အခန်း ၉၂၀

အပိုင်း (၉၂၀) အရှင်ဖမ်းရမယ်

အနီးကပ် တိုက်ပွဲဖြစ်နေသဖြင့် အရိပ်တပ်ဖွဲ့ဝင်များပင်လျှင် ကိုယ့်လူများ ထိခိုက်မည်ကို စိုးရိမ်သောကြောင့် ဓာတ်ရောင်ခြည်ဗုံးများကို အလွယ်တကူ မသုံးရဲကြပေ။

ထိုအချိန်တွင် ဟိုင်လုံက သန္ဓေပြောင်း မျိုးရိုးဗီဇပုံစံဖြင့် ရှေ့တန်းသို့ တရှိန်ထိုး ဝင်ရောက်တိုက်ခိုက်နေပြီ ဖြစ်သည်။

သူက ထိုစစ်သင်္ဘောပေါ်သို့ အတင်းဝင်ရောက်ကာ ဒီလူတွေက ဘာကိုအားကိုးပြီး ဓာတ်ရောင်ခြည်ဗုံး ပေါက်ကွဲမှုကို တားဆီးနိုင်ခဲ့သလဲ ဆိုတာကို သိချင်နေသည်။

"ဝုန်း... ဝုန်း.... ဝုန်း"

ကောင်းကင်ပေါ်ရှိ စစ်သင်္ဘောပေါ်မှ စွမ်းအင်ဗုံးများ ဆက်တိုက် ပစ်ခတ်လာပြီး ဟိုင်လုံကို ဗုံးကြဲတိုက်ခိုက်လေသည်။

ဟိုင်လုံ၏ မျိုးရိုးဗီဇ သဏ္ဍာန်က အလွန်ထူးခြားပြီး ဧရာမ ပင်လယ်မိစ္ဆာကြီး တစ်ကောင် ဖြစ်သည်။

ထို ပင်လယ်မိစ္ဆာကြီးတွင် လူတစ်ဝက်နှင့် ရေဘဝဲတစ်ဝက် ပုံစံရှိသည်။

ခန္ဓာကိုယ် အထက်ပိုင်းက လူသားပုံစံဖြစ်ပြီး မီးခိုးပြာရောင် ဖောက်ထွင်းမြင်နိုင်သော အရေပြား ရှိကာ မျက်နှာပေါ်တွင် မျက်ခွံမပါသော ငွေရောင် မျက်လုံးပြူးကြီးများ ရှိသည်။ နားရွက်အထိ ပြဲနေသော ပါးစပ်ကြီးထဲတွင် ပုလဲရောင် အလွှာများဖြင့် ဖွဲ့စည်းထားသော သေးငယ်ချွန်ထက်သည့် သွားများ ပြည့်နှက်နေ၏။

အောက်ပိုင်းကမူ ရေဘဝဲလက်တံများကဲ့သို့ ခြေလက်များဖြစ်ပြီး စုစုပေါင်း ခုနစ်ချောင်း ရှိသည်။

ရေပေါ်တွင် လျှောတိုက်သွားသည်ဖြစ်စေ လေထဲတွင် ပျံသန်းသည်ဖြစ်စေ အလွန် လျင်မြန်လှသည်။

ပတ်ဝန်းကျင်မှ စွမ်းအင်အမြောက်ဆန်များ ပစ်ခတ်လာသောအခါ သူ၏ ခန္ဓာကိုယ်ပတ်လည်တွင် စွမ်းအင်အကာအကွယ်တစ်ခု ပေါ်လာပြီး ထိုတိုက်ခိုက်မှုများကို လျင်မြန်စွာ ကာကွယ်လိုက်သည်။

ဟိုင်လုံက အလွန်မြန်ဆန်သော အလျင်ဖြင့် ထိုက်ယန်တောင် စစ်သင်္ဘောကြီးတစ်စင်းရှေ့သို့ ရောက်လာပြီး သူ၏ မျက်နှာတွင် ကြောက်မက်ဖွယ်ကောင်းသော အမူအရာများ ပေါ်လာသည်။

"မင်းတို့ကောင်တွေဆီမှာ ဘာတွေများ ထူးဆန်းနေသလဲ ဆိုတာ ကြည့်ရသေးတာပေါ့"

ပြောပြောဆိုဆိုနှင့် သူ၏ လက်တံတစ်ချောင်းက ကွေးညွှတ်ထွက်ပေါ်လာပြီး စစ်သင်္ဘောကြီးကို ရစ်ပတ်လိုက်သည်။

သို့သော် ထိုအချိန်မှာပင် စစ်သင်္ဘောကြီးပေါ်မှ လူရိပ်တစ်ခု ချက်ချင်း ခုန်ထွက်လာလေသည်။

