အခန်း ၉၁၈

အပိုင်း (၉၁၈) စစ်ပွဲစတင်ခြင်း

"ဝုန်း"

ကောင်းကင်ယံ၌ မိုးခြိမ်းသံများက ဟိန်းထွက်နေသည်။

ထို့နောက် ချက်ချင်းပင် ရေပေါ်ကျွန်းပေါ်မှ ယာဉ်ပျံအမြောက်အမြား ပျံသန်းထွက်ခွာလာကြသည်။

ယွီဝမ်ထောင်၊ ကျိုးဟောင်ရန်၊ ဝမ်ထျန်အန်း နှင့် လုတရုံ တို့ကလည်း ယာဉ်ပျံရာချီ စေလွှတ်လိုက်ကြသည်။

ယခုအချိန်သည်ကား ထိုက်ယန်တောင် တပ်မကြီးက တရားဝင် တန်ပြန်တိုက်ခိုက်မည့် အချိန်ပင် ဖြစ်သည်။

ယနေ့ခေတ် ထိုက်ယန်တောင် တွင် လေတပ်သား အမြောက်အမြားကို လေ့ကျင့်မွေးထုတ်ထားပြီး ဖြစ်သည်။

အစောပိုင်းကာလက ရွှီဟွမ်၊ ဖေးခန်း တို့ကဲ့သို့သော ပထမမျိုးဆက် လေယာဉ်မှူးများမှစတင်၍ လစဉ်လတိုင်းလိုလို လေယာဉ်မှူး အမြောက်အမြား သင်တန်းဆင်းခဲ့ကြသည်။

လက်ရှိ ထိုက်ယန်တောင် တွင် ရေတပ်သင်္ဘောအုပ်စုမှလွဲလျှင် လေယာဉ်မှူးအလုပ်က အခွင့်အရေးအများဆုံး အလုပ်အကိုင် ဖြစ်နေသည်။

လူအများအပြားသည် ယာဉ်ပျံမောင်းနှင်သူ ဖြစ်လာရန် အလုအယက် သင်ယူချင်နေကြ၏။

သို့သော် လေယာဉ်မှူးအဖြစ် လက်ခံရာတွင် အလွန် တင်းကျပ်သော စည်းမျဉ်းများ ရှိပြီး စိတ်စွမ်းအင် အမျိုးအစား အစွမ်းပိုင်ရှင်များကို ဦးစားပေး ရွေးချယ်ကာ ထိုမှတစ်ဆင့် ဒြပ်စင်အမျိုးအစား အစွမ်းပိုင်ရှင်များကို ရွေးချယ်လေ့ရှိသည်။

အကြောင်းမှာ ယာဉ်ပျံများ၏ ပျံသန်းနှုန်းသည် အလွန်မြန်ဆန်လှသဖြင့် လေယာဉ်မှူးများ၏ တုံ့ပြန်နိုင်စွမ်းအပေါ် အလွန်မြင့်မားသော တောင်းဆိုချက်များ ရှိနေသောကြောင့် ဖြစ်သည်။

စိတ်စွမ်းအင် အားကောင်းသူများ၏ တုံ့ပြန်နိုင်စွမ်းက သဘာဝအရ မြန်ဆန်ပြီးသား ဖြစ်လေသည်။

နောက်ထပ် အကြောင်းရင်းတစ်ခုမှာ စိတ်စွမ်းအင်သည် စိတ်အဝေးထိန်းအစွမ်း အဖြစ် ပြောင်းလဲနိုင်ပြီး တစ်ပြိုင်နက်တည်း အများအပြားကို ထိန်းချုပ်နိုင်ကာ ခန္ဓာကိုယ် ဒဏ်ရာရနေလျှင်တောင် စိတ်စွမ်းအင်ဖြင့် ထိန်းချုပ်ခလုတ်များကို ကိုင်တွယ်နိုင်သောကြောင့်ပင်။

ယာဉ်ပျံ ရာပေါင်းများစွာက အရှိန်အဟုန်ဖြင့် ထွက်ခွာသွားပြီးနောက် ချက်ချင်းပင် ထိုက်ယန်တောင် ဆိပ်ကမ်းမှ စစ်သင်္ဘော ဒါဇင်ပေါင်းများစွာ ထွက်ခွာလာကြသည်။

ထိုမြင်ကွင်းကြောင့် ထိုက်ယန်တောင် ခိုလှုံရေးစခန်း မှ နေထိုင်သူအများအပြားက မျက်လုံးပြူးကာ အကြောင်းရင်းကို အချင်းချင်း မေးမြန်းနေကြသည်။

