အခန်း (၉၃၉-၉၄၀)

အပိုင်း (၉၃၉) လုရှင်းနန်နှင့် နတ်ဘုရား

"စုန်းမလေး မော်လီ... နတ်ဘုရားဆိုတာ ကောင်းကင်ယံမှာ မြင့်မြင့်မားမား တောက်ပနေတဲ့ နေမင်းကြီးလိုပဲ... တိုက်ရိုက် စိုက်ကြည့်လို့ မရဘူး... သူက ခင်ဗျားကို ဘယ်လိုလုပ် လွယ်လွယ်လေး တွေ့ခွင့်ပေးမှာလဲ"

"ခင်ဗျားမှာ ပြောစရာ ကိစ္စရှိရင် ကျွန်တော့်ကို ပြောလို့ရတယ်... ကျွန်တော်က နတ်ဘုရားရဲ့ တမန်တော်... နတ်ဘုရားရဲ့ သစ္စာအရှိဆုံး ကျေးကျွန်... လုရှင်းနန် ပါ"

နတ်ဘုရားနိုင်ငံတော်၏ အထွတ်အမြတ်ကျွန်းပေါ်တွင် မော်လီက သူမရှေ့ရှိ အဖြူရောင် ဝတ်ရုံရှည် ဝတ်ဆင်ထားသော အမျိုးသားကို မော့ကြည့်ရင်း မျက်မှောင်ကြုတ်လိုက်သည်။

တစ်ဖက်လူက အပြုံးမျက်နှာဖြင့် စကားများကို သွက်လက်စွာ ပြောဆိုနေသော်လည်း... သူမသည် ဆရာလင်း၏ အမိန့်အရ နတ်ဘုရားနိုင်ငံတော်သို့ ရောက်ရှိလာသည်မှာ တစ်ရက်ရှိနေပြီ ဖြစ်သော်လည်း "နတ်ဘုရား" ၏ အရိပ်အယောင်ကိုပင် မမြင်တွေ့ရသေးပေ။

ထို့ပြင် တစ်ဖက်လူ ပေးလာသော အကြောင်းပြချက်မှာလည်း အလွန် ရယ်စရာကောင်းလှသည်။ နတ်ဘုရားသည် မြင့်မြတ်လှသဖြင့် မည်သူမဆို တွေ့ခွင့်မရှိဟု ဆိုနေခြင်းပင်။

ဤအချက်က စုန်းမ မော်လီအား ပြောစရာစကားပင် ဆွံ့အသွားစေသည်။

သူမ၏ မျက်ခွံများ အနည်းငယ် တုန်ယင်သွားပြီး အေးစက်စက် လေသံဖြင့် ပြောလိုက်သည်။ "ကျွန်မတို့ ခိုက်ရီနည်းပညာ ကုမ္ပဏီက စေတနာအပြည့်နဲ့ လာခဲ့တာပါ... ဆရာလု... ကျင်းကျိုးစစ်တပ်ရဲ့ ရည်ရွယ်ချက်ကို ရှင် ရှင်းရှင်းလင်းလင်း သိသင့်တယ်"

"သူတို့လူတွေ ကျွန်မတို့ကို လာဆက်သွယ်တာက ကျွန်မတို့နဲ့ ကျင်းကျိုးစစ်တပ် ပူးပေါင်းပြီး နတ်ဘုရားနိုင်ငံတော်ကို တောင်နဲ့မြောက် ညှပ်ပြီး တိုက်ခိုက်ချင်လို့ပဲ"

"ဒီလို အရေးကြီးတဲ့ ကိစ္စမျိုးကိုတောင် ရှင်တို့ရဲ့ နတ်ဘုရား က ကျွန်မနဲ့ ကိုယ်တိုင်ကိုယ်ကျ ထွက်ပြီး မဆွေးနွေးချင်ဘူးလား"

"ကျွန်မတို့နဲ့ ကျင်းကျိုးစစ်တပ် ပူးပေါင်းသွားမှာကို သူ တကယ်ပဲ မကြောက်တာလား"

လုရှင်းနန်က ရယ်မောလိုက်သည်။ "စုန်းမလေး... စိတ်အေးအေး ထားပါ... နတ်ဘုရားကိုယ်တိုင် ထွက်ပြီး ဆွေးနွေးမှ ရမှာလား... ကျွန်တော်နဲ့ ဆွေးနွေးတာကရော အတူတူပဲ မဟုတ်ဘူးလား"

မော်လီက မျက်မှောင်ကြုတ်လိုက်သည်။ "ရှင်က ဆုံးဖြတ်ချက် ချနိုင်လို့လား"

လုရှင်းနန်က ခေါင်းညိတ်ပြကာ ပြုံးလိုက်သည်။ "စစ်ရေးစစ်ရာမှာတော့ ကျွန်တော် အတိုင်းအတာ တစ်ခုအထိ ဆုံးဖြတ်ပိုင်ခွင့် ရှိပါတယ်"

"ကောင်းပြီလေ... ဒါဆိုရင်လည်း ကျွန်မ မေးချင်တယ်... အခုလောလောဆယ် နတ်ဘုရားနိုင်ငံတော်က ဘယ်လို စဉ်းစားထားလဲ"

လုရှင်းနန်က ပြောလိုက်သည်။ "ကျွန်တော်တို့က ခင်ဗျားတို့ ကုမ္ပဏီနဲ့ မဟာမိတ် ဖွဲ့ချင်တာပေါ့... ကျင်းကျိုးစစ်တပ်ရဲ့ ဝံပုလွေလို ရည်မှန်းချက်ကြီးမားမှုကို ဘယ်သူမဆို မြင်နိုင်တာပဲ"

"ဒီတစ်ခေါက် သူတို့က ကျွန်တော်တို့ နတ်ဘုရားနိုင်ငံတော်ကို တိုက်ခိုက်ပြီး သိမ်းပိုက်ဖို့ ကြိုးစားနေတယ်... သူတို့ရဲ့ ကျူးကျော်မှုသာ အောင်မြင်သွားရင် အနာဂတ်မှာ သေချာပေါက် တောင်ဘက်ကို ဆင်းလာလိမ့်မယ်... အဲဒီအခါကျရင် ခိုက်ရီနည်းပညာ ကုမ္ပဏီက ပထမဆုံး ထိခိုက်ခံရမယ့်သူ ဖြစ်လာမှာပဲ"

"ဒါကြောင့် ကျွန်တော်တို့ နှစ်ဖက်စလုံးမှာ မဟာမိတ်ဖွဲ့ဖို့ မူလအခြေခံ အကြောင်းရင်းတွေ ရှိနေပြီ မဟုတ်ဘူးလား"

လုရှင်းနန်က ပြုံးရွှင်စွာ ပြောလိုက်သည်။ သူ၏ စကားများအရ နတ်ဘုရားနိုင်ငံတော်နှင့် ခိုက်ရီနည်းပညာတို့ ပူးပေါင်းခြင်းသည် နှစ်ဦးနှစ်ဖက် အကျိုးရှိမည့် ကိစ္စဖြစ်ကြောင်း ပေါ်လွင်နေသည်။

သို့သော်လည်း မော်လီ ဤနေရာသို့ လာရောက် ဆွေးနွေးရခြင်းမှာ ဤစကားများကို နားထောင်ရန် မဟုတ်ပေ။

သူမက အကျိုးအမြတ် ရလိုခြင်း ဖြစ်သည်။

ထိုသို့မှ မဟုတ်လျှင် နတ်ဘုရားနိုင်ငံတော်နှင့် မဟာမိတ်ဖွဲ့ရန် မည်သည့် အကြောင်းပြချက် ရှိမည်နည်း။

မော်လီက တည်ငြိမ်သော မျက်နှာထားဖြင့် မေးလိုက်သည်။ "ဆရာလု... ကျွန်မတို့ ခိုက်ရီနည်းပညာက ဘယ်သူနဲ့ပဲ ပူးပေါင်းပူးပေါင်း နှစ်ဦးနှစ်ဖက် အကျိုးရှိမှာချည်းပါပဲ... ဒါပေမဲ့ မဟာမိတ်ဖွဲ့ချင်တယ် ဆိုမှတော့ ရှင်တို့ဘက်က စေတနာလေး နည်းနည်းလောက်တော့ ပြသင့်တယ် မဟုတ်လား"

