သေဆုံးနေသော ဟာဝိုင်အီကျွန်း (၁)

ပိစိဖိတ်သမုဒ္ဒရာအလယ်ပိုင်းတွင် တည်ရှိသော ဟာဝိုင်အီကျွန်းစုသည် တစ်ချိန်က နိုင်ငံတကာတွင် ထင်ရှားကျော်ကြားသော ကမ္ဘာလှည့်ခရီးသွားလုပ်ငန်းကြီးဖြစ်ခဲ့ဖူးသည်။ ကျွန်းစု၏ ခရီးသွားလုပ်ငန်းမှာ အလွန်ဖွံ့ဖြိုးတိုးတက်ခဲ့ပြီး မြို့ပြဧရိယာ စတုရန်းကီလိုမီတာ ၂၀၀၀ကျော်နှင့် လူဦးရေ တစ်သန်းကျော် ရှိခဲ့သည်။ သို့သော် ကမ္ဘာပျက်ကပ်နေ့ရောက်ရှိပြီးနောက်တွင်မူ ဤနေရာသည် ကမ္ဘာကြီး၏ မေ့လျော့ခြင်းကို ခံလိုက်ရပြီး ပင်လယ်ပြင်ထက်မှ အထီးကျန်ကျွန်းတစ်ခုဖြစ်လာခဲ့တော့သည်။

ညနေ ၄ နာရီ ၁၂ မိနစ်တွင် ဟာဝိုင်အီကျွန်းစု၏ အဖြူရောင်ကမ်းခြေများပေါ်သို့ နေရောင်ခြည်များဖြာကျနေသည်။ ကောင်းကင်ကြီးမှာ အညစ်အကြေးအစွန်းအထင်းအနည်းငယ်မျှမရှိဘဲ ကြည်လင်ပြာလွင်နေပြီး ပူပြင်းလှသော အလင်းရောင်မှာ အရာအားလုံးပေါ်သို့ အတားအဆီးမရှိကျရောက်နေသဖြင့် စူးရှသောအလင်းဖြူများကို အလင်းပြန်နေသည်။

အိုအာဟူးကျွန်း၏ ကမ်းရိုးတန်းမှာ ကွေ့ကောက်နေပြီး ပင်လယ်ရေများမှာ အောက်ခြေရှိ ရောင်စုံသန္တာကျောက်တန်းများကို မြင်တွေ့ရသည်အထိ ထိတ်လန့်ဖွယ်ကောင်းလောက်အောင် ပြာလွင်ကြည်လင်နေသည်။ သို့သော် ရွှေရောင်သဲသောင်ပြင်ကို နမ်းရှိုက်နေသော ဆီးနှင်းကဲ့သို့ ဖြူဖွေးသည့် လှိုင်းလုံးများ၏ လှပသော ပုံရိပ်မှာ လုံးဝ ပျက်စီးယိုယွင်းနေခဲ့ပြီ ဖြစ်သည်။ သဲသောင်ပြင်ကြီးမှာ ကိုးရိုးကားယားလျှောက်လှမ်းနေသော အသေကောင်များ၏ ပုပ်သိုးဆွေးမြည့်ရာ သုသာန်ပြင်ကြီးတစ်ခုအဖြစ် ပြောင်းလဲနေပြီး နေရာတိုင်းတွင် ပုပ်ပွနေသော အလောင်းများနှင့် နေလောင်ဒဏ်ကြောင့် ခြောက်သွေ့နေသော ဖုတ်ကောင်အုပ်ကြီးကို တွေ့ရသည်။

