အခန်း ၂၀၃

အခန်း (၂၀၃) လုံယန်ကို သန့်စင်ခြင်း... မြို့စားအိုကြီးကိုယ်တိုင် လာရောက်ကြိုဆိုတယ်

ဤအချိန်အခိုက်အတန့်တွင် မြေအောက်ကမ္ဘာကိုးထပ်မြို့တော်တစ်ခုလုံးသည် ကြောက်မက်ဖွယ်ကောင်းသော တိတ်ဆိတ်ခြင်းသို့ ကျရောက်သွားသည်။စောင့်ကြည့်နေသော ကျင့်ကြံသူများ၏ မျက်နှာအမူအရာများ ပြင်းထန်စွာ ပြောင်းလဲသွားပြီး နက်ရှိုင်းသော အံ့အားသင့်မှုနှင့် မယုံကြည်နိုင်မှုတို့ဖြင့် ပြည့်နှက်နေသည်။အစစ်အမှန်နဂါး ရှေးဟောင်းမျိုးနွယ်စုသည် ရှေးဟောင်း ဧကရာဇ်ခုနစ်ပါးဂိုဏ်းတစ်ဂိုဏ်းပင်။ထိုအင်အားစု၏အခြေခံအုတ်မြစ်မှာ နက်ရှိုင်းပြီး အားကောင်းကာ သာမန်အင်မော်တယ် တာအိုနယ်မြေများနှင့် နှိုင်းယှဉ်၍မရနိုင်လောက်အောင်ပင်။တစ်ဖက်လူသည် ရန်လိုသောမှတ်ချက်များဖြင့် အရင် ရန်စခဲ့သည် ဆိုသော်လည်း ဤလုပ်ရပ်သည် နက်ရှိုင်းသော ရန်ငြိုးတစ်ခု မဟုတ်သဖြင့် ဤမျှထိ ပြင်းထန်စွာ တိုက်ခိုက်ရန် မလိုအပ်ချေ။သို့သော် ခုံးဝူတောက်သည် သူ့ကို တိုက်ရိုက်သတ်ဖြတ်ရန် အမိန့်ပေးခဲ့သည်။သူသည် အစစ်အမှန်နဂါး ရှေးဟောင်းမျိုးနွယ်စုထံမှ လက်စားချေမှုကို ခံရမည်အား အမှန်တကယ်ပင် မကြောက်ရွံသလော...သို့သော် ခုံးကျန်းယွဲ့နှင့် တခြားသူများသည် ပတ်ဝန်းကျင်ရှိ ထိတ်လန့်နေသော အကြည့်များကို လုံးလုံးလျားလျား လျစ်လျူရှုထားခဲ့ကြ၏။သူတို့အတွက် ခုံးဝူတောက်၏ဆန္ဒသည် သူတို့ အချိန်လေဟာနယ် တားမြစ်နယ်မြေ၏ဆန္ဒပင်။ငါးရှဥ့်တစ်ကောင် အသတ်ခံရတယ်ဆိုတော့ကော ဘာဖြစ်မည်နည်း...ဘာကို ကြောက်စရာ ရှိသနည်း..."ခုံးဝူတောက်... မင်း တကယ်ကြီး ရဲတင်းတာပဲ..."လုံယန်၏မျက်နှာ ပြာနှမ်းသွားသည်။မည်သို့ပင်ဆိုစေကာမူ ဤလျှို့ဝှက်နယ်မြေသည် ကောင်းကင်ဘုံများ၏ နယ်မြေအသီးသီးတွင် ပွင့်လာပေမည်။ ကောင်းကင်ဘုံများ၏ နယ်မြေအသီးသီးက ပူးတွဲသဘောတူညီထားသော စည်းမျဉ်းများအရ လူငယ်မျိုးဆက်များသည် ကောင်းကင်ဘုံများ၏ နယ်မြေအသီးသီးကို ဖြတ်သန်း ခရီးသွားနိုင်သော်လည်း လူကြီးပိုင်းမျိုးဆက်များသည် ဝင်ရောက်စွက်ဖက်၍ မရနိုင်ချေ။ထို့ပြင် ဤလျှို့ဝှက်နယ်မြေခရီးစဉ်သည် အစပြုရုံသာ ရှိသေးပေ၏။ရှေးဟောင်း အင်အားစု အများအပြားသည် သူတို့၏ အမွေဆက်ခံသူများအတွက် အစောင့်အရှောက်များကို စီစဉ်ပေးရန် အလျင်လိုမနေကြရာ အစစ်အမှန်နဂါး ရှေးဟောင်းမျိုးနွယ်စုသည်လည်း ချွင်းချက်မဟုတ်ပေ။သူသည်လည်း မြေအောက်ကမ္ဘာကိုးထပ်မြို့တော်သို့ ပထမဆုံး ရောက်ရှိလာသော အစစ်အမှန်နဂါး ရှေးဟောင်းမျိုးနွယ်စု၏ ပါရမီရှင်များအနက်မှ တစ်ဦးပင်။လုံအောင်းယွီနှင့် တခြား မဟာနဂါးဘုရင် အမွေဆက်ခံသူငါးဦးသည် အချိန်အတန်ကြာမှသာ ရောက်ရှိလာပေမည်။ယခုအချိန်၌ သူသည် လုံးလုံးလျားလျား အထီးကျန်ပြီး ကူကယ်ရာမဲ့ ဖြစ်နေလေပြီ။သူ၏စိတ်နှလုံးသားထဲရှိ ကြောက်ရွံ့မှုများ ပို၍အားကောင်းလာခဲ့သည်။သူ ဂုဏ်သိက္ခာကို မည်သို့ ဂရုစိုက်နိုင်တော့မည်နည်း။လုံယန်သည် ဖားယားပြီး ကိုးရို့ကားရားဆန်သော အပြုံးတစ်ခုကို အတင်းအကြပ် ဖန်တီးလိုက်သည်။ "ခုံးဝူတောက်... နတ်ဘုရားသားတော်အရှင် ခုံးဝူတောက်.... အစောပိုင်းက သခင့်ကို စော်ကားပြီး သေခြင်းတရားကို ရှာဖွေခဲ့တာ ကျွန်တော်ပါ... နတ်ဘုရားသားတော်အရှင် ကျေးဇူးပြုပြီးတော့ သနားညှာတာပြီး ကျွန်တော့်ရဲ့အသက်ကို ချမ်းသာပေးဖို့ တောင်းပန်ပါတယ်...""နတ်ဘုရားသားတော်အရှင်ကို တောင်းပန်ဖို့အတွက် ဘယ်လို တန်ကြေးမျိုးကိုပဲဖြစ်ဖြစ် ပေးဆပ်ဖို့ ကျွန်တော် ဆန္ဒရှိပါတယ်..."စောင့်ကြည့်နေသော ကျင့်ကြံသူ အများအပြားသည် လုံယန်က ရုတ်တရက် နှိမ့်ချသော ဟန်ပန်ဖြင့် သနားခံလိုက်သည်ကို မြင်တွေ့မိလေ၏။အံ့အားသင့်နေစဉ်မှာပင် သူတို့သည် မထီမဲ့မြင်ပြုမှုနှင့် သူတစ်ပါး အခက်တွေ့သည်ကို ဝမ်းသာမှုတချို့ကိုလည်း ခံစားလိုက်ရသည်။အစစ်အမှန်နဂါး ရှေးဟောင်းမျိုးနွယ်စုသည် စွမ်းအားကြီးမားသော ရှေးဟောင်းအင်အားစုတစ်ခုအနေဖြင့် အမြဲတစေ လွှမ်းမိုးချုပ်ကိုင်ပြီး မောက်မာထောင်လွှားစွာ ပြုမူလေ့ရှိသည်။ယခုအချိန်၌ သူတို့၏ ထိပ်တန်းအမွေဆက်ခံသူ ဖြစ်သော လုံယန်သည် သံပြားတစ်ချပ်ကို ကန်မိပြီး ခုံးဝူတောက်၏ ပြတ်ပြတ်သားသား အနိုင်ယူခြင်းကို ခံလိုက်ရလေပြီ။ဤအရာက သူတို့အား ထူးဆန်းသော စိတ်ကျေနပ်မှု