အခန်း ၁၄၉

အခန်း(၁၄၉) စနစ်၏ အဆုံးစွန်သော ဆုလာဘ်

ချူးရှန့်သည် မျက်မှောင်ကြုတ်လျက် အလွန်တောက်ပပြောင်လက်နေသော ရွှေရောင်အိုင်ကွန်ကို စိုက်ကြည့်နေမိ၏။

စတီယာရင်၊ အတောင်ပံများနှင့် တာယာချော်ရာ လမ်းကြောင်းများ။

ဤမပြည့်စုံသော စနစ်ကြီး အဆင့်မြှင့်တင်ပြီးနောက် အလှအပဆိုင်ရာ ခံစားချက်က သည်မျှအထိ ပိုမိုလွန်ကဲသွားရသလော။

သူက စိတ်ထဲမှ တိုးတိုးရေရွတ်နေစဉ်မှာပင် ထိုအိုင်ကွန်၏ အလင်းရောင်သည် တစ်ခဏချင်းအတွင်း အထွတ်အထိပ်သို့ ရောက်ရှိသွားတော့သည်။

တစ်လောကလုံးရှိ ပကတိမျက်နှာပြင်တစ်ခုလုံး စူးရှသော ရွှေရောင်များ ဖုံးလွှမ်းသွား၏။

ထို့နောက်တွင် စနစ်၏ လေးနက်ခန့်ညားလှသော အသိပေးသံသည် ပတ်ပတ်လည်မှ ပဲ့တင်ထပ်လျက် ထွက်ပေါ်လာတော့သည်။

[အိမ်ရှင်အား ဂုဏ်ပြုပါသည်... သင်သည် အမြဲတမ်းအသုံးပြုနိုင်ပြီး အဆင့်မြှင့်တင်၍ရသော နတ်ဘုရားအဆင့် စွမ်းရည်တစ်ခုကို ရရှိသွားပါပြီ]

[နတ်ဘုရားအဆင့် ယာဉ်မောင်းနှင်ခြင်း စွမ်းရည်…]

အောင်မြင်သွားချေပြီ။

ချူးရှန့်၏ တင်းမာနေသော အာရုံကြောများက နောက်ဆုံးတွင် အနည်းငယ် လျော့ပါးသွားရ၏။

‌ဤအရာပင် ဖြစ်သည်။

ဤအရာသည် သူ အလိုချင်ဆုံးအရာ အတိအကျပင် ဖြစ်ပေသည်။

သူ အသေအချာ မစဉ်းစားရသေးခင်မှာပင် ဖော်ပြ၍မရသော သတင်းအချက်အလက် ရေစီးကြောင်းကြီးသည် ရေတွက်၍မရသော ကြွက်သားမှတ်ဉာဏ်များနှင့် ရောနှောလျက် ကျိုးပေါက်သွားသော တာတမံတစ်ခုကဲ့သို့ အရှိန်အဟုန်ဖြင့် တိုးဝင်လာတော့သည်။ မဟုတ်သေး... ထိုအရာက ရေကြီးရေလျှံမှုထက်ပင် ပိုမိုပြင်းထန်လှပြီး တစ်စုံတစ်ဦးက မြင့်မားသော ဖိအားရေသေနတ်ကို အသုံးပြု၍ အချက်အလက်အားလုံးကို သူ၏ဦးနှောက်ထဲသို့ အတင်းအကျပ် ရိုက်သွင်းနေသကဲ့သို့ပင် ဖြစ်၏။

[စွမ်းရည်အမည် - နတ်ဘုရားအဆင့် ယာဉ်မောင်းနှင်ခြင်း စွမ်းရည် (LV.1)]

[စွမ်းရည်အဆင့် - အဆင့်မြှင့်တင်နိုင်သည် (နောက်တစ်ဆင့်အတွက် လိုအပ်သော ခြိမ်းခြောက်နိုင်စွမ်းတန်ဖိုး - ၁၀၀,၀၀၀ / ၁,၀၀၀,၀၀၀)]

[စွမ်းရည်ဖော်ပြချက် - လူနှင့်ယာဉ် တစ်သားတည်းကျခြင်း.. လမ်းမထက်က အရှင်သခင်... ပိုင်ရှင်သည် လူသားတို့ သိရှိထားသော မည်သည့်ကုန်းလမ်းသယ်ယူပို့ဆောင်ရေး ယာဉ်မဆို မောင်းနှင်နိုင်ပြီး ၎င်း၏ စွမ်းဆောင်ရည်ကို ရုပ်ပိုင်းဆိုင်ရာ ကန့်သတ်ချက်များ၏ ၁၂၀ ရာခိုင်နှုန်းထက်ကျော်လွန်အောင် ထုတ်ဖော်နိုင်သည်…]

