အခန်း (၂၅၅-၂၅၆)

အခန်း ၂၅၅: ဖူယောင်ရဲ့ ဓား

ဤသို့ပြောပြီးနောက် ဧကရာဇ်က မြေပြင်ပေါ်တွင် နောက်တစ်ကြိမ် ဒူးထောက်ကာ ခါးသီးစွာ တောင်းပန်လိုက်သည်။

"အင်မော်တယ်သခင်... အင်မော်တယ်သခင်က ကရုဏာထားပြီး အဲ့ဒီအမျိုးသမီးအင်မော်တယ်သခင် ကို ကယ်တင်ဖို့...ပြီးတော့ ဒီရွှမ်ဟွမ်နယ်မြေထဲက သန်းထောင်နဲ့ချီတဲ့ သာမန် ပြည်သူတွေကို ကယ်တင်ဖို့ ကျွန်တော် တောင်းပန်ပါတယ်..."

စူးချန်ကဲက တိတ်ဆိတ်စွာ နားထောင်နေပြီး သူ၏ လက်ချောင်းထိပ်များက သူ၏လက်ဖက်ရည်ခွက်၏ အနားသတ်ကို ညင်သာစွာ ပွတ်သပ်နေကာ သူ၏ အကြည့်က နက်ရှိုင်းနေသည်။

ရွှမ်ဟွမ်နယ်မြေ၊ မိစ္ဆာနတ်ဆိုးချီ၊ ရှေးဟောင်းအင်မော်တယ် မိစ္ဆာမျိုးနွယ်စု၊ အင်မော်တယ်သင်္ချိုင်း ချိုင့်ဝှမ်း...

ထို့ပြင် နတ်ဘုရားအဆင့် ဓားစွမ်းရည်များကို ပိုင်ဆိုင်ထားပြီး ပြိုင်ဘက်ကင်းအလှတရားရှိသော အမျိုးသမီး အင်မော်တယ်သခင်...

"အဲ့ဒီ အမျိုးသမီး အင်မော်တယ်သခင်..."

စူးချန်ကဲက ဖြည်းညှင်းစွာ စကားပြောဆိုလိုက်ရာ သူ၏ အသံက တည်ငြိမ်နေသော်လည်း ဖုံးကွယ်၍မရသော စိုးရိမ်ပူပန်မှု အရိပ်အယောင်တစ်ခု ပါဝင်နေခဲ့လေသည်။

"သူရဲ့နာမည်က ဘယ်လိုခေါ်လဲ..."

ဧကရာဇ်က အလျင်စလို မော့ကြည့်လိုက်ပြီး သူ၏ မျက်ရည်များကို အင်္ကျီလက်ဖြင့်သုတ်ကာ ရိုသေစွာ ပြောလိုက်သည်။

"အင်မော်တယ်သခင်ကို ဖြေကြားရရင်... အမျိုးသမီး အင်မော်တယ်သခင်က သူ့ကိုယ်သူ... နင်ဖူယောင်လို့ ခေါ်ပါတယ်..."

ဤစကားများကို ကြားလိုက်သည်နှင့်တပြိုင်နက် စူးချန်ကဲ၏သူငယ်အိမ်များ အနည်းငယ် ကျုံ့သွားခဲ့သည်။

'အမ်...'

'ဖူယောင်လား...'

'သူလား...'

အချိန်တခဏအတွင်းမှာပင် နဂါးရထားလုံးအတွင်းရှိ လေထုသည် တခဏမျှ အေးခဲသွားပုံ ရလေ၏။

ဝမ်တန်နှင့် ကျန်းချီလီတို့ နှစ်ဦးလုံးက စူးချန်ကဲကို တပြိုင်နက်တည်း ကြည့်လိုက်ကြလေသည်။ ထိုနာမည်ကို သူ ကြားလိုက်ရသောအခါ သူ၏ အရှိန်အဝါတွင် မသိသာလုနီးပါး ဖြစ်သော်လည်း အမှန်တကယ် ဖြစ်ပေါ်သွားသော လှိုင်းဂယက်ကို သူတို့နှစ်ဦးလုံးက ဖမ်းဆုပ်မိခဲ့ကြသည်။

'အစ်ကိုစူးက... ဒီနင်ဖူယောင်ကို သိနေတာလား...'

'ပြီးတော့ သူတို့ရဲ့ ဆက်ဆံရေးက... ပုံမှန်မဟုတ်ဘူးလား...'

စူးချန်ကဲက သူ၏ မျက်ခွံများကို အောက်ချလိုက်ပြီး သူ၏မျက်လုံးများတွင် လင်းလက်သွားသော ရှုပ်ထွေးသည့် အလင်းရောင်ကို ဖုံးကွယ်လိုက်သည်။

'တကယ်ပဲ သူ ဖြစ်နေတာကိုး...'

စူးချန်ကဲက သူ၏လက်ဖက်ရည်ခွက်ကို ချလိုက်ပြီး ပြတင်းပေါက်မှ ဖြတ်ပြေးသွားသော ရှုခင်းများကို မော့ကြည့်လိုက်၏။ အဝေးမှ မြင့်မားသော တော်ဝင်မြို့တော်၏ပုံရိပ်ကို ရှင်းလင်းစွာ မြင်တွေ့နေရလေပြီ။

စူးချန်ကဲ၏အသံက သူ၏ပုံမှန်တည်ငြိမ်မှုသို့ ပြန်လည် ရောက်ရှိသွားပြီး သူက ပြောလိုက်သည်။

"သားရဲအသင်္ချေတောင်တန်းက အင်မော်တယ်သင်္ချိုင်းချိုင့်ဝှမ်းနဲ့ အဲ့ဒီ ရှေးဟောင်း အင်မော်တယ် မိစ္ဆာ မျိုးနွယ်စုတွေနဲ့ ပတ်သက်တဲ့ သတင်းအချက်အလက်တွေအားလုံးကိုယူခဲ့... ပြီးတော့ မြေပုံတွေလည်း ယူခဲ့စမ်း..."

"ဟုတ်ကဲ့... ဟုတ်ကဲ့..."

ဧကရာဇ်က အလျင်စလို တုံ့ပြန်လိုက်ကာ သူ၏ စိတ်နှလုံးသားအတွင်း၌ အနည်းငယ် စိတ်သက်သာရာ ရသွားခဲ့သည်။ အကယ်၍ အင်မော်တယ်သခင်က မငြင်းဆန်လျှင် ထိုကိစ္စအတွက် မျှော်လင့်ချက် ရှိနေနိုင်သည်။

သားရဲအသင်္ချေတောင်တန်းရှိ အင်မော်တယ်သင်္ချိုင်း ချိုင့်ဝှမ်း၌....

တစ်ချိန်တည်းမှာပင် သားရဲအသင်္ချေတောင်တန်း၏ အနက်ရှိုင်းဆုံးနေရာတွင်....