"ဘာတွေ ဖြစ်နေတာလဲ... စစ်ဖြစ်တော့မလို့လား"

"ထူးဆန်းလိုက်တာ... ယွီကျိုးပြည်နယ် က မုန်ယာအဖွဲ့ ကို ရှင်းလင်းပြီးသွားပြီလို့ ပြောတယ် မဟုတ်ဘူးလား... ဘာလို့ စစ်ထပ်ဖြစ်ရပြန်တာလဲ"

"ဒီတစ်ခေါက် ဘယ်သူ့ကို သွားတိုက်မှာလဲ"

"မင်းတို့ မသိကြသေးဘူးထင်တယ်... ငါပြောပြမယ်... တောင်ဘက်မှာ ပြဿနာတက်နေတာ"

"တောင်ဘက်... ဘာဖြစ်လို့လဲ"

"အရိပ်တပ်ဖွဲ့ တွေ ဝင်တိုက်နေပြီတဲ့"

"ဘာကောင်တွေ... မင်း ဘယ်သူလို့ ပြောလိုက်တာလဲ"

"အရိပ်တပ်ဖွဲ့ လေ... ထိုင်ဝမ်ကျွန်းကကောင်တွေ"

"ကျစ်... အဲ့ဒီ ကောင်တွေက မသေကြသေးဘူးလား"

"ဟူး... ငါလည်း အကုန်သေကုန်ပြီလို့ ထင်နေတာ... ဒါက သတင်းအစအနလေးတွေ ကြားထားတာ"

"နေပါဦး... ဒီကောင်တွေ မသေဘူးဆိုရင်တောင် အသက်ရှင်ကျန်ရစ်သူ ဘယ်လောက်မှ မရှိလောက်တော့ဘူးမလား... ငါတို့ ထိုက်ယန်တောင် ကို လာတိုက်ဖို့ သူတို့က ဘယ်က သတ္တိတွေ ရနေတာလဲ"

"မသိဘူးလေ... ငါကြားတာတော့ ကွမ်းတုံပြည်နယ် နဲ့ မင်ပြည်နယ် ဘက်က ခိုလှုံရေးစခန်း အတော်များများကို အရိပ်တပ်ဖွဲ့ တွေက သိမ်းပိုက်လိုက်ပြီတဲ့"

"ဟင်... ဘယ်လိုလုပ် အဲ့ဒီလို ဖြစ်ရတာလဲ"

"အခြေအနေ အတိအကျကိုတော့ မသိရသေးဘူး... ဒါပေမဲ့ ငါတို့ဘက်က ယာဉ်ပျံတွေနဲ့ စစ်သင်္ဘောတွေ ဒီလောက်အများကြီး ထွက်သွားမှတော့ သေချာပေါက် နိုင်မှာပါ"

...

ထိုက်ယန်တောင် ကျွန်းပတ်လည်တွင် လူအများအပြားက အချင်းချင်း ဆွေးနွေးပြောဆိုနေကြသည်။

ယခုအချိန်တွင် တပ်မကြီးက ထွက်ခွာသွားပြီ ဖြစ်ကာ ယာဉ်ပျံများက လေခွင်းသံများပေးလျက် စစ်သင်္ဘောများကလည်း အရှိန်အဟုန်ဖြင့် မောင်းနှင်နေကြသည်။

မုန်တိုင်းနှင့် မိုးသက်လေပြင်းများ ကျရောက်ကာ လှိုင်းတံပိုးများ ရိုက်ခတ်နေသည့် ကြားမှပင် ထိုက်ယန်တောင် တပ်မကြီးသည် တောင်ဘက်သို့ ဦးတည်ချီတက်သွားလေသည်။

လင်းယွမ် က အကြီးဆုံး စစ်သင်္ဘောပေါ်တွင် ရပ်လျက် ရှေ့တန်းစစ်မျက်နှာပြင်သို့ ကိုယ်တိုင် ကြီးကြပ်ကွပ်ကဲရန် လိုက်ပါသွားသည်။

သူက ထို အရိပ်တပ်ဖွဲ့ တွေ ဘယ်လောက်တောင် အစွမ်းထက်နေသလဲ ဆိုတာကို ကိုယ်တိုင် ကြည့်ရှုချင်နေသည်။

ဤအချိန်၌ သူ့ဘေးတွင် ချွီကျင့် ၊ မုန့်ဟူ ၊ ကောရွေ့ အစရှိသော ကျွန်းသခင်များကလည်း အတူလိုက်ပါလာကြသည်။

