အခန်း ၄၁
Vol. 5 Ch. 41
အခန်း (၄၁) - ချင်းယန်ဇီ
ထန်ရွေ့သည် အနားသို့ချဉ်းကပ်လာရင်း လင်းဖန်အား လက်ညှိုးထိုးပြလိုက်ခြင်း ဖြစ်သည်။
သူ၏နောက်တွင် လှေကားထစ်များ၏ ထိပ်ဆုံးသို့ အောင်မြင်စွာ တက်လှမ်းနိုင်ခဲ့ကြသော အခြား ဝင်ခွင့်ဖြေဆိုသူများလည်း ရှိနေကြပေသည်။
ဝင်ခွင့်ဖြေဆိုသူများအနက် သုံးပုံနှစ်ပုံသာလျှင် ထိပ်ဆုံးသို့ ရောက်ရှိနိုင်ခဲ့ကြသည်။
လင်းဖန်က ထန်ရွေ့ကို ဂရုပင်မစိုက်ချေ။ သူသည် တစ်ဖက်သို့သာ အကြည့်လွှဲလိုက်လေသည်။
ထိုသို့ ဂရုမစိုက်သော အမူအရာက ထန်ရွေ့ကို ဒေါသထွက်စေခဲ့သည်။
‘ငါ့ထက်အရင် လှေကားထိပ်ကို ရောက်ရဲတယ်ပေါ့လေ။ ငါ့ဆီက အာရုံစိုက်ခံရမှုတွေ အကုန်လုံးကို လုယူသွားရဲတယ်ပေါ့’
အကယ်၍ သူတို့သာ ချင်ဖုန်းဂိုဏ်းထဲ၌ ရောက်မနေခဲ့ပါက လင်းဖန်ကို နေရာမှာတင် သတ်ပစ်လိုက်ပြီးဖြစ်ပေမည်။
“လိမ်တယ်ဆိုတာ ဘာသဘောလဲ။ သူက ဘယ်လိုမျိုး ဘာလုပ်ခဲ့လို့လဲ”
ချီပြန်လည်အားဖြည့်ဆေးလုံးကို ဝေငှပေးနေသည့် တပည့်ဖြစ်သူက မေးလိုက်သည်။
“သူက သူ့သူငယ်ချင်းကို ကူညီပြီးတော့ အခြားတစ်ယောက်ကို အောက်ဆွဲချပစ်ခဲ့တာ”
“မင်း ဘာပြောလိုက်တယ်။ လူလိမ်ကောင်ရဲ့”
ဟိုမင်မှာ သူကြားလိုက်ရသည့် စကားကြောင့် မကျေမနပ် ဖြစ်သွားလေသည်။
“အဲ့ဒီလူက သူ့ဘာသာသူ ပြုတ်ကျသွားတာကွ။ သူ့ခွန်အားတွေ ကုန်ခန်းသွားလို့ပဲ ဖြစ်ရမယ်”
“ပေါက်ကရတွေ၊ အဲ့ဒီလူက အကောင်းကြီးပဲ ရှိသေးတာ။ ရုတ်တရက်ကြီး ပြုတ်ကျသွားတာ”
“ဟုတ်တယ်၊ မင်းတို့ကောင်တွေ တစ်နည်းနည်းနဲ့ သူ့ကို တွန်းချလိုက်တာပဲ ဖြစ်ရမယ်”
“ဒါပေမဲ့ အဲ့ဒီလူက မပြုတ်ကျခင် ‘ကူညီပါဦး၊ ငါပင်ပန်းနေပြီ’ လို့ ပြောတာ ငါကြားလိုက်တယ်”
ဝင်ခွင့်ဖြေဆိုသူများက သူတို့၏ ကိုယ်ပိုင်အမြင်များကို အသီးသီး ပြောဆိုလာကြသဖြင့် ဆူညံသံများ ထွက်ပေါ်လာလေတော့သည်။
ထန်ရွေ့တစ်ယောက်မှလွဲ၍ လူတိုင်းက ဝင်ရောက်ပြောဆိုနေကြခြင်း ဖြစ်သည်။
ထန်ရွေ့သည် နှုတ်ခမ်းကို ကိုက်ထားလိုက်သည်။
