အခန်း ၆၈

အခန်း (၆၈) - ဒေါင်

လင်းဖန်၏ တူကြီးမှာ ပြိုင်ဘက်၏ဦးခေါင်းကို အားပြင်းစွာ ရိုက်မိသွားလေသည်။

ယခုတစ်ကြိမ်တွင်မူ သံသတ္တုချင်း ထိခတ်မိသံမှာ ထူးဆန်းစွာ ကွဲပြားခြားနားနေပေသည်။

လင်းဖန်၏တူကြီးသည် အလွန်အမင်း မာကျောလှသော အရာတစ်ခုခုကို ထိမှန်သွားသည့်အလား ခံစားလိုက်ရသည်။

တုန်ခါမှု အရှိန်အဟုန်မှာ သူ၏ လက်မောင်းနှစ်ဖက်ဆီသို့ တိုက်ရိုက် တုန်ခါပျံ့နှံ့လာလေသည်။

“အား”

ထိုသူသည် လင်းဖန်၏ တူချက်ကြောင့် ရရှိသွားသော ဒဏ်ရာကို ပွတ်သပ်လိုက်သည်။

ယခုမူ သူသည် လင်းဖန်၏ စိတ်အနှောင့်အယှက်ဖြစ်ဖွယ် တူကြီးများကို အလွန်အမင်း ဒေါသထွက်နေချေပြီ။

သူသည် လင်းဖန်ဘက်သို့ လှည့်ကာ ကျားလက်သည်းသဏ္ဌာန် လက်ဖဝါးများဖြင့် လင်းဖန်ဆီသို့ အရှိန်ပြင်းစွာ ပြေးဝင်လာတော့သည်။

သူ၏ အတွင်းအား ချီစွမ်းအင်များ ပေါက်ကွဲထွက်လာသောအခါ သူ၏ ကျောနောက်ကွယ်တွင် ကြောက်မက်ဖွယ်ကောင်းသော ကျားရိုင်းတစ်ကောင်၏ ပုံရိပ်ကို ဝိုးတဝါး မြင်တွေ့လိုက်ရသည်။

သူ၏ ဟိန်းဟောက်သံမှာလည်း ဟိန်းဟောက်နေသော ကျားရိုင်းတစ်ကောင်အလား ထွက်ပေါ်လာသည်။

လင်းဖန်သည် သူ၏ ချီစွမ်းအင်များကို တူကြီးအတွင်းသို့ လျင်မြန်စွာ ပို့လွှတ်လိုက်ရာ ထိုတူကြီးမှာ မူလထက် နှစ်ဆခန့် ပိုမိုကြီးမားသွားပြီး ကျားလက်ဖဝါးတိုက်ကွက်ကို ခုခံကာကွယ်လိုက်လေသည်။

ဒေါင်…

ထိုသတ္တုချင်း ထိခတ်သံကြီး ထပ်မံ ထွက်ပေါ်လာပြန်သည်။

ဤအချိန်တွင် မိုးကြိုးမုန်တိုင်းဂိုဏ်းမှ တပည့်များမှာ လင်းဖန်၏ တူကြီးများကို ပျောက်ကွယ်သွားစေချင်နေကြပြီ ဖြစ်သည်။

ချင်ဖုန်းဂိုဏ်း၏ လက်နက်တောင်ထွတ်မှ တပည့်များမှာမူ လင်းဖန်၏ တူကြီးများကို စိတ်ဝင်တစားဖြင့် စိုက်ကြည့်နေကြသည်။

သူတို့သည် လက်နက်အသစ်များ သွန်းလုပ်ရန်အတွက် အကြံဉာဏ်သစ်များ စတင်ရရှိလာကြသည်။

ယခင်ကမူ သူတို့ စဉ်းစားသမျှမှာ ဓားသွားများကို မည်သို့ ပိုမိုထက်မြက်အောင် ပြုလုပ်ရမည်ဟူသောအချက်သာ ဖြစ်သည်။