သူတို့ ယခုလို လိုက်ပါလာခြင်းမှာ ထိုက်ယန်တောင် ၏ စစ်ရေးစွမ်းရည်ကို ကိုယ်တိုင် မျက်မြင်တွေ့ရှိချင်၍ ဖြစ်ကာ အရိပ်တပ်ဖွဲ့ များကို တကယ်တမ်း ရင်ဆိုင်နိုင်စွမ်း ရှိမရှိ သိချင်သောကြောင့် ဖြစ်သည်။

"ပေါ်"

စစ်သင်္ဘောများ နာရီဝက်ခန့် ခုတ်မောင်းပြီးသွားသောအခါ ရှေ့ဆုံးမှ စစ်သင်္ဘောက ရုတ်တရက် အချက်ပေး ဥသြသံ ဆွဲလိုက်သည်။

မျက်တောင်တစ်ခတ်အတွင်းမှာပင် စစ်သင်္ဘောအားလုံးက အကာအကွယ် များကို အသီးသီး ဖွင့်လိုက်ကြသည်။

ထို့နောက် ချက်ချင်းပင် ကောင်းကင်ယံ၌ ယာဉ်ပျံများကလည်း အလျင်အမြန် နေရာယူကာ ရှေ့သို့ စတင် ပျံသန်းသွားကြသည်ကို ကြားလိုက်ရသည်။

"ဆရာလင်း... ရန်သူတွေကို တွေ့ပြီ"

လင်းယွမ် က ခေါင်းကို ဖြည်းညင်းစွာ ညိတ်လိုက်ပြီး "ကြည့်ရတာ ထိပ်တိုက်တွေ့တော့မယ့်ပုံပဲ" ဟု ပြောလိုက်သည်။

တကယ်ပင် သူ စကားပြောပြီးသည်နှင့် ရှေ့ဘက် ရေပြင်ညီမျဉ်းပေါ်တွင် ကျွန်းတစ်ကျွန်း ပေါ်ထွက်လာသည်။

ထိုကျွန်းက အရှိန်အဟုန်ဖြင့် နီးကပ်လာနေ၏။

ထိုကျွန်း၏ အထက်ကောင်းကင်ယံတွင် ယာဉ်ပျံအမြောက်အမြားက အသံကျယ်လောင်စွာဖြင့် ဝဲပျံနေကြပြီး ထိုယာဉ်ပျံများပေါ်တွင် အရိပ် သင်္ကေတများ ရိုက်နှိပ်ထားရာ ၎င်းတို့သည် အရိပ်တပ်ဖွဲ့ ၏ ယာဉ်ပျံများပင် ဖြစ်သည်။

"ဝုန်း"

ပြင်းထန်သော ပေါက်ကွဲသံကြီး ထွက်ပေါ်လာပြီး မရေမတွက်နိုင်သော အမြောက်ဆံများက မျက်စိတစ်မှိတ်အတွင်းမှာပင် တစ်ဖက်ရန်သူ၏ ယာဉ်ပျံများဆီသို့ ပစ်ခတ်သွားကြသည်။

ချက်ချင်းပင် ကောင်းကင်ယံ၌ မီးရောင်များ လင်းလက်သွားပြီး စွမ်းအင်ရောင်စဉ်များက ဆက်တိုက်ဆိုသလို ပေါက်ကွဲထွက်လာလေသည်။

ယာဉ်ပျံ အများအပြား၏ စွမ်းအင်အကာအကွယ်များ ပေါက်ကွဲသွားသော်လည်း ထိုက်ယန်တောင် ဘက်မှ ယာဉ်ပျံများ၏ စွမ်းအင်အကာအကွယ်များကမူ လုံးဝ ပျက်စီးခြင်း မရှိသည်ကို တွေ့လိုက်ရသည်။

ဆန့်ကျင်ဘက်အားဖြင့် အရိပ်တပ်ဖွဲ့ ဘက်မှ ယာဉ်ပျံများမှာမူ ထိုက်ယန်တောင် ၏ စွမ်းအင်အမြောက် ထိမှန်လိုက်သည်နှင့် တစ်ပြိုင်နက် ပြင်းထန်စွာ တုန်ခါယိမ်းယိုင်သွားကြလေသည်။

ဆက်တိုက် ပစ်ခတ်မှု ဆယ်ကြိမ်ပင် မပြည့်ခင် အရိပ်တပ်ဖွဲ့ ယာဉ်ပျံများ၏ အကာအကွယ်များ ပေါက်ကွဲထွက်သွားပြီး ယာဉ်ပျံများလည်း တိုက်ရိုက် ပျက်စီးသွားတော့သည်။