[အကျုံးဝင်သော ယာဉ်များ - စက်ဘီး၊ သုံးဘီးဆိုင်ကယ်၊ မော်တော်ဆိုင်ကယ်၊ ထရက်တာ၊ ခရီးသည်တင်ကား၊ အက်ဖ်ဝမ်း ပြိုင်ကား၊ အဝေးပြေးကုန်တင်ကားကြီးများ၊ အဓိကတိုက်ပွဲဝင် တင့်ကားများ၊ အင်ဂျင်နီယာ စက်ရုပ်ဝတ်စုံများ... မြေပြင်ပေါ်တွင် မောင်းနှင်နိုင်သော မည်သည့်အရာမဆို ပိုင်ရှင့်ခန္ဓာကိုယ်၏ အစိတ်အပိုင်းတစ်ခု ဖြစ်လာလိမ့်မည်…]

ဝုန်း…

ချူးရှန့်၏ ခန္ဓာကိုယ်မှာ တုန်ခါသွားရ၏။

သူသည် မိမိ၏ဦးနှောက် ပေါက်ကွဲထွက်လုမတတ် ခံစားလိုက်ရသည်။

တရုတ်အင်ဂျင်များ၏ အခြေခံအကျဆုံး သဘောတရားများမှသည် ကလပ်နှစ်ခုပါသော ဂီယာအုံအတွင်းရှိ ဂီယာများ၏ အရှုပ်ထွေးဆုံး ချိတ်ဆက်မှုပုံစံများအထိ။

အရှိန်ပြင်းပြင်း ကွေ့လိုက်စဉ် နောက်ဘီးများနှင့် မြေပြင်ကြားရှိ အကောင်းဆုံး ပွတ်တိုက်မှုဆိုင်ရာ တွက်ချက်မှုများမှသည် ကားပျံတက်သွားစဉ် လေကြောင်းလှုပ်ရှားမှု သဘောတရားကို အသုံးပြု၍ ယာဉ်၏အနေအထားကို မည်သို့ထိန်းညှိရမည်အထိ။

ဟောင်းနွမ်းနေသော စက်ဘီးတစ်စီးဖြင့် အစွန်းရောက် လျှောတိုက်ခြင်းကို မည်သို့ပြုလုပ်ရမည်မှသည် တန်၅၀ ရှိသော တင့်ကားကြီးတစ်စီးကို မြို့ပြလမ်းမများပေါ်တွင် မည်သို့အကပြခိုင်းရမည်အထိ။

ရေတွက်၍မရသော ဗဟုသုတများ၊ ရေတွက်၍မရသော ပုံရိပ်များနှင့် ရေတွက်၍မရသော ခန္ဓာကိုယ်၏ ဗီဇတုံ့ပြန်မှုများအားလုံးသည် တစ်စက္ကန့်အတွင်း သူ၏အရိုးထဲတွင် စွဲထင်သွားပြီး သွေးသားထဲသို့ စီးဆင်းသွားတော့သည်။

သူသည် မျက်စိမှိတ်ထားလျှင်ပင် ကားကိုယ်ထည်ပေါ်တွင် စီးဆင်းနေသော လေထု၏ ရွေ့လျားမှုတိုင်းကို ရှင်းလင်းစွာ မြင်နိုင်ပြီး အင်ဂျင်အတွင်းရှိ ပစ်စတန်လှုပ်ရှားမှုတိုင်း၏ သေးငယ်သော အသံများကို ကြားနိုင်သည်ဟုပင် ခံစားနေရ၏။

ဤလိုခံစားချက်မျိုးက...အလွန်အံ့ဩစရာကောင်းလှပေသည်။

ချူးရှန့်သည် မသိစိတ်က သူ၏လက်ချောင်းများကို လှုပ်ရှားလိုက်၏။

သူသည် မိမိ၏လက်ချောင်းများက တစ်စက္ကန့်လျှင် အကြိမ်ရာပေါင်းများစွာသော နှုန်းဖြင့် စတီယာရင်ကို အတိကျဆုံး ထိန်းညှိပေးနိုင်ပြီဟု ခံစားလိုက်ရသည်။

