အခန်း ၃၁၈

အခန်း (၃၁၈) - ကာလရှည်ကြာ မေ့ပျောက်နေခဲ့သော မှတ်ဉာဏ်များ

ထိုကောင်လေးသည် အမွေဆက်ခံသူ တပည့်နှစ်ဦးနောက်မှ လိုက်ပါလာသော်လည်း သိပ်နောက်မကျလှပေ။ တောင်တန်းကြီး၏ အရွယ်အစားမှာ အဆင့် (၂) အင်ပါယာတစ်ခု၏ မြို့ကြီးတစ်မြို့စာခန့် ကျယ်ဝန်းပြီး အဆင့် (၄) အင်ပါယာ သို့မဟုတ် နိုင်ငံတစ်ခု၏ အကြီးဆုံးမြို့တော်အရွယ်အစားနှင့် ညီမျှလေသည်။

တောင်ခြေ၏ မျက်နှာပြင်အကျယ်အဝန်းမှာ ကြီးမားကျယ်ပြန့်ပြီး တောင်ထိပ်သို့ မြင့်တက်သွားလေလေ ကျဉ်းမြောင်းသွားလေလေ ဖြစ်၏။

ထို့ကြောင့် ပါဝင်ယှဉ်ပြိုင်သူများအနေဖြင့် စာမေးပွဲ၏ အစောပိုင်းအဆင့်များတွင် အချင်းချင်းဆုံတွေ့ရန် အခွင့်အလမ်း နည်းပါးလှသည်။ သို့သော် အစောပိုင်းအဆင့်များတွင်ပင် အချင်းချင်း မဆုံတွေ့နိုင်ဟု တပ်အပ်ပြော၍ မရနိုင်ချေ။

သို့ရာတွင် လတ်တလော၌ မည်သည့်ယှဉ်ပြိုင်သူမျှ အချင်းချင်း ဆုံတွေ့ခြင်း မရှိကြသေးပေ။

မှတ်တမ်းဖိုင်များအရ ထိုခုနစ်နှစ်အရွယ်ကောင်လေး၏ အမည်မှာ လျောင်ကျားရီဖြစ်ပြီး အဆင့် (၄) နိုင်ငံတစ်ခုမှ အငြိမ်းစား အဆင့်နိမ့်စစ်သည်တစ်ဦး၏ သားဖြစ်သည်။

သူ၏ရှေ့မှ အမွေဆက်ခံသူနှစ်ဦးမှာမူ အသက်အရွယ်နှင့် လိင်အမျိုးအစား တူညီကြလေသည်။ သူတို့နှစ်ဦးလုံးမှာ ချီသန့်စင်ခြင်းနယ်ပယ် အဆင့်လေးတွင်ရှိကြသော အသက်ဆယ့်သုံးနှစ်အရွယ် ယောက်ျားလေးများ ဖြစ်ကြ၏။

တစ်ဦးမှာ အသားညိုပြီး ကျန်တစ်ဦးမှာမူ ဗာဒံစေ့ညိုရောင် ဆံပင်ရှိသည်။ ယန်ချင်းသိထားသလောက် အသားညိုသူမှာ သားရဲထိန်းကျောင်းရာဌာနတွင် အလုပ်လုပ်သော ရုံးတော်ဝန်ထမ်းတစ်ဦး၏ သားဖြစ်ပြီး ဆံပင်အညိုရောင်ရှိသူ၏ မိဘတစ်ဦးမှာမူ လက်မှုပညာဌာနတွင် ပန်းပဲဆရာအဖြစ် အလုပ်လုပ်လေသည်။

ကျန်ရှိနေသေးသော အမွေဆက်ခံသူနှစ်ဦး၏ မိဘများမှာမူ ပြင်ပထောက်ပံ့ပို့ဆောင်ရေးရုံဟူသည့် ဌာနတစ်ခုတည်း၌ပင် အလုပ်လုပ်ကြခြင်းဖြစ်သည်။