ထိုလူမှာ ခွန်အားကုန်ခန်းသွားရန် မဖြစ်နိုင်ကြောင်းကို သူကောင်းကောင်း သိထားသည်။
အဘယ်ကြောင့်ဆိုသော် ထိုသူသည် ထန်မိသားစုမှ ကျင့်ကြံသူတစ်ဦး ဖြစ်သောကြောင့်ပင်။
‘လင်းဖန်က အဲဒီလူကို တွန်းချလိုက်တယ်ဆိုတဲ့ အချက်ကိုပဲ ဆုပ်ကိုင်ထားတာ ကောင်းတယ်’
“တိတ်တိတ်နေကြစမ်း။ မင်းတို့တွေ ထပ်ပြီး ငြင်းခုံနေကြမယ်ဆိုရင် အားလုံးကို အရည်အချင်းမပြည့်မီဘူးလို့ သတ်မှတ်လိုက်မယ်။ ပွဲစီစဉ်သူ အကြီးအကဲကို ဆုံးဖြတ်ခိုင်းလိုက်ပါ”
ထိုတပည့်က လက်နှစ်ဖက်ကို မြှောက်ကာ ဆူညံသံများကို တားဆီးလိုက်လေသည်။
ရင်ပြင်နှင့် မလှမ်းမကမ်းတွင် မဏ္ဍပ်တစ်ခု ရှိလေသည်။
မဏ္ဍပ်အတွင်း၌ တာအိုဝတ်ရုံများကို ဝတ်ဆင်ထားသည့် အမျိုးသားနှစ်ဦးနှင့် ကျန်းရှီတို့ ထိုင်နေကြသည်။
ထိုသူများအနက်မှ တစ်ဦးမှာ ဂိုဏ်းချုပ် ချင်းယန်ဇီဖြစ်ပြီး ဖြူဖွေးနေသော ဆံပင်နှင့် မုတ်ဆိတ်ရှည်များရှိကာ၊ ပြုံးလိုက်ပါက မျဉ်းတစ်ကြောင်းပမာ ဖြစ်သွားတတ်သည့် မျက်လုံးငယ်လေးများ ပိုင်ဆိုင်ထားသူ ဖြစ်ပြီး လက်ဖက်ရည်ကို သောက်နေလေသည်။
နောက်တစ်ဦးမှာ ထန်ဖေးဖြစ်ပြီး တုတ်ခိုင်သော ခန္ဓာကိုယ်နှင့် ယုတ်မာသည့်အသွင်ရှိကာ မုတ်ဆိတ်မွေးပါးပါးရှိသော သူ၏မေးစေ့ကို ပွတ်သပ်နေလေသည်။
ချင်းယန်ဇီသည် လက်ဖက်ရည်သောက်ပြီးသောအခါ ခွက်ကိုချလိုက်ပြီး ပြုံးလျက် ပြောလိုက်သည်။
“ထန်ဖေး၊ မင်းက ဒီနှစ်အတွက် ပွဲစီစဉ်သူ အကြီးအကဲပဲလေ။ မင်းပဲ ဆုံးဖြတ်လိုက်ပါ။ မှတ်ထားရမှာက အရာရာ အဆင်ပြေချောမွေ့ဖို့ဆိုရင် တာအိုတရားက သဟဇာတဖြစ်နေဖို့ လိုအပ်တယ်။ တာအိုကို လှုပ်ခတ်သွားစေလောက်တဲ့အထိ အစွန်းရောက်တာတွေကို ငါတို့ မလုပ်သင့်ဘူး”
ထန်ဖေးက မျက်လုံးများကို ကျဉ်းလိုက်ကာ သူ့ဘာသာ တွေးလိုက်လေသည်။
‘ပါးနပ်တဲ့ မြေခွေးအိုကြီး၊ ငါ့ကို တာဝန်ယူခိုင်းထားတယ်ဆိုပေမဲ့ အလွန်အကျွံ မလုပ်ဖို့ သတိပေးနေသေးတယ်’
ဂရုတစိုက် စဉ်းစားပြီးနောက် ထန်ဖေးက ပြန်လည်ဖြေလိုက်သည်။