လင်းယွမ် သည် ထိုမြင်ကွင်းကို ကြည့်ရင်း အပြုံးယောင်ယောင်လေးတစ်ခု ပေါ်လာသည်။

ဘေးနားရှိ မုန့်ဟူ က မနေနိုင်ဘဲ "ထိုက်ယန်တောင် ယာဉ်ပျံတွေရဲ့ အမြောက်စွမ်းအားက အရမ်းပြင်းတာပဲ... အရိပ်တပ်ဖွဲ့ ရဲ့ ယာဉ်ပျံ အကာအကွယ်တွေ လုံးဝ မတောင့်ခံနိုင်ဘူး" ဟု ပြောလိုက်သည်။

ချွီကျင့် ကလည်း လက်သီးကို တင်းတင်းဆုပ်ကာ စိတ်လှုပ်ရှားစွာဖြင့် "ယာဉ်ပျံ အကာအကွယ် ပြဿနာတင် မဟုတ်ဘူး... အရိပ်တပ်ဖွဲ့ ရဲ့ စွမ်းအင်အမြောက်တွေကလည်း အသုံးမကျဘူး" ဟု ဝင်ပြောသည်။

"ဆရာလင်း... ထိုက်ယန်တောင် ရဲ့ လက်နက်တပ်ဆင်မှုတွေက အရိပ်တပ်ဖွဲ့ ရဲ့ လက်နက်တွေထက် အများကြီး ပိုအဆင့်မြင့်နေတာပဲ" ကောရွေ့ ကလည်း မနေနိုင်ဘဲ အံ့သြချီးကျူးလိုက်သည်။

လင်းယွမ် ကလည်း ရယ်မောလိုက်ပြီး "ကျွန်တော်တို့ ထိုက်ယန်တောင် ရဲ့ သုတေသနနဲ့ ဖွံ့ဖြိုးရေးဌာနက ဒီလက်နက်တွေအပေါ်မှာ အချိန်နဲ့ ခွန်အားတွေ အများကြီး ရင်းနှီးပြီး သုတေသန လုပ်ထားတာလေ" ဟု ရှင်းပြသည်။

"ပြီးတော့ ထိုက်ယန်တောင် ရဲ့ သုတေသနပစ္စည်းတွေကလည်း ကွမ်ဖူ စစ်တပ်ဆီကနေ အမွေရထားတာဆိုတော့... နည်းပညာပိုင်းအရ ကျွန်တော်တို့က အရိပ်တပ်ဖွဲ့ ထက် သေချာပေါက် ပိုသာနေမှာပေါ့"

လူတိုင်းလည်း မျက်ဝါးထင်ထင် တွေ့မြင်နေရသည်။ ထိုက်ယန်တောင် ဘက်မှ ယာဉ်ပျံဖြစ်စေ၊ စစ်သင်္ဘောဖြစ်စေ အလွန် ပြင်းထန်သော တိုက်ခိုက်ရေးစွမ်းအားကို ပြသနေပြီး တစ်ဖက်မှ အရိပ်တပ်ဖွဲ့ များ လုံးဝ မတားဆီးနိုင်ပေ။

ထိုအချိန်တွင် အရိပ်တပ်ဖွဲ့ ၏ ဧရာမ ရေပေါ်ကျွန်းကြီး ဖြစ်သော 'ပေ့မင်' ကလည်း အခြေအနေမဟန်သည်ကို ရိပ်မိသွားပြီး ကျွန်းတစ်ခုလုံး အလျင်အမြန် အရှိန်လျှော့ကာ ရပ်တန့်လိုက်သည်။

တစ်ချိန်တည်းမှာပင် ပေ့မင် ရေပေါ်ကျွန်း စစ်စခန်းအတွင်း၌။

ပေ့မင်လန် သည် ရှေ့တန်းမှ ပြန်လည်ပို့ဆောင်လာသော စစ်သတင်းများကို လက်ခံရရှိနေပြီ ဖြစ်သည်။

ပေ့မင်လန် သည် ယခုနှစ်တွင် အသက် ၄၂ နှစ် ရှိပြီဖြစ်ကာ အရပ်မှာ (၅) ပေ (၇) လက်မ ပင် မပြည့်ချေ။ သူသည် သူတို့၏ ရိုးရာဝတ်စုံကို ဝတ်ဆင်ထားပြီး ဆံပင်များကို ဖားလျားချထားသည်။

