အခန်း ၅၅၅
Vol. 40 Ch. 555
အခန်း ( ၅၅၅ ) - အံ့ဩတုန်လှုပ်ခြင်း၊ အသုံးမကျသော နည်းလမ်းများနှင့် အလိမ်အညာကို ဖော်ထုတ်ခြင်း
ချူးဧကရာဇ်၏ မျက်လုံးများမှာ ပြူးကျယ်သွားကာ မယုံကြည်နိုင်သည့် အမူအရာများ ပြည့်နှက်နေလေသည်။
သူ အမြင်မှားသွားသည်ဟုပင် သံသယဝင်သွားမိ၏။ ဒါ ဘယ်လိုလုပ် ဖြစ်နိုင်မှာလဲ။
ကုချန်၏အသိစိတ်ပင်လယ် နက်ရှိုင်းရာမှ အခြားသော မဟာတာအို ကောင်းကင်တိုင်များ ဘယ်လိုလုပ် ထွက်ပေါ်လာနိုင်ရသနည်း။
နတ်ဆိုးဧကရာဇ်အဆင့် တည်ရှိမှုတစ်ခု ကျင့်ကြံတဲ့ တာအိုဆိုတာ တစ်ခုတည်း သီးသန့်ဖြစ်ရမှာ မဟုတ်ဘူးလား။
ချူးဧကရာဇ်မှာ အံ့ဩတုန်လှုပ်သွားရကာ တစ်ခဏမျှ အသက်ရှူရန်ပင် မေ့လျော့သွားလုနီးပါး ဖြစ်သွားခဲ့သည်။
အဘယ်ကြောင့်ဆိုသော် သူ၏ရှေ့မှ မြင်ကွင်းသည် သူ၏နားလည်နိုင်စွမ်း အကန့်အသတ်များထက် လုံးဝ ကျော်လွန်နေသောကြောင့်ပင် ဖြစ်သည်။
နတ်ဆိုးဧကရာဇ်အဆင့် တည်ရှိမှုတစ်ခု ကျင့်ကြံသော တာအိုသည် တစ်ခုတည်းဖြစ်သည်ဆိုသောအချက်မှာ ကမ္ဘာလောက၏ ပြောင်းလဲ၍မရသော သံမဏိစည်းမျဉ်းတစ်ခုကဲ့သို့ ဖြစ်နေပြီး ချွင်းချက်ဟူသော သူတစ်ဦးတစ်ယောက်မျှ ရှိသည်ကို သူ တစ်ခါမျှ မကြားဖူးခဲ့ချေ။
ချူးဧကရာဇ်၏ ဘဝတစ်လျှောက် သူရရှိခဲ့သော ထိုးထွင်းသိမြင်မှုများကလည်း ဤအချက်ကို သံသယဖြစ်ဖွယ်မရှိ အတည်ပြုပေးခဲ့ပြီး ဖြစ်လေသည်။
သူ နတ်ဆိုးဧကရာဇ်အဆင့်သို့ တက်လှမ်း၍ သူ၏မွေးရာပါ တာအိုအဖြစ် ဖယောင်းတိုင် တာအိုကို ရွေးချယ်ပြီးကတည်းက အခြားသော မဟာတာအိုများ၏ တည်ရှိမှုကို သူ အာရုံမခံနိုင်တော့ချေ။ ထိုခံစားချက်မှာ မဟာတာအိုများ အချင်းချင်း တွန်းကန်နေကြပြီး တစ်ခုကို ရွေးချယ်လိုက်သည်နှင့်တစ်ပြိုင်နက် အခြား မဟာတာအိုများ အားလုံး၏ စွန့်ပစ်ခြင်းကို ခံလိုက်ရသကဲ့သို့ပင် ဖြစ်သည်။
ချူးဧကရာဇ်သည် ဤကမ္ဘာ၏ အဆုံးမဲ့တာအိုများကို စွမ်းအင်အဖြစ် ပြောင်းလဲအသုံးပြုနိုင်သေးသော်လည်း ပိုမိုနက်ရှိုင်းသော မဟာတာအိုများ၏ အရင်းအမြစ်ကိုမူ သူ ဆက်လက် အာရုံမခံနိုင်တော့ပေ။