ဤနေရာတွင် တစ်နှစ်ပတ်လုံး ပြယ်လွင့်မသွားသော မီးခိုးရောင်ရင့်ရင့် မိစ္ဆာနတ်ဆိုးချီများဖြင့် ဖုံးလွှမ်းနေသည်။ နေနှင့်လတို့ပင် အလင်းရောင် မထောက်ပံ့နိုင်ဘဲ မည်းနက်သော လေများက တဝီဝီ တိုက်ခတ်နေပြီး ကြမ်းတမ်းသော ကျောက်ဆောင်များက ရုပ်ဆိုးသော သရဲတစ္ဆေများအလား မားမားမတ်မတ် တည်ရှိနေသည်။

တောင်တန်း၏အလယ်ဗဟိုတွင် မြေပြင်ပေါ်ရှိ အမာရွတ် တစ်ခုအလား ဖြစ်နေသော အောက်ခြေမရှိသည့် ဧရာမချောက်ကမ်းပါးကြီးတစ်ခု ရှိနေသည်။

ဤသည်မှာအင်မော်တယ်သင်္ချိုင်းချိုင့်ဝှမ်းပင်။

ချိုင့်ဝှမ်းအတွင်းတွင် မိစ္ဆာနတ်ဆိုးချီများက မင်ရည်အလား ထူထပ်သိပ်သည်းနေပြီး မရေမတွက်နိုင်သော ထူးဆန်းစွာ ပုံပျက်နေသည့် အပင်များ ပေါက်ရောက်နေကာ လေထဲတွင် ဆွေးမြေ့နေသောအနံ့နှင့် သွေးညှီနံ့များဖြင့် ပြည့်နှက်နေသည်။

ထို့ထက်ပို၍ ကြောက်မက်ဖွယ်ကောင်းသောအရာမှာ ချိုင့်ဝှမ်းသည် ထူးဆန်းသော ဟင်းလင်းပြင် ပုံပျက်မှု ခံစားချက်တစ်ခုဖြင့် ပြည့်နှက်နေခြင်းပင်။ ဤနေရာတွင် လူတစ်ယောက်၏ အရပ်မျက်နှာအာရုံခံနိုင်စွမ်း လုံးလုံးလျားလျား ပျက်စီးသွားလေ၏။ တစ်ခါတစ်ရံ ဆွဲငင်အားက ပြောင်းပြန်ဖြစ်သွားပြီး တစ်ခါတစ်ရံ ဟင်းလင်းပြင်က ခေါက်ချိုးဖြစ်သွားသည်။ အကယ်၍ သာမန်ကျင့်ကြံသူတစ်ဦးသာ ဤနေရာအတွင်းသို့ ခြေချမိပါက သူတို့သည် အချိန်အခိုက်အတန့်လေးအတွင်း၌ လမ်းပျောက်သွားပေမည်။ နောက်ဆုံးတွင် သူတို့သည် မိစ္ဆာနတ်ဆိုးချီ၏ တိုက်စားမှုကို ခံရကာ ချိုင့်ဝှမ်းအတွင်းရှိ ခြောက်သွေ့သော အရိုးများအဖြစ် ပြောင်းလဲသွားပေမည်။

ထို့ပြင် ဤအချိနိအခိုက်အတန့်တွင် အင်မော်တယ်သင်္ချိုင်းချိုင့်ဝှမ်း အတွင်းရှိ အတော်အသင့် ညီညာပြန့်ပြူးသော ကျောက်ဆောင်စင်မြင့်တစ်ခုပေါ်တွင်...

သွေးများ စွန်းထင်းနေသော အဖြူရောင်ဝတ်ရုံကို ဝတ်ဆင်ထားသည့် လှပသောပုံရိပ်တစ်ခုက ဓားတစ်လက်အလား ခါးမတ်၍ပလ္လင်ခွေထိုင်ကာ သူမ၏ ဒဏ်ရာများကို ကုသရန်အတွက် သူမ၏အသက်ရှူနှုန်းကို ထိန်းညှိနေသည်။

ထိုအမျိုးသမီးမှာ နင်ဖူယောင်ပင်။

သူမ၏မျက်နှာသည် ပြိုင်ဘက်ကင်းလောက်အောင် တင့်တယ်လှပသော်လည်း ဤအချိန်အခိုက်အတန့်တွင် စက္ကူတစ်ရွက်အလား ဖြူရော်နေသည်။ သူမ၏ နှုတ်ခမ်းထောင့်များတွင် မခြောက်သွေ့သေးသော သွေးစများ ကျန်ရှိနေပြီး သူမ၏ အဖြူရောင်ဝတ်စုတွင် တောက်ပသော သွေးကွက်အစွန်းအထင်းများဖြင့် ပြည့်နှက်နေပေ၏။ သူမ၏ဝတ်စုံသည် နေရာအနှံ့ စုတ်ပြဲနေသဖြင့် အောက်ရှိ အမာရွတ်များ ရှိနေသော ဖြူဝင်းသည့် အရေပြားကို မြင်နေရသည်။

သူမ၏အရှိန်အဝါသည် အနည်းငယ် ဖရိုဖရဲ ဖြစ်နေပြီး သူမ၏နံဘေးပတ်လည်ရှိ မူလက တောက်ပပြီး ထက်ရှသော ဓားစိတ်ဆန္ဒမှာ ယခုအချိန်၌ လေထဲတွင် မှိတ်တုတ်မှိတ်တုတ် ဖြစ်နေသော ဖယောင်းတိုင် တစ်တိုင်အလား အနည်းငယ် မှေးမှိန်နေပုံရသည်။

သို့သော် သူမ၏အကြည့်သည် မည်သို့မျှ အရည်မပျော်နိုင်သော ထာဝရရေခဲအလား အေးစက်ပြီး ခိုင်မာနေဆဲပင်။

သူမ၏ရှေ့တွင် ထိုးစိုက်ထားသည်မှာ ရှေးဟောင်းဓားတစ်လက်ပင်။

ထို့ပြင် သူမ၏နံဘေးပတ်လည်ရှိ ပေတစ်ရာ ကျယ်ဝန်းသော စင်မြင့်ပေါ်တွင် ပြင်းထန်သော တိုက်ပွဲတစ်ပွဲ၏ အငွေ့အသက်များ ရှိနေသည်။

ဓားရာများက ပေအတော်များများ နက်ရှိုင်းစွာ ယှက်နွယ်နေပြီး ကြွင်းကျန်နေသော ဓားစိတ်ဆန္ဒမှာ ထက်ရှကာ ကြီးကျယ်ခမ်းနားနေဆဲပင်။

အေးခဲပြီး တိုက်စားခံထားရသော အမှတ်အသား အများအပြား ရှိနေကာ အစွမ်းထက်သော မိစ္ဆာချီများကို ထုတ်လွှတ်နေသော်လည်း အသက်ကင်းမဲ့နေပြီ ဖြစ်သည့် ထူးဆန်းသော သားရဲအသေကောင် အများအပြားလည်း ရှိနေသည်။ ထိုအရာများမှာ သူမ သတ်ဖြတ်ခဲ့သော အစွမ်းထက်သည့် နတ်ဆိုးသားရဲများပင်။

သို့သော် ဤတိုက်ပွဲရလဒ်များက ဤနေရာတွင် ပိတ်မိနေသော သူမ၏ မျှော်လင့်ချက်မဲ့သော အခြေအနေကို မပြောင်းလဲနိုင်ခဲ့ချေ။

အဘယ်ကြောင့်ဆိုသော် စင်မြင့်၏အပြင်ဘက်ရှိ မင်ရည်အလား ထူထပ်သိပ်သည်းသော မိစ္ဆာနတ်ဆိုးချီ မြူခိုးများအတွင်းတွင် လောဘများ ပြည့်နှက်နေသည့် ကြောက်မက်ဖွယ်ကောင်းပြီး မကောင်းဆိုးဝါးဆန်သော အကြည့်များက ညအချိန်ရှိ မီးရှူးတိုင်များအလား သူမကို တင်းကြပ်စွာ ချိတ်ပိတ်ထားသည်ကို ဝေဝါးစွာ မြင်တွေ့နိုင်သောကြောင့်ပင်။

ထိုအရာများမှာ သူမကို ဝန်းရံထားသော ရှေးဟောင်း အင်မော်တယ် မိစ္ဆာမျိုးနွယ်စုဝင်များပင်။

"ကျွတ် ကျွတ်... ဒီလိုနေရာမျိုးမှာ မပျက်စီးနိုင်တဲ့ ဓားခန္ဓာကိုယ် ပေါ်လာတာက တကယ်ကို ရှားပါးတာပဲ... မင်းက အခုချိန်ထိ တောင့်ခံနိုင်ပြီး ငါ့ရဲ့လက်အောက်က နတ်ဆိုးသားရဲ စစ်သူကြီး ဆယ့်သုံးကောင်ကို သတ်နိုင်တာ အံ့အားသင့်စရာ မရှိတော့ဘူး..."

