အခန်း ၁၀၉

အခန်း (၁၀၉) ချန်ရှန်းသူတော်စင်သားတော်အား ဖိနှိပ်ခြင်းနှင့် လင်းရွှမ်၏ ချစ်သူ

"တကယ်ကို မာနကြီးလွန်းတယ်... ဟမ်... မင်းက နောက်ခံကောင်းကနေ လာပြီး မဟာချင်အင်ပါယာရဲ့ တော်ဝင်မျိုးနွယ် သွေးကို ကံကောင်းထောက်မစွာ ပိုင်ဆိုင်ထားလို့ပဲ မဟုတ်လား”

"ဒီအဆင့်အတန်းကလွဲရင် မင်းမှာ ဘာရှိသေးလို့လဲ”

"ဒီနေ့တော့ ငါ လော့ထုံက မင်းကို သေချာ သင်ခန်းစာပေးရမယ်... မင်း အရမ်းကြီး မာနမကြီးသင့်ဘူးဆိုတာကိုပေါ့”

‘ဝုန်း!’

သူတို့ စကားပြောနေစဉ် လော့ထုံ၏ ကျင့်ကြံမှုက အပြည့်အဝ ပေါက်ကွဲထွက်လာပြီး လိုဏ်ဂူကောင်းကင်အဆင့် တတိယအလွှာသို့ ရောက်ရှိသွားခဲ့သည်။

"ချန်ရှန်းမြင့်မြတ်နယ်မြေရဲ့ သူတော်စင်သားတော် လော့ထုံရဲ့ ကျင့်ကြံမှုက လိုဏ်ဂူကောင်းကင်အဆင့် ၃ ကို ရောက်နေတာ ကြာပြီ၊ သူ့ရဲ့ တိုက်ခိုက်ရေးစွမ်းအားက သာမန် လိုဏ်ဂူကောင်းကင် အလယ်အလတ်အဆင့်တွေထက် ပိုသန်မာတယ်... ချင်လော့ရဲ့ သတင်းအချက်အလက်တွေ မှန်ကန်တယ်ဆိုရင် လွန်ခဲ့တဲ့ နှစ်ဝက်ကျော်လောက်က သူက နတ်စွမ်းအင်အဆင့်မှာပဲ ရှိနေသေးတယ် မဟုတ်လား”

"အဲဒါက အတိတ်မှာ ကျန်ခဲ့ပြီလေ... ချင်လော့ရဲ့ ကျင့်ကြံမှုက နတ်ဘုရားအသွင်ပြောင်းအဆင့်ကို ရောက်နေတာ ကြာပြီ... မဟာချင်အင်ပါယာရဲ့ အရင်းအမြစ်တွေ အများကြီးနဲ့ဆိုတော့ မဟာချင်အင်ပါယာရဲ့ မင်းသားတစ်ပါးအနေနဲ့ လေ့ကျင့်မှု မရှိဘဲ နေပါ့မလား”

စကားသံထဲတွင် အနည်းငယ် မနာလိုဖြစ်နေသော အရိပ်အယောင်များ ပါဝင်နေခဲ့၏။

"ငါတို့နဲ့တခြားစီပဲ ငါတို့လို ဂိုဏ်းအင်အားနည်းပြီး ကိုယ့်ခြေထောက်ပေါ် ကိုယ်ရပ်တည်နေရလို့ ဒီနေ့အခြေအနေအထိ ရောက်လာရတာနဲ့ ဘယ်တူပါ့မလဲ”

"နတ်ဘုရားအသွင်ပြောင်းအဆင့်က အံ့မခန်းပါရမီရှင်များစာရင်းထဲကို ဝင်နိုင်တယ်တဲ့လား... ကျစ်ကျစ်... လော့ထုံက လက်မခံတာ အံ့ဩစရာ မရှိပါဘူး... ဒီနေရာမှာ လျှို့ဝှက်ချက်တွေ မရှိဘူးဆိုတာကို ရိုးရိုးသားသား ပြောရရင် ငါ မယုံဘူး”