ထို့နောက် ထိုလူရိပ်က လျင်မြန်စွာ ကြီးထွားလာပြီး သွေးမြူများ လည်ပတ်ကာ ဧရာမ အပြာရောင် ပင်လယ်ကဏန်းကြီး တစ်ကောင် လေထဲတွင် ပေါ်လာ၏။

ထို အပြာရောင် ကဏန်းကြီး၏ ကိုယ်ပေါ်တွင် ကျားသစ်ကွက်များ အများအပြား ရှိပြီး ဧရာမ လက်မကြီး နှစ်ချောင်းက ဧရာမ ကတ်ကြေးကြီး နှစ်လက်နှင့် တူနေသည်။

"ဘုန်း"

အပြာရောင် ကဏန်းကြီး၏ ကျားသစ်ကွက် လက်မကြီးက ဟိုင်လုံ၏ လက်တံပေါ်သို့ အားကုန် ရိုက်ချလိုက်ရာ ကြီးမားလှသော အသံကြီး ထွက်ပေါ်လာသည်။

ဟိုင်လုံက လက်တံမှ ပြင်းထန်သော နာကျင်မှုကို ခံစားလိုက်ရပြီး ချက်ချင်း ပြန်ရုပ်လိုက်သည်။ သူက ထို အပြာရောင် ကဏန်းကြီးကို ဒေါသတကြီး စိုက်ကြည့်လိုက်ပြီး တစ်ဖက်လူက မည်သူဖြစ်ကြောင်း မှတ်မိသွားသည်။

"မုန့်ဟူ"

သူက မပီမသ လေယူလေသိမ်းဖြင့် ဒေါသတကြီး အော်ဟစ်လိုက်သည်။

ထင်ရှားစွာပင် သူနှင့် အပြာရောင် ကဏန်းကြီးအဖြစ် ပြောင်းလဲသွားသော မုန့်ဟူတို့ ယခင်က တိုက်ခိုက်ဖူးကြပုံ ရသည်။

မုန့်ဟူက လက်မကြီး နှစ်ချောင်းကို မြှောက်ကာ လူအသံဖြင့် အော်လိုက်သည်။ "လူယုတ်မာကောင်တွေ... အသနားခံလည်း အလကားပဲ... ဒီနေ့က မင်းတို့ တိရစ္ဆာန်အုပ်စုရဲ့ နောက်ဆုံးနေ့ပဲ"

"ခွေးကောင်"

ဟိုင်လုံက ဒေါသတကြီး ဟိန်းဟောက်လိုက်ပြီး ပါးစပ်ကို ဟလိုက်ရာ ကြီးမားသော စွမ်းအင်များ ချက်ချင်း စုစည်းလာလေသည်။

"အား"

ဧရာမ အသံလှိုင်းကြီး တစ်ခုက သူ၏ ပါးစပ်ထဲမှ စူးစူးဝါးဝါး ထွက်ပေါ်လာ၏။

ပြင်းထန်သော အသံလှိုင်းကြီးထဲတွင် ကြောက်မက်ဖွယ်ကောင်းသော စိတ်စွမ်းအင် တိုက်ခိုက်မှု ပါဝင်နေသည်။

၎င်းက သူ၏ ပင်လယ်မိစ္ဆာ အစွမ်းပင် ဖြစ်သည်။

မျက်တောင်တစ်ခတ်အတွင်းမှာပင် မုန့်ဟူက ခေါင်းကွဲမတတ် နာကျင်လာမှုကို ခံစားလိုက်ရပြီး ဧရာမ ခန္ဓာကိုယ်ကြီးက အရက်မူးနေသူအလား ယိမ်းယိုင်သွားလေသည်။

ထိုအခွင့်အရေးကို အသုံးချကာ ဟိုင်လုံက လက်တံအချို့ကို ထိန်းချုပ်ပြီး ကဏန်းကြီး၏ ခန္ဓာကိုယ်ကို ရူးသွပ်စွာ ရိုက်နှက် တိုက်ခိုက်တော့သည်။

ကဏန်းကြီး၏ အခွံက ထူထဲလေးလံသော်လည်း အရိုက်ခံရမှုကြောင့် တဖြည်းဖြည်း နောက်ဆုတ်သွားရသည်။

ခွန်အားပိုင်းတွင် ဤ ပင်လယ်မိစ္ဆာက ကဏန်းကြီးထက် လုံးဝ မနိမ့်ကျပေ။

သိသာထင်ရှားစွာပင် ဟိုင်လုံ၏ အဓိက အရည်အသွေးက စိတ်စွမ်းအင် ဖြစ်သော်လည်း ဒုတိယ အရည်အသွေးက ခွန်အား ဖြစ်နေသည်။