သံနှင့်ကျောက်တုံး ပွတ်တိုက်သည့်အလား ခြောက်ကပ်ပြီး စူးရှသော အသံတစ်သံက လှောင်ပြောင်မှုနှင့် ရက်စက်မှုတို့ကို သယ်ဆောင်ကာ ထူထပ်သော မြူခိုးများ အတွင်းမှ ထွက်ပေါ်လာသည်။

"နှမြောစရာပဲ.....မင်းရဲ့ မပျက်စီးနိုင်တဲ့ ဓားခန္ဓာကိုယ် က အကြီးစား အောင်မြင်မှုအဆင့်ကို မရောက်သေးပုံရတယ်....မင်းရဲ့ ဓားစိတ်ဆန္ဒက သန့်စင်ပေမဲ့ မင်းရဲ့ ကျင့်ကြံခြင်းက လိုအပ်နေသေးတယ်... တကယ်လို့ မင်းကိုသာ သူတော်စင်နယ်ပယ်ကို အဆင့်တက်ခွင့် ပေးလိုက်မယ်ဆိုရင်တော့ ငါ့ကို တကယ်ပဲ နည်းနည်းတော့ ဒုက္ခပေးနိုင်လောက်တယ်..."

နောက်ထပ် အမျိုးသမီးဆန်ပြီး မြန်ဆန်သော အသံတစ်သံက အဆိပ်ပြင်းသော မြွေတစ်ကောင် လျှာထုတ်လိုက်သည့်အလား စကားဆက်ပြောလိုက်ရာ ထိုလေသံတွင် လောဘများဖြင့် ပြည့်နှက်နေသည်။

"မပျက်စီးနိုင်တဲ့ ဓားခန္ဓာကိုယ်က ရှားပါးတဲ့ ထိပ်တန်းအဆင့် ဓားခန္ဓာကိုယ်ပဲ...မင်းရဲ့ ဓားအရိုးတွေ ဓားသွေးတွေနဲ့ ဓားဝိညာဉ်တွေအားလုံးက ကြီးမားတဲ့ အားဖြည့်ဆေးတွေပဲ..တကယ်လို့ ငါတို့သာ ဒါတွေကို ဝါးမျိုပြီး သန့်စင်နိုင်မယ်ဆိုရင် ငါတို့ရဲ့ သွေးမျိုးဆက်တွေက သေချာပေါက် ပိုပြီးတိုးတက်လာလိမ့်မယ်....ပြီးတော့ ငါတို့က အင်မော်တယ် မဟာတာအို ရဲ့ အရိပ်အယောင်လေး တစ်ခုကိုတောင် မြင်တွေ့နိုင်လောက်တယ် "

"အစ်ကိုကြီး အစ်ကိုလတ် သူနဲ့ စကားပြောပြီး အချိန်ဖြုန်းနေစရာ ဘာအကြောင်း ရှိလို့လဲ... အင်မော်တယ်သင်္ချိုင်းချိုင့်ဝှမ်းရဲ့ ဒီသားရဲအသင်္ချေ ဝိညာဉ်တိုက်စားခြင်း မဟာဝင်္ကပါက အသက်ဝင်နေတာ ခုနစ်ရက်ရှိပြီ....သူက အားကုန်လုနီးပါး ဖြစ်နေပြီ.... သူ အားနည်းနေတုန်း သူ့ကို တစ်ချက်တည်းနဲ့ သတ်ဖြတ်ပြီးတော့ သူ့ရဲ့ ဓားခန္ဓာကိုယ် မူလအစကို ခွဲဝေယူကြစို့..."

တတိယအသံက မိုးကြိုးအလား လျှင်မြန်ပြင်းထန်ပြီး ရက်စက်ကြမ်းကြုတ်သည်။

ထူထပ်သိပ်သည်းသော မြူခိုးများ လှိုင်းထသွားပြီး ဧရာမပုံရိပ်ကြီးသုံးခုက ဖြည်းညှင်းစွာ ချဉ်းကပ်လာခဲ့သည်။

သူတို့သည် ပုံစံ အမျိုးမျိုး ရှိသော်လည်း သူတို့အားလုံးက ရှေးဟောင်းဆန်ကာ ကြောက်မက်ဖွယ်ကောင်းလောက်အောင် ရက်စက်ကြမ်းကြုတ်သည့် အရှိန်အဝါတစ်ခုကို ထုတ်လွှတ်ထားသည်။ သူတို့သည် ရှေးဟောင်းအင်မော်တယ် မိစ္ဆာမျိုးနွယ်စုမှ အလွန် ရှေးကျသော သွေးမျိုးဆက်များရှိသည့် သူတော်စင်နယ်ပယ် အစွမ်းထက်သူသုံးဦးပင်။

ခေါင်းဆောင်သည် ကျားတစ်ကောင်အလား ခန္ဓာကိုယ်ရှိသော်လည်း နဂါးချိုများနှင့် ကျောပေါ်တွင် အတောင်ပံများရှိပြီး ရွှေရောင်ရင့်ရင့်အကြေးခွံများ ဖုံးလွှမ်းနေသည်။ သူ၏မိစ္ဆာမျက်လုံးများမှာ သွေးလွှမ်းနေသော ဝဲဂယက်နှစ်ခုအလားပင်။ သူသည် အစစ်အမှန်နဂါးနှင့် ကျားဖြူသွေးမျိုးဆက်၏ ပါးလွှာသော အရိပ်အယောင်တစ်ခုကို ပိုင်ဆိုင်ထားသည့် ရွှေတောင်ပံ နဂါးကျားသားရဲပင်။

ဒုတိယတစ်ကောင်မှာ ဧရာမ စပါးကြီးမြွေ တစ်ကောင်၏ ပုံစံရှိသော်လည်း ရုပ်ဆိုးသော ခေါင်းကိုးလုံးရှိပြီး ခေါင်းတစ်လုံးစီက မတူညီသော အဆိပ်ပြင်းမြူများနှင့် မိစ္ဆာမီးတောက်များကို ထုတ်လွှတ်ထားသည်။ ဤသည်မှာ ရှေးဟောင်းရက်စက်ကြမ်းကြုတ် သားရဲတစ်ကောင်၏ မျိုးဆက်ဖြစ်သော ခေါင်းကိုးလုံးရှန်လျိုပင်။

တတိယတစ်ကောင်မှာ တိကျသော ပုံသဏ္ဍာန် မရှိဘဲ အဆက်မပြတ် ပြောင်းလဲနေသော အရိပ်အစုအဝေး တစ်ခု ဖြစ်သော်လည်း သူ့ထံမှ မကောင်းမှုနှင့် တိုက်စားခြင်း၏ အသန့်စင်ဆုံး အရှိန်အဝါကို ထုတ်လွှတ်ထားသည်။ သူသည် မွေးရာပါ မိစ္ဆာနတ်ဆိုးချီမှ စုစည်းလာသော ထူးဆန်းသည့် သက်ရှိတစ်ကောင်ဖြစ်သည့် ဟင်းလင်းပြင်အရိပ်မိစ္ဆာပင်။

