ရွှေနဂါးဘုရင်နှင့် ပြန်လည်ဆုံတွေ့ခြင်း

"ဆန်းကျိက ဘာဖြစ်လို့ ဒီကိုရောက်နေတာလဲ"

ယခင် မိစ္ဆာတစ်သောင်း ညီလာခံတွင် တတိယနေရာကို ရရှိခဲ့သူဖြစ်သည့်အတွက် မိုးပြာနဂါးအိုကြီးမှာ အတော်လေး လူသိများထင်ရှားသူဖြစ်ပေသည်။ သူပေါ်လာသည်နှင့်တစ်ပြိုင်နက် ချက်ချင်းမှတ်မိသွားကြ၏။

"မိုးပြာနဂါးမျိုးနွယ်စုက မိစ္ဆာလောကကနေ နှင်ထုတ်ခံလိုက်ရတာ မဟုတ်ဘူးလား"

"သူတို့ အင်မော်တယ်လောကရဲ့ သံတမန်တစ်ယောက်ကို သတ်ပစ်လိုက်တယ်လို့ ငါကြားထားတယ်"

"အဲဒါတင်မကဘူး... သူတို့က ချီလင်မျိုးနွယ်စုကိုတောင် လုယက်ခဲ့ကြသေးတာ"

"ဟီးဟီး... အဲဒါက တကယ်ကို သတ္တိရှိလွန်းတာပဲ"

မိစ္ဆာနန်းတော်တစ်သောင်းကို လက်ရှိတွင် ချီလင်မျိုးနွယ်စုက ထိန်းချုပ်ထားပြီး မိစ္ဆာမျိုးနွယ်စုဝင် အများအပြားမှာ ၎င်းတို့နှင့် ပတ်သက်ဆက်နွှယ်နေကြသော်ငြားလည်း မိစ္ဆာမျိုးနွယ်စုဝင်များစွာတို့သည် မိုးပြာနဂါးမျိုးနွယ်စု၏ လုပ်ရပ်များကို တိတ်တဆိတ် သဘောကျနေခဲ့ကြသည်။ သူတို့သည် အင်မော်တယ်လောကအပေါ် နက်ရှိုင်းသော အမုန်းတရားများရှိနေကြရာ အင်မော်တယ်မဟာမိတ်အဖွဲ့၏သံတမန်ကို သတ်ဖြတ်လိုက်ခြင်းက သူတို့ကို အမှန်တကယ် စိတ်ကျေနပ်မှုရရှိစေ၏။ ၎င်းကို လူသိရှင်ကြား ထုတ်ဖော်မပြောရဲကြခြင်းသာ။

ထိုအရာနှင့် နှိုင်းယှဉ်ပါက သူတို့သည် ကျန်းချန်ကို ပိုမို၍ စူးစမ်းလိုစိတ် ဖြစ်ပေါ်နေကြသည်။

"ဒါက မိုးပြာနဂါးမျိုးနွယ်စုရဲ့ မဟာဧကရာဇ်အသစ်လား"

"သူက ဧကရာဇ်တစ်ပိုင်း အစောပိုင်းအဆင့်ပဲ ရှိသေးတာကို... ဘာလာလုပ်တာလဲ"

"သူက မိစ္ဆာတစ်သောင်း ညီလာခံကို ပါဝင်ယှဉ်ပြိုင်ဖို့ ရည်ရွယ်နေတာတော့ မဟုတ်ပါဘူးနော်"

"ဧကရာဇ်တစ်ပိုင်း အစောပိုင်းအဆင့်ကတော့ အဆင့်နိမ့်လွန်းပါတယ်"

"မျိုးနွယ်စုတစ်ခုရဲ့ မဟာဧကရာဇ်က ပြင်းပြင်းထန်ထန် အရိုက်ခံလိုက်ရရင်... တစ်မျိုးနွယ်စုလုံး မျက်နှာပျက်ရလိမ့်မယ်... အထူးသဖြင့် မိုးပြာနဂါးမျိုးနွယ်စုက ရှေးဟောင်းဧကရာဇ်မျိုးနွယ်စု ဖြစ်နေလို့ပဲ"