သူ အာရုံခံနိုင်သည့် တစ်ခုတည်းသောအရာမှာ သူရွေးချယ်ထားသော ဖယောင်းတိုင်တာအိုပင် ဖြစ်လေသည်။
သူသိထားသလောက်ဆိုလျှင် အခြားသော နတ်ဆိုးဧကရာဇ်အဆင့် တည်ရှိမှု အများစုသည်လည်း ဤကဲ့သို့ပင် ဖြစ်ကြ၏။ သူတို့ ကျင့်ကြံမည့် တာအိုကို ရွေးချယ်ပြီးသည်နှင့်တစ်ပြိုင်နက် အခြားသော မဟာတာအိုများ၏ တည်ရှိမှုကို အာရုံမခံနိုင်ကြတော့ချေ။
သို့သော် ဤအရာက ချူးဧကရာဇ်အတွက် လုံးဝ ပြဿနာ မရှိခဲ့ပေ။ မည်သို့ပင်ဆိုစေ သူ ကျင့်ကြံရန် ရွေးချယ်ထားသော တာအို ရှိနေပြီးဖြစ်သလို အခြားသော နတ်ဆိုးဧကရာဇ်အဆင့် တည်ရှိမှုများ အားလုံးသည်လည်း ဤကဲ့သို့ပင်ဖြစ်ရာ စိုးရိမ်ပူပန်စရာ ဘာရှိမည်နည်း။
သို့သော် ယခုအခါ ချူးဧကရာဇ်သည် သူ၏ နားလည်နိုင်စွမ်းထက် များစွာ ကျော်လွန်နေသော အရာတစ်ခုကို မြင်တွေ့လိုက်ရခြင်း ဖြစ်သည်။
သူ၏ရှေ့မှ ဤသူသည် မဟာတာအို ကောင်းကင်တိုင် အများအပြားကို ဆင့်ခေါ်နိုင်သည်တဲ့လော။ ဒါတွေ အားလုံးက သူကျင့်ကြံတဲ့ မဟာတာအိုတွေများ ဖြစ်နေမလော။
ချူးဧကရာဇ်၏ နှလုံးသားထဲတွင် လှိုင်းလုံးကြီးများ ဆူပွက်နေခဲ့သော်လည်း အံ့ဩစရာကောင်းသော အဖြစ်အပျက်များမှာ ပြီးဆုံးသွားခြင်း မရှိသေးချေ။
အဘယ်ကြောင့်ဆိုသော် ကုချန်၏ အသိစိတ်ပင်လယ် နက်ရှိုင်းရာမှ ထို မဟာတာအို ကောင်းကင်တိုင်များသည် အဆုံးအစမရှိသကဲ့သို့ အဆက်မပြတ် ဆက်လက် ထွက်ပေါ်လာနေသောကြောင့်ပင်။
ဓာတ်ကြီးငါးပါး တာအို၊ အချိန်တာအို၊ မြေတာအို.....
အမျိုးမျိုးသော တာအိုများကို ကိုယ်စားပြုသည့် မရေမတွက်နိုင်သော ရှေးဟောင်း ကောင်းကင်တိုင်များ အဆုံးအစမရှိ ရပ်တည်နေကြကာ ခမ်းနားကြီးကျယ်၍ အမြင့်မြတ်ဆုံးသော ချီအငွေ့အသက်များကို ထုတ်လွှတ်နေကြလေသည်။
၎င်းတို့နှင့် ယှဉ်လိုက်ပါက ချူးဧကရာဇ်၏ ဖယောင်းတိုင်တာအိုမှာ အလွန်တရာ သေးငယ်ပြီး အားနည်းနေပုံ ပေါ်လေသည်။
အဘယ်ကြောင့်ဆိုသော် သူ ရင်ဆိုင်နေရသည်မှာ ရိုးရှင်းသော တာအိုတစ်ခုတည်း မဟုတ်ဘဲ ဤကောင်းကင်ဘုံများရှိ တာအိုအားလုံး စုပေါင်းထားသည့် ခမ်းနားကြီးကျယ်ကာ အဆုံးအစမရှိသော မဟာတာအိုများ ဖြစ်နေသောကြောင့်ပင်!
