အခန်း ၉၇

အခန်း (၉၇) မဟာချင်အင်ပါယာအား ဖြုတ်ချရန် ရည်ရွယ်သူတိုင်း မျိုးနွယ်စုတစ်စုလုံး သတ်ဖြတ်ခံရပေမည်

လီယီနှင့် အခြားသူများအားလုံး တွေဝေသွားကြပေ၏။

ဤအခြေအနေက အတော်လေး ကြီးမားလှပေသည်။

ယခင်က နတ်ဆိုးနှိမ်နင်းရေးဌာန၏ အမှုတွင် ချင်လော့သည် နတ်ဆိုးနှိမ်နင်းရေးဌာနကို ကိုယ်စားပြုခဲ့သော်လည်း ယခုအခါတွင်မူ ချင်လော့သည် မဟာချင်အင်ပါယာကို ကိုယ်စားပြုနေခြင်း ဖြစ်ပေ၏။

သူ စုံစမ်းစစ်ဆေးလိုသည်မှာ နိုင်ငံတော်ပုန်ကန်မှုအမှုပင် ဖြစ်သည်။

"ဒီအမှုက အတော်လေး ကျယ်ပြန့်တယ်... မဟာချင်အင်ပါယာက လူတွေတောင် ပါဝင်နေတယ်... သာမန် ပုဂ္ဂိုလ်ရေးရန်ငြိုးတွေက ဒီလောက် ကြီးမားတဲ့ သက်ရောက်မှုမျိုး လုံးဝ မဖြစ်စေနိုင်ဘူး... ဒါကြောင့် ဝူယွမ်စစ်သူကြီး အမှုမှာ နိုင်ငံတော်ပုန်ကန်မှု ပါဝင်နေပြီး မဟာချင်အင်ပါယာက အရေးပါတဲ့သူတွေလည်း ပါဝင်ပတ်သက်နေတယ်..."

"ငါ့ရဲ့ ကောက်ချက်ချမှုကို နတ်ဆိုးနှိမ်နင်းရေးဌာနဆီ ပို့လိုက်ပါ... သူတို့က ဒီလောက်အထိ ကစားလာမှတော့ ဒီကိစ္စကို အလွယ်တကူ အဆုံးသတ်ပေးလိုက်လို့ မဖြစ်တော့ဘူး"

သတင်းသည် နတ်ဆိုးနှိမ်နင်းရေးဌာနသို့ ရောက်ရှိသွားချိန်၌ ဆူညံပွက်လောရိုက်သွားပေ၏။

အခြေအနေကို ကောင်းစွာ သဘောပေါက်သူတိုင်းက တစ်စုံတစ်ယောက်သည် ချင်လော့အား အပြစ်ပုံချရန် ကြိုးစားနေကြောင်း သိရှိကြသည်။

သို့သော် ချင်လော့က တစ်စုံတစ်ယောက်သည် မဟာချင်အင်ပါယာကို ဖြုတ်ချရန် ကြံစည်နေသည်ဟု တန်ပြန်စွပ်စွဲလိုက်ခြင်းကလည်း အတော်လေး အဓိပ္ပာယ်ရှိနေပေသည်။

"ဝူယွမ်စစ်သူကြီး သေးသေးလေးတစ်ယောက်က လူအများကြီးကို စိုးရိမ်ပူပန်အောင် လုပ်နိုင်စွမ်း မရှိဘူး"

"ချင်လော့က ဒီကိစ္စတွေကို သူ လုပ်ခဲ့တာလို့ သွယ်ဝိုက်သောနည်းနဲ့ ဝန်ခံလိုက်တာပဲ... ဂိုဏ်းအဖွဲ့အစည်း အတော်များများက ဒီကိစ္စမှာ ပါဝင်ပတ်သက်နေတယ်ဆိုတာက ဝူယွမ်စစ်သူကြီးဆီမှာ နောက်ထပ် လျှို့ဝှက်ချက်တစ်ခု ရှိနေသေးတယ်ဆိုတာကို သက်သေပြနေတာပဲ... သူက တကယ့် အရူးတစ်ယောက်ပဲ..."

