အခန်း ၁၀၇၃
Vol. 103 Ch. 1073
အခန်း ၁၀၇၃ မုဆိုးကြယ်ကို အသုံးချခြင်း
ဤအစီအရင်ကို မဖျက်ဆီးနိုင်သရွေ့ ဤနေရာမှ လွတ်မြောက်ရန် မဖြစ်နိုင်ချေ။
သူ့တွင် သွေမျိုးဆက် ကျောင်းတော်ထံမှ ရရှိထားသော အစီအရင်ဆိုင်ရာ ဗဟုသုတအချို့ ရှိနှင့်ပြီးသား ဖြစ်၏။ သူသည် ထိုဗဟုသုတများကို အသုံးပြု၍ လှည့်စားခြင်းမျက်နှာဖုံး၏ အစီအရင်အား အနည်းငယ် ပြောင်းလဲခဲ့သည်မှလွဲ၍ အခြား အစီအရင်များကို ကိုယ်တိုင် လက်တွေ့မဖန်တီးဖူးသေးသော်လည်း သီအိုရီအရမူ သူသည် အလွန် နှံ့စပ်ကျွမ်းကျင်သူတစ်ဦး ဖြစ်ပေသည်။
ထိုဗဟုသုတများအရ မြို့တော်တစ်ခုလုံးကို လွှမ်းခြုံနိုင်သော ယခုကဲ့သို့ အလွန်ကြီးမားသည့် အစီအရင်ကြီးများသည် သာမန် အစီအရင်ငယ်များထက် စွမ်းအင်အမြောက်အမြား ပိုမိုလိုအပ်သဖြင့် အစီအရင် ဗဟိုချက်များစွာ ရှိနေရမည် ဖြစ်ကြောင်း သူ သိရှိပေသည်။
သူ၏ ခန့်မှန်းချက်အရ ထိုအစီအရင်ဗဟိုချက် အများစုမှာ တော်ဝင်မြို့တော်၏ အစွန်းပတ်ပတ်လည်တွင် တည်ရှိနေနိုင်ချေ အလွန်များ၏။ ကောင်းကင်ပြင်ထက်က ထူးဆန်းသော စွမ်းအင်လိုင်းများကို ကြည့်ခြင်းအားဖြင့် ထိုဗဟိုချက်များကို ရှာဖွေနိုင်လိမ့်မည်ဟု သူ ယုံကြည်ထားသည်။
သို့သော် အခက်ခဲဆုံး အပိုင်းမှာ ရန်သူက အရန်အနေဖြင့် မြို့တွင်း၌ လျှို့ဝှက် ရေးဆွဲထားနိုင်သည့် အစီအရင် ဗဟိုချက်များကို ရှာဖွေရန် ဖြစ်ပေသည်။ ဤရန်သူသည် မိမိ၏ ဝှက်ဖဲအားလုံးကို တစ်နေရာတည်းတွင် စုပုံထားလောက်သည်အထိ မိုက်မဲမည့်သူ မဟုတ်ကြောင်း သေချာသည်။
"ငါ သေသွားတာနဲ့ မင်း လွတ်လပ်ခွင့်ရမှာက ဘာဆိုင်လို့လဲ။ ငါ မင်းကို သိတောင်မသိဘူး။ ငါ့မှာ မင်းနဲ့ ဘာရန်ငြိုးမှ ရှိခဲ့တာလည်း မဟုတ်ဘူး။ အဲဒါကို ဘာဖြစ်လို့လဲ" လုံချန်းက ထပ်မံ၍ မေးမြန်းလိုက်သည်။
သူ၏ စိတ်ထဲတွင်မူ ကောင်းကင်က စွမ်းအင်လိုင်းများကို အခြေခံကာ ထိုမန္တန်အစီအရင်၏ ဝိညာဉ် ဗဟိုချက်များ မည်သည့်နေရာတွင် ရှိနေနိုင်သနည်းဆိုသည်အား အမြန်ပင် တွက်ချက်နေခဲ့ပြီ ဖြစ်၏။
