ထိပ်တန်းအောင်မြင်မှုအဆင့်

လီတိုင်ရွှမ် လက်သီးဝိညာဉ်အမှတ်အသားကို အသက်သွင်းလိုက်ပြီးနောက် သူ့ပတ်ပတ်လည်ရှိ သဘာဝစွမ်းအင်များ ပြင်းထန်စွာ ဆူပွက်လာခဲ့ပြီး သူ့နောက်ကွယ်က ကောင်းကင်ပုလဲ နှစ်ခုမှာလည်း အရူးအမူး လည်ပတ်လျက် ၎င်းတို့ကို အဆက်မပြတ် ဝါးမြိုတော့သည်။ ၎င်းစွမ်းအင်များမှာ ပြင်းထန်လှသော ပဲ့တင်ထပ်သံစွမ်းအားများအဖြစ် သူ့ခန္ဓာကိုယ်အတွင်းသို့ တရစပ် စီးဝင်သွားခဲ့သည်။

နောက်တစ်ခဏတွင် လီတိုင်ရွှမ်၏ ခန္ဓာကိုယ်မှ လက်သီးလှိုင်းတစ်ခု အပြင်သို့ ဖြာထွက်လာခဲ့တော့သည်။

ဝုန်း

ကြည်လင်ပြီး ကျယ်လောင်လှသော နဂါးဟိန်းသံကြီး ပေါက်ကွဲထွက်လာခဲ့ပြီး ပေရာနှင့်ချီ၍ ကျယ်ပြောလှသော ဧရာမ လက်သီးပုံရိပ်ကြီးတစ်ခု အပြင်သို့ ထိုးထွက်လာခဲ့သည်။

ထိုလက်သီးပုံရိပ်ကြီး၏ မျက်နှာပြင်ပေါ်တွင် နဂါးအကြေးခွံများနှင့် ဆင်တူလှသော အကြေးခွံများစွာ ဖုံးလွှမ်းနေသဖြင့် ၎င်းကို ဤသို့သော ထူးခြားလှသည့် အမည်နာမ ပေးအပ်ထားခြင်း ဖြစ်ပေမည်။

ထိုနဂါးအကြေးခွံများပေါ်တွင် ရေတွက်မရနိုင်သော ဝိညာဉ်အမှတ်အသား အလင်းတန်းများစွာ စီးဆင်းနေကြသဖြင့် ၎င်း၏ စစ်မှန်သော ခွန်အားကို ပိုမိုမြင့်တက်စေသည်။

ထိုနဂါးလက်သီးချက် ဟင်းလင်းပြင်ကို ဖြတ်သန်းသွားချိန်တွင် ပြင်းထန်လှသော နဂါးဟိန်းသံကြီး တစ်ပြိုင်နက်တည်း ထွက်ပေါ်လာခဲ့ပြီး ကောင်းကင်ယံတစ်ခုလုံးကို တုန်ဟည်းသွားစေနိုင်လောက်သော မယုံနိုင်လောက်အောင် ကြောက်စရာကောင်းသည့် အရှိန်အဝါကြီးတစ်ခုနှင့်အတူ ရှေ့သို့ တိုးဝင်သွားခဲ့ရာ ၎င်း၏ လမ်းကြောင်းတလျှောက်ရှိ အရာအားလုံးကို ပြင်းထန်စွာ လှုပ်ခါသွားစေတော့သည်။

ဒါတင် မကသေးပေ... ထိုနဂါးလက်သီးချက်ထံမှ ပြင်းထန်လှသော နဂါးဖိအားလှိုင်းများပါ အဆက်မပြတ် ထွက်ပေါ်နေခဲ့သည်။ စိတ်ဓာတ်ကြံ့ခိုင်မှုမရှိသူ မည်သူမဆို ဤတိုက်ကွက်နှင့် ထိပ်တိုက်မတွေ့ဆုံရသေးခင်မှာပင် ခုခံလိုစိတ်များအားလုံး လုံးဝဥဿုံ အရည်ပျော်သွားကြမည်မှာ သေချာသည်။

ဤရိုးရှင်းလှသော တိုက်ကွက်တစ်ခုတည်းကပင် ပတ်ဝန်းကျင်ရှိ တံခွန်ကိုင်အားလုံးကို မျက်နှာပျက်သွားစေခဲ့သည်။

လုချင်းမိန်ပင်လျှင် အလွန်ပင် လေးနက်သွားခဲ့ရပြီ ဖြစ်သည်။ သူမ ကောင်းစွာ သိရှိလိုက်ရသည်မှာ အကယ်၍ သူမသာ လီလော့ နေရာတွင် ရှိနေခဲ့ပါက ဤတိုက်ကွက်ကို ထိပ်တိုက်မရင်ဆိုင်ဘဲ အဝေးသို့ အမြန်ဆုံး ရှောင်တိမ်းရန်သာ ကြိုးစားမိပေလိမ့်မည်။

သမိုင်းတစ်လျှောက်မှာ အသန်မာဆုံးသော နဂါးခေါင်းဆောင် သုံးဦးစာရင်းအတွင်းမှာ ပါဝင်နေခဲ့သည့် ကျော်ကြားလှသော လီတိုင်ရွှမ်က စစ်မှန်သော စွမ်းအားများဖြင့် လူအုပ်ကြီးကို ချက်ချင်းပင် အံ့ဩမှင်တက်သွားစေခဲ့ပြီ ဖြစ်သည်။

