အခန်း ၁၈၆

🍋 Chapter 186

ကျိုးထျန်းမှ သူပြင်ဆင်ထားသော ပူဖောင်းများကို ထုတ်ပြပြီး လှပသော ကောင်မလေးနှစ်ယောက်ကို ခြောက်လှန့်မောင်းထုတ်လိုက်သည်ကို မြင်သောအခါ ကျောင်းသားသမဂ္ဂဥက္ကဋ္ဌ၏ မျက်နှာထားမှာ ခက်ထန်သွား၏။

"မင်း ဘာလုပ်ချင်တာလဲ၊ ကျောင်းရောက်ရောက်ချင်း ပုန်ကန်ချင်နေတာလား"

တစ်ဖက်လူက ကျိုးထျန်း၏ လက်မောင်းကို လက်တစ်ဖက်ဖြင့် ဖမ်းဆုပ်လိုက်ပြီး ကျန်လက်တစ်ဖက်က ကားပြတင်းပေါက်ခလုတ်ကို အငြိုးတကြီး နှိပ်ချလိုက်သည်။

သူက ပြတင်းပေါက်မှန်ဖြင့် ကျိုးထျန်း၏လက်မောင်းကို ညှပ်ထားချင်နေခြင်းဖြစ်သည်။

သို့သော် သူ၏တုံ့ပြန်မှုနှင့် ခွန်အားမှာ ကျိုးထျန်းနှင့် ယှဉ်လျှင် ဘာမှမဟုတ်ပေ။

ကျိုးထျန်းက သူ၏လက်မောင်းကို ဆုပ်ကိုင်ထားသော လက်ကောက်ဝတ်ကို ပြန်ဖမ်းဆွဲလိုက်ပြီး ကားအပြင်ဘက်သို့ ဆွဲထုတ်လိုက်၏။

ရုတ်တရက်ဆိုသလို ဥက္ကဋ္ဌမှာ ကားအပြင်သို့ တစ်ဝက်ခန့် ထွက်လာပြီး ထိုအချိန်မှာပင် ပြတင်းပေါက်မှန်မှာ တက်လာကာ သူ၏ဝမ်းဗိုက်ကို ညှပ်မိသွားသည်။

"အား..."

ပြတင်းပေါက်မှန်၏ အရှိန်က အတော်လေး ပြင်းထန်လှသည်။ သူ၏ ကိုယ်တွင်းအင်္ဂါများ တစ်စုတစ်စည်းတည်း ညှစ်ခံလိုက်ရသလို ခံစားလိုက်ရပြီး အရိုးများပင် ကျွတ်ခနဲ အသံမည်သွား၏။

ကျိုးထျန်းက သူ့ကို အမြန်လွှတ်ပေးလိုက်ကာ အနီးနားရှိ ချုံပုတ်များဆီသို့ ပြေးသွားပြီး ချွန်ထက်နေသော ကျောက်ခဲကြီးတစ်လုံးကို ကောက်ယူလိုက်သည်။

"ငါ မင်းကို ကယ်ဖို့လာပြီ"

ခွမ်း!

သူက ကားပြတင်းပေါက်မှန်ကို အစွမ်းကုန် အကြိမ်ကြိမ် ထုခွဲလိုက်ရာ ပင့်ကူအိမ်ကဲ့သို့ အက်ကွဲကြောင်းများ ဖြစ်သွားလေသည်။

ထိုအခါမှသာ ဥက္ကဋ္ဌဖြစ်သူက သက်သာရာရသွားပြီး ထိုင်ခုံပေါ်သို့ ပြန်ကျသွား၏။

"ငါ... ငါ... ငါ မင်းကို သတ်ပစ်မယ်ကွ"

သူက ကားထဲမှ ခုန်ဆင်းလာပြီး လက်တစ်ဖက်က ခါးကို ကိုင်ထားဆဲဖြစ်ရာ အတော်လေး ဒဏ်ရာရသွားသည်မှာ သိသာလှသည်။