ယခု လင်းဖန်၏ တူကြီးများကို မြင်တွေ့ရသောအခါတွင်မူ သူတို့၏ အတွေးအမြင်များမှာ ပိုမိုကျယ်ပြန့်သွားလေတော့သည်။

အခြားညီအစ်ကိုတစ်ယောက်က အပေါ်မှနေ၍ လင်းဖန်ထံသို့ ခုန်အုပ်လိုက်ချိန်တွင် ကျန်းရှီက သတိပေးကာ အော်ဟစ်လိုက်သည်။

“အပေါ်က ဘေးကို သတိထား”

ထိုသူသည် သူ၏ လက်နှစ်ဖက်ကို ကြိုးကြာဦးခေါင်းသဏ္ဌာန် ပြုလုပ်လျက် အပေါ်စီးမှနေ၍ လင်းဖန်ထံသို့ ထိုးစိုက်ချလာသည်။

လင်းဖန်မှာ သူ၏ တူကြီးများကို အသုံးပြု၍ အပေါ်သို့ ပြန်လည်ရိုက်နှက်ရန် ပြင်လိုက်သော်လည်း သူ၏ ရှေ့မှ ပြိုင်ဘက်က လင်းဖန်၏ တူကြီးများကို အတင်းအကျပ် ဆွဲကိုင်ထားလိုက်လေသည်။

ကျန်းရှီမှာ ကူညီရန်အတွက် လျင်မြန်စွာ ဝင်ရောက်လာပြီး ထိုသူ၏ ကျောပြင်ကို လက်သီးချက်များ ဆက်တိုက် ရိုက်သွင်းလိုက်သည်။

ထိုသူသည် နာကျင်မှုကို အံကြိတ်ခံကာ လင်းဖန်၏ တူကြီးကို လုံးဝ လက်မလွှတ်ချေ။

“ဟုတ်တယ်၊ သူ့ကို အဆုံးသတ်လိုက်တော့”

“ဒီစိတ်ရှုပ်စရာကောင်းတဲ့ တူကြီးတွေမရှိရင် သူက ဘာမှမဟုတ်တော့ဘူး”

“မိုးကြိုးမုန်တိုင်းဂိုဏ်း အနိုင်ရပါစေ”

မိုးကြိုးမုန်တိုင်းဂိုဏ်းမှ လူများက ဤမြင်ကွင်းကို မြင်တွေ့သောအခါ ဆူညံစွာ အားပေးကြွေးကြော်လိုက်ကြသည်။

နောက်ဆုံးတွင်မူ တူကြီးများ မရှိတော့လျှင် လင်းဖန်သည် သူတို့အတွက် မည်သို့မျှ ခြိမ်းခြောက်မှု မဖြစ်နိုင်တော့ချေ။

လင်းဖန်က လှောင်ပြုံးတစ်ချက် ပြုံးလိုက်ရင်း စိတ်ထဲမှ ရေရွတ်လိုက်သည်။

‘ငါ တူကြီးတွေကို လက်လွှတ်လိုက်ရင် မင်းတို့တွေ နောင်တရသွားလိမ့်မယ်’

သူတို့၏ ဆန္ဒကို ဖြည့်ဆည်းပေးသည့်အနေဖြင့် လင်းဖန်သည် တူကြီးများကို လက်လွှတ်လိုက်ပြီး သူ၏ သံမဏိလက်သည်းစွမ်းရည်ကို အသုံးပြုကာ အပေါ်မှကျဆင်းလာသော ကြိုးကြာတိုက်ကွက်ကို ခုခံရန် ပြင်လိုက်လေသည်။

“ကောင်းတယ်”

ဘေးပတ်ဝန်းကျင်မှ လူအုပ်ကြီးမှာ လင်းဖန် တူကြီးများကို လက်လွှတ်လိုက်သည်ကို မြင်သောအခါ ပိုမိုဆူညံလှုပ်ရှားသွားကြသည်။

