အခန်း ၃၃၇

အခန်း (၃၃၇ )ကြောက်မက်ဖွယ်ရာ မိစ္ဆာကောင်……

ဝေထျန်းရှုံးက ဂိုဏ်းပြောင်း၍ သစ္စာခံလိုကြောင်း အာဘော်ထုတ်လိုက်သည်ကို ကြားရသောအခါ ဝမ့်ယင်းဂိုဏ်းတပည့်များ၏ အကြည့်များ ပြောင်းလဲသွားပြီး၊ နှာခေါင်းရှုံ့ကာ အထင်သေးရိပ်များ ထွက်ပေါ်လာသလို တစ်ဖက်တွင်လည်း စိတ်အေးသွားသည့် အရိပ်အယောင်များ ယှက်သန်းသွားသည်။

ချီချန်ဖုန်းက မျက်မှောင်ကြုတ်ကာ….

"ဒါ မင်းတို့ ဂိုဏ်းချုပ်ရဲ့ သဘောထားအမှန်လား" ဟု စစ်ဆေးမေးမြန်းလိုက်သည်။

ဝေထျန်းရှုံးက…. “ငါတို့ ချင်းရှောင်ဂိုဏ်းက အသက်ရှည်ခြင်း

ကျင့်စဉ်ကိုပဲ အဓိက လိုက်စားချင်တာ၊ လောကကြီးမှာ အာဏာလုဖို့ စိတ်ကူးမရှိဘူး…အကယ်၍ တစ်စုံတစ်ယောက်က ငါတို့ကို အကာအကွယ်ပေးနိုင်မယ်ဆိုရင် အကောင်းဆုံးပဲပေါ့…မင်းတို့ ငါတို့ဂိုဏ်းအကြောင်းကို စုံစမ်းဖူးတယ်ဆိုရင် သိမှာပါ၊ ငါတို့က လောကီလူသားလောကကို စိုးမိုးချုပ်ကိုင်မထားဘူး၊ အဲဒီလို ရည်မှန်းချက်မျိုး မရှိလို့ပဲ" ဟု ပြန်လည်ဖြေကြားခဲ့သည်။

ချီချန်ဖုန်း ဤအချက်ကို အမှန်တကယ်ပင် စုံစမ်းသိရှိထားပြီး ဖြစ်သည်။ ဝမ့်ယင်းဂိုဏ်း၏ လက်အောက်တွင်လည်း လူသားမင်းဆက်အင်ပါယာများ ရှိကြပြီး၊ ၎င်းတို့အပေါ် ချုပ်ကိုင်မှုမှာ အလွန်အမင်း တင်းကျပ်လှပေသည်။ နန်းတော်ဆိုသည်မှာ သူတို့ အလိုရှိသလို ဝင်ထွက်သွားလာနိုင်သော နေရာဖြစ်ပြီး၊ မင်းစိုးရာဇာများနှင့် အထက်တန်းလွှာများမှာ သူတို့၏ ခြေဖဝါးအောက်က အစေခံခွေးများမျှသာ ဖြစ်၏။

သို့သော် ချင်းရှောင်ဂိုဏ်းကတော့ ကွဲပြားသည်။ ရွှမ်မင်းဆက်၏ ဧကရာဇ်ကို ချင်းရှောင်ဂိုဏ်းက နန်းတင်ပေးခဲ့ခြင်းဖြစ်သော်လည်း၊ နန်းတွင်းရေးရာကိစ္စရပ်များတွင် ဝင်ရောက်စွက်ဖက်ခြင်းမရှိဘဲ မင်းဆက်ကို လွတ်လပ်ခွင့် အမြောက်အမြား ပေးထားသည်။ ထို့ပြင် ချီချန်ဖုန်း၏ လူများ စုံစမ်းချက်အရ ချင်းရှောင်ဂိုဏ်းက မိမိတို့နယ်မြေအတွင်း၌ အခြားသော ဂိုဏ်းငယ်လေးများ ထွက်ပေါ်လာခြင်းကိုပင် ခွင့်ပြုထားသေးရာ ၎င်းမှာ သူတို့အမြင်အရ သေတွင်းရှာနေခြင်းသာ ဖြစ်ပေသည်။

သူတို့အမြင်တွင် ချင်းရှောင်ဂိုဏ်းမှာ အားနည်းချက်များဖြင့် ပြည့်နှက်နေပြီး၊ ဂိုဏ်းချုပ်ဖြစ်သူမှာလည်း အမြော်အမြင်မရှိဘဲ အန္တရာယ်အသိ ကင်းမဲ့နေသော ညံ့ဖျင်းသည့် အုပ်ချုပ်သူတစ်ဦးမျှသာ ဖြစ်သည်။

ယခု ဝေထျန်းရှုံး၏ စကားကို ကြားလိုက်ရသည့်အခါမှသာ အခြေအနေမှန်ကို သဘောပေါက်သွားတော့သည်။

'ဒါဆို လီချင်းချိုးဆိုတာ ကမ္ဘာကြီးကို စိုးမိုးမယ့် ဧကရာဇ်တစ်ပါး မဟုတ်ဘဲ၊ ကျင့်ကြံခြင်းကိုပဲ ရူးသွပ်နေတဲ့ သာမန်လူတစ်ယောက်ပေါ့လေ'

ချီချန်ဖုန်း၏ မျက်နှာအမူအရာ အနည်းငယ် ပျော့ပြောင်းသွားပြီး….

