၏ အသက်စွမ်းအားများကို စုပ်ယူပြီးနောက် ယခုအခါ တစ်ကိုယ်လုံး ရွှေရောင် အရိပ်အယောင်များအဖြစ်သို့ တစ်စစ အသွင်ပြောင်းလဲသွားခဲ့ပြီ ဖြစ်သည်။

၎င်း၏ အရှိန်အဝါသည်လည်း ကြီးမားသော ပြောင်းလဲမှုများကို ဖြတ်သန်းခဲ့ရပြီး ထူးခြားလှသော မွှေးရနံ့တစ်ခုက လေထဲတွင် ပျံ့လွင့်နေတော့၏။

ထူးဆန်းသော မျိုးစေ့ကို မှော်လက်နက်နန်းတော်ထဲမှ ထုတ်ယူလိုက်သည်နှင့် ၎င်းသည် လေးလံလှသဖြင့် မြေပြင်ပေါ်သို့ တိုက်ရိုက် ပြုတ်ကျသွားတော့သည်။ တခဏချင်းမှာပင် အာရုံလှည့်စားမှု နှလုံးသား ကျောက်တုံး၏ တားမြစ်နယ်မြေအတွင်းရှိ သဘာဝ ဝိညာဉ်စွမ်းအားများ တုန်ခါသွားစေတော့၏။

“ဝူး...”

ထူးဆန်းသော မျိုးစေ့သည် မြေကြီးထဲသို့ ဝင်သွားသည်နှင့် ချက်ချင်းပင် အပင်ပေါက်လာတော့သည်။ ခြေလှမ်း (၁၀) လှမ်းပင် မပြည့်သော အချိန်အတွင်းမှာပင် ထိုအပင်ပေါက်ကလေးသည် (၁၀) ပေကျော် မြင့်မားသော ရွှေရောင်ဖျော့ဖျော့ ဝိညာဉ်အပင်ကြီး တစ်ပင်အဖြစ်သို့ ချက်ချင်း ကြီးထွားလာ၏။ တောက်ပသော အစိမ်းရောင် အင်မော်တယ် အလင်းတန်းများနှင့်အတူ ဆန်းကြယ်လှသော ရွှေရောင် အင်မော်တယ် အလင်းတန်းများကို ဖြာထွက်စေတော့သည်။

ဤတစ်ကြိမ်တွင်မူ ရွှေရောင် ဝိညာဉ်အပင်ကြီးသည် ကြီးထွားလာသော်လည်း ပန်းပွင့်ခြင်း ၊ အသီးသီးခြင်း လုံးဝ မရှိချေ။ ၎င်းအစား အပင်ကြီးမှာ ရင့်မှည့် သန်မာလာပြီးနောက် ချက်ချင်းပင် ပြာမှုန့်များအဖြစ်သို့ ပြောင်းလဲသွားကာ ဖြည်းညင်းစွာ လွင့်ပျံ ပျောက်ကွယ်သွားတော့၏။

လေထဲတွင်မူ ရွှေရောင်ဖျော့ဖျော့ ဝိညာဉ်အရည် တစ်စက်သာ ကျန်ရစ်ခဲ့၏။

၎င်းအပြင် မှိန်ပျပျ ထူးဆန်းသော မျိုးစေ့တစ်ခုက မြေပြင်ပေါ်သို့ ပြန်လည် ပြုတ်ကျလာတော့သည်။

စုယွီက ထူးဆန်းသော မျိုးစေ့ကို အလျင်အမြန် ကောက်ယူလိုက်ပြီး အနည်းငယ် ပြောင်းလဲသွားသော မျိုးစေ့ကို ကြည့်ရင်း တီးတိုး ရေရွတ်လိုက်မိ၏။

“သူက မျိုးစေ့တစ်ခုအဖြစ် ပြန်ပြောင်းသွားပြန်ပြီလား... ဒါနဲ့ဆိုရင် ဘယ်နှစ်ကြိမ်မြောက် ရှိနေပြီလဲ...”