ယန်ချင်းနှင့် ကျန်လူများအတွက် ယခုအချိန်အထိ မြင်တွေ့ခဲ့ရသော အမွေဆက်ခံသူများ၏ ထူးချွန်ပြောင်မြောက်သော စွမ်းဆောင်ရည်များမှာ အံ့သြစရာ မဟုတ်ပေ။ သို့သော် အခြားသော ယှဉ်ပြိုင်သူများမှာလည်း မဆိုးလှချေ။

ထိုခုနစ်နှစ်အရွယ် ကောင်လေးအပြင် သူတို့၏အနောက်တွင် အခြားထင်ရှားသူများလည်း ရှိနေသေး၏။

ကနဦးအဆင့်သာ ဖြစ်လင့်ကစား အပြာရောင်အဆင့် ကျင့်စဉ်တစ်ခုကို ကျွမ်းကျင်ပိုင်နိုင်ပုံရသည့် အမြွှာညီအစ်ကိုလည်း ရှိနေသေးရာ ၎င်းမှာ ကြီးမားသော အောင်မြင်မှုတစ်ခုပင် ဖြစ်သည်။

ထိုအပြာရောင်အဆင့်ကျင့်စဉ်က သူတို့ကို သဘာဝစွမ်းအင်ဂုဏ်သတ္တိများ ပေးစွမ်းထားလေသည်။ ခန္ဓာကိုယ်ထွားကျိုင်းသူမှာ ကြံ့ခိုင်သော ကာကွယ်ရေးစွမ်းရည်ရှိပြီး မြေစွမ်းအင်နှင့် လိုက်ဖက်ညီကာ ပညာတတ်ပုံပေါ်သူ၏ ခန္ဓာကိုယ်တစ်ဝိုက်တွင်မူ တောက်ပသော အပြာရောင်လျှပ်စီးများ လက်ဖြာနေ၏။

သူတို့၏ ပူးပေါင်းဆောင်ရွက်မှုမှာ အလွန်ချောမွေ့ပြီး တစ်ဦးနှင့်တစ်ဦး ပြီးပြည့်စုံစွာ ဖြည့်ဆည်းပေးနိုင်ကြလေသည်။

သူတို့အပြင် အထူးယှဉ်ပြိုင်သူများထဲတွင် ပုံမှန်မဟုတ်ဘဲ ကြီးမားလွန်းသော ဝိညာဉ်ကြောင့် စိတ်နယ်ပယ်ကို ဖွင့်လှစ်နိုင်ခဲ့သည့် ဆယ့်လေးနှစ်အရွယ် မိန်းကလေးတစ်ဦးလည်း ရှိနေသည်။

သူမသည် မိမိပတ်လည် ငါးမီတာအချင်းဝက်ကို လွှမ်းခြုံနိုင်သော ဝိညာဉ်အာရုံကို အသုံးပြုနိုင်နေပြီ ဖြစ်၏။ သို့ရာတွင် သူမ၏ ဝိညာဉ်မှာ ခန္ဓာကိုယ်မှ ခံနိုင်ရည်မရှိလောက်သည်အထိ အားကောင်းလွန်းနေပြီး သူမ၏အာရုံများက ထောက်လှမ်းသိရှိသည့်အရာများကို တုံ့ပြန်ရန် ရုန်းကန်နေရလေသည်။

ထို့အပြင် အလွန်အားကောင်းသော ဝိညာဉ်ကြောင့် ခန္ဓာကိုယ်မှာ ဟန်ချက်မညီဖြစ်နေသည်။ သူမ၏ ကျင့်ကြံခြင်းအခြေခံမှာ ချီသန့်စင်ခြင်းနယ်ပယ် အဆင့်သုံးတွင်သာ ရှိသော်လည်း ယန်ချင်း၏ ခန့်မှန်းချက်အရ သူမ၏ဝိညာဉ်မှာ အမြုတေဖွဲ့စည်းခြင်းနယ်ပယ်သို့ အသစ်တဖန် ချိုးဖြတ်ဝင်ရောက်ထားသည့် ကျွမ်းကျင်သူတစ်ဦး၏ စွမ်းအားနှင့် ညီမျှနေပေသည်။