သူ၏ခြေထောက်များသည်လည်း လီဗာနင်းတံ၏ မီလီမီတာ အစိတ်အပိုင်းမျှသာရှိသော အသေးငယ်ဆုံး ပြောင်းလဲမှုကိုပင် ခံစားသိရှိနိုင်စွမ်း ရှိနေပုံရ၏။

ယခုအခါ သူသာ ကားတစ်စီးထဲသို့ ဝင်ထိုင်လိုက်ပါက အင်ဂျင်လည်ပတ်နှုန်းပြဒိုင်ခွက်ကို ကြည့်ရန်ပင်မလိုဘဲ မည်သည့်အရှိန်နှုန်းက ရုန်းအားအကောင်းဆုံးဖြစ်သည်ကို သူ၏နောက်ထိုင်ခုံ ခံစားချက်ဖြင့်တင် သိရှိနိုင်ပေသည်။

"ဟူး……"

ချူးရှန့်သည် ရင်ထဲမှ လေပူများကို ဖြည်းညင်းစွာ မှုတ်ထုတ်လိုက်၏။

ရုတ်တရက် ပီတိဖြစ်ရသော စိတ်လှုပ်ရှားမှုကြီးက ဒီရေကျသွားသကဲ့သို့ ပြန်လည်ငြိမ်သက်သွားတော့သည်။

ကျန်ရှိနေခဲ့သည်မှာ ဗီဇအရ ပါလာပြီးသားဖြစ်ကာ အကြိမ်ပေါင်းထောင်ချီ လေ့ကျင့်ထားပြီးသကဲ့သို့ အပြည့်အဝ ယုံကြည်မှုပင်ဖြစ်၏။

သူသည် ယခုအချိန်တွင် ပြင်းထန်သော ဆန္ဒတစ်ခုသာ ဖြစ်ပေါ်နေသည်။

သူ ကားမောင်းချင်နေမိ၏။

မည်သည့်ကားပဲဖြစ်ဖြစ် ရပေသည်။

သူ၏အကြည့်သည် မသိစိတ်ကြောင့်ပင် စင်္ကြံပြတင်းပေါက်ကို ကျော်ဖြတ်ကာ ဗျူရိုအဆောက်အအုံအောက်ရှိ ကားပါကင်ဆီသို့ ကျရောက်သွားတော့သည်။

ကားပါကင်တွင် ရဲတပ်ဖွဲ့အမှတ်အသားပါသော ဆန်တာနာကားများ စီစီရီရီ ရပ်နားထား၏။

အတိတ်ကာလကမူ ဤကားများသည် သူ့အတွက် သံတိုသံစ စုပုံထားခြင်းမျှသာ ဖြစ်သည်။

သို့သော် ယခုအခါတွင်မူ…

သူ၏အကြည့်သည် ရုတ်တရက် ထူးဆန်းသွားရပြီး အဆင့်အတန်းမမီသော ဝက်သားတစ်တုံးကို အနုစိတ်စိစစ်နေသည့် မီရှယ်လင်းကြယ်ပွင့်အဆင့် ထိပ်တန်းစားဖိုမှူးတစ်ဦး၏ အကြည့်ကဲ့သို့ ဖြစ်နေတော့သည်။

"ဟမ့်..."

ချူးရှန့်သည် စိတ်ထဲမှ နှာခေါင်းရှုံ့လိုက်မိ၏။

"ဒီစုတ်ချာလှတဲ့ကားက..."

"ကားအောက်ပိုင်းက မြင့်လွန်းတယ်... ဗဟိုချက်က မငြိမ်မသက်ဖြစ်နေတယ်... အရှိန်ပြင်းပြင်းနဲ့ ကွေ့လိုက်ရင် လှန်သွားမှာ သေချာတယ်..."

"ဆိုင်ပန်ရှင်က ရှည်လျားပြီး ပျော့အိနေတယ်... လီဗာအနည်းငယ် နင်းလိုက်ရုံနဲ့ ကားခေါင်းက မော့တက်လုမတတ် ဖြစ်သွားတယ်... ဘရိတ်နင်းလိုက်တဲ့အခါမှာလည်း ကားခေါင်းက ရှေ့ကို စိုက်ကျသွားတာ ပြင်းထန်လွန်းတယ်..."