အပူလှိုင်းများမှာ တရှိန်ရှိန်တက်နေပြီး လေထုထဲတွင် ဆွေးမြည့်နေသော အပုပ်နံ့များနှင့် ပင်လယ်ရေ၏ ဆားငံရေအငွေ့အသက်များက ထူထပ်စွာရောနှောနေသည်။ ပင်လယ်လေပြင်းက သဲသောင်ပြင်ပေါ်ရှိ အမှိုက်သရိုက်များကို ပြင်းထန်စွာ တိုက်ခတ်နေသဖြင့် ကာတွန်းအုန်းပင်ပုံများ ရိုက်နှိပ်ထားသော ပို့စကတ်များမှာ နင်းခြေခံထားရပြီး တစ်စစီဖြစ်နေသည်။ နီညိုရောင်အစွန်းအထင်းများ ပေကျံနေသော ရေကူးဝတ်စုံအပိုင်းအစများမှာ သေဆုံးနေသော အုန်းပင်ပင်စည်များနှင့် ရောယှက်နေပြီး သဲထဲတွင် တစ်ဝက်မျှ မြုပ်နေသော ဖလာမင်ဂိုရေကူးကွင်းကြီး၏ တောက်ပသောပန်းရောင်မှာလည်း ယခုအခါတွင် အမည်းရောင်မှိုများဖုံးလွှမ်းနေခဲ့ပြီ ဖြစ်သည်။

အဆုံးမဲ့ကျယ်ပြောလှသော အဖြူရောင်သဲသောင်ပြင်ထက်တွင် တစ်ချိန်က ကမ္ဘာလှည့်ခရီးသွားများ နေပူဆာလှုံခဲ့ကြသည့် နေရာများကို ယခုအခါတွင် ယိမ်းထိုးလှုပ်ရှားနေသော အရိပ်မည်းကြီးများက စိုးမိုးထားကြလေသည်။

ဝူး ဝူး

ဝေးလံသော မိုးကုတ်စက်ဝိုင်းဆီမှ ပြင်ပဧည့်သည်တော်တစ်ဦး၏ မြည်ဟီးသံက ကျွန်း၏ တိတ်ဆိတ်မှုကို ဖြိုခွဲလိုက်သည်။ အလျားလေးကီလိုမီတာရှိသော ဧရာမရထားကြီးတစ်စင်းသည် လေထုကို အန်တုလျက် သဲသောင်ပြင်ပေါ်သို့ ကြီးမားလှသော အရိပ်ကြီးတစ်ခုအဖြစ်ဖုံးလွှမ်းလိုက်သည်။ ၎င်းသည် နက်ပြာရောင်ပင်လယ်ပြင်ထက်မှ လျင်မြန်စွာ ဖြတ်သန်းလာပြီး ယိမ်းထိုးနေသော ဖုတ်ကောင်အုပ်ကြီးကို ဖုံးလွှမ်းသွားသည်။ ရထားကိုယ်ထည်အကာအကွယ်ပြားများမှာ ပြင်းထန်သော အလင်းရောင်အောက်တွင် အေးစက်စက်သတ္တုအလင်းများကို အလင်းပြန်နေပြီး ၎င်းပေါ်တွင် မုန်တိုင်းဒဏ်ရာများ၊ ကျည်ဆန်အက်ကြောင်းများ၊ မြင့်မားသောအပူချိန်ကြောင့် ပုံပျက်နေသော သတ္တုမျက်နှာပြင်များနှင့် ဝန်ပိသွားသော တည်ငြိမ်လျှပ်စစ်ကွင်းထုတ်လွှတ်သည့်စနစ်ကြောင့် ကျန်ရစ်ခဲ့သည့် မီးကျွမ်းရာများကို ဖော်ပြနေသည်။ သို့သော် ကံကောင်းထောက်မစွာဖြင့် တိုက်ရိုက်တိုက်ခိုက်မှုကို မခံခဲ့ရသဖြင့် ရထားကိုယ်ထည်မှာ ပြင်းထန်သော ပျက်စီးဆုံးရှုံးမှုမျိုးနှင့်မူ မကြုံတွေ့ခဲ့ရပေ။