နတ်ဆိုးနှိမ်နင်းရေးဌာန တပ်ဖွဲ့ ၁၀၏ တပ်မှူးချုပ်သည် ချင်လော့၏ အစီရင်ခံစာကို လက်ခံရရှိပြီးနောက် သူ၏ မျက်နှာသည် စက္ကူကဲ့သို့ ဖြူလျော့သွားပေ၏။

ကိစ္စရပ်များသည် လူတိုင်း၏ မျှော်လင့်ချက်ထက် ကျော်လွန်သွားမည်ဖြစ်ပြီး ကြီးမားသော ပြဿနာများ ပေါ်ပေါက်လာတော့မည်ဟု သူ ကြိုတင် ခံစားမိလိုက်သည်။

"ဘိုးဘေးတို့... မြန်မြန် လုပ်ကြပါ... လက်ထဲမှာ ရှိနေတဲ့ ကိစ္စတွေကို အမြန်ဆုံး ပြီးပြတ်အောင် ရှင်းလင်းပြီး တောင်တန်းတစ်သောင်းနယ်မြေကို သွားရမယ်"

"ယွင်ရှန်း ရှောင်မိသားစုနဲ့ ဓားတစ်သောင်းစံအိမ်တို့က မဟာချင်အင်ပါယာကို ဖြုတ်ချဖို့ ကြံစည်နေတဲ့ နောက်ကွယ်က လူမိုက်တွေပဲ... သူတို့ မျိုးနွယ်စုတစ်စုလုံးကို သတ်ပစ်ရမယ်"

ချင်လော့က တည်ကြည်လေးနက်သော အသံဖြင့် အမိန့်ပေးလိုက်သည်။

သူက ထိုက်ရွှီမြင့်မြတ်နယ်မြေ၏ အမည်ကို အသုံးပြုကာ တောင်တန်းတစ်သောင်းနယ်မြေကို ဆက်လက် သိမ်းပိုက်ရန် ရည်ရွယ်ထားခဲ့သော်လည်း တစ်ဖက်လူက ဤသို့ ကစားလာသဖြင့် သူလည်း ရပ်တန့်နေမည် မဟုတ်ချေ။

"သွားကြစို့... ဓားတစ်သောင်းစံအိမ်ကို အရင်သွားမယ်"

ဓားတစ်သောင်းစံအိမ်တွင် အကျော်ကြားဆုံးမှာ ဓားသင်္ချိုင်းပင် ဖြစ်သည်။

ထိုနေရာတွင် ကျော်ကြားသော ဓားပေါင်း သောင်းချီ မြှုပ်နှံထားကြောင်း ကောလာဟလများ ရှိပေ၏။

လွန်ခဲ့သော နှစ်ထောင်ပေါင်းများစွာက ဓားတစ်သောင်းစံအိမ်သည် အလွန် ကြီးကျယ်ခမ်းနားခဲ့ပြီး မဟာသူတော်စင်အဆင့် ကျင့်ကြံသူများပင် ရှိခဲ့ဖူးသည်။

သို့ရာတွင် ယခုအချိန်၌ ဓားတစ်သောင်းစံအိမ်သည် လုံးဝ ကျဆင်းသွားခဲ့ပြီ ဖြစ်သည်။

ထို့ပြင် ရဲ့ချန်ကြောင့် သူတို့သည် ကြေကွဲဖွယ်ရာ ကံကြမ္မာနှင့် ရင်ဆိုင်ရတော့မည် ဖြစ်ပေ၏။

ချင်လော့က ဓားတစ်သောင်းစံအိမ်သို့ မရောက်မီ ရန်သူများက ဓားတစ်သောင်းစံအိမ်ကို တိုက်ခိုက်နေကြပြီ ဖြစ်သည်။