မုန့်ဟူကမူ ရေဓာတ် ဖြစ်သော်လည်း သူ၏ ဒုတိယ အရည်အသွေးက ခွန်အား မဟုတ်ဘဲ အလျင် ဖြစ်နေ၏။

နှစ်ဖက် အကြိတ်အနယ် တိုက်ခိုက်ကြရာတွင် မုန့်ဟူက ချက်ချင်းပင် အထိနာသွားသည်။

"ဝုန်း"

ခန္ဓာကိုယ်က ခံနိုင်ရည်မရှိတော့သည်ကို မြင်သောအခါ မုန့်ဟူက သူ၏ သန္ဓေပြောင်းအစွမ်းကို ချက်ချင်း အသက်သွင်းလိုက်ပြီး ဧရာမ ခန္ဓာကိုယ်ကြီးက ဧရာမ ရေလှိုင်းကြီးအဖြစ် ချက်ချင်း ပြောင်းလဲကာ မျက်စိတစ်မှိတ်အတွင်း ထွက်ပြေး ပျောက်ကွယ်သွားသည်။

ထို့နောက် ရေအောက်ရှိ ဧရာမ လှိုင်းလုံးကြီးများ လိမ့်တက်လာပြီး ဧရာမ ရေလှိုင်းလက်မကြီး တစ်ခုအဖြစ် ပုံဖော်ကာ ဟိုင်လုံ၏ ပင်လယ်မိစ္ဆာထံသို့ အားကုန် ရိုက်ချလိုက်လေသည်။

ဟိုင်လုံက အေးစက်စက် ပြုံးလိုက်ပြီး သူ၏ စိတ်စွမ်းအင်ကို ကြောက်မက်ဖွယ် စူးစူးဝါးဝါး အော်သံအဖြစ် ချက်ချင်း ပြောင်းလဲလိုက်သည်။

နားစည်ကို ဆုတ်ဖြဲမတတ် ကြောက်မက်ဖွယ် အသံလှိုင်းကြီးက ဧရာမ ရေလှိုင်းကြီးကို ချက်ချင်း ရိုက်ချိုး ဖျက်ဆီးပစ်လိုက်၏။

မလှမ်းမကမ်းတွင် ရှိနေသော လင်းယွမ်က ထိုမြင်ကွင်းကို ကြည့်ရင်း မျက်ခုံးပင့်လိုက်ကာ "ဒီ အရိပ်တပ်ဖွဲ့ကောင်က နည်းနည်းတော့ အစွမ်းအစ ရှိသားပဲ... ကျွန်းသခင်မုန့်က သူ့ပြိုင်ဘက် မဟုတ်လောက်ဘူး" ဟု ပြောလိုက်သည်။

ဘေးနားရှိ ချွီကျင့်က ချက်ချင်း ဝင်ပြောသည်။ "ဆရာလင်း... ကျွန်တော် သွားလိုက်မယ်"

လင်းယွမ်က သူ့ကို တစ်ချက် ကြည့်လိုက်ပြီး ပြုံးလျက် "ခင်ဗျား သေချာလား"

ချွီကျင့်က ခါးသက်သက် ပြုံးရင်း ခေါင်းခါလိုက်သည်။ "တစ်ယောက်ချင်း တိုက်ဖို့ကတော့ ကျွန်တော့်မှာ အစွမ်းမရှိပါဘူး... ဒါပေမဲ့ ကျွန်းသခင်မုန့်နဲ့သာ ပူးပေါင်းလိုက်ရင် မနိုင်စရာ အကြောင်းမရှိဘူး"

လင်းယွမ်က ခပ်ဖွဖွ ရယ်မောလိုက်ပြီး "အချိန်ကုန်တယ်"

"အခု ဒီ အရိပ်တပ်ဖွဲ့ဝင်တွေရဲ့ အခြေခံ အစွမ်းကို စမ်းသပ်လို့ သိပြီးပြီပဲ... အချိန်ဆွဲနေစရာ မလိုတော့ဘူး"

"ဝမ်ထျန်အန်း... မင်း သွားရှင်းလိုက်ပါ"

ဝမ်ထျန်အန်းက ထွက်လာပြီး သွားဖြီးပြုံးလိုက်ကာ "ဆရာလင်း... စောင့်သာ ကြည့်နေလိုက်... ဒီကောင်ကို ကျွန်တော့်တာဝန်ယူတယ်"