သူတို့က ဤကမ္ဘာမှ မူလနတ်ဆိုးများ မဟုတ်ဘဲ ရွှမ်ဟွမ်နယ်မြေ၏အပိုင်းအစကို တစ်စုံတစ်ခုမှ ကြားဖြတ် ယူဆောင်လိုက်စဉ်က ဤနေရာတွင် အတူတကွ ချိတ်ပိတ်ခံခဲ့ရသော ရှေးဟောင်းအကြွင်းအကျန်များဖြစ်သည်။

နင်ဖူယောင်က သူမ၏မျက်လုံးများကို ဖြည်းညှင်းစွာ ဖွင့်လိုက်သည်။

အေးစက်သော ရေကန်တစ်ခုအလား ကြည်လင်နေသော သူမ၏မျက်လုံးများတွင် ရှေ့သို့ချဉ်းကပ်လာသော ကြောက်မက်ဖွယ်ကောင်းသည့် မိစ္ဆာပုံရိပ်သုံးခု ထင်ဟပ်နေသည်။ သူမထံတွင် အကြောက်တရား မရှိဘဲ ချမ်းစိမ့်သော သတ်ဖြတ်လိုခြင်း စိတ်ဆန္ဒနှင့် ဆုံးဖြတ်ချက် အရိပ်အယောင်တစ်ခုသာ ရှိနေသည်။

ခါးသီးသော တိုက်ပွဲဆယ်ရက်...ချောင်ပိတ်မိနေခြင်း ခုနစ်ရက်...

သူမသည် ကောင်းကင်တက်လှမ်းခြင်း လှေကားတွင် သူမ ရရှိခဲ့သော ကောင်းကင်ကို ဆန့်ကျင်သည့် ဓား တာအိုအခွင့်အရေးနှင့် ရှေးဟောင်းဓားအင်မော်တယ် တစ်ပါး၏ ဓားတာအို မူလအစအမွေအနှစ်ကို အားကိုးခဲ့ပြီး ထိုအရာက သူမ၏ မပျက်စီးနိုင်သော ဓားခန္ဓာကိုယ်ကို ကဏဦးနိုးထမှုတစ်ခု ဖြတ်သန်းခွင့် ပေးခဲ့သည်။ သူမ၏ ဓားတာအိုကျင့်ကြံခြင်းက မြင့်တက်သွားပြီး နတ်ဘုရားမီးတောက်နယ်ပယ် အထွတ်အထိပ်နယ်ပယ်သို့ ရောက်ရှိရန် နတ်ဘုရား မီးတောက်နယ်ပယ် အတားအဆီးကို တစ်ချက်တည်းဖြင့် ဖြတ်ကျော်သွားကာ သူတော်စင်နယ်ပယ်နှင့် နီးစပ်သော တိုက်ပွဲဝင်စွမ်းအား ရှိလာသည်။

သူမ၏ အဆင့်တက်ခြင်းမှ ကောင်းကင်နှင့်မြေကြီးချီ ကို အသုံးပြု၍ သူမက ကောင်းကင်တက်လှမ်းခြင်း လှေကား၏ နှစ်ဆယ့်တစ်ဆင့်မြောက်အထပ်သို့ တစ်ဟုန်ထိုးမြင့်တက်သွားပြီး ဤရွှမ်ဟွမ်နယ်မြေထဲသို့ ခြေချခဲ့သည်။

သူမသည် မူလက နတ်ဆိုးများကိုသတ်ရန်၊ သူမ၏ ဓား နှလုံးသားကို သန့်စင်ရန်နှင့် ဤကမ္ဘာမှ ထွက်ခွာပြီး သူမ၏ တက်လှမ်းမှုကို ဆက်လက်လုပ်ဆောင်ရန်တို့အတွက် နည်းလမ်းတစ်ခုရှာဖွေရန် ရည်ရွယ်ခဲ့လေ၏။

သို့သော် ဤရွှမ်ဟွမ်နယ်မြေ၏အခြေအနေများက ဤမျှထိ နက်ရှိုင်းလိမ့်မည်ဟု သူမ မျှော်လင့်မထားခဲ့ပေ။

ထိုအရာက ရှေးဟောင်းအင်မော်တယ် မိစ္ဆာမျိုးနွယ်စုကဲ့သို့ ကြောက်မက်ဖွယ်ကောင်းသည့် တည်ရှိမှုများကို အမှန်တကယ် ဖုံးကွယ်ထားခဲ့သည်။

သူမက ဤပြန်လမ်းမဲ့နယ်မြေထဲသို့ မတော်တဆ ခြေချမိသွားပြီး ဤမိစ္ဆာသုံးကောင်မှ မြေပြင် အနေအထားနှင့် ထူးဆန်းသော မဟာဝင်္ကပါကို အသုံးပြုကာ ဝန်းရံခြင်းကို ခံခဲ့ရသည်။

ယခုအချိန်အထိ ပြင်းထန်စွာ တိုက်ခိုက်ခဲ့ပြီးနောက် သူမ၏စွမ်းအားများအားလုံး ကုန်ခမ်းသွားခဲ့လေပြီ။ သူမသည် သူမ၏ မပျက်စီးနိုင်သော ဓားခန္ဓာကိုယ် မူလအစ တစ်စိတ်တစ်ပိုင်းကို လောင်ကျွမ်းစေသည့် အထိပင် ပြုလုပ်ခဲ့သည်။ သူမက နတ်ဆိုးအများအပြားကို သတ်ဖြတ်ခဲ့ပြီး ခေါင်းကိုးလုံးရှန်လျို၏ ပင်မခေါင်းများအနက်မှ တစ်ခုကို ပြင်းထန်စွာ ဒဏ်ရာရစေခဲ့သော်လည်း သူမသည်လည်း အားအင်ကုန်ခမ်းသွားသည့် အခြေအနေသို့ ရောက်ရှိနေလေပြီ။

အားချီသည်လည်း ဒဏ်ရာရသွားပြီး အိပ်မောကျသွားခဲ့လေ၏။ သူမကိုယ်တိုင်လည်း ဒဏ်ရာအပြင်းအထန်ရနေပြီး သူမ၏စိတ်ဝိညာဉ်စွမ်းအားမှာ ခမ်းခြောက်လုနီးပါး ဖြစ်နေသည်။

တစ်ချိန်တည်းမှာပင် ပြိုင်ဘက်များသည် ထိခိုက်ပျက်စီးမှုများ ခံစားခဲ့ရသော်လည်း သူတို့ဘက်တွင် လုံလောက်သော စွမ်းအားများ ကျန်ရှိနေသေးကြောင်း သိသာရှင်းလင်းသည်။

မျှော်လင့်ချက်မဲ့ အခြေအနေ...