သူတို့သည် ဓားတစ်သောင်းစံအိမ်၏ ဓားသင်္ချိုင်းအထိ ထိုးဖောက်ဝင်ရောက်လာခဲ့ရာ ဓားတစ်သောင်းစံအိမ်မှ တပည့်များက အစီအရင်များနှင့် မြေပြင်အနေအထားကို အသုံးပြုကာ ခုခံနေကြရသည်။

အကြီးအသေး ဂိုဏ်းအဖွဲ့အစည်း ဆယ်ခုကျော်မှ လူပေါင်း တစ်သောင်းကျော်သည် ဓားတစ်သောင်းစံအိမ်၏ ဓားသင်္ချိုင်းကို ဝန်းရံထားကြပေ၏။

ယခုအခါ ဓားတစ်သောင်းစံအိမ်သည် ငရဲကဲ့သို့ ဖြစ်နေပေပြီ။

ဓားတစ်သောင်းစံအိမ်မှ အမျိုးသမီးတပည့် အများအပြားသည် အနိုင်ရသူများ၏ ကစားစရာများ ဖြစ်လာခဲ့ပြီး အခြားတပည့်များမှာလည်း ထိုလူများ၏ လေ့ကျင့်ရေး ပစ်မှတ်များအဖြစ် ပြောင်းလဲသွားကာ နေ့စဉ်နှင့်အမျှ သေဆုံးမှုများ ရှိနေခဲ့သည်။

"အားလုံးပဲ... ဓားတစ်သောင်းစံအိမ်ရဲ့ ဓားသင်္ချိုင်းကို သိမ်းပိုက်ပြီးရင် ငါတို့ ရွှေဓားဂိုဏ်းက ဓားအလက် တစ်ထောင် ယူမယ်..."

"အဘိုးကြီး... ခင်ဗျားက ဓားမြှောင်တွေနဲ့ပဲ ကစားတာလေ... ဓားရှည်တွေကို ဘာလုပ်မလို့လဲ... အဲ့ဒီဓားတွေ အားလုံးကို ငါတို့ ကံကြမ္မာဓားကိုးလက်ဂိုဏ်းကို ပေးလိုက်တာ ပိုကောင်းမယ်... အဲ့ဒါဆိုရင် ကံကြမ္မာဓားကိုးလက်ဂိုဏ်းက ခင်ဗျားတို့ ရွှေဓားဂိုဏ်းရဲ့ ကျေးဇူးကို မှတ်ထားပေးမယ်”

"ရှေးခေတ်ကတည်းက ဓားနဲ့ ဓားမြှောင်ဆိုတာ ခွဲခြားလို့ မရဘူး... ငါတို့ ရွှေဓားဂိုဏ်းက ဘာလို့ ဓားရှည်တွေနဲ့ မကစားနိုင်ရမှာလဲ... ငါတို့ ရွှေဓားဂိုဏ်းကို ရွှေဓားရှည်ဂိုဏ်းလို့ နာမည်ပြောင်းလိုက်လို့ ရတယ်"

"ခင်ဗျားတို့ ဘာလိုချင်တယ်ဆိုတာ ငါ ဂရုမစိုက်ဘူး... ငါတို့ မာယာတစ်သောင်းဓားဂိုဏ်းက ဓားတစ်သောင်းစံအိမ်ကို လိုချင်တယ်"

ချောမောသော အမျိုးသားတစ်ဦး ထွက်ပေါ်လာပြီး အခြားသူများကို ကြည့်ကာ တည်ကြည်လေးနက်စွာ ပြောဆိုလိုက်သည်။

သူ၏ အသံတွင် ငြင်းဆန်၍ မရနိုင်သော လေသံ ပါဝင်နေပေ၏။

မာယာတစ်သောင်းဓားဂိုဏ်းသည် ဤတိုက်ခိုက်မှု၏ အဓိက အင်အားစု ဖြစ်သည်။

မာယာတစ်သောင်းဓားဂိုဏ်း၏ ဂိုဏ်းချုပ် လီမိုသည် မကြာသေးမီကမှ သူတော်စင်အဆင့်သို့ တက်လှမ်းထားသူ ဖြစ်ပြီး ဓားတစ်သောင်းစံအိမ်၏ အရှင်သခင်သည် သူ၏ ဂိုဏ်းတူညီငယ်ပင် ဖြစ်လေသည်။