ယခုအချိန်တွင် ဝမ်ထျန်အန်းသည် ထိုက်ယန်တောင်၌ တစ်လခန့် နေထိုင်ခဲ့ပြီးနောက် စွမ်းအားများ ထပ်မံ တိုးတက်လာခဲ့ပြီ ဖြစ်သည်။

ယခင်ကတည်းက သူသည် လင်းယွမ်၏ တိုက်ခိုက်မှုများကို အချက်ပေါင်းများစွာ တောင့်ခံနိုင်ခဲ့ပြီး ထိုအချိန်က သူ၏ မျိုးရိုးဗီဇ ပြန်လည်ဖွဲ့စည်းခြင်း အဆင့်မှာပင် ၆၀% အထက်သို့ ရောက်ရှိနေခဲ့ပြီ ဖြစ်သည်။

ယခု တစ်လကြာပြီးနောက် သူ၏ စွမ်းအားများ ထပ်မံ မြင့်တက်လာကာ ၆၅% ဝန်းကျင်အထိ ရောက်ရှိနေပြီ ဖြစ်၏။

ဤမျှလောက် စွမ်းအားမျိုးနှင့် မျိုးရိုးဗီဇ ပြန်လည်ဖွဲ့စည်းခြင်း အဆင့် ၅၅% ဝန်းကျင်သာ ရှိသော ဟိုင်လုံကဲ့သို့ အစွမ်းပိုင်ရှင်ကို ရင်ဆိုင်ရသည်မှာ အလွန်လွယ်ကူသော ကိစ္စရပ်ပင်။

အထူးသဖြင့် သူ၏ သန္ဓေပြောင်းအစွမ်းက ဟင်းလင်းပြင် အမျိုးအစားနှင့် သက်ဆိုင်နေသည် မဟုတ်ပါလော။

"ဝှစ်"

ဝမ်ထျန်အန်းက တစ်ချက် လှုပ်ရှားလိုက်သည်နှင့် လေထဲသို့ ရောက်ရှိသွားသည်ကို မြင်လိုက်ရသည်။

သူ့တစ်ကိုယ်လုံးက ပေနှစ်ရာနီးပါး ကြီးမားသော ဧရာမ ပုစဉ်းရင်ကွဲကြီး အဖြစ်သို့ ပြောင်းလဲသွားလေသည်။

၎င်းက သူ၏ မျိုးရိုးဗီဇ သဏ္ဍာန်ဖြစ်သော ကြယ်စင် ပုစဉ်းရင်ကွဲပင်တည်း။

"ဝှစ်... ဝှစ်"

ကြယ်စင် ပုစဉ်းရင်ကွဲက အကြိမ်အနည်းငယ် လှည့်ပတ်ပျံသန်းပြီးနောက် ဟိုင်လုံ၏ အထက်ကောင်းကင်ယံသို့ ရောက်ရှိသွားသည်။

ဟိုင်လုံက မုန့်ဟူ ပြောင်းလဲထားသော ကဏန်းကြီးကို ဖိနှိပ်တိုက်ခိုက်နေစဉ် ရုတ်တရက် တစ်စုံတစ်ခု မှားယွင်းနေကြောင်း ခံစားလိုက်ရ၏။

သူ၏ အနောက်ဘက်ရှိ လေထုများ လိမ်ကောက်သွားသံကို ကြားလိုက်ရပြီး တစ်ခုခုက ဝင်ရောက်တိုက်ခိုက်လာသကဲ့သို့ ခံစားလိုက်ရသည်။

သူ အလျင်အမြန် လှည့်ကြည့်လိုက်လေသည်။

ဟင်းလင်းပြင် လိမ်ကောက်မှုမှ ဖြစ်ပေါ်လာသော ထက်မြက်သည့် ဓားသွားတစ်ခုက အဆုံးမဲ့ လေဟာနယ်ထဲမှ ခုတ်ပိုင်းလာသည်ကို မြင်လိုက်ရ၏။

ဟင်းလင်းပြင်အက်ကွဲ ဓားကွက်။

ဝမ်ထျန်အန်းက ရက်စက်စွာ ရယ်မောလိုက်ပြီး "သွားသေလိုက်စမ်း... ခွေးကောင်"

"ဖွပ်"

ပင်လယ်မိစ္ဆာကြီးမှာ ဟင်းလင်းပြင်အက်ကွဲဓားကွက်၏ တိုက်ရိုက် ခုတ်ပိုင်းခံလိုက်ရပြီး မျက်စိတစ်မှိတ်အတွင်း နှစ်ပိုင်းပြတ်သွားလေတော့သည်။