လုရှင်းနန်သည် ချက်ချင်းပင် ဟားတိုက် ရယ်မောလိုက်လေသည်။ "စုန်းမလေး မော်လီ... ခင်ဗျားစကားက ပြောင်းပြန် ဖြစ်နေပြီ မဟုတ်လား... ခင်ဗျားတို့ ခိုက်ရီနည်းပညာဘက်က စေတနာ ပြသင့်တာလေ... ဘာပဲဖြစ်ဖြစ် မဟာမိတ်ဖွဲ့ဖို့ ကိစ္စကို ခင်ဗျားတို့ဘက်က ကျွန်တော်တို့ကို အရင်လာကမ်းလှမ်းတာ မဟုတ်ဘူးလား"

မော်လီ၏ မျက်နှာမှာ ချက်ချင်းပင် ပျက်ယွင်းသွားသည်။ သူမက လုရှင်းနန်ကို စိုက်ကြည့်ကာ အေးစက်စက် လေသံဖြင့် ပြောလိုက်သည်။ "ကျွန်မ ကိုယ်တိုင် လာခဲ့တာက ဆရာလုကို အထင်လွဲသွားစေတာပဲ"

"ဒီလိုဆိုမှတော့လည်း ထားလိုက်ပါတော့... ကျွန်မတို့ ခိုက်ရီနည်းပညာက ကျင်းကျိုးစစ်တပ်နဲ့ တိုက်ရိုက် ပူးပေါင်းလို့ ရပါတယ်... ဒါပေမဲ့ အဲဒီအချိန်ကျမှ ဆရာလု နောင်တ မရပါစေနဲ့"

စကားဆုံးသည်နှင့် မော်လီက ချက်ချင်း မတ်တတ်ထရပ်လိုက်ပြီး နောက်သို့ပင် လှည့်မကြည့်ဘဲ ထွက်ခွာသွားလေသည်။

လုရှင်းနန်၏ အပြုံးကမူ ပြောင်းလဲမသွားပေ။ သူက သူမ ထွက်ခွာသွားသည်ကိုသာ ငေးကြည့်နေလိုက်သည်။

အချိန်အနည်းငယ် ကြာပြီးနောက် မော်လီ အဓိက ခန်းမကြီးထဲမှ အမှန်တကယ် ထွက်ခွာသွားပြီး ရေပေါ်ကျွန်း ကောင်းကင်ယံထက်တွင် အလင်းတန်းတစ်ခုအဖြစ် ပြောင်းလဲ ပျောက်ကွယ်သွားသည့် အချိန်ရောက်မှသာ လုရှင်းနန်၏ အပြုံးများ တဖြည်းဖြည်း ပျောက်ကွယ်သွားကာ မျက်မှောင်ကြုတ်လာလေသည်။

"တကယ်ကြီး ထွက်သွားတာလား"

လုရှင်းနန်သည် သူ၏ ကိုယ်ပိုင် ဆုံးဖြတ်ချက်ကို အနည်းငယ် သံသယ ဝင်သွားမိသည်။

သူ ဤသို့ မာနထောင်လွှားနေရခြင်းမှာ ခိုက်ရီနည်းပညာမှ နတ်ဘုရားနိုင်ငံတော်နှင့် မဟာမိတ်ဖွဲ့ရန် ဤမျှ အလောတကြီး ရောက်လာခြင်းသည် ကျင်းကျိုးစစ်တပ်၏ ခြိမ်းခြောက်မှု ခံထားရခြင်းကြောင့် ဖြစ်နိုင်ခြေ များသည်ဟု ခန့်မှန်းထားသောကြောင့် ဖြစ်သည်။

လုရှင်းနန်သည် ခိုက်ရီနည်းပညာတွင် အမှန်တကယ် စွမ်းရည်ရှိသည်ဟု တစ်ခါမျှ မထင်ခဲ့ပေ။ နတ်ဘုရား၏ အရှေ့တွင် ထိုခိုက်ရီနည်းပညာ၏ ခေါင်းဆောင် ဂျိမ်းစ် ဆိုသူသည်လည်း အရေးပါသော လူတစ်ယောက် မဟုတ်ပေ။

ခိုက်ရီနည်းပညာ တစ်ခုလုံးသည် ယွီကျိုးပြည်နယ် ဌာနချုပ်တွင် တည်ရှိသော အင်အားစုငယ်လေး တစ်ခုမျှသာ ဖြစ်သည်။

ကျင်းကျိုးစစ်တပ်မှ လူများက အနည်းငယ် ခြိမ်းခြောက်လိုက်ရုံဖြင့် တစ်ဖက်လူကို ကြောက်လန့်သွားစေပြီး နတ်ဘုရားနိုင်ငံတော်နှင့် မဟာမိတ်ဖွဲ့ရန် အပြေးအလွှား ရောက်လာစေခဲ့ခြင်း ဖြစ်သည်။

ထို့ကြောင့် သူက ဤအခွင့်အရေးကို အသုံးချကာ သေချာပေါက် အကျပ်ကိုင်ရန် ကြိုးစားခြင်း ဖြစ်သည်။

မူလက သူ အစီအစဉ်ဆွဲထားသည်မှာ ထိုစုန်းမလေးကို အကျပ်ကိုင်နိုင်သည်နှင့် ခိုက်ရီနည်းပညာဘက်မှ ရေပေါ်ကျွန်း အနည်းဆုံး သုံးကျွန်းကို ခွဲပေးရန် တောင်းဆိုမည် ဖြစ်ပြီး ထိုသို့လုပ်ပေးမှသာ သူက နတ်ဘုရားနိုင်ငံတော် ကိုယ်စားပြုအနေဖြင့် ခိုက်ရီနည်းပညာနှင့် မဟာမိတ်ဖွဲ့မည် ဖြစ်သည်။

သို့သော်လည်း သူ တောင်းဆိုချက်များပင် မပြောရသေးခင် ထိုစုန်းမလေးက ချက်ချင်း မျက်နှာထား တင်းမာသွားလိမ့်မည်ဟု မထင်မှတ်ထားခဲ့ပေ။

စောစောက သူက တစ်ဖက်လူမှ သူ့ကို စမ်းသပ်နေသည်ဟု ထင်ခဲ့သဖြင့် တမင်တကာပင် အသံထွက်၍ မတားဆီးခဲ့ခြင်း ဖြစ်သည်။

သို့ရာတွင် ဤမျှ အချိန်တိုလေး အတွင်းမှာပင် တစ်ဖက်လူက လုံးဝ တွန့်ဆုတ်နေခြင်း မရှိဘဲ နတ်ဘုရားကျွန်းမှ တိုက်ရိုက် ထွက်ခွာသွားလိမ့်မည်ဟု သူမထင်ထားခဲ့ရာ ယခုအခါ အခြေအနေကို မည်သို့ ထိန်းချုပ်ရမည်ကိုပင် မသိတော့ပေ။

သူ အနည်းငယ် စဉ်းစားလိုက်ပြီးနောက် မလှမ်းမကမ်းရှိ အဖြူရောင် ဝတ်ရုံရှည်နှင့် အစောင့်တစ်ဦးကို အလျင်အမြန် လက်ယပ်ခေါ်လိုက်သည်။

"ချန်ချန်"

"ရှိပါတယ်... သခင်" အဖြူရောင် ဝတ်ရုံရှည်နှင့် အစောင့်က ချက်ချင်း ရှေ့တိုးလာကာ ရိုသေလေးစားစွာဖြင့် ပြန်ထူးလိုက်သည်။

လုရှင်းနန်က လေသံတိုးတိုးဖြင့် ပြောလိုက်သည်။ "မင်း အခုချက်ချင်း သူ့နောက်ကို လိုက်သွား... သူမက နတ်ဘုရားနိုင်ငံတော် နယ်နိမိတ်ထဲကနေ တကယ် ထွက်သွားပြီလား ဆိုတာ သွားကြည့်"

"ဟုတ်ကဲ့ပါ... သခင်" ချန်ချန်က ချက်ချင်း မတ်တတ်ထရပ်လိုက်ပြီး မော်လီနောက်သို့ လိုက်ရန် ပြင်လိုက်သည်။

"နေဦး"