"မင်းတို့ကို အဖွဲ့ဝင်အဖြစ် သစ္စာခံခွင့်ပေးဖို့ဆိုတာ မဖြစ်နိုင်တာတော့ မဟုတ်ဘူး၊ ဒါပေမဲ့ ဝမ့်ယင်းဂိုဏ်းအနေနဲ့ မင်းတို့ဂိုဏ်းအပေါ် အတိုင်းအတာတစ်ခုအထိ အချုပ်အာဏာ သက်ရောက်ခွင့် ရှိရမယ်" ဟု ဆိုလိုက်သည်။

ဘေးတွင်ရှိနေသော ယွမ်လီ၊ ချူကျင်း၊ ကုချန်းဖိန်နှင့် အခြားသူများမှာ စိုးစဉ်းမျှ တုန်လှုပ်ခြင်း မရှိကြပေ။

အဘယ်ကြောင့်ဆိုသော် ဝေထျန်းရှုံးက ဝမ့်ယင်းဂိုဏ်း၏ နောက်ကြောင်းကို စကားနာထိုး စုံစမ်းနေခြင်းသာဖြစ်ကြောင်း သူတို့ နားလည်ထားကြသည်။

"မဟုတ်သေးဘူး... မင်း နားလည်မှုလွဲနေပြီ…ငါတို့က အဲဒီအဆင့်အထိ မရောက်သေးဘူး… ငါတို့ ချင်းရှောင်ဂိုဏ်းဘက်က မင်းတို့ ဝမ့်ယင်းဂိုဏ်းရဲ့ စစ်မှန်တဲ့ စွမ်းပကားကို အရင်ဆုံး သိမြင်ဖို့ လိုအပ်ဦးမယ်"

"မင်းတို့က ဘယ်လိုမျိုး စမ်းသပ်ချင်တာလဲ"

ဝေထျန်းရှုံးက တဖက်လူ၏ မျက်ဝန်းများကို စိုက်ကြည့်၍ "ငါ အမှန်တရားကိုပဲ ကြားချင်တယ်" ဟု ဆိုလိုက်တော့ ချီချန်ဖုန်းက နှာခေါင်းရှုံ့ကာ….

"ဝမ့်ယင်းဂိုဏ်းရဲ့ စွမ်းပကားက အတိုင်းအဆမဲ့ ကြီးမားတယ်…. ဂိုဏ်းသားတစ်ယောက်အနေနဲ့ တိတိကျကျ မပြောနိုင်ပေမယ့်၊ အရှေ့ဘက်ကို စစ်ချီဖို့ ဝိညာဉ်အသိအာရုံအဆင့်ရှိတဲ့ တပည့်ပေါင်း တစ်ထောင်ကို လွယ်လွယ်ကူကူ စေလွှတ်နိုင်တယ်ဆိုတာနဲ့၊ အဲဒီအထက် နယ်ပယ်တွေက ကျွမ်းကျင်သူကြီးတွေလည်း အများကြီး ရှိနေတယ်ဆိုတာကိုတော့ ငါ အာမခံရဲတယ်" ဟု ကြုံးဝါးလိုက်သည်။

ဝေထျန်းရှုံးက…

"ဒါဆိုရင်လည်း ဒီလိုလုပ်ကြတာပေါ့... မင်းတို့ထဲက တစ်ယောက်ကို ရွေးထုတ်ပြီး ငါတို့ဂိုဏ်းက တပည့်တစ်ယောက်နဲ့ တစ်ယောက်ချင်းချင်း လက်ရည်စမ်းခိုင်းကြည့်ရအောင်၊ မင်းတို့ နိုင်မလားဆိုတာ ကြည့်ရသေးတာပေါ့" ဟု စိန်ခေါ်လိုက်သည်။

ဤစကားကြောင့် ချီချန်ဖုန်း၏ မျက်မှောင်များ ပိုမို တွန့်ချိုးသွားပြီး၊ ချင်းရှောင်ဂိုဏ်းဘက်က ကျင့်ကြံသူများကမူ ပြုံးစိစိဖြင့် လှောင်ပြောင်သောအမူအရာများကို ဖော်ပြလိုက်ကြသည်။

ဝမ့်ယင်းဂိုဏ်းသားများက ၎င်းမှာ ချင်းရှောင်ဂိုဏ်းက မိမိတို့ကို တိုက်ရိုက် ရန်စစိန်ခေါ်နေခြင်းဖြစ်သည်ဟု ယူဆကာ ဒေါသထွက်သွားကြလေသည်။

ချီချန်ဖုန်းက….

"ကောင်းပြီလေ... ဒါဆိုရင်လည်း အဆင့်တူချင်းပဲ လက်ရည်စမ်းကြတာပေါ့၊ မင်းတို့ဘက်က ဘယ်သူ့ကို လွှတ်မှာလဲ" ဟု ဆိုလိုက်သည်။

ဝေထျန်းရှုံး စကားမဆိုရသေးမီမှာပင် ယွမ်လီ နေရာမှ မတ်တတ်ထရပ်လိုက်သည်။

ချီချန်ဖုန်းတို့က ယွမ်လီကို ဂရုတစိုက် အကဲခတ်ကြည့်လိုက်ကြသည်။ သူတို့ ကြားသိထားရသည့် သတင်းများအရ ချင်းရှောင်ဂိုဏ်းအတွင်း၌ တစ်ကိုယ်တော် စွမ်းပကားဖြင့် လူအများအပြားကို တစ်ပြိုင်နက်တည်း ရင်ဆိုင်နိုင်ပြီး၊ ဝမ့်ယင်းဂိုဏ်းသား အများအပြားကို အပြင်းအထန် ဒဏ်ရာရအောင် ပြုလုပ်ခဲ့သည့် 'ကြောက်မက်ဖွယ်ရာ မိစ္ဆာကောင်' ကဲ့သို့သော ကျင့်ကြံသူတစ်ဦး ရှိနေသည်ဟု သိထားကြသည်။

သို့သော် လက်ရှိ ရှေ့မှောက်တွင် မြင်တွေ့နေရသော ယွမ်လီကတော့ အလွန်တည်ငြိမ်နေပြီး မည်သည့် အရှိန်အဝါမျိုးမျှ ထွက်ပေါ်နေခြင်း မရှိသဖြင့်၊ ထိုကြောက်မက်ဖွယ်ကောင်းသော ကျွမ်းကျင်သူနှင့် ဘယ်လိုမှ တစ်ဦးတည်း ဖြစ်လိမ့်မည်ဟု သူတို့ မချိတ်ဆက်နိုင်ကြပေ။