ချက်ချင်းပင် သွေးများ ပန်းထွက်သွားပြီး ပင်လယ်မိစ္ဆာ၏ နားကွဲမတတ် အော်ဟစ်သံကြီးမှာ ရုတ်တရက် ရပ်တန့်သွားသည်။

ထိုအခွင့်အရေးကို ယူကာ မုန့်ဟူက အရှိန်ဖြင့် ခုန်ထွက်လာပြီး ဧရာမ လက်မကြီး နှစ်ချောင်းဖြင့် ပင်လယ်မိစ္ဆာ၏ အထက်ပိုင်းကို ညှပ်ဖမ်းလိုက်သည်။

"ခွပ်"

လက်မကြီးက အားကုန် ညှပ်ချလိုက်ရာ ဤ ပင်လယ်မိစ္ဆာ၏ အထက်ပိုင်းသည် စက္ကန့်ပိုင်းအတွင်း နှစ်ပိုင်း ပြတ်ထွက်သွားလေသည်။

သူ၏ လက်မကြီး နှစ်ချောင်းက ရပ်တန့်မသွားဘဲ ရူးသွပ်စွာ ဆက်လက် ညှပ်ဖြတ်နေသဖြင့် မကြာမီ ရေပြင်ပေါ်တွင် အသားစများ အမြောက်အမြား ပေါလောပေါ်လာတော့သည်။

ချွီကျင့်နှင့် အခြားသူများက ထိုမြင်ကွင်းကို ကြည့်ရင်း အလွန်အမင်း တုန်လှုပ်သွားကြသည်။

ဆရာလင်း၏ လက်အောက်တွင် အစွမ်းထက်သူများ အမှန်တကယ် များပြားလွန်းလှသည်။

ကျပန်း ရွေးချယ် စေလွှတ်လိုက်သော လူတစ်ယောက်ကပင် သူတို့ အဓိက ရန်သူကြီးအဖြစ် သတ်မှတ်ထားသော အရိပ်တပ်ဖွဲ့ အစွမ်းပိုင်ရှင်ကို ဤမျှ လွယ်ကူစွာ သတ်ဖြတ်နိုင်ခဲ့သည် မဟုတ်ပါလော။

သူတို့ကို လမ်းတစ်လျှောက်လုံး လိုက်လံ သတ်ဖြတ်ခဲ့သော အရိပ်တပ်ဖွဲ့က ခွေးအိုကြီး ဟိုင်လုံ။

ဤနေရာတွင် ဤမျှ လွယ်ကူစွာ သေဆုံးသွားခဲ့ပြီ ဖြစ်သည်။

လူအချို့၏ မျက်နှာအမူအရာများ ရှုပ်ထွေးသွားပြီး လင်းယွမ်ကို ပြန်လည် ကြည့်ရှုလိုက်သောအခါ ကြောက်ရွံ့ ရိုသေမှုများစွာ တိုးပွားလာခဲ့သည်။

လင်းယွမ်က သူတို့၏ အတွေးများကို ဂရုမစိုက်ဘဲ "တပ်ဖွဲ့တစ်ခုလုံး တိုက်ခိုက်ကြ... ဒီကျွန်းကို သိမ်းလိုက်... ဟို ပေ့မင်လန် ဆိုတဲ့ကောင်ကို အရှင်ဖမ်း" ဟု အမိန့်ပေးလိုက်သည်။

"ဟုတ်ကဲ့ပါ... ဆရာ"

"ဆရာ... ကျွန်တော်တို့ဆီသာ လွှဲထားလိုက်ပါ"

လင်းယွမ်၏ အမိန့်ပေးသံနှင့်အတူ ခွန်ဆန်း၊ ဟန်ရှန်းမန်၊ ရှီဟိုင်ကျူး၊ ချန်ကျန့်ဖုန်း နှင့် အခြားသူများက အသီးသီး ဝင်ရောက် တိုက်ခိုက်ကြလေသည်။

စွမ်းအင်ပိတ်လှောင် အမြောက်တစ်ချက်က ပေ့မင် ရေပေါ်ကျွန်း တစ်ခုလုံးကို တိုက်ရိုက် ပိတ်ဆို့လိုက်သည်။

မျက်စိတစ်မှိတ်အတွင်းမှာပင် ပေ့မင် ရေပေါ်ကျွန်းရှိ သန္ဓေပြောင်းအစွမ်း အားလုံး တားမြစ်ခံလိုက်ရပြီး အစွမ်းပိုင်ရှင် အားလုံး မည်သည့် အစွမ်းကိုမျှ ထုတ်သုံး၍ မရတော့ပေ။