"အံ့မခန်းပါရမီရှင်များစာရင်းရဲ့ တန်ဖိုးက ကျဆင်းသွားပြီပဲ... ဒီစာရင်းကို ကြည့်ရတာ လူတွေကို လက်နဲ့ ရေးခိုင်းလိုက်တာက ပိုကောင်းမယ် ထင်တယ်”

ရှန်ချင်းယန်သည် ဤစကားများကို ဂရုမစိုက်ဘဲ ချင်လော့ကိုသာ စိုက်ကြည့်နေခဲ့၏။

ချင်လော့ သေဆုံးသွားသည်ကို သူမ မြင်တွေ့ချင်ပေသည်။

လော့ထုံသည် ချင်လော့ကို မသတ်ရဲသော်လည်း ကိစ္စမရှိပေ။

တစ်စုံတစ်ယောက်က ချင်လော့ကို သတ်ဖြတ်လိမ့်မည် ဖြစ်သည်။

"ဖိနှိပ်ထားစမ်း!"

လော့ထုံက သူ၏ စွမ်းအား ခုနစ်ဆယ်ရာခိုင်နှုန်းခန့်ကို ထုတ်လွှတ်ကာ တိုက်ခိုက်လိုက်သည်။

သူက အစွမ်းကုန် တိုက်ခိုက်ရန် ရည်ရွယ်ထားသော်လည်း အကယ်၍ ထိုသို့ပြုလုပ်ပါက ချင်လော့ကို ဤနေရာတွင်ပင် လက်ဝါးတစ်ချက်တည်းဖြင့် ရိုက်သတ်မိမည်ကို စိုးရိမ်နေခဲ့၏။

ချင်လော့ကို သတ်ဖြတ်ခြင်းက သူ့အတွက် ရိုးရှင်းသော်လည်း ချင်လော့ကို သတ်ဖြတ်ပြီးနောက် သူနှင့် ချန်ရှန်းမြင့်မြတ်နယ်မြေသည် သေချာပေါက် သေဆုံးရမည့် ကံကြမ္မာကို ရင်ဆိုင်ရပေလိမ့်မည်။

သူ ဒေါသထွက်နေသည်မှာ မှန်သော်လည်း ချင်လော့ကို မသတ်ရဲသည်မှာလည်း အမှန်ပင် ဖြစ်သည်။

‘ချန်ရှန်း မဟာလက်ဝါးတံဆိပ်!’

ကြီးမားသော တောင်ထွတ်ကြီးတစ်ခု၏ ပုံရိပ်ယောင် ပေါ်လာပြီး ချင်လော့ထံသို့ ရက်စက်စွာ ဖိနှိပ်လာခဲ့သည်။

"ဒီလောက်ပဲလား..."

ချင်လော့က လော့ထုံကို အထင်အမြင်သေးစွာ ကြည့်လိုက်၏။

"ငါ့ကို တိုက်ခိုက်တာတောင် အစွမ်းကုန် မတိုက်ခိုက်ဘူးလား... မင်းက ငါ့ကို အထင်သေးနေတာလား... ဒါမှမဟုတ် မင်းရဲ့ အသက်ကို မင်း တန်ဖိုးမထားတာလား"

သူ ဓားဆွဲထုတ်ရန်ပင် မစဉ်းစားခဲ့ချေ။

အဘယ်ကြောင့်ဆိုသော် သူ၏ရှေ့ရှိ လော့ထုံက မထိုက်တန်သောကြောင့်ပင်။

‘ဝုန်း!’

ချင်လော့က တိုက်ခိုက်မှုကို လက်သီးတစ်ချက်ဖြင့် ရင်ဆိုင်လိုက်ရာ လော့ထုံ၏ နှုတ်ခမ်းထောင့်ရှိ အပြုံးက ပိုမို ကြီးမားလာခဲ့သည်။

ချင်လော့က သူ့ကို မြေပြင်ပေါ်တွင် ဖိနှိပ်ထားပြီး အသက်ချမ်းသာပေးရန် တောင်းပန်နေမည့် မြင်ကွင်းကို ကြိုတင်မြင်ယောင်နေသည့်အလားပင်။

‘ဘန်း!’