"ဟားဟားဟား... စိတ်ဝင်စားဖို့ကောင်းတဲ့ပွဲ ကြည့်ရတော့မယ်ထင်တယ်"

ရှုပ်ထွေးဆူညံနေသော ဆွေးနွေးပြောဆိုမှုများအကြားတွင် နဂါးမျိုးနွယ်စုဝင်တစ်စုက သူတို့ကိုကြိုဆိုရန် ထွက်လာကြသည်။ အဖွဲ့ကိုဦးဆောင်လာသူမှာ နဂါးပြာမဟာဧကရာဇ်ဖြစ်၏။ သူ့နောက်ကွယ်တွင်မူ နဂါးပြာမျိုးနွယ်စု၏ ဧကရာဇ်တစ်ပိုင်း နှောင်းပိုင်းအဆင့်ဖြစ်ပြီး ယခုပွဲအတွက် နဂါးပြာမျိုးနွယ်စု၏ ပါဝင်ယှဉ်ပြိုင်သူလည်း ဖြစ်သည့် ရွှမ်ဟိုင်ပါလာသည်။ ၎င်းအပြင် ရွှေနဂါးမျိုးနွယ်စု၏ ဝါရင့်ဧကရာဇ်တစ်ပိုင်း အောက်ချန်ကလည်း အောက်ယန်ကိုခေါ်ဆောင်၍ ရောက်ရှိလာ၏။

"ဆန်းကျိ... ဆန်းချန်... မင်းတို့နှစ်ယောက်က ဒီမှာဘာလုပ်နေကြတာလဲ"

နဂါးပြာမဟာဧကရာဇ်၏ မျက်နှာမှာ တွေ့ဆုံလိုက်သည်နှင့်တစ်ပြိုင်နက် မည်းမှောင်သွားသည်။

"ဒါက မိစ္ဆာတစ်သောင်း ညီလာခံပဲ... ချီလင်မျိုးနွယ်စုက မင်းတို့ကို ပြဿနာရှာဖို့ ချောင်းနေကြတာ... အရှုပ်အထုပ်တွေ လျှောက်မလုပ်နဲ့"

ဆန်းကျိက တဟီးဟီး ရယ်မောလိုက်၏။

"ငါတို့က လျှောက်လုပ်ဖို့လာတာမဟုတ်ဘူး... ငါတို့မျိုးနွယ်စုရဲ့ မဟာဧကရာဇ်က မိစ္ဆာတစ်သောင်း ညီလာခံ ပြိုင်ပွဲမှာ ပါဝင်ယှဉ်ပြိုင်ဖို့ လာခဲ့တာလေ"

"မင်း ဘာပြောလိုက်တယ်"

နဂါးပြာမဟာဧကရာဇ် မျက်လုံးပြူးသွားသည်။

"သူက ပါဝင်ယှဉ်ပြိုင်မှာ ဟုတ်လား..."

"ဆန်းကျိ... မင်းတို့ မိုးပြာနဂါးချိုင့်ဝှမ်းက ရူးသွားတာလား... ဒါမှမဟုတ် ငါကပဲ ရူးသွားတာလား..."

"ပုံစံကိုးမျိုးသွေးမျိုးဆက်နဲ့ ကမ္ဘာဦးနဂါးအရိုးက အမှန်တကယ် ဆန်းကြယ်လှတာ မှန်ပေမယ့်... ဒီတစ်ကြိမ် ပါဝင်ယှဉ်ပြိုင်သူတွေထဲမှာ ဘယ်သူကများ နောက်ခံမရှိလို့လဲ"

သူက ခေါင်းကို တရစပ်ခါယမ်းလိုက်တော့သည်။

"သူက ဒီသွေးမျိုးဆက်နဲ့ နဂါးအရိုးကိုတင်အားကိုးပြီး ကျင့်ကြံခြင်းအဆင့်နှစ်ဆင့်ကိုကျော်ပြီး ဧကရာဇ်တစ်ပိုင်း နှောင်းပိုင်းအဆင့်တွေနဲ့ ယှဉ်ပြိုင်နိုင်လိမ့်မယ်လို့ တကယ်ကြီးမျှော်လင့်နေတာလား"