ထို့နောက် ဧရာမ အရွယ်အစားရှိသော မျိုးရိုးဗီဇ သားရဲကြီး ငါးကောင် ခြောက်ကောင်ခန့် ကမ်းရိုးတန်းတွင် ပေါ်လာကြသည်။

သူတို့က ကြောက်မက်ဖွယ်ကောင်းသော မျိုးရိုးဗီဇ သားရဲကြီးများအဖြစ် ပြောင်းလဲကာ တားဆီးမှု အားလုံးကို ဖယ်ရှားပြီး ပေ့မင် ရေပေါ်ကျွန်းပေါ်သို့ အင်အားသုံး၍ တက်ရောက်သွားကြ၏။

ပေ့မင် ရေပေါ်ကျွန်းပေါ်တွင် မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းထက်သူများသာ ပြန်လည် ခုခံနိုင်စွမ်း ရှိကြသည်။

နှမြောစရာကောင်းသည်မှာ ထို ပေ့မင် ရေပေါ်ကျွန်းမှ မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းထက်သူများ၏ စွမ်းအားက အလွန် ညံ့ဖျင်းလွန်းနေသည်။

အမြင့်ဆုံးဆို၍ ကျွန်းသခင် ပေ့မင်လန် သာလျှင် ရှိသည်။

သို့သော် ယခုအချိန်တွင် ပေ့မင်လန် သည်လည်း ခွန်အားကုန်ခမ်းနေပြီ ဖြစ်သည်။

အဘယ်ကြောင့်ဆိုသော် ကျွန်းပေါ်တွင် ကြိုတင် ပုန်းအောင်းနေခဲ့သော ထူလုံနှင့် ဝူယင် တို့က စတင် တိုက်ခိုက်နေပြီ ဖြစ်သောကြောင့်တည်း။

လွန်ခဲ့သော မိနစ်အနည်းငယ်က ပေ့မင်လန် ကို အရိပ်မည်းတစ်ခုက ရုတ်တရက် လွှမ်းခြုံသွားခဲ့သည်။

ထို့နောက် အရိပ်ထဲမှ ချွန်ထက်သော အရိပ်ဓားသွားတစ်ခုက ထိုးထွက်လာ၏။

ချက်ချင်းပင် သူ၏ အသားလုံးပုံစံ ခန္ဓာကိုယ်ကို ပြင်းထန်စွာ ဒဏ်ရာရသွားစေသည်။

၎င်းနောက် အရိပ်ထဲမှ ဧရာမ ကျားရိုင်းကြီး တစ်ကောင် ထပ်မံ ခုန်ထွက်လာလေသည်။

ထူလုံက ကျားရိုင်းကြီးအဖြစ် ပြောင်းလဲကာ ပေ့မင်လန် ၏ ကိုယ်ပေါ်သို့ ချက်ချင်း ခုန်တက်လိုက်သည်။

ကျားလက်သည်းများက အသားလုံးကြီးကို အားကုန် ဆုတ်ဖြဲလိုက်ရာ ချက်ချင်းပင် သွေးများ ပန်းထွက်သွားပြီး အသားစကြီးများ ပြဲထွက်သွားသည်။

ကျား၏ ကျောပေါ်မှ အရိုးခေါင်း လက်ဝါးကြီး နှစ်ခု ထွက်ပေါ်လာပြီး အသားလုံးကြီးထဲသို့ အားကုန် ထိုးသွင်းလိုက်၏။

ထို အရိုးခေါင်း လက်ဝါးကြီးက ပုံသဏ္ဍာန်မဲ့သော အရာတစ်ခုအလား အားကုန် ဆွဲထုတ်လိုက်ရာ ပေ့မင်လန် ကို တောင့်တင်းသွားသည့် အခြေအနေသို့ တိုက်ရိုက် ရောက်ရှိသွားစေသည်။

ထူလုံက အဆုံးသတ် သတ်ဖြတ်တော့မည့် အချိန်တွင် အဝေးမှ ကျောက်ရုပ်ကြီး တစ်ရုပ် လျင်မြန်စွာ ပျံသန်းလာပြီး "ထူလုံ... ဆရာလင်းက အရှင်ဖမ်းခိုင်းထားတယ်" ဟု ကျယ်လောင်စွာ အော်ဟစ်လိုက်သည်။

ထို ကျားရိုင်းကြီးက အသားလုံးကြီး၏ မျက်လုံးဆီသို့ ရိုက်ချတော့မည့် လက်သည်းများက လေထဲတွင် ရုတ်တရက် ရပ်တန့်သွားလေသည်။