'သူမသာ အထူးနယ်မြေတစ်ခုကို ရှာတွေ့ပြီး ဆောင်းဦးသစ်ရွက် ခြေလှမ်းတစ်ရာ့ရှစ်လှမ်းကို စတင်ကျင့်ကြံနိုင်မယ်ဆိုရင် ခန္ဓာကိုယ်က ဖိအားတချို့ သက်သာသွားမှာပဲ'

ယန်ချင်း တွေးလိုက်၏။

ထိုကျင့်စဉ်မှာ ပြည့်စုံလွှမ်းခြုံမှုရှိပြီး ခန္ဓာကိုယ်နှင့် ဝိညာဉ်အားဖြည့်နည်းစနစ်များ ပါဝင်သည့် ကျင့်ကြံခြင်းဆိုင်ရာ အဓိကကဏ္ဍအားလုံး၏ အခြေခံများကို ထည့်သွင်းပေးထားသည်။

ထို့အပြင် ယန်ချင်း၏ အပိုဆောင်းမှတ်စုများနှင့်အတူ ထိုနှစ်ခုကြား ဟန်ချက်ညီစေရန် ကြိုးပမ်းနိုင်မည့် နည်းလမ်းများကိုပါ ထည့်သွင်းပေးထားလေသည်။

ထိုကျင့်စဉ်ကို သူ၏ ယင်ယန်ကျောက်စိမ်းအရိုးခန္ဓာကိုယ်၏ အကျိုးသက်ရောက်မှုများထဲမှ တစ်ခုဖြစ်သော အတွေ့အကြုံများအပေါ် အခြေခံ၍ ဝိညာဉ်နှင့် ခန္ဓာကိုယ်ကို တူညီသော စွမ်းအားအဆင့်တွင် ရှိနေစေရန် တည်ဆောက်ထားခြင်း ဖြစ်၏။

အားကောင်းသော ဝိညာဉ်ပိုင်ရှင်မိန်းကလေးအနေဖြင့် ခန္ဓာကိုယ်ကို အားဖြည့်ရန် အချိန် လုံလုံလောက်လောက်ရရှိပြီး မိမိကိုယ်ကို ဖိအားမပေးဘဲ ဝိညာဉ်ကို မည်သို့မှန်ကန်စွာ အသုံးပြုရမည်ကို သိမြင်နားလည်သွားပါက သူမသည် တောင်ထိပ်သို့ ပထမဆုံးရောက်ရှိမည့်သူများထဲတွင် အဓိကပြိုင်ဘက်တစ်ဦး ဖြစ်လာပေလိမ့်မည်။

အားသာချက်များအရ ယန်ချင်း သတိထားမိခဲ့သော လက်ရှိယှဉ်ပြိုင်သူများကြားရှိ ခန္ဓာကိုယ်အမျိုးအစားအားလုံးနှင့် ယှဉ်လျှင်ပင် ဝိညာဉ်အာရုံက အကြီးမားဆုံး အားသာချက် ဖြစ်နေလေသည်။

ဝိညာဉ်အာရုံဆိုသည်မှာ အမြုတေဖွဲ့စည်းခြင်းနယ်ပယ်ရှိသူများသာ ပိုင်ဆိုင်နိုင်သည့် အားသာချက်တစ်ခု ဖြစ်သည်။

သူမ၏ အာရုံခံနိုင်စွမ်းမှာ ငါးမီတာသာရှိပြီး ယင်းမှာ အမြုတေဖွဲ့စည်းခြင်းနယ်ပယ် ပထမအဆင့် ကျွမ်းကျင်သူတစ်ဦးရရှိမည့် အတိုင်းအတာထက် နိမ့်ကျနေသော်လည်း ထိုငါးမီတာအတွင်း၌မူ အစစ်အမှန် ဝိညာဉ်အာရုံ၏ အကျိုးကျေးဇူးများကို ခံစားနိုင်သေး၏။

