အခန်း ၃၄၆

အခန်း (၃၄၆) - နင်မြို့အတွင်းမှ လှုပ်ခတ်နေသော အဝါရောင်လှိုင်းများ (၂)

“လက်ပတ်ကို ဝတ်ဆင်ထားပါ၊ ဒါက အရင်းအမြစ်တွေ ခွဲဝေမှုနဲ့ စီမံခန့်ခွဲမှုအတွက် အထောက်အကူပြုပါတယ်”

လက်ပတ်က သူတို့၏ အရေပြားနှင့် ထိတွေ့လိုက်သည့် အခိုက်အတန့်တွင် အဆင့်မြင့် ကျင့်ကြံသူအများစုပင် ခံစားသိရှိနိုင်ရန် ခက်ခဲလောက်အောင် အလွန်အားနည်းသော စွမ်းအင်လှိုင်းဂယက်တစ်ခု ဖြတ်သန်းသွားသည်ကိုမူ မည်သူမျှ သတိမပြုမိခဲ့ကြပေ။

မြေအောက်ခိုလှုံရာနေရာများ၏ အဝင်ဝတွင် လူသားတို့၏ အလင်းနှင့် အရိပ်တို့ ရောယှက်နေသည်။

ဘဏ်တိုက် တံခါးများအလား ထူထဲလှသော ဧရာမ သတ္တုစပ် တံခါးကြီးများ ဖြည်းညင်းစွာ မြင့်တက်လာပြီး ကွန်ကရစ်နှင့် ပိုးသတ်ဆေးနံ့များ ရောနှောနေသည့် နက်ရှိုင်းသော ဥမင်လိုဏ်ခေါင်းကြီး ပေါ်လာသည်။

ဤအရာမှာ ခေတ်ဟောင်းက ကျန်ရစ်ခဲ့သော ပြည်သူ့ကာကွယ်ရေးစီမံကိန်းတစ်ခုဖြစ်သည်။

ယခုအခါ သုသေသနအသင်းနှင့် သံမဏိဒိုင်းကာ ကင်းစခန်းတို့က အတူတကွ လွှဲပြောင်းရယူထားကာ အတွင်းပိုင်းကို ပြင်ဆင်ပြီး အခြေခံလူနေအဆောက်အအုံများ တည်ဆောက်ထားခြင်း ဖြစ်သည်။

လေ့ဟောက်၏ ကြီးမားလှသော ပုံရိပ်သည် အဝင်ဝ၏ အထင်ရှားဆုံးနေရာတွင် ရပ်နေသည်။ သူ့တွင် မိုက်ခရိုဖုန်း မရှိသော်လည်း တည်ငြိမ်သော သူ၏ အသံက ပတ်ဝန်းကျင်ရှိ ဆူညံသံအားလုံးကို လွှမ်းမိုးသွားပြီး လူတိုင်း၏ နားထဲသို့ ရောက်ရှိသွားသည်။

“ထိတ်လန့်မနေကြပါနဲ့။ ငါတို့မှာ အချိန်ရှိပါသေးတယ်၊ ခိုလှုံရာနေရာအတွင်းမှာ လုံလောက်တဲ့ နေရာလွတ်တွေနဲ့ အခြေခံ အသက်ရှင်ဖို့အတွက် ထောက်ပံ့ရေး ပစ္စည်းတွေ ရှိပါတယ်”

“ကျုပ် လေ့ဟောက်အနေနဲ့ သံမဏိဒိုင်းကာ ကင်းစခန်းရဲ့ နာမည်နဲ့ ကျိန်ဆိုရဲတယ်၊ မြို့တံတိုင်းကြီး မပြိုလဲသရွေ့၊ ဒီမှာ ရှိနေသရွေ့ ဝင်လာတဲ့ ရဲဘော်ရဲဘက် တိုင်းကို ကာကွယ်ဖို့ ကျုပ် အစွမ်းကုန် ကြိုးစားသွားမှာပါ”

သူ၏ စကားများသည် စိတ်လှုပ်ရှားဖွယ် မရှိသော်လည်း လေးနက်ပြီး ယုံကြည်ရသည့်ဟန်ရှိသည်။

သူ၏ စစ်သည်များသည် ဒိုင်းများနှင့် ခန္ဓာကိုယ်များကို အသုံးပြု၍ ကာကွယ်ရေးမျဉ်းတစ်ခု တည်ဆောက်ကာ လူအုပ်ကြီးကို အလွန်ထိရောက်စွယ လမ်းညွှန်ပေးနေကြသည်။