ဖုတ်ကောင်များသည် ထိုကြီးမားလှသော အသံနှင့် အရိပ်ကြောင့် အနှောင့်အယှက်ဖြစ်သွားပုံရပြီး ၎င်းတို့၏ အဓိပ္ပာယ်မဲ့လျှောက်လှမ်းမှုများကို တုံ့ဆိုင်းစွာ ရပ်တန့်လိုက်ကြကာ မှုန်ဝါးနေသော မျက်လုံးအိမ်ကြီးများအားလုံးက တစ်ပြိုင်နက်တည်း ကောင်းကင်ယံဆီသို့ မော့ကြည့်လိုက်ကြတော့သည်။

၎င်းတို့၏ ပုပ်ပွနေသောမျက်နှာများကို မော့လိုက်ကြပြီး လည်ချောင်းထဲမှ သိပ်သည်းထူးဆန်းသော ဟိန်းဟောက်သံများကို ညှစ်ထုတ်လိုက်ကြသည်။ ကောင်းကင်အမိုးခုံးရထားကြီးက ပို၍နိမ့်ဆင်းလာသည်နှင့်အမျှ အားကောင်းလှသော တွန်းကန်လေစီးကြောင်းက အောက်ဘက်သို့ ပြင်းထန်စွာဖိချလိုက်သဖြင့် ပင်လယ်ရေပြင်တွင် ဧရာမချိုင့်ခွက်ကြီးတစ်ခု ဖြစ်ပေါ်သွားသည်။ ဘေးပတ်ပတ်လည်မှ လှိုင်းလုံးကြီးများမှာ လိပ်တက်ကာ ဆူပွက်နေသော အမြှုပ်ဖြူများအဖြစ် ပေါက်ကွဲသွားပြီး သဲသောင်ပြင်ပေါ်ရှိ သဲနုလေးများမှာလည်း လေထဲသို့ လွင့်ပျံသွားကာ အမှိုက်သရိုက်များနှင့် ပုပ်ပွနေသော အကြွင်းအကျန်များကို ဝါးမြိုလျက် ညစ်ထေးထေးသဲမုန်တိုင်းငယ်များအဖြစ် ဖုံးလွှမ်းသွားတော့သည်။

သဲသောင်ပြင်ပေါ်ရှိ ဖုတ်ကောင်အုပ်ကြီးမှာ မမြင်ရသော ဧရာမလက်ဝါးကြီးတစ်ချက်ဖြင့် တွန်းထုတ်ခံလိုက်ရသည့်အလား ၎င်းတို့၏ တောင့်တင်းနေသော ခန္ဓာကိုယ်များမှာ လေထဲတွင် ယိမ်းထိုးလှုပ်ရှားနေသည်။ အချို့မှာမူ ခြေလက်အင်္ဂါများ မစုံလင်တော့သဖြင့် မြေပြင်ပေါ်သို့ တိုက်ရိုက်လဲပြိုသွားကြတော့သည်။ လှုပ်ခတ်နေသော လေလှိုင်းများကြောင့် ရွှေရောင်သဲများမှာ လွင့်ပျံသွားပြီး ဖုတ်ကောင်များ၏ ပုပ်ပွနေသော အသားစများနှင့် ပျက်စီးနေသော အဆောက်အအုံ အကြွင်းအကျန်များကို ပြင်းထန်စွာ ရိုက်ခတ်သဖြင့် ဝရုန်းသုန်းကားဖြင့် ရှုပ်ထွေးလှသောအသံများ ထွက်ပေါ်လာသည်။