“ဂိုဏ်းချုပ်၊ အဲ့ဒီလင်းဖန်က သူ့သူငယ်ချင်းကို ကူညီခဲ့တာ မှန်ပါတယ်။ ဟိုလူ ပြုတ်ကျသွားတဲ့ ကိစ္စနဲ့ ပတ်သက်ပြီးတော့ ကျွန်တော်တို့ သက်သေတွေကို မေးမြန်းဖို့ လိုအပ်ပါလိမ့်မယ်”
ဤသည်ကို ကြားသောအခါ ကျန်းရှီတစ်ယောက် သိပ်မပျော်ရွှင်လှချေ။
သူမ၏ဖခင်က တံခါးပိတ်ကျင့်ကြံနေသဖြင့် ကိုယ်စားလှယ်အဖြစ် ဤနေရာသို့ ရောက်ရှိနေခြင်း ဖြစ်သော်လည်း သူမ၏စိတ်ထဲရှိသည့်အတိုင်း ပြောဆိုရန် အကြောက်အလန့် မရှိပေ။
“ဒီနှစ် ခန္ဓာကိုယ်ကြံ့ခိုင်ရေးတောင်ထွတ်ကနေ လာတဲ့ လက်ထောက်စီစဉ်သူ တစ်ယောက်အနေနဲ့ ကျွန်မ သဘောမတူဘူး။ ချင်ဖုန်းဂိုဏ်းက တပည့်တွေကို အခက်အခဲရှိချိန်မှာ တစ်ယောက်ကိုတစ်ယောက် ကူညီဖို့ သင်ကြားပေးထားတာလေ။ အကယ်လို့ သူ့ကို အပြစ်ပေးလိုက်မယ်ဆိုရင် တပည့်တွေအားလုံး စိတ်ဓာတ်ကျသွားစေလိမ့်မယ်”
“ဟင်း... ကျန်းရှီလေး၊ မင်းရဲ့အဖေ ကျန်းရီနျန်က မင်းကို သေချာသင်ပေးထားတာပဲဆိုတာကို ငါမြင်နိုင်ပါတယ်”
ချင်းယန်ဇီက ခေါင်းညိတ်လိုက်ပြီး သူ၏လက်ဖက်ရည်ခွက်ကို ယူကာ နောက်ထပ်တစ်ငုံ သောက်လိုက်လေသည်။
“အခု ဘာလုပ်ရမလဲဆိုတာ ကျုပ်သိပါပြီ ဂိုဏ်းချုပ်”
ထန်ဖေးမှာ သိပ်ပြီး ဘဝင်မကျလှပေ။ သူ၏ နှာခေါင်းမှ လေပူများမှုတ်ထုတ်လိုက်သဖြင့် ပါးလွှာသော နှုတ်ခမ်းမွေးလေးမှာ တလှုပ်လှုပ်ဖြစ်သွားလေသည်။
သူက မတ်တတ်ရပ်လိုက်ပြီးနောက် သူ၏အသံမှာ လေထုထဲ၌ ဟိန်းထွက်သွားသည်။
“လင်းဖန်က ဂိုဏ်းတူအစ်ကိုတွေကို ကူညီပေးခဲ့လို့ ချင်ဖုန်းဂိုဏ်းသားတစ်ယောက်မှာ ရှိသင့်ရှိထိုက်တဲ့ အရည်အချင်းတွေကို ပြသနိုင်ခဲ့တယ်။ ဒါကြောင့် သူ နောက်ထပ် စမ်းသပ်မှုကို ဆက်ပြီး ဝင်ရောက်နိုင်တယ်။”
“သူ ခြေလှေကားပေါ်ကနေ တွန်းချလိုက်တဲ့ လူကရော ဘယ်လိုလုပ်မလဲ”
“ဟုတ်တယ်၊ အဲဒါကရော ဘယ်လိုဖြစ်သွားတာလဲ”
“ဒီကိစ္စကို အဆုံးတိုင်အောင် စုံစမ်းပေးရမယ်”
“အဲဒီလူကို ဒီအပေါ်ခေါ်လာပြီး လင်းဖန်နဲ့ မျက်နှာချင်းဆိုင် ဖြေရှင်းခိုင်းပါ”