"အဲဒါတွေက အရေးမကြီးပါဘူး။ မင်းက သေရတော့မှာပဲဥစ္စာ။ ငါ ဘာဖြစ်လို့ တစ်စက္ကန့်လေးတောင် အချိန်ဖြုန်းနေရဦးမှာလဲ။ ဒီတစ်ကြိမ်တော့ ဘယ်ရှေးဟောင်းဝိညာဉ်ကမှ မင်းကို လာကယ်နိုင်မှာ မဟုတ်ဘူး။ ဒါဟာ မင်း မြင်တွေ့ရမယ့် နောက်ဆုံးနေ့ ဖြစ်ပါစေ" ကောင်လေးက ဆိုလိုက်ရင်း လက်ကို ကောင်းကင်ယံထက်သို့ မြှောက်လိုက်သည်။
ရန်သူ့ထံမှ တိုက်ခိုက်မှု ရောက်ရှိလာတော့မည်ကို သိရှိသဖြင့် လုံချန်းသည် အချိန်ဓားအား ထုတ်ယူလိုက်၏။ ဓားနှင့်အတူ ၎င်းကို ဝန်းရံထားသော မှောင်မိုက်သည့် စွမ်းအင်များပါ ထွက်ပေါ်လာခဲ့သည်။ ဓား၏ ပတ်ပတ်လည်တွင် အချိန်နိယာမများမှာ မတည်မငြိမ် ဖြစ်လာခဲ့ပြီး ဟင်းလင်းပြင်အက်ကွဲကြောင်း အချို့ပင် ဖြစ်ပေါ်လာခဲ့ရ၏။ လုံချန်း၏ မျက်နှာထက်တွင်လည်း အလွန်ထက်မြက်သော အမူအရာများဖြင့် ပြည့်နှက်သွားခဲ့ပြီး သူသည် ယခင်ကနှင့်မတူဘဲ လုံးဝ ကွဲပြားခြားနားသော လူတစ်ယောက်ပမာ ဖြစ်သွားခဲ့ရသည်။
ဝိညာဉ်ဗဟိုချက်များ ရှိရာနေရာကို အတိအကျသိရန် သူ့အတွက် အချိန်အနည်းငယ် လိုအပ်သေးသော်လည်း ရန်သူ့တိုက်ခိုက်မှုများ ရောက်ရှိလာတော့မည့် အခြေအနေအောက်တွင် သူ ဤအတိုင်း ငြိမ်ခံနေ၍ မရချေ။ သူ ယခုချက်ချင်း အရေးပေါ် အရေးယူဆောင်ရွက်ရမည် ဖြစ်သည်။
သူသည် အစီအရင်ဗဟိုချက်များ ရှိနိုင်မည့် လမ်းကြောင်း အကြမ်းဖျင်းဆီသို့ ဦးတည်ကာ ကောင်းကင်ယံထက်သို့ ပျံသန်းရန် ဆုံးဖြတ်လိုက်သည်။ တိုက်ခိုက်ခြင်းနှင့် ပတ်သက်၍မူ သူ ယခုအချိန်တွင် တိုက်ခိုက်ရန် စိတ်ကူးမရှိသေးချေ။
မိမိ ရှေ့မှ ရောက်ရှိနေသော သူသည် အလွန်အမင်း အစွမ်းထက်ကြောင်း သူ ခံစားမိပေသည်။ မိမိဘက်က အားနည်းချက် ရှိနေသည့် အခြေအနေမျိုးတွင် အသက်စွန့် တိုက်ခိုက်ခြင်းက ဖြစ်နိုင်သော်လည်း အနည်းဆုံးတော့ ၎င်းက မိမိ စိတ်ကြိုက်ဖန်တီးထားသည့် အခြေအနေမျိုးအောက်တွင်သာ ဖြစ်သင့်ပေသည်။ သူသည် မိမိ၏ နေရာရွှေ့ပြောင်းခြင်း အစွမ်းကို လွတ်လပ်စွာ အသုံးပြုနိုင်သည့် အချိန်ကျမှသာ မည်သို့ လုပ်နိုင်မည်ကို စမ်းသပ်ကြည့်ချင်သည်။
သူ ကောင်းကင်ယံထက်သို့ ပျံသန်းရန် ဆုံးဖြတ်လိုက်စဉ်မှာပင် ဧကရာဇ်လုက သူ့ရှေ့သို့ ပိတ်ရပ်လိုက်သည်ကို မြင်လိုက်ရသဖြင့် ခြေလှမ်းများ ရပ်တန့်သွားခဲ့ရ၏။