ကျန်းချန်က ခပ်ဖွဖွပြုံးလိုက်၏။

"အဲ့လိုမရဘူးလို့ စည်းကမ်းသတ်မှတ်ထားလို့လား"

"ဒါပေါ့... မရဘူး"

ရွှမ်မင်က ဒေါသတကြီးဖြင့် ပြောဆိုလိုက်သည်။

"မဟာနဂါးချိုင့်ဝှမ်းသုံးခုရဲ့ နဂါးဧကရာဇ်တွေက ဘယ်လောက်အထိမြင့်မားတဲ့ အဆင့်အတန်းမျိုးရှိလဲ... မင်းက ဒီမှာ ပြင်းပြင်းထန်ထန် အရိုက်ခံလိုက်ရရင်... မိုးပြာနဂါးမဟာဧကရာဇ်ဖြစ်တဲ့ ငါလည်း လုံးဝအရှက်ကွဲရလိမ့်မယ်"

"အကယ်၍ ယီခုန်းနဲ့ မော့ယန်တို့ကို စေလွှတ်လိုက်တာဆိုရင်... ငါ ဘာမှပြောမှာမဟုတ်ဘူး"

"ဒါပေမဲ့ မင်းကတော့... လုံးဝမဖြစ်နိုင်ဘူး"

"ချက်ချင်းပြန်တော့"

သူ၏ မျက်လုံးထဲတွင်မူ နဂါးဧကရာဇ်တစ်ပါး၏ ရှုံးနိမ့်မှုက နဂါးမျိုးနွယ်စုတစ်ခုလုံးအပေါ် အရှက်ရစေလိမ့်မည်။

ကျန်းချန်လည်း ဆွံ့အသွား၏။

“စောက်ရူး... မင်းက အပိုတွေလုပ်နေတာပဲ... မင်းကိုယ်မင်း တစ်နဂါးမျိုးနွယ်စုလုံးရဲ့ အဖေလို့ တကယ်ကြီးထင်နေတာလား...”

"ရွှမ်မင်... မင်း ဒီကိစ္စကို ဝင်စွက်ဖက်လို့မရဘူး"

တစ်လမ်းလုံး နှုတ်ဆိတ်နေခဲ့သည့် မိုးပြာနဂါးဧကရီက တိုက်ရိုက်တုံ့ပြန်ပြောဆိုလိုက်သည်။

"ငါက သူလုပ်နိုင်တယ်လို့ပြောရင် သူလုပ်နိုင်ရမယ်... အရှက်ကွဲရမယ်ဆိုရင်တောင်မှ... အဲဒါက ငါ့ရဲ့ အရှက်ကွဲမှုပဲ ဖြစ်လိမ့်မယ်"

သူမသည် ဝိညာဉ်အကြွင်းအကျန်မျှသာ ဖြစ်သော်လည်း မိုးပြာနဂါးမဟာဧကရာဇ်နှင့် အဆင့်အတန်းတန်းတူရှိနေသူဖြစ်၏။ သူမပေါ်လာသည်နှင့်တစ်ပြိုင်နက် ရွှမ်မင်သည် သူ့အဆင့်အတန်းကို အသုံးပြု၍ သူမကို ဖိနှိပ်နိုင်ခြင်းမရှိတော့ချေ။

သူက အေးစက်စက်သာ ပြောနိုင်တော့သည်။

"ဆန်းလင်... အကယ်၍ မင်း စိတ်ကူးယဉ်တတ်တဲ့ ဒီအကျင့်ကိုမပြင်ဘူးဆိုရင်... မိုးပြာနဂါးမျိုးနွယ်စုက လက်ရှိအခြေအနေအထိ ကျဆင်းသွားမှာမဟုတ်ဘူး"

ဆန်းလင်က ခပ်ဖွဖွရယ်မောလိုက်၏။

"ဘယ်သူက မှန်ပြီး ဘယ်သူက မှားလဲဆိုတာကတော့... ပြောဖို့ စောလွန်းပါသေးတယ်..."