ဤအချိန်တွင် လုရှင်းနန်က ရုတ်တရက် သူ့ကို ထပ်မံ လှမ်းတားလိုက်ခြင်း ဖြစ်သည်။

ချန်ချန်သည် အလျင်အမြန် လှည့်ကြည့်ကာ လုရှင်းနန်ကို ကြည့်လိုက်သည်။

လုရှင်းနန်က အနည်းငယ် စဉ်းစားလိုက်ပြီး ပြောလိုက်သည်။ "မင်း နောက်ထပ် အဖွဲ့တစ်ဖွဲ့ကို လွှတ်ပြီး ခိုက်ရီနည်းပညာ ကုမ္ပဏီ အနီးတစ်ဝိုက်မှာ အခြေအနေ သွားစုံစမ်းခိုင်းလိုက်... အဓိကကတော့ သူတို့နဲ့ ကျင်းကျိုးစစ်တပ် တကယ် တိုက်ပွဲဖြစ်နေပြီလား ဆိုတာ သေချာ ကြည့်ခိုင်း"

"ဟုတ်ကဲ့ပါ... သခင်"

ချန်ချန်သည် အဓိက ခန်းမကြီးထဲမှ အလျင်အမြန် ထွက်ခွာသွားလေသည်။

လုရှင်းနန်သည် ချန်ချန် ထွက်ခွာသွားသော ကျောပြင်ကို ကြည့်ရင်း အချိန်အနည်းငယ် ကြာအောင် စဉ်းစားနေလိုက်ပြီးနောက် နန်းတော်၏ အတွင်းပိုင်းသို့ လှည့်ဝင်သွားလေသည်။

နန်းတော် တစ်ခုလုံးကို ကျောက်တုံးများဖြင့် တည်ဆောက်ထားသော်လည်း မည်သည့် ဆင့်စီထားသော အရာကိုမျှ မတွေ့ရပေ။ ၎င်းသည် မြေဓာတ် အစွမ်းပိုင်ရှင် တစ်ဦးဦးက သူ၏ အစွမ်းကို အသုံးပြု၍ တိုက်ရိုက် ဖန်တီးထားခြင်း ဖြစ်ပေလိမ့်မည်။

လုရှင်းနန်သည် ဤနေရာကို အလွန် ကျွမ်းဝင်နေပုံရပြီး လမ်းတစ်လျှောက် ရှေ့ဆက်သွားရာ အချိန်တိုအတွင်းမှာပင် ခန်းမဆောင်ကြီး တစ်ခုအတွင်းသို့ ရောက်ရှိသွားလေသည်။

ခန်းမဆောင်ကြီး၏ အထက်ပိုင်းရှိ မြင့်မားသော စင်မြင့်ပေါ်တွင် တင်ပျဉ်ခွေ ထိုင်နေသော လူရိပ်တစ်ခုကို တွေ့လိုက်ရသည်။

စင်မြင့်၏ ပတ်ပတ်လည်တွင် အစေခံမိန်းကလေးများ အသင့်စောင့်ဆိုင်းနေကြပြီး ဇာခန်းဆီးများ ချထားသဖြင့် သူ၏ ကိုယ်ခန္ဓာကို ဖုံးကွယ်ထားရာ အသက်လတ်ပိုင်း အမျိုးသား တစ်ဦးဖြစ်ကြောင်း ခပ်ရေးရေးမျှသာ မြင်နိုင်လေသည်။

ထိုအသက်လတ်ပိုင်း အမျိုးသား၏ ကိုယ်ပတ်လည်တွင် မျက်စိဖြင့် မမြင်နိုင်သော အလင်းရောင်ဝန်းတစ်ခု ဖုံးလွှမ်းနေပြီး အမှန်တကယ် နတ်ဘုရားတစ်ပါးနှင့်ပင် တူနေလေသည်။

လုရှင်းနန်သည် စင်မြင့်ပေါ်ရှိ အမျိုးသားကို မြင်လိုက်ရသောအခါ သူ၏ မျက်ဝန်းများထဲတွင် ရိုသေလေးစားမှုနှင့် အလွန်အမင်း ကြည်ညိုမှု အရိပ်အယောင်များ ပေါ်ထွက်လာသည်။

"နတ်ဘုရား... ခိုက်ရီနည်းပညာက လူ ထွက်သွားပါပြီ"

စင်မြင့်ပေါ်မှ အေးစက်စက် အသံတစ်သံ ထွက်ပေါ်လာသည်။ "သွားပြီလား... သူက ငါတို့ရဲ့ တောင်းဆိုချက်ကို သဘောတူသွားလို့လား"

"မဟုတ်ပါဘူး... သူမက ကျွန်တော်တို့ရဲ့ တောင်းဆိုချက်ကို သဘောမတူတဲ့အပြင် သူမဘက်ကနေတောင် တောင်းဆိုချက်တွေ လုပ်ချင်နေတာပါ... ကျွန်တော် သဘောမတူလိုက်တော့ သူမက ဒေါသထွက်ပြီး ထွက်သွားတာပါ"

"ဟင်... ထွက်သွားပြီ" စင်မြင့်ပေါ်ရှိ အမျိုးသားသည် အနည်းငယ် အံ့အားသင့်သွားပြီး မေးလိုက်သည်။ "သူ တကယ် ထွက်သွားတာ သေချာလို့လား... ဒါမှမဟုတ် ဟန်ဆောင်နေတာလား"

"သိပ်တော့ မသေချာပါဘူး... ဒါပေမဲ့ ကျွန်တော် ချန်ချန်ကို သူ့နောက် လိုက်ဖို့ လွှတ်လိုက်ပါပြီ... ဒီမိန်းမက ဟန်ဆောင်နေတာ ဖြစ်ဖို့ များပါတယ်"

လုရှင်းနန်က ဆန်းစစ်ပြလိုက်သည်။ "ကျင်းကျိုးစစ်တပ်က ခိုက်ရီနည်းပညာဆီ သွားနေပြီဆိုတာ သိသိရက်နဲ့ သူက ကျွန်တော်တို့ဆီ လာပြီး မဟာမိတ်ဖွဲ့ချင်နေတာက... ကျင်းကျိုးစစ်တပ်က သူတို့ကို မျက်နှာသာ မပေးလို့ ဖြစ်ရမယ်"

"ပြည်သူ့ ခိုလှုံရေးစခန်းတွေအပေါ် ကျင်းကျိုးစစ်တပ်ရဲ့ သဘောထားအရ ဆိုရင် အတင်းအဓမ္မ သိမ်းယူတာ ဒါမှမဟုတ် တိုက်ရိုက် ဖျက်ဆီးပစ်တာပဲ ရှိမှာ... ခိုက်ရီနည်းပညာနဲ့ တကယ် ပူးပေါင်းဖို့ ဆိုတာ မဖြစ်နိုင်ပါဘူး"

စင်မြင့်ပေါ်ရှိ အမျိုးသားသည် ထိုစကားကို ကြားသောအခါ ပြောလိုက်သည်။ "အင်း... သူ့ နောက်ကို လိုက်ပြီး ဘယ်သွားမလဲ ဆိုတာ ကြည့်ထား... နောက်ပြီး ခိုက်ရီနည်းပညာဘက်ကိုလည်း လူလွှတ်ပြီး အခြေအနေကို သွားကြည့်ခိုင်းလိုက်ဦး... ခိုက်ရီနည်းပညာအပေါ် ကျင်းကျိုးစစ်တပ်က တကယ် ဘယ်လို သဘောထားလဲ ဆိုတာ သိရအောင်"

လုရှင်းနန်က ပြန်ဖြေလိုက်သည်။ "ကျွန်တော်မျိုး လူလွှတ်လိုက်ပါပြီ"

"မဆိုးဘူး... ဟားဟား... ကျင်းကျိုးစစ်တပ်က တကယ်ပဲ ဘာမှမပေးဆပ်လိုက်ရဘူးလို့ ငါ ထင်နေတာ"

"သူတို့က အမြဲတမ်း မာနထောင်လွှားပြီး ကျင်းကျိုး အပြင်ဘက်က အင်အားစုတွေကို တောသားတွေလိုပဲ သဘောထားတတ်ကြတာ... ဒီတစ်ခေါက် ဟုန်ထျန်ရီ ငါနဲ့ ယှဉ်တိုက်တုန်းက ဒဏ်ရာရသွားတာ ဖြစ်ဖို့များတယ်... အဲဒီလိုမှ မဟုတ်ရင် သူတို့က ငါတို့ကို ရင်ဆိုင်ဖို့ ခိုက်ရီနည်းပညာနဲ့ သွားပူးပေါင်းစရာ အကြောင်းမရှိဘူး"