ယခုအချိန်တွင် သူ၏ မျက်နှာသည် ဒေါသကြောင့် မည်းမှောင်နေပြီး သတင်းလာပို့သော တပည့်ကို ကြည့်ကာ ဒေါသတကြီး အော်ဟစ်လိုက်သည်။ "တိုက်ပွဲစတာ ဘယ်လောက်ကြာသေးလို့လဲ... မင်းတို့က ဒီလောက်တောင် အသေအပျောက် များနေပြီလား"

"အသုံးမကျတဲ့ကောင်တွေ... အလကားကောင်တွေ... ငါတို့ အရိပ်တပ်ဖွဲ့ထဲမှာ ဘယ်လိုလုပ် မင်းတို့လို အသုံးမကျတဲ့ကောင်တွေ ရှိနေရတာလဲ"

ထိုလက်အောက်ငယ်သားမှာ လုံးဝ ပြန်မပြောရဲဘဲ ခေါင်းငုံ့ကာ မဝံ့မရဲ ဖြေလိုက်သည်။ "ကျွန်းသခင်... ဒီရန်သူတွေက အရင်ရန်သူတွေနဲ့ မတူတဲ့ပုံပဲ"

"သူတို့ဆီမှာ အဆင့်မြင့် လက်နက်တွေ ရှိနေရုံတင်မကဘူး... တိုက်ပွဲဝင် စိတ်ဓာတ်ကလည်း အရမ်းပြင်းထန်တယ်"

"ကျွန်တော်တို့က ဟိုဘက်က ပြည်မကြီး ရဲ့ အထူးတပ်တွေနဲ့များ တွေ့နေရတာလားလို့ သံသယဖြစ်မိတယ်"

"တောက်"

ပေ့မင်လန် က ဒေါသတကြီး အော်ဟစ်ဆဲဆိုလိုက်သည်။ "ပေါက်ကရတွေ လျှောက်ပြောမနေနဲ့... သူတို့ရဲ့ ပင်မတပ်ဖွဲ့ ကို ငါတို့ အရင်က မတိုက်ခဲ့ဖူးတာလည်း မဟုတ်ဘူး... သူတို့က ဝက်လိုကောင်တွေချည်းပဲ"

"ဘာကို ကြောက်စရာရှိလို့လဲ... ငါတို့ လမ်းတစ်လျှောက်လုံး သတ်ဖြတ်လာခဲ့တာ... သူတို့မှာ လုံးဝ ခုခံနိုင်စွမ်း မရှိခဲ့ဘူး"

"ငါ့အမိန့်ကို နာခံစမ်း... ဓာတ်ရောင်ခြည်ဗုံး တွေကို အဆင်သင့်ပြင်ထား... အဲ့ဒီကောင်တွေကို သန္ဓေပြောင်း သတ္တဝါဆိုး တွေဖြစ်အောင် အကုန် ပြောင်းလဲပစ်လိုက်"

"သူတို့အချင်းချင်း ပြန်သတ်ကြတာကို ငါ မြင်ချင်တယ်"

ပေ့မင်လန် က အဆက်မပြတ် ဟိန်းဟောက်နေလေသည်။

အောက်ဘက်ရှိ လက်အောက်ငယ်သားကလည်း အလျင်အမြန် ခေါင်းညိတ်ပြီး ဓာတ်ရောင်ခြည်ဗုံးများကို ပြင်ဆင်ရန် အမြန် ထွက်သွားတော့သည်။

ပေ့မင်လန် ၏ ဘေးတွင် ရပ်နေသော အရိပ်တပ်ဖွဲ့ မှ အဘိုးအိုတစ်ဦးက လေးနက်သောအသံဖြင့် ပြောလိုက်သည်။ "အရှင်ပေ့မင်... ဒီတစ်သုတ် ရောက်လာတဲ့ ရန်သူတွေက တကယ်ပဲ သိပ်ရိုးရှင်းမယ့်ပုံ မပေါ်ဘူးနော်"

ပေ့မင်လန် က သူ့ကို လှည့်ကြည့်ပြီး မေးလိုက်သည်။ "ဟိုင်လုံ... ခင်ဗျားကပါ အဲ့ဒီလို ပြောနေတာလား"

