အခန်း ၁၃၀

အခန်း ၁၃၀ - ငါ ပြန်လာခဲ့မယ်။

ရှောင်ချန်ယွီသည် ပင်လယ်နတ်ဘုရားအကြောင်းကို အများကြီး မသိသကဲ့သို့ ပင်လယ်နတ်ဘုရားမှာလည်း ရှောင်ချန်ယွီအကြောင်းကို များစွာ မသိပေ။

ရှောင်ချန်ယွီတစ်ယောက် ပထမဆုံးအကြိမ် ဒဏ်ရာရသွားသည်ကို မြင်လိုက်ရသောအခါ ပင်လယ်နတ်ဘုရားမှာ အနည်းငယ် ဝမ်းသာသွားသည်။ တိုက်ပွဲကြာရှည်စွာ ဖြစ်ပွားပြီးနောက်တွင် ရှောင်ချန်ယွီ၏ အကာအကွယ်ကို ဖောက်ထွက်နိုင်ခဲ့ပြီဖြစ်၍ ဖြစ်သည်။

သို့သော် ပင်လယ်နတ်ဘုရား မသိသည်မှာ ရှောင်ချန်ယွီ၏ တိုက်ပွဲမှာ အခုမှ စတင်ခြင်းပင် ဖြစ်သည်။

"ကုသခြင်း လျှို့ဝှက်ချက်။"

ရှောင်ချန်ယွီ၏ ခန္ဓာကိုယ်ပေါ်တွင် အလင်းတန်းတစ်ခု ဖြတ်သန်းသွားပြီး ဒဏ်ရာရထားသော ရှောင်ချန်ယွီ၏ရှေးဟောင်းမြင့်မြတ်ခန္ဓာမှာ ချက်ချင်းပင် မူလအတိုင်း ပြန်လည်ကောင်းမွန်သွားသည်။ ပင်လယ်နတ်ဘုရား ကြိုးစားပမ်းစား တိုက်ခိုက်ခဲ့သမျှမှာ တစ်ခဏချင်းတွင် အလဟဿ ဖြစ်သွားရသည်။

ကုသခြင်း လျှို့ဝှက်ချက်ဖြင့် သူ၏ခန္ဓာကိုယ်ကို ပြန်လည်ပြုပြင်နိုင်ရာ သူ၏ လက်နက်များမှာ ပင်လယ်နတ်ဘုရားထက် မနည်းပေ။

သူနှင့် ဖူလန်ဒါတို့၏ တိုက်ပွဲမှာ ရိုးရှင်းပြီး အင်အားနှင့် ဝိဉာဥ်စွမ်းရည်တို့၏ တိုက်ပွဲသာ ဖြစ်သည်။ ရှေးဟောင်းမြင့်မြတ်ခန္ဓာ ၏ ကြံ့ခိုင်သော ခုခံနိုင်စွမ်းဖြင့် ရှောင်ချန်ယွီသည် ဖူလန်ဒါ၏ ခန္ဓာကိုယ်ကို ပူးကပ်နေသော ပင်လယ်နတ်ဘုရားကို အကောင်းဆုံး ယှဉ်ပြိုင်နိုင်ခဲ့သည်။

သူသာ ကန့်သတ်ချက်များကို လုံးဝ ဖယ်ရှားလိုက်ပါက ပို၍ပင် သန်မာလာမည် ဖြစ်သော်လည်း ယခုအချိန်တွင်မူ ထိုသို့လုပ်ရန် မလိုသေးပေ။

အကြောင်းမှာ သူသည် ပင်လယ်နတ်ဘုရား ကိုယ်တိုင်နှင့် တိုက်ခိုက်နေခြင်း မဟုတ်ဘဲ ဖူလန်ဒါကို ပူးကပ်ထားသော ပင်လယ်နတ်ဘုရားနှင့်သာ တိုက်ခိုက်နေခြင်း ဖြစ်၍ဖြစ်သည်။

ပင်လယ်နတ်ဘုရားသာ ကိုယ်တိုင် ဆင်းသက်လာပါက ရှောင်ချန်ယွီက သေချာပေါက် ကောင်းကောင်းကြီး ကြိုဆိုပေးမည် ဖြစ်သည်။

"ဘုန်း ဘုန်း"

ထိခိုက်မှုများမှာ ရှောင်ချန်ယွီ၏ ခန္ဓာကိုယ်ပေါ်သို့ မိုးစက်များပမာ ကျရောက်လာသည်။ ပင်လယ်နတ်ဘုရား ပူးကပ်ထားသော ဖူလန်ဒါမှာလည်း ပို၍ စိတ်လှုပ်ရှားလာပုံရသည်။

ရှောင်ချန်ယွီကမူ ဖူလန်ဒါ၏ တိုက်ခိုက်မှုများကို ပိတ်ဆို့ရင်း နောက်သို့ တဖြည်းဖြည်း ဆုတ်ခွာနေသည်။

သူသည် ခရီးသွားခြင်း လျှို့ဝှက်ချက်ကို အသုံးပြု၍ လျင်မြန်စွာ ဆုတ်ခွာနေသော်လည်း ဖူလန်ဒါနှင့် သတ်မှတ်ထားသော အကွာအဝေးကို အမြဲ ထိန်းထားသည်။

ဖူလန်ဒါမှာ တိုက်ပွဲ ကြာရှည်လာသည်နှင့်အမျှ ပိုမို စိုးရိမ်လာသည်။ သူ့ရှေ့က လူငယ်မှာ ထင်သလောက် မရိုးရှင်းကြောင်း သူ သိလိုက်ရသည်။