သူတို့သည် လင်းဖန်၏ လက်ကို ကြိုးကြာတိုက်ကွက်ဖြင့် အပေါက်ဖောက်ခံရပြီးနောက် သူ၏ ဦးခေါင်းပါ ပွင့်ထွက်သွားလိမ့်မည်ဟု မျှော်လင့်ထားကြသည်။

လက်ဗလာဖြင့် ကြိုးကြာတိုက်ကွက်ကို ယှဉ်ပြိုင်ရန်ကြိုးစားခြင်းမှာ အလွန်အမင်း မောက်မာလွန်းသော လူမိုက်တစ်ယောက်၏ လုပ်ရပ်ပင် ဖြစ်ပေသည်။

သို့သော်ငြား သူတို့ မျှော်လင့်ထားသည့်အရာများမှ တစ်ခုမျှ ဖြစ်မလာခဲ့ပေ။

လင်းဖန်၏ သံမဏိလက်သည်းစွမ်းရည်သည် ကြိုးကြာတိုက်ကွက်ကို ဖမ်းဆုပ်လိုက်ပြီး သူ၏ လက်ချောင်းများမှာ ပြိုင်ဘက်၏ လက်ဖဝါးများကို ဖောက်ထွက်သွားလေသည်။

နူးညံ့လှသော တို့ဟူးတုံးတစ်တုံးကို သံမဏိလက်သည်းဖြင့် အလွယ်တကူ ဖြတ်တောက်လိုက်သည့်အလားပင်။

ထိုပြိုင်ဘက်မှာ နာကျင်လွန်းသဖြင့် အော်ဟစ်ညည်းတွားလိုက်ရတော့သည်။

ထိုနောက် လင်းဖန်သည် သူ၏ ရှေ့ရှိ ပြိုင်ဘက်ကို အားပြင်းသော ခြေကန်ချက်ဖြင့် တည့်တည့် ကန်လိုက်သည်။

ဖုန်း…

သူ၏ အံ့ဖွယ်ခုန်ပျံခြင်းစွမ်းရည်ကို အသုံးပြုထားသော ခြေကန်ချက်ကြောင့် ထိုသူမှာ မြေပြင်ပေါ်တွင် လိမ့်ပိတ်သွားရတော့သည်။

ဆက်လက်၍ သူသည် သူ၏ လက်ထဲ၌ ဖမ်းဆုပ်ထားသော ပြိုင်ဘက်ကိုလည်း မြေပြင်ပေါ်သို့ ပြင်းထန်စွာ ရိုက်ချလိုက်သည်။

ထိုနောက် သူ၏ တူကြီးများကို ပြန်လည် ကောက်ယူလိုက်ပြီး မြေပြင်ပေါ်တွင် လဲလျောင်းနေသော ပြိုင်ဘက်၏ ဦးခေါင်းပေါ်သို့ တင်ထားလိုက်သည်။

လင်းဖန်က အေးစက်စွာ ပြောလိုက်သည်။

“အရှုံးပေးမလား။ မဟုတ်ရင်တော့…”

သူသည် သူတို့ကို မသတ်လိုပေ။ အဘယ်ကြောင့်ဆိုသော် သူတို့တွင် မိမိအပေါ် ယုတ်မာသော ရည်ရွယ်ချက်များ မရှိသောကြောင့် ဖြစ်သည်။

ကျားကွက်သဏ္ဌာန်ကို အသုံးပြု၍ လင်းဖန်ထံသို့ ထပ်မံပြေးဝင်ရန် ပြင်နေသော အခြားပြိုင်ဘက်မှာ ချက်ချင်း ရပ်တန့်သွားရတော့သည်။