ဟိုင်လုံကျန့် က ခေါင်းညိတ်လိုက်ပြီး လေးနက်စွာ ပြောသည်။ "ဒီ ပြည်မကြီးက ကပ်ဘေးမတိုင်ခင်က တော်တော်လေး အင်အားကြီးခဲ့တာ... သူတို့ရဲ့ အခြေခံအုတ်မြစ်က ခိုင်မာတယ်လေ... ရေဘေးကြီးကြောင့် လူတွေ အများကြီး သေဆုံးခဲ့ရတယ် ဆိုရင်တောင်မှ အသက်ရှင်ကျန်ရစ်သူ အရေအတွက်က သေချာပေါက် ငါတို့ထက် ပိုများနေမှာပဲ"

"ငါတို့က ရေဘေးကြီး မတိုင်ခင်ကတည်းက ခိုလှုံရေးစခန်းတွေကို ကြိုတင် တည်ဆောက်ထားခဲ့လို့သာ ဘေးအန္တရာယ်ကို ပထမဆုံးအချိန်မှာ ရှောင်လွှဲနိုင်ခဲ့တာ"

"ဒါပေမဲ့ မမေ့နဲ့ဦး... ပြည်မကြီး ရဲ့ မြေမျက်နှာပြင် အမြင့်က ငါတို့ဆီထက် အများကြီး ပိုမြင့်တယ်"

"ငါတို့ဘက်မှာ ရေဘေး အကြီးအကျယ် ခံရတယ်ဆိုရင်တောင် ပြည်မကြီး ရဲ့ မြေမြင့်ပိုင်း ဒေသတွေကတော့ အလွယ်တကူ ရေလွှမ်းခံရမှာ မဟုတ်ဘူး... သူတို့မှာ ရေဘေးကို ရင်ဆိုင်ဖို့ ပြင်ဆင်ချိန် အလုံအလောက် ရှိခဲ့မှာပဲ"

"ဒီ ပြည်မကြီးကလူတွေ က ကပ်ဘေးမတိုင်ခင်က နည်းပညာတချို့ကို ထိန်းသိမ်းထားနိုင်ခဲ့တာ ဖြစ်နိုင်တယ်လို့ ငါ သံသယဖြစ်မိတယ်... ဒါကြောင့်လည်း အခုလို အင်အားကြီးတဲ့ ခိုလှုံရေးစခန်းကို တည်ဆောက်နိုင်ခဲ့တာ ဖြစ်မယ်"

ပေ့မင်လန် က အေးစက်သောအသံဖြင့် "အဲ့ဒီလိုဆိုရင်တောင်... သူတို့က ငါတို့ရဲ့ ဓာတ်ရောင်ခြည်ဗုံး ကို ခုခံနိုင်မယ်လို့ ထင်နေတာလား"

"ဘယ်လိုပဲဖြစ်ဖြစ်... ဒီကောင်တွေကို တစ်ကြိမ်လောက် ဗုံးမကြဲလိုက်ရရင် ငါကတော့ လက်လျှော့မှာ မဟုတ်ဘူး"

"ခင်ဗျား မမေ့နဲ့... ဟိုးအရင်တုန်းက ငါတို့ရဲ့ကြယ်စင်မဟာမိတ် တွေက ပထမဆုံး အဏုမြူဗုံး ကို အသုံးပြုပြီး ဒုတိယကမ္ဘာစစ်ကြီးကို ဆုံးခန်းတိုင်စေခဲ့တာ"

"ဒီတစ်ကြိမ်မှာလည်း ငါတို့က ကြယ်စင်မဟာမိတ် တွေကို အတုယူပြီး ဒီရန်သူတွေကို အမြစ်ပြတ်သွားအောင် ဗုံးကြဲပစ်ရမယ်... သူတို့တွေ ဓာတ်ရောင်ခြည်ဗုံး ကို ဖြေရှင်းမယ့်နည်းလမ်း မရှာတွေ့ခင်မှာ အပြတ်ကို ရှင်းပစ်ရမယ်"

ဟိုင်လုံကျန့် လည်း ထိုစကားကို ကြားပြီးနောက် ခေါင်းကို ဖြည်းညင်းစွာ ညိတ်ကာ ပြောလိုက်သည်။ "ငါက သူတို့ကို မသတ်ဘူးလို့ ပြောနေတာ မဟုတ်ဘူး... ငါတို့ သတိထားဖို့ လိုတယ်လို့ ပြောတာပါ... ဒီရန်သူတွေက အရင်ရန်သူတွေနဲ့ သိပ်မတူဘူးလေ"

"ဒီရန်သူတွေကို ငါတို့ မဖြစ်မနေ သတိထားရမယ်... အထင်သေးမိလို့ အရေးနိမ့်တာမျိုး လုံးဝ အဖြစ်မခံနိုင်ဘူး"