သို့သော်လည်း ချီချန်ဖုန်းက ပေါ့ဆတတ်သူ မဟုတ်သဖြင့် မတော်တဆမှုများ မဖြစ်ပွားစေရန်အတွက် သူကိုယ်တိုင် တိုက်ပွဲဝင်ရန် ဆုံးဖြတ်လိုက်သည်။

ထို့ကြောင့် ချီချန်ဖုန်း မတ်တတ်ရပ်လိုက်ပြီး နန်းဆောင်အပြင်ဘက် ခြံဝင်းဆီသို့ လက်ညှိုးထိုးပြလိုက်တော့ ယွမ်လီက ခေါင်းညိတ်ပြလိုက်ပြီးနောက် နှစ်ဦးစလုံး တံခါးအပြင်ဘက်သို့ လျှောက်လှမ်းသွားခဲ့ကြရာ အခြားသူများကလည်း နောက်ကနေ လိုက်ပါလာခဲ့ကြတော့သည်။

ဝမ့်ယင်းဂိုဏ်းဖြစ်စေ၊ ချင်းရှောင်ဂိုဏ်းဖြစ်စေ မိမိတို့ဘက်က ကိုယ်စားလှယ်များအပေါ် အပြည့်အဝ ယုံကြည်မှု ရှိနေကြသဖြင့် အခြားတစ်ဖက်က အရှက်ရတော့မည်ဟု အသီးသီး တွေးတောနေကြသည်။

ခြံဝင်းအတွင်းသို့ ရောက်ရှိလာသောအခါ ချီချန်ဖုန်းက သိုလှောင်အိတ်ထဲမှ ဓားတစ်လက်ကို ဆွဲထုတ်လိုက်ပြီး ယွမ်လီကို စိုက်ကြည့်ကာ…

"မင်းရဲ့ စွမ်းအားအားလုံးကို ထုတ်သုံးလိုက်ပါ..ငါ မင်းကို မသတ်ပါဘူး၊ အလွန်ဆုံး ဒုက္ခိတဖြစ်အောင်ပဲ လုပ်မှာပါ" ဟု ကဲ့ရဲ့လိုက်သည်။

မည်သို့ပင်ဆိုစေ သူတို့သည် မိစ္ဆာလမ်းစဉ်ကျင့်ကြံသူများဖြစ်သည့် ဝမ့်ယင်းဂိုဏ်းမှ လာခဲ့သူဖြစ်သဖြင့် အရိုးထဲ၌ သွေးဆာမှုနှင့် ရက်စက်ကြမ်းကြုတ်မှုများ ကိန်းအောင်းနေခြင်း ဖြစ်ပေသည်။

ထိုသူ၏မောက်မာမှုကို ရင်ဆိုင်ရင်း ယွမ်လီက အသာအယာ ခေါင်းညိတ်ပြလိုက်ပြီးနောက် သူ့ထံသို့ ဒီအတိုင်း ရိုးရိုးရှင်းရှင်း လျှောက်လှမ်းသွားခဲ့သည်။

ယွမ်လီက မည်သည့် ကာကွယ်ရေး အနေအထားမျိုးမျှ မပြင်ဆင်ဘဲ မိမိထံသို့ တိုက်ရိုက် လျှောက်လှမ်းလာသည်ကို မြင်ရသောအခါ ချီချန်ဖုန်း၏ မျက်ဝန်းထဲတွင် မကျေမနပ်ရိပ်များ ဖြတ်သန်းသွားပြီး အထင်သေးစော်ကားခံလိုက်ရသည်ဟု ယူဆလိုက်မိသည်။

ထို့ထို့ကြောင့် ချက်ချင်းပင် ဓားကို မြှောက်လိုက်ပြီး ဘယ်ဘက်လက်ညှိုးနှင့် လက်ခလယ်ဖြင့် ဓားသွားပေါ်သို့ အသာအယာ ပွတ်ဆွဲလိုက်တော့သည်။ ချက်ချင်းဆိုသလိုပင် ဓားဖျားမှ ဓားချီများ ဖြာထွက်လာပြီး သူ့ ပတ်ပတ်လည်တွင် မိုးပြာရောင် ဓားရိပ် ကိုးခု ပေါ်ထွက်လာကာ ယွမ်လီထံသို့ တိုက်ရိုက် အရှိန်ပြင်းစွာ ချိန်ရွယ်လိုက်လေသည်။

ထိုစဉ်၌ ယွမ်လီ၏ ပုံရိပ်မှာ ဝုန်းခနဲ လှုပ်ရှားသွားပြီး၊ မျက်စိတစ်မှိတ်အတွင်းမှာပင် ချီချန်ဖုန်း၏ ရှေ့တည့်တည့်သို့ ရောက်ရှိသွားခဲ့သဖြင့်

ချီချန်ဖုန်း၏ မျက်စိသူငယ်အိမ်များ ဆတ်ခနဲ ကျုံ့ဝင်သွားခဲ့သည်။

အမြင်အာရုံတွင် ဧရာမ လက်သီးတစ်ချက် တဟုန်ထိုး ကြီးမားလာသည်ကို မြင်တွေ့လိုက်ရသော်လည်း ရှောင်တိမ်းရန် အချိန် လုံးဝ မရှိတော့ပေ။

ခွပ်…

ယွမ်လီက လက်သီးဖြင့် ချီချန်ဖုန်း၏ ရင်ဘတ်တည့်တည့်သို့ ပြင်းထန်စွာ ထိုးနှက်လိုက်ရာ၊ ချီချန်ဖုန်းခင်မျာ အမြောက်ဆန်တစ်ခုကဲ့သို့ အနောက်ဘက်သို့ လွင့်ပျံသွားခဲ့ပြီး နံရံများကို တစ်ခုပြီးတစ်ခု ဖြိုခွဲလျက် အဝေးဆီသို့ လွင့်စင်သွားခဲ့တော့သည်။

