အခန်း ၅၉

အခန်း (၅၉) - ဟိုကျဲ့နှင့် ဟိုမင်

အပြာရင့်ရောင်ဝတ်ရုံများကို ဝတ်ဆင်ထားသည့် အတွင်းစည်းတပည့်များအားလုံး အောက်ခြေသိမ်းတပည့်များ၏ နေရာသို့ စုပြုံဆင်းသက်လာကြသည်ကို မြင်သောအခါ အောက်ခြေသိမ်းတပည့်များမှာ မိမိတို့ အရိုက်ခံရတော့မည်ဟု ထင်မှတ်ကာ ကြောက်ရွံ့သွားကြလေသည်။

၎င်းတို့ ကြုံတွေ့ခဲ့ရသည့် အရာများကြောင့် နောက်ထပ် မည်သည့်ဆိုးကျိုးများ ကြုံတွေ့ရဦးမည်ကို တွေးတောရင်း တုန်လှုပ်ခြောက်ခြားနေကြသည်။

တစ်စုံတစ်ယောက်က ထိုအတွင်းစည်းတပည့်များကို ဒေါသထွက်အောင် ပြုလုပ်လိုက်၍ ဤနေရာသို့ ရောက်လာကြခြင်းလော။

အတွင်းစည်းတပည့်များမှာ စတင်တော့မည့် တိုက်ပွဲကိုသာ အာရုံစိုက်ကြည့်နေကြသည်ကို မြင်မှသာ သူတို့ စိတ်သက်သာရာရကာ သက်ပြင်းချနိုင်တော့သည်။

ထို့နောက် ထိုသူများ၏ အာရုံစိုက်မှုက လင်းဖန်အပေါ်တွင် ကျရောက်နေကြောင်း သိလိုက်ရသည့်အခါ သူတို့သည် စိတ်ထဲမှနေ၍ လင်းဖန်ကို တိတ်တဆိတ် ကျိန်ဆဲလိုက်ကြသည်။

ဤအတွင်းစည်းတပည့်များ ဤနေရာအထိ ရောက်လာရလောက်အောင် လင်းဖန်တစ်ယောက် မည်သည့်ပြဿနာများ ရှာဖွေထားခဲ့သနည်း။

ပြိုင်ပွဲကို စီရင်ပေးမည့် စီနီယာ အောက်ခြေသိမ်းတပည့်ဖြစ်သော ဒိုင်လူကြီးမှာမူ ဘေးပတ်ပတ်လည်တွင် ပရိသတ်အများအပြား ဝန်းရံနေသည်ကို မြင်သောအခါ ဆွံ့အသွားလေသည်။

ခေတ္တမျှ စိတ်ကို တည်ငြိမ်အောင် ထိန်းချုပ်လိုက်ပြီးနောက် သူက လက်နှစ်ဖက်ကို မြှောက်ကာ ကျယ်လောင်စွာ ကြေညာလိုက်သည်။

“နောက်တစ်ပွဲကတော့ လင်းဖန်နဲ့ လောင်ဖေတို့ ဖြစ်ပါတယ်”

“စည်းကမ်းတွေကတော့ ရည်ရွယ်ချက်ရှိရှိ သတ်ဖြတ်တာ၊ ခြေလက်ဖြတ်တောက်တာနဲ့ ခေါင်းဖြတ်တာတွေကို ခွင့်မပြုပါဘူး”

“သွေးနဲ့ချီ ပြန်လည်အားဖြည့်ဆေးလုံးတွေနဲ့ ကုသလို့မရနိုင်တဲ့ ဒဏ်ရာမျိုးတွေကို မလုပ်ကြဖို့ သတိပေးချင်ပါတယ်”

ဒိုင်လူကြီးက လက်ကို ပြန်ချလိုက်သည်နှင့်တစ်ပြိုင်နက် လောင်ဖေသည် လင်းဖန်ထံသို့ အရှိန်အဟုန်ဖြင့် ပြေးဝင်သွားလေတော့သည်။

လောင်ဖေသည် လက်ကိုမြှောက်ကာ လင်းဖန်၏ မျက်လုံးများကို ပစ်မှတ်ထားပြီး လေပွေကဲ့သို့ ဝေ့ဝဲနေသော တိုက်ကွက်တစ်ခုဖြင့် ထိုးနှက်လိုက်သည်။