ကျိုးထျန်းက ထွက်ပြေးမည့်ဟန် မပြဘဲ ငြိမ်သက်စွာ ရပ်နေ၏။ ပြေးဝင်လာသော ဥက္ကဋ္ဌကို ရင်ဆိုင်ရင်း သူက အပေါ်ဘက် ညာထောင့်ဆီသို့ လက်ညှိုးထိုးပြလိုက်သည်။

ထိုနေရာတွင် လုံခြုံရေးကင်မရာတစ်လုံး ရှိနေသည်။

ကျိုးထျန်း၏ အဓိပ္ပာယ်က ရှင်းလင်းနေသည်။ မင်း ရန်ဖြစ်ချင်တာလား၊ ဒီနေရာက အရာအားလုံးကို မှတ်တမ်းတင်ထားနိုင်တယ်။

ဥက္ကဋ္ဌက သူ၏လက်ညှိုးအတိုင်း လိုက်ကြည့်လိုက်ရာ ကင်မရာကို မြင်သွားပြီး ချက်ချင်း ရပ်တန့်သွား၏။

ရိုက်နှက်ရန်ဆိုသည်မှာ လုံးဝ မဖြစ်နိုင်တော့ပေ။

ရှန်ဟိုင်း၏ စည်းမျဉ်းများအရ အရင်စရိုက်သူက လျော်ကြေးပေးရမည်ဖြစ်ပြီး ရက်အနည်းငယ်ခန့် ထောင်ကျနိုင်သေးသည်။

သို့သော် တစ်ဖက်လူက သူ၏ကားမှန်ကို ရိုက်ခွဲထားရာ ပြင်ဆင်စရိတ်က ယွမ်ထောင်ချီ ကုန်ကျမည်ဖြစ်သည်။ ဤကိစ္စကို ဒီအတိုင်း လွှတ်ထား၍မဖြစ်ပေ။

"မင်း ကောင်စုတ်လေး၊ ငါ့ကို လျော်ပေးစမ်း"

သူက သွားကြိတ်ရင်း အော်ဟစ်လိုက်ပြီး အစောပိုင်းက 'လူကြီးလူကောင်း' အသွင်အပြင်ကို လုံးဝ စွန့်လွှတ်လိုက်လေသည်။

"ဟေး ခင်ဗျားက ဘာလို့ ကျွန်တော့်ကို လျော်ခိုင်းနေရတာလဲ၊ ခင်ဗျားကို ကယ်ချင်လို့ ကားမှန်ကို ခွဲလိုက်တာလေ၊ ကျွန်တော်က ခေတ်သစ် စီးမာကွမ်းပါဗျာ၊ ခင်ဗျားက ကျွန်တော့်ကို ဒီလိုပြန်လုပ်ရက်တယ်ပေါ့လေ၊ စိတ်မကောင်းလိုက်တာ"

ကျိုးထျန်းက သူ့ကို အပြစ်ကင်းစင်သော မျက်နှာလေးဖြင့် ကြည့်လိုက်သည်။

"သောက်ကျိုးနည်း တော်စမ်းပါ၊ ဒီနေ့ မင်းမလျော်ဘူးဆိုရင် ကျောင်းသားရေးရာရုံးခန်းကို သွားပြီး ရှင်းကြတာပေါ့"

"ကောင်းပြီလေ အခုပဲ သွားကြတာပေါ့"

ကျိုးထျန်းက သူ့ကို ရှေ့ကသွားရန် လက်ဟန်ပြလိုက်သည်။

"ဒါနဲ့ ခင်ဗျားကားထဲမှာ ပူဖောင်းတွေ အများကြီးပါလာတာနဲ့ ကောင်မလေးတွေကို ကားထဲဖိတ်ခေါ်တဲ့အကြောင်း ဆရာတွေကို ကျွန်တော် ပြောပြရဦးမယ်။ ပြီးတော့ ခင်ဗျားကို ကယ်ဖို့ ကားမှန်ကို ကျွန်တော် တကယ်ခွဲခဲ့တာ ဟုတ်မဟုတ်သိရအောင် ခင်ဗျားရဲ့ ကားရှေ့ခန်းကင်မရာ ကိုလည်း စစ်ကြည့်ရဦးမယ်"