သူ သေသလား ရှင်သလားကိုပင် မည်သူမျှ မသိနိုင်တော့ပေ။

ဝမ့်ယင်းဂိုဏ်း တပည့်များ အကြီးအကျယ် ထိတ်လန့်တုန်လှုပ်သွားကြပြီး၊ ပျာယာခတ်လျက် မိမိတို့၏ မှော်ပစ္စည်းများကို ချက်ချင်း ဆွဲထုတ်လိုက်ကြတော့သည်။ ၎င်းကို မြင်တွေ့လိုက်ရသော ချင်းရှောင်ဂိုဏ်းသားများကလည်း စစ်ပွဲအတွက် အသင့်ပြင်ဆင်လိုက်ကြသည်။

ယွမ်လီကမူ လက်သီးထိုးနှက်ထားသော အနေအထားအတိုင်းပင် တည်ငြိမ်စွာ ရပ်နေဆဲဖြစ်ပြီး မျက်နှာတွင် မည်သည့် အမူအရာမျှ မရှိပေ။ အနိုင်ရခြင်းကြောင့် စိတ်လှုပ်ရှားခြင်းမရှိဘဲ ကြည့်ရသည်မှာ ပိုးမွှားတစ်ကောင်ကို အသာအယာ ဖယ်ရှားလိုက်ရသကဲ့သို့ပင်။

ဝေထျန်းရှုံးက ယွမ်လီကို ကြည့်ကာ ကျေနပ်စွာဖြင့် ခေါင်းညိတ်လိုက်မိသည်။

'ဒီကောင်လေး ပိုပြီးတော့တောင် အစွမ်းထက်လာပါလား... ကြည့်ရတာ သူ နေ့စဉ်နေ့တိုင်း ကျင့်ကြံခြင်းကို ပေါ့ဆမထားခဲ့ဘူးပဲ' ဟု စိတ်ထဲမှ ကျိတ်၍ ချီးမွမ်းလိုက်သည်။

ယွမ်လီသည် ကိုယ်တွင်းစွမ်းအားကို ထိန်းချုပ်ရာတွင် ယခင်ထက် များစွာ ပိုမိုအဆင့်မြင့်လာခဲ့ပြီဖြစ်ကြောင်း သူ အကဲခတ်မိလိုက်သည်။ ဤသည်မှာ အလွန် ကောင်းမွန်သောအချက် ဖြစ်၏။

ချူကျင်းက ဝေထျန်းရှုံး၏ ဘေးသို့ လျှောက်လာပြီး စိတ်ချင်းဆက်သွယ်မှုအစွမ်းဖြင့် လှမ်း၍ မေးမြန်းလိုက်သည်။

"မင်း ဒီအတိုင်းပဲ ဆက်ပြီး အချိန်ဆွဲထားဖို့ ကြံနေတာလား"

ဤကဲ့သို့သော တစ်ယောက်ချင်း ပြိုင်ပွဲမျိုးက ဂိုဏ်းနှစ်ခုအကြား အလုံးစုံစစ်ပွဲကြီး ဖြစ်ပွားလာအောင် တွန်းပို့နိုင်မည်မဟုတ်ပေ။ အထူးသဖြင့် ချင်းရှောင်ဂိုဏ်းဘက်က သစ္စာခံလိုသော အရိပ်အယောင် ပြသထားသော်လည်း၊ ဝမ့်ယင်းဂိုဏ်းဘက်ကမူ ဤမျှအထိ သိက္ခာကျသွားခဲ့ရသဖြင့် ဤအတိုင်း အလွယ်တကူ လက်လွှတ်လိမ့်မည် မဟုတ်ပေ။

ဝေထျန်းရှုံးကလည်း စိတ်ချင်းဆက်သွယ်မှုဖြင့်ပင် ပြန်လည်ဖြေကြားခဲ့သည်။

"နောက်ကျရင် ဝမ့်ယင်းဂိုဏ်းသားတွေ ယွမ်လီရဲ့လက်ထဲမှာ ထပ်ပြီး ဒုက္ခရောက်ကြရဦးမှာပဲ… မင်းနဲ့ငါကတော့ တခြားသော အရေးကြီးတဲ့ အလုပ်တစ်ခုကို သွားပြီး လုပ်ကြရအောင်..."

ထိုအခါ ချူကျင်း၏ မျက်ဝန်းများ လက်ခနဲ ဖြစ်သွားပြီး သူ့အကြည့်က ကျန်ရှိနေသော ဝမ့်ယင်းဂိုဏ်း တပည့်တစ်သိုက်ထံသို့ ကျရောက်သွားခဲ့တော့သည်။

ဝမ့်ယင်းဂိုဏ်းမှ ချီချန်ဖုန်းကို ယွမ်လီက လက်သီးတစ်ချက်တည်းဖြင့် အလဲထိုးပစ်လိုက်သည်ဟူသော သတင်းမှာ အနောက်ဘက်အန္တရာယ်နယ်မြေ မသေမျိုးမြို့တော်တစ်ခုလုံးသို့ လျင်မြန်စွာ ပျံ့နှံ့သွားခဲ့ပြီး၊ မကြာမီအချိန်အတွင်းမှာပင် ချင်းရှောင်ဂိုဏ်း၏ ပင်မတောင်တန်းကြီးဆီသို့ပါ ရောက်ရှိသွားခဲ့သည်။ ဤသတင်းက ဂိုဏ်းတစ်ခုလုံးရှိ တပည့်များ၏ စိတ်ဓာတ်ကို အကြီးအကျယ် တက်ကြွစေခဲ့ပြီး၊ တပည့်များစွာကလည်း ယွမ်လီကို လေးစားအားကျနေကြသည်။