ကြီးကျယ်သော ပုဂ္ဂိုလ်ကြီးနှစ်ဦး အငြင်းပွားနေကြစဉ်အတွင်း ရွှေနဂါးဘုရင် အောက်ယန်ကလည်း ကျန်းချန်ကို စူးစမ်းလိုစိတ်ဖြင့် စောင့်ကြည့်နေခဲ့သည်။ မိုးပြာနဂါးပုံသဏ္ဌာန် ဖြစ်နေသောကြောင့် သူ့ကို ဂိုဏ်းချုပ်ကျန်းအဖြစ် မှတ်မိခြင်းမရှိချေ။ သို့သော်လည်း ဤအကြိမ် ကန့်သတ်ချက်မဲ့ကျင့်ကြံခြင်းမှ ထွက်လာပြီးနောက်တွင်မူ သူသည် ဆန်းချန်၏ နာမည်ကျော်ကြားမှုကို ကြားသိခဲ့ရသည်။

ပုံစံကိုးမျိုးမိုးပြာနဂါး သွေးမျိုးဆက်မှာလည်း အောက်လောကမှလာခဲ့ခြင်းဖြစ်ကြောင်း ပြောဆိုနေကြပြီး ရောက်ရှိလာသည်နှင့်တစ်ပြိုင်နက် ကြီးမားသောလုပ်ရပ်အများအပြားကို လုပ်ဆောင်ခဲ့သေးသည်။

"အစ်ကိုကြီး... မင်း ကျင့်ကြံခြင်းကနေ ထွက်လာပြီလား"

သိုးအိုကြီးရှမ်းကန်းက သူ့ထံသို့ လျှို့ဝှက်အသံလွှင့်ချက်တစ်ခု ပေးပို့လိုက်၏။ သူတို့နှစ်ဦးစလုံးမှာ ကောင်းကင်မိစ္ဆာနယ်မြေမှ လာခဲ့ကြခြင်းဖြစ်သည်။ သူတို့သည် မတူညီသော မျိုးနွယ်စုများမှ ဖြစ်ကြသော်လည်း မိတ်ဆွေဟောင်းကြီးများ ပြန်လည်ဆုံတွေ့ရသကဲ့သို့ ခံစားချက်မျိုးရှိကြ၏။

နှစ်ပေါင်းများစွာ ကွဲကွာနေခဲ့ပြီးနောက် အောက်ယန်ကလည်း စိတ်လှုပ်ရှားမှုကို ခံစားလိုက်ရသည်။

"မင်းကလည်း အခု ဧကရာဇ်တစ်ပိုင်း အလယ်အဆင့်ကိုရောက်နေပြီပဲ... မဆိုးဘူး"

"ဟားဟား... ဟုတ်တယ်... မင်းက ဒီတစ်ကြိမ် ရွှေနဂါးမျိုးနွယ်စုအတွက် ဝင်ရောက်ယှဉ်ပြိုင်မယ့်သူလား"

"ဟုတ်တယ်"

"အစ်ကိုကြီး၊ မင်းက ဧကရာဇ်တစ်ပိုင်း နှောင်းပိုင်းအဆင့်ကို ရောက်နေပြီဆိုတော့... ဒီတစ်ကြိမ်မှာ ကြီးမားတဲ့ အလားအလာရှိနေတာပေါ့။ မင်းရဲ့ လက်သည်းရှစ်ခု ရွှေနဂါးသွေးမျိုးဆက်နဲ့ဆိုရင် ထိပ်ဆုံးရှစ်ယောက်နေရာကတော့ သေချာပေါက်ပဲ"

"ပြောဖို့ ခက်ပါတယ်... မိစ္ဆာလောကက အားကောင်းတဲ့သူတွေနဲ့ ပြည့်နှက်နေတာ... အရင်တုန်းက ကောင်းကင်မိစ္ဆာနယ်မြေနဲ့ မတူဘူး"

အောက်ယန်က ခေါင်းခါယမ်းလိုက်၏။ သူသည် အခြေအနေမှန်ကို အမြဲတမ်း သိရှိနားလည်ထားသူ ဖြစ်သည်။