သူသည် လင်းဖန်၏ မျက်လုံးများနှင့် ဦးနှောက်ကို ဖျက်ဆီးပစ်ရန် ကြိုးစားနေခြင်းပင်။

လင်းဖန်က ဘေးသို့ ကိုယ်ကို တိမ်းစောင်းကာ ရှောင်တိမ်းလိုက်သော်လည်း သူ၏ စိတ်ထဲ၌မူ မနှစ်မြို့မိချေ။

ဤသည်မှာ စည်းကမ်းချက်များကို ဖောက်ဖျက်ရာ မရောက်ပေဘူးလော။

လင်းဖန်က လောင်ဖေ၏ ခါးအောက်ပိုင်းကို လက်သီးဖြင့် ပြင်းထန်စွာ ထိုးနှက်လိုက်ရာ လောင်ဖေမှာ လွင့်ထွက်သွားပြီး မြေပြင်ပေါ်တွင် လိမ့်ကျသွားလေသည်။

လောင်ဖေသည် ဓားကို မြေပြင်တွင် ထောက်ကာ အားယူ၍ မတ်တတ်ရပ်ရန် ကြိုးစားလိုက်သည်။

သို့သော်လည်း သူသည် သွေးတစ်လုတ်ကို အန်ထုတ်လိုက်ပြီးနောက် မြေပြင်ပေါ်သို့ ပြန်လည် လဲကျသွားရှာသည်။

လင်းဖန်၏ လက်သီးချက်ကြောင့် သူ၏ ကိုယ်တွင်းအင်္ဂါများမှာ ပြင်းထန်စွာ ပျက်စီးသွားခဲ့ပြီ ဖြစ်ပေသည်။

အဆင့် ၄ ခန္ဓာကိုယ်ကြံ့ခိုင်မှု ရှိထားသည့် လင်းဖန်အတွက်မူ သူ၏ ကျင့်ကြံခြင်း ချီစွမ်းအင်များနှင့် သိုင်းကွက်များကိုပင် ထုတ်ဖော်အသုံးပြုရန် မလိုချေ။

သူ၏ ခန္ဓာကိုယ်ခွန်အားမှာ ချီစုစည်းမှုအဆင့် ကျင့်ကြံသူတစ်ဦးကို အလွယ်တကူ လွှမ်းမိုးနိုင်ရန် လုံလောက်နေသည်မှာ ကြာပြီပင်။

ဒိုင်လူကြီးသည် ထိုအခြေအနေကို မြင်သောအခါ လောင်ဖေနှင့် လင်းဖန်တို့၏ ကြားထဲသို့ အပြေးအလွှား ဝင်ရောက်ကာ တားဆီးလိုက်သည်။

သူက ချက်ချင်းပင် လက်များကို မြှောက်ကာ အနိုင်ရရှိသူကို ကြေညာလိုက်သည်။

“တော်ပြီ။ လင်းဖန်ကို အနိုင်ရရှိသူအဖြစ် ကြေညာပါတယ်”

လင်းဖန်မှာမူ ကိုယ်ကိုလှည့်ကာ နောက်ထပ် ပွဲစဉ်အတွက်သာ အေးဆေးစွာ စောင့်ဆိုင်းနေလိုက်သည်။

ဤရလဒ်မှာ သူ့အတွက်မူ ဖြစ်ရိုးဖြစ်စဉ် တစ်ခုမျှသာ ဖြစ်ပုံရလေသည်။

လောင်ဖေ၏ စွမ်းရည်မှာ မည်မျှအထိ ကောင်းမွန်ကြောင်း သိကြသဖြင့် အောက်ခြေသိမ်းတပည့်များအားလုံးမှာ တိတ်ဆိတ်ငြိမ်သက်သွားကြသည်။

လောင်ဖေမှာ ချီစုစည်းမှုအဆင့်၏ အဆင့်ငါးသို့ပင် ရောက်ရှိနေပြီ ဖြစ်သည်။

သူတို့အားလုံးထဲတွင် ကျင့်ကြံခြင်းအဆင့် အမြင့်မားဆုံးသူလည်း ဖြစ်သည်။

သို့သော်လည်း လင်းဖန်က သူ့ကို လက်သီးတစ်ချက်တည်းဖြင့် အလဲထိုးပစ်လိုက်နိုင်ခဲ့လေသည်။