လီချင်းချိုက ဤသတင်းကို ဂိုဏ်းအတွင်း ဖြန့်ဝေခွင့်ပြုထားခဲ့သော်လည်း၊ ဂိုဏ်းတစ်ခုလုံးကို စစ်ပွဲအတွက်ပြင်ဆင်မှု အရေးပေါ်အနေအထားသို့ရောက်အောင် အတင်းအကျပ် တွန်းမပို့ခဲ့ပေ။

တပည့်များက ဂိုဏ်း၏ အရေးကြီးသော ဖြစ်ရပ်များကို စိတ်ဝင်တစား စောင့်ကြည့်နေကြသော်လည်း၊ သူတို့၏ အဓိက အာရုံစိုက်မှုမှာ ကိုယ်ပိုင် ကျင့်ကြံမှု တိုးတက်ရေးပေါ်တွင်သာ ရှိနေကြဆဲပင်။ ပိုမိုများပြားသော ကျင့်ကြံခြင်းအရင်းမြစ်များကို ရယူနိုင်ရန်အတွက် ကျင့်ကြံရေးခန်းမသည် တပည့်အားလုံး မလွဲမသွေ သွားရောက်ရမည့် နေရာတစ်ခု ဖြစ်လာခဲ့သည်။

အချိန်ကာလသည် အရပ်မျက်နှာအနှံ့ ပူပြင်းအိုက်စပ်လှသော အပူရှိန်များ တဖြည်းဖြည်း လျော့ပါးသက်သာလာသည့် အောက်တိုဘာလသို့ ရောက်ရှိလာခဲ့ပြီ ဖြစ်သည်။

တောင်ပိုင်းချူပြည်နယ်တွင်……

သစ်တောကြီးတစ်ခုအတွင်း၌ ချင်းရှောင်ဂိုဏ်းမှ တပည့် ခုနစ်ဦး ဓားများကို ကိုင်ဆောင်ကာ အသည်းအသန် ပြေးလွှားနေကြသည်။ ထိုသူများထဲတွင် ဟူယန် အထူးသဘောကျနေသော တပည့်မလေး တွမ့်ရှောင်ကျွမ်းလည်း ပါဝင်နေသည်။

လက်ရှိအချိန်တွင် သူတို့သည် ဧရာမ မိစ္ဆာကျားသစ် တစ်ကောင်ကို လိုက်လံနှိမ်နင်းနေကြခြင်း ဖြစ်သည်။ ဤမိစ္ဆာကျားသစ်သည် လူသားရွာပေါင်းများစွာကို သွေးချောင်းစီးအောင် သတ်ဖြတ်စားသောက်ခဲ့သဖြင့် လောကီအစိုးရအဖွဲ့မှ မည်သို့မျှ မတတ်နိုင်တော့ဘဲ ချင်းရှောင်ဂိုဏ်းထံသို့ အကူအညီ တောင်းခံလာခဲ့ခြင်း ဖြစ်သည်။

တွမ့်ရှောင်ကျွမ်းသည် ယခင်ကလည်း ဤကဲ့သို့သော တာဝန်များကို အကြိမ်ကြိမ် ဆောင်ရွက်ဖူးသဖြင့်၊ ဤကဲ့သို့သော တာဝန်မျိုးမှာ သူမအတွက် အလွန်အမင်း အန္တရာယ်ရှိသည်ဟု မယူဆတော့ပေ။ လက်ရှိတွင် သူမ၌ အနည်းဆုံး မူလအားဖြည့်နယ်ပယ်ဆဋ္ဌမအဆင့် ကျင့်ကြံမှု ရှိနေပြီဖြစ်ပြီး၊ သူတို့ကို ဦးဆောင်လာသော စီနီယာအစ်ကိုကြီးကလည်း မူလအားဖြည့်နယ်ပယ်အဋ္ဌမအဆင့်သို့ ရောက်ရှိနေသူ ဖြစ်သည်။

ရှေ့ဆုံးမှ ဦးဆောင်ပြေးနေသော အမျိုးသားတပည့်က ရှေ့မှောက်၌ မိစ္ဆာကျားသစ်၏ ပုံရိပ်ကို လှမ်း၍မြင်တွေ့လိုက်ရသည်။ ၎င်းမှာ တစ်ကိုယ်လုံး သွေးညှီနံ့များ လှိုင်နေပြီး ကျားတစ်ကောင်မျှ ကြီးမားလှသော ကျားသစ်ကြီး ဖြစ်သည်။

ထိုအမျိုးသားတပည့်က ကျားသစ်ကို လက်ထဲရှိ ချင်းရှောင်ဓားဖြင့် လှမ်းပစ်ပေါက်လိုက်တော့….

ရွှီး…….

ချင်းရှောင်ဓားက အေးစက်လှသော အလင်းတန်းတစ်ခုအဖြစ် ပြောင်းလဲသွားပြီး၊ သစ်တောကြီးကို ဖြတ်သန်းကာ ကိုက်ပေါင်းမြောက်မြားစွာ အကွာအဝေးသို့ တဟုန်ထိုး ပြေးဝင်သွားပြီး မိစ္ဆာကျားသစ်၏ ခန္ဓာကိုယ်ကို တည့်တည့် ထိုးစိုက်သွားသည်။

မိစ္ဆာကျားသစ်လည်း စူးရှစွာ အော်ဟစ်လိုက်ပြီးနောက် လဲပြိုသွားခဲ့ပြီး ဧရာမ သစ်ပင်ကြီးတစ်ပင်ကို သွားရောက်ရိုက်ခတ်မိသွားခဲ့သည်။ ၎င်းသည် ခေါင်းကို ဝှေ့ယမ်းကာ မတ်တတ်ရပ်ရန် ကြိုးစားလိုက်သော်လည်း၊ ခန္ဓာကိုယ်တစ်ခုလုံး ပျော့ခွေသွားပြီး ရွှံ့နွံပမာ မြေပြင်ပေါ်သို့ လဲကျသွားကာ ဦးခေါင်းနှင့် မြေပြင် ထိကပ်သွားလေသည်။