သူတို့၏ လှုပ်ရှားမှုများသည် ကြမ်းတမ်းမှုသော်လည်း အဝင်ဝကို ရှင်းလင်းနေစေရန်နှင့် အခြေခံစည်းကမ်းများ ထိန်းသိမ်းထားနိုင်ရန် သေချာစေခဲ့သည်။

သူတို့သည် သက်ကြီးရွယ်အိုများ၊ အားနည်းသူများ၊ အမျိုးသမီးများနှင့် ကလေးငယ်များကို လက်ကမ်းကူညီပေးကြသည်။

လမ်းဖြတ်ရန် ကြိုးစားကြသူများ သို့မဟုတ် ဖရိုဖရဲဖြစ်အောင် လုပ်ကြသူများအတွက်မူ မည်သည့် ညှာတာမှုမျှမပြဘဲ ဒိုင်းများဖြင့် တွန်းထုတ်ပစ်ကြပြီး အချို့ကို ယာယီ ထိနိးသိမ်းထားကြသည်။

၎င်းနှင့် နှိုင်းယှဉ်ပါက လောင်ကျွမ်းမီးလျှံဂိုဏ်း၏ ပါဝင်မှုမှာ ပိုမိုထိရောက်မှုရှိပုံရသည်။

ဟုန့်ကျိသည် စည်းကမ်းနှင့် တိုက်ခိုက်ရေးစွမ်းအားကြောင့် နာမည်ကြီးသော အဖွဲ့တစ်ဖွဲ့ကို စေလွှတ်ခဲ့သော်လည်း သူတို့သည် လောင်ကျွမ်းမီးလျှံဂိုဏ်း၏ အအဓိကထိန်းချုပ်ရာဧရိယာသို့ ဦးတည်သည့် လမ်းဆုံအချို့ကိုသာ အဓိက စောင့်ကြပ်နေကြသည်။

“ဂိုဏ်းချုပ်ကြီးရဲ့ အမိန့်…”

“ ငါတို့ ထိန်းချုပ်တဲ့ ဧရိယာအတွင်းက အရပ်သားတွေအတွက် ရွှေ့ပြောင်းရေး လမ်းကြောင်းတွေ ရှင်းလင်းနေဖို့ကိုပဲ ဦးစားပေး သေချာစေရမယ်”

“ မသက်ဆိုင်တဲ့သူတွေ ငါတို့ရဲ့ အဓိက ဧရိယာကို ချဉ်းကပ်ခွင့် မရှိဘူး”

အဖွဲ့ခေါင်းဆောင်က ကြေညာလိုက်သည်။

သူတို့သည် လမ်းမများပေါ်ရှိ ရွှေ့ပြောင်းမှုများကို ကူညီရန် တက်ကြွစွာ ဆောင်ရွက်ခြင်း မရှိကြသော်လည်း သူတို့ သတ်မှတ်ထားသော ဧရိယာအတွင်း ဝင်ရောက်လာကြပြီး “တန်ဖိုးရှိပုံရသည့်” အရပ်သားများ (ဥပဒေအရ သန်မာသူများ သို့မဟုတ် အထူးစွမ်းရည်ရှိသူများကဲ့သို့) အတွက်မူ အကန့်အသတ်ရှိသော ကာကွယ်မှုများနှင့် လမ်းညွှန်မှုများကို ပံ့ပိုးပေးကြသည်။

ပိုမိုဝေးကွာသော နေရာများရှိ ဖရိုဖရဲဖြစ်မှုများကိုမူ သူတို့က အေးစက်စွာဖြင့်သာ စောင့်ကြည့်နေကြသည်။

ဟုန့်ကျိ၏ မဟာဗျူဟာမှာ ရှင်းလင်းလှသည်။

ခွန်အားများကို စုစည်းရန်၊ အခြေခံစခန်းကို ကာကွယ်ရန်၊ ပြီးလျှင် သူတို့ တတ်နိုင်သမျှ ကန့်သတ်ချက်အတွင်း၌ စည်းကမ်းနှင့် လူထုထောက်ခံမှု အချို့ကို ထိန်းသိမ်းရန်ဖြစ်ပြီး ပြင်ပလူများအတွက်မူ သူတို့၏ အဓိက ခွန်အားများကို ဘယ်တော့မှ အကုန်အခံမည် မဟုတ်ပေ။