စုယွီသည် ရွှေရောင် ဝိညာဉ်အရည်စက်ကို ကြည့်လိုက်ရာ မျက်လုံးအစုံတွင် အံ့အားသင့်သည့် အရိပ်အယောင်များဖြင့် ပြည့်နှက်သွားတော့၏။

ဤဝိညာဉ်အရည်စက်က မည်မျှလောက် ထူးခြားလှသော အာနိသင် စွမ်းပကားများ ရှိနေဦးမည်ကို စဉ်းစား၍ပင် မရနိုင်အောင် ဖြစ်နေရတော့သည်။

အခန်း (၆၉၀) - ပါရမီ အသွင်ပြောင်းလဲခြင်း၊ ဓာတ်ကြီး ငါးပါး မြေကမ္ဘာအဆင့် ဝိညာဉ်အမြစ် (အပိုင်း-၁)

စုယွီသည် တင်ပျဉ်ခွေ ထိုင်ချလိုက်ပြီး ရွှေရောင်ဖျော့ဖျော့ ဝိညာဉ်အရည်စက်ကို မျိုချလိုက်၏။ ထိုအခိုက်အတန့်၌ လျှို့ဝှက်ဆန်းကြယ်သော အရှိန်အဝါတစ်ခုက သူ၏ တစ်ကိုယ်လုံးသို့ ရိုက်ခတ်သွားပြီး သူ၏ ဝိညာဉ်ကို ကြောက်ရွံ့တုန်လှုပ်သွားစေတော့သည်။

‘ဒါ... ဘယ်လို အရှိန်အဝါမျိုးလဲ...’

ဤအရှိန်အဝါ ပေါ်ထွက်လာသည်နှင့် တစ်ပြိုင်နက် စုယွီက ဓာတ်ကြီး ငါးပါး ကျင့်စဉ်ကို အသက်သွင်းရန်ပင် အချိန်မရလိုက်။ သူ၏ တန်ထျန်ဆီသို့ တိုက်ရိုက် တဟုန်ထိုး ပြေးဝင်သွားလိုက်၏။

ထိုအခိုက်တွင် စုယွီ၏ ဓာတ်ကြီး ငါးပါး ဝိညာဉ်အမြစ်မှ မျက်စိကျိန်းမတတ် စူးရှသော အလင်းရောင်များ ဖြာထွက်လာတော့သည်။

တစ်ချိန်တည်းမှာပင် စုယွီ၏ ခန္ဓာကိုယ်မှ တောက်ပသော ရွှေရောင်ဖျော့ဖျော့ အင်မော်တယ် အလင်းတန်းများ ဖြာထွက်လာ၏။ စုယွီ၏ စိတ်အာရုံဖြင့် စူးစမ်းမှုအောက်တွင် ဝိညာဉ်အရည်၏ အရှိန်အဝါသည် သူ၏ ခြေလက်များနှင့် အရိုးများဆီသို့ လှည့်ပတ် စီးဆင်းသွားသည်။ ဝိညာဉ်အရည်၏ စွမ်းအားအောက်တွင် သူ၏ ခန္ဓာကိုယ်သည် သိမ်မွေ့သော အသွင်ပြောင်းလဲမှု တစ်ခုကို ဖြတ်သန်းနေရသည့်အလားပင်။

ဤအသွင်ပြောင်းလဲမှုသည် ယခင်ကနှင့် မတူညီချေ။ ယခင်က လျှို့ဝှက်ဆန်းကြယ်သော ဝိညာဉ်သစ်သီးများနှင့် ဝိညာဉ်အရည်များကို စားသုံးခြင်းသည် သူ၏ ရုပ်ခန္ဓာ သန့်စင်ခြင်းကိုသာ မြှင့်တင်ပေးခဲ့သည်။

သို့သော် သည်တစ်ကြိမ်တွင်မူ စုယွီသည် သူ၏ ခန္ဓာကိုယ် ဇစ်မြစ်ရှိ ပြောင်းလဲမှုကို ရှင်းလင်းစွာ ခံစားသိရှိနိုင်လိုက်၏။