" မဖြစ်နိုင်ဘူး! ဒါ လုံးဝ မဖြစ်နိုင်ဘူး! "
ချူးဧကရာဇ်သည် အံ့ဩတုန်လှုပ်စွာဖြင့် မသိစိတ်အလျောက် ငြင်းဆိုလိုက်မိ၏။
ဤအရာအားလုံးသည် ဤသူမှ ဖန်တီးထားသော ပုံရိပ်ယောင်တစ်ခုသာ ဖြစ်ရမည်ဟု သူ ခံစားလိုက်ရသည်။
အကယ်၍ ကုချန်သာ မဟာတာအို ကောင်းကင်တိုင်၏ ပုံရိပ်ယောင် နှစ်ခု၊ သုံးခုခန့်ကိုသာ ဖန်တီးခဲ့မည်ဆိုလျှင် သူ အံ့ဩသွားမည်ဖြစ်သော်လည်း ဤလောကတွင် တာအို နှစ်ခု၊ သုံးခုကို တစ်ပြိုင်နက်တည်း ကျင့်ကြံနိုင်သော တည်ရှိမှုများ အမှန်တကယ် ရှိနေနိုင်သည်ဟု တွေးကာ အနည်းငယ် ယုံကြည်ကောင်း ယုံကြည်မိပေလိမ့်မည်။
သို့သော် ယခု ကုချန်၏ အသိစိတ်ပင်လယ် နက်ရှိုင်းရာမှ ထွက်ပေါ်လာသော မရေမတွက်နိုင်သည့် မဟာတာအို ကောင်းကင်တိုင်များ၏ ပုံရိပ်ယောင်များကို မြင်လိုက်ရသောအခါ သူသည် ဤအချက်ကို ချက်ချင်း ငြင်းပယ်လိုက်လေသည်။
နောက်နေတာလား။ ဒီလောကမှာ မဟာတာအို အများကြီးကို တစ်ပြိုင်နက်တည်း ကျင့်ကြံတဲ့သူ ဘယ်လိုလုပ် ရှိနိုင်မှာလဲ။ မဟာတာအို အားလုံးတောင် အဲဒီထဲမှာ ပါနေသေးတယ်!
ထိုကဲ့သို့သော လူမျိုး ဤလောကတွင် လုံးဝ မရှိနိုင်ပေ။ ထို့ကြောင့် သူ မြင်တွေ့နေရသော မြင်ကွင်းသည်လည်း ပုံရိပ်ယောင်များနှင့် အတုအယောင်များသာ ဖြစ်ရမည်။
ဤသည်ကို တွေးမိသောအခါ ချူးဧကရာဇ်၏ နှလုံးသားမှာ ချက်ချင်းပင် တည်ငြိမ်သွားခဲ့၏။
ဤအရာအားလုံးမှာ တစ်ဖက်လူမှ ဖန်တီးထားသော 'မျက်လှည့်' တစ်ခုသာ ဖြစ်နေမှတော့ ကြောက်ရွံ့နေစရာ အကြောင်းမရှိတော့ချေ။
" ဟွန်းဟွန်း... ဒီလောက် အသုံးမကျတဲ့ နည်းလမ်းတွေကို သုံးပြီး ငါအရှင်ကို လှည့်စားဖို့ ရည်ရွယ်နေတာလား... ငါအရှင် မင်းကို ပြောနိုင်တာကတော့... မင်းက အရမ်းကို ရိုးအလွန်းတယ် "
အရာအားလုံး သူ၏ထိန်းချုပ်မှုအောက်တွင် ရှိနေသည့်အလား ချူးဧကရာဇ်၏ မျက်နှာပေါ်တွင် အပြုံးတစ်ခု ပြန်လည် ပေါ်ထွက်လာခဲ့၏။
ကုချန်၏ အသိစိတ်ပင်လယ်အတွင်းရှိ အရာအားလုံးသည် သူ လိမ်ညာဖန်တီးထားသော မျက်လှည့်တစ်ခုသာ ဖြစ်ကြောင်း သူ ယုံကြည်သွားသောအခါ ပျောက်ဆုံးနေသည်မှာ ကြာမြင့်ပြီဖြစ်သော ယုံကြည်ချက်သည် သူ၏ထံသို့ ပြန်လည် ရောက်ရှိလာခဲ့လေသည်။
ဒီလူက မဟာတာအိုတွေရဲ့ ပုံရိပ်ယောင် မြင်ကွင်းနဲ့ သူ့ကို ခြောက်လှန့်ဖို့ ကြိုးစားနေတာလား... အိပ်မက်မက်နေလိုက်!