ဒါတင် မကသေးပေ။ သူတို့၏အထက် ကောင်းကင်ယံတွင် ထိုင်နေကြသည့် အကြီးအကဲများမှာလည်း ရှုပ်ထွေးလှသော မျက်နှာထားများဖြင့် ရှိနေကြသည်။ ဤရင်းနှီးပြီးသားဖြစ်သော တိုက်ကွက်က သူတို့၏ ရင်ထဲရှိ နာကျင်စရာကောင်းလှသော အတိတ်က အမှတ်တရများကို ပြန်လည် လှုံ့ဆော်ပေးလိုက်သည့်နှယ်။

ရာစုတိုက်ပွဲ နဂါးလက်သီးမှာ လီတိုင်ရွှမ် ပထမဆုံး စတင်ကျင့်ကြံခဲ့ဖူးသည့် မြို့စားအဆင့်ပညာရပ် ဖြစ်သည်။ ၎င်းက ပုံမှန်အဆင့်မျှသာ ရှိသေးသည်မှာ မှန်သော်လည်း သူသည် ထိပ်တန်းအောင်မြင်မှုအဆင့် သို့တိုင်အောင် အောင်မြင်စွာ လေ့ကျင့်တတ်ကျွမ်းခဲ့သည်။

ထို့ကြောင့်ပင် ၎င်းက ထုတ်ပြနိုင်စွမ်းရှိသည့် စစ်မှန်သော စွမ်းအားပိုင်းမှာ အခြားသော ဝိညာဉ်အသွင်ပြောင်းလဲခြင်းအဆင့်ရှိသည့် မြို့စားအဆင့်ပညာရပ်များစွာထက် များစွာ ပိုမိုပြင်းထန်ခြင်း ဖြစ်သည်။

အခြားသူအားလုံး အံ့ဩမှင်တက်နေကြစဉ်မှာပင် လီလော့၏ မျက်နှာထားမှာ လုံးဝဥဿုံ လေးနက်သွားခဲ့သည်။ လီတိုင်ရွှမ် ထုတ်ပြလိုက်သည့် ဤရာစုတိုက်ပွဲ နဂါးလက်သီးချက်၏ ပြင်းထန်မှုမှာ ထင်မှတ်ချက်များကို ကျော်လွန်နေခြင်းမရှိသော်လည်း သူ့အနေနှင့်

နှောင်းပိုင်းနတ်ဆိုးခန္ဓာအဆင့်ရှိသော ကိုယ်ပိုင်ကျင့်စဉ်တစ်ခုတည်းကိုသာ အားကိုးပြီး ဒါကို ရင်ဆိုင်ရမှာဖြစ်သဖြင့် သူ့အပေါ်သို့ မယုံနိုင်လောက်အောင် ကြီးမားလှသော ဖိအားများ သက်ရောက်နေခဲ့သည်။

လီလော့ လေတစ်ချက် ရှူထုတ်လိုက်ပြီးနောက် သူ့ခန္ဓာကိုယ်အတွင်းရှိ ပဲ့တင်ထပ်သံနန်းတော် သုံးခုစလုံးကို အပြည့်အဝ အသက်သွင်းလိုက်သည်။ထိုအခါ ပဲ့တင်ထပ်သံစွမ်းအားများမှာ ဧရာမ ဒီရေလှိုင်းကြီးတစ်ခုပမာ အပြင်သို့ တစ်ဟုန်ထိုး စီးထွက်လာခဲ့တော့သည်။

ထို့နောက် လက်ကွက်အချို့ကို ပုံဖော်လိုက်ပြီးနောက် လက်ထဲက ဓားဖြင့် ရှေ့သို့ ပြတ်သားစွာပင် ဝှေ့ယမ်းပိုင်းချလိုက်တော့သည်။

ဟင်းလင်းပြင်မှာ ချက်ချင်းပင် ခွဲထုတ်ပစ်ခြင်း ခံလိုက်ရပြီး ၎င်းအတွင်းမှနေ၍ ပြင်းထန်လှသော ရေလှိုင်းသံကြီး ဆူညံစွာ ထွက်ပေါ်လာခဲ့သည်။ အက်ကြောင်းအတွင်းမှနေ၍ အေးစက်လှသော ငရဲမြစ်ရေလှိုင်းများနှင့်အတူ ဧရာမ နဂါးနက်ကြီးတစ်ကောင် ထွက်ပေါ်လာခဲ့ပြီး လူတိုင်းမျက်စိရှေ့တွင် ပြေးဝင်လာသော ပြင်းထန်လှသည့် နဂါးလက်သီးချက်နှင့် ထိပ်တိုက် ပြင်းထန်စွာ တွေ့ဆုံသွားခဲ့တော့သည်။

"မဟူရာမြစ်ရဲ့နဂါးအလံတော်"

ဘုန်း

ပြင်းထန်လှသော စွမ်းအင်မုန်တိုင်းကြီးတစ်ခု ချက်ချင်းပင် ပေါ်ထွက်လာခဲ့ပြီး ထိုဗဟိုချက်ပတ်လည်ရှိ ဟင်းလင်းပြင်မှာ ပြင်းထန်စွာ တုန်ခါသွားခဲ့ရသည်။

လီလော့၏ မျက်နှာထား အနည်းငယ် ပျက်ယွင်းသွားခဲ့သည်။ သူ ရှင်းလင်းစွာ ခံစားမိလိုက်သည်မှာ ထိုတိုက်ကွက်နှစ်ခု ထိပ်တိုက်တွေ့ဆုံသွားသည့် တစ်ခဏ၌ ထိုနဂါးလက်သီးချက်ထံမှ ပြင်းထန်လှသော စွမ်းအားများက သူ့ရဲ့ အမြွှာပဲ့တင်ထပ်သံစွမ်းအားများကြောင့် လျော့ပါးသွားခြင်းမျှမရှိဘဲ တည်ရှိနေဆဲဖြစ်ကြောင်းပင်။