သို့သော်ငြားလည်း မျက်စိကျိန်းမတတ် တောက်ပသော ရွှေရောင်ဖျော့ဖျော့ အင်မော်တယ် အလင်းတန်းများ သူ၏ ခန္ဓာကိုယ်မှ ရစ်သိုင်းလာသည်နှင့်အမျှ သူ၏ အနောက်တွင် မှုန်ဝါးဝါး ဧရာမ သစ်ပင်ကြီး တစ်ပင် ပေါ်ပေါက်လာသယောင် ရှိနေသည်ကိုမူ စုယွီ သတိမထားမိခဲ့ချေ။

စုယွီကို အနီးကပ် စောင့်ကြည့်နေသော အာရုံလှည့်စားမှု နှလုံးသား ကျောက်တုံးသည် ဤမိုးထိအောင် မြင့်မားလှသော သစ်ပင်ကြီးကဲ့သို့ ပုံရိပ်ယောင်ကို မြင်တွေ့လိုက်ရသည်။ ထိုသစ်ပင်ထံမှ ကြီးမြတ်သော အရှိန်အဝါကို ခံစားလိုက်ရပြီးနောက် ၎င်းက ထိတ်လန့်တကြား အော်ဟစ်လိုက်တော့၏။

“ဒါ ဘယ်လို ဝိညာဉ်အပင် အမျိုးအစားလဲ...”

“ဒီအရှိန်အဝါက... ရှေးဟောင်း ကောင်းကင်ဘုံ ကျောင်းတော်တွေက မူလဝိညာဉ်အဆင့် တာအိုသခင်တွေထက်တောင် ပိုပြီး ကြောက်စရာကောင်းနေတယ်လို့ ဘာလို့များ ငါ ခံစားနေရတာလဲ...”

အချိန်များ ကုန်လွန်လာသည်နှင့်အမျှ စုယွီ၏ ခန္ဓာကိုယ်ပေါ်ရှိ အရှိန်အဝါသည် ပိုမို အားကောင်းလာတော့သည်။

ဤအချိန်တွင် စုယွီသည် အလွန် လျှို့ဝှက်ဆန်းကြယ်သော အခြေအနေ တစ်ခုသို့ ကျရောက်သွားလေပြီ။

သူ၏ မူလဝိညာဉ်သည် သူ၏ ရုပ်ခန္ဓာအပြင်ဘက်၌ လှည့်လည်သွားလာနေပုံပေါ်၏။

ကျင့်ကြံခြင်း လောကအထက်တွင် ကန့်လန့်ဖြတ် သွယ်တန်းနေသော ပုံရိပ်ယောင်များပမာ ကြီးမားလှသော လမ်းစဉ်များကို သူ သိမြင်လိုက်ရသည်။ ၎င်းတို့သည် ကမ္ဘာကြီးကို ထောက်မထားပုံရပြီး မရေမတွက်နိုင်သော လမ်းစဉ်များ ပေါင်းဆုံကာ လျှို့ဝှက်ဆန်းကြယ်သော ကျင့်ကြံခြင်း လောကတစ်ခုကို ဖြစ်ပေါ်စေခဲ့၏။

ဤအခြေအနေတွင် ကောင်းကင်နှင့် မြေကြီး၏ မဟာလမ်းစဉ်များ၊ ဓာတ်ကြီး ငါးပါး၊ ဟင်းလင်းပြင်နှင့် အချိန်တာအိုတို့အကြောင်း စုယွီ၏ စိတ်ထဲ၌ စိတ်ကူးဉာဏ် အမြောက်အမြား ပေါ်ထွက်လာပြီး မရေမတွက်နိုင်သော ဉာဏ်အလင်း အသစ်များကို ယူဆောင်လာပေးတော့၏။

တစ်ချိန်ချိန်တွင် စုယွီသည် ပုံရိပ်ယောင် ကမ္ဘာ့ အတားအဆီး အလွှာတစ်ခု တည်ရှိနေသည့် ကောင်းကင်ယံ မြစ်တစ်စင်းနှယ် ကျယ်ပြောလှသည့် လမ်းစဉ် ပုံရိပ်ယောင်များကို ဖောက်ထွင်း၍ ကြည့်မြင်

လိုက်ရသယောင် ရှိနေ၏။

ဤလျှို့ဝှက်ဆန်းကြယ်သော အခြေအနေတွင် သူ သိမြင်ခဲ့သမျှ အရာအားလုံးက စုယွီကို အနည်းငယ် တွေဝေသွားစေခဲ့သည်။

ဤအခြေအနေမှ ရုန်းထွက်လာပြီးနောက် စုယွီသည် ခေတ္တမျှ မှင်သက်သွားခဲ့သည်။

‘ငါ မြင်လိုက်ရတဲ့ အဲဒီ ကြီးမားတဲ့ လမ်းစဉ်တွေလို ပုံရိပ်ယောင်တွေက တကယ်ပဲ တည်ရှိနေတာလား...’

‘ပြီးတော့ အဲဒီ ပုံရိပ်ယောင် ကမ္ဘာ့ အတားအဆီးဆိုတာက ဘာလဲ...’

သူသည် တွေဝေနေသော အမူအရာဖြင့် ကောင်းကင်ကို မော့ကြည့်လိုက်၏။

သို့သော်လည်း ထိုလျှို့ဝှက်ဆန်းကြယ်သော အခြေအနေသို့ သူ ထပ်မံ၍ ပြန်မသွားနိုင်တော့ချေ။

‘ဒါက ပုံရိပ်ယောင် တစ်ခုလား... ဒါမှမဟုတ် မဟာလမ်းစဉ်တွေက ဒီလိုနည်းလမ်းနဲ့ တကယ်ပဲ တည်ရှိနေတာလား...’

သူ သတိပြန်ဝင်လာသောအခါ စုယွီသည် ရုတ်တရက် အံ့အားသင့်သွားရသည်။ သူ၏ ခန္ဓာကိုယ်သည် ကြီးမားသော အသွင်ပြောင်းလဲမှု တစ်ခုကို ဖြတ်သန်းခဲ့ရတော့၏။

စုယွီ၏ သွေးများသည် ရွှေရောင်အလင်းတန်းဖြင့် မှိန်ပျပျ တောက်ပနေ၏။

အသက်စွမ်းအား၏ ဇစ်မြစ် အရှိန်အဝါသည် ယခင်ကနှင့် နှိုင်းယှဉ်ပါက အခြား အဆင့် တစ်ခုသို့ ခုန်တက်သွားပုံ ပေါ်သည်။

စုယွီသည် သူ၏ ခန္ဓာကိုယ် အသွင်ပြောင်းနေသလို ခံစားလိုက်ရ၏။

သို့သော် ဝိညာဉ်အရည်၏ စွမ်းအားမှာ ကုန်ခမ်းသွားခဲ့ပြီ ဖြစ်ပြီး သူ၏ ခန္ဓာကိုယ်မှာလည်း အသွင်ပြောင်းလဲမှု စတင်ပြီးကာမှ ရပ်တန့်သွားခဲ့သည်။

သူက ကျွမ်းကျင်မှု ပြကွက်ဆီသို့ အကြည့်တစ်ချက် ဝေ့လိုက်၏။

ဤအရာကို မြင်လိုက်ရသောအခါ သူသည် အကြီးအကျယ် တုန်လှုပ်သွားတော့သည်။ သူ၏ သက်တမ်းသည် သုံးရာရှစ်ဆယ့်သုံးနှစ် တိုးလာခဲ့ပြီ ဖြစ်၏။ စုစုပေါင်း နှစ်ထောင့်ငါးရာ့တစ်ဆယ့်ငါးနှစ်အထိ ရောက်ရှိသွားခဲ့သည်။

[သက်တမ်း - (၂၈၆) / (၂၅၁၅) နှစ်]

စုယွီ လန့်ဖျတ်သွား၏။ ဝိညာဉ်ခန္ဓာကိုယ်များသည် သဘာဝအတိုင်း ကမ္ဘာမြေကြီးက ပြုစုပျိုးထောင်ပေးထားခြင်းပင်။ သူသည် အင်မော်တယ် တစ်သောင်း နန်းတော် ၌ စာအုပ်များနှင့် ရှေးဟောင်း မှတ်တမ်းပေါင်းများစွာကို ဖတ်ရှုခဲ့ဖူးသော်လည်း မွေးဖွားပြီးနောက် ဝိညာဉ်ခန္ဓာကိုယ်ကို ကျင့်ကြံနိုင်သူ တစ်ဦးတစ်ယောက်ကိုမျှ မတွေ့ဖူးခဲ့ချေ။

‘ငါ့ခန္ဓာကိုယ်က ဝိညာဉ်ခန္ဓာကိုယ် အဖြစ် အသွင်ပြောင်းသွားနိုင်တာများလား...’