သူတို့နှစ်ဦး ရင်ဆိုင်မိချိန်၌ ချင်လော့၏ ခန္ဓာကိုယ်မှ အလွန်မင်းကြီးမားသော အားကောင်းသည့် စွမ်းအားများ ထွက်ပေါ်လာရာ သူ လုံးဝ တားဆီးနိုင်ခြင်း မရှိခဲ့ချေ။

"မဖြစ်နိုင်ဘူး!’

လော့ထုံက အံ့အားသင့်စွာ အော်ဟစ်လိုက်ပြီး သူ၏မျက်နှာက စက္ကူတစ်ရွက်ကဲ့သို့ ချက်ချင်း ဖြူရော်သွားခဲ့သည်။

သူ၏ တိုက်ခိုက်မှုသည် ချင်လော့၏ လက်သီးတစ်ချက်တည်းဖြင့် ချက်ချင်း ကြေမွသွားခဲ့ပြီး ချင်လော့၏ လက်သီးအရှိန်က လျော့ကျမသွားဘဲ လော့ထုံထံသို့ ပြင်းထန်စွာ ဝင်ဆောင့်သွားပေ၏။

‘ဘန်း!’

ထိုလက်သီးချက်က လော့ထုံ၏ ရင်ဘတ်ကို တည့်တည့်ထိမှန်သွားရာ လော့ထုံက သွေးခဲများ ပါဝင်သော သွေးတစ်ပွက်ကို အန်ထုတ်လိုက်ရသည်။

ပြင်းထန်သော ထိုးနှက်ချက်ကို ခံလိုက်ရပြီး သူက မြေပြင်ပေါ်သို့ လဲကျသွားချိန်၌ ချင်လော့၏ ပြင်းထန်သော ခြေကန်ချက်တစ်ခုက သူ၏ ရင်ဘတ်ပေါ်သို့ ကျရောက်လာခဲ့ပြန်သည်။

‘ဗွတ်!’

လော့ထုံက နောက်ထပ် သွေးတစ်ပွက်ကို အန်ထုတ်လိုက်ရပြီး ချက်ချင်းပင် အားအင်ကုန်ခမ်းသွားကာ ပြင်းထန်စွာ ဒဏ်ရာရရှိပြီး သေလုမြောပါး ဖြစ်သွားခဲ့၏။

အားလုံးက အံ့အားသင့်သွားကြပြီး ရလဒ်က ဤသို့ ဖြစ်လာမည်ဟု မမျှော်လင့်ထားခဲ့ကြချေ။

လော့ထုံသည် အလွန် လွယ်ကူစွာ ရှုံးနိမ့်သွားခဲ့သည်။

ချင်လော့၏ လက်ထဲတွင် လော့ထုံက တိုက်ခိုက်မှု တစ်ချက်ကိုတောင် မခံနိုင်ဘူးလား။

"လော့ထုံက သရုပ်ဆောင်နေတာလား... ချင်လော့ရဲ့ ကျင့်ကြံမှုက ပေါက်ကွဲမထွက်သေးဘူးလေ... ဒါက သရုပ်ဆောင်တာ အရမ်း ပေါ်လွင်မနေဘူးလား”

"ဖြစ်နိုင်တယ်... ဒါက ဖြစ်နိုင်တယ်... လော့ထုံက မဟာချင်အင်ပါယာကို မျက်နှာလိုမျက်နှာရ လုပ်ချင်နေတာ ဖြစ်ရမယ်”

"ဒီလောက်ပဲလား”

ချင်လော့က လော့ထုံကို အထင်အမြင်သေးစွာ ငုံ့ကြည့်လိုက်သည်။

"မင်းလို ကောင်လေးက ငါ့ကို စိန်ခေါ်ဖို့ ဘယ်သူက သတ္တိပေးထားတာလဲ”

"အသုံးမကျတဲ့ကောင်... မင်းကို ဒီလောကမှာ ထားခဲ့တာက အစားအသောက် ဖြုန်းတီးရာကျတယ်”