ယင်းမှာ အသုံးပြုသူထံသို့ အရာရာ၏တည်ရှိမှုကို ချဲ့ကားပြသခြင်းဖြင့် အားလုံးကို ဖမ်းယူနိုင်စွမ်းရှိသော ဘက်စုံအာရုံခံစွမ်းရည်ပင် ဖြစ်သည်။

မျက်စိ သို့မဟုတ် နားများမှ လွတ်ကင်းသွားနိုင်သည့် အရာများကိုပင် ဝိညာဉ်အာရုံက အလွယ်တကူ ဖမ်းယူနိုင်စွမ်းရှိလေသည်။

မရင်းနှီးသော နေရာတစ်ခုသို့ ဝင်ရောက်လာချိန်တွင် ကျင့်ကြံသူတစ်ဦး၏ ဝိညာဉ်အာရုံမှာ ၎င်းတို့၏ အသက်သွေးကြောများထဲမှ တစ်ခုဖြစ်သည်။

အဆုံးသတ်တွင် အခြေအနေများ မည်သို့ဖြစ်လာမည်ကို မြင်တွေ့ရန် ယန်ချင်း စိတ်အားထက်သန်နေမိသည်။

ထို့နောက် သူ၏အကြည့်က အခြားသော ယှဉ်ပြိုင်သူများထံ ရောက်ရှိသွား၏။ သူမြင်တွေ့နေရသော ပါရမီအဆင့်အတန်းများကြောင့် သက်ပြင်းမချဘဲ မနေနိုင်တော့ချေ။

သူတို့ကြားတွင် အလားအလာရှိသော အဂ္ဂိရတ်ပညာရှင်တစ်ဦးနှင့် ပန်းပဲဆရာတစ်ဦးတို့ပင် ရှိနေပြီဖြစ်သည်။

ထိုနှစ်ဦးမှာ အထူးနယ်မြေတစ်ခုသို့ ရောက်ရှိနေပြီဖြစ်ပြီး အထူးနယ်မြေအတွင်းမှနေ၍ သူတို့၏ အခွင့်အရေးကို တိုးမြှင့်ရန် ကိုယ်ပိုင်အားသာချက်အသီးသီးကို အသုံးပြုကာ ကြိုးစားပမ်းစား လုပ်ဆောင်နေကြလေသည်။

"မကြာသေးခင်က ဖြစ်ပျက်ခဲ့တဲ့ ကိစ္စတွေ ရှိနေပေမဲ့ ရုံးတော်က လူထုအပေါ် လွှမ်းမိုးထားနိုင်နေတုန်းပဲထင်တယ်"

အဆင့် ၃ နှင့်အထက်ရှိသော မည်သည့်အဆင့်မြင့် အဖွဲ့အစည်းများတွင်မဆို ထိပ်တန်းတပည့်များအဖြစ် သတ်မှတ်ခံရနိုင်သည့် ပါရမီရှိသော ယှဉ်ပြိုင်သူ ငါးဆယ်ကျော်ကို ရေတွက်ကြည့်ရင်း ယန်ချင်း သက်ပြင်းမချဘဲ မနေနိုင်တော့ချေ။

ထို့နောက် ယန်ချင်း၏အကြည့်က လိုင်ရို့ထံသို့ ရောက်ရှိသွားလေသည်။ အလွန်အမင်း ထိတ်လန့်နေသည့်တိုင် ပထမဆုံး မေးခွန်းမေးရဲသော သတ္တိကြောင့် ထိုအရပ်ရှည်ရှည် လူငယ်လေးအပေါ် သူ အကောင်းမြင်မိ၏။