လုရှင်းနန်သည် ထိုစကားကို ကြားသောအခါ မျက်လုံးများ အရောင်လက်သွားပြီး ပြောလိုက်သည်။ "ဒီလိုကိုး... ဒါဆို ကျွန်တော်တို့ တောင်ဘက်ကို ဆင်းမယ့်ကိစ္စကို ရပ်တန့်လိုက်ရမလား"

နတ်ဘုရား က ခေါင်းအနည်းငယ် ခါယမ်းလိုက်သည်။ "အစီအစဉ် မပြောင်းဘူး... တောင်ဘက်ကို ဆက်ဆင်းမယ်... ဗျူဟာမြောက် ဆုတ်ခွာကြတာပေါ့"

"ငါတို့ရဲ့ လူအင်အားက နည်းလွန်းသေးတယ်... စစ်တပ်မှာက ဟုန်ထျန်ရီ တစ်ယောက်တည်း ရှိတာ မဟုတ်ဘူး... တခြား အစွမ်းထက်တဲ့သူတွေလည်း အများကြီး ရှိသေးတယ်"

"လောလောဆယ် ငါတို့အနေနဲ့ တောင်ပိုင်းက အင်အားစုတွေကို အမြန်ဆုံး စုစည်းပြီး နတ်ဘုရားနိုင်ငံတော်ကို အင်အားကြီးမားလာအောင် လုပ်ဖို့ လိုအပ်တယ်... ဒါမှသာ ကျင်းကျိုးစစ်တပ်နဲ့ ယှဉ်ပြိုင်နိုင်မှာ"

လုရှင်းနန်သည် ထိုစကားကို ကြားသောအခါ အနည်းငယ် တွန့်ဆုတ်သွားပြီး မေးလိုက်သည်။ "ဒါဆို ခိုက်ရီနည်းပညာဘက်နဲ့ရော... ကျွန်တော်တို့ ပူးပေါင်းသင့်သလား"

နတ်ဘုရားက ခေါင်းအနည်းငယ် ခါယမ်းလိုက်ပြီး ပြောလိုက်သည်။ "ပူးပေါင်းတာ မဟုတ်ဘူး... ငါ ပြောတာက သိမ်းသွင်းပြီး အောင်နိုင်ရမှာ"

"ငါ လိုအပ်တာက တောင်ပိုင်း မဟာမိတ်အဖွဲ့ မဟုတ်ဘူး... တောင်ပိုင်း ရေလွှမ်းမိုးနေတဲ့ ကမ္ဘာကြီးကို သိမ်းပိုက်ထားနိုင်တဲ့ နတ်ဘုရားနိုင်ငံတော်ကို လိုအပ်တာ"

"ယုံကြည်မှု တစ်ခုတည်း ဖြစ်နေမှသာ လူအင်အားရဲ့ စွမ်းအားကို အမှန်တကယ် ထုတ်ဖော်ပြသနိုင်မှာ"

"ဟားဟား... မင်း စစ်တပ်ကို ကြည့်လိုက်လေ... လူဦးရေ တစ်သိန်းလောက် ရှိတယ်လို့ ထင်ရပေမဲ့ အတွင်းပိုင်း အုပ်စုကွဲ ပြဿနာတွေက အမြဲတမ်း ရှိနေတာပဲ... ဟုန်ထျန်ရီ ကိုယ်တိုင်တောင် ဒီလို အခြေအနေမျိုးကို မတားဆီးနိုင်ပါဘူး"

"သူတို့ အခု ကြီးမားတဲ့ အင်အားရှိနေသယောင် ထင်ရပေမဲ့ ဒါက အပြင်ဘက်မှာ ငါလို ရန်သူမျိုး ရှိနေလို့ သူတို့ မဖြစ်မနေ စည်းလုံးနေကြရတာ"

"တကယ်လို့ ငါသာ ဒီနေရာမှာ မရှိဘူးဆိုရင် အပြင်ဘက်က ခြိမ်းခြောက်မှု မရှိတော့တဲ့ သူတို့တွေဟာ အနှေးနဲ့အမြန်ဆိုသလို ပြိုကွဲသွားကြမှာပဲ"

လုရှင်းနန်သည် ထိုစကားကို ကြားသောအခါ အဆက်မပြတ် ခေါင်းညိတ်လိုက်ပြီး ပြောလိုက်သည်။ "နတ်ဘုရားရဲ့ ဆန်းစစ်မှုက အလွန်မှန်ကန်ပါတယ်... လူသားတွေ အကျွမ်းကျင်ဆုံးက အတွင်းရေး ပဋိပက္ခတွေပဲ... ကျင်းကျိုးဆိုတာက မူလကတည်းက အာဏာဗဟိုချက်ပဲလေ... ကပ်ဘေးမတိုင်ခင် နိုင်ငံရေးနဲ့ ယဉ်ကျေးမှု ဗဟိုဌာန ဖြစ်ခဲ့တော့ အတွင်းရေး ပြဿနာဆိုတာ သူတို့ရဲ့ ရိုးရာလိုတောင် ဖြစ်နေပြီ"

နတ်ဘုရားက ပြုံးလိုက်ပြီး ပြောလိုက်သည်။ "ကောင်းပြီ... သွားတော့... နောက်ပြီး မုန်ယာကုမ္ပဏီ က လူတွေနဲ့ သွားဆက်သွယ်လိုက်... ကျင်းရှီရုံ ကို ရှာ... ငါ သူနဲ့ စကားနည်းနည်း ပြောဖို့ လိုတယ်"

ဆက်ရန်...

အပိုင်း(၉၄၀) နတ်ဘုရား၏ အတိတ်

ရှန်းတိက ထွက်ခွာသွားသော လုရှင်းနန်၏ ကျောပြင်ကို ကြည့်ရင်း သူ၏ မျက်ဝန်းထဲတွင် တွေးတောနေသည့် အရိပ်အယောင်များ ပေါ်လွင်နေသည်။

သူ၏ ခန္ဓာကိုယ်မှာ အနည်းငယ် ဝဖြိုးနေပြီး ယခုနှစ်ဆိုလျှင် အသက် (၄၂) နှစ် ရှိနေပြီ ဖြစ်သည်။

သို့သော်လည်း သန္ဓေပြောင်းအစွမ်းများ ပေါ်ပေါက်လာပြီးနောက် အစွမ်းကို လေ့ကျင့်ပြီးချိန်တွင် သူသည် ပို၍ပင် နုပျိုလာသယောင် ရှိသည်။

ကပ်ဘေးမတိုင်မီက လူလတ်ပိုင်းအရွယ် အမျိုးသားတစ်ဦးအနေဖြင့် သူသည် ကပ်ဘေးမကျရောက်ခင်ကပင် တော်ရုံတန်ရုံ ဥစ္စာဓန ပြည့်စုံခဲ့သူ ဖြစ်သည်။

အရက်သောက်နိုင်ခြင်းနှင့် စကားပြောကောင်းခြင်းတို့ကြောင့် သူသည် အရောင်းအဝယ်လောကတွင် အောင်မြင်မှုများစွာ ရရှိခဲ့သည်။

ထို့နောက်တွင် ကိုယ်ပိုင် ကုမ္ပဏီတစ်ခုကိုပင် တည်ထောင်နိုင်ခဲ့ပြီး သူဌေးတစ်ဦး ဖြစ်လာခဲ့သည်။

သို့ရာတွင် ခြောက်လကြာ ဆက်တိုက် ရွာသွန်းခဲ့သော မိုးသည်းထန်မှုကြောင့် ရေကြီးရေလျှံမှုများ ဖြစ်ပေါ်လာပြီး သူ၏ ကုန်လှောင်ရုံမှာ ရေနစ်မြုပ်သွားကာ သိုလှောင်ထားသမျှ ကုန်ပစ္စည်းများအားလုံး ပျက်စီးဆုံးရှုံးရမည့် အခြေအနေသို့ ဆိုက်ရောက်သွားခဲ့သည်။

ထိုအချိန်က အိမ်တွင်ရှိနေသော သူမှာ အလွန်တရာ စိုးရိမ်ပူပန်နေခဲ့ပြီး ရေဘေးအပြီးတွင် သူ သေချာပေါက် ဒေဝါလီခံရတော့မည်ဟု ထင်မှတ်ခဲ့သည်။