ချင်လော့က သူ၏ ခြေထောက်ကို မြှောက်လိုက်ပြီး လော့ထုံကို အနောက်ဘက်သို့ ပို့ဆောင်ပေးရန် နောက်တစ်ကြိမ် ကန်ထုတ်ရန် ပြင်လိုက်သည်။

ဤအခိုက်အတန့်တွင် လင်းဟောက်က ဝင်ရောက်ပြောဆိုလိုက်၏။

"ဂျူနီယာညီလေး ချင်... ငါ့မျက်နှာကို ထောက်ထားပြီး ခွင့်လွှတ်ပေးလို့ ရမလား”

ချင်လော့၏ မျက်လုံးရှေ့တွင် လင်းဟောက်၏ သတင်းအချက်အလက်များ ပေါ်လာခဲ့သည်။

[ကံကြမ္မာသားတော် ကို ရှာဖွေတွေ့ရှိပါသည်]

[အမည် - လင်းဟောက်]

[အသက် - ၃၅ နှစ်]

[ကံကြမ္မာအဆင့် - တတိယအဆင့်]

[ကံကြမ္မာတန်ဖိုး - ၁၃၀,၀၀၀ မှတ်]

[ခန္ဓာကိုယ် - ကျိုးထျန်း ကြယ်တာရာခန္ဓာ]

[ခန္ဓာကိုယ်အတွင်းရှိ ကြယ်တာရာများ၏ စွမ်းအားကို အသုံးပြု၍ ကျင့်ကြံနိုင်ပြီး သိုင်းပညာများ၏ စွမ်းအားကို ထုတ်လွှတ်နိုင်သည်။ ကျင့်ကြံမှု အထွတ်အထိပ်သို့ ရောက်ရှိချိန်တွင် ကောင်းကင်ရှိ ကြယ်တာရာများကိုပင် ထိန်းချုပ်နိုင်ပြီး အကန့်အသတ်မဲ့နီးပါး စွမ်းအားများကို ရရှိနိုင်သည်။]

[ကျင့်ကြံခြင်းအဆင့် - လိုဏ်ဂူကောင်းကင်အဆင့် ၇ ]

[မိတ်ဆက် - ယခင်က ဇာတ်ပို့တစ်ဦးဖြစ်သော်လည်း ယခုအခါ ဇာတ်လိုက်ဖြစ်လာရန် အလားအလာရှိနေသည်။ ဆက်ခံသူတစ်ဦး ဖြစ်နိုင်ပြီး သေဆုံးသွားသော ကံကြမ္မာသားတော်၏ အမျိုးသမီးကို ရယူနိုင်ရုံသာမက သူ၏ အနာဂတ် အရင်းအမြစ်များကိုပါ ရယူနိုင်သော်လည်း သူ အမှန်တကယ် ကြီးထွားလာနိုင်ပါ့မလား။]

"ဂျူနီယာညီလေး ချင်... မင်း ငါနဲ့ ရင်းနှီးမှာ မဟုတ်လို့ ကိုယ့်ကိုယ်ကိုယ် မိတ်ဆက်ပေးပါရစေ”

လင်းဟောက်က ချင်လော့ကို ကြည့်ကာ ပြုံးလျက် ပြောဆိုလိုက်၏။

"ငါက ချန်းလန်မြင့်မြတ်နယ်မြေရဲ့ လင်းဟောက်ပါ”

"အိုး... ဒါဆို ချန်းလန်မြင့်မြတ်နယ်မြေရဲ့ သူတော်စင်သားတော် လင်းဟောက်ပေါ့... ငါ ဒီတစ်ကြိမ် ဉာဏ်အလင်းပွင့်လက်ဖက်ရည်သောက်ပွဲကို လာနိုင်ခဲ့တာက မင်း ဖိတ်ကြားခဲ့လို့ မဟုတ်လား”

လင်းဟောက်က ခေါင်းညိတ်လိုက်သည်။

"မှန်ပါတယ်... ဒီတစ်ကြိမ် ဉာဏ်အလင်းပွင့်လက်ဖက်ရည်သောက်ပွဲအတွက် ဖိတ်စာကို ငါ ကိုယ်တိုင် ပို့ပေးခဲ့တာပါ”

"ကောင်းပြီလေ”