ပေ့မင်လန် က ဟားတိုက်ရယ်မောလိုက်ပြီး "စိတ်ချပါ ဟိုင်လုံ... ငါ့ ပေ့မင် တပ်ဖွဲ့က စစ်သည်တွေက အစွမ်းအထက်ဆုံးပဲ... ပြီးတော့ ငါတို့မှာ ဓာတ်ရောင်ခြည်ဗုံး ဆိုတဲ့ အစွမ်းထက် လျှို့ဝှက်လက်နက် ရှိသေးတယ်လေ"

"သွားမယ်... ငါတို့ အတူတူ ထွက်သွားပြီး ဒီကောင်တွေ ဓာတ်ရောင်ခြည်သင့်ပြီး သန္ဓေပြောင်း သတ္တဝါဆိုး တွေအဖြစ် ဘယ်လို ပြောင်းလဲသွားမလဲဆိုတာ သွားကြည့်ကြတာပေါ့"

ထိုသို့ ပြောပြီးနောက် သူက ဟိုင်လုံကျန့် ကို ခေါ်ကာ နှစ်ယောက်သား စစ်စခန်းထဲမှ ထွက်ခွာပြီး ကျွန်းအပြင်ဘက်သို့ ထွက်လာခဲ့ကြသည်။

ယခုအချိန်တွင် တိုက်ပွဲမှာ တစ်ဖက်သတ် အနိုင်ရနေသည့် အခြေအနေသို့ ရောက်ရှိနေပြီ ဖြစ်သည်။

ထိုက်ယန်တောင် ယာဉ်ပျံများနှင့် စစ်သင်္ဘောများ၏ ပြင်းထန်သော တိုက်ခိုက်မှုအောက်တွင် တစ်ဖက်မှ အရိပ်တပ်ဖွဲ့ ယာဉ်ပျံများသည် ဆက်တိုက် ဆုတ်ခွာ ထွက်ပြေးနေကြရသည်။

တစ်ချိန်တည်းမှာပင် ပေ့မင် ရေပေါ်ကျွန်းကြီး ရုတ်တရက် တုန်ခါသွားပြီး ကျွန်းပေါ်ရှိ အကာအကွယ် မှ တံခါးပေါက်ကြီး တစ်ခု ပွင့်လာလေသည်။

ထို့နောက် ချက်ချင်းပင် ယာဉ်ပျံများ တစ်စီးပြီးတစ်စီး အရှိန်အဟုန်ဖြင့် ပျံသန်းထွက်ပေါ်လာကြသည်။

ထိုယာဉ်ပျံများ၏ ပုံစံမှာ ယခင်ယာဉ်ပျံများနှင့် သိသိသာသာ ကွာခြားနေသည်။

ယာဉ်ပျံတစ်စီးစီ၏ အောက်ခြေတွင် ဧရာမ ကျည်သေတ္တာကြီးများ တပ်ဆင်ထားသည်။

ထိုယာဉ်ပျံများ ထွက်ပေါ်လာသည်နှင့် တစ်ပြိုင်နက် ထိုက်ယန်တောင် ၏ စစ်သင်္ဘောအုပ်စုဆီသို့ အပြင်းအထန် ပစ်ခတ်လိုက်ကြသည်ကို တွေ့လိုက်ရသည်။

မျက်တောင်တစ်ခတ်အတွင်းမှာပင် ထိုသေတ္တာကြီးများထဲမှ ဧရာမ သတ္တုအမြောက်ဆံကြီးများ အရှိန်ပြင်းစွာဖြင့် ပစ်ထွက်သွားလေသည်။

"ဝုန်း"

ကြီးမားသော ပေါက်ကွဲသံကြီး ထွက်ပေါ်လာပြီး အမြောက်ဆံများက ကောင်းကင်ကို ခွဲထွက်ကာ ထိုက်ယန်တောင် စစ်သင်္ဘောများ အပြင်ဘက်ရှိ စွမ်းအင်အကာအကွယ်များပေါ်သို့ ဝင်တိုက်သွားလေသည်။

ချက်ချင်းပင် ပြင်းထန်သော စွမ်းအင်လှိုင်းများ ပေါက်ကွဲထွက်လာသည်။

ထို့နောက် မျက်စိကျိန်းမတတ် စူးရှသော အလင်းဖြူတန်းများက အရှိန်အဟုန်ဖြင့် ပြန့်ကားလာလေသည်။