"အထူးသဖြင့် ချီလင်မျိုးနွယ်စုက ထူးခြားဆန်းကြယ်တဲ့ ကောင်းချီးပေးမှုကို ခံထားရရုံတင်မကဘူး... သူတို့အတွက် လမ်းခင်းပေးနေတဲ့ မဟာမိတ်တွေလည်း အများကြီးရှိသေးတယ်... ပထမဆုံးအနေနဲ့ ထိပ်ဆုံး ၃၂ ယောက်စာရင်းထဲ ဝင်အောင်လုပ်ပြီး ကမ္ဘာမြေအဆင့်အတန်းတစ်ခုကို အရင်ဆုံးဆုပ်ကိုင်ထားရမယ်"

ရှမ်းကန်းက ရယ်မောလိုက်၏။

"အဆင်ပြေပါတယ်... ဘာပဲဖြစ်ဖြစ် ချီလင်မျိုးနွယ်စုကတော့ ဒီတစ်ကြိမ်မှာ ကံဆိုးမှုနဲ့ ကြုံတွေ့ရတော့မှာပါ"

ဤမှတ်ချက်က အောက်ယန်ကို တုန့်ဆိုင်းသွားစေခဲ့သည်။

"မင်းက ဒါကို ဘယ်လို သိတာလဲ"

ချီလင်မျိုးနွယ်စုက လက်ရှိတွင် အာဏာအရှိန်အဝါ အကြီးမားဆုံးအဆင့်သို့ ရောက်ရှိနေခြင်းဖြစ်သည်။ မည်သူက သူတို့ကို ယှဉ်ပြိုင်နိုင်မည်နည်း။

ရှမ်းကန်းက သူသည် ဂိုဏ်းချုပ်ကျန်း၏တည်ရှိမှုကို သိရှိထားပြီးပြီဟု တွေးတောကာ ပုံမှန်အတိုင်းပင် ပြောဆိုလိုက်တော့သည်။

"ဂိုဏ်းချုပ်ကျန်း ရှိနေမှတော့... ချီလင်မျိုးနွယ်စုက ဘာလုပ်နိုင်ဦးမှာလဲ"

"ဂိုဏ်းချုပ်ကျန်း ဟုတ်လား..."

အောက်ယန်က လန့်ဖျန့်သွားပြီးနောက် သူ၏ကြီးမားလှသော နဂါးခန္ဓာကိုယ်ကြီးက တုန်ခါသွား၏။

"ဘယ်ဂိုဏ်းချုပ်ကျန်းလဲ"

"တခြား ဘယ်ဂိုဏ်းချုပ်ကျန်း ရှိဦးမှာလဲ... ဒါပေါ့... ဂိုဏ်းချုပ် ကျန်းချန်ပေါ့။ အစ်ကိုကြီး... မင်းက မသိဘူးလား"

ရှမ်းကန်းက အံ့ဩတုန်လှုပ်သွားသော မျက်နှာပေးဖြင့် စူးစမ်းကြည့်လိုက်သည်။

အောက်ယန်မှာမူ သူ၏ တည်ငြိမ်မှုကို ဆက်လက်ထိန်းသိမ်းထားနိုင်ခြင်း မရှိတော့ချေ။

သူသည် ရွှေနဂါးမျိုးနွယ်စုဝင်များအကြားမှနေ၍ တိုက်ရိုက်ပျံသန်းထွက်လာခဲ့ပြီး ရှမ်းကန်း၏ဘေးသို့ အပြေးအလွှားရောက်ရှိလာကာ သူ့ကို အဝေးတစ်နေရာဆီသို့ အလျင်အမြန် ဆွဲခေါ်သွားတော့သည်။

ထိုအရာက သိုးမျိုးနွယ်စု၏ ဧကရာဇ်တစ်ပိုင်း ကျောက်ချုန်းကို ချက်ချင်းပင် သတိကြီးသွားစေပြီး သူက တိုက်ခိုက်တော့မည်ဟု တွေးတောမိသွားသည်။ မိစ္ဆာမျိုးနွယ်စုဝင်များအကြားတွင်မူ အနည်းငယ် သဘောထားကွဲလွဲရုံမျှဖြင့် တိုက်ခိုက်ကြခြင်းက ပုံမှန်ဖြစ်ပေသည်။

မိုးပြာနဂါးမဟာဧကရာဇ်က ဤအရာကို မြင်တွေ့လိုက်ရသည့်အခါတွင်မူ အလျင်အမြန်ပင် ရှင်းလင်းပြောကြားလိုက်၏။