ချင်လော့က လော့ထုံအပေါ်မှ ခြေထောက်ကို ဖယ်ရှားလိုက်၏။

"မင်း လင်းဟောက်က ငါ့ကို ဒီနေရာသို့ ဖိတ်ကြားခဲ့တယ်ဆိုတော့ ငါ မင်းကို ကျေးဇူးဆပ်ရမှာပေါ့”

"ဒီကောင်လေးရဲ့ အသက်ကို ငါ မလိုချင်တော့ဘူး... ဒါပေမဲ့ သူက ငါ့ကို ပွင့်ပွင့်လင်းလင်း ရန်စရဲတာဆိုတော့ သူ့ကို သေဒဏ်ကနေ ကင်းလွတ်ခွင့် ပေးနိုင်ပေမဲ့ အပြစ်ပေးတာကနေတော့ လွတ်မြောက်နိုင်မှာ မဟုတ်ဘူး”

ချင်လော့ စကားပြောဆိုပြီးသည်နှင့် တစ်ပြိုင်နက် ခြေထောက်ဖြင့် ကန်ထုတ်လိုက်ရာ ဘန်းခနဲ အသံနှင့်အတူ ကြီးမားသော စွမ်းအားတစ်ခုက လော့ထုံ၏ တန်ထျန်းအတွင်းသို့ ဝင်ရောက်သွားပြီး သူ၏ လိုဏ်ဂူကောင်းကင်ကို ကြေမွသွားစေခဲ့သည်။

"အား!”

လော့ထုံက နာကျင်စွာ ဟိန်းဟောက်လိုက်ပြီး ချက်ချင်း သတိလစ်သွားခဲ့၏။

ဤမြင်ကွင်းကို မြင်တွေ့လိုက်ရသူတိုင်း၏ ခန္ဓာကိုယ်များ တုန်လှုပ်သွားကြပြီး အချို့က အလျင်အမြန် ပြေးသွားကာ လော့ထုံ အမှန်တကယ် ပျက်စီးသွားပြီဖြစ်ကြောင်းကို အတည်ပြုလိုက်ကြသည်။

"ဒီကောင်လေးက တကယ် ရက်စက်တာပဲ”

"မာနကြီးလိုက်တာ... တကယ်ကို လွန်ကဲလွန်းတယ်”

"လော့ထုံက မဟာချင်အင်ပါယာကို မျက်နှာလိုမျက်နှာရ လုပ်ချင်နေတာ... ဒါက နည်းနည်း လွန်လွန်းမနေဘူးလား... သရုပ်ဆောင်တာ အရမ်း ပီပြင်လွန်းတယ်”

ဤစကားကို ကြားချိန်၌ လူအများအပြား၏ နှုတ်ခမ်းထောင့်များ တွန့်ကွေးသွားခဲ့ကြ၏။

အမှန်တကယ်ပင် အစွဲအလမ်းများကို ပြောင်းလဲရန် မလွယ်ကူလှချေ။

လင်းဟောက်၏ အမူအရာက ချက်ချင်း မည်းမှောင်သွားပြီး ချင်လော့ကို ကြည့်လိုက်ရာ သူ၏ အကြည့်တွင် ရန်လိုမှုအချို့ ပါဝင်နေခဲ့သည်။

"ဂျူနီယာညီလေး ချင်... မင်း အရမ်းလွန်ကဲနေပြီလို့ မထင်ဘူးလား”

ချင်လော့က လှောင်ပြောင်လိုက်၏။

"မင်း လွန်ကဲတယ်လို့ ထင်လို့လား... မဟုတ်ဘူး... မဟုတ်ဘူး... မဟုတ်ဘူး... တကယ်လို့ ဖိနှိပ်ခံရတဲ့သူက ငါသာဆိုရင် မင်း ကန့်ကွက်မှာ မဟုတ်ဘူးလေ”

"အရည်အချင်း မရှိဘဲနဲ့ အဆင်အခြင်မဲ့ ရန်စနေသေးတယ်ဆိုရင် သူ သေသွားရင်တောင် ခံထိုက်ပါတယ်”