ထိုသို့ဆိုမှတော့ ငါအရှင်က မင်းရဲ့ အယောင်ဆောင်မှုကို ကိုယ်တိုင် ဖော်ထုတ်ပြီး... နတ်ဆိုးဧကရာဇ်အဆင့် တည်ရှိမှုတွေအချင်းချင်း တိုက်ခိုက်တဲ့အခါမှာ... အဲ့ဒီ အချည်းနှီး ကြွားဝါမှုတွေက လုံးဝ အသုံးမဝင်ဘူးဆိုတာ မင်းကို သေချာ သင်ခန်းစာပေးရမှာပေါ့!
" သွားစမ်း! "
ဤသည်ကို တွေးမိသောအခါ ချူးဧကရာဇ်သည် ထပ်မံ တွန့်ဆုတ်မနေတော့ဘဲ ကုချန်၏ အသိစိတ်ပင်လယ် နက်ရှိုင်းရာ၌ ရုပ်လုံးပေါ်လာသော ဖယောင်းတိုင်တာအို ကောင်းကင်တိုင်ကို ကုချန်၏ အသိစိတ်ပင်လယ် နက်ရှိုင်းရာဆီသို့ ပြင်းထန်စွာ ရိုက်ချရန် ချက်ချင်း အမိန့်ပေးလိုက်လေသည်။
သူသည် မဟာတာအို ကောင်းကင်တိုင်များ၏ ပုံရိပ်ယောင်များ အားလုံးကို ရိုက်ခွဲပစ်ကာ ဤထိပ်တိုက်ရင်ဆိုင်မှုကို လုံးဝ အဆုံးသတ်ပစ်လိုခြင်း ဖြစ်သည်။
" ဝုန်း! "
သူ၏ အသိစိတ်ပင်လယ်အတွင်းသို့ ရိုက်ချလာသော ချူးဧကရာဇ် စတေးလိုက်သည့် ဖယောင်းတိုင်တာအို ကောင်းကင်တိုင်ကို ကြည့်လျက် ကုချန်၏မျက်နှာပေါ်တွင် စိုးရိမ်ပူပန်မှု အရိပ်အယောင် တစ်စုံတစ်ရာမျှ မရှိခဲ့ချေ။
ဒီ ချူးဧကရာဇ်က တကယ်ကို ရူးနေတာပဲ!