နောက်ဆုံးတွင်မူ နဂါးနက်ကြီး၏ ခန္ဓာကိုယ်မှာ အရင်ဆုံး ပေါက်ကွဲပျက်စီးသွားခဲ့ရပြီး ထိုနဂါးလက်သီးချက်ထံမှ ကျန်ရှိနေသေးသည့် စွမ်းအင်လှိုင်းများက လီလော့ရှိရာသို့ ရက်စက်စွာဖြင့် တိုက်ရိုက် ဖိချလာခဲ့တော့သည်။

ထိုတစ်ခဏ၌ လီလော့၏ ခန္ဓာကိုယ် အရေပြားမျက်နှာပြင်တစ်ခုလုံးတွင် လျှပ်စီးအလင်းတန်းများစွာ ပြင်းထန်စွာ ပေါက်ကွဲထွက်လာခဲ့တော့သည်။

အတုအယောင် မြို့စားအဆင့်ပညာရပ် - လျှပ်စီးအလင်းတန်း

ဟင်းလင်းပြင်၌ ပုံရိပ်အကြွင်းအကျန်တစ်ခုကိုသာ ချန်ထားရစ်ခဲ့ပြီး လီလော့၏ ပုံရိပ်မှာ မျက်တောင်တစ်ခတ်အတွင်းမှာပင် ပေရာနှင့်ချီ၍ ဝေးကွာလှသော နေရာဆီသို့ လျင်မြန်စွာ ပျံသန်းရှောင်တိမ်းသွားခဲ့တော့သည်။

ထိုလက်သီးပုံရိပ်ကြီးမှာ လီလော့၏ ပုံရိပ်အကြွင်းအကျန်ပေါ်သို့ ပြင်းထန်စွာ ကျရောက်သွားခဲ့ပြီး မြေပြင်ပေါ်တွင် မယုံနိုင်လောက်အောင် ကြီးမားလှသော ဧရာမ လက်သီးရာကြီးတစ်ခု ထင်ကျန်ရစ်စေခဲ့ကာ အရပ်မျက်နှာအနှံ့သို့လည်း အက်ကြောင်းများစွာ ဖြစ်ပေါ်စေခဲ့သည်။

ဤထိပ်တိုက်တွေ့ဆုံမှုအတွင်းမှာပင် မဟူရာမြစ်၏နဂါးအလံတော်ပညာရပ်က လီတိုင်ရွှမ်၏ ရာစုတိုက်ပွဲ နဂါးလက်သီးပညာရပ်ကို စက္ကန့်အနည်းငယ်မျှပင် တားဆီးပေးနိုင်ခြင်း မရှိခဲ့ပေ။

"လူအိုကြီးရဲ့ ရာစုတိုက်ပွဲ နဂါးလက်သီးက ပုံမှန်အဆင့်ရှိတဲ့ မြို့စားအဆင့်ပညာရပ်တစ်ခုပဲ ရှိသေးတာမှန်ပေမဲ့ ထုတ်ပြနိုင်စွမ်းရှိတဲ့ စွမ်းအားကတော့ ရှိသင့်တဲ့ အဆင့်အတန်းထက် ပိုပြီး ပြင်းထန်လွန်းနေတယ်"

လီလော့ မျက်မှောင်ကြုတ်ရင်း စိတ်ထဲမှ တိုးညင်းစွာ ရေရွတ်လိုက်မိသည်။ သို့သော်လည်း ထိုတစ်ခဏ၌ သူ့ မျက်ဝန်းများအတွင်း၌ ထူးဆန်းသော အလင်းတန်းတစ်ခု ဖြတ်ပြေးသွားခဲ့ပြီး…

"ကြည့်ရတာ ရာစုတိုက်ပွဲ နဂါးလက်သီးကို ထိပ်တန်း အောင်မြင်မှုအဆင့်အထိ ကျွမ်းကျင်အောင် ကျင့်ကြံထားခဲ့တာ ဖြစ်လိမ့်မယ်"

မြို့စားအဆင့်ပညာရပ်တစ်ခုတွင် အဆင့်တိုးတက်မှု အဆင့်အတန်း သုံးခု ရှိနေခြင်း ဖြစ်သည်။ ၎င်းတို့မှာ အသေးစားအောင်မြင်မှုအဆင့်၊ ထိပ်တန်းအောင်မြင်မှုအဆင့် နှင့် အကြွင်းမဲ့ပြီးပြည့်စုံခြင်းအဆင့်တို့ ဖြစ်ကြသည်။ လီလော့၏ မဟူရာမြစ်၏နဂါးအလံတော်ပညာရပ်မှာ ယခုအချိန်အထိ အသေးစားအောင်မြင်မှုအဆင့်သို့သာ ရောက်ရှိနေသေးခြင်း ဖြစ်သည်။

သူသည် အမြွှာပဲ့တင်ထပ်သံစွမ်းအား အားသာချက်များကို ပေါင်းစပ်အသုံးချနိုင်ခဲ့ခြင်းကြောင့်သာ သာမန်လူများ၏ မြို့စားအဆင့်ပညာရပ်များထက် ပိုမိုပြင်းထန်သော စွမ်းအားကို ထုတ်ပြနိုင်ခြင်း ဖြစ်သည်။