သူ၏ ညီအစ်ကိုဖြစ်သူ၏ အသက်မှာ လင်းဖန်၏ တူအောက်တွင် ရောက်ရှိနေပြီ မဟုတ်ပါလော။

မိုးကြိုးမုန်တိုင်းဂိုဏ်း၏ တပည့်များမှာမူ သူ၏တုံ့ဆိုင်းနေမှုအပေါ် မကျေမနပ် ဖြစ်နေကြလေသည်။

“အရှုံးမပေးနဲ့”

“ဂိုဏ်းရဲ့မျက်နှာကို ထောက်ထားစမ်း”

“ဒါက ဂိုဏ်းရဲ့ကျေးဇူးကို ပြန်ဆပ်ရမယ့်အချိန်ပဲ”

လင်းဖန်သည် သူတို့၏ ရူးသွပ်လှသော အပြုအမူကို ကြည့်ကာ ခေါင်းကိုသာ ခါယမ်းလိုက်မိတော့သည်။

မြေပြင်ပေါ်တွင် လဲလျောင်းနေသော သူ၏ပြိုင်ဘက်က ညီဖြစ်သူကို လှမ်းကြည့်လိုက်ပြီး မေးစေ့ဖြင့်အချက်ပြကာ မျက်လုံးများကို မှိတ်လိုက်လေသည်။

ညီဖြစ်သူသည် မိမိ၏လက်များကို ငုံ့ကြည့်ကာ သက်ပြင်းပြင်းပြင်းတစ်ချက် ချလိုက်သည်။

ထို့နောက် သူ၏ချီစွမ်းအင်အားလုံးကို စုစည်းကာ လင်းဖန်ထံသို့ အရှိန်အဟုန်ဖြင့် ပြေးဝင်ရန် ပြင်လိုက်သည်။

သို့သော် သူ အရှိန်ယူ၍ မခုန်တက်နိုင်မီမှာပင်။

သူ၏ခန္ဓာကိုယ်မှာ တောင့်တင်းသွားခဲ့သည်။

သူသည် လှုပ်ရှား၍ပင် မရတော့ချေ။

ထိုစဉ် သူ၏လက်မှာ သူ့အလိုအလျောက် ထိန်းချုပ်၍မရဘဲ အပေါ်သို့ မြှောက်တက်သွားလေသည်။

“ကျုပ် အရှုံးပေးပါတယ်။ ချင်ဖုန်းဂိုဏ်း နိုင်သွားပြီ”

သူ၏နှုတ်ခမ်းဖျားမှ စကားလုံးများ ထွက်ပေါ်လာခဲ့သည်။

သို့သော် ထိုအပြုအမူမှာ သူကိုယ်တိုင် ပြုလုပ်ခဲ့ခြင်း မဟုတ်ပေ။

တစ်စုံတစ်ယောက်က သူ့ကို ထိန်းချုပ်ထားခြင်းပင်။

‘မင်း အသက်ကြီးလာတဲ့အခါ ကျုပ်ကို ကျေးဇူးတင်ရလိမ့်မယ်’

လင်းဖန်က စိတ်ထဲတွင် ရေရွတ်လိုက်သည်။

ဤလောကကြီးတွင် ခေတ္တခဏမျှသာရှိသော အရာများအတွက် အသက်ပေးရန် အသင့်ဖြစ်နေသည့် ရူးမိုက်သော လူငယ်များ ဘယ်သောအခါမျှ မရှားပါးပေ။

အရာအားလုံးမှာ ဖြတ်သန်းသွားမည့် အချိန်ခဏတာမျှသာ ဖြစ်ပေသည်။

ထိုကဲ့သို့သော အရာအတွက် မိမိ၏ညီအစ်ကိုအရင်းအချာကို စတေးရန် ကြိုးစားခြင်းမှာ အလွန်ပင် မိုက်မဲလှသည်။