"စတီယာရင်ရဲ့ လှည့်ပတ်နှုန်းက မြင့်မားလွန်းတယ်... ကစားကွက်လည်း အများကြီး ရှိနေလိမ့်မယ်... မင်းသာ လျှောတိုက်ချင်တယ်ဆိုရင် လက်မောင်းကျိုးသွားလိမ့်မယ်..."

"ရှေ့မှန်တိုင်က ထူလွန်းလို့ အမြင်အာရုံကို ပိတ်ဆို့ထားတယ်... ပြီးတော့ ထိုင်ခုံတွေရဲ့ ဒီဇိုင်းကလည်း လူသားတွေ သက်သောင့်သက်သာဖြစ်ဖို့ လုံးဝမစဉ်းစားထားဘူး..."

ထိုကား၏ အားနည်းချက်ပေါင်း တစ်ရာကျော်သည် သူ၏ဦးနှောက်ထဲတွင် တစ်ခဏချင်း ပေါ်လာတော့သည်။

သို့သော် သူက အတွေးကို ပြောင်းလဲလိုက်၏။

"ဒါပေမဲ့... အီးအေ၁၁၁ အင်ဂျင်က တကယ်ပဲ ကြံ့ခိုင်ပြီး ရေရှည်ခံတယ်... ဖွဲ့စည်းပုံက ရိုးရှင်းပြီး ပြုပြင်မွမ်းမံဖို့ အလားအလာ အများကြီးရှိတယ်..."

"အကယ်၍ လေဝင်ပိုက်ကို လေစီးဆင်းမှုကောင်းတဲ့အမျိုးအစားနဲ့ လဲလှယ်လိုက်မယ်... အိပ်ဇောစနစ်တစ်ခုလုံးကို အဆင့်မြှင့်တင်မယ်... စပါတ်ပလတ်နဲ့ အဂ္ဂနီရှင်းကွိုင်တွေကို အသစ်လဲမယ်... နောက်ဆုံးမှာ တစ်စုံတစ်ယောက်ကို အီးစီယူ စနစ် အထူးပြန်ပြင်ခိုင်းလိုက်မယ်ဆိုရင်..."

"ရှော့ဘားတွေကို လိုသလိုနိမ့်မြင့်လုပ်လို့ရတဲ့ ပစ္စည်းတွေနဲ့လဲပြီး ကားကို အနိမ့်ဆုံးအနေအထားအထိ နှိမ့်ချလိုက်မယ်... ပြီးတော့ ဘေးဘယ်ညာမယိမ်းအောင် ထိန်းတဲ့တံကို တပ်ဆင်မယ်..."

"တာယာတွေကို လမ်းပေါ်ကပ်တဲ့ ပြိုင်ကားတာယာတွေအဖြစ် ပြောင်းလဲပြီး ဘရိတ်တွေကို ပစ္စတန်လေးခုပါတဲ့ ဘရိတ်မျိုး ပြောင်းလိုက်မယ်ဆိုရင်..."

ချူးရှန့်က ပိုတွေးတောလေ သူ၏မျက်လုံးများက ပိုမိုတောက်ပလာလေ ဖြစ်တော့သည်။

သူသည် ယခုလိုဟောင်းနွမ်းနေသော ဆန်တာနာကားတစ်စီးကိုပင် သူကိုယ်တိုင် လေ့ကျင့်မွမ်းမံပြီး မောင်းနှင်မည်ဆိုပါက ဖာရရီပြိုင်ကားတစ်စီးကို အနိုင်ယူရန်မှာ အနည်းငယ် စွန့်စားရနိုင်သော်လည်း။

အာကီနာတောင်ပေါ်တွင်မူ ထိုဂျီတီအာရ် ပြိုင်ကားများကို သူ၏နောက်မီးကိုပင် မမြင်ရအောင် လုပ်ဆောင်ရန်မှာမူ မည်သို့မျှ မခက်ခဲသောအရာဟု ခံစားလိုက်ရ၏။

သူသည် ထိုသို့ပြုပြင်ထားသော ဆန်တာနာကားကို အသုံးပြု၍ သူခုနကတင် ပျံသန်းကျော်ဖြတ်ခဲ့သော ကျိုးပျက်နေသည့် တံတားပေါ်တွင် ၃၆၀ ဒီဂရီ သောမတ်စ်စတိုင် လှည့်ပတ်မှုတစ်ခု ပြုလုပ်ပြီးနောက် လေထဲတွင် နှစ်ပတ်ခွဲခန့် လှည့်ကာ ချောမွေ့စွာ မြေပြင်ပေါ်သို့ ဆင်းသက်နေသည့် ပုံရိပ်ကိုပင် စိတ်ကူးယဉ်နေမိပြီဖြစ်သည်။