သို့သော် သူ လုံးဝ မထင်မှတ်ထားသည်မှာ ဤမိုးကြီးက ရပ်တန့်မသွားဘဲ ကမ္ဘာပျက်မတတ် ကြီးမားသော ရေလွှမ်းမိုးမှု ကပ်ဘေးကြီးကို တိုက်ရိုက် ဖြစ်ပေါ်စေခဲ့ခြင်းပင်။

ထိုအခိုက်တွင်တော့ သူသည် ဒေဝါလီခံရမည့် ကိစ္စအတွက် ပူပန်စရာ မလိုတော့ပေ။

သို့သော်လည်း အသက်ရှင်သန်ရေးအတွက်မူ သူ ပူပန်လာရတော့သည်။

အဘယ်ကြောင့်ဆိုသော် သူက ငွေကြေးအနည်းငယ် ချမ်းသာသဖြင့် ခြံဝင်းနှင့် အိမ်ကြီးအကောင်းစားတွင် နေထိုင်ခြင်းကြောင့် ဖြစ်သည်။

ရေလွှမ်းမိုးမှု ကပ်ဘေး အစောပိုင်းကာလတွင် အစောဆုံး ရေနစ်မြုပ်သွားသည်မှာ ထိုကဲ့သို့သော လုံးချင်းအိမ်ကြီးများပင် ဖြစ်သည်။

ပို၍ ဆိုးရွားသည်မှာ သူ့တွင် အလွန်တရာ လှပသော ဇနီးတစ်ဦး ရှိနေခြင်း ဖြစ်သည်။

ဤဇနီးသည်မှာ သူ ဇနီးဟောင်းနှင့် ကွာရှင်းပြီးနောက်မှ ရရှိခဲ့သူဖြစ်ကာ ငယ်ရွယ်လှပပြီး တက်ကြွမှုရှိသော်လည်း ငွေမက်သည့် အကျင့်လေးတော့ ရှိသည်။

ထိုစဉ်က ရေကြီးရေလျှံမှု စတင်ပြီး နှစ်လပင် မပြည့်သေးချိန်တွင် ခြံဝင်းအိမ်ရာများရှိရာ ရပ်ကွက်မှာ လူနေထိုင်၍ မရနိုင်တော့ပေ။

အခြား ရွေးချယ်စရာ မရှိတော့သဖြင့် ရှန်းတိက သူ၏ ဇနီးချောလေးကို ခေါ်ဆောင်ကာ သစ်သားပြားတစ်ချပ်ကို ရှာဖွေပြီး အသက်ကယ်အင်္ကျီများကို ဝတ်ဆင်လျက် အနီးအနားရှိ တောင်ပေါ်သို့ လှော်ခတ်သွားခဲ့သည်။

ကံကောင်းသည်မှာ သူ၏အိမ်က စောစီးစွာ ရေနစ်မြုပ်သွားခဲ့သဖြင့် သူတို့ ထွက်ပြေးချိန်မှာ အချိန်မီသွားခဲ့ခြင်းပင်။

ထို့ကြောင့် နောက်ပိုင်းတွင် ရေမျက်နှာပြင် ဆက်လက်မြင့်တက်လာပြီး ရေထဲ၌ သန္ဓေပြောင်း သတ္တဝါ အမြောက်အမြား ပေါ်လာချိန်တွင် သူက တောင်ပေါ်သို့ ရောက်ရှိနေပြီ ဖြစ်သည်။

သူသည် ရေဘေးကြီးကို အောင်မြင်စွာ ရှောင်ရှားနိုင်ခဲ့ပြီး ထိုတောင်ပေါ်တွင် အစောဆုံး အခြေချနေထိုင်သူများထဲမှ တစ်ဦး ဖြစ်လာရုံသာမက နောက်ပိုင်းတွင် သူ၏ အဟောအပြောကောင်းမှုကြောင့် လူအများအပြားကို သူ့နောက်သို့ လိုက်ပါလာစေရန် စည်းရုံးနိုင်ခဲ့သည်။

သူ့နောက်သို့ လိုက်ပါသူများပြားလာသည်နှင့်အမျှ အင်အားစုငယ်လေး တစ်ခု တဖြည်းဖြည်း ပေါ်ပေါက်လာခဲ့သည်။

သို့သော် နောက်ပိုင်းတွင် ရေကြီးမှုမှာ ပိုမိုဆိုးရွားလာပြီး တောင်ပေါ်သို့ တက်လာသူများလည်း ပို၍များပြားလာသည်။

နောက်ကျမှ တောင်ပေါ်သို့ တက်လာသူများမှာ အခြေခံအားဖြင့် ရက်စက်ကြမ်းကြုတ်သူများချည်း ဖြစ်ကြသည်။

အဘယ်ကြောင့်ဆိုသော် ထိုကဲ့သို့သော လူများသည် အစောပိုင်းကာလက တိုက်အဆောက်အအုံများအတွင်း ရှင်သန်နိုင်ခဲ့သူများဖြစ်ရာ ယေဘုယျအားဖြင့် ရက်စက်တတ်သူများ ဖြစ်နေသောကြောင့်ပင်။

ဤလူများက ရှန်းတိ၏ နောက်သို့ ရိုးရိုးသားသား လိုက်ပါကြမည် မဟုတ်သည်မှာ သဘာဝပင် ဖြစ်သည်။

တောင့်တင်းခိုင်မာသော ခန္ဓာကိုယ်ရှိသည့် လူအချို့ကဆိုလျှင် ပြဿနာများကိုပင် မကြာခဏ ဖန်တီးတတ်ကြသည်။

တစ်နေ့တွင် အနီးအနားရှိ အင်အားစုငယ်လေးတစ်ခု၏ ခေါင်းဆောင်က သန္ဓေပြောင်းအစွမ်းကို ရုတ်တရက် နိုးထလာခဲ့ရာ ထိုတောင်ပေါ်ရှိ အင်အားစုများ၏ အနေအထားမှာ ချက်ချင်းပင် ကြီးမားစွာ ပြောင်းလဲသွားတော့သည်။

ထိုသူသည် လူတိုင်းက အလုအယက် သစ္စာခံချင်ကြသည့် ပုဂ္ဂိုလ်ဖြစ်လာပြီး သူကလည်း အလွန်လျင်မြန်သော အရှိန်အဟုန်ဖြင့် တောင်ပေါ်ရှိ သူ့ကို ဆန့်ကျင်သူအားလုံးကို သုတ်သင်ရှင်းလင်းပစ်ခဲ့သည်။

မကျေနပ်သူများကို အခြေခံအားဖြင့် ရိုက်သတ်ပစ်ခြင်း (သို့မဟုတ်) ရေထဲသို့ တိုက်ရိုက် ပစ်ချခြင်းများ ပြုလုပ်ခဲ့သည်။

ရှန်းတိက ပါးနပ်သူတစ်ဦးဖြစ်ရာ သူက ပထမဆုံး အချိန်မှာပင် လက်နက်ချရန် ရွေးချယ်ခဲ့ပြီး ထိုသူ့ထံသို့ ခိုလှုံခဲ့သည်။

အပေးအယူ အနေဖြင့် သူ၏ လှပသော ဇနီးချောလေးကို ပေးအပ်ခဲ့ရသည်။

သို့သော် သူ၏ ဇနီးမှာ ငွေမက်သူဖြစ်ရာ ဇိမ်ကျကျ နေထိုင်ရမည့် ဘဝကို ရရှိရန်အတွက် ရှန်းတိအပေါ် မည်သည့် သံယောဇဉ်မျှ မထားတော့ဘဲ ထိုအစွမ်းပိုင်ရှင်နောက်သို့ ဝမ်းသာအားရ လိုက်ပါသွားခဲ့သည်။

ထို့နောက်ပိုင်း သန္ဓေပြောင်းအစွမ်း နိုးထလာသူများ ပိုများလာသည်နှင့်အမျှ တောင်ပေါ်တွင် အာဏာလုပွဲ တိုက်ပွဲများ အကြိမ်ကြိမ် ဖြစ်ပွားခဲ့သည်။