မိမိလက်ထဲတွင် ဆုပ်ကိုင်ထားနိုင်သည့် အရာများသာလျှင် အစစ်အမှန် ဖြစ်ပေသည်။

ဥပမာအားဖြင့် စွမ်းဆောင်ရည်အမှတ်များ ကဲ့သို့ပင်။

မိမိရရှိတော့မည့် စွမ်းဆောင်ရည်အမှတ်များအကြောင်းကို စဉ်းစားကာ လင်းဖန်၏ နှုတ်ခမ်းဖျားတွင် အပြုံးတစ်ခု ပေါ်လာလေသည်။

ဒိုင်လူကြီးက လက်ကို မြှောက်ကာ ပြိုင်ပွဲ၏ အနိုင်ရရှိသူကို ကြေညာလိုက်သည်။

“ချင်ဖုန်းဂိုဏ်း အနိုင်ရရှိပါတယ်”

ချင်ဖုန်းဂိုဏ်း၏ တပည့်များဆီမှ ကျယ်လောင်သော အော်ဟစ်အားပေးသံများ ဆူညံစွာ ထွက်ပေါ်လာတော့သည်။

“ချင်ဖုန်းဂိုဏ်း”

အခြားတစ်ဖက်တွင်မူ မိုးကြိုးမုန်တိုင်းဂိုဏ်းသားများမှာ နှုတ်ဆိတ်နေကြပြီး သူတို့၏ စိတ်ထဲတွင် ဒေါသအရှိန်များ တောက်လောင်နေကြလေသည်။

သူတို့က ထိုညီအစ်ကိုနှစ်ဦးကို ဒေါသတကြီး စိုက်ကြည့်လိုက်ကြသည်။

‘မင်းတို့ ဘာလို့ အရှုံးပေးလိုက်ရတာလဲ ရူးလိုက်တာ’

သူတို့အတွက်မူ အနိုင်ရရှိရေးကသာ အရေးကြီးဆုံး ဖြစ်ပေသည်။

သို့သော် ထိုညီအစ်ကိုနှစ်ဦးမှာ ဂိုဏ်းချုပ်၏ တိုက်ရိုက်တပည့်များဖြစ်ကြသဖြင့် သူတို့မှာ စိတ်ထဲမှသာ တိတ်တဆိတ် ကျိန်ဆဲနိုင်ကြလေသည်။

ညီအစ်ကိုနှစ်ဦးမှာ ယခုအခါ ပြန်လည်ထူမတ်လာကြပြီး တစ်စုံတစ်ယောက်က သူတို့ကို ပြန်လည်ကောင်းမွန်ခြင်းဆေးလုံးများ တိုက်ကျွေးလိုက်သည်။

တစ္ဆေတစ်ဆယ့်သုံးချက် သွေးကြောပိတ်တိုက်ကွက်၏ အာနိသင်များ ပျောက်ပြယ်သွားချိန်တွင် သူတို့၏ ခန္ဓာကိုယ်အတွင်းမှ အင်အားများ ဆုတ်ယုတ်သွားသဖြင့် နုံးချည့်နေကြလေသည်။

“မိုးကြိုးမုန်တိုင်းဂိုဏ်းက အောက်ခြေသိမ်းတပည့်တစ်ယောက်ကို ရှုံးသွားတာပဲ။ တကယ့်ဟာသပဲ”

“ဟားဟား ဟုတ်ပဗျာ။ သူတို့က နိမ့်ကျတဲ့ အောက်ခြေသိမ်းတပည့်တစ်ယောက်ကိုတောင် ရှုံးတယ်နော်”

“ဒီအကြောင်းသာ အပြင်ကိုပျံ့သွားရင် သူတို့မျက်နှာ ဘယ်နားသွားထားမလဲ မသိဘူး”

ချင်ဖုန်းဂိုဏ်း၏ တပည့်များသည် လင်းဖန်မှာ အောက်ခြေသိမ်းတပည့်တစ်ဦးသာ ဖြစ်သည်ဟူသောအချက်ကို အသုံးချကာ ဝိုင်းဝန်းလှောင်ပြောင်ကြတော့သည်။