'ဟင်... အဲဒီကောင်က ငါ့ကို တိုက်ခိုက်တော့မှာကို ဒီဧကရာဇ်က ဘာဖြစ်လို့ ရှေ့ကနေ ဝင်ခံပေးနေတာလဲ။ ငါ့ကို ကာကွယ်ပေးဖို့ ကြိုးစားနေတာလား။ သူက ငါ့ကို တကယ်ပဲ ကယ်တင်ချင်နေတာလား' လုံချန်းက အံ့ဩတုန်လှုပ်စွာဖြင့် တွေးမိသွားသည်။
မိမိ လွဲချော်နေသော ကွင်းဆက်တစ်ခုခု ရှိနေသေးကြောင်း သူ သေချာပေါက် သိလိုက်ရ၏။ ထိုလူသည် မိမိကို ကာကွယ်ရန် ကြိုးစားနေခြင်း၌ မုချ အကြောင်းပြချက်တစ်ခု ရှိရမည်ဖြစ်ပြီး ၎င်းက လုံချန်းအပေါ် ထားရှိသော မေတ္တာကြောင့်တော့ မဟုတ်သည်မှာ သေချာလှပေသည်။
"ဟိုလေ... အင်မော်တယ်ကမ္ဘာက တမန်တော်ကြီး။ ကျေးဇူးပြုပြီး တိုက်ခိုက်ခြင်း မပြုပါနဲ့ဦး။ သူက ကျွန်တော့်ရဲ့သမီးတော်ကို ဘယ်မှန်းမသိတဲ့ နေရာတစ်ခုဆီ ပို့လိုက်ပြီ။ တကယ်လို့ ခင်ဗျားက သူ့ကို သတ်ပစ်လိုက်ရင် ကျွန်တော့် သမီးကို ဘယ်တော့မှ ပြန်တွေ့ရတော့မှာ မဟုတ်ဘူး။ ကျေးဇူးပြုပြီး သူ့ကို သတ်တာကလွဲလို့ ကြိုက်တာလုပ်ပါ။ အနည်းဆုံးတော့ ကျွန်တော့်သမီးကို ပြန်ရှာတွေ့တဲ့အထိ စောင့်ဆိုင်းပေးပါ" ဧကရာဇ်က ကျယ်လောင်စွာဖြင့် လှမ်း၍ အော်ဟစ်လိုက်သည်။
"လုံချန်းရဲ့ သတင်းကို ခင်ဗျားတို့ဆီ ပေးပို့ခဲ့တာ ကျွန်တော်ပါပဲ။ ကျေးဇူးပြုပြီး ဒီအသေးအမွှား ကိစ္စလေးကို ကူညီပေးပါ။ ကျွန်တော်က အင်မော်တယ်ကမ္ဘာရဲ့ မိတ်ဆွေတစ်ယောက်ပါ" သူက ထပ်မံ၍ ဖြည့်စွက်ပြောဆိုလိုက်၏။
"အင်မော်တယ်ကမ္ဘာ ဟုတ်လား။ သူက အဲဒီက လာတာလား။ ပြီးတော့ ခင်ဗျားကပဲ သူ့ကို သတင်းပေးလိုက်တာပေါ့" လုံချန်းက ယောက္ခမတော်ကို မည်သို့ ပြန်ပြောရမှန်း မသိသည့် အမူအရာဖြင့် မေးလိုက်သည်။ အရာရာက မှန်ကန်နေခဲ့ပြီ ဖြစ်၏။ သူတို့နှစ်ဦးစလုံး ပူးပေါင်းကြံစည်ထားကြခြင်း ဖြစ်ပေသည်။ ထို့ကြောင့်ပင် ဧကရာဇ်သည် လုံချန်းကို ဤနေရာတွင် မရမက အချိန်ဆွဲထားချင်ခဲ့ခြင်း ဖြစ်၏။ မိမိကိုယ်တိုင် လုံချန်းကို လှည့်စားရန်မဟုတ်ဘဲ အခြားတစ်ယောက်က လုံချန်းအား အပြတ်ရှင်းနိုင်ရန်အတွက် လမ်းခင်းပေးထားခြင်း ဖြစ်ပေသည်။
အရာရာကို သဘောပေါက်သွားသောအခါ လုံချန်းသည် စိတ်ပျက်အားလျော့သည့် အရိပ်အယောင်မျိုးပင် မပြခဲ့ချေ။ ၎င်းက သူ မျှော်လင့်မထားသည့် အရာမျိုး မဟုတ်သောကြောင့် ဖြစ်သည်။ သူသည် သံသယဖြစ်ဖွယ်ကောင်းသော ယောက္ခမတော်ကို မည်သည့်အချိန်ကမျှ အထင်ကြီးလေးစားခြင်း မရှိခဲ့ချေ။ ဧကရာဇ်အနေဖြင့် ဤမျှအထိ အောက်တန်းကျသော နည်းလမ်းကို အသုံးပြုလိမ့်မည်ဟု မထင်မှတ်ထားခဲ့သော်လည်း အံ့ဩတုန်လှုပ်သွားခြင်းမျိုးမူ မရှိချေ။