ရှန်းတိ၏ ဇနီးချောလေးမှာ ဤအာဏာ အပြောင်းအလဲများကြားတွင် ယောက်ျား အတော်များများကို ပြောင်းလဲခဲ့ရသော်လည်း အခြေအနေကောင်းတစ်ခုကို ဖန်တီးနိုင်ခဲ့ပြီး လူတစ်စုကို ဦးဆောင်ကာ သူမကိုယ်တိုင် ခေါင်းဆောင် ဖြစ်လာခဲ့သည်။

ရှန်းတိက သူမ၏ ခင်ပွန်းဟောင်း ဖြစ်သည့်အတွက် သူမက ရှန်းတိကို ဒုက္ခမပေးခဲ့ဘဲ သူမ၏ အဖွဲ့ထဲသို့ ခေါ်ယူကာ သူမအတွက် အလုပ်လုပ်ပေးစေခဲ့သည်။

သို့သော် ဤမိန်းမသည် အမျိုးသားများ၏ ကစားစရာအဖြစ် အဆက်မပြတ် နေခဲ့ရသော ထိုကာလအတွင်း စိတ်ပိုင်းဆိုင်ရာ ဖောက်ပြန်မှုများ ဖြစ်ပေါ်လာခဲ့ပြီး ပုံမှန်မဟုတ်သော လုပ်ရပ်များကို မကြာခဏ ပြုလုပ်တတ်လာသည်။

ထိုအထဲမှ အဆိုးရွားဆုံး ကိစ္စတစ်ခုမှာ သူမသည် ရှန်းတိအား သူမနှင့် အခြားအမျိုးသားများ အတူအိပ်စက်သည်ကို အတင်းအဓမ္မ ကြည့်ရှုခိုင်းကာ တမင်သက်သက် နှိပ်စက်ခြင်းပင် ဖြစ်သည်။

ဤနည်းလမ်းဖြင့် သူမသည် အစောပိုင်းက ထိုအစွမ်းပိုင်ရှင်ထံသို့ သူမကို ပေးအပ်ခဲ့သော ရှန်းတိအား လက်စားချေလိုဟန် ရှိသည်။

ရှန်းတိမှာ စိတ်ထဲတွင် ဒေါသထွက်နေသော်လည်း ဘာမှ မတတ်နိုင်ခဲ့ပေ။

သို့သော် မကြာမီမှာပင် အချိုးအကွေ့ တစ်ခု ရောက်ရှိလာခဲ့သည်။ သူ၏ အစွမ်းမှာ နိုးထလာခဲ့ပြီး သူရရှိသော အစွမ်းမှာလည်း အလွန်ထူးခြားလှသည်။

သူ နိုးထလာသော အစွမ်းကို အားကိုး၍ အနီးအနားရှိ တောင်အောက်မှ တိုက်မြင့်များအတွင်း၌ တပည့်များကို တိတ်တဆိတ် မွေးမြူကာ ဘာသာရေးဂိုဏ်းကို ဖြန့်ကျက်ခဲ့သည်။

တစ်နေ့တွင် သူ၏ စွမ်းအားသည် တောင်ပေါ်ရှိ အစွမ်းပိုင်ရှင်များအားလုံးကို ကျော်လွန်သွားခဲ့သည်။

ထိုအခါ သူက တိုက်အဆောက်အအုံများအတွင်းရှိ တပည့်များကို ဦးဆောင်ကာ တောင်ပေါ်သို့ ပြန်လည် တိုက်ခိုက်ခဲ့လေသည်။

သူသည် ယခင်က ရန်သူများကို သုတ်သင်ရှင်းလင်းပစ်ရုံသာမက သူ၏ ဇနီးဖြစ်သူကိုပါ မချမ်းသာပေးတော့ဘဲ တိုက်ရိုက်သတ်ဖြတ်ကာ ရင်ထဲမှ အငြိုးကို ဖြေဖျောက်ခဲ့သည်။

ထိုအချိန်မှစ၍ သူ၏ နတ်ဘုရား ပုံရိပ်ကို ထိန်းသိမ်းထားရန်အတွက် သူသည် အပြင်ထွက်ခြင်းကို လျှော့ချခဲ့ပြီး လူတိုင်းအား ခိုလှုံရန် ရောက်ရှိလာသော ဒုက္ခသည်များကို လှိုက်လှိုက်လှဲလှဲ ကြိုဆိုလက်ခံစေခဲ့သည်။

တောင်ပေါ်သို့ ထွက်ပြေးခိုလှုံလာသူများ ပိုများလာသည်နှင့်အမျှ သူ့ကို "နတ်ဘုရား" အဖြစ် ယုံကြည်ကိုးကွယ်သူများလည်း ပိုမို များပြားလာခဲ့သည်။

မည်သည့်အချိန်က စတင်ခဲ့မှန်း မသိသော်လည်း သူသည် လူတိုင်း၏ စိတ်နှလုံးထဲတွင် အရာရာကို စွမ်းဆောင်နိုင်သော နတ်ဘုရားတစ်ပါး အမှန်တကယ် ဖြစ်လာခဲ့သည်။

ကောင်းကင်မှ မိုးသက်မုန်တိုင်းများကို ရပ်တန့်အောင် မလုပ်နိုင်ခြင်း၊ ရေဘေးကို ကျဆင်းသွားအောင် မလုပ်နိုင်ခြင်းမှလွဲ၍ သူသည် လူတိုင်း တောင်းဆိုသမျှကို လုပ်ဆောင်ပေးနိုင်ပုံ ပေါ်သည်။

ထို့ကြောင့် သူ၏ ဩဇာတိက္ကမမှာ ပိုမို မြင့်မားလာပြီး နတ်ကွန်းထဲတွင် မြင့်မြတ်စွာ ထိုင်ကာ ဤကဲ့သို့သော အာဏာကို ချုပ်ကိုင်ထားရသည့် ခံစားချက်ကို သာယာကြည်နူးနေခဲ့သည်။

ရေပေါ်ကျွန်းများနှင့် လေပေါ်ကျွန်းများ ပေါ်ပေါက်လာသည်နှင့်အမျှ နတ်ဘုရားနိုင်ငံတော်ကို တည်ထောင်နိုင်ခဲ့ပြီး နတ်ဘုရားနိုင်ငံတော်၏ ပိုင်နက်နယ်မြေမှာ ပိုမို ကြီးမားလာကာ အဆက်မပြတ် တိုးချဲ့လာနိုင်ခဲ့သည်။

ယွီကျိုးပြည်နယ် အလယ်ပိုင်းအထိ တိုးချဲ့လာချိန်တွင်တော့ ခိုက်ရီနည်းပညာ အဖွဲ့နှင့် ရင်ဆိုင်ခဲ့ရသည်။

ထိုအချိန်က ခိုက်ရီနည်းပညာသည် အစွမ်းပိုင်ရှင်များ အားကောင်းရုံသာမက သင်္ကေတနည်းပညာ ဖွံ့ဖြိုးတိုးတက်မှုမှာလည်း နတ်ဘုရားနိုင်ငံတော်ထက် ပိုမို သာလွန်နေခဲ့သည်။

ရှန်းတိက ဂျိမ်းစ်နှင့် တစ်ကြိမ် တိုက်ခိုက်ဖူးရာ ဂျိမ်းစ်က သူ၏ အစွမ်းကို တားဆီးချေဖျက်နိုင်ကြောင်းကို အံ့သြထိတ်လန့်စွာ တွေ့ရှိခဲ့ရသည်။

ထိုအကြိမ်က သူသည် အလွန် ဆိုးရွားစွာ ရှုံးနိမ့်ခဲ့ပြီး သီသီလေးသာ လွတ်မြောက်လာခဲ့ရသည်။

ထိုအချိန်မှစ၍ သူသည် ဂျိမ်းစ်နှင့် ခိုက်ရီနည်းပညာကို ထပ်မံ ရန်စခြင်း မပြုတော့ပေ။

သို့သော် သူ အပြင်မထွက်သော်လည်း သူ့ထံသို့ ပြဿနာလာရှာသူ ရှိလာခဲ့သည်။

ကျင်းရှီရုံ၏ မုန်ယာကုမ္ပဏီမှာ လျင်မြန်စွာ ဖွံ့ဖြိုးလာခဲ့ပြီး ခိုက်ရီနည်းပညာနှင့် ပဋိပက္ခ ဖြစ်ပွားပြီးနောက် ဂျိမ်းစ်၏ အစွမ်းသတ္တိကို မျက်ဝါးထင်ထင် တွေ့မြင်ခဲ့ရသဖြင့် သူသည် ခိုက်ရီနည်းပညာကို ရှောင်ကွင်းကာ နတ်ဘုရားနိုင်ငံတော်ကို တိုက်ခိုက်ပြီး နယ်မြေတိုးချဲ့ရန် ပြင်ဆင်ခဲ့သည်။