ဤသည်မှာ သွေးအေးလွန်းခြင်း မဟုတ်ဘဲ ကမ္ဘာပျက်ကပ်၏ ရက်စက်လှသော လက်တွေ့အခြေအနေမှ မွေးဖွားလာသည့် ချိန်ဆမှုတစ်ခု သက်သက်သာ ဖြစ်သည်။

ဤသို့ဖြင့် မိစ္ဆာသားရဲ မဟာမိတ်တပ်ဖွဲ့များ ဝိုင်းရံမှုကို မပြီးဆုံးမီ မရေမတွက်နိုင်သော အရပ်သားများ၏ ထိတ်လန့်နေကြသော အကြည့်များအောက်တွင်…

မီးပွားသုသေသနပညာရှင်အသင်း ဌာနချုပ်၏ မြေအောက်နက်ရှိုင်းရာမှ ရုတ်တရက် နှလုံးခုန်ရပ်မတတ် ဖြစ်စေသည့် စွမ်းအင် ပေါက်ကွဲမှုတစ်ခု ထွက်ပေါ်လာခဲ့သည်။

ချက်ချင်းဆိုပင် မြို့တော်အောက်တွင် ကြိုတင် မြှုပ်နှံထားသည့် ထူထဲသော စွမ်းအင်ပြွန်များတစ်လျှောက် မိုးပြာရောင် ရေစီးကြောင်းကြီးတစ်ခု ဆူပွက်လာခဲ့ပြီး မြို့တော်တစ်ခုလုံးရှိ အဓိကအမှတ် တစ်ရာ့ရှစ်ခုတွင် ဖြန့်ကျက်ထားသော စွမ်းအင် ထုတ်လွှတ်မှု ကိရိယာများကို ချက်ချင်း အသက်သွင်းလိုက်သည်။

ဝီ…

နင်မြို့၏ အစွန်းများမှနေ၍ အရောင်ဖျော့ဖျော့ အပြာရောင်ရှိပြီး တစ်ဝက်ပွင့်လင်းမြင်သာသော စွမ်းအင် အကာအကွယ်ကြီးတစ်ခု ကောင်းကင်ယံသို့ ထိုးတက်သွားသည်။

ဒဏ္ဍာရီထဲက ကောင်းကင်နှင့် မြေကြီးကို ချိတ်ဆက်ထားသည့် တံတိုင်းကြီးတစ်ခုအလား ၎င်းသည် မြင့်မားလှသော ကောင်းကင်ယံ၌ အကွေးပုံစံဖြင့် လျင်မြန်စွာ ချိတ်ဆက်သွားသည်။

နောက်ဆုံးတွင် မြို့တော်တစ်ခုလုံးကို တင်းကျပ်စွာ လွှမ်းခြုံထားသည့် အကာအကွယ်ကြီးတစ်ခုကို ဖွဲ့စည်းလိုက်သည်။

ကောင်းကင်ယံတံတိုင်း တရားဝင်အသက်ဝင်သွားခဲ့ပြီဖြစ်သည်။

အကာအကွယ်၏ မျက်နှာပြင်ပေါ်တွင် မရေမတွက်နိုင်သော နက်နဲလှသော ရုန်းများသည် အသက်ရှူနေသကဲ့သို့ တဖျပ်ဖျပ် လင်းလက်နေကြပြီး စိတ်အေးချမ်းစေသည့် စွမ်းအင်အလင်းရောင်များက လှည့်ပတ်နေသည်။

၎င်းသည် မြို့အပြင်ဘက်၌ ဆူနာမီတစ်ခုအလား ပိုမိုနီးကပ်လာနေသည့် ကြောက်မက်ဖွယ် မိစ္ဆာရောင်ဝါများနှင့် မြေပြင်တုန် ဟိန်းဟောက်သံများကြားမှ မြို့တော်ကို အောင်မြင်စွာ သီးခြားခွဲထုတ်ပေးလိုက်သည်။ မြို့အတွင်း၌ အသက်ရှူကျပ်စေသော ဖိအားများမှာ လျော့ပါးသွားခဲ့သည်။

ခဏတာ တိတ်ဆိတ်သွားပြီးနောက် ဘေးအန္တရာယ်မှ လွတ်မြောက်သွားခဲ့ရသည့်အလား ကြီးမားလှသော အသံဗလံများ ထွက်ပေါ်လာခဲ့ရာ ငိုယိုသံများ၊ ဆုတောင်းသံများနှင့် ပင်ပန်းနွမ်းနယ်မှုကြောင့် သက်ပြင်းချသံများ ရောနှောနေသည်။

ဤ “ဥခွံ” ကြီးက လူသန်းပေါင်းများစွာအတွက် အယောင်ဆောင်ဘေးကင်းမှု ခံစားချက် အနည်းငယ်ကို ပေးစွမ်းလိုက်သည်။

သို့သော်လည်း ထိုအယောင်ဆောင် ဘေးကင်းမှုအောက်တွင်မူ...