ဤသည်မှာ အမှန်တကယ်ကို မျှော်လင့်ချက်မဲ့သော အခြေအနေတစ်ခုပင်။

နင်ဖူယောင်က သူမ၏ရှေ့တွင် စိုက်ထားသော ယောင်ကွမ်းဓား၏လက်ကိုင်ကို ဆုပ်ကိုင်ပြီး ဖြည်းညှင်းစွာ မတ်တတ်ထရပ်လိုက်သည်။

သူမ၏အဖြူရောင်ဝတ်ရုံများက လူးလွန့်နေကာ သူမထံ၌ သွေးများစွန်းထင်းနေသော်လည်း သူမသည် မောက်မာထောင်လွှားနေဆဲပင်။

အခန်း ၂၅၆: စီနီယာ အစ်ကိုကို စိတ်ပျက်အောင် လုပ်မှာ မဟုတ်ဘူး

နင်ဖူယောင်က သူမ၏ ဓားလက်ကိုင်ကို ဆုပ်ကိုင်လိုက်သည်။ အေးစက်သော သတ္တုအထိအတွေ့က သူမ၏ အနည်းငယ် မိန်းမောနေသောစိတ်ကို အာရုံစိုက်မှု သို့ ပြန်လည် ရောက်ရှိစေခဲ့ပြီး သူမ၏ မျက်လုံးများတွင် အတိတ်ကို လွမ်းဆွတ်မှု အရိပ်အယောင်တစ်ခု ထွက်ပေါ်လာသည်။

နဝမတောင်ထိပ်ရှိ ဝူယာခြံဝန်းမှ နေ့ရက်များကို သူမ ပြန်လည်၍ တွေးတောမိသွားသည်။

ထိုအချိန်က သူမသည် ကြောက်တတ်သော ဂျူနီယာ ညီမလေးတစ်ယောက်သာ ဖြစ်ပြီး သူမ၏ စီနီယာ အစ်ကို စူးချန်ကဲက အစိမ်းရောင်ဝတ်ရုံကို ဝတ်ဆင်ကာ ခြံဝင်းအတွင်း၌ အမြဲတစေ ထိုင်နေလေ့ရှိသည်။

စီနီယာအစ်ကိုသည် အမြဲတစေ တည်ငြိမ်နေပြီး လောကကြီးပေါ်ရှိ မည်သည့်အရာကမျှ သူ့ကို လှုပ်ရှားရန် မလုံလောက်သည့်အလားပင်။ သို့သော် သူမ ဓားရေးလေ့ကျင့်ချိန်၌ သူက အချိန်ကိုက် ညွှန်ပြမှု တစ်ခုကို ပေးလေ့ရှိပြီး ထိုအရာက သူမကို ရုတ်တရက် ဉာဏ်အလင်းပွင့်သွားစေခဲ့သည်။

ထိုစကားလုံးများက သူမ၏နားထဲတွင် ပဲ့တင်ထပ်နေဆဲပင်။

"စီ... စီနီယာအစ်ကို..."

ဤအရာကို တွေးမိသောအခါ နင်ဖူယောင်က ခပ်ဖျော့ဖျော့ပြုံးပြီး တီးတိုးရေရွတ်လိုက်သည်။

"စီနီယာအစ်ကိုကို နောက်တစ်ကြိမ် ပြန်တွေ့ခွင့် ရပါ့မလား မသိဘူး... အခုတော့ စီနီယာအစ်ကိုရဲ့ ဘေးမှာ ရပ်ဖို့ ငါက အရည်အချင်း ပြည့်မီနေလောက်ပြီ မဟုတ်လား"

နောက်တစ်စက္ကန့်တွင်...

ဘုန်း....

ကောင်းကင်နှင့်မြေကြီး တုန်ခါသွားကာ မိစ္ဆာချီများ ပြင်းထန်စွာ တဝုန်းဝုန်းထလာသည်။

"သူတို့ လာနေပြီ..."

နင်ဖူယောင်၏အမူအရာက အေးစက်တင်းမာသွားပေ၏။

"စီနီယာအစ်ကိုကို ငါက စိတ်ပျက်အောင်လုပ်မှာ မဟုတ်ဘူး"

"တကယ်လို့ ဒီနေ့ ငါ သေသွားပြီးတော့ ငါ့ရဲ့ တာအို ပျောက်ကွယ်သွားရင်တောင် စီနီယာအစ်ကိုရဲ့ အကဲခတ်မှုက ဘယ်တော့မှ မမှားဘူး ဆိုတာကို သက်သေပြဖို့ ဒီတိရစ္ဆာန်သုံးကောင်ကို ငါ သတ်မယ်..."

သူမက အသက်ပြင်းပြင်းရှူလိုက်ပြီး သူမ၏ခန္ဓာကိုယ်ထဲတွင် ကျန်ရှိနေသော စိတ်ဝိညာဉ်စွမ်းအင်များက ရူးသွပ်စွာ လည်ပတ်လာခဲ့သည်။ သူမ၏ မပျက်စီးနိုင်သော ဓားခန္ဓာကိုယ် မူလအစက နောက်တစ်ကြိမ် လောင်ကျွမ်းလာပြီး ယခင်ကထက် ပို၍ပင် ပြတ်သားလာခဲ့သည်။

"ဝီ..."

မြေကြီးထဲ စိုက်ထားသော ရှေးဟောင်းဓားက ရုတ်တရက် ကြည်လင်သော ဓားတုန်ခါသံတစ်သံကို ထုတ်လွှတ်လိုက်၏။ ဓားသွားသည် မှေးမှိန်နေသော်လည်း ဤအချိန်အခိုက်အတန့်တွင် ထိုအရာက အံ့အားသင့်ဖွယ်ကောင်းလောက်အောင် ထက်ရှသော ဓားစိတ်ဆန္ဒတစ်ခုဖြင့် ပေါက်ကွဲထွက်လာသည်။ ဓားသွားပေါ်ရှိ သေးငယ်သော အက်ကွဲကြောင်းများမှ သန့်စင်သော ဓားဆန္ဒ ကြိုးမျှင်များ အမှန်တကယ်ကို စတင်၍ စီးဆင်းလာတော့သည်။

နင်ဖူယောင်က ဓားကိုဆွဲထုတ်ပြီး မတ်တတ်ထရပ်လိုက်သည်။

သူမ၏အဖြူရောင်ဝတ်စုံတွင် သွေးများစွန်းထင်းနေပြီး သူမ၏အနက်ရောင်ဆံပင်များက ရူးသွပ်စွာ လူးလွန့်နေကာ သူမ၏အကြည့်သည် လျှပ်စီးအလားပင်။

"ယုတ်ညံ့တဲ့ တိရစ္ဆာန်တွေ....သေစမ်း "

သူမ၏ရှင်းလင်းသော အော်ဟစ်သံကြားတွင် သူမက လူနှင့်ဓား ပေါင်းစပ်ခြင်းကို ရရှိသွားပြီး ချဉ်းကပ်လာသော ရှေးဟောင်းအင်မော်တယ် မိစ္ဆာသုံးဦးကိုတိုက်ခိုက်လိုက်သည်။ သူမ၏ဓားချက်သည် အလွန်အမင်း တောက်ပသော်လည်း အလွန်အမင်း ကြေကွဲဖွယ်ကောင်းသော ဓားချီအလင်းတန်းတစ်ခုအဖြစ်သို့ ပြောင်းလဲသွားပေ၏။

ဤဓားတိုက်ခိုက်မှုကို "သေမျိုးလောကကို ဖြတ်တောက်ခြင်း" ဟု အမည်ပေးထားသည်။

ဤသည်မှာ ကောင်းကင်တက်လှမ်းခြင်းလှေကား တွင် ရှေးဟောင်းဓားအင်မော်တယ်များ၏ ကျန်ရစ်နေသော အတွေးများကို လေ့လာစောင့်ကြည့်ပြီး ထိုအရာများကို သူမ၏ကိုယ်ပိုင် မပျက်စီးနိုင်သော ဓားခန္ဓာကိုယ်နှင့် ပေါင်းစပ်ကာ သူမ နားလည်သဘောပေါက်ထားသော သတ်ဖြတ်ခြင်းဓားနည်းစနစ်တစ်ခုပင်။

ထိုဓားကို ခုတ်ပိုင်းလိုက်ချိန်၌ ဤသည်က သေမျိုးလောကနှင့် ပတ်သက်မှုအားလုံးကို ဖြတ်တောက်လိုက်ပြီး ရန်သူကိုသတ်ရန် အတွေးတစ်ခုတည်းကိုသာ ချန်ထားခဲ့သည်။