ခံစားချက်တစ်ခုကိုလည်း ဖြစ်ပေါ်စေခဲ့သည်။လှုပ်ရှားတော့မည့် ခုံးကျန်းယွဲ့တို့လူစုသည် အနည်းငယ် တုံ့ဆိုင်းသွားကြ၏။သူတို့သည် သူတို့၏ နတ်ဘုရားသားတော်အရှင်ထံသို့ မေးမြန်းလိုသည့် အကြည့်တစ်ချက်ဖြင့် ကြည့်လိုက်ကြသည်။ယခုအချိန်၌ ခုံးဝူတောက်သည် သူတို့၏အမာခံကျောရိုး ဖြစ်နေလေပြီ။ဤကိစ္စ၏ရလဒ်ကို သူတို့၏ နတ်ဘုရားသားတော်အရှင်က ဆုံးဖြတ်ပေးပေလိမ့်မည်။ခုံးဝူတောက်က မျက်ခုံးတစ်ဖက် ပင့်လိုက်ပြီး သူ၏ နှုတ်ခမ်းထောင့်တွင် အဓိပ္ပာယ်ပါသော အပြုံးတစ်ခု ဖြစ်ပေါ်လာသည်။"ဟား ဟား... တကယ်တော့ မင်းရဲ့ အခုလို နှိမ့်ချတဲ့ သနားခံမှုထက်... အရင်က မင်းရဲ့ မောက်မာပြီး ထိန်းချုပ်လို့မရတဲ့ အသွင်အပြင်ကို ငါ ပိုပြီးသဘောကျတယ်...""မင်း..."လုံယန်၏ မျက်နှာအမူအရာ ချက်ချင်းအေးခဲတောင့်တင်းသွားပေ၏။ကောင်းပြီ...ကောင်းပြီ...ကောင်းပြီလေ...တခြားသူ၏အမိုးအောက်တွင် ရှိနေသောအခါ ဦးညွှတ်ရုံမှတစ်ပါး တခြားရွေးချယ်စရာ မရှိသဖြင့် သူ သည်းခံရပေမည်။သူက အနေရခက်စွာ ဆက်လက်၍ ပြုံးပြပြီး ခုံးဝူတောက်ထံမှ ခွင့်လွှတ်မှု တောင်းခံရန် စဉ်းစားနေစဉ်မှာပင်..."သူ့ကို သတ်လိုက်..."ခုံးဝူတောက်၏အပြုံးသည် ချက်ချင်းပျောက်ကွယ်သွားပြီး သူက အေးစက်စွာ ပြောလိုက်၏။ဤစကားလုံးလေးလုံးသည် သေဒဏ်ချမှတ်လိုက်သကဲ့သို့ ဖြစ်ပြီး လုံယန်ကို ငရဲချောက်နက်ထဲသို့ လုံးလုံးလျားလျား တွန်းချလိုက်ကာ သူ၏ နတ်ဘုရားစိတ်ဝိညာဉ်ကို အထိန်းအကွပ်မဲ့စွာ တုန်ယင်သွားစေခဲ့သည်။"မဟုတ်ဘူး... ငါ့ရဲ့အဖေက နဂါးနီဘုရင်ပဲ... တကယ်လို့ မင်း ငါ့ကို သတ်ဖို့ ရဲတင်းရင်... သူက သေချာပေါက်..."ဝုန်း...သူ၏နံဘေးတွင် ရှိနေသော ခုံးကျန်းယွဲ့က သူမ၏ နတ်ဘုရားသားတော်အရှင်ရှေ့တွင် သူ့ကို မောက်မာခွင့် မည်သို့ ပေးမည်နည်း။သူ၏စကား မဆုံးမီမှာပင် သူမသည် ကြောက်မက်ဖွယ်ကောင်းသော စွမ်းအားကို တိုက်ရိုက်ထုတ်လွှတ်လိုက်ပြီး လုံယန်ကို လုံးလုံးလျားလျား ဖိနှိပ်ကာ ကန့်သတ်လိုက်၏။တစ်ချိန်တည်းမှာပင် သူမ၏လက်ဝါးက လုံယန်၏ ငယ်ထိပ်ကို ဆုပ်ကိုင်လိုက်ပြီး ကြီးမားသော