သို့သော် ယခင်က သူ၏ ဂိုဏ်းတူညီအစ်ကိုများကို သတ်ဖြတ်ရာတွင် သူသည် လုံးဝ သက်ညှာခဲ့ခြင်း မရှိချေ။

ဓားတစ်သောင်းစံအိမ်မှ လူတစ်သောင်းကျော် သေဆုံးခဲ့ရာ အနည်းဆုံး ရှစ်ထောင်ခန့်မှာ မာယာတစ်သောင်းဓားဂိုဏ်း၏ လက်ချက်ပင် ဖြစ်သည်။

"ဂိုဏ်းချုပ်လီက လိုချင်တယ်ဆိုရင်တော့ ကျွန်တော်တို့က ဂိုဏ်းချုပ်လီနဲ့ အလုအယက် မလုပ်ပါဘူး... ဒါပေမဲ့ ဓားသင်္ချိုင်းထဲက ဓားတွေအကုန်လုံးကို ယူမှာလား"

ရွှေဓားဂိုဏ်း ဂိုဏ်းချုပ်က စမ်းသပ်မေးမြန်းလိုက်၏။

"ငါတို့ မာယာတစ်သောင်းဓားဂိုဏ်းက တစ်လက်မှ မယူဘူး"

ဤစကားကို ကြားချိန်၌ အခြားသူများ၏ မျက်လုံးများ တောက်ပသွားကြသည်။

လီမိုက အများဆုံး ယူမည်ဟု သူတို့ ထင်မှတ်ထားခဲ့သော်လည်း ယခု လီမိုက မယူဘူးဆိုလျှင် သူတို့အတွက် အခွင့်အရေးပင်။

"တိုက်ခိုက်ကြ... ဓားတစ်သောင်းစံအိမ်က လူတွေကို သတ်..."

လီမိုက ဓားတစ်လက်ကို ထုတ်ယူလိုက်ပြီး ခန္ဓာကိုယ်ထောင်ပေါင်းများစွာ အဖြစ် ခွဲထွက်ကာ ဓားသင်္ချိုင်း၏ အစီအရင်ကြီးကို ရူးသွပ်စွာ တိုက်ခိုက်လိုက်သည်။

‘ရွှစ်... ရွှစ်... ရွှစ်…’

ဓားချက်တိုင်း ကျရောက်သွားချိန်၌ လှိုင်းဂယက်များ ထွက်ပေါ်လာပေ၏။

မျက်တောင်တစ်ခတ်အတွင်း လီမိုက ဓားချက်ပေါင်း ထောင်ချီ ထုတ်လွှတ်လိုက်သည်။

ဓားသင်္ချိုင်း အစီအရင်အတွင်းမှ တပည့်များအားလုံးသည် အထက်မှ ကြောက်မက်ဖွယ်ကောင်းသော ဓားချီများကို မော့ကြည့်ရင်း မျက်နှာများ ဖြူလျော့သွားကြသည်။

အဘိုးအိုတစ်ဦးက သက်ပြင်းချလိုက်၏။

"ဒီနေ့တော့ ငါတို့ ဓားတစ်သောင်းစံအိမ် ပျက်စီးရတော့မယ် ထင်တယ်..."

"သေတဲ့အထိ တိုက်မယ်... သေတဲ့အထိ တိုက်မယ်..."

အခြားတပည့်များက ရန်သူကို မုန်းတီးစွာ ကြည့်ရင်း ဓားရှည်များကို ကိုင်ဆောင်ကာ မျက်လုံးများတွင် ခိုင်မာသော ဆုံးဖြတ်ချက်များ ပြည့်နှက်နေကြသည်။

တစ်ဖက်လူသည် အကျဉ်းသားများကို ချန်ထားမည် မဟုတ်သဖြင့် သူတို့ သေသည်အထိ တိုက်ခိုက်ရုံသာ ရှိပေသည်။

‘ဘုန်း ဘုန်း ဘုန်!’