ထို့ကြောင့် နတ်ဘုရားနိုင်ငံတော်၏ "နတ်ဘုရား" တစ်ပါးအနေဖြင့် ရှန်းတိက ကျင်းရှီရုံကို နတ်ဘုရားနိုင်ငံတော်အား အလွယ်တကူ တိုက်ခိုက်ခွင့်ပြုမည် မဟုတ်သည်မှာ သဘာဝပင်။

သူတို့နှစ်ဦးသည် နတ်ဘုရားနိုင်ငံတော်ရှိ နတ်ဘုရားကျွန်းပေါ်တွင် တိုက်ခိုက်ခဲ့ကြပြီး ရှန်းတိက ကျင်းရှီရုံကို တစ်ချက်တည်းဖြင့် အနိုင်ယူနိုင်ခဲ့သည်။

သို့သော် ထိုအချိန်က ကျင်းရှီရုံသည် ကိုယ်ပွားအစွမ်းကို ပုံတူကူးချထားပြီးဖြစ်ရာ တိုက်ခိုက်ရန် စေလွှတ်ခဲ့သည်မှာ သူ၏ ကိုယ်ပွားတစ်ခုသာ ဖြစ်သည်။

ရှန်းတိက ကျင်းရှီရုံ၏ ကိုယ်ပွားကို သတ်ဖြတ်လိုက်ခြင်းကြောင့် ကျင်းရှီရုံမှာ အံ့သြဒေါသထွက်သွားခဲ့ပြီး လတ်တလောတွင် နတ်ဘုရားနိုင်ငံတော်ကို အလွယ်တကူ ထပ်မံ မကျူးကျော်ရဲတော့ပေ။

ထို့ကြောင့် မုန်ယာကုမ္ပဏီလည်း ငြိမ်သက်သွားပြီး တောင်ဘက်သို့ လှည့်၍ ဖွံ့ဖြိုးရန် ဆုံးဖြတ်လိုက်သည်။

ဤသို့ဖြင့် ယွီကျိုးပြည်နယ်သည် အင်အားစုကြီး သုံးခု အပြိုင်အဆိုင် ရပ်တည်နေသော အနေအထားသို့ လုံးဝ ရောက်ရှိသွားခဲ့သည်။

ရှန်းတိသည် တောင်ဘက်တွင် ခိုက်ရီနည်းပညာနှင့် မုန်ယာကုမ္ပဏီ ဟူသော အင်အားစုကြီးနှစ်ခု ရှိနေခြင်းကြောင့် တောင်ဘက်သို့ နယ်မြေတိုးချဲ့ရန် မဖြစ်နိုင်တော့သဖြင့် မြောက်ဘက်သို့ တိုးချဲ့ရန် ဆုံးဖြတ်လိုက်သည်။

သို့သော် သူ နယ်မြေတိုးချဲ့သည်မှာ တစ်လပင် မပြည့်သေးချိန်တွင် ကျင်းကျိုး စစ်တပ်၏ အာရုံစိုက်မှုကို ခံလိုက်ရသည်။

ထို့ကြောင့် နတ်ဘုရားနိုင်ငံတော်နှင့် ကျင်းကျိုး စစ်တပ်တို့အကြား ပဋိပက္ခများ ဖြစ်ပွားခဲ့ပြီး နှစ်ဖက်စလုံးက နောက်မဆုတ်ကြသဖြင့် ယနေ့အခြေအနေသို့ ရောက်ရှိလာခြင်း ဖြစ်သည်။

ရှန်းတိသည် တွေးတောနေရာမှ သတိပြန်ဝင်လာပြီး ခေါင်းကို အနည်းငယ် ရမ်းကာ တိုးတိုးလေး ရေရွတ်လိုက်သည်။ "ကျင်းကျိုး စစ်တပ်ရဲ့ သင်္ကေတနည်းပညာက အရမ်း အစွမ်းထက်တာပဲ... ဟင်းလင်းပြင် နေရာရွှေ့ပြောင်းခြင်း နည်းပညာကိုတောင် တီထွင်နိုင်နေကြပြီ"

"သူတို့က တကယ်ပဲ အာကာသထဲကို ချီတက်တော့မှာလား"

ထိုသို့ တွေးမိပြီးနောက် ရှန်းတိက ခေါင်းမော့ကာ ကောင်းကင်ကို ကြည့်လိုက်သည်။

သူ၏ အကြည့်များသည် နန်းတော်ခေါင်မိုးကို ဖောက်ထွင်းပြီး အဆုံးအစမဲ့သော ဟင်းလင်းပြင်ကြီးကို ကြည့်နေသည့်အလား ပေါ်လွင်နေသည်။

"ဒီစကြဝဠာမြစ်ကြီးက တကယ်တော့ ဘာကြီးလဲ... သူက ဘယ်ကနေ ရောက်လာတာလဲ"

...

ကျင်းကျိုး၊ ကြယ်နီကျွန်း။

ဤသည်မှာ ကျင်းကျိုးမှ ဟုန်ထျန်ယိ၏ လေပေါ်ကျွန်းဖြစ်ပြီး တစ်ချိန်တည်းမှာပင် ယခုအခါ တစ်ခုလုံးသော ကျင်းကျိုး စစ်တပ်၏ ဗဟို စုဝေးရာ နေရာလည်း ဖြစ်သည်။

ကြယ်နီကျွန်းသည် အလွန်တရာ ကြီးမားလှပြီး ၎င်း၏ ဧရိယာမှာ မြို့နယ်တစ်ခုစာ အကျယ်အဝန်းခန့် ရှိသည်။

ဤကျွန်းတွင် ကြယ်နီ သတ္တုရိုင်း ဟုခေါ်သော အထူး သတ္တုရိုင်းတစ်မျိုး အများအပြား ထွက်ရှိသည်။

ထိုသတ္တုရိုင်းကို ကြိုချက်၍ အထူး ကြယ်နီသတ္တုကို ရရှိနိုင်ပြီး ၎င်းတွင် သိပ်သည်းဆ ပေါ့ပါးခြင်း၊ သန္ဓေပြောင်းစွမ်းအင် စီးဆင်းနိုင်မှုနှုန်း မြင့်မားခြင်း၊ ဆန့်ထွက်နိုင်စွမ်း ကောင်းမွန်ခြင်း စသည့် အားသာချက်များစွာ ရှိသည်။

အရေးအကြီးဆုံးမှာ ထိုသတ္တုရိုင်းသည် ယခုအခါ အာကာသယာဉ်များ တည်ဆောက်ရာတွင် အသုံးပြုသည့် အဓိက ကုန်ကြမ်းပစ္စည်း ဖြစ်နေခြင်းပင်။

သေချာပေါက် လေပေါ်ကျွန်း တစ်ကျွန်းမှ သတ္တုရိုင်းများ ထွက်ရှိနိုင်ခြင်း၏ အဓိက အကြောင်းရင်းမှာ ထိုလေပေါ်ကျွန်း၏ မူလ ဧရာမ အလောင်းကောင်ကြီးတွင် ၎င်းနှင့် သက်ဆိုင်သော အရည်အသွေးများ ရှိနေသောကြောင့် ဖြစ်သည်။

ကျင်းကျိုး စစ်တပ်၏ အာကာသယာဉ် တည်ဆောက်ရေး စခန်းကို ယခုအခါ ဤကြယ်နီကျွန်းပေါ်တွင် တည်ဆောက်ထားခြင်း ဖြစ်သည်။

ဟုန်ထျန်ယိက အစည်းအဝေးခန်းမထဲတွင် ထိုင်နေပြီး သူ၏ အောက်တွင် တပ်နယ်အသီးသီးမှ လာရောက်ကြသော စစ်ဘက်ဆိုင်ရာ ဗိုလ်ချုပ်များ ရှိနေကြသည်။

ဤလူများအားလုံးက ဗိုလ်ချုပ်များဟု မိမိကိုယ်ကိုယ် ခံယူထားကြပြီး သူတို့၏ လက်အောက်တွင် ကိုယ်ပိုင် တပ်ဖွဲ့များနှင့် ပိုင်နက်နယ်မြေများ အသီးသီး ရှိကြသည်။