သို့ရာတွင် အတွင်းစည်းတပည့်များမှာမူ ထိုသို့မထင်ဘဲ ခေါင်းများကိုသာ ခါယမ်းလိုက်ကြသည်။

သူတို့သည် မည်သည့်အရာကို မျှော်လင့်ထားခဲ့ကြသနည်း။

ဤမျှ အဆင့်နိမ့်သော အောက်ခြေသိမ်းတပည့်များ၏ တိုက်ခိုက်မှုများမှာ သာမန်အပျော်တမ်းအဆင့် တိုက်ခိုက်ခြင်းမျှသာ ဖြစ်နေမည်မှာ အမှန်ပင်။

သူတို့ထဲမှ အချို့မှာမူ စိတ်ဝင်စားမှုမရှိတော့သဖြင့် လင်းဖန်အား ထူးခြားသော သိုင်းပညာရှင်တစ်ဦးဟု ထင်မှတ်ကာ အချိန်ဖြုန်းခဲ့မိသည့်အတွက် ကျိန်ဆဲရင်း ထွက်ခွာသွားကြလေသည်။

ကျန်ရစ်ခဲ့သူများကမူ လင်းဖန်သည် သူ၏ စစ်မှန်သော စွမ်းရည်များကို ဖုံးကွယ်ထားခြင်း ရှိမရှိကို ဆက်လက် စောင့်ကြည့်လိုကြသည်။

သို့သော်လည်း သူတို့အတွက် ထိုသို့သော အခွင့်အရေး မရရှိခဲ့ချေ။

လင်းဖန်နှင့် နောက်ဆက်တွဲ ယှဉ်ပြိုင်ရမည့် ပြိုင်ဘက်များအားလုံးမှာမူ လက်လျှော့သွားကြပြီး တိုက်ခိုက်ရေးကွင်းထဲသို့ ခြေပင်မချဝံ့ကြတော့ချေ။

“တောက်... စောစောထွက်သွားခဲ့ရမှာ”

“အချိန်ကုန်တာပဲ အဖတ်တင်တယ်”

“သူ့မှာ လျှို့ဝှက်ချက် ရှိနေဦးမယ်လို့ ထင်ထားခဲ့တာ”

လင်းဖန်အား လစဉ်အဆင့်ပြိုင်ပွဲ၏ ချန်ပီယံအဖြစ် ကြေညာလိုက်ချိန်တွင် ကျန်ရှိနေသော အတွင်းစည်းတပည့်များမှာ ကျိန်ဆဲရင်း ထွက်ခွာသွားကြလေသည်။

ဒိုင်လူကြီးက လင်းဖန်အား လက်ဟန်ပြခေါ်ယူရင်း အော်ပြောလိုက်သည်။

“ဒီလရဲ့ အဆင့်ပြိုင်ပွဲမှာ လင်းဖန်ကို အောင်နိုင်သူအဖြစ် ကြေညာတယ်။ လာခဲ့... မင်းရဲ့ ဆုလာဘ်ဖြစ်တဲ့ စွမ်းဆောင်ရည်အမှတ် ဆယ်မှတ်ကို လာယူချေ”

လင်းဖန်သည် သူ၏ သစ်သားပြားကို ကမ်းပေးလိုက်ပြီး ဆုလာဘ်ကို ရယူလိုက်သည်။

သူသည် လက်ထဲရှိ သစ်သားပြားကိုကိုင်ထားရင်း ကျန်ရှိသောအမှတ်ကို စစ်ဆေးကာ စိတ်ထဲမှ ရေရွတ်လိုက်လေသည်။

‘ဒီနေ့အတွက်တော့ မဆိုးပါဘူး’

ယခုဆိုလျှင် သူ့တွင် စွမ်းဆောင်ရည်အမှတ် တစ်ရာ ရှိနေပြီဖြစ်ရာ ယနေ့ည မှောင်ခိုဈေးတွင် သူလိုအပ်သည်များကို ဝယ်ယူနိုင်ပေတော့မည်။