လူအုပ်ကြီးမှာ ကျေနပ်မှုမရှိကြချေ။
လင်းဖန်သည် ထိပ်ဆုံးသို့ ပထမဆုံးရောက်ရှိရန် အင်အားအလုံအလောက် ရှိနေခဲ့သည်။
သူသည် သူတို့၏ ဂိုဏ်းဝင်ခွင့်ရရှိရေး အခွင့်အလမ်းများအတွက် ခြိမ်းခြောက်မှုတစ်ခု ဖြစ်နေလေသည်။
ယခုအချိန်တွင် သူတို့သည် လင်းဖန်အား အရည်အချင်းမပြည့်မီစေရန် မည်သည့်နည်းလမ်းကိုမဆို ကြိုးစားလုပ်ဆောင်ကြမည်သာ ဖြစ်ပေသည်။
သို့သော်ငြား ထန်ရွေ့ကမူ တိတ်ဆိတ်စွာပင် နေနေလိုက်သည်။
အကယ်၍ ထိုလူကိုသာ ခေါ်ယူစစ်ဆေးမည်ဆိုပါက ဂိုဏ်းဝင်ခွင့်လာရောက်ဖြေဆိုသူများကြား ရောနှောဝင်ရောက်နေသည့် ကျင့်ကြံသူတစ်ယောက်အဖြစ် သူ၏ လျှို့ဝှက်ချက်အား ဖော်ကောင်အလုပ်ခံရမည်သာ ဖြစ်ပေသည်။
“သခင်လေးထန်ရွေ့... နှုတ်ဆိတ်မနေပါနဲ့။ တစ်ခုခုပြောပါဦး”
“စိတ်မပူပါနဲ့။ ကျွန်တော်တို့က သခင်လေးဘက်က ရပ်တည်ပြီး တရားမျှတမှုအတွက် ပါဝင်ပေးမှာပါ”
ထန်ရွေ့မှာ ပုံမှန်မဟုတ်ဘဲ တိတ်ဆိတ်နေကာ သူ၏ မျက်လုံးများက ဟိုဟိုဒီဒီ ကစားနေလေသည်။
‘ဒီလူတွေက သောက်ရမ်းတုံးတဲ့ ငကြောင်တွေပဲ’
သူ၏စိတ်ထဲတွင် ဒေါသတကြီးဖြင့် တွေးလိုက်သည်။
‘သူတို့လုပ်ရပ်က အကူအညီမဖြစ်ဘူးဆိုတာ မမြင်ကြဘူးလား’
နောက်ဆုံးတွင် သူသည် မဏ္ဍပ်အတွင်းရှိ ထန်ဖေးကို အကူအညီတောင်းခံသည့် အကြည့်ဖြင့် လှမ်းကြည့်လိုက်လေသည်။
ထန်ဖေးက မဏ္ဍပ်အပြင်ဘက်တွင် ရပ်နေသော သူ၏ ကိုယ်ရံတော်ကို လက်ညှိုးထိုးကာ ပြောလိုက်သည်။
“ပြုတ်ကျသွားတဲ့လူကို သွားကြည့်လိုက်စမ်း။ လင်းဖန်နဲ့ မျက်နှာချင်းဆိုင် ဖြေရှင်းဖို့ သူ့ကို ဒီခေါ်လာခဲ့။ သူ ကောင်းကောင်း သက်သာလာပြီလားဆိုတာ သေချာစစ်ဆေးလိုက်ဦး”
“ဟုတ်ကဲ့ပါ အကြီးအကဲထန်ဖေး”
ကိုယ်ရံတော်က ခေါင်းညိတ်လိုက်ပြီး ခြေလှေကားများအတိုင်း အောက်သို့ ဆင်းသွားလေသည်။
လူတိုင်းက ကိုယ်ရံတော် ပြန်အလာကို စိတ်အားထက်သန်စွာ စောင့်ဆိုင်းနေကြသဖြင့် အချိန်အတန်ကြာ ကုန်ဆုံးသွားသည်။