မြေအောက် အဓိက ဓာတ်ခွဲခန်းအတွင်း၌။

ယန်ချင်းယွမ်သည် လူများစွာအတွက် မျှော်လင့်ချက်များ ပေးစွမ်းနေသည့် ခေါင်းပေါ်က အကာအကွယ်ကြီးအပေါ် မည်သည့်စိတ်ဝင်စားမှုမျှ မရှိပေ။

သူ၏ စိတ်တစ်ခုလုံးမှာ အလယ်ဗဟိုရှိ ကြီးမားလှသော ပွင့်လင်းမြင်သာသည့် အသက်ထောက်ပံ့မှု ကွန်တိန်နာကြီးအပေါ်၌သာ အာရုံစိုက်နေသည်။

ကွန်တိန်နာအတွင်းရှိ နောက်ကျိသော စွမ်းအင်အရည်များကြား၌ ဖရိုဖရဲဖြစ်ပြီး အားကောင်းလှသော စွမ်းအင်အတက်အကျများကို ထုတ်လွှတ်နေသည့် နတ်ဘုရားအောက်အဆင့်ဖန်တီးမှုရှိလေသည်။

ထိုနတ်ဘုရားအဆင့်ဖန်တီးမှုမှာ ပြင်ပပတ်ဝန်းကျင်၏ စွမ်းအင် ရုတ်တရက်တိုးပွားလာမှု (သားရဲအုပ်စုနှင့် စွမ်းအင် အကာအကွယ်) ကြောင့် ပြင်းထန်စွာ မငြိမ်မသက်ဖြစ်နေပြီး ပုံသဏ္ဌာန်ပျက်ပြားနေကာ အချိန်မ‌ရွေးပြိုလဲသွားတော့မည့်ဟန် ဖြစ်နေလေသည်။

သူ့ရှေ့ရှိ ဒုတိယမျက်နှာပြင်တွင် အမျိုးမျိုးသော ခိုလှုံရာနေရာများအတွင်း စုပြုံနေကြသည့် လူအုပ်ကြီးကို ပြသနေပြီး လက်ပတ်အချက်ပြမှုများနှင့်အတူ အားနည်းစွာ လင်းလက်နေကြသည့် သက်ရှိလက္ခဏာများကို ကိုယ်စားပြုသည့် အလင်းစက်ပေါင်း သောင်းချီရှိနေသည်။

“တည်ငြိမ်မှုက ဆက်ပြီး ကျဆင်းနေတုန်းပဲ... ထပ်တူကျမှုနှုန်း လှုပ်ခတ်မှုတွေက ပိုပြီး ပြင်းထန်လာတယ်... ‘သယ်ဆောင်သူ’ ရဲ့ ခံနိုင်ရည်က အကန့်အသတ်ကို ရောက်လုနီးပါး ဖြစ်နေပြီ...”

သူ တိုးတိုးလေး ရေရွတ်လိုက်မိရာ တင်းကျပ်စွာ ဆုပ်ကိုင်ထားမှုကြောင့် သူ၏ လက်ချောင်းများမှာ အနည်းငယ် ဖြူရော်သည်။

မျက်မှန်နောက်ကွယ်ရှိ အကြည့်များမှာ စွဲလမ်းမှုများနှင့် ရူးသွပ်မှုများဖြင့် လောင်ကျွမ်းနေသည်။

“ငါ လိုအပ်တယ်... ဆင့်ကဲပြောင်းလဲမှုကို လမ်းညွှန်ဖို့၊ မျှခြေဖြစ်စေဖို့၊ ပြီးပြည့်စုံစေဖို့အတွက် ပိုပြီး အားကောင်းပြီး အရည်အသွေးမြင့်မားတဲ့ ‘ပစ္စည်း’ တွေကို ငါ လိုအပ်တယ်...”