ကျောင်းသားသမဂ္ဂဥက္ကဋ္ဌမှာ လန့်သွားပြီး စက္ကန့်အနည်းငယ်ခန့် ရပ်တန့်သွား၏။

လွန်ခဲ့သည့်ရက်အနည်းငယ်က သူသည် ကျောင်းသူတစ်ဦးကို ကားစီးရန် ဖိတ်ခေါ်ခဲ့ပြီး ကားထဲတွင် မပြောဝံ့သည့်ကိစ္စအချို့ကို လုပ်ခဲ့ကြသည်။ ထို့ကြောင့် ထိုဘူးက ကားထဲတွင် ရှိနေခြင်းဖြစ်သည်။

လတ်တလောတွင် ရာသီဥတုက ပုံမှန်မဟုတ်ဘဲ ပူအိုက်နေသဖြင့် ကားထဲတွင် ရှိနေစဉ် အင်ဂျင်ကို မပိတ်ထားခဲ့ပေ။

ဆိုလိုသည်မှာ ကားရှေ့ခန်းကင်မရာ ပွင့်နေပြီး သူတို့၏ အသံများကို မှတ်တမ်းတင်ထားမည်ဖြစ်သည်။

အကယ်၍ ကျောင်းသားရေးရာရုံးခန်းကသာ ကားကင်မရာကို စစ်ဆေးလိုက်ပါက သူ ပေါ်သွားမည် မဟုတ်ပါလား။

‘ ပြဿနာပဲ၊ ပြီးတော့ အဲ့ဒီ ဂျူနီယာကောင်မလေးမှာ ရည်းစားရှိတယ်လေ... သတင်းသာ ထွက်သွားရင်တော့ ငါ ပြဿနာအကြီးအကျယ် တက်တော့မှာပဲ...’

သူ၏မျက်နှာပေါ်ရှိ ဝေခွဲမရဖြစ်နေသော အမူအရာကို မြင်သောအခါ ကျိုးထျန်း ရယ်မောလိုက်သည်။

‘ဒီအမှိုက်ကောင်လေးက ငါ့ကိုများ လာပြီးကစားချင်သေးတယ်။ မင်းကို သေအောင် ခြောက်ပြလိုက်မယ်။ ဝေဖေးယွီတောင် ငါ့ရဲ့လှည့်စားတာကို ခံရသေးတာပဲ၊ မင်းကို ကိုင်တွယ်ရတာက ကိတ်မုန့်စားရသလို လွယ်လွန်းတယ်...’

"ဘယ်လိုလဲ၊ ခင်ဗျားကပဲ ကျွန်တော့်ကို လျော်ပေးချင်လို့လား"

ကျိုးထျန်းက ပြုံး၍ မေးလိုက်သည်။

"မင်း... ကျောင်းမှာ ငါနဲ့မတွေ့စေနဲ့၊ မင်း စောင့်ကြည့်နေလိုက်"

သူ လှည့်ကာ ကားထဲသို့ ဝင်ထိုင်လိုက်သည်။

သို့သော် ထိုင်ချလိုက်သည်နှင့် ထိုင်ခုံပေါ်ရှိ မှန်ကွဲစတစ်ခုက သူ၏တင်ပါးကို စူးဝင်သွားလေ၏။

"အား......"

ဤအော်သံကြီးက ဟက်စကီခွေးတစ်ကောင်၏ အသံနှင့်တူနေပြီး မည်မျှနာကျင်သွားကြောင်း ဖော်ပြနေသည်။

ကျိုးထျန်း ခေါင်းခါလိုက်သည်။

"ဂန္ဓမာပန်းလေး ကြွေလွင့်သွားပြီ၊ မြေပြင်တစ်ခုလုံးလည်း ဒဏ်ရာတွေနဲ့၊ သနားစရာကောင်းလိုက်တာ"