ဝှစ်

စူးရှသော စိတ်စွမ်းအင် ရိုက်ခတ်မှုသံတစ်ခု ထွက်ပေါ်လာပြီး ထိုထူထပ်လှသော ဖုတ်ကောင်များမော့ကြည့်လိုက်ကြရာ ဧရာမ ရထားကြီး၏ ဦးခေါင်းပိုင်းတွင် ရပ်နေသော အရိပ်မည်းတစ်ခုကို မြင်တွေ့လိုက်ကြရသည်။ ရူဂျီက သူ၏လက်ကို မြှောက်လိုက်ရာ တုန်ခါလှိုင်းဓားတစ်ချက်က ကမ်းခြေတစ်လျှောက်ရှိ ဖုတ်ကောင်အုပ်စုကို တိုက်ရိုက်ခြေမှုန်းသုတ်သင်ပစ်လိုက်တော့သည်။ ထို့နောက် ကောင်းကင်အမိုးခုံးရထားကြီးသည် တဖြည်းဖြည်းနှင့် အရှိန်လျှော့ကာ ကမ်းနားလမ်းအနီးရှိ သဲသောင်ပြင်ကွင်းပြင်ကျယ်တွင် ဆိုက်ကပ်ရပ်တန့်လိုက်သည်။

တစ်ချိန်တည်းမှာပင် မရေမတွက်နိုင်သော ဒရုန်းများမှာ ပျားအုံမှ ပျားအုပ်ကြီးပျံသန်းလာသည့်အလား ကျွန်း၏ မြို့ပြဧရိယာဆီသို့ ထူထပ်စွာ ပျံသန်းသွားကြပြီး ပိုက်စိပ်တိုက်ရှာဖွေရေးကို စတင်လိုက်ကြတော့သည်။

ပင်မကွပ်ကဲတံတားပေါ်တွင် လင်းရှန်နှင့် တခြားသူများသည် အဝေးမှ ကမ်းခြေမြို့ပြကြီးကို စိုက်ကြည့်ရင်း သက်ပြင်းချနေကြသည်။

ချီလီက ပထမဆုံး ပြောလာသည်။

“ငါတို့ စောပြီးရောက်လာတာပဲ၊၊ ပျံသန်းရတာက တကယ်မြန်တယ်”

“ဒါပေမဲ့ အန္တရာယ်လည်းများတယ်”

နန်ကျင်းက မျက်မှောင်ကြုတ်လိုက်ပြီး အစောပိုင်းက လွတ်မြောက်လာခဲ့သည့် အခြေအနေကို တွေးကာ ချွေးစေးများကို သုတ်လိုက်သည်။

“ပျံသန်းတိုင်း ဒီလိုအခြေအနေမျိုးနဲ့ ကြုံတွေ့ရမယ်ဆိုရင်တော့ ဒါက တကယ်ကို မကောင်းတဲ့အကြံဉာဏ်ပဲ”

လော့ယန်ကလည်း ထောက်ခံသည့်အနေဖြင့် ခေါင်းညိတ်ပြလိုက်သည်။

“ငါတို့ရဲ့ သံလမ်းသွားရထားကပဲ ပိုပြီးတော့ ယုံကြည်စိတ်ချရပါသေးတယ်”

လင်းရှန်က ရှေ့သို့ လျှောက်သွားပြီး အသက်ကို ပြင်းပြင်းရှူလိုက်သည်။

“ငါတို့ အလျင်မလိုဘူးဆိုရင်တော့ ပျံသန်းပြီး ဒီလောက်အထိ စွန့်စားနေစရာမလိုပါဘူး”