ယန်ချင်းသည် သူ၏ ဇွဲလုံ့လကို သဘောကျမိပြီး ပါရမီအရ ထူးထူးခြားခြား ထင်ပေါ်နေသည့်အရာမျိုး မမြင်တွေ့ရသေးလျှင်ပင် အိပ်မက်ကမ္ဘာရေတံခွန်ကို ဖြတ်သန်းနိုင်ခဲ့သည့်အတွက် လိုင်ရို စွမ်းဆောင်နိုင်ခဲ့ပြီဟု ယူဆမိဆဲဖြစ်သည်။

ယှဉ်ပြိုင်သူများ၏ သုံးပုံတစ်ပုံခန့်မှာ ရေတံခွန်ကြောင့် ပြုတ်ကျသွားခဲ့ပြီး ဖြတ်သန်းသွားနိုင်သူများထဲမှ အချို့မှာလည်း အမြင့်ကြီးသို့ မတက်နိုင်မီမှာပင် ကျဆုံးသွားခဲ့ကြပြီ ဖြစ်သည်။

လိုင်ရိုသည် အားအနည်းဆုံး ကျင့်ကြံခြင်းအခြေခံများထဲမှ တစ်ခုကို ပိုင်ဆိုင်ထားသော်လည်း တောင့်ခံထားနိုင်ဆဲဖြစ်သည်။

သူသည် ခန္ဓာသန့်စင်ခြင်းနယ်ပယ် သံမဏိအဆင့်တွင်သာ ရှိနေသည်ကို ထောက်ရှုပါက ကျိုးမောင်နှမထက်ပင် အားနည်းနေသေး၏။

သူ၏ချဉ်းကပ်ပုံမှာ အလွန်သတိကြီးလှပြီး ပုံမှန်မဟုတ်သော လမ်းကြောင်းများကို အသုံးပြုနေသည်။

သူ၏ ပိန်ပိန်ပါးပါး ခန္ဓာကိုယ်ကို အသုံးပြုကာ ထူထပ်သော သစ်သီးဝလံပင်များပေါ်သို့ တက်ရောက်ခြင်း၊ အမြင်အာရုံမှ ကင်းလွတ်စေရန် သစ်ပင်တစ်ပင်မှ တစ်ပင်သို့ ဖြည်းညင်းစွာ ရွေ့လျားခြင်းတို့ပင် ဖြစ်၏။

သူ၏ တိုးတက်မှုမှာ နှေးကွေးသော်လည်း ရှေ့သို့ ဆက်လက်ရွေ့လျားနိုင်နေဆဲပင်။

'အင်း...'

လိုင်ရိုအား အနီးကပ် စောင့်ကြည့်နေရင်း ယန်ချင်း၏ မျက်ခုံးတန်းများ တွန့်ချိုးသွားလေသည်။

"မင်းတို့ကောင်တွေ... ဟိုကောင်လေးလိုင်ရိုနဲ့ ပတ်သက်ပြီး ဘယ်လိုထင်လဲ"

ယန်ချင်းက လိုင်ရို့ထံမှ အကြည့်မခွာဘဲ မေးလိုက်၏။

"ဒီလိုခန္ဓာကိုယ်မျိုးနဲ့ အသက် ၁၃ နှစ်ပဲ ရှိသေးတယ်ဆိုတာ ငါ မယုံနိုင်ဘူး။ သူသာ နည်းနည်းပါးပါး အသားပြည့်ရင် ကြောက်စရာကောင်းနေမှာပဲ"

ခန်းဟွေ့လန်က နှမ်းစေ့အချို့နှင့် ဝိုင်တို့ကို ပါးစပ်ထဲသို့ ပစ်ထည့်ရင်း ပေါ့ပေါ့ပါးပါးပင် ဆိုလိုက်သည်။

'သူက ဒီကို စားဖို့လာတာလား'