သူက အနောက်သို့ လှည့်ကာ လျိုမုယန်၏လက်ကို ပြန်ဆွဲလိုက်ပြီး စာသင်ဆောင်ဘက်သို့ ပျော်ရွှင်စွာ လျှောက်သွားလေသည်။

"နင် တော်တော်ဆိုးတာပဲ"

လျိုမုယန်က ပြတင်းပေါက်မှန် ကွဲနေသောကားကို လှည့်ကြည့်ရင်း ပြောလိုက်သည်။

"ဒါကို ဆိုးတယ်လို့ ဘယ်လိုလုပ် ခေါ်လို့ရမှာလဲ။ ဒါက ဉာဏ်ရည်ဉာဏ်သွေးလေ၊ ဘယ်သူက သူ့ကို တုံးအပြီး ငါနဲ့မှ လာရှုပ်ခိုင်းလို့လဲ"

"သူက ကျောင်းသားသမဂ္ဂဥက္ကဋ္ဌလို့ ပြောသွားတယ်နော်။ နင့်ရဲ့ပဋိပက္ခက ကျောင်းမှာ ငါတို့ရဲ့ နေထိုင်မှုကို ထိခိုက်စေမှာ မဟုတ်ဘူးလား"

လျိုမုယန် အနည်းငယ် စိုးရိမ်နေသည်။

"အဆင်ပြေပါတယ်။ ကျောင်းသားသမဂ္ဂဥက္ကဋ္ဌက ကျောင်းမှာပဲ ဩဇာညောင်းနိုင်တာလေ။ အကယ်လို့ သူက ငါတို့ကို တကယ်ကြီး ဒုက္ခပေးရဲတယ်ဆိုရင် လူ့အသိုင်းအဝိုင်းရဲ့ ကြမ်းတမ်းတဲ့ အမှန်တရားတွေအကြောင်း ငါ သူ့ကို သင်ခန်းစာပေးလိုက်မယ်"

သူ လုံးဝ စိုးရိမ်ပူပန်မနေပေ။

တစ်ပတ်ရစ်ကားတစ်စီးကို မောင်းနေရသဖြင့် သူ၏ မိသားစုစီးပွားရေးအခြေအနေမှာ ပုံမှန်လောက်သာ ဖြစ်နိုင်ပြီး သူ့ကို ယှဉ်နိုင်မည့် ပြိုင်ဘက်မျိုး မဟုတ်ပေ။

သို့သော် ဘေးကင်းစေရန်အတွက် သူက ဂျက်ဆီထံ စာပို့ကာ ထိုကောင်နှင့်ပတ်သက်သည့် အသေးစိတ်အချက်အလက်များကို ရှာဖွေပေးရန် တောင်းဆိုလိုက်သေးသည်။

ထိုကဲ့သို့သော ကိစ္စသေးသေးလေးကို သူ လုံးဝ ဂရုမစိုက်ပေ။ သူက ပုံမှန်အတိုင်း စားသောက်နေလိုက်သည်။

သူတို့နှစ်ဦး စာသင်ဆောင်အဝင်ဝသို့ ရောက်သောအခါ သူတို့၏ သက်ဆိုင်ရာ မေဂျာမှတ်ပုံတင်မည့်နေရာကို စတင်ရှာဖွေကြလေသည်။

ကျိုးထျန်းသည် အချိန်အတော်ကြာ ရှာဖွေပြီးနောက်မှ တရုတ်ဘာသာစကားနှင့် စာပေမေဂျာပြခန်းကို ထောင့်တစ်နေရာတွင် တွေ့လိုက်ရသည်။

စားပွဲတစ်လုံးတည်းသာရှိပြီး လူသူကင်းမဲ့နေရာ ဤမေဂျာတွင် လူအလွန်နည်းကြောင်း သိသာလှသည်။

သို့သော် ထိုအချက်က ပို၍ပင် ကောင်းသေးသည်။ သူက လူကြိုက်နည်းသော မေဂျာကို ရွေးချယ်ရန် လာခဲ့ခြင်းဖြစ်သည်။

"မင်္ဂလာပါ စီနီယာတို့၊ ကျွန်တော် မှတ်ပုံတင်ဖို့ လာတာပါ"