ထိုအလင်းဖြူတန်းများထဲတွင် ပြင်းထန်သော ဓာတ်ရောင်ခြည်လှိုင်းများ ပါဝင်နေသည်။

စစ်သင်္ဘောများပေါ်ရှိ အကာအကွယ်များပင်လျှင် ခဏတာမျှသာ တောင့်ခံနိုင်ပြီး ဓာတ်ရောင်ခြည်လှိုင်းများ၏ ထိုးဖောက်စားသုံးခြင်းကို ခံလိုက်ရတော့သည်။

ဤမြင်ကွင်းကို မြင်လိုက်ရသောအခါ လင်းယွမ် ဘေးရှိ ချွီကျင့် ၏ မျက်နှာကြီး ပျက်ယွင်းသွားပြီး "မကောင်းတော့ဘူး... ဓာတ်ရောင်ခြည်ဗုံး တွေပဲ" ဟု ချက်ချင်း အော်ဟစ်လိုက်သည်။

မုန့်ဟူ လည်း မျက်နှာပျက်သွားကာ "ဆရာလင်း... လူတွေကို အမြန် သတိထားခိုင်းလိုက်ပါဦး" ဟု အော်ပြောလိုက်သည်။

လင်းယွမ် ကမူ အမူအရာ တည်ငြိမ်နေဆဲဖြစ်ပြီး "စစ်သင်္ဘောအားလုံး အမိန့်နာခံ... စွမ်းအင်ချိတ်ပိတ် အစီအရင် တွေကို ဖွင့်လိုက်" ဟု အော်ဟစ် အမိန့်ပေးလိုက်သည်။

"ဝုန်း... ဝုန်း... ဝုန်း"

နောက်တစ်ခဏတွင် စစ်သင်္ဘောအားလုံး၏ အပေါ်၌ ဧရာမ သင်္ကေတ အစီအရင် အလင်းရောင်များ အသီးသီး လင်းလက်လာကြသည်။

အစီအရင် အတွင်း၌ ချိတ်ပိတ် သင်္ကေတ က လည်ပတ်နေပြီး အလင်းရောင်များ ဖြာထွက်လာသည်။

မူလက ပေါက်ကွဲထွက်နေသော ဓာတ်ရောင်ခြည်လှိုင်းများသည် စွမ်းအင်ချိတ်ပိတ် အစီအရင် ၏ လွှမ်းခြုံမှုကို ခံလိုက်ရသည့် အခိုက်အတန့်တွင် သာမန်မျက်စိဖြင့်ပင် မြင်နိုင်လောက်သော အရှိန်နှုန်းဖြင့် လျင်မြန်စွာ ပျောက်ကွယ်သွားသည်ကို တွေ့လိုက်ရသည်။

တစ်ချိန်တည်းမှာပင် အရိပ်တပ်ဖွဲ့ ၏ ယာဉ်ပျံများပေါ်မှ ဆက်လက် ပစ်ခတ်နေဆဲဖြစ်ကာ ဓာတ်ရောင်ခြည်ဗုံး အမြောက်အမြားက ထိုက်ယန်တောင် ၏ စစ်သင်္ဘောအုပ်စုဆီသို့ ရူးသွပ်စွာ ပစ်လွှတ်နေကြသည်။

ဓာတ်ရောင်ခြည်ဗုံး အများအပြားသည် စွမ်းအင်ချိတ်ပိတ် အစီအရင် ထဲသို့ ကျရောက်သွားပြီးနောက် ပေါက်ကွဲရန်ပင် မဖြစ်နိုင်တော့ချေ။

အကြောင်းမှာ ဓာတ်ရောင်ခြည်ဗုံးများ၏ ပေါက်ကွဲစေသော စနစ်သည်လည်း သန္ဓေပြောင်းစွမ်းအင် သင်္ကေတ ဖြင့် ပေါက်ကွဲစေသည့် နည်းလမ်းကို အသုံးပြုထားသောကြောင့်ပင် ဖြစ်သည်။

ဤနည်းလမ်းသည် စွမ်းအင်ချိတ်ပိတ် အစီအရင် အတွင်း၌ လုံးဝ အသက်မဝင်နိုင်တော့သဖြင့် ပေါက်ကွဲခြင်းမရှိသော ဗုံးခွံအလွတ် အများအပြား ဖြစ်ပေါ်လာတော့သည်။

ဤမြင်ကွင်းကြောင့် ပွဲကြည့်ရန် စောင့်နေကြသော အရိပ်တပ်ဖွဲ့ဝင် များအားလုံး ချက်ချင်းပင် မျက်လုံးပြူး မျက်ဆံပြူး ဖြစ်သွားကြလေတော့သည်။

ဆက်ရန်...