သူ ဖန်တီးထားသော မဟာတာအို ကောင်းကင်တိုင်များ၏ ပုံရိပ်ယောင်များ အားလုံးသည် ကောင်းကင်ဘုံအလုံးစုံ အမှန်တရား နားလည်ခြင်း၏ စွမ်းအားဖြင့် စုစည်းထားခြင်း ဖြစ်သည်။ ၎င်းတို့၏စွမ်းအားသည် စစ်မှန်သော မဟာတာအိုများ၏ တစ်စိတ်တစ်ပိုင်းမျှပင် မရှိသော်ငြားလည်း ၎င်းတို့သည် အတုအယောင်များ မဟုတ်ကြပေ။
ထို မဟာတာအို ကောင်းကင်တိုင် တစ်ခုစီတိုင်းသည် မဟာတာအို တစ်ခုကို ကိုယ်စားပြုကာ အမှန်တကယ် တည်ရှိနေခြင်း ဖြစ်သည်။
ယခု ချူးဧကရာဇ်သည် သူ၏ မွေးရာပါ တာအိုကို အသုံးပြုကာ ထိပ်တိုက် ရင်ဆိုင်ရန် အမှန်တကယ် ဝံ့ရဲနေသည်တဲ့လော။ ဤသည်မှာ ရန်သူ၏ ဓားသွားပေါ်သို့ ကိုယ့်လည်ပင်းကိုယ် သွားတင်ပေးခြင်းနှင့် မည်သို့ ကွာခြားမည်နည်း။
" မင်းက သေချင်နေမှတော့ မင်းရဲ့ဆန္ဒကို ငါ ဖြည့်ဆည်းပေးရမှာပေါ့ "
ကုချန်၏စိတ်နှလုံးမှာ ရေပြင်ကဲ့သို့ တည်ငြိမ်နေခဲ့၏။ ချူးဧကရာဇ်မှာ အလွန်အမင်း စိတ်လောနေသဖြင့် မဟာတာအို ကောင်းကင်တိုင်များကို အသက်သွင်းရန်ပင် အားမထုတ်တော့ဘဲ ကုချန်မှ ဖယောင်းတိုင်တာအို ကောင်းကင်တိုင်ကို ရိုက်ချလာမည့်အချိန်ကိုသာ တိတ်ဆိတ်စွာ စောင့်ဆိုင်းနေလိုက်လေသည်။
ကုချန် မလှုပ်မယှက် နေသည်ကို မြင်သောအခါ ချူးဧကရာဇ်၏ စိတ်နှလုံးမှာ ပို၍ပင် ယုံကြည်ချက် ရှိလာခဲ့၏။
အဘယ်ကြောင့်ဆိုသော် ဤသည်မှာ လှည့်ကွက် ဖော်ထုတ်ခံလိုက်ရပြီးနောက် ဤလူ၏ မျှော်လင့်ချက်မဲ့ကာ အကူအညီမဲ့နေသော တုံ့ပြန်မှုဖြစ်သည်ဟု သူ ခံစားလိုက်ရသောကြောင့်ပင်။
မည်သို့ပင်ဆိုစေကာမူ ထို မဟာတာအို ကောင်းကင်တိုင်များသည် အတုအယောင်များသာ ဖြစ်၏။ ယခု သူ ဖော်ထုတ်လိုက်ပြီဖြစ်ရာ ဤလူအတွက် စောင့်ကြိုနေသော တစ်ခုတည်းသော လမ်းကြောင်းမှာ နာခံစွာ သေဆုံးပေးရန်သာ ဖြစ်သည်။
" ဝုန်း! "
ဖယောင်းတိုင်တာအို ကောင်းကင်တိုင်ကြီး ကျဆင်းလာကာ ကုချန်၏ အသိစိတ်ပင်လယ် နက်ရှိုင်းရာသို့ လျင်မြန်စွာ ထိုးဖောက် ဝင်ရောက်သွားလေသည်။
သို့သော် သူ၏ တာအို ကောင်းကင်တိုင်ကို ဤအဆင့်အထိ တွန်းပို့လိုက်ချိန်မှသာ ချူးဧကရာဇ်သည် တစ်စုံတစ်ခု မှားယွင်းနေကြောင်းကို ဝိုးတဝါး ခံစားလိုက်ရလေသည်။
အဘယ်ကြောင့်ဆိုသော် ထိုနေရာတွင် မတ်မတ်ရပ်နေသော ခမ်းနားကြီးကျယ်သည့် မဟာတာအို ကောင်းကင်တိုင်များသည် အလွန်တရာ အစစ်အမှန်နှင့် တူလွန်းနေသောကြောင့်ပင်။ မဟာတာအို ကောင်းကင်တိုင် တစ်ခုစီတိုင်းသည် ခမ်းနားကြီးကျယ်ပြီး အဆုံးအစမရှိသော တာအို ချီအငွေ့အသက်များကို ထုတ်လွှတ်နေကြသည်။ ထိုခံစားချက်က အတုအယောင်များနှင့် လုံးဝ မတူညီခဲ့ချေ!