အဝေးရှိ အရိပ်ထဲမှ တက်တူးဝိညာဉ် နတ်ဆရာ ပုံစံဖြင့် ထူလုံ ထွက်လာပြီး "အရှင် ဖမ်းရမယ်... ဒါဆို ဘယ်လို လုပ်ရမလဲ"

"မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိတဲ့ အစွမ်းပိုင်ရှင်ကို စွမ်းအင်ပိတ်လှောင် အစီအရင်က ထိန်းချုပ်လို့မှ မရတာ"

ထူလုံ အခက်တွေ့နေသည်မှာလည်း မဆန်းပေ။ မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းထက်သူများသည် စွမ်းအင်ပိတ်လှောင် အစီအရင်ထဲတွင် ရှိနေလျှင်တောင် ခန္ဓာကိုယ်ကို ပြောင်းလဲနိုင်စွမ်း ရှိကြသည်။

ဤကဲ့သို့ ပြောင်းလဲခြင်းက မျိုးရိုးဗီဇ အဆင့် ပြောင်းလဲခြင်း ဖြစ်ပြီး သန္ဓေပြောင်းအစွမ်း လည်ပတ်မှုနှင့် မပတ်သက်သောကြောင့် စွမ်းအင်ပိတ်လှောင် အစီအရင်က မတားဆီးနိုင်ပေ။

ဤ ပေ့မင်လန် က မျိုးရိုးဗီဇ ပြန်လည်ဖွဲ့စည်းခြင်း ပုံစံကို မဖြုတ်သရွေ့ သူ့ကို အပြည့်အဝ ထိန်းချုပ်နိုင်ရန် အလွန် ခက်ခဲလေသည်။

ရှီဟိုင်ကျူးက ဟားတိုက် ရယ်မောလိုက်ပြီး "မင်းက တုံးလိုက်တာ... အရှင်ဖမ်းခိုင်းတာက သူ့ကို ဒဏ်ရာမပေးရဘူးလို့ ပြောတာမှ မဟုတ်တာ"

"ဒီ ခွေးကောင်က ငါတို့လူတွေကို အများကြီး သတ်ထားတာ... သူ့ကို သတ်ပစ်လိုက်ရင်တောင် သက်ညှာရာကျနေဦးမယ်"

"ငါတို့ သူ့ရဲ့ ခြေလက်တွေကို ခုတ်ဖြတ်လိုက်မယ်... မသေရင် ပြီးတာပဲ မဟုတ်လား"

ထိုစကားကို ကြားလိုက်ရသောအခါ ထူလုံလည်း ချက်ချင်း သဘောပေါက်သွားပြီး ဟားတိုက် ရယ်မောကာ လက်မထောင်ပြလိုက်သည်။

"မင်းက တကယ့် ပါရမီရှင်ပဲကွာ... လာ... အဲဒီလိုပဲ လုပ်ကြမယ်... ဒီ ခွေးကောင်က ခံထိုက်ပါတယ်"

ပြောပြောဆိုဆိုနှင့် ပေ့မင်လန် တောင့်တင်းနေဆဲ အခြေအနေကို အခွင့်ကောင်းယူကာ မျိုးရိုးဗီဇ ပြန်လည်ဖွဲ့စည်းခြင်း ပုံစံရှိ အခြား အစွမ်းပိုင်ရှင်များက တစ်ပြိုင်နက်တည်း ပြေးဝင်သွားကြသည်။

စွမ်းအင်ပိတ်လှောင် အစီအရင်ထဲတွင် သန္ဓေပြောင်းအစွမ်းများကို အသုံးမပြုနိုင်သောကြောင့် လူအင်အား သုံးသည့် နည်းဗျူဟာက လုံးဝ အသာစီးရနေသည်။

ခွန်ဆန်းနှင့် အခြားသူများက အသားလုံးပုံစံ ဖြစ်နေသော ပေ့မင်လန် ကို ဖိချထားပြီး ချန်ကျန့်ဖုန်း က ထက်မြက်သော ဓားရှည်တစ်လက်ကို ပုံဖော်ကာ "ရွှပ်" ခနဲ အသံနှင့်အတူ ပေ့မင်လန် ၏ ခြေလက်များကို ခုတ်ဖြတ်လိုက်လေသည်။

ချက်ချင်းပင် ပေ့မင်လန် က စူးစူးဝါးဝါး အော်ဟစ်လိုက်ပြီး ပါးစပ်မှ မရပ်မနား ဆဲရေးတိုင်းထွာတော့သည်။

"မင်းတို့ ခွေးကောင်တွေ... အား... မင်းတို့ကို သတ်ပစ်မယ်... မင်းတို့ကို သတ်ပစ်မယ်"

"သေစမ်း... အော်ရဲသေးတယ်ပေါ့"

