အခန်း ၁၁၅

အခန်း ၁၁၅ - နင်ဖုန်းကျီ၏ ရွေးချယ်မှု။

တစ်ချိန်တည်းမှာပင် ဝိဉာဥ်နန်းတော်၏ နောက်ထပ် အစိတ်အပိုင်းတစ်ခုဖြစ်သော အကြီးအကဲများနန်းတော်တွင်လည်း လူများပြည့်နှက်နေသည်။ ဝိဉာဥ်နန်းတော်ကိုအဓိကနန်းတော် နှင့် အကြီးအကဲများနန်းတော်ဟူ၍ နှစ်ပိုင်းခွဲထားသည်။

အဓိကနန်းတော်သည် ပြင်ပကိစ္စရပ်များကို တာဝန်ယူရပြီး အကြီးအကဲများနန်းတော်သည် အတွင်းရေးနှင့် ဝိဉာဥ်စနစ်ဆိုင်ရာများကို တာဝန်ယူရသည်။

အမှန်တကယ်တွင် ဝိဉာဥ်နန်းတော်၏ အာဏာအစစ်အမှန်မှာ အကြီးအကဲများနန်းတော်တွင် ရှိနေသည်။

အုပ်ချုပ်သူ ပီပီတုံ သည် သရဲတုံ့လောနှင့် ပန်းတုံ့လောဟူသော လက်အောက်ခံ နှစ်ဦးသာ ထားရှိပြီး အခြားဒိုလူများမှာမူ အကြီးအကဲများနန်းတော်၏ ခေါင်းဆောင် ချန်တောက်လျိုထံတွင်သာ အမိန့်နာခံကြသည်။

ရှောင်ချန်ယွီက ကျောက်ဝူကျိအား အနိုင်ယူလိုက်သည့် သတင်းမှာ အကြီးအကဲများနန်းတော်သို့ ရောက်ရှိသွားသည်။

"သူက တကယ်ပဲ အဲ့လောက် စွမ်းတာလား။ကျောက်ဝူကျိလောက်ကို အနိုင်ယူရုံနဲ့တော့ ဘာမှ မဟုတ်သေးပါဘူး။"

"ငါသာဆိုရင်လည်း ဒီအတိုင်းပဲ မဟုတ်လား ဝိဉာဥ်နန်းတော်ရဲ့ အနာဂတ်က ငါ့ရဲ့ မြေးမလေးဆီမှာပဲ ရှိတယ်။"

ချန်တောက်လျိုက ပြုံးလျက် ပြောလိုက်သည်။

ချန်တောက်လျိုသည် အလွန်ခန့်ညားသော ပုဂ္ဂိုလ်ဖြစ်ပြီး ထန်ချန်တို့နှင့်အတူ ကုန်းမြေပေါ်တွင် မကျော်လွှားနိုင်သော တောင်တန်းကြီး သုံးခုကဲ့သို့ ကျော်ကြားသူဖြစ်သည်။

သူသည် မြေးမလေး ချန်းရန်ရွှယ် ကို အလွန်အမင်း ချစ်ခင်သူဖြစ်သည်။

"အဘိုး... ဒီရှောင်ချန်ယွီကို အထင်မသေးသင့်ပါဘူး။ သူက ဝိဉာဥ်ကို မသုံးဘဲ ထူးခြားတဲ့ ကိုယ်ခံပညာတွေကို သုံးပြီး ကျောက်ဝူကျိကို အနိုင်ယူသွားတာလို့ သတင်းရထားပါတယ်။"

ချန်းရန်ရွှယ်က စိုးရိမ်တကြီး ပြောလိုက်သည်။

ချန်းရန်ရွှယ်သည် အသက် ၂၀ ကျော် အရွယ်ရှိပြီး အလွန်ထက်မြက်ကာ မွေးရာပါ ဝိဉာဥ်စွမ်းအား အပြည့်ရှိသူဖြစ်သည်။ သူမ၏ စကားကြောင့် ချန်တောက်လျိုပင်လျှင် အံ့အားသင့်သွားသည်။

"ဘာ ဝိဉာဥ်မသုံးဘဲနဲ့ ကျောက်ဝူကျိကို အနိုင်ယူနိုင်တာလား။ ဒီရှောင်ချန်ယွီ ဘယ်လိုလုပ်ပြီး အဲ့လောက်အထိ ဖြစ်နိုင်ရတာလဲ။"

ချန်တောက်လျိုသည် အလွန်အံ့အားသင့်သွားပြီး ပီပီတုံက ရှောင်ချန်ယွီကဲ့သို့ အရည်အချင်းရှိသူကို မည်သို့ ဆွဲဆောင်နိုင်ခဲ့သနည်းဟု မနာလို ဖြစ်မိသည်။

သူသည် ရှောင်ချန်ယွီကို အကြီးအကဲများနန်းတော်သို့ ခေါ်ဆောင်လိုသော်လည်း ပီပီတုံက သူ့ကို သန့်စင်သော သားတော် အဖြစ် ကြိုတင် ခန့်အပ်လိုက်သဖြင့် အခွင့်မသာတော့ပေ။

တစ်ဖက်တွင်နင်ဖုန်းကျီ၏ ဘုံခုနစ်ဆင့်ပြဿဒ်ဂိုဏ်းတွင်မူ...

"ဘာ ဝိဉာဥ်နန်းတော်က ကျူးကဲမြားစက် လို့ခေါ်တဲ့ လက်နက်ကို ရောင်းချနေတယ်ဟုတ်လား။ ထောက်ပံ့ရေး ဝိဉာဥ်သခင်တစ်ယောက်တောင် ဒါကိုသုံးပြီး တိုက်ခိုက်ရေးသမားတစ်ယောက်ကို သတ်နိုင်တယ်။"

နင်ဖုန်းကျီမှာ အံ့အားသင့်သွားသည်။ သူသည် ဝိဉာဥ်ကုန်းမြေတွင် အထက်မြက်ဆုံး ထောက်ပံ့ရေး ဝိဉာဥ်ပညာရှင်ဖြစ်ပြီး သူ၏ ဂိုဏ်းဝင်များသည် အားကောင်းသော်လည်း ကိုယ်တိုင်တိုက်ခိုက်နိုင်စွမ်း နည်းပါးခြင်းမှာ အကြီးမားဆုံး အားနည်းချက်ဖြစ်သည်။

"ဒီလက်နက်သာ တကယ်ဆိုရင်... ငါတို့ ဂိုဏ်းအတွက် အကြီးမားဆုံးသော အပြောင်းအလဲပဲ။"

နင်ဖုန်းကျီသည် ဤလက်နက်၏ အရေးပါပုံကို ချက်ချင်း သဘောပေါက်လိုက်ပြီး ရှောင်ချန်ယွီနှင့် ဝိဉာဥ်နန်းတော်၏ လှုပ်ရှားမှုကို ဂရုတစိုက် စောင့်ကြည့်ရန် ဆုံးဖြတ်လိုက်တော့သည်။