ချင်းရှောင်ဂိုဏ်း တပည့် ခုနစ်ဦးစလုံး ချက်ချင်းပင် အနီးသို့ ပြေးဝင်လာကြပြီး ၎င်းကို ဝန်းရံလိုက်ကြသည်။ တပည့်တစ်ဦးက မန္တန်အဆောင်တစ်ခုကို လှမ်း၍ပစ်လိုက်ရာ ၎င်းမှာ မိစ္ဆာကျားသစ်၏ ခန္ဓာကိုယ်ပေါ်သို့ သွားရောက်ကပ်မိသွားပြီး ၎င်း၏ သွေးသားချီစွမ်းအင်နှင့် မိစ္ဆာစွမ်းအားအားလုံးကို အလုံးစုံ ချိတ်ပိတ်ပစ်လိုက်တော့သည်။

တွမ့်ရှောင်ကျွမ်းက မိစ္ဆာကျားသစ်ထံမှ မည်သည့် အရှိန်အဝါမျိုးမျှ ထွက်ပေါ်မလာတော့သည်ကို ခံစားမိလိုက်သဖြင့် သေဆုံးသွားခဲ့ပြီဟု ယူဆကာ မျက်နှာတွင် အပြုံးတစ်ခု ထွက်ပေါ်လာခဲ့သည်။

' တာအိုကံကြမ္မာအမှတ် ၅၀ ရရှိခဲ့ပြီပဲ!'

လူအများအပြား ခွဲဝေယူကြရသဖြင့် ရရှိသည့်ပမာဏမှာ မများပြားလှသော်လည်း၊ ဘေးကင်းလုံခြုံမှုအတွက်မူ ဤသည်မှာ အလွန်တန်ဖိုးရှိလှပေသည်။ ဤသည်မှာ ဟူယန်က သူမကို တောင်အောက်ဆင်းသည့်အခါ အလွန်အမင်း စွန့်စားရသည့် အလုပ်များကို မလုပ်ရန် အစဉ်တစိုက် မှာကြားထားခဲ့ခြင်းကြောင့် ဖြစ်၏။

သူတို့နှစ်ဦး၏ ချစ်သူသက်တမ်းကို တရားဝင် မသတ်မှတ်ရသေးသော်လည်း၊ တစ်ဦးအပေါ်တစ်ဦး ထားရှိသော စိတ်ခံစားချက်များကို အပြန်အလှန် သိရှိနားလည်ထားကြသည်။

တွမ့်ရှောင်ကျွမ်းက ဂိုဏ်းသို့ ပြန်ရောက်လျှင် ဟူယန်နှင့် မည်သည့်အကြောင်းအရာများကို ပြောဆိုရမလဲဟူ၍ စိတ်ကူးယဉ် တွေးတောနေမိတော့သည်။

ဦးဆောင်လာသော စီနီယာအစ်ကိုကြီးက ရှေ့သို့ လှမ်းတက်လိုက်ပြီး မိစ္ဆာကျားသစ်ကို လက်ဖြင့် စမ်းသပ်ကြည့်ကာ …"ဒီသားရဲ သေသွားပြီ.. တာဝန် ပြီးဆုံးသွားခဲ့ပြီ" ဟု ကြေညာလိုက်သည်။

ထိုစကားကို ကြားရသောအခါ ကျန်ရှိနေသော ခြောက်ဦးစလုံး ပြုံးရွှင်သွားကြပြီး အချင်းချင်း ပျော်ရွှင်စွာ စကားစမြည် ပြောဆိုကြလေသည်။

တွမ့်ရှောင်ကျွမ်းသည် အကျင့်စရိုက် ကောင်းမွန်သူဖြစ်ပြီး လူတိုင်းနှင့် တည့်အောင် ပေါင်းသင်းတတ်သူဖြစ်ရာ စကားအပြောဆုံးသူမှာ သူမပင် ဖြစ်နေသည်။

ထိုစဉ်၌ အေးစက်လှသော လေပြင်းတသုတ် ရုတ်တရက် တိုက်ခတ်လာခဲ့ပြီး

မိစ္ဆာကျားသစ်ကို ကိုင်တွယ်နေသော စီနီယာအစ်ကိုကြီး၏ မျက်နှာအမူအရာ အနည်းငယ် ပြောင်းလဲသွားပြီး ချက်ချင်းပင် မတ်တတ်ရပ်ကာ… "သတိထားကြ... အန္တရာယ်ရှိတယ်!" ဟု အော်ဟစ်သတိပေးလိုက်သည်။

စကားအဆုံးမှာပင် ပုံရိပ်တစ်ခုက လေပြင်းမုန်တိုင်းတစ်ခုကဲ့သို့ တစ်ဟုန်ထိုး ပြေးဝင်လာပြီး တပည့်များ၏ အနီးမှ ဖြတ်သန်းသွားခဲ့သည်။

တွမ့်ရှောင်ကျွမ်းသည် မိမိ၏ခန္ဓာကိုယ်ကို တစ်စုံတစ်ယောက်က လက်ဖြင့် အသာအယာ တို့ထိလိုက်သည်ဟုသာ ခံစားလိုက်ရပြီး၊ ချက်ချင်းဆိုသလိုပင် တစ်ကိုယ်လုံး လှုပ်ရှား၍မရတော့ဘဲ ကျောက်ရုပ်ပမာ တောင့်တင်းသွားလေသည်။

ကျင့်ကြံမှုအမြင့်ဆုံးဖြစ်သော စီနီယာအစ်ကိုကြီးက အလိုလို ဓားကို မြှောက်ရန် ကြိုးစားလိုက်သော်လည်း၊ အခြားတစ်လူ၏ လက်ညှိုးနှင့် လက်ခလယ်က သူ့ထက် များစွာ ပိုမိုမြန်ဆန်လှပြီး၊ သူ့ လည်ချောင်းတည့်တည့်သို့ တိုက်ရိုက် ထိုးနှက်လိုက်ရာ လည်ပင်းကို တစ်ခါတည်း ဖောက်ထွင်းသွားခဲ့သဖြင့် လည်ပင်းအနောက်ဘက်မှ သွေးများ ပန်းထွက်သွားခဲ့လေသည်။