ချင်လော့ ဤသို့ပြောဆိုရင်း သူ၏ အကြည့်များက အခြားသူများထံသို့ ရောက်ရှိသွားသည်။

"အားလုံးပဲ... မင်းတို့ထဲက အများစုက ငါ့ကို မနှစ်မြို့ဘူးဆိုတာ ငါ နားလည်ပါတယ်... ဒါကြောင့် မင်းတို့အားလုံး ငါ့ကို လာစိန်ခေါ်ဖို့ ကြိုဆိုပါတယ်”

"မင်းတို့အားလုံး ခုနက ကောင်လို အသုံးမကျဖြစ်မနေဖို့ ငါ မျှော်လင့်ပါတယ်”

ဤအခိုက်အတန့်တွင် ချင်လော့က အလွန် မာနကြီးလွန်းနေသဖြင့် အားလုံးက ချင်လော့အပေါ် မကျေနပ်မှုများနှင့် ရန်လိုမှုများကို ပြသလာကြပြီး အချို့ဆိုလျှင် ဝင်ရောက်စမ်းသပ်ရန်ပင် စိတ်အားထက်သန်နေကြ၏။

ချင်လော့၏ အကြည့်က ထင်ရှားသော ရုပ်ရည်ရှိသည့် အမျိုးသမီးတစ်ဦးအပေါ်သို့ ကျရောက်သွားသည်။

သူမ၏ အမည်ကို မြင်တွေ့လိုက်ချိန်၌ ချင်လော့၏ နှုတ်ခမ်းထောင့်တွင် အပြုံးလေးတစ်ခု ပေါ်လာခဲ့သည်။

"ဒါဆို သူမက လင်းရွှမ်ရဲ့ ချစ်သူလေးပေါ့”

[ကံကြမ္မာသမီးတော် ကို ရှာဖွေတွေ့ရှိပါသည်]

[အမည် - ရှန်ချင်းယန်]

[အသက် - ၂၈ နှစ်]

[ကံကြမ္မာအဆင့် - စတုတ္ထအဆင့်]

[ကံကြမ္မာတန်ဖိုး - ၄၀၀,၀၀၀ မှတ်]

[ခန္ဓာကိုယ် - ကွမ်းဟန် ဝိညာဉ်ခန္ဓာ]

[လျှို့ဝှက်ဆန်းကြယ်သော လမင်းနန်းတော်၏ အမွေအနှစ်မှ ဆင်းသက်လာသည်ဟု ဆိုကြပြီး လရောင်၏ စွမ်းအားကို အသုံးပြု၍ ကျင့်ကြံခြင်းနှင့် တိုက်ခိုက်ခြင်းများကို ပြုလုပ်နိုင်သည်။ ကျင့်ကြံမှု အထွတ်အထိပ်သို့ ရောက်ရှိချိန်တွင် လမင်းနန်းတော်ကို တာဝန်ယူရန် ကောင်းကင်ဘုံသို့ တက်လှမ်းခြင်း ပြုလုပ်နိုင်သည်။]

[ကျင့်ကြံခြင်းအဆင့် - လိုဏ်ဂူကောင်းကင်အဆင့် ၃ ]

ဤသည်ကို မြင်တွေ့ချိန်၌ ချင်လော့ ချက်ချင်း နားလည်သွားပြီး လင်းဟောက်ကို ကြည့်ကာ ပြောဆိုလိုက်၏။

"ချန်းလန်သူတော်စင်သားတော်... မင်း ငါ့ကို ကျေးဇူးတင်သင့်တယ်လို့ ငါ ထင်တယ်... တကယ်လို့ ငါသာ မင်းရဲ့ အချစ်ပြိုင်ဘက်ကို မသတ်ခဲ့ဘူးဆိုရင်…”

"မင်း ဒီတစ်သက်မှာ သူမအနားကို ချဉ်းကပ်ဖို့ အခွင့်အရေး ရမှာ မဟုတ်ဘူး... သူမရဲ့ သစ္စာရှိ ပရိတ်သတ် တစ်ယောက် ဖြစ်လာဖို့ဆိုတာ ပိုတောင် ဝေးသေးတယ်..."