သို့သော်လည်း လက်ရှိအခြေအနေရဆို ထင်ရှားသော အားနည်းချက်များရှိနေခဲ့ပြီ ဖြစ်သည်။

ပြိုင်ဘက်က မိမိထက် ပိုမိုမြင့်မားသော ကျင့်စဉ်အဆင့်ကို ပိုင်ဆိုင်ထားသည်မှာ မှန်သော်လည်း လီလော့သည်လည်း မိမိ၏ ပဲ့တင်ထပ်သံ သုံးမျိုး၊ စတုတ္ထဆင့် အသံလှိုင်း၊ကမ္ဘာဦးဆင်ရိုင်းခွန်အားနှင့် အခြားသော လျှို့ဝှက်တိုက်ကွက်များစွာကို ပေါင်းစပ်အသုံးချနိုင်စွမ်း ရှိသဖြင့် ထိုကျင့်စဉ်ကွာဟချက်ကို များစွာ ဖြည့်ဆည်းပေးထားနိုင်သည်။

ထို့ကြောင့် ဤထိပ်တိုက်တွေ့ဆုံမှုအတွင်း လုံးဝဥဿုံ ဖိနှိပ်ခြင်း ခံလိုက်ရသည့် တစ်ခုတည်းသော အကြောင်းရင်းမှာ ပြိုင်ဘက်၏ ရာစုတိုက်ပွဲ နဂါးလက်သီးအတတ်မှာ ပိုမိုမြင့်မားသောအဆင့်သို့ ရောက်ရှိနေခြင်းကြောင့်သာ ဖြစ်ရမည်။

ဒါတင် မကသေးပေ၊ လီတိုင်ရွှမ် ထိုလက်သီးဝိညာဉ်အမှတ်အသားကို ဖော်လိုက်စဉ်မှာပင် လီလော့အနေနှင့် ၎င်းထံမှ ရင်းနှီးပြီးသားဖြစ်သော အရှိန်အဝါတစ်ခုကို ရှင်းလင်းစွာ ခံစားမိလိုက်ခြင်း ဖြစ်သည်။

ယခုအချိန်သို့ ရောက်ရှိလာမှသာ သူ ဒါကို ကောင်းစွာ သဘောပေါက်လိုက်တော့သည်။

၎င်းအတွင်း၌ ကောင်းကင်နဂါးစွမ်းအင်များ ပါဝင်နေခြင်းကြောင့် ဖြစ်သည်။

လီတိုင်ရွှမ်၏ တိုက်ခိုက်မှုအတွင်း၌ ကောင်းကင်နဂါးစွမ်းအင်များ ပါဝင်နေခဲ့သဖြင့် ၎င်းက တိုက်ကွက်ကို နောက်ထပ် အဆင့်တစ်ခုသို့ အရှိန်အဟုန်ဖြင့် မြင့်တက်သွားစေနိုင်ခြင်း ဖြစ်သည်။

ဤသဘောပေါက်မှုကပင် ကောင်းကင်နဂါးစွမ်းအင်များကို နဂါးပဲ့တင်ထပ်သံစွမ်းအားများနှင့် သဟဇာတဖြစ်သော မြို့စားအဆင့်ပညာရပ်များအတွင်း မည်သို့ ထည့်သွင်းအသုံးပြုရမည်ဆိုသည်ကို ကောင်းစွာ နားလည်သွားစေခဲ့သည်။

သို့သော်လည်း ထိုသို့လုပ်ဆောင်ရန်မှာ မဆင်မခြင် စွမ်းအင်နှစ်ခုကို အတင်းအကျပ် ပေါင်းစပ်ခြင်းမျိုးမဟုတ်ဘဲ အကောင်းဆုံးသော သက်ရောက်မှု ထွက်ပေါ်လာစေရန်အတွက် မယုံနိုင်လောက်အောင် တိကျလှသော ထိန်းချုပ်မှုစွမ်းရည် လိုအပ်‌မည် ဖြစ်သည်။

လီလော့၏ စိတ်ထဲတွင်မူ ဤစွမ်းအင်များကို သူ့ရဲ့အကျွမ်းကျင်ဆုံးသော မြို့စားအဆင့်ပညာရပ်ဖြစ်သည့် မဟူရာမြစ်၏နဂါးအလံတော်ပညာရပ်အတွင်းသို့ ဘယ်လို ထည့်သွင်းအသုံးပြုရမလဲဆိုသည့် အတွေးအချို့ ချက်ချင်း ပေါ်ထွက်လာခဲ့ပြီ ဖြစ်သည်။

သူသည် ဤပညာရပ်ကို ထိပ်တန်းအောင်မြင်မှုအဆင့်သို့ တက်လှမ်းနိုင်ရန်အတွက် ခြေတစ်လှမ်းအကွာ အတားအဆီးတစ်ခုတွင် အမြဲတမ်း ပိတ်မိနေခဲ့ခြင်းဖြစ်ပြီး ရှေ့ဆက်၍ မည်သို့မျှ မတိုးတက်နိုင်ခဲ့ပေ။ ယခု မြင်တွေ့လိုက်ရသည့် မြင်ကွင်းကသာ သူ့အတွက် အလိုအပ်ဆုံးသော တွန်းအားတစ်ခု ဖြစ်လာခဲ့ပြီ ဖြစ်သည်။