"မင်းက သေချင်နေတာပဲ "

ရွှေတောင်ပံ နဂါကျားသားရဲက ဟိန်းဟောက်လိုက်သည်။ သူ၏ ရွှေရောင်ရင့်ရင့်အတောင်ပံများက ရုတ်တရက် ဖြန့်ကျက်သွားပြီး ကောင်းကင်ကို ဖုံးလွှမ်းသွားသော မိစ္ဆာလေပြင်းတစ်ခုကို ဖြစ်ပေါ်စေခဲ့သည်။ သူ၏ ထက်ရှသော လက်သည်းများကို ဝှေ့ယမ်း၍ ထိုဓားချီအလင်းရောင်ဆီသို့ ပြင်းထန်စွာ ခုန်အုပ်လိုက်စဉ် နဂါးနှင့်ကျားတစ်ကောင်၏ ပုံရိပ်ယောင်များကို သယ်ဆောင်လာကာ ဟင်းလင်းပြင်ကို ဆုတ်ဖြဲသွားသည်။

ခေါင်းကိုးလုံးရှန်လျို၏ ခေါင်းရှစ်လုံးက တပြိုင်နက်တည်း အသံပြုလိုက်ပြီး မတူညီသော ဂုဏ်သတ္တိ ရှစ်မျိုးဖြစ်သည့် အဆိပ်ပြင်းသော မီး၊ ရေခဲ၊ မိုးကြိုးနှင့် တိုက်စားနိုင်သော ရေမည်းအစရှိသည့် ကြောက်မက်ဖွယ်ကောင်းသော တိုက်ခိုက်မှုများကို ထုတ်လွှတ်ကာ ထိုအရာများကို ဖျက်ဆီးခြင်းပိုက်ကွန်တစ်ခုအဖြစ် ယက်လုပ်လိုက်သည်။

ဟင်းလင်းပြင် အရိပ်မိစ္ဆာက ပတ်ဝန်းကျင်ရှိ ထူထပ်သော မိစ္ဆာနတ်ဆိုးချီထဲသို့ တိတ်ဆိတ်စွာ ပေါင်းစပ်သွားပြီး နင်ဖူယောင်၏ နတ်ဘုရားစိတ်ဝိညာဉ်နှင့် ဓားစိတ်ဆန္ဒကို တိုက်စားရန် ရည်ရွယ်ထားသည်။ မိစ္ဆာနတ်ဆိုးချီများသည် အရပ်မျက်နှာအဘက်ဘက်မှနေ၍ သူမဆီသို့ ရစ်ပတ်လာသော မရေမတွက်နိုင်သည့် ရေဘဝဲလက်တံပုံရိပ်ယောင်များ အဖြစ်သို့ ပြောင်းလဲသွားတော့သည်။

"ဘုန်း... "

ဓားချီအလင်းတန်းက မိစ္ဆာနည်းစနစ်များနှင့် တိုက်ခတ်မိသွားပြီး လောကကြီးကို တုန်ခါစေမည့် ဟိန်းဟောက်သံတစ်သံ ပေါက်ကွဲထွက်လာသည်။

အင်မော်တယ်သင်္ချိုင်း ချိုင့်ဝှမ်းတစ်ခုလုံး တုန်ခါသွားပေ၏။ ကျောက်ဆောင်စင်မြင့်မှ ကျောက်ခဲများ လွင့်စင်သွားပြီး လေထဲတွင် ဖုန်မှုန့်များဖြင့် ပြည့်နှက်သွားသည်။

နင်ဖူယောင်က တိုးညင်းစွာ ညည်းတွားလိုက်ပြီး သူမ၏နှုတ်ခမ်းထောင့်မှ သွေးများ နောက်တစ်ကြိမ် လျှံကျလာကာ သူမ၏ပုံရိပ်က ခြေလှမ်းတော်တော်များများ နောက်သို့ယိမ်းယိုင်သွားသည်။

သို့သော် ထူးဆန်းသော အလင်းရောင်တစ်ခုက သူမ၏မျက်လုံးများတွင် လင်းလက်သွားပေ၏။

အစောပိုင်းက သေရေးရှင်ရေး ထိပ်တိုက်တွေ့ဆုံမှုတွင် သူမ၏ခန္ဓာကိုယ်အတွင်းရှိ အချုပ်အနှောင်တစ်ခု လျော့ရဲသွားပုံရသည်။

သူမသည် နတ်ဘုရား မီးတောက်နယ်ပယ် အထွတ်အထိပ်အဆင့်သို့ ရောက်ရှိနေပြီး သူတော်စင် နယ်ပယ်နှင့် ခြေတစ်လှမ်းသာ ကွာဝေးတော့သည်။

ဤဆယ်ရက်တာ ခါးသီးသော တိုက်ပွဲများတွင် ခုနစ်ရက်တာ လှောင်ပိတ်မိနေခြင်းနှင့် သေခြင်းတရားနှင့်ရှင်သန်ခြင်း၏အစွန်းတွင် မရေမတွက်နိုင်အောင် လျှောက်လှမ်းခဲ့ရခြင်းတို့က သူမ၏ရှေ့အလားအလာကို ကန့်သတ်ချက်အထိ ညှစ်ထုတ်ပြီးဖြစ်ပေ၏။

ယခု ဤမျှော်လင့်ချက်မဲ့ အခြေအနေတွင် သေဆုံးရန် အသင့်ဖြစ်နေသော စိတ်နှလုံးသားဖြင့် သူမ ထုတ်လွှတ်လိုက်သည့် ဓားချက်က သူမကို ထိုအတားအဆီး အား အမှန်တကယ်ပင် ထိတွေ့ခွင့် ပေးခဲ့သည်။

"သူတော်စင်လမ်းကြောင်း..."

နင်ဖူယောင်က တိုးညှင်းစွာ ရေရွတ်လိုက်ပြီး သူမ၏ အကြည့်က ပို၍ပို၍ တောက်ပလာသည်။

သူမသည် မူလက ကံကြမ္မာသမီးတော်ဖြစ်ပြီး ကံကောင်းခြင်းများ ဖြင့် ကောင်းချီးပေးခံရကာ မပျက်စီးနိုင်သော ဓားခန္ဓာကိုယ်ကဲ့သို့ ကောင်းကင်ကို ဆန့်ကျင်သည့် ရုပ်ပိုင်းဆိုင်ရာ ဖွဲ့စည်းတည်ဆောက်ပုံ ကို ပိုင်ဆိုင်ထားသည်။ သူမ၏ပါရမီနှင့် နားလည်သဘောပေါက်နိုင်စွမ်း နှစ်ခုလုံးမှာ ထိပ်တန်းအဆင့် ပင်။

ယခုချိန်၌ သေရေးရှင်ရေးအကျပ်တည်းကြားတွင် သူမ ဉာဏ်အလင်းပွင့်သွားခြင်းဖြင့် အရာအားလုံးက သဘာဝအတိုင်း လိုက်ပါလာသည်။

ဝီ....