‘သူ့ခန္ဓာကိုယ်ရဲ့ ပြောင်းလဲမှုတွေက ဘာဖြစ်နေတာလဲ...’

အခြား အသွင်အပြင်များကို ကြည့်လိုက်လျှင်…

ဓာတ်ကြီး ငါးပါး နယ်ပယ်၊ ဟင်းလင်းပြင် နယ်ပယ်၊ အချိန် နယ်ပယ် စသည်တို့ အားလုံး တိုးတက်လာခဲ့ပြီး နယ်ပယ်များ၏ တိုးတက်လာမှုကို စုယွီက ရှင်းလင်းစွာ ခံစားနိုင်လိုက်၏။

သူ၏ နှလုံးသားထဲမှ အတွေးတစ်ချက်နှင့်အတူ ကောင်းကင်နှင့် မြေကြီး၏ တဝီဝီ မြည်သံများပင် ထွက်ပေါ်လာတော့သည်။

ကောင်းကင်နှင့် မြေကြီးသည် စုယွီ၏ ပတ်ပတ်လည်တွင် ပြောင်းလဲလာတော့၏။ မျက်စိတစ်မှိတ်အတွင်းမှာပင် အာရုံလှည့်စားမှု နှလုံးသား ကျောက်တုံး၏ တားမြစ်နယ်မြေသည် ပန်းတစ်ရာဂိုဏ်း၏ လျှို့ဝှက်ဆန်းကြယ် နယ်မြေအဖြစ်သို့ ပြောင်းလဲသွား၏။ နန်းတော်များနှင့် ပန်းပင်လယ်များက သူ၏ မျက်စိရှေ့တွင် ဖြစ်တည်လာတော့သည်။

သူ့ရှေ့ရှိ အရာအားလုံးကို ကြည့်ရင်း စုယွီက လှစ်ခနဲ ပြုံးမိသွားသည်။

“ပုံရိပ်ယောင် နယ်ပယ်...”

စုယွီ၏ စိတ်ထဲမှ အနည်းငယ် လှုပ်ရှားလိုက်မှုနှင့်အတူ ကျောက်စားပွဲ တစ်လုံးနှင့် ရေနွေးအိုးငယ် တစ်လုံးသည် သူ့ရှေ့တွင် ချက်ချင်း ဖြစ်တည်လာ၏။ စုယွီက လက်ဖက်ရည် ဖျော်ရန် ရေနွေးအိုးကို ကိုင်လိုက်သည်။ နှစ်ကြိမ်မျှ နှပ်ပြီးနောက် ပုံရိပ်ယောင် နယ်ပယ်အတွင်း၌ သူသည် ဝိညာဉ်လက်ဖက်ရည်ကို စတင် မြည်းစမ်းကြည့်လိုက်တော့၏။

တစ်ငုံ သောက်လိုက်ပြီးနောက် စုယွီ၏ မျက်နှာပေါ်တွင် အနည်းငယ် အံ့အားသင့်သွားသည့် အရိပ်အယောင်တစ်ခု ပေါ်လာ၏။

“ဘာလို့ အစစ်လို အရသာရှိနေတာလဲ...”

ဝိညာဉ်လက်ဖက်ရည်သည် သူ၏ ဝမ်းဗိုက်ထဲသို့ ဝင်သွားသောအခါ လက်ဖက်ရည်ထံမှ ပူနွေးသော ခံစားမှုနှင့် လျှံကျလာသော ဝိညာဉ်စွမ်းအားများထံမှ သက်သောင့်သက်သာ ခံစားမှုကို သူ တကယ်ပင် ခံစားလိုက်ရသည်။