လီလော့ အနောက်သို့ လျင်မြန်စွာ ဆုတ်ခွာလိုက်ပြီးနောက် လက်ကွက်များကို အရှိန်အဟုန်ဖြင့် စတင်၍ ပုံဖော်လိုက်တော့သည်။ စက္ကန့်အနည်းငယ်မျှ ကုန်ဆုံးသွားခဲ့ပြီးနောက် ဟင်းလင်းပြင်မှာ နောက်တစ်ကြိမ် ပြန်လည် ခွဲထုတ်ပစ်ခြင်း ခံလိုက်ရပြန်သည်။

နောက်ထပ် နဂါးနက်ကြီးတစ်ကောင် အပြင်သို့ ထိုးထွက်လာခဲ့ပြီး ၎င်း၏ ခန္ဓာကိုယ်ပတ်လည်တွင် အေးစက်လှသော ရေလှိုင်းများ ဝန်းရံလျက် ပြင်းထန်စွာ ဟိန်းဟောက်နေခဲ့သည်။ သို့သော်လည်း ၎င်းက ရှေ့သို့ တိုက်ရိုက် မပြေးဝင်တော့ဘဲ လီလော့၏ ခန္ဓာကိုယ်ပတ်လည်တွင်သာ ခိုင်မာစွာ ဝဲပျံနေခဲ့တော့သည်။

ထိုအချိန်တွင် လီလော့၏ ခန္ဓာကိုယ်အတွင်းရှိ ကောင်းကင်နဂါးစွမ်းအင်များမှာ မယုံနိုင်လောက်အောင် ထူးဆန်းလှပြီး ၎င်းတို့က သူ့ရဲ့သွေးစွမ်းအားနှင့် အရိုးအဆစ်တိုင်းအတွင်းသို့ စိမ့်ဝင်နေခဲ့ခြင်း ဖြစ်သည်။ ၎င်းတို့ကို တကူးတက လှုံ့ဆော်ရန်မှာ သူ့အတွက် မယုံနိုင်လောက်အောင် ခက်ခဲလှသည်မှာ မှန်သော်လည်း ဖခင်ဖြစ်သူကတော့ အလွယ်တကူ လုပ်ဆောင်နိုင်ခဲ့သည်။

ဤသည်က ကောင်းကင်နဂါး ပဲ့တင်ထပ်သံစွမ်းအားကို ပိုင်ဆိုင်ထားခြင်းကြောင့် ရရှိလာသည့် အကျိုးကျေးဇူးတစ်ခု ဖြစ်မည်မှာ သေချာသည်။

ထို့ကြောင့် သူသည်လည်း အခြားသော နည်းလမ်းတစ်ခုကိုသာ မဖြစ်မနေ အသုံးချရတော့မည် ဖြစ်သည်။

သူသည် လက်ထဲက ဓားဖြင့် လက်ဝါးကို ပြတ်သားစွာ ထိုးခွဲလိုက်ရာ သွေးစိမ်းများစွာ ချက်ချင်း စီးထွက်လာခဲ့ပြီး ဝဲပျံနေသော နဂါးနက်ကြီး၏ ခန္ဓာကိုယ်ပေါ်သို့ တိုက်ရိုက် ကျရောက်သွားခဲ့တော့သည်။

သူ့ရဲ့ သွေးစိမ်းများအတွင်း၌ မွေးရာပါ ကောင်းကင်နဂါးစွမ်းအင်များ ပါဝင်နေခဲ့ခြင်းဖြစ်ပြီး သူ့တွင် ၎င်းတို့ကို တကူးတက အသက်သွင်းနိုင်မည့် နည်းလမ်း မရှိသေးသဖြင့် ဤသွေးစိမ်းများကို ကြားခံတစ်ခုအဖြစ် အသုံးချကာ မိမိ၏ မြို့စားအဆင့်ပညာရပ်ကို အတင်းအကျပ် မြင့်တက်လာအောင် လုပ်ဆောင်ရန် ရွေးချယ်လိုက်ခြင်း ဖြစ်သည်။

နောင်အနာဂတ်ကျမှသာ သူ ဒါအတွက် ပိုမိုကောင်းမွန်သော နည်းလမ်းတစ်ခုကို ထပ်မံ စဉ်းစားရပေမည်။

သွေးစိမ်းများ နဂါးနက်ကြီး၏ ခန္ဓာကိုယ်ပေါ်သို့ ကျရောက်သွားသည့် တစ်ခဏ၌ ၎င်းတို့မှာ ထိုနဂါးကြီး၏ ခန္ဓာကိုယ်အတွင်းပိုင်းသို့ ချက်ချင်းပင် ထိုးဖောက်စိမ့်ဝင်သွားခဲ့ကြသည်။

လီလော့က သေချာစွာ စောင့်ကြည့်နေပြီး ထိုသွေးများကို နဂါးကြီးနှင့် ပေါင်းစပ်လိုက်သည်။မဟုရာမြစ်၏နဂါးအလံတော်ပညာရပ်ကို အချိန်အတော်ကြာအောင် ကျင့်ကြံခဲ့ဖူးသူပီပီ ဤပညာရပ်၏ အနုစိတ်လှသော လျှို့ဝှက်ချက်အားလုံးကို ကောင်းစွာ သဘောပေါက်ထားပြီးသားပင်။