"ဧကရာဇ်တစ်ပိုင်း ကျောက်ချုန်း စိုးရိမ်မနေပါနဲ့... အောက်ယန်က ရွှေနဂါးမျိုးနွယ်စုရဲ့ ပြိုင်ဘက်ကင်း ပါရမီရှင်တစ်ဦးပဲ... သူက ပြဿနာရှာတတ်တဲ့ ဆန်းချန်လိုမဟုတ်ဘူး... သူက ဘယ်လိုပြုမူရမလဲဆိုတာကို ကောင်းကောင်းသိပါတယ်"

အောက်ယန်ကို ရည်ညွှန်းပြောဆိုလိုက်သည့်အခါတွင်မူ သူသည် အလွန်အမင်း စိတ်သက်သာရာရမှုကို ခံစားလိုက်ရ၏။

ဤထွက်ပေါ်လာခဲ့သော ရွှေနဂါးမျိုးနွယ်စု၏ ကြယ်ပွင့်သစ်သည် ထူးခြားဆန်းကြယ်သော ပါရမီကို ပိုင်ဆိုင်ထားရုံတင်မကဘဲ စည်းစနစ်ကျနကာ နက်ရှိုင်းသော အမြော်အမြင်လည်းရှိပြီး အလွန်အမင်း တည်ငြိမ်ရင့်ကျက်သူ ဖြစ်သည်။ သူရောက်ရှိလာသည့် ပထမဆုံးနေ့ကတည်းကပင် သူသည် နဂါးမျိုးနွယ်စု၏ အဆင့်မြင့်ပုဂ္ဂိုလ်များအတွက် အလွန်စိတ်ချရသော အရင်းအမြစ်တစ်ခုဖြစ်သည်။

မိမိကိုယ်မိမိ နဂါးမျိုးနွယ်စုတစ်ခုလုံး၏ဖခင်ဟု သတ်မှတ်ထားသော ဤမဟာဧကရာဇ်သည် တစ်ခါတစ်ရံတွင် ရွှေနဂါးမျိုးနွယ်စု၌ ဤကဲ့သို့သော ထူးချွန်ထက်မြက်သည့် ဆက်ခံသူတစ်ဦး ရှိနေသည့်အတွက်ကြောင့်ပင် မနာလိုဖြစ်မိသေးသည်။

မိုးပြာနဂါးမျိုးနွယ်စုက ဤအကြိမ်တွင် ဧကရာဇ်တစ်ပိုင်း နှောင်းပိုင်းအဆင့်ဖြစ်သော ရွှံဟိုင်ကို စေလွှတ်ထားခဲ့သော်လည်း သူသည် ရွှေနဂါးမျိုးနွယ်စုမှ အောက်ယန်အပေါ်တွင် ပို၍မျှော်လင့်ထားခြင်းဖြစ်သည်။ မဟာဧကရာဇ်သည် သူ့ထံမှနေ၍ ကာလကြာရှည်စွာ ပျောက်ကွယ်နေခဲ့သော ဧကရာဇ်တစ်ပါး၏အရှိန်အဝါကို မြင်တွေ့နေရသောကြောင့်ဖြစ်၏။

ဤအစည်းအဝေးပွဲတွင် နဂါးမျိုးနွယ်စု၏ ဂုဏ်သိက္ခာက သူ့အပေါ်တွင် ရှိနေသည်။

အခြားတစ်ဖက်တွင်မူ အောက်ယန်က ပုံမှန်မဟုတ်ဘဲ အလွန်အမင်း စိတ်လှုပ်ရှားနေ၏။

"မင်း ဂိုဏ်းချုပ်ကျန်းနဲ့ တွေ့ခဲ့တာလား"

"သူ ဘယ်မှာလဲ"

"သူ ပျောက်ကွယ်သွားခဲ့တာ နှစ်ပေါင်းသန်းတစ်ရာလောက်ရှိနေပြီကို... မင်းက သူ့ကို ဘယ်လိုလုပ်ပြီး ရှာတွေ့ခဲ့တာလဲ"

ရှမ်းကန်းက ဆွံ့အသွားခဲ့ရသည်။

"အစ်ကိုကြီး... မင်းက သူ့နဲ့ အနီးကပ်ဆုံး ရှိနေခဲ့တဲ့သူပဲဥစ္စာ... ဒါကို မသိသေးဘူးလား"

"ငါက သူ့နဲ့ အနီးကပ်ဆုံး ရှိနေခဲ့တာ ဟုတ်လား..."