ဟုန်ထျန်ယိက လေးနက်သော အသံဖြင့် စကားစလိုက်သည်။ "လူကြီးမင်းတို့... နတ်ဘုရားနိုင်ငံတော်က အခုဆိုရင် သိသိသာသာ ဆုတ်ခွာမယ့် အရိပ်အယောင်တွေ ရှိနေပြီ... အခုက တိုက်ခိုက်ဖို့ အကောင်းဆုံး အချိန်ပဲ... ကျွန်တော်တို့ စစ်တပ်နဲ့ ပူးပေါင်းဖို့ ခိုက်ရီနည်းပညာကို သဘောတူအောင် ပြောနိုင်တာနဲ့ နတ်ဘုရားနိုင်ငံတော် မိစ္ဆာဂိုဏ်းကို တစ်ကြိမ်တည်းနဲ့ သုတ်သင်ပစ်နိုင်မှာ သေချာတယ်"

သူ၏ စကားဆုံးသည်နှင့် အောက်ရှိ လူအများအပြားက ခေါင်းညိတ် ထောက်ခံလိုက်ကြသည်။

စစ်ဝတ်စုံ ဝတ်ဆင်ထားသော လူလတ်ပိုင်း အမျိုးသားတစ်ဦးက ဝင်ပြောလိုက်သည်။ "မိစ္ဆာဂိုဏ်းက သောင်းကျန်းနေတာ... ကျွန်တော်တို့ ကျင်းကျိုးမှာတောင် ဘာသာရေး လာဖြန့်ရဲတယ်ဆိုတော့ လုံးဝ သည်းခံလို့ မရဘူး"

"အခု သူတို့ကို ကျွန်တော်တို့ တစ်ကြိမ် ဆုတ်ခွာသွားအောင် တိုက်ထုတ်နိုင်ခဲ့ပြီ... ဒါပေမဲ့ ဒီလို အင်အားစုမျိုးက အရိုးထဲစွဲနေတဲ့ အဆိပ်လိုပဲ... လုံးဝ ပြတ်ပြတ်သားသား မဖြေရှင်းနိုင်ဘဲ သူတို့ကို တဖြည်းဖြည်း ဖွံ့ဖြိုးလာအောင် ဆက်ပြီး လွှတ်ထားမယ်ဆိုရင် နောက်ဆုံးမှာ သေချာပေါက် အန္တရာယ်ကြီး ဖြစ်လာလိမ့်မယ်"

"ဒါကြောင့် ဗိုလ်ချုပ်ဟုန်ရဲ့ အကြံပြုချက်ကို ကျွန်တော်လည်း သဘောတူတယ်... ဒီတစ်ကြိမ်မှာ နတ်ဘုရားနိုင်ငံတော် ဆိုတဲ့ မိစ္ဆာဂိုဏ်းကို မဖြစ်မနေ သုတ်သင်ပစ်ရမယ်"

သူ ပြောပြီးနောက် အခြားလူများကလည်း အသီးသီး ခေါင်းညိတ် သဘောတူလိုက်ကြပြီး သူတို့၏ အမြင်များကို ချက်ချင်း ထုတ်ဖော်ပြောဆိုလာကြသည်။

"မိစ္ဆာဂိုဏ်းကို လွှတ်ထားလို့ မရဘူး... အမြစ်ပြတ် သုတ်သင်ပစ်ရမယ်"

"အရင်က မသိခဲ့လို့ ထားလိုက်ပါတော့... အခု ဒီမိစ္ဆာဂိုဏ်းက ကျွန်တော်တို့ မျက်စိအောက်မှာတင် ရှိနေတာ... ကျွန်တော်တို့ စစ်တပ်ထဲကိုတောင် ထိုးဖောက်ဝင်ရောက်လာရဲသေးတယ်... ဘယ်လိုလုပ် သည်းခံနိုင်မှာလဲ... သူတို့ကို မဖြစ်မနေ ဖျက်ဆီးပစ်ရမယ်"

......

ဟုန်ထျန်ယိက လူအများအပြား သူ၏ အကြံပြုချက်ကို သဘောတူကြသည်ကို မြင်သောအခါ ချက်ချင်းပင် ရယ်မောလိုက်သည်။

သူက စားပွဲကို ခေါက်လိုက်ပြီး ပြောလိုက်သည်။ "အားလုံးရဲ့ သဘောထား တူညီကြမှတော့ ကျွန်တော်တို့ တိုက်ခိုက်ရေး စီမံချက်ကို ခွဲဝေလိုက်ကြရအောင်"

"အင်းပေါ့... ခိုက်ရီနည်းပညာ ဘက်ကတော့ ကျွန်တော်တို့ရဲ့ ဒီတိုက်ပွဲအတွက် အရေးကြီးတဲ့ အစိတ်အပိုင်းပဲ... အဲဒီလိုမှ မဟုတ်ရင် နတ်ဘုရားနိုင်ငံတော် မိစ္ဆာဂိုဏ်းက အချိန်မရွေး တောင်ဘက်ကို ဆုတ်ခွာသွားနိုင်တယ်"

"မြွေကိုသတ်ရင် မသေမချင်း သတ်ရတယ်... မဟုတ်ရင် ပြန်ကိုက်ခံရလိမ့်မယ်... ကျွန်တော်တို့က တစ်ချက်တည်းနဲ့ အသေအလဲ တိုက်ခိုက်နိုင်ဖို့ လိုအပ်တယ်... နတ်ဘုရားနိုင်ငံတော်လို မိစ္ဆာဂိုဏ်းကို တောင်ဘက်ဆီ လုံးဝ ထွက်ပြေးခွင့် မပေးနိုင်ဘူး"

ဆက်ရန်...

နောက်တစ်အုပ်မှာတော့... လင်းယွမ်တို့က ကျင်းကျိုး စစ်တပ်ကို ဘယ်လိုရင်ဆိုင်မလဲ၊ ကျင်းကျိုး စစ်တပ်က ဘာလို့အာကာသယာဉ်ကို အပြင်းအထန်တီထွင်နေရတာလဲ၊ သူတို့ ကမ္ဘာ့အပြင်နဲ့ ရေဘေးကြီးနဲ့ပါတ်သတ်ပြီး အရေးကြီးတဲ့တစ်ခုခုသိထားတာများလား၊ ရှေးဟောင်းအမွေအနစ်တွေကနေ သူတို့ဘယ်လိုလျှို့ဝှက်ချက်တွေရလိုက်လဲ၊ နတ်ဘုရားနိုင်ငံတော်က နတ်ဘုရားရဲ့အစွမ်းကရော တကယ်တမ်းဘယ်လိုမျိုးလဲ၊ ဘာလို့ဦးနှောက်ဆေး ရိုက်သွင်းတာမျိုး မရှိပဲ လူတွေသူ့ကိုအရမ်းယုံကြတာလဲ၊ လင်းယွမ်က ဒီ အင်အားစုနှစ်ခုနဲ့ဘယ်လိုရင်ဆိုင်မှာလဲ၊ စကြဝဠာထဲက ကြယ်နတ်ဘုရားအဆင့် သားရဲရော ကမ္ဘာကို ရောက်လာနိုင်လား၊ လင်းယွမ်ကရော ကြယ်နတ်ဘုရားအဆင့်ကို တက်သွားနိုင်မှာလား စတာတွေကို ဆက်ပြီးစောင့်မျှော်ဖတ်ရှုကြပါဦးနော်။

တစ်လက်စတည်း မင်မင် နောက်ထပ် တစ်အုပ်ရေးဖို့လည်း လုပ်ထားပါတယ်။ ကမ္ဘာပျက်ဇာတ်လမ်းဖြစ်ရင်ဖြစ် မဟုတ်ရင်အခုခေတ်ကိုမှ အစွမ်းတွေပါတဲ့ဟာ ဖြစ်ဖို့များတယ်။ ဇာတ်လမ်းကတော့ မပူနဲ့မကောင်းတဲ့ဇာတ်လမ်းကို ယူမပြန်ပါဘူး။ အဲ့ခါကျရင်လည်း အားပေးကြဦးနော်။ အခုထိအားပေးလာကြတဲ့သူတွေအားလုံးကို ကျေးဇူးအထူးတင်ပါတယ်။