ထို့နောက် ချန်ဆီရွှမ်က ပြောလိုက်သည်။

“ဒီကျွန်းမှာ ပနားမားသယ်ယူပို့ဆောင်ရေးမြို့ဆီကို ဦးတည်ထားတဲ့ သံလမ်းခွဲတစ်ခုရှိတယ်၊၊ အဲဒီကနေတစ်ဆင့် ကျွန်မတို့ ကာရေဘီယံပင်လယ်ထဲကို ဝင်ရောက်ပြီး ကုန်းပေါ်တက်နိုင်တယ်၊၊ ပြီးရင် လွတ်မြောက်ရေးသံလမ်းအတိုင်း တောင်အမေရိကတိုက်ရဲ့ ဗဟိုချက်ကို တိုက်ရိုက်ဖြတ်သန်းပြီး ယူရှူးရာကို သွားမယ်၊၊ အဲဒီကနေတစ်ဆင့် မုန်တိုင်းရေလက်ကြားကို ဖြတ်ပြီး ဝငိရိုးစွန်းဒေသထဲကို ဝင်နိုင်တယ်၊၊ ဒီလမ်းကြောင်းက ပင်လယ်ပြင်မှာ အကြီးမားဆုံးဖြစ်တဲ့ အမှတ် ၁၃ တွင်းနက်ကို ရှောင်ကွင်းသွားနိုင်ပြီး မြောက်အမေရိကရဲ့ အမှတ် ၂နဲ့ အမှတ် ၁၀ ဒါမှမဟုတ် အတ္တလန္တိတ်ရဲ့ အမှတ် ၁၁ တွင်းနက်လမ်းကြောင်းတွေထဲမှာလည်း မကျရောက်တာမို့လို့ အတော်လေးလုံခြုံတဲ့အစီအစဉ်တစ်ခုဖြစ်လိမ့်မယ်”

“အဲဒီလောက်အထိ ချောမွေ့ပါ့မလား”

မိုနီကာက လင်းရှန်ကို ကြည့်လိုက်သည်။

လင်းရှန်က ကူကယ်ရာမဲ့စွာပြုံးလိုက်သည်။

“ငါလည်း မသိဘူး၊၊ ဥရောပ မုန်တိုင်းမဟာမိတ်အဖွဲ့၊ အာရုဏ်ဦးဗဟိုစင်တာနဲ့ နောဧတို့ အားလုံးက မုန်တိုင်းရေလက်ကြားဆီကို ဦးတည်နေကြပြီ၊၊ ငါတို့ အမှီလိုက်ရမယ်”

“လင်းရှန်”

ကီကီက ဤအခိုက်အတန့်တွင် ပျံသန်းလာပြီး မေးလိုက်သည်။

“ကျွန်မတို့ တောင်အမေရိကမှာရှိတဲ့ ကျွန်မတို့ရဲ့ ရထားအဖွဲ့နဲ့ သွားတွေ့ရမလား”

လင်းရှန်က ခေါင်းညိတ်ပြလိုက်သည်။ “ရထားအဖွဲ့ကလည်း လွတ်မြောက်ရေးသံလမ်းကိုပဲ အသုံးပြုမှာလေ… ငါတို့ရဲ့ အမြန်နှုန်းနဲ့ဆိုရင် သူတို့အရင်ရောက်သွားနိုင်တယ်၊၊ ပြီးရင်တော့ ဘေးကင်းဖို့အတွက် ရထားအဖွဲ့ကို သံလမ်းအတိုင်း ဆက်သွားခိုင်းပြီး အထူးအခြေအနေမျိုးမရှိရင် အပေါ်ကို မပျံတတ်တာကောင်းတယ်”

“ကျွန်မတို့ရဲ့ ကောင်းကင်အမိုးခုံးရထားက တကယ်ကို အံ့ဩဖို့ကောင်းတာပဲ”

ထိုအချိန်တွင် ရှားရှားက ပြောလိုက်သည်။

“အသံထက်မြန်တဲ့ အရှိန်နဲ့ ပျံသန်းနိုင်တယ်၊၊ အဲဒီမုန်တိုင်းထဲကနေလည်း ပျံထွက်လာနိုင်တယ်၊၊ တကယ်ကိုမယုံနိုင်စရာပဲ၊၊ ပြီးတော့ အများကြီးကျယ်ဝန်းတယ်”

ထိုအချိန်တွင် ကင်းထောက်ရန် ဖြန့်ကျက်ထားသော ဒရုန်းများက သတင်းအချက်အလက်များကို ပေးပို့လာပြီး ဗိုင်အိုလာထံသို့ စုစည်းရောက်ရှိသွားသည်။