စုပ်ယူမှု စွမ်းအားလှိုင်းတစ်ရပ်က သူမ၏လက်ဝါးမှ ပေါက်ကွဲထွက်လာသည်။လုံးလုံးလျားလျား ဖိနှိပ်ခံထားရပြီး ကန့်သတ်ခံထားရသော လုံယန်သည် ရူးသွပ်စွာ ရုန်းကန်ခဲ့သော်လည်း ထိုအရာက အချည်းနှီးသာ ဖြစ်ခဲ့သည်။သူ၏ခန္ဓာကိုယ်တစ်ခုလုံးရှိ သွေးများ ဆူပွက်နေသည်ကိုသာ သူ ခံစားလိုက်ရသည်။သူ၏ခန္ဓာကိုယ်ထဲတွင် ပါဝင်သော အစစ်အမှန် နဂါး သွေးမျိုးဆက်သည် ကြောက်မက်ဖွယ်ကောင်းသော စွမ်းအားတစ်ခုကြောင့် တဖြည်းဖြည်း ဖယ်ရှားခြင်း ခံနေရလေ၏။ဤအချိန်အခိုက်အတန့်တွင် လုံယန်၏စိတ်နှလုံးသားထဲရှိ အံ့အားသင့်မှုနှင့် ကြောက်ရွံ့မှုတို့သည် အထွတ်အထိပ်သို့ ရောက်ရှိသွားလေပြီ။မူလက ခုံးဝူတောက်သည် လုံလောက်အောင် ကြောက်စရာ ကောင်းနေပြီဟု သူ တွေးထင်ခဲ့သည်။တစ်ဖက်လူ၏ နောက်လိုက်မျှသာ ဖြစ်သော ခုံးကျန်းယွဲ့သည်လည်း ဤကဲ့သို့ ကြောက်မက်ဖွယ်ကောင်းသော စွမ်းအားကို ပိုင်ဆိုင်ထားလိမ့်မည်ဟု သူ မျှော်လင့်မထားခဲ့ချေ။ရှေးဟောင်းပါရမီရှင်တစ်ဦးဖြစ်သော သူသည် သူမ၏ရှေ့တွင် ခုခံရန် အမှန်တကယ်ကို စွမ်းအားမဲ့နေသည်။"မဟုတ်ဘူး... မလုပ်ပါနဲ့..."မရေမတွက်နိုင်သောလူများ၏ ထိတ်လန့်နေသော အကြည့်များအောက်တွင် လုံယန်၏ ချီစွမ်းအားနှင့် သွေးများ အဆက်မပြတ် စုပ်ယူခြင်း ခံနေရသည်။သူ၏ရုပ်ခန္ဓာကိုယ်သည် တဖြည်းဖြည်း တွန့်လိမ်ပြီး အိုမင်းလာကာ သူ သေဆုံးလုနီးပါး ဖြစ်နေလေပြီ။ထို့ပြင် ခုံးကျန်းယွဲ့၏ လုပ်ရပ်များသည် လုံယန်၏ ခန္ဓာကိုယ်အတွင်းရှိ ကာကွယ်ရေး ကန့်သတ်ချက် တစ်ခုကို အသက်သွင်းလိုက်မိပုံရသည်။ဝေါင်း...ကောင်းကင်ကို တုန်ခါစေသော နဂါးဟိန်းသံကြီး ပဲ့တင်ထပ်လာကာ တလိမ့်လိမ့်ထနေသော နဂါးချီစွမ်းအင်သည် ကျယ်ပြန့်သော သမုဒ္ဒရာတစ်စင်းအလား သူ၏ခန္ဓာကိုယ်မှ ရူးသွပ်စွာ ပေါက်ကွဲထွက်လာသည်။နောက်ဆုံးတွင် ထိုအရာသည် ကြောက်မက်ဖွယ်ကောင်းသော အပူချိန်ကို ထုတ်လွှတ်နေသည့် ဧရာမ မီးတောက်နဂါးနီ ပုံရိပ်ယောင်ကြီးတစ်ခုအဖြစ်သို့ စုစည်းသွားပေ၏။ဧရာမ နဂါးပုံရိပ်ယောင်သည် ခုံးကျန်းယွဲ့၏ ဖိနှိပ်မှုနှင့် ကန့်သတ်ချက်မှ ရုန်းထွက်ချင်ပုံရကာ ရူးသွပ်စွာ ရုန်းကန်ပြီး ခုခံနေခဲ့သည်။"ငါးရှဥ့်​ကောင်... မင်းက ဘယ်လိုများ ရိုင်းစိုင်းဖို့ ရဲတင်းရတာလဲ"သို့သော် ခုံးဝူတောက်၏အသံ ရုတ်တရက် ထွက်ပေါ်လာပြီး လူတိုင်းသည် အလွန်အမင်း ကြောက်မက်ဖွယ်ကောင်းသော မမြင်နိုင်သည့် ဖိအားတစ်ခု ဆင်းသက်လာသည်ကို ခံစားလိုက်ရသည်။ ဤသည်က ရှေးဟောင်း နတ်ဘုရားတောင်ကြီးတစ်လုံး ရုတ်တရက် ဆင်းသက်လာသကဲ့သို့ သူတို့ကို မွန်းကြပ်လာစေကာ အသက်ရှူ၍မရနိုင်အောင် ဖြစ်သွားစေခဲ့သည်။လုံယန်၏သွေးမျိုးဆက် အနက်ရှိုင်းဆုံး နေရာမှ ထွက်ပေါ်လာသော နဂါးနီ ပုံရိပ်ယောင်သည်လည်း ဤကြောက်မက်ဖွယ်ကောင်းသော စွမ်းအားကြောင့် ချက်ချင်းဖိနှိပ်ခံလိုက်ရပြီး အချိန်တခဏအတွင်း အေးခဲတောင့်တင်းသွားသော တိတ်ဆိတ်ခြင်းသို့ ကျရောက်သွားတော့သည်။ခုံးကျန်းယွဲ့သည်လည်း တုံ့ဆိုင်းမနေခဲ့ချေ။ဤအလွန်ကောင်းမွန်သော အခွင့်အရေးကို အသုံးချကာ သူမသည် ဤနဂါးနီပုံရိပ်ယောင်ကို လုံယန်၏ ခန္ဓာကိုယ်မှ လုံးလုံးလျားလျား ဖယ်ရှားလိုက်၏။ထိုအရာသည် ကျယ်ပြန့်သော နဂါး အရှိန်အဝါကို ထုတ်လွှတ်နေသည့် ကြည်လင်သော သွေးတစ်စက် အဖြစ်သို့ အရည်ပျော်သွားတော့သည်။ဤသည်မှာအစစ်အမှန် နဂါးသွေးအနှစ်သာရဖြစ်ပြီးအစစ်အမှန်နဂါး ရှေးဟောင်းမျိုးနွယ်စု၏ ပါရမီရှင်များ အားကောင်းနိုင်ရခြင်း၏ အခြေခံ အကြောင်းအရင်းပင်။ဤသွေးစက်လေးတစ်စက်တည်း၌ပင် နဂါးချီစွမ်းအင်များ အမြောက်အများပါဝင်ပြီး ကြောက်မက်ဖွယ်ကောင်းသော သွေးချီစွမ်းအားများကို ထုတ်လွှတ်နေကာ ပတ်ဝန်းကျင်ရှိ ဟင်းလင်းပြင်ကို အနည်းငယ် လှိုင်းထသွားစေသည်။တစ်ဖက်လူ၏ခန္ဓာကိုယ်မှ အစစ်အမှန် နဂါးသွေးအနှစ်သာရကို လုံးလုံးလျားလျား ထုတ်ယူပြီးနောက်လုံယန်၏တန်ဖိုးများအားလုံး ဆုံးရှုံးသွားခဲ့ပေ၏။ခုံးကျန်းယွဲ့၏ ပေါ့ပေါ့ပါးပါး လက်ဝါးရိုက်ချက် တစ်ချက်ဖြင့် သူ့ကို သွေးမြူများ ပြည့်နှက်နေသော တိန်တိုက်တစ်ခုအဖြစ် ခြေမွှဖျက်ဆီးလိုက်သည်။ပတ်ဝန်းကျင်နေရာတဝိုက်လုံး သုသာန်တစပြင်ကဲ့သို့ တိတ်ဆိတ်သွားသည်။လုံယန် ရိုက်သတ်ခံလိုက်ရသည့် ကြီးမားသောအမြင်အာရုံရိုက်ခတ်မှုနှင့် နှိုင်းယှဉ်ပါက သူတို့၏နှလုံးသားများ ပို၍ပင် တုန်ရီသွားခဲ့သည်။ခုံးဝူတောက် အစောပိုင်းက ထုတ်လွှတ်လိုက်သော ကြောက်မက်ဖွယ်ကောင်းသည့် အရှိန်အဝါ....