လင်းဖန်ကမူ ဂရုမစိုက်ပေ။ မြေပြင်ပေါ်တွင် ထိုင်ချလိုက်ကာ ပေါက်စီများ ထုတ်ယူပြီး ဟိုမင်နှင့် မျှဝေစားသောက်လိုက်သည်။
သူတို့သည် နောက်ထပ်စမ်းသပ်မှုအတွက် ပြင်ဆင်ရင်း ပေါက်စီများကို မြိန်ယှက်စွာ စားသောက်နေကြလေသည်။
“ပိုစားထားပါ။ ပထမစမ်းသပ်မှုက ခံနိုင်ရည်ကို စမ်းသပ်တာဆိုရင် နောက်တစ်ခုက အင်အားနဲ့ပတ်သက်တာ ဖြစ်ရမယ်”
ဟိုမင်က ခေါင်းညိတ်ပြလိုက်သည်။
“အရှင်ထန်ဖေး... အဲဒီလူက... အဲဒီလူက အင်အားတွေ ကုန်ခန်းပြီး မောပန်းလွန်းလို့ သေဆုံးသွားပါပြီ”
ကိုယ်ရံတော် ပြန်ရောက်လာချိန်တွင် ထန်ဖေးကို အစီရင်ခံလိုက်သည်။
ထန်ဖေးက ထန်ရွေ့ကို တစ်ချက်ကြည့်လိုက်ပြီး လူအုပ်ကြီးကို ပြောလိုက်သည်။
“ဒီအမှုကတော့ ဒီမှာတင် ပြီးသွားပြီ။ နောက်ထပ် စမ်းသပ်မှုက မကြာခင် စတင်တော့မယ်”
သူသည် ထိုလူအား အဆုံးစီရင်ရန် သူ၏ကိုယ်ရံတော်ကို ညွှန်ကြားခဲ့ခြင်း ဖြစ်ပေသည်။
ဂိုဏ်းချုပ်မှာ အိုမင်းမစွမ်းဖြစ်နေသော သက်ကြီးရွယ်အို အရူးတစ်ယောက် မဟုတ်ပေ။
ထိုလူကို ဤနေရာသို့ ခေါ်လာခြင်းက ပြဿနာများကို ဖိတ်ခေါ်သကဲ့သို့ ဖြစ်သွားပေလိမ့်မည်။
ထို့အပြင် သူသာ ဤကိစ္စကို ဆက်လက်စူးစမ်းမည်ဆိုပါက ဂိုဏ်းချုပ်ထံတွင် သေဆုံးသွားသူများထံမှ မှတ်ဉာဏ်များကို တူးဆွနိုင်သည့် သူ၏ကိုယ်ပိုင်နည်းလမ်းများ ရှိနေပြန်သည်။
“ကောင်းတယ် ထန်ဖေး။ တာအိုရဲ့ သဟဇာတဖြစ်မှုကို ထိန်းသိမ်းထားဖို့က အဓိကပဲဆိုတာ အမြဲတမ်း မှတ်ထားပါ”
ချင်းယန်ဇီက သူ၏ မီးခိုးရောင် မုတ်ဆိတ်ရှည်ကြီးကို ပွတ်သပ်ရင်း ထန်ဖေးကို ချီးကျူးစကား ဆိုလိုက်လေသည်။
ထန်ဖေးက ဂိုဏ်းချုပ်အား ပြုံးပြလိုက်သော်လည်း သူ၏စိတ်ထဲတွင်မူ တိတ်တဆိတ် ရေရွတ်လိုက်သည်။
‘ကောက်ကျစ်တဲ့ မြေခွေးအိုကြီး’
ဂိုဏ်းချုပ်၏ စကားများကို စိတ်ထဲမှတ်သားထားရင်း ထန်ဖေးက မတ်တတ်ရပ်ကာ ကြေညာလိုက်လေသည်။
“အခု အရာအားလုံး ပြီးဆုံးသွားပြီဆိုတော့ နောက်ထပ် စမ်းသပ်မှုအတွက် အချိန်ရောက်လာပြီ”