ဤအပြုအမူကြောင့် ထိုနဂါးနက်ကြီး၏ ခန္ဓာကိုယ်မှာ သေးငယ်သော အံ့ဖွယ်အသွင်ပြောင်းလဲမှုတစ်ခု ချက်ချင်း ဖြစ်ပေါ်လာခဲ့သည်။ အရင်ဆုံး ခန္ဓာကိုယ် ပိုမို ကြီးမားထူထပ်လာခဲ့ပြီး အစွယ်၊ လက်သည်းခြေသည်းများထံမှလည်း ဆန်းပြားလှသော အလင်းတန်းများစွာ ပြင်းထန်စွာ ဖြာထွက်လာခဲ့ကာ ရှေးယခင်ကထက် များစွာ ပိုမိုရက်စက်သော အသွင် ဖြစ်လာခဲ့ချေပြီ။

ဒါတင် မကသေးပေ... ထိုနဂါးကြီး၏ မျက်ဝန်းများအတွင်း၌လည်း ပြင်းထန်လှသော သွေးဆာလိုစိတ် အသွင်သဏ္ဌာန်များ ပေါ်ထွက်လာခဲ့ပြီး ၎င်းထံမှ ကြောက်မက်ဖွယ်ကောင်းသော နတ်ဆိုးအရှိန်အဝါများပါ အပြင်သို့ ထွက်ပေါ်လာခဲ့တော့သည်။

ဝုန်း

ထိုနဂါးနက်ကြီးက ပြင်းထန်လှသော မြည်ဟည်းသံကြီးတစ်ခုကို ထုတ်လွှတ်လိုက်ပြီး သူ့အောက်မှ ငရဲမြစ်ရေလှိုင်းများမှာလည်း ရှေးယခင်ကထက် များစွာ ပိုမိုအေးခဲနေပြီဖြစ်သည်။

ဤမြို့စားအဆင့်ပညာရပ်ထံမှ ထွက်ပေါ်နေသော အရှိန်အဝါပိုင်းမှာ ယခင်ကထက် နောက်ထပ် အဆင့်တစ်ခုသို့ သိသိသာသာ မြင့်တက်သွားခဲ့ရပြီ ဖြစ်သည်။

ထိုနဂါးနက်ကြီး၏ ပြောင်းလဲမှုက လီလော့ကို ကြီးမားလှသော ဝမ်းသာအားရမှုများ ပေးစွမ်းနိုင်ခဲ့သည်။

သူသည် မဟူရာမြစ်၏နဂါးအလံတော်ပညာရပ်ကို ထိပ်တန်းအောင်မြင်မှုအဆင့်သို့ အတင်းအကျပ် မြင့်တက်လာအောင် လုပ်ဆောင်နိုင်ရန်အတွက် ကောင်းကင်နဂါးစွမ်းအင်များ ပါဝင်နေသည့် သွေးစိမ်းများကို အသုံးချခဲ့ရသည်မှာ မှန်သော်လည်း ဒါက ဤမြို့စားအဆင့်ပညာရပ်အပေါ် သဘောပေါက်မှုပိုင်းမှာလည်း နောက်ထပ် အဆင့်တစ်ခုသို့ အောင်မြင်စွာ တက်လှမ်းနိုင်ခဲ့ပြီဖြစ်ကြောင်း ပြသနေသည့် သက်သေပင် ဖြစ်သည်။

ထို့အပြင် ဤတိုးတက်မှုက သူ့အတွက် မယုံနိုင်လောက်အောင် အရေးကြီးလှပေသည်။

ဘုန်း

လီလော့ စိတ်လှုပ်ရှားစွာဖြင့် ပျော်ရွှင်နေဆဲမှာပင် ကွင်းပြင်ပတ်လည်၌ နောက်ထပ် အသံလှိုင်းပေါက်ကွဲသံကြီးတစ်ခု ထပ်မံ၍ မြည်ဟည်းသွားခဲ့ပြန်ပြီး ပေရာနှင့်ချီ၍ ကျယ်ပြောလှသော နောက်ထပ် နဂါးလက်သီးချက်တစ်ခု သူ့ထံသို့ တဟုန်ထိုး ပြေးဝင်လာခဲ့ပြန်သည်။

ယခုတစ်ကြိမ်တွင်မူ သူသည် နောက်ထပ် ပုန်းကွယ်ရန် မကြိုးစားတော့ပေ။ လီလော့၏

နဂါးနက်ကြီးက မိမိ၏ ဂုဏ်သိက္ခာများကို စိန်ခေါ်ခံလိုက်ရသည့်အလား ပြင်းထန်လှသော မြည်ဟည်းသံကြီးတစ်ခုကို ထုတ်လွှတ်လိုက်ပြီး ခန္ဓာကိုယ်တစ်ခုလုံးကို နက်မှောင်သော ငရဲမြစ်ရေလှိုင်းများဖြင့် ဖုံးလွှမ်းလျက် ပြေးဝင်လာသော ပြင်းထန်လှသည့် နဂါးလက်သီးချက်နှင့် ထိပ်တိုက် တိုက်ရိုက် ပြင်းထန်စွာ ရင်ဆိုင်လိုက်တော့သည်။

ဘုန်း

ထွက်ပေါ်လာသည့် ပြင်းထန်လှသော ပဲ့တင်ထပ်သံစွမ်းအင် မုန်တိုင်းလှိုင်းများ ကွင်းပြင်တစ်ခုလုံးသို့ အရူးအမူး လွင့်စင်သွားခဲ့သဖြင့် ပတ်ဝန်းကျင် ဟင်းလင်းပြင်ပင်လျှင် လောင်ကျွမ်းသွားခဲ့ရပြီး နားကွဲလုမတတ် ပြင်းထန်သော ပေါက်ကွဲသံကြီးများပါ အဆက်မပြတ် မြည်ဟည်းနေခဲ့သည်။