ထိုစွမ်းအားသည် သူတို့အပေါ် ရည်ရွယ်ထားခြင်း မဟုတ်သည့်တိုင် သူတို့၏ဦးရေပြားကို ထုံကျဉ်သွားစေပြီး သူတို့၏ခန္ဓာကိုယ်များကို အထိန်းအကွပ်မဲ့စွာ တုန်ယင်သွားစေခဲ့သည်။ပျံ့နှံ့လာသော အရှိန်အဝါ အရိပ်အယောင်လေး တစ်ခုတည်းကပင် ထိုကဲ့သို့ ကြောက်မက်ဖွယ်ကောင်းသော စွမ်းအားမျိုး ပါဝင်နေသည်။အကယ်၍ ခုံးဝူတောက်သာ သူ၏စွမ်းအားပြည့်ကို ထုတ်လွှတ်လိုက်မည်ဆိုပါက မည်မျှထိ ကြောက်မက်ဖွယ်ကောင်းမည်ကို စိတ်ကူးယဥ်တွေးတောကြည့်ရန် ခက်ခဲလှသည်။လုံယန်ကို ခုံးဝူတောက်ကိုယ်တိုင် ဖိနှိပ်ခဲ့ခြင်း မဟုတ်လျှင်ပင် တစ်ဖက်လူက ဤနေရာရှိ ပါရမီရှင်များထံသို့ ယူဆောင်လာပေးသော ခြိမ်းခြောက်နိုင်စွမ်းသည် ခုံးကျန်းယွဲ့တို့လူစုထက် များစွာပို၍ ကြောက်မက်ဖွယ်ကောင်းသည်။"နတ်ဘုရားသားတော်အရှင်"ဤအချိန်အခိုက်အတန့်တွင် ခုံးကျန်းယွဲ့သည် ခုံးဝူတောက်၏ရှေ့သို့ ရောက်ရှိနေပြီဖြစ်ပြီး အစစ်အမှန် နဂါးသွေးအနှစ်သာရကို လက်နှစ်ဖက်ဖြင့်ကိုင်ဆောင်ကာ ရိုသေလေးစားစွာ ပေးအပ်လိုက်၏။ထိုအရာကို ယူပြီးနောက် ခုံးဝူတောက်က ပေါ့ပေါ့ပါးပါး တစ်ချက်ကြည့်လိုက်ပြီး ခပ်သဲ့သဲ့ လှောင်ပြောင်ကာ ခုံးကျန်းယွဲ့ထံသို့ ပြန်ပစ်ပေးလိုက်သည်။"အစစ်အမှန် နဂါးသွေးအနှစ်သာရက အခုလက်ရှိ ငါ့ရဲ့ ရုပ်ခန္ဓာကိုယ်အတွက် သိပ်ပြီးအသုံးမဝင်တော့ဘူး...""မင်း အဲ့ဒါကိုယူပြီး စုပ်ယူလိုက်...""နတ်ဘုရားသားတော်အရှင်ရဲ့ ပေးသနားမှုအတွက် ကျေးဇူးတင်ပါတယ်..."ခုံးကျန်းယွဲ့သည် နတ်ဘုရားသားတော်အရှင်၏ စကားသည် ဥပဒေဖြစ်ကြောင်း သိထားသည်။ထိုကြောင့် သူမသည် ဟန်လုပ်မနေဘဲ တိုက်ရိုက်လက်ခံလိုက်၏။ဤအရာက စောင့်ကြည့်နေသော ကျင့်ကြံသူများအားကို မနာလို ဖြစ်သွားစေခဲ့သည်။နဂါးမျိုးနွယ်စုသည် လောကကြီးတွင် အားအကောင်းဆုံး ရုပ်ခန္ဓာကိုယ်ရှိသည့် မျိုးနွယ်စုပင်။အကယ်၍ တစ်စုံတစ်ယောက်က အစစ်အမှန် နဂါးသွေးအနှစ်သာရတစ်စက်ကို