'အင်မော်တယ်ကမ္ဘာရဲ့ တမန်တော်လား၊ အင်မော်တယ်ကမ္ဘာက ဘာဖြစ်လို့ နင့်ကို အသေရချင်နေရတာလဲ'
ရွှင်း၏ အသံက လုံချန်း၏ စိတ်ထဲတွင် ထွက်ပေါ်လာခဲ့သည်။ သူမကိုယ်တိုင်လည်း ဤအမှန်တရားကြောင့် အံ့ဩသွားခဲ့ရရှာ၏။
"ဘယ်သူသိမှာလဲ။ ဖြစ်နိုင်တာက ငါ့ရဲ့ သွေးမျိုးဆက် စွမ်းအားကြောင့် ဖြစ်လိမ့်မယ်။ ဒါမှမဟုတ် သူတော်စင်ဘုရင်ကြောင့်လည်း ဖြစ်နိုင်တာပဲ။ သူက အင်မော်တယ်ကမ္ဘာကို သွားခဲ့တာလေ။ အဲဒီမှာ ရန်သူတွေ ရှိခဲ့တာ နေမှာပေါ့။ ငါက သူတော်စင်ဘုရင်ရဲ့ အမွေဆက်ခံသူလည်း ဖြစ်နေတော့ သူတို့က ငါ့ကို သေစေချင်တာ ဖြစ်နိုင်တယ်။ ဘာပဲဖြစ်ဖြစ် ငါ့ကိုယ်ငါတော့ အသေခံလို့ မဖြစ်ဘူး" လုံချန်းက ဝူလျာကို စိုက်ကြည့်ရင်း ပြန်လည် ဖြေကြားလိုက်သည်။
သူသည် မည်သည့်စကားမျှ ထပ်မံမဆိုတော့ဘဲ ကောင်းကင်ယံထက်သို့ စတင်ပျံတက်လိုက်၏။
"မင်းက အင်မော်တယ်ကမ္ဘာက လာတာဆိုတော့လည်း ကောင်းပြီလေ။ မင်း ငါ့ကို သေစေချင်တာလား... ရတယ်။ လာပြီး သတ်လိုက်စမ်း" လုံချန်းက ရန်သူကို စိုက်ကြည့်ရင်း ကြေညာလိုက်သည်။
သူ၏ အစီအစဉ်မှာ အစီအရင်ကို ဖျက်ဆီးပစ်ရန်အတွက် အစီအရင် ဗဟိုချက်များအား ရှာဖွေရန် ဖြစ်ပြီး ယခုအခါ ၎င်းတို့ မည်သည့်နေရာတွင် ရှိနေသည်ကို သူ ရိပ်မိသွားခဲ့ပြီ ဖြစ်သည်။ သို့သော် ပြဿနာတစ်ခုက ရှိနေပြန်၏။
သူ၏ ခန့်မှန်းချက်အရ ထိုကောင်လေး မိမိကို မဖမ်းမိခင် ထိုနေရာများဆီသို့ အမှီသွားနိုင်မည့် အရှိန်အဟုန်မျိုး သူ့တွင် မရှိချေ။ အကြောင်းမှာ သူ့တွင် နေရာရွှေ့ပြောင်းခြင်း အစွမ်း မရှိသောကြောင့် ဖြစ်သည်။
ထိုအခြေအနေတွင် သူ လုပ်ဆောင်နိုင်သည့် တစ်ခုတည်းသောအရာမှာ လှည့်ကွက်အသေးစားလေးတစ်ခုကို အသုံးပြုရန်ဖြစ်ပြီး သူ သေချာပေါက် လုပ်ဆောင်လိုက်ပြီ ဖြစ်သည်။
သူသည် မိမိနှင့် စိတ်ချင်းဆက်သွယ်ထားသော မုဆိုးကြယ်ကို တိတ်တဆိတ် ထုတ်ယူလိုက်ခြင်း ဖြစ်၏။