အခြားသူများလည်း တိုက်ပွဲတွင် ပါဝင်လာကြပြီး ဓားတစ်သောင်းစံအိမ်၏ အစီအရင်ကြီးသည် ကျိုးပျက်လုနီးပါး ဖြစ်လာခဲ့သည်။

ဤအရေးကြီးသော အခိုက်အတန့်တွင် ဓားတစ်သောင်းစံအိမ်အတွင်း၌ ဩဇာအာဏာအပြည့်ရှိသော အသံတစ်သံ ထွက်ပေါ်လာခဲ့၏။

"ဓားတစ်သောင်းစံအိမ်က ဝူယွမ်စစ်သူကြီးစံအိမ် သတ်ဖြတ်ခံရတဲ့ အမှုမှာ ပါဝင်ပတ်သက်နေပြီး မဟာချင်အင်ပါယာကို ဖြုတ်ချဖို့ ကြံစည်နေတယ်"

"နတ်ဆိုးနှိမ်နင်းရေးဌာနက အမှုကို စစ်ဆေးနေတယ်... မသက်ဆိုင်တဲ့သူတွေ ထွက်သွားကြ... မဟုတ်ရင် အတူတူ အပြစ်ပေးခံရမယ်"

ဤစကားကို ကြားချိန်၌ အခြားသူများအားလုံး အံ့အားသင့်သွားကြသည်။

"ဘာ... ဓားတစ်သောင်းစံအိမ်က မဟာချင်အင်ပါယာကို ဖြုတ်ချဖို့ ကြံစည်နေတယ်"

"ဒီစွပ်စွဲချက်က အတော်လေး ကြီးမားလွန်းတယ်... ဓားတစ်သောင်းစံအိမ်မှာ ဘာစွမ်းရည်တွေ ရှိလို့လဲ"

"အဲ့ဒါ ချင်လော့ပဲ... သူ ထပ်ရောက်လာပြန်ပြီ... မြန်မြန် သွားကြစို့... ဒီနေရာက ကိစ္စတွေကို ဝင်မစွက်ဖက်တာ ပိုကောင်းမယ်"

ထက်မြက်သူများက ချင်လော့သည် သူတို့ကို ကြံရာပါများဟု စွပ်စွဲမည်ကို သိရှိထားကြပေသည်။

သို့သော် အချို့ကတော့ လက်မလျော့လိုကြချေ၊ အထူးသဖြင့် လီမိုပင်။

အနည်းငယ်လေး... အနည်းငယ်လေးသာ လိုတော့သည်။

သူသည် ဓားတစ်သောင်းစံအိမ်၏ အစီအရင်ကို ဖျက်ဆီးနိုင်လုနီးပါး ဖြစ်နေပြီး ဓားတစ်သောင်းစံအိမ်၏ အရေးကြီးသော အမွေအနှစ်ကို ရရှိရန် နီးကပ်နေပြီ ဖြစ်သည်။

သို့သော် ဤအရေးကြီးသော အချိန်တွင် ချင်လော့ ရောက်ရှိလာခဲ့သည်။

သူ ရက်အတော်ကြာ စောင့်ဆိုင်းခဲ့ပြီး ချင်လော့သည် ဓားတစ်သောင်းစံအိမ်ဆီကို လာမည် မဟုတ်ဟု အတည်ပြုခဲ့ပြီးမှ လာရောက်ခဲ့ခြင်း ဖြစ်သည်။