သူမ၏နံဘေးပတ်လည်ရှိ အရှိန်အဝါက ရုတ်တရက် ပြောင်းလဲသွားပေ၏။

မူလက ဖရိုဖရဲ ဖြစ်နေပြီး အားနည်းနေသော သူမ၏အရှိန်အဝါသည် အံ့အားသင့်ဖွယ်ကောင်းသော အရှိန်ဖြင့် စတင်၍ မြင့်တက်လာပြီး စုစည်းလာခဲ့သည်။

သူမ၏ခန္ဓာကိုယ်အတွင်းရှိ ခမ်းခြောက်လုနီးပါး ဖြစ်နေသော စိတ်ဝိညာဉ်စွမ်းအင်များသည် အရင်းအမြစ် အသစ်တစ်ခု ထိုးသွင်းခံလိုက်ရသည့်အလား စတင်၍ စီးဆင်းလာသည်။

သူမ၏ မပျက်စီးနိုင်သော ဓားခန္ဓာကိုယ် မူလအစကို လောင်ကျွမ်းစေခြင်းမှ ဖြစ်ပေါ်လာသော အားနည်းမှု ခံစားချက်သည် ဤအသစ်မွေးဖွားလာသော စွမ်းအား ကြောင့် အမှန်တကယ်ပင် ယာယီဖိနှိပ်ခံလိုက်ရသည်။

ထို့ထက်ပို၍ အရေးကြီးသည်မှာ ဓားတာအိုလမ်းကြောင်းအပေါ် သူမ၏နားလည်မှုနှင့် မပျက်စီးနိုင်သော ဓားခန္ဓာကိုယ်အပေါ် သူမ၏ထိန်းချုပ်မှုသည် ဤအချိန်အခိုက်အတန့်တွင် အဆင့်သစ်တစ်ခုသို့ လုံးလုံးလျားလျား ရောက်ရှိသွားခြင်းပင်။

"သူ... သူက အဆင့်တက်နေတာလား"

ခေါင်းကိုးလုံး ရှန်လျို၏ ပင်မခေါင်းများထဲမှ တစ်ခုက ထိတ်လန့်တုန်လှုပ်မှုနှင့် မသေချာမှုတို့ဖြင့် အော်ဟစ်လိုက်သည်။

"တိုက်ပွဲအလယ်မှာ အဆင့်တက်တာလား... ဘယ်လောက်တောင် သတ္တိရှိလိုက်လဲ... ဘယ်လောက်တောင် ပါရမီရှိလိုက်လဲ "

ရွှေတောင်ပံ နဂါးကျားသားရဲ၏ သွေးရောင် မျက်လုံးများတွင် တည်ကြည်လေးနက်မှုနှင့် သတ်ဖြတ်လိုခြင်း စိတ်ဆန္ဒတစ်ခု ဖြတ်ပြေးသွားသည်။

"သူ့ကို အောင်မြင်ခွင့်ပေးလို့ မရဘူး... သူ့ကို သတ် "

လူသားမျိုးနွယ်စုမှ ဤအမျိုးသမီး၏ပါရမီသည် စိတ်ကူးယဥ်၍မရနိုင်လောက်အောင် ကြောက်မက်ဖွယ်ကောင်းကြောင်း သူတို့ နားလည်သဘောပေါက်သွားသည်။

အကယ်၍ သူမကိုသာ သူတော်စင် နယ်ပယ်သို့ ရောက်ရှိခွင့် ပေးလိုက်မည်ဆိုပါက ရွှမ်ဟွမ် နယ်မြေ ၏ အထူးဖိနှိပ်ထားသော ပတ်ဝန်းကျင် နှင့် ပေါင်းစပ်ထားသည့် သူမ၏ မပျက်စီးနိုင်သော ဓားခန္ဓာကိုယ် ၏အခြေခံအုတ်မြစ်ကြောင့် သူတို့သုံးဦး ပူးပေါင်းလျှင်ပင် ကြီးမားသော တန်ကြေးတစ်ခုကို ပေးဆပ်ရနိုင်ချေရှိသည်။

"အတူတူတိုက်ခိုက်ကြစမ်း....ငါတို့မှာ ရှိသမျှ စွမ်းအားတွေအားလုံး စုစည်းပြီး သူ့ကို သတ်ရမယ်...."

ဟင်းလင်းပြင် အရိပ်မိစ္ဆာ၏အသံက ရှားပါးသော အလျင်လိုမှု ခံစားချက်တစ်ခုကို သယ်ဆောင်လာကာ အရပ်မျက်နှာအဘက်ဘက်မှ ထွက်ပေါ်လာသည်။

ရှေးဟောင်း အင်မော်တယ် မိစ္ဆာသုံးဦးသည် နောက်ထပ်ထိန်းချုပ်မထားတော့ဘဲ သူတို့၏မိစ္ဆာ စွမ်းအားများအားလုံး ပေါက်ကွဲထွက်လာသည်။ သူတို့၏ ဝှက်ဖဲအသီးသီးဖြစ်သော နတ်ဘုရားစွမ်းရည် များကိုထုတ်လွှတ်ကာ သူမ အဆင့်တက်မည့် အရေးကြီးသော အခိုက်အတန့်တွင် နင်ဖူယောင်ကို ခြေမွှဖျက်ဆီးပစ်မည်ဟု ကျိန်ဆိုလိုက်ကြသည်။

ရွှေတောင်ပံ နဂါးကျားသားရဲက ကောင်းကင်သို့ ဦးတည်၍ ဟိန်းဟောက်လိုက်ရာ သူ၏ရွှေရောင်ရင့်ရင့်အကြေးခွံများပေါ်တွင် ရှေးဟောင်းမှော်စာလုံးများ ထွက်ပေါ်လာသည်။ သူ၏အတောင်ပံများက သွေးရောင်အဖြစ်သို့ ပြောင်းလဲသွားပြီး သူ၏အရှိန်အဝါ က မြင့်တက်လာကာ လက်သည်းတစ်ချက် ဝှေ့ယမ်းလိုက်သည်နှင့် နဂါးများနှင့်ကျားများ၏ အသံများ ကပ်ပါလာခဲ့သည်။ ဟင်းလင်းပြင်သည် မည်းနက်သော အက်ကွဲကြောင်းငါးခုအဖြစ် ဆုတ်ဖြဲခံလိုက်ရသည်။

ခေါင်းကိုးလုံး ရှန်လျို၏ ခေါင်းရှစ်လုံးက မူလမိစ္ဆာ မီးတောက်ကို တပြိုင်နက်တည်း မှုတ်ထုတ်လိုက်သည်။ အရောင်ရှစ်မျိုးပါသော မီးတောက်များက တောင်များကိုပြာချနိုင်ပြီး ပင်လယ်များကို ဆူပွက်စေနိုင်သော မြေအောကမ္ဘာကိုးထပ် အဆိပ်မီးတောက် တစ်ခုအဖြစ် ပေါင်းစပ်သွားသည်။ ထိုအရာ ဖြတ်သန်းသွားသော နေရာတိုင်းတွင် ဟင်းလင်းပြင်ပင်လျှင် လောင်ကျွမ်းပြီး ပုံပျက်သွားပေ၏။

ဟင်းလင်းပြင်အရိပ်မိစ္ဆာက မိစ္ဆာနတ်ဆိုးချီမြူခိုးထဲသို့ လုံးဝပေါင်းစပ်သွားသည်။ ကျောက်စင်မြင့်တစ်ခုလုံး၏နံဘေးပတ်လည်ရှိ အရိပ်များက အသက်ဝင်လာပုံရပြီး နင်ဖူယောင်၏ နတ်ဘုရားစိတ်ဝိညာဉ်ကို ဝါးမျိုရန်နှင့် သူမ၏ဓားနှလုံးသားကို ညစ်ညမ်းစေရန် ရည်ရွယ်ကာ သူမကို ထောင့်ပေါင်းစုံမှ ဖမ်းဆုပ်သည့် ရုပ်ဆိုးသော သရဲတစ္ဆေလက်များအဖြစ် ပြောင်းလဲသွားသည်။