စားပွဲအနောက်တွင် ကောင်မလေးနှစ်ယောက် ဖုန်းသုံးရင်း ထိုင်နေကြသည်။ သူ၏အသံကို ကြားတော့ သူတို့ မော့ကြည့်လာကြ၏။

သူ၏ရုပ်ရည်သွင်ပြင်ကို မြင်လိုက်ရသောအခါ ကောင်မလေးနှစ်ယောက်စလုံး၏ မျက်လုံးများ အရောင်လက်သွားသည်။

"ဘုရားသခင်ကို ကျေးဇူးတင်ပါတယ်။ နောက်ဆုံးတော့ ငါတို့ဌာနမှာ လူချောလေးတစ်ယောက် ရောက်လာပြီ။ တကယ့်ကို ရှားရှားပါးပါးပဲ"

"ဂျူနီယာ မင်းနာမည်က ဘယ်လိုခေါ်လဲ၊ ဖုန်းနံပါတ်ကရော ဘာလဲ"

လက်အုပ်ချီ၍ ဆုတောင်းနေသော စီနီယာကောင်မလေးက မေးလိုက်သည်။

‘ဘာလဲဟ တွေ့တာ စက္ကန့်အနည်းငယ်ပဲ ရှိသေးတာကို ဖုန်းနံပါတ်တောင်းတယ်ဆိုတာက ဘာသဘောလဲ။ တော်တော်လေး တက်ကြွနေပါလား...’

"WeChat ဖြစ်ဖြစ် QQ ဖြစ်ဖြစ် အဆင်ပြေပါတယ်"

ကောင်မလေးက သူမ၏ မျက်လုံးဝိုင်းကြီးများကို ပုတ်ခတ်ပုတ်ခတ်လုပ်လိုက်ပြီး ပါးစပ်က နားရွက်တိုင်အောင် ပြုံးဖြီးနေလေသည်။

"စီထုံ အလုပ်ပြန်လုပ်စမ်းပါ၊ သူ့ကို မခြောက်လှန့်ပါနဲ့"

အခြားကောင်မလေးတစ်ယောက်က သူမကို လက်ကတောက်ဖြင့်တွတ်ကာ ရှက်ကိုးရှက်ကန်း ပြောလိုက်သည်။

သူမ၏ သူငယ်ချင်းက ထိုသို့ပင်ဖြစ်သည်။ ယောက်ျားဆန်ဆန် စရိုက်ရှိပြီး အမြဲတမ်း ရယ်မော နောက်ပြောင်တတ်သည်။

သူငယ်ချင်းဖွဲ့ရာတွင်လည်း အမြဲတမ်း တက်ကြွလွန်းနေတတ်သဖြင့် သူမ၏ လွန်ကဲသော စိတ်အားထက်သန်မှုကြောင့် အခြားသူများကို မကြာခဏ အနေရခက်စေသည်။

"အို ဟုတ်သားပဲ ဟုတ်သားပဲ၊ အလုပ်ပြန်လုပ်ကြရအောင်၊ နောက်မှ ငါတို့ စကားပြောကြတာပေါ့"

သူ၏နာမည်ကို မှတ်ပုံတင်ပြီး ပြဋ္ဌာန်းစာအုပ်အချို့ကို လက်ခံရယူပြီးနောက် ကျိုးထျန်းက သူ၏ဖုန်းကို ထုတ်လိုက်သည်။

"စီနီယာ ကျွန်တော်တို့ WeChat Add ထားကြရအောင်"

"ကောင်းပြီလေ"

ကောင်မလေးက စိတ်လှုပ်ရှားစွာဖြင့် QR Code ကို Scan ဖတ်လိုက်သည်။

ချက်ချင်းပင် Add ပြီးသွားသည်။ သူမ၏ အမည်ပြောင်မှာ 'သံမဏိအမျိုးသမီး' ဖြစ်ကြောင်း ကျိုးထျန်း တွေ့လိုက်ရပြီး သူမ၏ ရုပ်ရည်သွင်ပြင်ကို ကြည့်ပြီးနောက် သူ တွေးလိုက်သည်။

‘အင်း ဒီအမည်ပြောင်က သင့်တော်ပါတယ်...’