ဟိုမင်က လင်းဖန်အား ဂုဏ်ပြုစကား ပြောလိုက်သည်။

“ဂုဏ်ယူပါတယ် လင်းဖန်။ မင်းရဲ့ သစ်သားတဲအိမ်မှာ ငါ့ကို စောင့်နေဦး။ ငါတို့ ဂုဏ်ပြုပွဲအသေးစားလေးနဲ့ အောင်ပွဲခံကြရအောင်”

လင်းဖန်က နောက်ပြောင် ပြောလိုက်သည်။

“ကောင်းပြီလေ။ မင်း ဘာတွေ ကြံစည်နေလဲတော့ ငါမသိဘူး။ ဒါပေမဲ့ ကောင်းကောင်းမွန်မွန် ဖြစ်ဖို့တော့ မျှော်လင့်ရတာပဲ”

လင်းဖန်သည် ဟိုမင်၏ပုခုံးကို ပုတ်လိုက်ပြီးနောက် လှည့်ထွက်ကာ သူ့လမ်းသူ ဆက်လျှောက်သွားလေသည်။

သူ ဖြတ်လျှောက်သွားစဉ် အခြားအောက်ခြေသိမ်းတပည့်များက သူ့ကို လမ်းဖယ်ပေးလိုက်ကြသည်။

အရင်ကမူ သူတို့သည် မည်သည့်အဆင့်မှန်းမသိရသော ကျင့်ကြံခြင်းအမြုတေရှိသည့် လင်းဖန်ကို အသုံးမကျသော ကျင့်ကြံသူတစ်ဦးဟု ထင်မှတ်ခဲ့ကြသည်။

ယခုအချိန်တွင်မူ သူတို့ မှားယွင်းသွားခဲ့ကြောင်း နားလည်သွားကြလေပြီ။

…

သစ်သားတဲအိမ်အတွင်း၌…

လင်းဖန်သည် ဟိုကျဲ့နှင့်အတူ လက်ဖက်ရည် သောက်နေစဉ် ဟိုမင် ဝင်ရောက်လာသည်။

ဟိုကျဲ့က ဟိုမင်ကို မြင်သောအခါ မေးလိုက်သည်။

“ဒါက...”

ဟိုမင်က လက်ယှက်ကာ ဦးညွှတ်နှုတ်ဆက်လိုက်သည်။

“မင်္ဂလာညချမ်းပါ။ ကျုပ်က အန်းရှန်းရွာက ဟိုမင်ပါ။ လင်းဖန်နဲ့ တစ်ရွာတည်းသားတွေပါ”

ဟိုကျဲ့သည် ခေတ္တမျှ မှင်တက်သွားပြီးနောက် လင်းဖန်ကို တစ်ချက် စောင်းငဲ့ကြည့်လိုက်ပြီး ညစာပြင်ဆင်ပေးရန် ကမ်းလှမ်းလိုက်သည်။

“အာ... တိုက်ဆိုင်လိုက်တာ။ ငါတို့တွေ မျိုးရိုးတူကြတာပဲ။ ကြိုဆိုပါတယ်။ ထိုင်ပါဦး။ ငါ သွားပြီး ညစာ ပြင်ဆင်လိုက်ဦးမယ်”

ဟိုကျဲ့သည် ဟိုမင်ကို တစ်ခါမျှ မမြင်ဖူးကြောင်း ပြောခဲ့သည်ကို လင်းဖန် ပြန်လည်အမှတ်ရလိုက်သည်။

သူသည် ဟိုမင် မမွေးဖွားမီကပင် ချင်ဖုန်းဂိုဏ်းသို့ စေလွှတ်ခြင်း ခံထားရသူ ဖြစ်သည်။

ဟိုကျဲ့အနေဖြင့် မိမိကိုယ်ကိုယ် ဟိုမင်၏ ဦးလေးအဖြစ် မိတ်မဆက်ချင်သဖြင့် သူ့တွင် ကိုယ်ပိုင်အကြောင်းပြချက်များ ရှိနေပေလိမ့်မည်။

လင်းဖန်သည် ဟိုကျဲ့ကို ခေါင်းညိတ်ပြလိုက်ပြီး သူ၏ လျှို့ဝှက်ချက်ကို ဖော်ထုတ်မည်မဟုတ်ကြောင်း ကတိပေးလိုက်သည်။