ယန်ချင်း တွေးလိုက်မိသည်။ စာမေးပွဲအတွက်၊ အထူးသဖြင့် စာမေးပွဲ၏ နောက်ဆုံးအထူးအပိုင်းအတွက် ကျင့်စဉ်နှင့်ပတ်သက်၍ ဟွေ့လန်၏ အကူအညီက အရေးပါသောကြောင့် ထိုအတွေးများကို သူ့စိတ်ထဲတွင်သာ သိမ်းဆည်းထားလိုက်၏။

ထို့ကြောင့် ဤတစ်ကြိမ်တွင် ယန်ချင်းက သူ့အား လွှတ်ပေးထားရန် ဆုံးဖြတ်လိုက်ပြီး စကားဆိုလိုက်သည်။

"ငါ ပြောနေတာက သူ့ရဲ့ လှုပ်ရှားမှုနဲ့ ဟန်ချက်ညီမှုအကြောင်းပါ"

"အရပ်ရှည်ရှည် ခန္ဓာကိုယ်နဲ့စာရင် သူက အရမ်းသွက်လက်တယ်။ လေကိုသုံးပြီး သူ့ကိုယ်သူ ရှေ့ကိုတွန်းပို့နေသလိုပဲ။ ပြီးတော့ သစ်ပင်တွေကြားက အမှောင်ထုကလည်း သူ့အတွက် နည်းနည်းလေးတောင် သက်ရောက်မှုရှိပုံ မပေါ်ဘူး"

ရှားပေါ်ချင်းက ပြောလိုက်သည်။

"သူက ခန္ဓာကိုယ်ရဲ့ အစိတ်အပိုင်းတိုင်းကို သေချာထိန်းချုပ်ထားနိုင်ပုံပဲ။ ဘယ်လှုပ်ရှားမှုကိုမှ အလဟဿ မဖြစ်စေဘူး။ သူ့ရဲ့ ပခုံးလှုပ်ရှားမှုတွေက အရမ်းချောမွေ့တယ်။ သူ့ရဲ့ ပခုံးဆစ်ကြွက်သားတွေမှာ ရပ်တန့်သွားတာမျိုး မရှိသလိုပဲ။ သူ့ပခုံးတွေကို အဆစ်ဖြုတ်ထားတယ်လို့တောင် ထင်ရတယ်”

“ငါကတော့ သူ ဘယ်လိုကိစ္စမျိုးတွေ ကြုံတွေ့ခဲ့ရလို့ ဒီလိုအစွန်းရောက်တဲ့ နည်းလမ်းတွေ သုံးတာလဲဆိုတာကို သိချင်မိတယ်"

တိုင်ချန်က ဝင်ပြောလိုက်၏။

"ငါ ခန့်မှန်းရသလောက် သူက သတ္တုတွင်းတစ်ခုမှာ အလုပ်လုပ်ခဲ့တာပဲ။ ဒီလိုခန္ဓာကိုယ်မျိုးနဲ့ အဲဒီလိုကျဉ်းမြောင်းတဲ့ တွင်းပေါက်လေးတွေထဲမှာ ဝင်ထွက်သွားလာနိုင်ဖို့ သူ နည်းလမ်းရှာခဲ့ရမှာပေါ့"

ခန်းဟွေ့လန်က ဆိုလိုက်သည်။

သူသည် ယခင်ကကဲ့သို့ ပေါ့ပေါ့ပါးပါး မရှိတော့ဘဲ ရှားပါးလှသော တည်ကြည်လေးနက်သည့် အမူအရာမျိုး ဖြစ်ပေါ်နေ၏။

"သူ့ရဲ့လှုပ်ရှားမှုတွေက ပေါက်ပြားလွှဲခုတ်နေတဲ့သူနဲ့ တူတယ်။ ပြီးတော့ အဲဒီသတ္တုတွင်းတွေက တစ်ခါတလေ ဘယ်လောက်တောင် မှောင်မိုက်သလဲဆိုရင် သစ်ပင်တွေကြားက အမှောင်ထုနည်းနည်းလောက်ကို ကိုင်တွယ်ဖြေရှင်းရတာက သူ့အတွက် ပြဿနာမဟုတ်လောက်ဘူး”