စုပ်ယူနိုင်မည်ဆိုပါက သူ၏ ရုပ်ခန္ဓာကိုယ်ကြံ့ခိုင်မှုကို ကြီးမားစွာ တိုးတက်စေနိုင်သည်။သို့သော် ခုံးဝူတောက်က ထိုအရာကို ပေါ့ပေါ့ပါးပါး ပေးအပ်လိုက်သည်။သို့သော် တွေးခေါ်တတ်သော ပါရမီရှင်တချို့၏ မျက်နှာအမူအရာများ ပို၍ပင် တည်ကြည်လေးနက်လာပေ၏။ဤ အစစ်အမှန် နဂါးသွေးအနှစ်သာရတစ်စက်သည် သူ၏လက်ရှိ ရုပ်ခန္ဓာကိုယ်အတွက် သိပ်မအသုံးဝင်ကြောင်း ခုံးဝူတောက်က အစောပိုင်းတွင် ပြောခဲ့သည်။ဤအရာက မည်သည့်အရာကို ဆိုလိုသနည်း...​ဤသည်မှာ ခုံးဝူတောက်၏ ရုပ်ခန္ဓာကိုယ် ခွန်အားသည် သူတို့ စိတ်ကူးမယဉ်နိုင်သော အဆင့်တစ်ခုသို့ ရောက်ရှိနေပြီဖြစ်ကြောင်း ဆိုလိုခြင်းပင်။ဝီ...ထိုအချိန်မှာပင် ထူးဆန်းသော စွမ်းအားအတက်အကျများသည် ဟင်းလင်းပြင်တွင် လှိုင်းထသွားပေ၏။မရေမတွက်နိုင်သော ကျင့်ကြံသူများ၏ အံ့အားသင့်နေသော အကြည့်များအောက်တွင် အလွန်အမင်း ကြောက်မက်ဖွယ်ကောင်းသော အရှိန်အဝါရှိသည့် အဘိုးအို တစ်ဦးသည် ကောင်းကင်ယံအထက်တွင် ထွက်ပေါ်လာသည်။ထိုအဘိုးအိုသည် ပိုးထည်ဝတ်ရုံကို ဝတ်ဆင်ထားပြီး ခရမ်းရွှေရောင်သရဖူကို ဆောင်းထားကာ တောက်ပစွာ လင်းလက်နေပြီး ကြွယ်ဝသော ဧကရာဇ်အရှိန်အဝါက သူ၏ခန္ဓာကိုယ်ကို ဝန်းရံထားသည်။သူသည် အနည်းငယ် အိုမင်းနေပုံရသော်လည်း သူ၏ ခန္ဓာကိုယ်မှ ထွက်ပေါ်လာသော ကျယ်ပြန့်သည့် သွေး ချီစွမ်းအားများက သူ၏ ပြိုင်ဘက်ကင်းသော အရှိန်အဝါကို ဖော်ပြနေပေ၏။ဤအဘိုးအို ထွက်ပေါ်လာမှုနှင့်အတူ မြေအောက်ကမ္ဘာကိုးထပ်မြို့တော်တစ်ခုလုံး နောက်တစ်ကြိမ် ကသောင်းကနင်း ဖြစ်သွားခဲ့သည်။မရေမတွက်နိုင်သော ကျင့်ကြံသူများ အံ့အားသင့်သွားကြပြီး သူတို့၏မျက်နှာများတွင် မယုံကြည်နိုင်သော အမူအရာများဖြင့် ပြည့်နှက်နေသည်။လူတိုင်း မတုံ့ပြန်နိုင်မီမှာပင် ဤစွမ်းအားကြီးမားသော မဟာဧကရာဇ် အဘိုးအိုသည် သူ၏လက်များကို ပူးဆုပ်ကာ ဦးညွှတ်လိုက်ပြီး သူ၏လေသံတွင် ရိုသေလေးစားမှုများ အပြည့်အဝ ပါဝင်နေပေ၏။"ဒီအဘိုးအိုရှင်းယွီက နတ်ဘုရားသားတော်အရှင် ခုံးဝူတောက်ရဲ့ ရောက်ရှိလာမှုကို ကြိုဆိုဖို့ အထူးလာရောက်ခဲ့တာပါ..."