ဖြစ်နိုင်ချေရှိသည်။

လုံးဝကို ဖြစ်နိုင်ချေရှိပေသည်။

အရှိန်နှုန်းက လုံလောက်အောင် မြန်ဆန်နေသရွေ့၊ ထောင့်ချိုးက လုံလောက်အောင် ခက်ခဲနေသရွေ့၊ ပြီးတော့ မြစ်ပြင်ပေါ်က လေထုရဲ့ ပင့်အားကို အသုံးချနိုင်မယ်ဆိုရင် ချူးရှန့်သည် "ဆန်တာနာကားကို အကြီးအကျယ် ပြုပြင်မွမ်းမံရန်" ဟူသော သူ၏ကြီးကျယ်ခမ်းနားသည့် အစီအစဉ်ကြီးထဲတွင် နစ်မြောနေပြီး ရုန်းမထွက်နိုင် ဖြစ်နေစဉ်မှာပင်။

"တီ.. တီ.."

အိတ်ကပ်ထဲမှ ဖုန်းသည် မသင့်တော်သော အချိန်တွင် ပြင်းထန်စွာ ထပ်မံတုန်ခါလာပြန်၏။

ချူးရှန့်က မျက်မှောင်ကြုတ်လျက် စိတ်မရှည်စွာဖြင့် ဖုန်းကို ထုတ်လိုက်သည်။

ဖုန်းမျက်နှာပြင်ပေါ်တွင် ကြီးမားသော စာလုံးသုံးလုံးသည် ရူးသွပ်စွာ လင်းလက်နေ၏။

[အဘိုးကြီးဝမ်]

ချူးရှန့်သည် ဖုန်းလက်ခံရန် နှိပ်လိုက်သော်လည်း သူ စကားမပြောရသေးခင်မှာပင်…

ဖုန်း၏တစ်ဖက်မှ ဝမ်ထျဲ့ကျွင်း၏ ငိုကြွေးမြည်တမ်းသံသည် ဝမ်းနည်းပူဆွေးမှု၊ မျှော်လင့်ချက်မဲ့မှုများနှင့် အလိုလိုဖားချင်နေသည့် အငွေ့အသက်များ ပြည့်နှက်လျက် သူ၏ဖခင်ရင်း သေဆုံးသွားသကဲ့သို့ ထွက်ပေါ်လာတော့သည်။

"ချူးရှန့်... ငါ့ရဲ့သားကြီးရယ်..."

"မင်း ဘယ်တွေသွားနေတာလဲ... အောင်ပွဲခံ ဂုဏ်ပြုစားပွဲက ပြီးသွားပြီ..."

"မြန်မြန်ပြန်လာခဲ့ပါဦး... ပြဿနာကြီး တက်နေပြီ..."

ချူးရှန့်သည် မည်သည့်ခံစားချက်မျှမရှိဘဲ တည်ငြိမ်စွာ တုံ့ပြန်လိုက်၏။

"အွန်း..."

ဖုန်းတစ်ဖက်မှ ဝမ်ထျဲ့ကျွင်းသည် ထို "အွန်း" ဟူသော စကားကြောင့် သိသိသာသာ ဆွံ့အသွားပြီးနောက် ပိုမိုစူးရှသော အသံဖြင့် အော်ဟစ်လိုက်တော့သည်။

"အွန်းပဲလုပ်မနေနဲ့တော့... ဒုတိယညွှန်ကြားရေးမှူးစွန်းက ငါ့ကို သီးသန့်ခေါ်ပြီး အဲဒီပျက်စီးသွားတဲ့ အပိုလိုအီးဗွီအို... ယူရိုသန်းပေါင်းများစွာ တန်ဖိုးရှိတဲ့ စူပါကားအကြောင်း မေးနေပြီ..."

"ဒါနဲ့... မင်း အဲဒီအစီရင်ခံစာကို ဘယ်လိုရေးမှာလဲ..."

"အထက်လူကြီးတွေက ငါ့ကို ဖိအားပေးနေကြပြီ... မနက်ဖြန်မနက် မပျက်မကွက် တင်ရမယ်တဲ့... ငါသာ အစီရင်ခံစာ မတင်နိုင်ရင် သူတို့ ငါ့ကို အရေးယူတော့မှာ..."