ဗိုင်အိုလာက လက်နှစ်ဖက်ကို အနောက်တွင်ထား၍ လင်းရှန်ကို ပြောလိုက်သည်။

[ပဏာမစုံစမ်းစစ်ဆေးမှုတွေအရ ဖုတ်ကောင်အရေအတွက် အမြောက်အမြားနဲ့ ထူးဆန်းတဲ့ သန္ဓေပြောင်းလူသားအချို့ကို ရှာဖွေတွေ့ရှိထားပါတယ်၊၊ ဒီမြို့က အကြီးစားကျူးကျော်မှုမျိုးကို ကြုံတွေ့ခဲ့ရပုံမပေါ်ပါဘူး၊၊ ဖုတ်ကောင်တွေရဲ့ ပဏာမအချက်အလက်နှိုင်းယှဉ်ချက်တွေအရ သူတို့က ကမ္ဘာလှည့်ခရီးသွားတွေနဲ့ မြို့ခံလူထုတွေ ဖြစ်ကြပါတယ်၊၊ အသက်ရှင်ကျန်ရစ်သူအဖွဲ့အစည်း ဒါမှမဟုတ် လက်နက်ကိုင်တပ်ဖွဲ့တွေကိုတော့ ရှာမတွေ့သေးပါဘူး]

“ဘာကိုဆိုလိုတာလဲ” ချန်ဆီရွှမ် မျက်မှောင်ကြုတ်လိုက်သည်။

“ကမ္ဘာပျက်ကပ်နေ့ပြီးကတည်းက ဒီနေရာကို ဘယ်သူမှ မရောက်ဖူးသေးဘူးလို့ ဆိုလိုတာလား”

“အဲဒီလိုပဲ ထင်ရတယ်”

ကီကီက တာမီနယ်ကို ထုတ်ယူကာ ကီးဘုတ်ကို နှိပ်ရင်း ပြောလိုက်သည်။

“ဒီကျွန်းကနေ ထွက်ခွာဖို့ဆိုရင် သမုဒ္ဒရာဖြတ်ကျော်လေကြောင်းလိုင်းတွေ၊ သမုဒ္ဒရာသွားကူးတို့သင်္ဘောတွေ ဒါမှမဟုတ် အဲဒီသံလမ်းခွဲကိုပဲ သုံးရမှာ၊၊ ပထမအချက်နှစ်ခုက မဖြစ်နိုင်တော့ဘူး၊၊ တကယ်လို့ မြင့်မြတ်မြို့တော်လိုမျိုး ပင်လယ်ရေကြောင်းအဖွဲ့တွေ ဒီနေရာကို လာမဆိုက်ဖူးဘူးဆိုရင် ပနားမားသံလမ်းကနေပဲ လာနိုင်လိမ့်မယ်၊၊ ဒါပေမဲ့ အဲဒါက တော်တော်လေး ခက်ခဲလိမ့်မယ်၊၊ တခြားအသက်ရှင်ကျန်ရစ်သူတွေမရှိဘူးဆိုတာက အဲဒီသံလမ်းကို အသုံးပြုလို့မရတော့ဘူးဆိုတာကို ပြနေတာပဲ”

“ဒါဆိုရင် ဒီနေရာကို ဘယ်သူမှလာပြီး အသေးစိတ်မရှာဖွေရသေးဘူးပေါ့”

ချီလီက သူ၏ ယပ်တောင်ကို သိမ်းဆည်းလိုက်ပြီး ပြုံးကာ ပြောလိုက်သည်။

“ဒါက တကယ် ရှားရှားပါးပါးပဲ၊၊ မွန်းစတားတွေ မရှိဘူး၊၊ ဒီချစ်စရာကောင်းပြီး ရိုးသားတဲ့ဖုတ်ကောင်တွေပဲ ရှိတာဆိုတော့ ဒီည ငါတို့ကောင်းကောင်းအိပ်ရတော့မယ်”