သို့သော် ကိစ္စများမှာ ဤအခြေအနေသို့ ရောက်ရှိနေပြီဖြစ်ရာ လေးညှို့ပေါ်မှ မြှားတစ်စင်းကဲ့သို့ ပစ်လွှတ်ရုံသာ ရှိတော့သည်။
ချူးဧကရာဇ်သည် သွားကို တင်းတင်းကြိတ်ထားလိုက်၏။ သူ၏ ကိုယ်ပိုင် ဆုံးဖြတ်ချက်ကို သူ ယုံကြည်နေဆဲဖြစ်သည်။ ဤလောကတွင် မဟာတာအိုအားလုံးကို တစ်ပြိုင်နက်တည်း မည်သူက ကျွမ်းကျင်ပိုင်နိုင်နိုင်မည်နည်း။
ထို့ကြောင့် ဤအရာအားလုံးမှာ မျက်လှည့်တစ်ခုသာ ဖြစ်ရမည်။
" ငါအရှင်အတွက် အကုန် ကွဲထွက်သွားစမ်း!!! "
ချူးဧကရာဇ်သည် အစွမ်းကုန် ကြိုးပမ်းကာ ဖယောင်းတိုင်တာအို ကောင်းကင်တိုင်ကို အတင်းအကျပ် တွန်းအားပေး၍ မဟာတာအို ကောင်းကင်တိုင်များကြားသို့ ပြင်းထန်စွာ ရိုက်ချလိုက်လေသည်။
" ဘန်း! "
ချူးတာအို ကောင်းကင်တိုင်သည် မဟာတာအိုများကို ကိုယ်စားပြုသော ကောင်းကင်တိုင်များနှင့် ပြင်းထန်စွာ ဝင်တိုက်မိသွားသောအခါ ချူးဧကရာဇ်၏ နှလုံးသားမှာ ချက်ချင်းပင် လေးလံသွားခဲ့ပြီး ကြောက်မက်ဖွယ်ကောင်းသော အတွေးတစ်ခု သူ၏စိတ်ထဲတွင် ပေါ်ထွက်လာခဲ့၏။
ဒုက္ခပဲ!
အဘယ်ကြောင့်ဆိုသော် ကနဦး တိုက်ခိုက်မှုအပြီးတွင် ကုချန်၏ အသိစိတ်ပင်လယ် နက်ရှိုင်းရာရှိ ဤမဟာတာအို ကောင်းကင်တိုင်များသည် ပုံရိပ်ယောင်များ မဟုတ်ဘဲ အမှန်တကယ် တည်ရှိနေကြောင်းကို သူ ခန့်မှန်းသိရှိလိုက်သောကြောင့်ပင်။
တာအိုအချင်းချင်း တိုက်မိခြင်းမှ ရရှိလာသော ထိုခံစားချက်ကို လုံးဝ အတုအယောင် ဖန်တီး၍ မရနိုင်ချေ။
ဒါပေမဲ့ ဒါ ဘယ်လိုလုပ် ဖြစ်နိုင်မှာလဲ?!
ဒီလောကမှာ မဟာတာအို အားလုံးကို ဘယ်သူက ကျွမ်းကျင်ပိုင်နိုင်ထားနိုင်မှာလဲ?!