ယခုတစ်ကြိမ်တွင်မူ ထိုနဂါးနက်ကြီး၏ ခန္ဓာကိုယ်မှာ မည်သည့်ပေါက်ကွဲပျက်စီးသွားသည့်အရိပ်အယောင်များ ပြသခဲ့ခြင်းမရှိပေ။

နဂါးနက်ကြီးက ပြင်းထန်လှသော နဂါးလက်သီးချက်နှင့် အချင်းချင်း ရက်စက်စွာ ယှက်နွယ်သွားခဲ့ကြပြီးနောက် နောက်ဆုံး ဝမ်းနည်းစရာကောင်းလှသော မြည်တမ်းသံကြီးတစ်ခုနှင့်အတူ တိုက်ကွက်နှစ်ခုစလုံး ဟင်းလင်းပြင်၌ သေးငယ်သော အလင်းစက်များအဖြစ် တစ်ပြိုင်နက်တည်း ပေါက်ကွဲပျက်စီးသွားခဲ့ကြလေသည်။

ရှေးယခင်က ရေတွက်မရနိုင်သော ပါရမီရှင်များစွာကို အကြီးအကျယ် ထိတ်လန့်သွားစေခဲ့ဖူးသည့် လီတိုင်ရွှမ်၏ကြောက်မက်ဖွယ်ကောင်းလှသော နဂါးလက်သီးချက်မှာ ယခုအခါ အောင်မြင်စွာ တားဆီးခြင်း ခံလိုက်ရပြီ ဖြစ်သည်။

ဤမြင်ကွင်းက အထက်ကောင်းကင်ယံက အကြီးအကဲအားလုံးကိုပါ အကြီးအကျယ် ထိတ်လန့်သွားစေခဲ့သည်။

လီတိုင်ရွှမ်နှင့် မျိုးဆက်တူသူများဖြစ်ကြသည့် အကြီးအကဲများအားလုံး လီလော့ကို ရှုပ်ထွေးလှသော အကြည့်များဖြင့် စိုက်ကြည့်လိုက်မိကြသည်။ ရှေးယခင် နှစ်ပေါင်းများစွာ ကာလတုန်းက သူတို့ထဲမှ မည်သူမျှ ဤတိုက်ကွက်ကို အောင်မြင်စွာ မခုခံနိုင်ခဲ့ကြဘဲ ၎င်းကပင် လီတိုင်ရွှမ်ကို ပြိုင်ဘက်ကင်းသည့် ဒဏ္ဍာရီကြီးတစ်ခုအဖြစ် ဖြစ်ပေါ်လာစေခဲ့ခြင်း ဖြစ်သည်။

သို့သော်လည်း လီလော့ကတော့ ဒါကို အောင်မြင်စွာ လုပ်ဆောင်ပြနိုင်ခဲ့ပြီ ဖြစ်သည်။

ထို့ကြောင့် ရှေ့ဆက်ပြီး စကားအများကြီး ပြောနေရန် မလိုတော့ပေ။

သားဖြစ်သူက ဖခင်ကို အောင်မြင်စွာ ကျော်ဖြတ်ပြလိုက်ခြင်း ဖြစ်သည်။

သူတို့နှစ်ဦးစလုံးမှာ နိမ့်ကျလှသော ကျင့်စဉ်အဆင့်များကိုသာ အားကိုးပြီး တိုက်ခိုက်နေကြခြင်း ဖြစ်သည်မှာ မှန်သော်လည်း သူတို့ ထုတ်ပြလိုက်ကြသည့် စစ်မှန်သော တိုက်ခိုက်နိုင်စွမ်းကမူ လူတိုင်းကို လုံးဝ ဥဿုံ အမြင်ပွင့်လင်းသွားစေခဲ့ပြီ ဖြစ်သည်။

"ဟားဟား"

လီလော့ ကျယ်လောင်စွာ ရယ်မောလိုက်တော့သည်။ သူသည် ဖခင်၏ သံမဏိလက်သီးချက်ကို အောင်မြင်စွာ တားဆီးနိုင်ခဲ့ရုံတင်မကဘဲ မဟူရာမြစ်၏နဂါးအလံတော်ပညာရပ်အပေါ် သဘောပေါက်မှုကိုပါ ပိုမို မြင့်တက်လာစေခဲ့ပြီး ၎င်းကို ထိပ်တနအောင်မြင်မှုအဆင့်သို့ အောင်မြင်စွာ တက်လှမ်းနိုင်ခဲ့ခြင်း ဖြစ်သည်။ သူ့အနေနှင့် သွေးစိမ်းများကို ပေးဆပ်ခဲ့ရသည်မှာ မှန်သော်လည်း သူ ယုံကြည်ထားသည်မှာ နောက်ထပ် တံခွန်ဦးစီးတိုက်ပွဲပြီးလို့ အချိန်အနည်းငယ်မျှ သီးသန့်ကျင့်ကြံပြီးနောက်တွင်မူ ပြင်ပအကူအညီများ မလိုအပ်ဘဲ ဤအဆင့်အတန်းသို့ စစ်မှန်စွာ ရောက်ရှိနိုင်ပေလိမ့်မည်။

ထိုအချိန်ကျမှသာ မဟူရာမြစ်၏နဂါးအလံတော်ပညာရပ်၏ စစ်မှန်သော စွမ်းအားပိုင်းမှာ နောက်ထပ် အဆင့်သစ်တစ်ခုသို့ အရှိန်အဟုန်ဖြင့် ရောက်ရှိသွားမည် ဖြစ်သည်။