ဤကဲ့သို့ လောကကြီးကို ဖျက်ဆီးမည့်အလား ပြင်းထန်သည့် ဝန်းရံတိုက်ခိုက်မှုကို ရင်ဆိုင်ရသောအခါ နင်ဖူယောင်က သူမ၏မျက်လုံးများကို ပိတ်လိုက်၏။

သူမက ယောင်ကွမ်းဓားကို တင်းကြပ်စွာ ဆုပ်ကိုင်လိုက်ပြီး သူမ၏ခန္ဓာကိုယ်အတွင်း၌ ဖြစ်ပေါ်နေသော အပြောင်းအလဲတွင် သူမ၏စိတ်ကို နစ်မြုပ်လိုက်သည်။

သူတော်စင်လမ်းကြောင်းက ရှင်းလင်းနေပြီး အတားအဆီးက ကျိုးပဲ့ပျက်စီးသွားခဲ့လေပြီ။

ယခုချိန်၌ သူမ လိုအပ်သောအရာမှာ ထိုစွမ်းအားအသစ်ကို ပြင်ပသို့ လမ်းညွှန်ပေးရန်နှင့် နောက်ဆုံး အသွင်ပြောင်းခြင်းကို အပြီးသတ်ရန်သာ ဖြစ်လေ၏။

ထို့ပြင် ထိုအရာကို လမ်းညွှန်ရမည့်နည်းလမ်းမှာ တိုက်ပွဲမှတဆင့်ပင်။

စွမ်းအားကို တိုက်ပွဲဖြင့် ပြုစုပျိုးထောင်ပြီး သူမ၏ တာအိုကို ဓား ဖြင့် သက်သေပြခြင်းပင်။

"ခုတ်ပိုင်းစမ်း... "

နင်ဖူယောင်က ရုတ်တရက် သူမ၏ မျက်လုံးများကို ဖွင့်လိုက်ရာ သူမ၏မျက်လုံးသူငယ်အိမ်များတွင် ဓား ချီအလင်းရောင်များ မြင့်တက်လာသည်။

သူမသည် ထပ်မံ၍ ကာကွယ်ခြင်း မပြုတော့သည့်အပြင် ရှောင်တိမ်းခြင်းလည်း မပြုတော့ပေ။ ထိုအစား သူမက ကောင်းကင်ကို ဖုံးလွှမ်းနေသော တိုက်ခိုက်မှုများကို ရင်ဆိုင်လိုက်ပြီး သူမ၏ဓားကို နောက်တစ်ကြိမ် ဝှေ့ယမ်းလိုက်၏။

ဤဓားတိုက်ခိုက်မှုက ယခင်ကနှင့် လုံးလုံးလျားလျား ကွာခြားနေသည်။

ဓားချီအလင်းတန်းသည် အထူးသဖြင့် တောက်ပခြင်း သို့မဟုတ် စူးရှခြင်း မရှိပေ။ ထိုအစား ထိုအရာသည် ရိုးရှင်းပြီး ထိန်းချုပ်ထားပုံ ရသော်လည်း အရာအားလုံးကို ဖြတ်တောက်ရန်နှင့် ဥပဒေသများ အားလုံးကို ဖျက်ဆီးရန် ကြောက်မက်ဖွယ်ကောင်းသော စိတ်ဆန္ဒတစ်ခု ပါဝင်နေသည်။

မပျက်စီးနိုင်သော ဓားခန္ဓာကိုယ်၏ စွမ်းအားသည် အမှန်တကယ်ကို စတင်၍ ပေါ်လွင်လာခဲ့သည်။

ဝှစ်...

ဓားချီအလင်းရောင် ဖြတ်သန်းသွားသောနေရာတွင် ဟင်းလင်းပြင်ကို ဆုတ်ဖြဲရန် လုံလောက်သော ရွှေတောင်ပံ နဂါးကျားသားရဲ၏ လက်သည်းများ အတင်းအကြပ် ဖြတ်တောက်ခံလိုက်ရသည်။ လက်သည်းသုံးချောင်း ပြတ်တောက်သွားပြီး ရွှေရောင်ရင့်ရင့်သွေးများ ဖြာထွက်လာသည်။

"အား..."

ရွှေတောင်ပံ နဂါးကျားသားရဲက နာကျင်စွာ ဟိန်းဟောက်လိုက်ပြီး ပြင်းထန်စွာ နောက်ဆုတ်သွားကာ သူ၏မျက်လုံးများတွင် မယုံကြည်နိုင်မှုများဖြင့် ပြည့်နှက်နေသည်။

ဓားချီအလင်းတန်း၏ အရှိန်အဟုန်သည် လျော့ကျသွားခြင်းမရှိဘဲ ခေါင်းကိုးလုံးရှန်လျိုမှ မှုတ်ထုတ်လိုက်သော "မြေအောက်ကမ္ဘာကိုးထပ် အဆိပ် မီးတောက်" အတွင်းသို့ တိုက်ရိုက်ခုတ်ပိုင်းလိုက်သည်။

ထူးဆန်းသော မြင်ကွင်းတစ်ခု ဖြစ်ပေါ်လာသည်။

သူတော်စင်လက်နက်တစ်ခုကို ပြာချနိုင်စွမ်းရှိသည့် ကြောက်မက်ဖွယ်ကောင်းသော အဆိပ်မီးတောက်သည် ဓားချီအလင်းတန်းနှင့် ထိတွေ့လိုက်သည့် အခိုက်အတန့်တွင် သဘာဝရန်သူနှင့် တွေ့ဆုံသွားသည့်အလား နှစ်ပိုင်းကွဲထွက်သွားပြီး လျှင်မြန်စွာ ပျောက်ကွယ်သွားတော့သည်။

"ဘာ...."

ခေါင်းကိုးလုံးရှန်လျို ၏ ခေါင်းရှစ်လုံးလုံး၌ ထိတ်လန့်သော အမူအရာများ တပြိုင်နက်တည်း ထွက်ပေါ်လာသည်။

ထို့ပြင် နင်ဖူယောင်၏ပုံရိပ်က ရေခဲများ မှုတ်ထုတ်နေသော သူ၏ခေါင်းများအနက်မှ ခေါင်းတစ်လုံး၏ရှေ့တွင် သရဲတစ္ဆေတစ်ကောင်အလား ထွက်ပေါ်လာသည်။

"ဒီဓားချက်က မြောက်ပိုင်းပြည်နယ်သုံးခုက သေဆုံးသွားတဲ့ သာမန်ပြည်သူတွေအတွက်ပဲ "

သူမ၏အေးစက်သော အသံက သေမင်းနတ်ဘုရား တစ်ပါး၏ တီးတိုးပြောဆိုနေသံအလားပင်။

ဓားချီအလင်းတန်းတစ်တန်း လင်းလက်သွားသည်။

ဝှစ်....

ရှန်လျို၏ ရုပ်ဆိုးသောခေါင်းတစ်လုံးက မိုးကောင်းကင်ယံသို့ မြောက်တက်သွားသည်။ အစိမ်းရောင်ရင့်ရင့် မိစ္ဆာသွေးများသည် စမ်းရေပန်းတစ်ခုအလား ပန်းထွက်လာပေ၏။

"အား...."

ခေါင်းကိုးလုံးရှန်လျိုက အလွန်အမင်း နာကျင်သော အော်ဟစ်သံတစ်သံကို ထုတ်လွှတ်လိုက်သည်။ သူ၏ ကျန်ရှိနေသော ခေါင်းခုနစ်လုံးက ရူးသွပ်စွာ တုန်ခါနေပြီး နာကျင်မှုနှင့်ဒေါသတို့က သူ့ကို စိတ်လွတ်ကင်းသွားစေလုနီးပါး ဖြစ်စေခဲ့သည်။