ချင်လော့သည် ပုံမှန်အတိုင်း လုပ်ဆောင်မည် မဟုတ်ကြောင်း သူ မသိခဲ့ချေ။

လီမိုက လေပြင်းပြင်းတစ်ချက် ရှူသွင်းလိုက်ပြီး လေထဲသို့ ခုန်တက်သွားသည်။

သူက တည်ကြည်လေးနက်သော အသံဖြင့် ပြောဆိုလိုက်၏။

"ကျွန်တော်တို့လည်း ဓားတစ်သောင်းစံအိမ်နဲ့ ရန်ငြိုးရှိပါတယ်... ဓားတစ်သောင်းစံအိမ်က တပည့်အများစုဟာ ကျွန်တော်တို့ လက်ချက်နဲ့ သေဆုံးခဲ့ရတာပါ... ဓားတစ်သောင်းစံအိမ်က ရရှိလာမယ့် အရင်းအမြစ်တွေ အားလုံးကို လက်နှစ်ဖက်နဲ့ ဆက်သပါ့မယ်”

"ကျွန်တော့်မှာ တောင်းဆိုချက် တစ်ခုတည်းပဲ ရှိပါတယ်... လက်စားချေခွင့်ပေးပြီး ဓားတစ်သောင်းစံအိမ်ကို ကိုယ်တိုင် ဖျက်ဆီးခွင့် ပြုပါ... မဟာချင် နဝမမင်းသားက ခွင့်ပြုမယ်ဆိုရင် မာယာတစ်သောင်းဓားဂိုဏ်းက သခင်လေးရဲ့ ကျေးဇူးကို တင်ရှိသွားမှာပါ... အနာဂတ်မှာ ဓားတောင်ကို တက်ရတက်ရ၊ မီးပင်လယ်ကို ဖြတ်ရဖြတ်ရ ကျွန်တော် လီမိုက ဒီကျေးဇူးကို သေချာပေါက် ဆပ်ပါ့မယ်"

ချင်လော့က ခြေလှမ်းတစ်လှမ်း တိုးလိုက်ပြီး လီမိုကို ကြည့်ကာ အေးစက်စွာ ပြောဆိုလိုက်သည်။

"စောစောက ပြောခဲ့တဲ့ စကားကို ဒုတိယအကြိမ် ပြန်မပြောဘူး"

"မင်းလို သေးနုပ်တဲ့ သူတော်စင်တစ်ယောက်ရဲ့ ကျေးဇူးတင်မှုက တန်ဖိုးရှိလို့လား"

"လျိုကျင်းကျင်း... နေရာကို ရှင်းလင်းဖို့ ပြင်ဆင်လိုက်... သုံးစက္ကန့်အတွင်း ဒီနေရာကနေ မထွက်သွားချင်တဲ့သူတိုင်းကို သတ်ပစ်လိုက်"

ချင်လော့သည် အလွန် ဒေါသထွက်နေပြီး အကျိုးဆက်များကလည်း ပြင်းထန်သည်။

သူ့ကို လာရောက် စည်းကမ်းသတ်မှတ်ရန် မည်သည့်အရည်အချင်းများ ရှိနေသနည်း။

ထိုအခိုက်အတန့်တွင် လီယီက လူတစ်ယောက်ကို မြင်လိုက်ရပြီး သူ၏ မျက်လုံးများ ချက်ချင်း နီရဲသွားကာ လက်သီးများကို ဆုပ်ထားပြီး သူ၏ အမူအရာမှာ ကြောက်မက်ဖွယ် ကောင်းလာခဲ့သည်။

"အရှင်မင်းသား"

လီယီက ချင်လော့ကို ကြည့်ကာ အော်ဟစ်လိုက်၏။

"ကျေးဇူးပြုပြီး ငယ်သားကို ကူညီပေးပါ... ကံကြမ္မာဓားကိုးလက်ဂိုဏ်း ဂိုဏ်းချုပ် ဟိုယန်ဖိန်ကို သတ်ချင်ပါတယ်"

လီယီ၏ အကြည့်အတိုင်း ချင်လော့က ဟိုယန်ဖိန်နှင့် သူ၏ လူစုကို မြင်တွေ့လိုက်ရပြီး အေးစက်စွာ ပြောဆိုလိုက်သည်။