ကိုယ့်ကိုယ်ကိုယ် လှည့်စားခြင်း... ။

ဤအဖြစ်က ပုံရိပ်ယောင်ကို အစစ်အမှန်အဖြစ် ပြောင်းလဲရာတွင် အနည်းငယ် လျှို့ဝှက်

ဆန်းကြယ်လှပေ၏။

ပုံရိပ်ယောင် နယ်ပယ်ကို သူ ရုပ်သိမ်းလိုက်သည်နှင့် အာရုံလှည့်စားမှု နှလုံးသား ကျောက်တုံး၏ အသံက ရုတ်တရက် ထွက်ပေါ်လာပြီး ဝမ်းသာအားရဖြင့် အော်ဟစ်လိုက်တော့သည်။

“အဲဒါ ပုံရိပ်ယောင် နယ်ပယ်လား... မင်းက ပုံရိပ်ယောင် မဟာလမ်းစဉ်ကိုပါ နားလည်သဘောပေါက်သွားတာလား...”

“မတော်တဆ နားလည်သွားတာပါ...”

စုယွီက ပေါ့ပေါ့ပါးပါး တုံ့ပြန်လိုက်ပြီး သူ၏ ပြောင်းလဲမှုများကို ဆက်လက် ခံစားကြည့်နေလိုက်၏။

“...”

အာရုံလှည့်စားမှု နှလုံးသား ကျောက်တုံးသည် ဤမျှလောက် မျက်နှာပြောင်တိုက်လွန်းသူကို ယခင်က တစ်ခါမျှ မတွေ့ဖူးခဲ့ချေ။

စုယွီသည် သူ၏ ပြောင်းလဲမှုများကို ထပ်မံ စူးစမ်းလိုက်ပြီး သူ၏ တန်ထျန်ကို ကြည့်လိုက်သောအခါ ချီ ကျင့်ကြံခြင်းမှာ အနည်းငယ်မျှ မတိုးလာသော်လည်း ချီမှာ အလားတူ နည်းလမ်းဖြင့် အသွင်ပြောင်းသွားကာ အရှိန်အဝါ၌ အံ့မခန်း ဆယ်ရာခိုင်နှုန်းခန့် တိုးလာပုံရသည်။

ဆိုလိုသည်မှာ သူ၏ ချီ ပမာဏ များစွာ မပြောင်းလဲသည့် အခြေအနေအောက်တွင် သူ၏ ချီ ကျင့်ကြံခြင်း အခြေခံသည် တစ်ဖန် ပြောင်းလဲသွားခဲ့ပြန်ပြီတည်း။

စုယွီကို အံ့အားအသင့်ဆုံး ဖြစ်စေသည့် အရာမှာ သူ၏ ဝိညာဉ်အမြစ်သည် ဝိညာဉ်အရည်၏ စွမ်းအား အများစုကို စုပ်ယူလိုက်ပြီး အရည်အသွေးပိုင်း အသွင်ပြောင်းလဲမှု တစ်ခုကို ထပ်မံ ဖြတ်သန်းခဲ့ရခြင်းပင်။

၎င်းသည် ဓာတ်ကြီး ငါးပါး အဆင့်မြင့် ဝိညာဉ်အမြစ်မှ ဓာတ်ကြီး ငါးပါး မြေကမ္ဘာအဆင့် ဝိညာဉ်အမြစ်သို့ တိတ်ဆိတ်စွာ အသွင်ပြောင်းသွားခဲ့ပြီ ဖြစ်၏။

ဝိညာဉ်အမြစ်၏ အသွင်ပြောင်းလဲမှုက စုယွီအား ၎င်းတို့ကြားရှိ သိသာထင်ရှားသော ကွာခြားချက်ကို ခံစားသိရှိစေခဲ့၏။

ဓာတ်ကြီး ငါးပါး အဆင့်မြင့် ဝိညာဉ်အမြစ်သည် ကောင်းကင်နှင့် မြေကြီး၏ သာမန် ကလေးငယ် တစ်ဦး ဖြစ်မည် ဆိုလျှင် ဓာတ်ကြီး ငါးပါး မြေကမ္ဘာအဆင့် ဝိညာဉ်အမြစ်သည်ကား ကောင်းကင်နှင့် မြေကြီး၏ အချစ်တော် ကလေးငယ် တစ်ဦး ဖြစ်ပေလိမ့်မည်တကား။