ကျန်းစီထုံ အမည်ရှိသော ထိုကောင်မလေးတွင် ကြွက်သားအမြွှာမြွှာနှင့် လက်မောင်းများ၊ ဆံပင်တိုတိုနှင့် လက်နှစ်ဖက်စလုံး၏ လက်ဆစ်ရှစ်ခုစလုံးတွင် အမာရွတ်များရှိနေရာ လက်ဝှေ့ သို့မဟုတ် သိုင်းကစားရာမှ ရထားခြင်း ဖြစ်နိုင်ပေသည်။

ထို့ကြောင့် သူမက အတော်လေး ချောမောသော်လည်း ပြင်းထန်သော ယောက်ျားဆန်ဆန် အငွေ့အသက်များ ထွက်ပေါ်နေခြင်းဖြစ်သည်။

"ဂျူနီယာကျိုးထျန်း ကိုယ်ခံပညာကလပ်ကို ဝင်ဖို့ စိတ်ဝင်စားလား၊ မင်းမှာ အံ့မခန်း ခန္ဓာကိုယ်ဖွဲ့စည်းပုံရှိတာကို ငါတွေ့တယ်၊ မင်းက ကိုယ်ခံပညာပါရမီရှင်တစ်ယောက် ဖြစ်ရမယ်"

ကျန်းစီထုံက လက်ကမ်းစာစောင်တစ်ခုကို ဆွဲထုတ်လိုက်ပြီး ကျိုးထျန်း၏ မျက်နှာရှေ့တွင် ဝှေ့ယမ်းပြလိုက်သည်။

"စီထုံ နင့်ရဲ့ ကိုယ်ပိုင်ပရောဂျက်တွေကိုချည်း အမြဲတမ်း ခိုးမထည့်စမ်းပါနဲ့။ သူက ကျောင်းကို အခုမှ ရောက်လာခါစလေ"

"အို ရှောင်ယွီရယ်၊ ငါတို့မေဂျာက ကောင်လေးတွေက ပုရင်ပု မဟုတ်ရင် ပိန်ညှောင်ညှောင်ကောင်တွေချည်းပဲ။ သူ့လို အလားအလာကောင်းတဲ့သူကို ရှာတွေ့ဖို့ဆိုတာ ရှားတယ်၊ ငါ သူ့ကိုရအောင် စည်းရုံးကြည့်ရမယ်"

ကျိုးထျန်းက ပြုံးလိုက်ပြီး လက်ကမ်းစာစောင်ကို လက်ခံလိုက်သည်။

သူ တကယ်ဝင်ရောက်ရန် အစီအစဉ်မရှိသော်လည်း ဤကောင်မလေးက အတော်လေး စိတ်ဝင်စားဖို့ကောင်းသဖြင့် သူမကို အခွင့်အရေးတစ်ခု ပေးလိုက်ခြင်းဖြစ်သည်။

"စီနီယာ ကျွန်တော်တို့မေဂျာမှာ ကျား မ အချိုးအစားက ဘယ်လောက်ရှိလဲ"

သူ ဤကိစ္စကို စူးစမ်းချင်နေမိသည်။

အခြားမေဂျာများ၏ စားပွဲများနောက်တွင် ကောင်လေးတစ်ယောက်နှင့် ကောင်မလေးတစ်ယောက်ရှိသော်လည်း သူတို့ဆီတွင်မူ ကောင်မလေးနှစ်ယောက် ရှိနေခြင်းဖြစ်သည်။

"ငါးချိုး တစ်ချိုးလေ။ ဘယ်လိုလဲ၊ မိန်းမလှလေးတွေပေါတဲ့ နယ်ပယ်ထဲကို ကျရောက်သွားသလိုမျိုး နင့်ကိုယ် နင် အရမ်းကံကောင်းတယ်လို့ မခံစားရဘူးလား”