"ကံကြမ္မာဓားကိုးလက်ဂိုဏ်းက လူတွေ ဒီနေ့ တစ်ယောက်မှ အရှင်မထွက်သွားစေနဲ့"

‘ဝုန်း’

မျက်တောင်တစ်ခတ်အတွင်း အောက်ဘက်ရှိ လူများက ကံကြမ္မာဓားကိုးလက်ဂိုဏ်းမှ လူများနှင့် ချက်ချင်း ခွဲထွက်သွားကြရာ သူတို့သာ ကျန်ရစ်စေခဲ့သည်။

ဟိုယန်ဖိန်၏ မျက်နှာသည် ချက်ချင်း ဖြူလျော့သွားပေ၏။

လီယီသည် ချင်လော့၏ လူဖြစ်နေမည်ဟု သူ မထင်မှတ်ထားခဲ့ချေ။ ဤသည်က တကယ့်ကို စိတ်ပျက်စရာပင်။

သူက ချက်ချင်း စကားပြောဆိုပြီး အသက်ရှင်ရန် အခွင့်အရေးကို ရှာဖွေခဲ့သည်။

"နဝမမင်းသား... လီယီက ကျွန်တော့်သားကို သတ်ခဲ့ပြီး ကံကြမ္မာဓားကိုးလက်ဂိုဏ်းကို သစ္စာဖောက်ခဲ့တာပါ... မင်းသားက တခြားသူတွေရဲ့ စရိုက်ကို သိပ်မသိလို့ပါ"

"ကျွန်တော်တို့ ကံကြမ္မာဓားကိုးလက်ဂိုဏ်းက မင်းသားကို သစ္စာခံဖို့ ဆန္ဒရှိပါတယ်... မင်းသားအတွက် ခွေးတစ်ကောင်၊ မြင်းတစ်ကောင်လို အလုပ်အကျွေးပြုပါ့မယ်"

သူက အကြီးမားဆုံး အခွင့်အရေးဟု ထင်မှတ်ရသော အရာကို ထုတ်ယူကာ ချင်လော့အား ဆွဲဆောင်ရန် ကြိုးစားခဲ့သည်။

မည်သို့ပင် ကြည့်ရှုစေကာမူ ကံကြမ္မာဓားကိုးလက်ဂိုဏ်း တစ်ခုလုံး၏ တန်ဖိုးက လီယီ တစ်ယောက်တည်းထက် များစွာ သာလွန်နေပေသည်။

လီယီသည်လည်း လက်သီးများကို တင်းကျပ်စွာ ဆုပ်ထားမိ၏။

ဟိုယန်ဖိန်သည် ဤမျှ ပြတ်သားလိမ့်မည်ဟု သူ မထင်ထားခဲ့သဖြင့် သူ၏ စိတ်ထဲတွင် စိုးရိမ်ပူပန်မှုများ ဖြစ်ပေါ်လာခဲ့သည်။

"သစ္စာခံမယ်" ချင်လော့က လှောင်ပြောင်လိုက်သည်။

"ဒီလိုကိစ္စမျိုးမှာ အရင်ရောက်သူက အရင်အခွင့်အရေး ရတာ မဟုတ်ဘူးလား..."

"ပြီးတော့ မင်းကရော ထိုက်တန်လို့လား..."

သူက ချက်ချင်းပင် စီရင်ချက်ချလိုက်၏။

"ကံကြမ္မာဓားကိုးလက်ဂိုဏ်းက ဓားတစ်သောင်းစံအိမ်နဲ့ ပူးပေါင်းပြီး မဟာချင်အင်ပါယာရဲ့ ဝူယွမ်စစ်သူကြီးစံအိမ် တစ်ခုလုံးကို သတ်ဖြတ်ခဲ့တယ်... သူတို့က မဟာချင်အင်ပါယာကို ဖြုတ်ချဖို့ ကြံစည်နေတယ်"

"ဂိုဏ်းတစ်ခုလုံးကို သတ်ပစ်လိုက်..."