"သူ ဘာတွေ ပြောနေတာလဲ"

"ကောင်းတဲ့စကားတော့ မဟုတ်လောက်ဘူး... သူ့လျှာကို ဖြတ်ပစ်လိုက်"

"မရဘူး... လျှာကို ဖြတ်လို့ မဖြစ်ဘူး... ဆရာလင်း သူ့ကို စစ်မေးရဦးမှာ"

"ဒါဆိုရင် သူ့ရဲ့ ပေါင်ကြားထဲက ဟာကို ဖြတ်ပစ်လိုက်... သေစမ်း... သူ ထပ်ဆဲရဲသေးလား ကြည့်ရသေးတာပေါ့"

ဝူယင်က အေးစက်စက် ပြုံးရင်း ပြောလိုက်သည်။

အခြားလူများက တစ်ယောက်ကိုတစ်ယောက် ကြည့်လိုက်ကြပြီး အားလုံး ပြုံးလိုက်ကြ၏။

ချက်ချင်းပင် လက်မြှောက် ဓားကျနှင့်အတူ ပေ့မင်လန် ၏ အောက်ပိုင်းကို တိုက်ရိုက် ဖျက်ဆီးပစ်လိုက်လေသည်။

မျက်စိတစ်မှိတ်အတွင်းမှာပင် ပေ့မင်လန် က နာကျင်စွာဖြင့် သတိလစ်သွားတော့သည်။

ထို့နောက် သူက ခန္ဓာကိုယ်ကို ဆက်လက် မထိန်းချုပ်နိုင်တော့ဘဲ လျင်မြန်စွာ သေးငယ်သွားကာ လူသားပုံစံသို့ ပြန်လည် ရောက်ရှိသွားသည်။

သို့သော် ဤပုံစံတွင် သူ၏ ခြေလက်များ အခုတ်ခံထားရပြီး အောက်ပိုင်းကလည်း ဖျက်ဆီးခံလိုက်ရသဖြင့် လုံးဝ အသုံးမကျသူ တစ်ယောက် ဖြစ်သွားလေပြီ။

သို့သော် ဤကောင် သွေးထွက်လွန်ပြီး သေဆုံးသွားမည်ကို ကာကွယ်ရန်အတွက် ရှီဟိုင်ကျူးက ဆေးရည်တစ်ဘူးကို ထုတ်ယူလိုက်သည်။

"သေစမ်း... ဒီလောက် ကောင်းတဲ့ ဆေးရည်ကတော့ အလကား ဖြစ်သွားပြီ"

သူက မျိုးရိုးဗီဇ ဆေးရည်ကို အသုံးပြု၍ ပေ့မင်လန် ၏ အသက်ကို ကယ်တင်ပေးလိုက်သည်။

ဤအထိ ရောက်သောအခါ ဤတိုက်ပွဲ၏ အခြေအနေမှာ ယေဘုယျအားဖြင့် အဆုံးအဖြတ် ပေးပြီးသွားပြီ ဖြစ်သည်။

ပေ့မင် ရေပေါ်ကျွန်းမှာ ထိုက်ယန်တောင်၏ လက်အောက်သို့ ရောက်ရှိသွားခဲ့လေပြီ။

ဆက်ရန်...

နောက်တစ်အုပ်မှာတော့... အရိပ်တပ်ဖွဲ့ကိုနှိမ်နင်းပြီးနောက်မှာ လင်းယွမ် ၁၀၀% ပြည့်လို့နောက်တစ်ဆင့်ကို ဘယ်လိုတက်မလဲ၊ ဒီကမ္ဘာကြီးရဲ့ဘယ်လိုလျှို့ဝှက်ချက်တွေကို သိလိုက်ရမလဲ၊ ထွက်ပြေးနေတဲ့ ဝူယောင်ပန်းကိုရော ဘယ်လိုလိုက်ရှာမလဲ၊ လင်းယွမ်တို့မြောက်ဘက်ကို သွားကြမှာလား၊ နတ်ဘုရားနိုင်ငံတော်ရဲ့အခြေအနေကရောဘယ်လိုရှိလဲ၊ လင်းယွမ်စကြဝဠာသက်ရှိအဆင့်ကိုရောက်သွားမှာလား၊ ကမ္ဘာပေါ်ကို အဆက်မပြတ်ကျနေတဲ့ စကြဝဠာထဲက မြစ်ကြီးကရော ဘယ်ကဘယ်လိုဖြစ်ပေါ်နေတာလဲ... စတာတွေကိုဆက်ပြီး စောင့်မျှော်ဖတ်ရှုကြပါဦးနော်။