သူ၏ အကြည့်များသည် မျက်နှာပြင်ပေါ်ရှိ နတ်ဘုရားအောက်အဆင့်နှင့် ခိုလှုံရာနေရာ လူအုပ်ကြီး၏ အလင်းစက်လေးများကြားတွင် ရူးသွပ်စွာ ဖြတ်သန်းသွားသည်။

နောက်ဆုံးတွင် ၎င်းသည် ကျောက်ဆောင်အလွှာများနှင့် စွမ်းအင် အကာအကွယ်ကို ထိုးဖောက်သွားပြီး မြို့အပြင်ဘက်ရှိ အဆုံးစွန်သော မိစ္ဆာသားရဲအုပ်စုကြီးအပေါ်သို့ တင်းကြပ်စွာ “စိုက်ဝင်” သွားခဲ့ပြီဖြစ်သည်။

သူ၏ ခံစားသိမြင်မှုတွင် မြို့အပြင်ဘက်က မိစ္ဆာသားရဲများဖြစ်စေ၊ မြို့အတွင်းက ဤ “သာမန်” သက်ရှိများဖြစ်စေ အားလုံးမှာ နတ်ဘုရားနယ်ပယ်သို့ တက်လှမ်းမည့် ကြီးကျယ်ခမ်းနားသော လုပ်ငန်းစဉ်ကြီးရှေ့တွင် စတေးပစ်နိုင်သည့် “အရင်းအမြစ်များ” သက်သက်သာ ဖြစ်သည်။

၎င်းအတွက် “အရပ်သားများကို စွန့်လွှတ်ခြင်း” ဆိုသည်မှာ သူ့အတွက် သွေးအေးခြင်း မဟုတ်ဘဲ အစွန်းရောက်ပြီး ရူးသွပ်လှသော ဆင်ခြင်တုံတရားရှိသည့် ချိန်ဆမှုတစ်ခု သက်သက်သာ ဖြစ်သည်။

“နတ်ဘုရားဖန်တီးခြင်း” က လိုအပ်လာချိန်တွင် အရာအားလုံးကို စတေးပစ်နိုင်သည်။

ဤအခိုက်အတန့်တွင် ဝံပုလွေအသိုက်၌ ရှိနေဆဲဖြစ်ပြီး မိစ္ဆာသားရဲစခန်းဆီသို့ သွားရန် ပြင်ဆင်နေသည့် လင်းထျန်းလုံသည် သူ လှမ်းဝင်တော့မည့်အရာမှာ ရိုးရှင်းသော မြို့သိမ်းတိုက်ပွဲတစ်ခုထက် များစွာပိုမိုရှုပ်ထွေးနေကြောင်း မသိရှိသေးပေ။

နင်မြို့သည် စိတ်ပျက်အားငယ်မှုများ၊ တွက်ချက်မှုများနှင့် ရူးသွပ်သော လောဘတရားများ ပြည့်နှက်နေသည့် ဆူပွက်နေသော အိုးကြီးတစ်လုံးအဖြစ် ပြောင်းလဲသွားခဲ့ပြီဖြစ်သည်။

အတွင်း၌ ထိတ်လန့်နေကြသော လူထုနှင့် အိပ်မက်ချင်း မတူကြသော “ကာကွယ်သူများ” ရှိနေကြပြီး အပြင်၌ သွားများကို ကြိတ်ကာ သွေးစုပ်ရန် ပြင်နေကြသည့် မိစ္ဆာသားရဲ မဟာမိတ်တပ်ဖွဲ့ ရှိနေသည်။

ထနု့နောက် အမှောင်ထဲတွင် အရာအားလုံးကို အာဟာရအဖြစ် သတ်မှတ်ထားသည့် “နတ်ဘုရားဖန်တီးရေး” လောဘတရားများ ပုန်းကွယ်နေသည်။

မြောက်ဘက်က ဝံပုလွေဘုရင်ဖြစ်သော သူသည် ဤဖရိုဖရဲဖြစ်နေသည့် ဝဲကတော့ကြီးအတွင်း မိမိကိုယ်တိုင်နှင့် ဝံပုလွေအသိုက်အတွက် သွေးစွန်းနေသော အနာဂတ်လမ်းကြောင်းတစ်ခုကို မည်သို့ ဆုတ်ဖြဲပုံဖော်သွားမည်နည်း။