"အဲဒီ ပုံစံကိုးမျိုးမိုးပြာနဂါး မဟာဧကရာဇ်အသစ်လေ။ ငါက မင်းသိပြီးပြီလို့ ထင်နေတာ... မဟုတ်ရင် မင်း ခုနတုန်းက သူ့ကို ဘာဖြစ်လို့ သွားပြီးနှုတ်မဆက်ရတာလဲ"

"ဘာဖြစ်တယ်"

အောက်ယန် လုံးဝမှင်တက်သွားသည်။

"သူက ဂိုဏ်းချုပ်ကျန်း ဟုတ်လား... ဂိုဏ်းချုပ်ကျန်းက လူသားမျိုးနွယ်စုဝင်တစ်ဦး မဟုတ်ဘူးလား... ဒါက ဘယ်လိုလုပ်ပြီး ဖြစ်နိုင်မှာလဲ"

"ဂိုဏ်းချုပ်ကျန်းက ဘယ်လိုအစွမ်းထက်တဲ့ ပုဂ္ဂိုလ်မျိုးလဲ"

ရှမ်းကန်းက ခါးသက်သက် ပြုံးလိုက်၏။

"အဲဒီပုဂ္ဂိုလ်ကြီးက ကောင်းကင်ယံကို ဆန့်ကျင်နိုင်တဲ့ အစွမ်းထက်တဲ့ အရည်အချင်းတွေ ရှိနေတာမို့လို့... မင်းနဲ့ငါက ရိုးရိုးရှင်းရှင်း နားလည်နိုင်စွမ်း မရှိတာကတော့ ပုံမှန်ပဲမဟုတ်ဘူးလား"

"ပုံစံကိုးမျိုးမိုးပြာနဂါးအဖြစ် ပြောင်းလဲနိုင်တာကို ထားလိုက်ပါဦး... အကယ်၍ သူက ဝိညာဉ်လောက ဒါမှမဟုတ် သေခြင်းတရားလောကရဲ့ မဟာဧကရာဇ်အဖြစ် ပြောင်းလဲလိုက်မယ်ဆိုရင်တောင်မှ... အံ့ဩစရာမလိုတော့ဘူး"

ဤစကားလုံးများက အောက်ယန်ကို ထိုစဉ်က အံ့ဩဆန်းကြယ်လှသော မြင်ကွင်းများကို ပြန်လည်အမှတ်ရသွားစေသည်။

သူသည် ရှမ်းကန်း ပြောဆိုချက်က မှန်ကန်ကြောင်း ဝန်ခံလိုက်ရ၏။ ထိုပုဂ္ဂိုလ်ကြီး ဘာပဲလုပ်လုပ် အရာအားလုံးက ပုံမှန်ပင်။

ဤအရာကို တွေးတောမိလိုက်သည့်အခါတွင်မူ သူ့ရင်ထဲ၌ မည်သို့သော သံသယ သို့မဟုတ် တုန့်ဆိုင်းမှုများ ကျန်ရှိနေတော့မည်နည်း။

သူသည် ချက်ချင်းပင် အရှိန်အဟုန်အမြင့်ဆုံးဖြင့် ကျန်းချန်ဘေးသို့ ပျံသန်းလာခဲ့ပြီးနောက် သူ၏နဂါးခေါင်းကိုနှိမ့်ချလျက် အလွန်အမင်း ရိုသေလေးစားစွာဖြင့် အရိုအသေပေးလိုက်တော့သည်။

"ဂိုဏ်းချုပ်ကျန်း... ပြန်လာပြီပဲ။ ဘာဖြစ်လို့ ငါ့ကို စောစောစီးစီး မပြောခဲ့ရတာလဲ"

"ငါ မင်းနဲ့လွဲသွားတော့မလို့"