"ကြည့်ရတာ အဖေ့မှာလည်း နောက်ဆုံးတော့ ငါ့အတွက် အသုံးဝင်တဲ့ အချက်တစ်ခုခု ရှိနေသေးတာပဲ"

အစောပိုင်းက နောက်ဆုံး တိုက်ကွက်ချင်း အားပြိုင်မှုကို ကြည့်ပြီးနောက် သူ ကောင်းစွာ သဘောပေါက်လိုက်သည်မှာ ဤတိုက်ပွဲအတွင်း အနိုင်ရရှိရန်အတွက်ဆိုလျှင် မိမိတို့၏ အကြီးမားဆုံးသော အဓိက တိုက်ကွက်များကိုသာ ထုတ်သုံးရမည် ဖြစ်ကြောင်းပင်။

သာမန်တိုက်ကွက်များက ဤနေရာမှာ မည်သည့်အသုံးဝင်မှုမျှ ရှိမည် မဟုတ်ပေ။

လီလော့ လက်ဝါးနှစ်ဖက်လုံးကို ချက်ချင်း ပြန်လည်ပူးကပ်လိုက်ပြီး လက်ချောင်းများဖြင့် မယုံနိုင်လောက်အောင် ဆန်းပြားလှသော ဓားလက်ကွက်တစ်ခုကို အမြန်ဆုံး ပုံဖော်လိုက်တော့သည်။

ဝုန်း

ထက်မြက်လှသော ဓားမြည်ဟည်းသံကြီး ကောင်းကင်နှင့် မြေပြင်တစ်ခုလုံးတွင် မိုး‌မြေတုန်ဟည်းမတတ် မြည်ဟည်းသွားခဲ့ပြီးနောက် မည်သို့မျှ ဖော်ပြ၍မရနိုင်လောက်အောင် ထက်မြက်လှသော ဓားအရှိန်အဝါများ နေရာအနှံ့ ပေါက်ကွဲထွက်လာခဲ့တော့သည်။

ရေနှင့် အလင်းစွမ်းအားများ ပြည့်နှက်နေသော ပဲ့တင်ထပ်သံစွမ်းအားများ လီလော့၏ ခန္ဓာကိုယ်အတွင်းမှနေ၍ ကောင်းကင်ယံထံသို့ တစ်ဟုန်ထိုး ထိုးထွက်သွားခဲ့ပြီး လူတိုင်း၏ အံ့ဩမှင်တက်နေသော အကြည့်များအောက်တွင် တောက်ပလှသော အပြာနုရောင် နဂါးစွယ်ဓားကြီးတစ်စင်းအဖြစ် လျင်မြန်စွာ ပြောင်းလဲသွားတော့သည်။

ဟင်းလင်းပြင်အထက်က အကြီးအကဲအားလုံး ဤဓားကြီး ပေါ်ထွက်လာသည်ကို မြင်တွေ့လိုက်ရချိန်တွင် ခန္ဓာကိုယ်တစ်ခုလုံး လုံးဝ တောင့်တင်းသွားခဲ့ကြသည်။

လီလော့သည်လည်း မိမိ၏ ဦးခေါင်းထက်တွင် လွင့်မျောနေသော ထိုဓားကြီးကို သေချာစွာ စိုက်ကြည့်လိုက်မိပြီး သူ့ မျက်ဝန်းများအတွင်း၌မ ငြင်းပယ်၍မရနိုင်သော တောင့်တမှုများ ပြည့်နှက်နေခဲ့သည်။

ဤသည်က မယုံနိုင်လောက်အောင် ပြင်းထန်လှသော ကြိုးစားအားထုတ်မှုများစွာကို ပေးဆပ်ပြီးမှ ကျွမ်းကျင်အောင် လုပ်ဆောင်နိုင်ခဲ့သည့် သန္ဓေတည်ခြင်းအဆင့်ရှိသော ကောင်းကင်လွန် မြို့စားအဆင့်ပညာရပ် ပင် ဖြစ်လေသည်။

ယနေ့တွင်မူ ၎င်းက ကမ္ဘာမြေပေါ်သို့ စစ်မှန်စွာ ထွက်ပေါ်လာခဲ့ပြီ ဖြစ်သည်။

"လူအိုကြီး... အဖေ့ကို ကျေးဇူးဆပ်တဲ့အနေနဲ့ သားက အဖေ့ရဲ့ စွမ်းအင်ပုံရိပ်ကိုပဲ ဓားချက်အတွက် ပထမဆုံးသော ယဇ်ပူဇော်ပစ္စည်းအဖြစ် အသုံးချလိုက်တော့မယ်နော်"

"ဟဲ ဟဲ… ဒါက ကျွန်တော်တို့ လော့လန်အိမ်တော်ရဲ့ မွေးရာပါ အမှတ်အသားဖြစ်တဲ့ အထူးစရိုက်တစ်ခုပဲ မဟုတ်ဘူးလား။း… အချင်းချင်း ပြင်းပြင်းထန်ထန် ရိုက်နှက်ဆုံးမကြတာကမှ ဖခင်နဲ့ သားကြားမှာ ရှိနေတဲ့ အတိုင်းအဆမရှိလှတဲ့ ချစ်ခြင်းမေတ္တာတရားတွေကို အပြည့်အဝ ဖော်ပြနိုင်တဲ့ အကောင်းဆုံးနည်းလမ်းပဲပေါ့…”