သူ့ကို ထူးဆန်းသော ခံစားချက်များ ပေးစွမ်းနေသည်။ တစ်ဖက်လူမှာ စွမ်းအား အလွန်ကြီးမားသဖြင့် သူ့ကို အနိုင်ယူရန် ခက်ခဲနေသည်။ တိုက်ခိုက်မှုတိုင်းတွင် သူ၏ အင်အားများ အလွန်အမင်း ကုန်ဆုံးနေသည်။

ဖူလန်ဒါ၏ ခန္ဓာကိုယ်မှ အငွေ့အသက်များ ပြောင်းလဲသွားပြီး ခန္ဓာကိုယ်တစ်ခုလုံးကို အနက်ရောင် အကြေးခွံများ ဖုံးလွှမ်းသွားသည်။

"ဘုန်း"

ပင်လယ်နတ်ဘုရား၏ တိုက်ခိုက်မှုကြောင့် ရှောင်ချန်ယွီ၏ ရှေးဟောင်းမြင့်မြတ်ခန္ဓာပေါ်တွင် ဒဏ်ရာ အသေးစားလေးတစ်ခု ထပ်မံ ပေါ်လာသည်။

"ဟားဟားဟား မင်းက ကျောက်ဝူကျိကို သတ်ခဲ့တဲ့သူဆိုတာ ဂုဏ်သတင်းနဲ့ ညီပါတယ်။ မင်း တော်ပါတယ်။ ငါ့ရဲ့ အစွမ်းကုန်ကို ခံနိုင်ရည်ရှိတာက မင်းကို အလေးထားရကျိုးနပ်စေတယ်။"

ဖူလန်ဒါက ထူးဆန်းသော အနေအထားဖြင့် လက်များကို ရင်ဘတ်ရှေ့တွင် ပူးလိုက်ရာ သူ၏ ခန္ဓာကိုယ်တစ်ခုလုံး ရွှေရောင်သို့ ပြောင်းလဲသွားသည်။ ၎င်းသည် နဂါးဘုရား၏ အစွမ်းဖြစ်သော နဂါးအရှိန်အဝါပင် ဖြစ်သည်။

ဖူလန်ဒါက ခြေဖြင့် မြေပြင်ကို ဆောင့်နင်းလိုက်ရာ မြေကြီးများ ကွဲအက်သွားသည်။ သူ၏ ဒဏ်ရာများမှ သွေးများ ထွက်ကျလာသော်လည်း သူ၏ အကြည့်မှာ ပိုမို အေးစက်လာသည်။

သူ၏ လက်ဝဲဘက်မှ ရွှေရောင်အလင်းတန်းများ ထွက်ပေါ်လာပြီး နဂါးဘုရား၏ ဩဇာအရှိန်အဝါများဖြင့် ဖုံးလွှမ်းသွားသည်။

နဂါးဟိန်းသံမှာ ကောင်းကင်နှင့် မြေကြီးကို တုန်ခါသွားစေသည်။ ရွှေရောင်အလင်းတန်းများမှာ ရှောင်ချန်ယွီဆီသို့ ဝင်ရောက်လာသည်။

ဖူလန်ဒါ၏ ကိုယ်ပေါ်ရှိ အကြေးခွံများမှာ ပေါက်ကွဲထွက်သွားပြီး ရွှေရောင်အလင်းတန်းများအဖြစ် ပြောင်းလဲကာ ရှောင်ချန်ယွီ၏ လည်ပင်းကို ချိန်ရွယ် တိုးဝင်လာသည်။

"ရယ်စရာကောင်းလိုက်တာ။ ပင်လယ်နတ်ဘုရားတစ်ပါးက တခြား နတ်ဘုရားတွေလို အတုခိုးပြီး နဂါးဘုရားလို လုပ်နေတာပဲ တကယ်ကို ရှက်စရာကောင်းလိုက်တာ။"

ရှောင်ချန်ယွီက လှောင်ပြုံးဖြင့် ဆိုသည်။

ပင်လယ်နတ်ဘုရားက နဂါးဘုရား၏ စွမ်းအားကို အဘယ်ကြောင့် သုံးနိုင်သနည်း။ ဝိဉာဥ်ကုန်းမြေ၏ မူလဇာတ်လမ်းကို ဖတ်ဖူးသူ ရှောင်ချန်ယွီမှာ နဂါးဘုရား၏ စွမ်းအားရင်းမြစ်ကို ကောင်းစွာ သိသည်။

နဂါးဘုရားမှာ နတ်ဘုရားတစ်ပါး မဟုတ်ဘဲ ရှေးဦးဆုံး ပေါ်ပေါက်ခဲ့သော ဝိဉာဥ်သားရဲ ဖြစ်သည်။ သူသည် သူ၏ အစွမ်းဖြင့် နတ်ဘုရားအဆင့်သို့ ရောက်ရှိခဲ့သည်။

နဂါးဘုရားမှာ ဖျက်ဆီးခြင်းနှင့် ဖန်တီးခြင်း၏ အခြေခံ စွမ်းအားများကို ပိုင်ဆိုင်ထားပြီး မသေနိုင်သော တည်ရှိမှု ဖြစ်သည်။

သို့သော် အခြားနတ်ဘုရားများက သူ့ကို မနိုင်နိုင်သည့်အတွက် ညစ်ပတ်သော နည်းလမ်းများကို အသုံးပြုခဲ့ကြခြင်းသာ ဖြစ်သည်။