သူတို့အားလုံးက မိုးကြိုးမုန်တိုင်းဂိုဏ်းမှ တပည့်များကို လက်ညှိုးထိုးကာ ဝိုင်းဝန်းရယ်မောနေကြလေသည်။

မိုးကြိုးမုန်တိုင်းဂိုဏ်းဝင်များမှာမူ ဒေါသကြောင့် သွားကြိတ်လျက် မြေပြင်ကိုသာ ဆောင့်ကန်ကာ စိတ်ပျက်လက်ပျက် ဖြစ်နေကြရတော့သည်။

ကျန်းရှီက လင်းဖန်ကို ကျေးဇူးတင်စကားပြောရန် လှည့်ကြည့်လိုက်သော်လည်း သူသည် ထိုနေရာ၌ မရှိတော့ချေ။

“လင်းဖန်။ နင့်ရဲ့အကူအညီအတွက် ကျေးဇူးတင်ပါတယ်။ ယုန်မိန်းကလေးလည်း ကျေနပ်နေလိမ့်မယ်”

သူသည် အလောင်းအစားလုပ်ထားသော သူ၏နိုင်ကြေးများကို သွားရောက်ထုတ်ယူရန် ထွက်ခွာသွားပြီ ဖြစ်သည်။

ယခုအချိန်တွင် သူ့ကို မည်သည့်အရာကမျှ တားဆီးနိုင်မည်မဟုတ်ပေ။

ဒိုင်လုပ်သူမှာ လင်းဖန်ကို မြင်လိုက်ရသောအခါ ရှက်ပြုံးဖြင့် သူ၏ဦးခေါင်းနောက်စေ့ကို ပွတ်သပ်လိုက်ရင်း ပြောလိုက်သည်။

“မင်း ဒီလောက်သန်မာမှန်းသိရင် ကျုပ် မင်းရဲ့အလောင်းအစားကို လက်ခံခဲ့မှာ မဟုတ်ဘူး”

လင်းဖန်က လက်ကိုဆန့်တန်းကာ စောင့်ဆိုင်းနေလိုက်သည်။

“စကားအပိုတွေ ပြောမနေနဲ့တော့။ ကျုပ်ရဲ့ စွမ်းဆောင်ရည်အမှတ်တွေ ဘယ်မှာလဲ”

ဒိုင်လုပ်သူက သက်ပြင်းတစ်ချက်ချကာ သူ၏သစ်သားပြားကို ထုတ်ယူလိုက်ပြီး စွမ်းဆောင်ရည်အမှတ် ငါးရာကို လွှဲပြောင်းပေးကာ လင်းဖန်ထံသို့ ကမ်းပေးလိုက်လေသည်။

ဟိုမင်က ပြုံးရွှင်စွာဖြင့် လျှောက်လှမ်းလာရင်း ပြောလိုက်သည်။

“ဂုဏ်ယူပါတယ် လင်းဖန်”

ဒိုင်လုပ်သူမှာ ဟိုမင်ကို မြင်လိုက်ရသောအခါ မူးလဲမတတ် ဖြစ်သွားတော့သည်။

ဟိုမင်သည် စွမ်းဆောင်ရည်အမှတ် ငါးဆယ်အထိ လောင်းကြေးထပ်ခဲ့သည်ကို သူ သတိရသွားသောကြောင့်ပင်။

စုစုပေါင်း စွမ်းဆောင်ရည်အမှတ် နှစ်ထောင်ငါးရာ။

ဤမျှများပြားလှသော စွမ်းဆောင်ရည်အမှတ်များကို သူ မည်သည့်နေရာမှ သွားရှာရပါမည်နည်း။

ဒိုင်လုပ်သူမှာ ထွက်ပြေးရန် စဉ်းစားလိုက်သော်လည်း လင်းဖန်က သူ့ကို စူးရှစွာ စိုက်ကြည့်နေလေသည်။