ထိုအမျိုးသားတပည့်မှာ မျက်လုံးများ ပြူးကျယ်သွားပြီး မျက်နှာတွင် မယုံကြည်နိုင်လောက်သော အမူအရာများ ဖြစ်ပေါ်နေသည်။ သူ အရှေ့မှောက်တွင် မတ်တတ်ရပ်နေသူမှာ ဆံပင် ဖားလျားချထားပြီး ဝတ်စုံနက် ဝတ်ဆင်ထားသော အမျိုးသားတစ်ဦး ဖြစ်သည်။ ထိုသူ၏ မျက်နှာပေါ်တွင် မည်းနက်နေသော မှော်စာလုံး (Runes) များဖြင့် ပြည့်နှက်နေပြီး ကြည့်ရသည်မှာ အလွန်ပင် ရက်စက်ကြမ်းကြုတ်၍ ယုတ်မာပတ်စက်လှသော သွင်ပြင်မျိုးပင်။

ဘုန်း…

ထိုအမျိုးသားတပည့် မြေပြင်ပေါ်သို့ လဲကျ သေဆုံးသွားသည့်မြင်ကွင်းက တွမ့်ရှောင်ကျွမ်းနှင့် ကျန်ရှိသူလေးဦးကို အတိုင်းအဆမဲ့ ထိတ်လန့်တုန်လှုပ်သွားစေခဲ့သော်လည်း၊ သူတို့မှာ စကားပင် မပြောနိုင်ကြတော့ဘဲ မျက်လုံးများ ပြူးကျယ်လျက် မျက်နှာတစ်ခုလုံး ဖြူလျော်သွားကြသည်။

တစ်ဖက်တွင်မူ...

လင်းရှောင်ခြံဝင်းအတွင်း၌ လီချင်းချိုးက လီကျန်းရှို့ကို ကျင့်ကြံခြင်းဆိုင်ရာ ကိစ္စရပ်များကို လမ်းညွှန်ပြသပေးနေသည်။

လွန်ခဲ့သည့်လက လီရှို့မင် ပထမဆုံးအနေဖြင့် ဝိညာဉ်အသိအာရုံအဆင့် ပထမအဆင့်သို့ အောင်မြင်စွာ တက်လှမ်းနိုင်ခဲ့သည်။ ထိုကလေးမှာ ဘယ်လိုမှ ငြိမ်ငြိမ်မနေတတ်သူဖြစ်ရာ တာဝန်ခန်းမဆောင်ထံမှ တာဝန်တစ်ခုကို ရယူကာ တောင်အောက်သို့ တစ်ဦးတည်း ဆင်းသွားခဲ့ပြီး သိုင်းလောကအတွင်း လှည့်လည်သွားလာနေခဲ့ပြီ ဖြစ်သည်။

လီရှို့ကျန်းကမူ ဝိညာဉ်အသိအာရုံအဆင့်သို့ မတက်လှမ်းနိုင်သေးသော်လည်း တောင်အောက်ဆင်းရန် အလောမကြီး ခဲ့ပေ။လီကျန်းရှို့၏ စိတ်နေစိတ်ထားက လွန်စွာ တည်ငြိမ်လှသည်။ သူသည် လီချင်းချိုးထံသို့ လာရောက်ကာ ဟွမ်ယွမ်ကျမ်းစနှင့် ပတ်သက်၍ အကြံဉာဏ်များ တောင်းခံနေခြင်း ဖြစ်သည်။

ထိုစဉ်၌ ဂိုဏ်းသားတစ်ဦး ခြံဝင်းထဲသို့ အပြင်း ဝင်ရောက်လာပြီး လီချင်းချိုး၏ ဘေးသို့ လျှောက်လာကာ ဂါရဝပြုလိုက်သည်။ သူသည် ချက်ချင်း စကားမဆိုဘဲ လီရှို့ကျန်းကို ကြည့်ကာ အနည်းငယ် တွန့်ဆုတ်နေပုံရသည်။

"ဒီအတိုင်း တိုက်ရိုက်ပြောပါ" ဟု လီချင်းချိုးက အမိန့်ပေးလိုက်သည်။

သူသည် လီရှို့ကျန်းကို မိမိကိုယ်ပိုင်ကလေးကဲ့သို့ သဘောထားပြီး တပည့်တစ်ဦးအနေဖြင့် အပြည့်အဝ ပျိုးထောင်ပေးနေခြင်း ဖြစ်သည်။ မကြာသေးမီကပင် သူ့စိတ်ထဲ၌ စိတ်ကူးတစ်ခု ထွက်ပေါ်လာခဲ့သည်၊ ၎င်းမှာ လီရှို့ကျန်း၏ ပါရမီကို ဂိုဏ်း၏ စီမံခန့်ခွဲရေးကဏ္ဍတွင် အသုံးချရန် ဖြစ်ပေသည်။

လီရှို့ကျန်းကို သေချာပေါက် လူသားလောက၏ ဧကရာဇ်တစ်ပါး ဖြစ်လာရမည်ဟု မည်သူက သတ်မှတ်ထားသနည်း။

ဂိုဏ်းချုပ်၏ အမိန့်ကို ကြားရသောအခါ ထိုတပည့်က ချက်ချင်းပင် အစီရင်ခံလိုက်တော့သည်။

"ဂိုဏ်းချုပ်... တောင်ပိုင်းချူပြည်နယ်မှာ အတွေ့အကြုံ ယူနေကြတဲ့ ဂိုဏ်းသားတွေ ကပ်ဘေးနဲ့ ကြုံတွေ့ခဲ့ရပါတယ်၊ ဂိုဏ်းသား ခုနစ်ယောက်စလုံး သေဆုံးသွားခဲ့ပါပြီ !"