“ငါထင်တာတော့ သူ့မှာ ဓား ဒါမှမဟုတ် ဓားကောက်အတွက် ပါရမီရှိနိုင်တယ်။ သူ့ရဲ့ လှုပ်ရှားမှုစွမ်းရည်တွေ၊ လက်ကောက်ဝတ်နဲ့ ပခုံးရဲ့ ပျော့ပျောင်းမှုတွေ၊ ပြီးတော့ သူ လက်လှမ်းမီနိုင်တဲ့ အနေအထားတွေနဲ့ ပေါင်းစပ်လိုက်ရင် ကြောက်စရာကောင်းတဲ့ ဓား ဒါမှမဟုတ် ဓားကောက်ကျွမ်းကျင်သူတစ်ယောက် ဖြစ်လာမယ်လို့ ထင်တယ်"

ခန်းဟွေ့လန်က ထပ်လောင်းပြောဆိုလိုက်၏။

သူ၏ အာရုံစိုက်မှုတစ်ခုလုံးမှာ လိုင်ရို့ထံသို့ လုံးလုံးလျားလျား ရောက်ရှိသွားပေသည်။

ခန်းဟွေ့လန်၏ အမူအရာကို မြင်လိုက်ရချိန်တွင် အခြားသူများလည်း သက်ပြင်းချလိုက်မိကြသည်။

ရုံးတော်သို့ မဝင်ရောက်မီက ခန်းဟွေ့လန်သည် ကာလရှည်ကြာ မေ့ပျောက်ခံထားရသော ဂိုဏ်းတစ်ခု၏ ဝိညာဉ်ကျောက်မျက်သတ္တုတွင်းများတွင် အလုပ်လုပ်ခဲ့ရသည့် ကျွန်တစ်ဦး ဖြစ်ခဲ့ဖူး၏။

ထိုသတ္တုတွင်းများမှာ သေမင်းထောင်ချောက်များပင် ဖြစ်သည်။ ဂိုဏ်းမှ သတ်မှတ်ထားသော ပမာဏပြည့်မီစေရန် ခြိမ်းခြောက်မှုများအပြင် သတ္တုတွင်းများထဲ၌ ရက်စက်ကြမ်းကြုတ်သော ဝိညာဉ်သားရဲများဖြင့်လည်း ပြည့်နှက်နေပေသည်။

ဂိုဏ်းသည် သူတို့အား သတ္တုတွင်းတူးသမားများအဖြစ်သာမက သတ္တုတွင်းအတွင်းရှိ မမြင်ရသော အန္တရာယ်များကို ထောက်လှမ်းရန် အသေခံတပ်သားများအဖြစ်ပါ အသုံးပြုခဲ့သည်။

ခန်းဟွေ့လန်သည် ထိုသတ္တုတွင်းထဲ၌ သူ၏ ပြိုင်ဘက်ကင်း ကျောက်စိမ်းခန္ဓာကိုယ်ကို ဖွင့်လှစ်နိုင်ခဲ့ပြီး ဝိညာဉ်သားရဲလှိုင်း လာရောက်ချိန်တွင် လွတ်မြောက်ရန် ပြီးပြည့်စုံသော အခွင့်အရေးကို ဖန်တီးပေးခဲ့သောကြောင့်သာ ထိုနေရာမှ အသက်ရှင်လျက် လွတ်မြောက်လာနိုင်ခဲ့ခြင်း ဖြစ်သည်။

လိုင်ရို၏ပုံစံက သူ၏ ကာလရှည်ကြာ မေ့ပျောက်နေခဲ့သော မှတ်ဉာဏ်များကို ပြန်လည်တူးဆွပေးလိုက်ခြင်းလည်း ဖြစ်နိုင်ပေသည်။