ဟိုမင်က ပြောလိုက်သည်။

“နေပါဦး။ ငါ ဝိညာဉ်ဆန် ငါးဘူးနဲ့ မိစ္ဆာသားရဲအသားတွေ ယူလာခဲ့တယ်။ ကောင်းကောင်းမွန်မွန် ချက်ပြုတ်ပြီး ငါတို့ရဲ့ အောင်ပွဲကို ဆင်နွှဲကြတာပေါ့”

လင်းဖန်သည် ရရှိလာသော လက်ဆောင်များကို ငြင်းဆန်တတ်သူ မဟုတ်သဖြင့် ဆန်နှင့် အသားကို ဝမ်းမြောက်ဝမ်းသာ လက်ခံလိုက်သည်။

“ကောင်းလိုက်တာ။ ပြိုင်ပွဲတွေ အပြီးမှာ ဒါက ငါ တကယ် လိုအပ်နေတာပဲ”

ဟိုမင်သည် လင်းဖန်က ဟန်ဆောင်ကာ ကြွားဝါနေခြင်းဖြစ်ကြောင်း သိသွားသောအခါ စကားကို ရပ်လိုက်လေသည်။

“ဒါပေမဲ့ မင်းက တစ်ပွဲတည်း ပြိုင်ခဲ့ရတာလေ။ ပြီးတော့ အဲဒါကလည်း ချက်ချင်း...”

သို့သော် ဟိုမင် ပျော်ရွှင်မိသည်။ ဤသည်မှာ လင်းဖန်က အခြားသူများအား ပြသလေ့မရှိသော တစ်ဖက်ခြမ်း ဖြစ်လေသည်။

မိမိနှင့် နီးစပ်သူများကိုသာ ပြသတတ်သော အပြုအမူမျိုးပင်။

ညစာ အဆင်သင့် ဖြစ်သောအခါ သူတို့သည် မြိန်ရေယှက်ရေ စားသောက်ကြလေသည်။

ဝိညာဉ်ဆန်နှင့် မိစ္ဆာသားရဲအသားတို့က လင်းဖန်၏ ချီစွမ်းအင်များကို ပြန်လည်ဖြည့်တင်းပေးလေသည်။

ဟိုမင်သည် ပဲငံပြာရည်ဖြင့် ကြော်ထားသော နောက်ဆုံးအသားတုံးကို စားရင်း ကမ်းလှမ်းလိုက်သည်။

“မင်း လိုအပ်မယ်ဆိုရင် ငါ့ရဲ့ အပတ်စဉ် ရိက္ခာဖြစ်တဲ့ ဝိညာဉ်ဆန်နဲ့ မိစ္ဆာသားရဲအသားတွေကို ယူလာပေးမယ်။ ငါတစ်ယောက်တည်း အကုန်မစားနိုင်ဘူး”

လင်းဖန်သည် ဟိုကျဲ့အနေဖြင့် ဟိုမင်ကို ပို၍မကြာခဏ တွေ့ခွင့်ရစေရန် သဘောတူလိုသော်လည်း ဟိုကျဲ့က လင်းဖန်အား မျက်မှောင်ကြုတ်၍ စိုက်ကြည့်လိုက်လေသည်။

ထို့ကြောင့် လင်းဖန် မည်သို့ ပြန်လည်ဖြေကြားရမည်ကို သိရှိသွားပြီး ငြင်းဆန်လိုက်တော့သည်။

“မလိုပါဘူး။ ငါ့အဆင့်အတန်းနဲ့ဆိုရင် ဒါတွေက ငါ့ရဲ့ ချီကို ပြန်ဖြည့်ပေးရုံလောက်ပဲ တတ်နိုင်တော့တယ်။ ငါ့ရဲ့ ကျင့်ကြံခြင်းအတွက် သိပ်ပြီး အထောက်အကူ မပြုတော့ဘူး”

ထိုစကားကို ကြားသောအခါ ဟိုကျဲ့သည် သူ၏ လက်ဖက်ရည်ခွက်ကိုမကာ မျက်နှာရှေ့မှ ထွက်ပေါ်နေသော အပူငွေ့များကို မှုတ်ထုတ်လိုက်လေသည်။