လီချင်းချိုး မျက်မှောင်ကြုတ်သွားပြီး ….

"လူလွှတ်ပြီး ချက်ချင်း စုံစမ်းထောက်လှမ်းခိုင်းလိုက်" ဟု အမိန့်ပေးလိုက်သည်။

"ဟုတ်ကဲ့ပါ!"ဟု ဆိုကာ ထိုတပည့်လည်း ချက်ချင်းပင် လှည့်ထွက်သွားခဲ့တော့သည်။

ချင်းရှောင်ဂိုဏ်းတွင် တပည့်အမြောက်အမြား ရှိသဖြင့် ပုံမှန်အားဖြင့် အပြင်လောက၌ ဂိုဏ်းသားအချို့ သေဆုံးမှုများ ရှိတတ်သော်လည်း၊ ချင်းရှောင်ဂိုဏ်းဘက်က မိမိတို့လူ အသတ်ခံရခြင်းကို ဘယ်သောအခါမှ သည်းခံလွှတ်ထားလေ့ မရှိပေ။

သေဆုံးသွားသော တပည့်၏ ကျင့်ကြံမှု မည်မျှပင် နိမ့်ကျစေကာမူ၊ ဂိုဏ်းဘက်က ၎င်းတို့အတွက် သေချာပေါက် ကလဲ့စားချေပေးလေ့ ရှိသဖြင့်၊ အပြင် သိုင်းလောကတွင် အကြောင်းထူးမရှိဘဲ ချင်းရှောင်ဂိုဏ်းသားများကို ရန်စဝံ့သူ အလွန် ရှားပါးလှသည်။

လီရှို့ကျန်းက အပြင်လောက၌ ဂိုဏ်းသားများ သေဆုံးခဲ့ရသည်ဟူသော သတင်းကို ကြားရသောအခါ မျက်မှောင်ကြုတ်လိုက်ပြီး….

"ဦးလေးကြီး... ဒါက ဝမ့်ယင်းဂိုဏ်းနဲ့ ပတ်သက်နေနိုင်မလားမသိဘူး…. အတိတ်တုန်းက လူတစ်ယောက် သေဆုံးရင်တောင် တစ်ကိုယ်တော် လှုပ်ရှားနေတဲ့အချိန်မှာပဲ ဖြစ်တတ်တာ… အခုက လူခုနစ်ယောက် တူတူရှိနေတာကို ဒီလောကမှာ သူတို့ကို အကုန်သတ်နိုင်တဲ့သူ မရှိသလောက်ပဲလေ" ဟု သုံးသပ်ပြခဲ့သည်။

လီချင်းချိုးက… "ဖြစ်နိုင်ခြေ ရှိတယ်… အရင်ဆုံး စုံစမ်းစစ်ဆေးမှု ရလဒ်ကို စောင့်ကြည့်ကြတာပေါ့" ဟု ဆိုလိုက်သည်။

လီရှို့ကျန်းသည် လက်ရှိတွင် အသက်တစ်ဆယ့်ရှစ်နှစ်အရွယ်သို့ ရောက်ရှိနေပြီဖြစ်ရာ ပြဿနာများကို ဂိုဏ်း၏ ရှုထောင့်မှနေ၍ စတင်တွေးတောတတ်နေပြီဖြစ်ပြီး၊ ရံဖန်ရံခါတွင် လီချင်းချိုးကို ကောင်းမွန်သော စီမံခန့်ခွဲရေး အကြံဉာဏ်အချို့ပင် ပေးနိုင်နေပြီ ဖြစ်သည်။

သူတို့နှစ်ဦး ကျင့်ကြံခြင်းဆိုင်ရာ ကိစ္စရပ်များကို ဆက်လက်ဆွေးနွေးနေစဉ်အတွင်း၊ မကြာမီအချိန်မှာပင် ခြံဝင်းအတွင်းသို့ နောက်ထပ် လူတစ်ဦး ရောက်ရှိလာခဲ့ပြန်သည်၊ ၎င်းမှာ အခြားသူမဟုတ်ဘဲ ရှောင်ဝူချင်း ဖြစ်နေသည်။

ရှောင်ဝူချင်း၏ မျက်နှာအမူအရာမှာ ထိန်းမရအောင်ပျက်ယွင်းနေသည်။ သူသည် လီချင်းချိုး၏ ဘေးသို့ လျှောက်လာကာ ဂါရဝပြုလိုက်သည်။ လီရှို့ကျန်းက လီချင်းချိုး၏ အထူးယုံကြည်စိတ်ချရသူဖြစ်ကြောင်း သိထားသဖြင့် တိုက်ရိုက်ပင် အစီရင်ခံလိုက်တော့သည်။

"ဂိုဏ်းချုပ်... သေဆုံးသွားတဲ့ ဂိုဏ်းသား ခုနစ်ယောက်ထဲမှာ... တစ်ယောက်က တွမ့်ရှောင်ကျွမ်း ဖြစ်နေပါတယ်..."

ဤစကားကို ကြားလိုက်ရသောအခါ လီချင်းချိုး၏ ဆတ်ခနဲ မျက်မှောင်ကြုံ့လိုက်မိပြီး စိတ်တင်းကျပ်သွားသည်။

လီရှို့ကျန်းလည်း ကြောင်အမ်းသွားသည်။

သူသည်လည်း တွမ့်ရှောင်ကျွမ်းကို သိသည်။

အဘယ်ကြောင့်ဆိုသော် တွမ့်ရှောင်ကျွမ်းက ဟူယန်ကို လာရောက်ရှာဖွေလေ့ရှိပြီး၊ မည်သူ့ကိုမဆို ကြောက်ရွံ့ခြင်းမရှိဘဲ ရဲရဲတင်းတင်း ပေါင်းသင်းတတ်သူဖြစ်ရာ၊ သူနှင့်ပင် အကြိမ်အနည်းငယ် စကားစမြည် ပြောဆိုဖူးခြင်းကြောင့်ပင်။