မုဆိုးကြယ်သည် အရိပ်သားတော်ဟု လူသိများသော မိစ္ဆာမုဆိုးသားရဲ တစ်ကောင် ဖြစ်သည်။ သူသည် အရိပ်များထဲတွင် အလွန်လွယ်ကူစွာ ပုန်းအောင်းနိုင်စွမ်း ရှိ၏။ ယခုအချိန်အထိ မုဆိုးကြယ်သည် လုံချန်း၏ အရိပ်ထဲတွင် ပုန်းအောင်းနေခဲ့ခြင်း ဖြစ်ပြီး လုံချန်း ကောင်းကင်သို့ မပျံတက်မီလေးတွင်ပင် သူသည် မုဆိုးကြယ်ကို အဝေးသို့ လျှို့ဝှက်စွာ စေလွှတ်ခဲ့ခြင်း ဖြစ်သည်။
စိတ်ချင်း ဆက်သွယ်မှုမှတစ်ဆင့် သူသည် မုဆိုးကြယ်ကို မည်သည့်လမ်းကြောင်းသို့ သွားရမည်၊ မည်သည့်အရာများအား ဖျက်ဆီးပစ်ရမည် ဆိုသည်ကို လမ်းညွှန်ညွှန်ကြားနေခဲ့သည်။ သို့သော် ထိုသို့လုပ်ဆောင်နိုင်ရန်အတွက် မုဆိုးကြယ်တွင် အချိန်လိုအပ်ပေသည်။ အကြောင်းမှာ သူက မြို့တော်၏ အစွန်းတစ်ဖက်မှ အခြားတစ်ဖက်ဆီသို့ အကြိမ်ကြိမ် ဖြတ်သန်းသွားလာရမည် ဖြစ်သောကြောင့် ဖြစ်၏။
ထိုအချိန်ကာလသည် လုံချန်းအနေဖြင့် အသက်ရှင်အောင် ကြံ့ကြံ့ခံ စောင့်ဆိုင်းရမည့် အချိန်ပင် ဖြစ်သည်။ အကယ်၍ အရာရာက အစီအစဉ်အတိုင်း ဖြစ်မြောက်သွားခဲ့လျှင် သူသည် မိမိ၏ ဟင်းလင်း ပြင်နိယာမ စွမ်းအားကို ပြန်လည်အသုံးပြုနိုင်မည်ဖြစ်ပြီး ၎င်းက သူ့အတွက် ကြီးမားသော အထောက်အကူတစ်ခု ဖြစ်လာပေလိမ့်မည်။
ယင်းက မည်သည့်တိုက်ပွဲ၏ အခြေအနေကိုမဆို မိမိဘက်သို့ အသာစီးရအောင် ပြောင်းလဲပစ်နိုင်စွမ်းရှိသော အထွတ်အထိပ် ဟင်းလင်းပြင် နိယာမ စွမ်းအား ဖြစ်သည်။ ထို့အပြင် မိမိ အကျပ်အတည်းဖြစ်လာပါက လွတ်မြောက်တိမ်းရှောင်နိုင်မည့် လမ်းစကိုလည်း ဖန်တီးပေးနိုင်ပေသည်။
"မလုပ်ပါနဲ့ တမန်တော်ကြီး... ဒီမိုက်မဲတဲ့ ကောင်လေးရဲ့ စကားကို နားမယောင်ပါနဲ့။ သူ့ကို မသတ်ပါနဲ့ဦး။ သူ့ကို ဖမ်းဆီးပြီး ကျွန်တော့် သမီးကို ပြန်ရှာတွေ့အောင် ကူညီပေးပြီးမှ သူ့ကို သတ်ပစ်ပါ" ဧကရာဇ်က မိမိ၏သမီးတော် အန္တရာယ်ကြုံတွေ့ရမည်ကို စိုးရိမ်စိတ်ဖြင့် ထပ်မံ၍ ကြားဖြတ်ပြောဆိုလိုက်ပြန်သည်။
သူသည် သူ့အာရုံကို လုံချန်းဘက်သို့ ပြန်လည်လှည့်လိုက်ရင်း ဆက်လက်၍ ဆိုလိုက်၏။ "လုံချန်း... ဘာပဲဖြစ်ဖြစ် နောက်ဆုံးမှာ မင်း သေရမှာကတော့ အတူတူပဲ။ ဒါကြောင့် ငါ့သမီးကို ငါ့ဆီ အခုချက်ချင်း ပြန်အပ်စမ်း။ မင်းက သူ့ကို ပျော်ရွှင်စေချင်တာ မဟုတ်ဘူးလား"